{"id":"pp2.3","title":"3. Tikapuggalapaññatti","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"pp2.3","title":"3. Tikapuggalapaññatti","units":[{"id":"pp2.3:0","sourceIds":["pp2.3:0.1","pp2.3:0.2","pp2.3:0.3"],"kind":"text","text":{"pi":"Puggalapaññatti\nNiddesa\n3. Tikapuggalapaññatti"}},{"id":"pp2.3:1","sourceIds":["pp2.3:1.1","pp2.3:1.2","pp2.3:1.3","pp2.3:1.4","pp2.3:1.5","pp2.3:1.6","pp2.3:1.7"],"kind":"text","text":{"pi":"Katamo ca puggalo nirāso?\nIdhekacco puggalo dussīlo hoti pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto.\nSo suṇāti—\n“itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī”ti.\nTassa na evaṁ hoti—\n“kudāssu nāmāhampi āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissāmī”ti.\nAyaṁ vuccati puggalo “nirāso”."}},{"id":"pp2.3:2","sourceIds":["pp2.3:2.1","pp2.3:2.2","pp2.3:2.3","pp2.3:2.4","pp2.3:2.5","pp2.3:2.6","pp2.3:2.7"],"kind":"text","text":{"pi":"Katamo ca puggalo āsaṁso?\nIdhekacco puggalo sīlavā hoti kalyāṇadhammo.\nSo suṇāti—\n“itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī”ti.\nTassa evaṁ hoti—\n“kudāssu nāmāhampi āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissāmī”ti.\nAyaṁ vuccati puggalo “āsaṁso”."}},{"id":"pp2.3:3","sourceIds":["pp2.3:3.1","pp2.3:3.2","pp2.3:3.3","pp2.3:3.4","pp2.3:3.5","pp2.3:3.6","pp2.3:3.7","pp2.3:3.8","pp2.3:3.9"],"kind":"text","text":{"pi":"Katamo ca puggalo vigatāso?\nIdhekacco puggalo āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.\nSo suṇāti—\n“itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī”ti.\nTassa na evaṁ hoti—\n“kudāssu nāmāhampi āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissāmī”ti.\nTaṁ kissa hetu?\nYā hissa pubbe avimuttassa vimuttāsā, sā paṭippassaddhā.\nAyaṁ vuccati puggalo “vigatāso”."}},{"id":"pp2.3:4","sourceIds":["pp2.3:4.1","pp2.3:4.2","pp2.3:4.3"],"kind":"text","text":{"pi":"Tattha katame tayo gilānūpamā puggalā?\nTayo gilānā—\nidhekacco gilāno labhanto vā sappāyāni bhojanāni alabhanto vā sappāyāni bhojanāni, labhanto vā sappāyāni bhesajjāni alabhanto vā sappāyāni bhesajjāni, labhanto vā patirūpaṁ upaṭṭhākaṁ alabhanto vā patirūpaṁ upaṭṭhākaṁ, neva vuṭṭhāti tamhā ābādhā."}},{"id":"pp2.3:5","sourceIds":["pp2.3:5.1"],"kind":"text","text":{"pi":"Idha panekacco gilāno labhanto vā sappāyāni bhojanāni alabhanto vā sappāyāni bhojanāni, labhanto vā sappāyāni bhesajjāni alabhanto vā sappāyāni bhesajjāni, labhanto vā patirūpaṁ upaṭṭhākaṁ alabhanto vā patirūpaṁ upaṭṭhākaṁ, vuṭṭhāti tamhā ābādhā."}},{"id":"pp2.3:6","sourceIds":["pp2.3:6.1"],"kind":"text","text":{"pi":"Idha panekacco gilāno labhanto sappāyāni bhojanāni no alabhanto, labhanto sappāyāni bhesajjāni no alabhanto, labhanto patirūpaṁ upaṭṭhākaṁ no alabhanto, vuṭṭhāti tamhā ābādhā."}},{"id":"pp2.3:7","sourceIds":["pp2.3:7.1","pp2.3:7.2"],"kind":"text","text":{"pi":"Tatra yvāyaṁ gilāno labhanto sappāyāni bhojanāni no alabhanto, labhanto sappāyāni bhesajjāni no alabhanto, labhanto patirūpaṁ upaṭṭhākaṁ no alabhanto, vuṭṭhāti tamhā ābādhā, imaṁ gilānaṁ paṭicca bhagavatā gilānabhattaṁ anuññātaṁ gilānabhesajjaṁ anuññātaṁ gilānupaṭṭhāko anuññāto.\nImañca pana gilānaṁ paṭicca aññepi gilānā upaṭṭhātabbā."}},{"id":"pp2.3:8","sourceIds":["pp2.3:8.1","pp2.3:8.2","pp2.3:8.3"],"kind":"text","text":{"pi":"Evamevaṁ tayo gilānūpamā puggalā santo saṁvijjamānā lokasmiṁ.\nKatame tayo?\nIdhekacco puggalo labhanto vā tathāgataṁ dassanāya alabhanto vā tathāgataṁ dassanāya, labhanto vā tathāgatappaveditaṁ dhammavinayaṁ savaṇāya alabhanto vā tathāgatappaveditaṁ dhammavinayaṁ savaṇāya, neva okkamati niyāmaṁ kusalesu dhammesu sammattaṁ."}},{"id":"pp2.3:9","sourceIds":["pp2.3:9.1"],"kind":"text","text":{"pi":"Idha panekacco puggalo labhanto vā tathāgataṁ dassanāya alabhanto vā tathāgataṁ dassanāya, labhanto vā tathāgatappaveditaṁ dhammavinayaṁ savaṇāya alabhanto vā tathāgatappaveditaṁ dhammavinayaṁ savaṇāya, okkamati niyāmaṁ kusalesu dhammesu sammattaṁ."}},{"id":"pp2.3:10","sourceIds":["pp2.3:10.1"],"kind":"text","text":{"pi":"Idha panekacco puggalo labhanto tathāgataṁ dassanāya no alabhanto, labhanto tathāgatappaveditaṁ dhammavinayaṁ savaṇāya no alabhanto, okkamati niyāmaṁ kusalesu dhammesu sammattaṁ."}},{"id":"pp2.3:11","sourceIds":["pp2.3:11.1","pp2.3:11.2"],"kind":"text","text":{"pi":"Tatra yvāyaṁ puggalo labhanto tathāgataṁ dassanāya no alabhanto, labhanto tathāgatappaveditaṁ dhammavinayaṁ savaṇāya no alabhanto, okkamati niyāmaṁ kusalesu dhammesu sammattaṁ, imaṁ puggalaṁ paṭicca bhagavatā dhammadesanā anuññātā, imañca puggalaṁ paṭicca aññesampi dhammo desetabbo.\nIme tayo gilānūpamā puggalā santo saṁvijjamānā lokasmiṁ."}},{"id":"pp2.3:12","sourceIds":["pp2.3:12.1","pp2.3:12.2","pp2.3:12.3"],"kind":"text","text":{"pi":"Katamo ca puggalo kāyasakkhī?\nIdhekacco puggalo aṭṭha vimokkhe kāyena phusitvā viharati, paññāya cassa disvā ekacce āsavā parikkhīṇā honti—\nayaṁ vuccati puggalo “kāyasakkhī”."}},{"id":"pp2.3:13","sourceIds":["pp2.3:13.1","pp2.3:13.2","pp2.3:13.3"],"kind":"text","text":{"pi":"Katamo ca puggalo diṭṭhippatto?\nIdhekacco puggalo “idaṁ dukkhan”ti yathābhūtaṁ pajānāti, “ayaṁ dukkhasamudayo”ti yathābhūtaṁ pajānāti, “ayaṁ dukkhanirodho”ti yathābhūtaṁ pajānāti, “ayaṁ dukkhanirodhagāminī paṭipadā”ti yathābhūtaṁ pajānāti, tathāgatappaveditā cassa dhammā paññāya vodiṭṭhā honti vocaritā, paññāya cassa disvā ekacce āsavā parikkhīṇā honti—\nayaṁ vuccati puggalo “diṭṭhippatto”."}},{"id":"pp2.3:14","sourceIds":["pp2.3:14.1","pp2.3:14.2","pp2.3:14.3","pp2.3:14.4"],"kind":"text","text":{"pi":"Katamo ca puggalo saddhāvimutto?\nIdhekacco puggalo “idaṁ dukkhan”ti yathābhūtaṁ pajānāti …pe…\ntathāgatappaveditā cassa dhammā paññāya vodiṭṭhā honti vocaritā, paññāya cassa disvā ekacce āsavā parikkhīṇā honti, no ca kho yathādiṭṭhippattassa—\nayaṁ vuccati puggalo “saddhāvimutto”."}},{"id":"pp2.3:15","sourceIds":["pp2.3:15.1","pp2.3:15.2","pp2.3:15.3","pp2.3:15.4","pp2.3:15.5","pp2.3:15.6","pp2.3:15.7","pp2.3:15.8","pp2.3:15.9"],"kind":"text","text":{"pi":"Katamo ca puggalo gūthabhāṇī?\nIdhekacco puggalo musāvādī hoti sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho—\n“ehambho, purisa, yaṁ jānāsi taṁ vadehī”ti,\nso ajānaṁ vā āha—“jānāmī”ti,\njānaṁ vā āha—“na jānāmī”ti,\napassaṁ vā āha—“passāmī”ti,\npassaṁ vā āha—“na passāmī”ti.\nIti attahetu vā parahetu vā āmisakiñcikkhahetu vā sampajānamusā bhāsitā hoti—\nayaṁ vuccati puggalo “gūthabhāṇī”."}},{"id":"pp2.3:16","sourceIds":["pp2.3:16.1","pp2.3:16.2","pp2.3:16.3","pp2.3:16.4","pp2.3:16.5","pp2.3:16.6","pp2.3:16.7","pp2.3:16.8","pp2.3:16.9"],"kind":"text","text":{"pi":"Katamo ca puggalo pupphabhāṇī?\nIdhekacco puggalo musāvādaṁ pahāya musāvādā paṭivirato hoti sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho—\n“ehambho, purisa, yaṁ jānāsi taṁ vadehī”ti,\nso ajānaṁ vā āha—“na jānāmī”ti,\njānaṁ vā āha—“jānāmī”ti,\napassaṁ vā āha—“na passāmī”ti,\npassaṁ vā āha—“passāmī”ti.\nIti attahetu vā parahetu vā āmisakiñcikkhahetu vā na sampajānamusā bhāsitā hoti—\nayaṁ vuccati puggalo “pupphabhāṇī”."}},{"id":"pp2.3:17","sourceIds":["pp2.3:17.1","pp2.3:17.2","pp2.3:17.3"],"kind":"text","text":{"pi":"Katamo ca puggalo madhubhāṇī?\nIdhekacco puggalo yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā, tathārūpiṁ vācaṁ bhāsitā hoti—\nayaṁ vuccati puggalo “madhubhāṇī”."}},{"id":"pp2.3:18","sourceIds":["pp2.3:18.1","pp2.3:18.2","pp2.3:18.3","pp2.3:18.4","pp2.3:18.5"],"kind":"text","text":{"pi":"Katamo ca puggalo arukūpamacitto?\nIdhekacco puggalo kodhano hoti upāyāsabahulo, appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti.\nSeyyathāpi nāma duṭṭhāruko kaṭṭhena vā kaṭhalāya vā ghaṭṭito bhiyyoso mattāya āsavaṁ deti;\nevamevaṁ idhekacco puggalo kodhano hoti upāyāsabahulo, appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti—\nayaṁ vuccati puggalo “arukūpamacitto”."}},{"id":"pp2.3:19","sourceIds":["pp2.3:19.1","pp2.3:19.2","pp2.3:19.3","pp2.3:19.4","pp2.3:19.5"],"kind":"text","text":{"pi":"Katamo ca puggalo vijjūpamacitto?\nIdhekacco puggalo “idaṁ dukkhan”ti yathābhūtaṁ pajānāti, “ayaṁ dukkhasamudayo”ti yathābhūtaṁ pajānāti, “ayaṁ dukkhanirodho”ti yathābhūtaṁ pajānāti, “ayaṁ dukkhanirodhagāminī paṭipadā”ti yathābhūtaṁ pajānāti.\nSeyyathāpi nāma cakkhumā puriso rattandhakāratimisāya vijjantarikāya rūpāni passeyya;\nevamevaṁ idhekacco puggalo “idaṁ dukkhan”ti yathābhūtaṁ pajānāti, “ayaṁ dukkhasamudayo”ti yathābhūtaṁ pajānāti, “ayaṁ dukkhanirodho”ti yathābhūtaṁ pajānāti, “ayaṁ dukkhanirodhagāminī paṭipadā”ti yathābhūtaṁ pajānāti—\nayaṁ vuccati puggalo “vijjūpamacitto”."}},{"id":"pp2.3:20","sourceIds":["pp2.3:20.1","pp2.3:20.2","pp2.3:20.3","pp2.3:20.4","pp2.3:20.5"],"kind":"text","text":{"pi":"Katamo ca puggalo vajirūpamacitto?\nIdhekacco puggalo āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.\nSeyyathāpi nāma vajirassa natthi kiñci abhejjaṁ maṇi vā pāsāṇo vā;\nevamevaṁ idhekacco puggalo āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati—\nayaṁ vuccati puggalo “vajirūpamacitto”."}},{"id":"pp2.3:21","sourceIds":["pp2.3:21.1","pp2.3:21.2","pp2.3:21.3","pp2.3:21.4"],"kind":"text","text":{"pi":"Katamo ca puggalo andho?\nIdhekaccassa puggalassa tathārūpaṁ cakkhu na hoti yathārūpena cakkhunā anadhigataṁ vā bhogaṁ adhigaccheyya, adhigataṁ vā bhogaṁ phātiṁ kareyya;\ntathārūpampissa cakkhu na hoti yathārūpena cakkhunā kusalākusale dhamme jāneyya, sāvajjānavajje dhamme jāneyya, hīnappaṇīte dhamme jāneyya, kaṇhasukkasappaṭibhāge dhamme jāneyya—\nayaṁ vuccati puggalo “andho”."}},{"id":"pp2.3:22","sourceIds":["pp2.3:22.1","pp2.3:22.2","pp2.3:22.3","pp2.3:22.4"],"kind":"text","text":{"pi":"Katamo ca puggalo ekacakkhu?\nIdhekaccassa puggalassa tathārūpaṁ cakkhu hoti, yathārūpena cakkhunā anadhigataṁ vā bhogaṁ adhigaccheyya, adhigataṁ vā bhogaṁ phātiṁ kareyya;\ntathārūpampissa cakkhu na hoti yathārūpena cakkhunā kusalākusale dhamme jāneyya, sāvajjānavajje dhamme jāneyya, hīnappaṇīte dhamme jāneyya, kaṇhasukkasappaṭibhāge dhamme jāneyya—\nayaṁ vuccati puggalo “ekacakkhu”."}},{"id":"pp2.3:23","sourceIds":["pp2.3:23.1","pp2.3:23.2","pp2.3:23.3","pp2.3:23.4"],"kind":"text","text":{"pi":"Katamo ca puggalo dvicakkhu?\nIdhekaccassa puggalassa tathārūpaṁ cakkhu hoti yathārūpena cakkhunā anadhigataṁ vā bhogaṁ adhigaccheyya, adhigataṁ vā bhogaṁ phātiṁ kareyya;\ntathārūpampissa cakkhu hoti yathārūpena cakkhunā kusalākusale dhamme jāneyya, sāvajjānavajje dhamme jāneyya, hīnappaṇīte dhamme jāneyya, kaṇhasukkasappaṭibhāge dhamme jāneyya—\nayaṁ vuccati puggalo “dvicakkhu”."}},{"id":"pp2.3:24","sourceIds":["pp2.3:24.1","pp2.3:24.2","pp2.3:24.3","pp2.3:24.4","pp2.3:24.5","pp2.3:24.6","pp2.3:24.7","pp2.3:24.8","pp2.3:24.9","pp2.3:24.10","pp2.3:24.11"],"kind":"text","text":{"pi":"Katamo ca puggalo avakujjapañño?\nIdhekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavaṇāya.\nTassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsenti.\nSo tasmiṁ āsane nisinno tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti.\nVuṭṭhitopi tamhā āsanā tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti.\nSeyyathāpi nāma kumbho nikkujjo tatra udakaṁ āsittaṁ vivaṭṭati, no saṇṭhāti;\nevamevaṁ idhekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavaṇāya.\nTassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsenti.\nSo tasmiṁ āsane nisinno tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti.\nVuṭṭhitopi tamhā āsanā tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti—\nayaṁ vuccati puggalo “avakujjapañño”."}},{"id":"pp2.3:25","sourceIds":["pp2.3:25.1","pp2.3:25.2","pp2.3:25.3","pp2.3:25.4","pp2.3:25.5","pp2.3:25.6","pp2.3:25.7","pp2.3:25.8","pp2.3:25.9","pp2.3:25.10","pp2.3:25.11","pp2.3:25.12","pp2.3:25.13"],"kind":"text","text":{"pi":"Katamo ca puggalo ucchaṅgapañño?\nIdhekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavaṇāya.\nTassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsenti.\nSo tasmiṁ āsane nisinno tassā kathāya ādimpi manasi karoti, majjhampi manasi karoti, pariyosānampi manasi karoti.\nVuṭṭhito ca kho tamhā āsanā tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti.\nSeyyathāpi nāma purisassa ucchaṅge nānākhajjakāni ākiṇṇāni—\ntilā taṇḍulā modakā badarā.\nSo tamhā āsanā vuṭṭhahanto satisammosā pakireyya;\nevamevaṁ idhekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavaṇāya.\nTassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsenti.\nSo tasmiṁ āsane nisinno tassā kathāya ādimpi manasi karoti, majjhampi manasi karoti, pariyosānampi manasi karoti.\nVuṭṭhito ca kho tamhā āsanā tassā kathāya neva ādimpi manasi karoti, na majjhampi manasi karoti, na pariyosānampi manasi karoti—\nayaṁ vuccati puggalo “ucchaṅgapañño”."}},{"id":"pp2.3:26","sourceIds":["pp2.3:26.1","pp2.3:26.2","pp2.3:26.3","pp2.3:26.4","pp2.3:26.5","pp2.3:26.6","pp2.3:26.7","pp2.3:26.8","pp2.3:26.9","pp2.3:26.10","pp2.3:26.11"],"kind":"text","text":{"pi":"Katamo ca puggalo puthupañño?\nIdhekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavaṇāya.\nTassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsenti.\nSo tasmiṁ āsane nisinno tassā kathāya ādimpi manasi karoti, majjhampi manasi karoti, pariyosānampi manasi karoti.\nVuṭṭhitopi tamhā āsanā tassā kathāya ādimpi manasi karoti, majjhampi manasi karoti, pariyosānampi manasi karoti.\nSeyyathāpi nāma kumbho ukkujjo tatra udakaṁ āsittaṁ saṇṭhāti, no vivaṭṭati;\nevamevaṁ idhekacco puggalo ārāmaṁ gantā honti abhikkhaṇaṁ bhikkhūnaṁ santike dhammassavaṇāya.\nTassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsenti.\nSo tasmiṁ āsane nisinno tassā kathāya ādimpi manasi karoti, majjhampi manasi karoti, pariyosānampi manasi karoti.\nVuṭṭhitopi tamhā āsanā tassā kathāya ādimpi manasi karoti, majjhampi manasi karoti, pariyosānampi manasi karoti—\nayaṁ vuccati puggalo “puthupañño”."}},{"id":"pp2.3:27","sourceIds":["pp2.3:27.1","pp2.3:27.2","pp2.3:27.3"],"kind":"text","text":{"pi":"Katamo ca puggalo kāmesu ca bhavesu ca avītarāgo?\nSotāpannasakadāgāmino—\nime vuccanti puggalā “kāmesu ca bhavesu ca avītarāgā”."}},{"id":"pp2.3:28","sourceIds":["pp2.3:28.1","pp2.3:28.2","pp2.3:28.3"],"kind":"text","text":{"pi":"Katamo ca puggalo kāmesu vītarāgo, bhavesu avītarāgo?\nAnāgāmī—\nayaṁ vuccati puggalo “kāmesu vītarāgo, bhavesu avītarāgo”."}},{"id":"pp2.3:29","sourceIds":["pp2.3:29.1","pp2.3:29.2","pp2.3:29.3"],"kind":"text","text":{"pi":"Katamo ca puggalo kāmesu ca bhavesu ca vītarāgo?\nArahā—\nayaṁ vuccati puggalo “kāmesu ca bhavesu ca vītarāgo”."}},{"id":"pp2.3:30","sourceIds":["pp2.3:30.1","pp2.3:30.2","pp2.3:30.3","pp2.3:30.4","pp2.3:30.5","pp2.3:30.6","pp2.3:30.7"],"kind":"text","text":{"pi":"Katamo ca puggalo pāsāṇalekhūpamo?\nIdhekacco puggalo abhiṇhaṁ kujjhati.\nSo ca khvassa kodho ciraṁ dīgharattaṁ anuseti.\nSeyyathāpi nāma pāsāṇe lekhā na khippaṁ lujjati vātena vā udakena vā, ciraṭṭhitikā hoti;\nevamevaṁ idhekacco puggalo abhiṇhaṁ kujjhati.\nSo ca khvassa kodho ciraṁ dīgharattaṁ anuseti—\nayaṁ vuccati puggalo “pāsāṇalekhūpamo”."}},{"id":"pp2.3:31","sourceIds":["pp2.3:31.1","pp2.3:31.2","pp2.3:31.3","pp2.3:31.4","pp2.3:31.5","pp2.3:31.6","pp2.3:31.7"],"kind":"text","text":{"pi":"Katamo ca puggalo pathavilekhūpamo?\nIdhekacco puggalo abhiṇhaṁ kujjhati.\nSo ca khvassa kodho na ciraṁ dīgharattaṁ anuseti.\nSeyyathāpi nāma pathaviyā lekhā khippaṁ lujjati vātena vā udakena vā, na ciraṭṭhitikā hoti;\nevamevaṁ idhekacco puggalo abhiṇhaṁ kujjhati.\nSo ca khvassa kodho na ciraṁ dīgharattaṁ anuseti—\nayaṁ vuccati puggalo “pathavilekhūpamo”."}},{"id":"pp2.3:32","sourceIds":["pp2.3:32.1","pp2.3:32.2","pp2.3:32.3","pp2.3:32.4","pp2.3:32.5"],"kind":"text","text":{"pi":"Katamo ca puggalo udakalekhūpamo?\nIdhekacco puggalo āgāḷhenapi vuccamāno pharusenapi vuccamāno amanāpenapi vuccamāno saṁsandatimeva sandhiyatimeva sammodatimeva.\nSeyyathāpi nāma udake lekhā khippaṁ lujjati, na ciraṭṭhitikā hoti;\nevamevaṁ idhekacco puggalo āgāḷhenapi vuccamāno pharusenapi vuccamāno amanāpenapi vuccamāno saṁsandatimeva sandhiyatimeva sammodatimeva—\nayaṁ vuccati puggalo “udakalekhūpamo”."}},{"id":"pp2.3:33","sourceIds":["pp2.3:33.1","pp2.3:33.2","pp2.3:33.3","pp2.3:33.4","pp2.3:33.5","pp2.3:33.6","pp2.3:33.7","pp2.3:33.8","pp2.3:33.9","pp2.3:33.10","pp2.3:33.11","pp2.3:33.12","pp2.3:33.13","pp2.3:33.14"],"kind":"text","text":{"pi":"Tattha katame tayo potthakūpamā puggalā?\nTayo potthakā—\nnavopi potthako dubbaṇṇo ceva hoti dukkhasamphasso ca appaggho ca, majjhimopi potthako dubbaṇṇo ceva hoti dukkhasamphasso ca appaggho ca, jiṇṇopi potthako dubbaṇṇo ceva hoti dukkhasamphasso ca appaggho ca.\nJiṇṇampi potthakaṁ ukkhaliparimajjanaṁ vā karonti saṅkārakūṭe vā naṁ chaḍḍenti.\nEvamevaṁ tayome potthakūpamā puggalā santo saṁvijjamānā bhikkhūsu.\nKatame tayo?\nNavo cepi bhikkhu hoti dussīlo pāpadhammo, imassa dubbaṇṇatāya.\nSeyyathāpi so potthako dubbaṇṇo, tathūpamo ayaṁ puggalo.\nYe kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ ahitāya dukkhāya.\nIdamassa dukkhasamphassatāya.\nSeyyathāpi so potthako dukkhasamphasso, tathūpamo ayaṁ puggalo.\nYesaṁ kho pana so paṭiggaṇhāti cīvarapiṇḍapātasenāsanagilānapaccayabhesajjaparikkhāraṁ, tesaṁ taṁ na mahapphalaṁ hoti na mahānisaṁsaṁ.\nIdamassa appagghatāya.\nSeyyathāpi so potthako appaggho, tathūpamo ayaṁ puggalo."}},{"id":"pp2.3:34","sourceIds":["pp2.3:34.1","pp2.3:34.2","pp2.3:34.3","pp2.3:34.4","pp2.3:34.5","pp2.3:34.6","pp2.3:34.7","pp2.3:34.8","pp2.3:34.9"],"kind":"text","text":{"pi":"Majjhimo cepi bhikkhu hoti …pe…\nthero cepi bhikkhu hoti dussīlo pāpadhammo, idamassa dubbaṇṇatāya.\nSeyyathāpi so potthako dubbaṇṇo, tathūpamo ayaṁ puggalo.\nYe kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ ahitāya dukkhāya.\nIdamassa dukkhasamphassatāya.\nSeyyathāpi so potthako dukkhasamphasso, tathūpamo ayaṁ puggalo.\nYesaṁ kho pana so paṭiggaṇhāti cīvarapiṇḍapātasenāsanagilānapaccayabhesajjaparikkhāraṁ, tesaṁ taṁ na mahapphalaṁ hoti na mahānisaṁsaṁ.\nIdamassa appagghatāya.\nSeyyathāpi so potthako appaggho, tathūpamo ayaṁ puggalo."}},{"id":"pp2.3:35","sourceIds":["pp2.3:35.1","pp2.3:35.2","pp2.3:35.3","pp2.3:35.4","pp2.3:35.5"],"kind":"text","text":{"pi":"Evarūpo ce thero bhikkhu saṅghamajjhe bhaṇati.\nTamenaṁ bhikkhū evamāhaṁsu—\n“kiṁ nu kho tuyhaṁ bālassa abyattassa bhaṇitena, tvampi nāma bhaṇitabbaṁ maññasī”ti.\nSo kupito anattamano tathārūpiṁ vācaṁ nicchāreti yathārūpāya vācāya saṅgho taṁ ukkhipati, saṅkārakūṭeva naṁ potthakaṁ.\nIme tayo potthakūpamā puggalā santo saṁvijjamānā bhikkhūsu."}},{"id":"pp2.3:36","sourceIds":["pp2.3:36.1","pp2.3:36.2","pp2.3:36.3","pp2.3:36.4"],"kind":"text","text":{"pi":"Tattha katame tayo kāsikavatthūpamā puggalā?\nTīṇi kāsikavatthāni—\nnavampi kāsikavatthaṁ vaṇṇavantañceva hoti sukhasamphassañca mahagghañca, majjhimampi kāsikavatthaṁ vaṇṇavantañceva hoti sukhasamphassañca mahagghañca, jiṇṇampi kāsikavatthaṁ vaṇṇavantañceva hoti sukhasamphassañca mahagghañca.\nJiṇṇampi kāsikavatthaṁ ratanapaliveṭhanaṁ vā karonti gandhakaraṇḍake vā naṁ nikkhipanti."}},{"id":"pp2.3:37","sourceIds":["pp2.3:37.1","pp2.3:37.2","pp2.3:37.3","pp2.3:37.4","pp2.3:37.5","pp2.3:37.6","pp2.3:37.7","pp2.3:37.8","pp2.3:37.9","pp2.3:37.10"],"kind":"text","text":{"pi":"Evamevaṁ tayome kāsikavatthūpamā puggalā santo saṁvijjamānā bhikkhūsu.\nKatame tayo?\nNavo cepi bhikkhu hoti sīlavā kalyāṇadhammo, idamassa suvaṇṇatāya.\nSeyyathāpi taṁ kāsikavatthaṁ vaṇṇavantaṁ, tathūpamo ayaṁ puggalo.\nYe kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ hitāya sukhāya.\nIdamassa sukhasamphassatāya.\nSeyyathāpi taṁ kāsikavatthaṁ sukhasamphassaṁ, tathūpamo ayaṁ puggalo.\nYesaṁ kho pana so paṭiggaṇhāti cīvarapiṇḍapātasenāsanagilānapaccayabhesajjaparikkhāraṁ, tesaṁ taṁ mahapphalaṁ hoti mahānisaṁsaṁ.\nIdamassa mahagghatāya.\nSeyyathāpi taṁ kāsikavatthaṁ mahagghaṁ, tathūpamo ayaṁ puggalo."}},{"id":"pp2.3:38","sourceIds":["pp2.3:38.1","pp2.3:38.2","pp2.3:38.3","pp2.3:38.4","pp2.3:38.5","pp2.3:38.6","pp2.3:38.7","pp2.3:38.8","pp2.3:38.9"],"kind":"text","text":{"pi":"Majjhimo cepi bhikkhu …pe…\nthero cepi bhikkhu hoti sīlavā kalyāṇadhammo, idamassa suvaṇṇatāya.\nSeyyathāpi taṁ kāsikavatthaṁ vaṇṇavantaṁ, tathūpamo ayaṁ puggalo.\nYe kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ hitāya sukhāya.\nIdamassa sukhasamphassatāya.\nSeyyathāpi taṁ kāsikavatthaṁ sukhasamphassaṁ, tathūpamo ayaṁ puggalo.\nYesaṁ kho pana so paṭiggaṇhāti cīvarapiṇḍapātasenāsanagilānapaccayabhesajjaparikkhāraṁ, tesaṁ taṁ mahapphalaṁ hoti mahānisaṁsaṁ.\nIdamassa mahagghatāya.\nSeyyathāpi taṁ kāsikavatthaṁ mahagghaṁ, tathūpamo ayaṁ puggalo."}},{"id":"pp2.3:39","sourceIds":["pp2.3:39.1","pp2.3:39.2","pp2.3:39.3","pp2.3:39.4"],"kind":"text","text":{"pi":"Evarūpo ce thero bhikkhu saṅghamajjhe bhaṇati, tamenaṁ bhikkhū evamāhaṁsu—\n“appasaddā āyasmanto hotha, thero bhikkhu dhammañca vinayañca bhaṇatī”ti.\nTassa taṁ vacanaṁ ādheyyaṁ gacchati, gandhakaraṇḍakeva naṁ kāsikavatthaṁ.\nIme tayo kāsikavatthūpamā puggalā santo saṁvijjamānā bhikkhūsu."}},{"id":"pp2.3:40","sourceIds":["pp2.3:40.1","pp2.3:40.2","pp2.3:40.3"],"kind":"text","text":{"pi":"Katamo ca puggalo suppameyyo?\nIdhekacco puggalo uddhato hoti unnaḷo capalo mukharo vikiṇṇavāco muṭṭhassati asampajāno asamāhito vibbhantacitto pākaṭindriyo—\nayaṁ vuccati puggalo “suppameyyo”."}},{"id":"pp2.3:41","sourceIds":["pp2.3:41.1","pp2.3:41.2","pp2.3:41.3"],"kind":"text","text":{"pi":"Katamo ca puggalo duppameyyo?\nIdhekacco puggalo anuddhato hoti anunnaḷo acapalo amukharo avikiṇṇavāco upaṭṭhitassati sampajāno samāhito ekaggacitto saṁvutindriyo—\nayaṁ vuccati puggalo “duppameyyo”."}},{"id":"pp2.3:42","sourceIds":["pp2.3:42.1","pp2.3:42.2","pp2.3:42.3"],"kind":"text","text":{"pi":"Katamo ca puggalo appameyyo?\nIdhekacco puggalo āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati—\nayaṁ vuccati puggalo “appameyyo”."}},{"id":"pp2.3:43","sourceIds":["pp2.3:43.1","pp2.3:43.2","pp2.3:43.3"],"kind":"text","text":{"pi":"Katamo ca puggalo na sevitabbo na bhajitabbo na payirupāsitabbo?\nIdhekacco puggalo hīno hoti sīlena samādhinā paññāya.\nEvarūpo puggalo na sevitabbo na bhajitabbo na payirupāsitabbo, aññatra anuddayā aññatra anukampā."}},{"id":"pp2.3:44","sourceIds":["pp2.3:44.1","pp2.3:44.2","pp2.3:44.3","pp2.3:44.4","pp2.3:44.5","pp2.3:44.6","pp2.3:44.7","pp2.3:44.8"],"kind":"text","text":{"pi":"Katamo ca puggalo sevitabbo bhajitabbo payirupāsitabbo?\nIdhekacco puggalo sadiso hoti sīlena samādhinā paññāya.\nEvarūpo puggalo sevitabbo bhajitabbo payirupāsitabbo.\nTaṁ kissa hetu?\n“Sīlasāmaññagatānaṁ sataṁ sīlakathā ca no bhavissati, sā ca no phāsu bhavissati, sā ca no pavattinī bhavissati;\nsamādhisāmaññagatānaṁ sataṁ samādhikathā ca no bhavissati, sā ca no phāsu bhavissati, sā ca no pavattinī bhavissati;\npaññāsāmaññagatānaṁ sataṁ paññākathā ca no bhavissati, sā ca no phāsu bhavissati, sā ca no pavattinī bhavissatī”ti.\nTasmā evarūpo puggalo sevitabbo bhajitabbo payirupāsitabbo."}},{"id":"pp2.3:45","sourceIds":["pp2.3:45.1","pp2.3:45.2","pp2.3:45.3","pp2.3:45.4","pp2.3:45.5","pp2.3:45.6","pp2.3:45.7","pp2.3:45.8"],"kind":"text","text":{"pi":"Katamo ca puggalo sakkatvā garuṁ katvā sevitabbo bhajitabbo payirupāsitabbo?\nIdhekacco puggalo adhiko hoti sīlena samādhinā paññāya.\nEvarūpo puggalo sakkatvā garuṁ katvā sevitabbo bhajitabbo payirupāsitabbo.\nTaṁ kissa hetu?\n“Aparipūraṁ vā sīlakkhandhaṁ paripūressāmi, paripūraṁ vā sīlakkhandhaṁ tattha tattha paññāya anuggahessāmi;\naparipūraṁ vā samādhikkhandhaṁ paripūressāmi, paripūraṁ vā samādhikkhandhaṁ tattha tattha paññāya anuggahessāmi;\naparipūraṁ vā paññākkhandhaṁ paripūressāmi, paripūraṁ vā paññākkhandhaṁ tattha tattha paññāya anuggahessāmī”ti.\nTasmā evarūpo puggalo sakkatvā garuṁ katvā sevitabbo bhajitabbo payirupāsitabbo."}},{"id":"pp2.3:46","sourceIds":["pp2.3:46.1","pp2.3:46.2","pp2.3:46.3","pp2.3:46.4","pp2.3:46.5","pp2.3:46.6","pp2.3:46.7","pp2.3:46.8","pp2.3:46.9","pp2.3:46.10"],"kind":"text","text":{"pi":"Katamo ca puggalo jigucchitabbo na sevitabbo na bhajitabbo na payirupāsitabbo?\nIdhekacco puggalo dussīlo hoti pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto.\nEvarūpo puggalo jigucchitabbo na sevitabbo na bhajitabbo na payirupāsitabbo.\nTaṁ kissa hetu?\nKiñcāpi evarūpassa puggalassa na diṭṭhānugatiṁ āpajjati, atha kho naṁ pāpako kittisaddo abbhuggacchati—\n“pāpamitto purisapuggalo pāpasahāyo pāpasampavaṅko”ti.\nSeyyathāpi nāma ahi gūthagato kiñcāpi na ḍaṁsati, atha kho naṁ makkheti;\nevamevaṁ kiñcāpi evarūpassa puggalassa na diṭṭhānugatiṁ āpajjati, atha kho naṁ pāpako kittisaddo abbhuggacchati—\n“pāpamitto purisapuggalo pāpasahāyo pāpasampavaṅko”ti.\nTasmā evarūpo puggalo jigucchitabbo na sevitabbo na bhajitabbo na payirupāsitabbo."}},{"id":"pp2.3:47","sourceIds":["pp2.3:47.1","pp2.3:47.2","pp2.3:47.3","pp2.3:47.4","pp2.3:47.5","pp2.3:47.6","pp2.3:47.7","pp2.3:47.8","pp2.3:47.9","pp2.3:47.10","pp2.3:47.11"],"kind":"text","text":{"pi":"Katamo ca puggalo ajjhupekkhitabbo na sevitabbo na bhajitabbo na payirupāsitabbo?\nIdhekacco puggalo kodhano hoti upāyāsabahulo, appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti.\nSeyyathāpi nāma duṭṭhāruko kaṭṭhena vā kaṭhalāya vā ghaṭṭito bhiyyoso mattāya āsavaṁ deti, evamevaṁ idhekacco puggalo kodhano hoti upāyāsabahulo, appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti.\nSeyyathāpi nāma tindukālātaṁ kaṭṭhena vā kaṭhalāya vā ghaṭṭitaṁ bhiyyoso mattāya cicciṭāyati ciṭiciṭāyati;\nevamevaṁ idhekacco puggalo kodhano hoti upāyāsabahulo, appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti.\nSeyyathāpi nāma gūthakūpo kaṭṭhena vā kaṭhalāya vā ghaṭṭito bhiyyoso mattāya duggandho hoti;\nevamevaṁ idhekacco puggalo kodhano hoti upāyāsabahulo, appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti;\nevarūpo puggalo ajjhupekkhitabbo na sevitabbo na bhajitabbo na payirupāsitabbo.\nTaṁ kissa hetu?\n“Akkoseyyapi maṁ paribhāseyyapi maṁ anatthampi me kareyyā”ti.\nTasmā evarūpo puggalo ajjhupekkhitabbo na sevitabbo na bhajitabbo na payirupāsitabbo."}},{"id":"pp2.3:48","sourceIds":["pp2.3:48.1","pp2.3:48.2","pp2.3:48.3","pp2.3:48.4","pp2.3:48.5","pp2.3:48.6","pp2.3:48.7"],"kind":"text","text":{"pi":"Katamo ca puggalo sevitabbo bhajitabbo payirupāsitabbo?\nIdhekacco puggalo sīlavā hoti kalyāṇadhammo—\nevarūpo puggalo sevitabbo bhajitabbo payirupāsitabbo.\nTaṁ kissa hetu?\nKiñcāpi evarūpassa puggalassa na diṭṭhānugatiṁ āpajjati, atha kho naṁ kalyāṇo kittisaddo abbhuggacchati—\n“kalyāṇamitto purisapuggalo kalyāṇasahāyo kalyāṇasampavaṅko”ti.\nTasmā evarūpo puggalo sevitabbo bhajitabbo payirupāsitabbo."}},{"id":"pp2.3:49","sourceIds":["pp2.3:49.1","pp2.3:49.2","pp2.3:49.3"],"kind":"text","text":{"pi":"Katamo ca puggalo sīlesu paripūrakārī, samādhismiṁ mattaso kārī, paññāya mattaso kārī?\nSotāpannasakadāgāmino—\nime vuccanti puggalā sīlesu paripūrakārino, samādhismiṁ mattaso kārino, paññāya mattaso kārino."}},{"id":"pp2.3:50","sourceIds":["pp2.3:50.1","pp2.3:50.2","pp2.3:50.3"],"kind":"text","text":{"pi":"Katamo ca puggalo sīlesu ca paripūrakārī, samādhismiñca paripūrakārī, paññāya mattaso kārī?\nAnāgāmī—\nayaṁ vuccati puggalo sīlesu ca paripūrakārī, samādhismiñca paripūrakārī, paññāya mattaso kārī."}},{"id":"pp2.3:51","sourceIds":["pp2.3:51.1","pp2.3:51.2","pp2.3:51.3"],"kind":"text","text":{"pi":"Katamo ca puggalo sīlesu ca paripūrakārī, samādhismiñca paripūrakārī, paññāya ca paripūrakārī?\nArahā—\nayaṁ vuccati puggalo sīlesu ca paripūrakārī, samādhismiñca paripūrakārī, paññāya ca paripūrakārī."}},{"id":"pp2.3:52","sourceIds":["pp2.3:52.1","pp2.3:52.2","pp2.3:52.3","pp2.3:52.4"],"kind":"text","text":{"pi":"Tattha katame tayo satthāro?\nIdhekacco satthā kāmānaṁ pariññaṁ paññapeti, na rūpānaṁ pariññaṁ paññapeti, na vedanānaṁ pariññaṁ paññapeti.\nIdha panekacco satthā kāmānañca pariññaṁ paññapeti, rūpānañca pariññaṁ paññapeti, na vedanānaṁ pariññaṁ paññapeti.\nIdha panekacco satthā kāmānañca pariññaṁ paññapeti, rūpānañca pariññaṁ paññapeti, vedanānañca pariññaṁ paññapeti."}},{"id":"pp2.3:53","sourceIds":["pp2.3:53.1","pp2.3:53.2","pp2.3:53.3","pp2.3:53.4"],"kind":"text","text":{"pi":"Tatra yvāyaṁ satthā kāmānaṁ pariññaṁ paññapeti, na rūpānaṁ pariññaṁ paññapeti, na vedanānaṁ pariññaṁ paññapeti, rūpāvacarasamāpattiyā lābhī satthā tena daṭṭhabbo.\nTatra yvāyaṁ satthā kāmānañca pariññaṁ paññapeti, rūpānañca pariññaṁ paññapeti, na vedanānaṁ pariññaṁ paññapeti, arūpāvacarasamāpattiyā lābhī satthā tena daṭṭhabbo.\nTatra yvāyaṁ satthā kāmānañca pariññaṁ paññapeti, rūpānañca pariññaṁ paññapeti, vedanānañca pariññaṁ paññapeti, sammāsambuddho satthā tena daṭṭhabbo.\nIme tayo satthāro."}},{"id":"pp2.3:54","sourceIds":["pp2.3:54.1","pp2.3:54.2","pp2.3:54.3","pp2.3:54.4"],"kind":"text","text":{"pi":"Tattha katame aparepi tayo satthāro?\nIdhekacco satthā diṭṭhe ceva dhamme attānaṁ saccato thetato paññapeti, abhisamparāyañca attānaṁ saccato thetato paññapeti.\nIdha panekacco satthā diṭṭhe ceva dhamme attānaṁ saccato thetato paññapeti, no ca kho abhisamparāyaṁ attānaṁ saccato thetato paññapeti.\nIdha panekacco satthā diṭṭhe ceva dhamme attānaṁ saccato thetato na paññapeti, abhisamparāyañca attānaṁ saccato thetato na paññapeti."}},{"id":"pp2.3:55","sourceIds":["pp2.3:55.1","pp2.3:55.2","pp2.3:55.3","pp2.3:55.4"],"kind":"text","text":{"pi":"Tatra yvāyaṁ satthā diṭṭhe ceva dhamme attānaṁ saccato thetato paññapeti, abhisamparāyañca attānaṁ saccato thetato paññapeti, sassatavādo satthā tena daṭṭhabbo.\nTatra yvāyaṁ satthā diṭṭhe ceva dhamme attānaṁ saccato thetato paññapeti, no ca kho abhisamparāyaṁ attānaṁ saccato thetato paññapeti, ucchedavādo satthā tena daṭṭhabbo.\nTatra yvāyaṁ satthā diṭṭhe ceva dhamme attānaṁ saccato thetato na paññapeti, abhisamparāyañca attānaṁ saccato thetato na paññapeti, sammāsambuddho satthā tena daṭṭhabbo.\nIme aparepi tayo satthāro."}},{"id":"pp2.3:56","sourceIds":["pp2.3:56.1"],"kind":"text","text":{"pi":"Tikaniddeso."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/pp2.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}