{"id":"pp2.5","title":"5. Pañcakapuggalapaññatti","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"pp2.5","title":"5. Pañcakapuggalapaññatti","units":[{"id":"pp2.5:0","sourceIds":["pp2.5:0.1","pp2.5:0.2","pp2.5:0.3"],"kind":"text","text":{"pi":"Puggalapaññatti\nNiddesa\n5. Pañcakapuggalapaññatti"}},{"id":"pp2.5:1","sourceIds":["pp2.5:1.1","pp2.5:1.2","pp2.5:1.3","pp2.5:1.4"],"kind":"text","text":{"pi":"Tatra yvāyaṁ puggalo ārabhati ca vippaṭisārī ca hoti, tañca cetovimuttiṁ paññāvimuttiṁ yathābhūtaṁ nappajānāti, yatthassa te uppannā pāpakā akusalā dhammā aparisesā nirujjhanti, so evamassa vacanīyo—\n“āyasmato kho ārambhajā āsavā saṁvijjanti, vippaṭisārajā āsavā pavaḍḍhanti.\nSādhu vatāyasmā ārambhaje āsave pahāya vippaṭisāraje āsave paṭivinodetvā cittaṁ paññañca bhāvetu.\nEvamāyasmā amunā pañcamena puggalena samasamo bhavissatī”ti."}},{"id":"pp2.5:2","sourceIds":["pp2.5:2.1","pp2.5:2.2","pp2.5:2.3","pp2.5:2.4"],"kind":"text","text":{"pi":"Tatra yvāyaṁ puggalo ārabhati na vippaṭisārī hoti, tañca cetovimuttiṁ paññāvimuttiṁ yathābhūtaṁ nappajānāti, yatthassa te uppannā pāpakā akusalā dhammā aparisesā nirujjhanti, so evamassa vacanīyo—\n“āyasmato kho ārambhajā āsavā saṁvijjanti, vippaṭisārajā āsavā nappavaḍḍhanti.\nSādhu vatāyasmā ārambhaje āsave pahāya cittaṁ paññañca bhāvetu.\nEvamāyasmā amunā pañcamena puggalena samasamo bhavissatī”ti."}},{"id":"pp2.5:3","sourceIds":["pp2.5:3.1","pp2.5:3.2","pp2.5:3.3","pp2.5:3.4"],"kind":"text","text":{"pi":"Tatra yvāyaṁ puggalo na ārabhati vippaṭisārī hoti, tañca cetovimuttiṁ paññāvimuttiṁ yathābhūtaṁ nappajānāti, yatthassa te uppannā pāpakā akusalā dhammā aparisesā nirujjhanti, so evamassa vacanīyo—\n“āyasmato kho ārambhajā āsavā na saṁvijjanti, vippaṭisārajā āsavā pavaḍḍhanti.\nSādhu vatāyasmā vippaṭisāraje āsave paṭivinodetvā cittaṁ paññañca bhāvetu.\nEvamāyasmā amunā pañcamena puggalena samasamo bhavissatī”ti."}},{"id":"pp2.5:4","sourceIds":["pp2.5:4.1","pp2.5:4.2","pp2.5:4.3","pp2.5:4.4"],"kind":"text","text":{"pi":"Tatra yvāyaṁ puggalo na ārabhati na vippaṭisārī hoti, tañca cetovimuttiṁ paññāvimuttiṁ yathābhūtaṁ nappajānāti, yatthassa te pāpakā akusalā dhammā aparisesā nirujjhanti, so evamassa vacanīyo—\n“āyasmato kho ārambhajā āsavā na saṁvijjanti, vippaṭisārajā āsavā nappavaḍḍhanti.\nSādhu vatāyasmā cittaṁ paññañca bhāvetu.\nEvamāyasmā amunā pañcamena puggalena samasamo bhavissatī”ti."}},{"id":"pp2.5:5","sourceIds":["pp2.5:5.1"],"kind":"text","text":{"pi":"Ime cattāro puggalā amunā pañcamena puggalena evaṁ ovadiyamānā evaṁ anusāsiyamānā anupubbena āsavānaṁ khayaṁ pāpuṇanti."}},{"id":"pp2.5:6","sourceIds":["pp2.5:6.1","pp2.5:6.2","pp2.5:6.3","pp2.5:6.4"],"kind":"text","text":{"pi":"Kathañca puggalo datvā avajānāti?\nIdhekacco puggalo yassa puggalassa deti cīvarapiṇḍapātasenāsanagilānapaccayabhesajjaparikkhāraṁ, tassa evaṁ hoti—\n“ahaṁ dammi, ayaṁ paṭiggaṇhātī”ti, tamenaṁ datvā avajānāti.\nEvaṁ puggalo datvā avajānāti."}},{"id":"pp2.5:7","sourceIds":["pp2.5:7.1","pp2.5:7.2","pp2.5:7.3"],"kind":"text","text":{"pi":"Kathañca puggalo saṁvāsena avajānāti?\nIdhekacco puggalo yena puggalena saddhiṁ saṁvasati dve vā tīṇi vā vassāni, tamenaṁ saṁvāsena avajānāti.\nEvaṁ puggalo saṁvāsena avajānāti."}},{"id":"pp2.5:8","sourceIds":["pp2.5:8.1","pp2.5:8.2","pp2.5:8.3"],"kind":"text","text":{"pi":"Kathañca puggalo ādheyyamukho hoti?\nIdhekacco puggalo parassa vaṇṇe vā avaṇṇe vā bhāsiyamāne khippaññeva adhimuccitā hoti.\nEvaṁ puggalo ādheyyamukho hoti."}},{"id":"pp2.5:9","sourceIds":["pp2.5:9.1","pp2.5:9.2","pp2.5:9.3"],"kind":"text","text":{"pi":"Kathañca puggalo lolo hoti?\nIdhekacco puggalo ittarasaddho hoti ittarabhattī ittarapemo ittarappasādo.\nEvaṁ puggalo lolo hoti."}},{"id":"pp2.5:10","sourceIds":["pp2.5:10.1","pp2.5:10.2","pp2.5:10.3"],"kind":"text","text":{"pi":"Kathañca puggalo mando momūho hoti?\nIdhekacco puggalo kusalākusale dhamme na jānāti, sāvajjānavajje dhamme na jānāti, hīnappaṇīte dhamme na jānāti, kaṇhasukkasappaṭibhāge dhamme na jānāti.\nEvaṁ puggalo mando momūho hoti."}},{"id":"pp2.5:11","sourceIds":["pp2.5:11.1","pp2.5:11.2","pp2.5:11.3","pp2.5:11.4","pp2.5:11.5"],"kind":"text","text":{"pi":"Tattha katame pañca yodhājīvūpamā puggalā?\nPañca yodhājīvā—\nidhekacco yodhājīvo rajaggaññeva disvā saṁsīdati visīdati na santhambhati na sakkoti saṅgāmaṁ otarituṁ.\nEvarūpopi idhekacco yodhājīvo hoti.\nAyaṁ paṭhamo yodhājīvo santo saṁvijjamāno lokasmiṁ."}},{"id":"pp2.5:12","sourceIds":["pp2.5:12.1","pp2.5:12.2","pp2.5:12.3"],"kind":"text","text":{"pi":"Puna caparaṁ idhekacco yodhājīvo sahati rajaggaṁ, api ca kho dhajaggaññeva disvā saṁsīdati visīdati na santhambhati na sakkoti saṅgāmaṁ otarituṁ.\nEvarūpopi idhekacco yodhājīvo hoti.\nAyaṁ dutiyo yodhājīvo santo saṁvijjamāno lokasmiṁ."}},{"id":"pp2.5:13","sourceIds":["pp2.5:13.1","pp2.5:13.2","pp2.5:13.3"],"kind":"text","text":{"pi":"Puna caparaṁ idhekacco yodhājīvo sahati rajaggaṁ sahati dhajaggaṁ, api ca kho ussāraṇaññeva sutvā saṁsīdati visīdati na santhambhati na sakkoti saṅgāmaṁ otarituṁ.\nEvarūpopi idhekacco yodhājīvo hoti.\nAyaṁ tatiyo yodhājīvo santo saṁvijjamāno lokasmiṁ."}},{"id":"pp2.5:14","sourceIds":["pp2.5:14.1","pp2.5:14.2","pp2.5:14.3"],"kind":"text","text":{"pi":"Puna caparaṁ idhekacco yodhājīvo sahati rajaggaṁ sahati dhajaggaṁ sahati ussāraṇaṁ, api ca kho sampahāre haññati byāpajjati.\nEvarūpopi idhekacco yodhājīvo hoti.\nAyaṁ catuttho yodhājīvo santo saṁvijjamāno lokasmiṁ."}},{"id":"pp2.5:15","sourceIds":["pp2.5:15.1","pp2.5:15.2","pp2.5:15.3","pp2.5:15.4","pp2.5:15.5"],"kind":"text","text":{"pi":"Puna caparaṁ idhekacco yodhājīvo sahati rajaggaṁ sahati dhajaggaṁ sahati ussāraṇaṁ sahati sampahāraṁ.\nSo taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati.\nEvarūpopi idhekacco yodhājīvo hoti.\nAyaṁ pañcamo yodhājīvo santo saṁvijjamāno lokasmiṁ.\nIme pañca yodhājīvā santo saṁvijjamānā lokasmiṁ."}},{"id":"pp2.5:16","sourceIds":["pp2.5:16.1","pp2.5:16.2"],"kind":"text","text":{"pi":"Evamevaṁ pañcime yodhājīvūpamā puggalā santo saṁvijjamānā bhikkhūsu.\nKatame pañca?"}},{"id":"pp2.5:17","sourceIds":["pp2.5:17.1","pp2.5:17.2","pp2.5:17.3","pp2.5:17.4","pp2.5:17.5","pp2.5:17.6"],"kind":"text","text":{"pi":"Idhekacco bhikkhu rajaggaññeva disvā saṁsīdati visīdati na santhambhati na sakkoti brahmacariyaṁ sandhāretuṁ, sikkhādubbalyaṁ āvikatvā sikkhaṁ paccakkhāya hīnāyāvattati.\nKimassa rajaggasmiṁ?\nIdha bhikkhu suṇāti—\n“asukasmiṁ nāma gāme vā nigame vā itthī vā kumārī vā abhirūpā dassanīyā pāsādikā paramāya vaṇṇapokkharatāya samannāgatā”ti.\nSo taṁ sutvā saṁsīdati visīdati na santhambhati na sakkoti brahmacariyaṁ sandhāretuṁ, sikkhādubbalyaṁ āvikatvā sikkhaṁ paccakkhāya hīnāyāvattati.\nIdamassa rajaggasmiṁ."}},{"id":"pp2.5:18","sourceIds":["pp2.5:18.1","pp2.5:18.2","pp2.5:18.3"],"kind":"text","text":{"pi":"Seyyathāpi so yodhājīvo rajaggaññeva disvā saṁsīdati visīdati na santhambhati na sakkoti saṅgāmaṁ otarituṁ, tathūpamo ayaṁ puggalo.\nEvarūpopi idhekacco puggalo hoti.\nAyaṁ paṭhamo yodhājīvūpamo puggalo santo saṁvijjamāno bhikkhūsu."}},{"id":"pp2.5:19","sourceIds":["pp2.5:19.1","pp2.5:19.2","pp2.5:19.3","pp2.5:19.4","pp2.5:19.5","pp2.5:19.6"],"kind":"text","text":{"pi":"Puna caparaṁ idhekacco bhikkhu sahati rajaggaṁ, api ca kho dhajaggaññeva disvā saṁsīdati visīdati na santhambhati na sakkoti brahmacariyaṁ sandhāretuṁ, sikkhādubbalyaṁ āvikatvā sikkhaṁ paccakkhāya hīnāyāvattati.\nKimassa dhajaggasmiṁ?\nIdha bhikkhu na heva kho suṇāti—\n“asukasmiṁ nāma gāme vā nigame vā itthī vā kumārī vā abhirūpā dassanīyā pāsādikā paramāya vaṇṇapokkharatāya samannāgatā”ti, api ca kho sāmaṁ passati itthiṁ vā kumāriṁ vā abhirūpaṁ dassanīyaṁ pāsādikaṁ paramāya vaṇṇapokkharatāya samannāgataṁ.\nSo taṁ disvā saṁsīdati visīdati na santhambhati na sakkoti brahmacariyaṁ sandhāretuṁ, sikkhādubbalyaṁ āvikatvā sikkhaṁ paccakkhāya hīnāyāvattati.\nIdamassa dhajaggasmiṁ."}},{"id":"pp2.5:20","sourceIds":["pp2.5:20.1","pp2.5:20.2","pp2.5:20.3"],"kind":"text","text":{"pi":"Seyyathāpi so yodhājīvo sahati rajaggaṁ, api ca kho dhajaggaññeva disvā saṁsīdati visīdati na santhambhati na sakkoti saṅgāmaṁ otarituṁ, tathūpamo ayaṁ puggalo.\nEvarūpopi idhekacco puggalo hoti.\nAyaṁ dutiyo yodhājīvūpamo puggalo santo saṁvijjamāno bhikkhūsu."}},{"id":"pp2.5:21","sourceIds":["pp2.5:21.1","pp2.5:21.2","pp2.5:21.3","pp2.5:21.4","pp2.5:21.5"],"kind":"text","text":{"pi":"Puna caparaṁ idhekacco bhikkhu sahati rajaggaṁ sahati dhajaggaṁ, api ca kho ussāraṇaññeva sutvā saṁsīdati visīdati na santhambhati na sakkoti brahmacariyaṁ sandhāretuṁ, sikkhādubbalyaṁ āvikatvā sikkhaṁ paccakkhāya hīnāyāvattati.\nKimassa ussāraṇāya?\nIdha bhikkhuṁ araññagataṁ vā rukkhamūlagataṁ vā suññāgāragataṁ vā mātugāmo upasaṅkamitvā ūhasati ullapati ujjagghati uppaṇḍeti.\nSo mātugāmena ūhasiyamāno ullapiyamāno ujjagghiyamāno uppaṇḍiyamāno saṁsīdati visīdati na santhambhati na sakkoti brahmacariyaṁ sandhāretuṁ, sikkhādubbalyaṁ āvikatvā sikkhaṁ paccakkhāya hīnāyāvattati.\nIdamassa ussāraṇāya."}},{"id":"pp2.5:22","sourceIds":["pp2.5:22.1","pp2.5:22.2","pp2.5:22.3"],"kind":"text","text":{"pi":"Seyyathāpi so yodhājīvo sahati rajaggaṁ sahati dhajaggaṁ, api ca kho ussāraṇaññeva sutvā saṁsīdati visīdati na santhambhati na sakkoti saṅgāmaṁ otarituṁ, tathūpamo ayaṁ puggalo.\nEvarūpopi idhekacco puggalo hoti.\nAyaṁ tatiyo yodhājīvūpamo puggalo santo saṁvijjamāno bhikkhūsu."}},{"id":"pp2.5:23","sourceIds":["pp2.5:23.1","pp2.5:23.2","pp2.5:23.3","pp2.5:23.4","pp2.5:23.5"],"kind":"text","text":{"pi":"Puna caparaṁ idhekacco bhikkhu sahati rajaggaṁ sahati dhajaggaṁ sahati ussāraṇaṁ, api ca kho sampahāre haññati byāpajjati.\nKimassa sampahārasmiṁ?\nIdha bhikkhuṁ araññagataṁ vā rukkhamūlagataṁ vā suññāgāragataṁ vā mātugāmo upasaṅkamitvā abhinisīdati abhinipajjati ajjhottharati.\nSo mātugāmena abhinisīdiyamāno abhinipajjiyamāno ajjhotthariyamāno sikkhaṁ appaccakkhāya dubbalyaṁ anāvikatvā methunaṁ dhammaṁ paṭisevati.\nIdamassa sampahārasmiṁ."}},{"id":"pp2.5:24","sourceIds":["pp2.5:24.1","pp2.5:24.2","pp2.5:24.3"],"kind":"text","text":{"pi":"Seyyathāpi so yodhājīvo sahati rajaggaṁ sahati dhajaggaṁ sahati ussāraṇaṁ, api ca kho sampahāre haññati byāpajjati, tathūpamo ayaṁ puggalo.\nEvarūpopi idhekacco puggalo hoti.\nAyaṁ catuttho yodhājīvūpamo puggalo santo saṁvijjamāno bhikkhūsu."}},{"id":"pp2.5:25","sourceIds":["pp2.5:25.1","pp2.5:25.2","pp2.5:25.3","pp2.5:25.4","pp2.5:25.5"],"kind":"text","text":{"pi":"Puna caparaṁ idhekacco bhikkhu sahati rajaggaṁ sahati dhajaggaṁ sahati ussāraṇaṁ sahati sampahāraṁ.\nSo taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati.\nKimassa saṅgāmavijayasmiṁ?\nIdha bhikkhuṁ araññagataṁ vā rukkhamūlagataṁ vā suññāgāragataṁ vā mātugāmo upasaṅkamitvā abhinisīdati abhinipajjati ajjhottharati.\nSo mātugāmena abhinisīdiyamāno abhinipajjiyamāno ajjhotthariyamāno viniveṭhetvā vinimocetvā yena kāmaṁ pakkamati."}},{"id":"pp2.5:26","sourceIds":["pp2.5:26.1","pp2.5:26.2","pp2.5:26.3","pp2.5:26.4","pp2.5:26.5","pp2.5:26.6","pp2.5:26.7"],"kind":"text","text":{"pi":"So vivittaṁ senāsanaṁ bhajati araññaṁ rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ palālapuñjaṁ.\nSo araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.\nSo abhijjhaṁ loke pahāya vigatābhijjhena cetasā viharati, abhijjhāya cittaṁ parisodheti;\nbyāpādapadosaṁ pahāya abyāpannacitto viharati, sabbapāṇabhūtahitānukampī byāpādapadosā cittaṁ parisodheti;\nthinamiddhaṁ pahāya vigatathinamiddho viharati ālokasaññī sato sampajāno, thinamiddhā cittaṁ parisodheti;\nuddhaccakukkuccaṁ pahāya anuddhato viharati ajjhattaṁ vūpasantacitto, uddhaccakukkuccā cittaṁ parisodheti;\nvicikicchaṁ pahāya tiṇṇavicikiccho viharati akathaṅkathī kusalesu dhammesu, vicikicchāya cittaṁ parisodheti."}},{"id":"pp2.5:27","sourceIds":["pp2.5:27.1","pp2.5:27.2","pp2.5:27.3","pp2.5:27.4"],"kind":"text","text":{"pi":"So ime pañca nīvaraṇe pahāya cetaso upakkilese paññāya dubbalīkaraṇe vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati;\nvitakkavicārānaṁ vūpasamā dutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ upasampajja viharati."}},{"id":"pp2.5:28","sourceIds":["pp2.5:28.1","pp2.5:28.2","pp2.5:28.3"],"kind":"text","text":{"pi":"So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṁ khayañāṇāya cittaṁ abhininnāmeti.\nSo “idaṁ dukkhan”ti yathābhūtaṁ pajānāti, “ayaṁ dukkhasamudayo”ti yathābhūtaṁ pajānāti, “ayaṁ dukkhanirodho”ti yathābhūtaṁ pajānāti, “ayaṁ dukkhanirodhagāminī paṭipadā”ti yathābhūtaṁ pajānāti,\n“ime āsavā”ti yathābhūtaṁ pajānāti, “ayaṁ āsavasamudayo”ti yathābhūtaṁ pajānāti, “ayaṁ āsavanirodho”ti yathābhūtaṁ pajānāti, “ayaṁ āsavanirodhagāminī paṭipadā”ti yathābhūtaṁ pajānāti."}},{"id":"pp2.5:29","sourceIds":["pp2.5:29.1","pp2.5:29.2","pp2.5:29.3","pp2.5:29.4","pp2.5:29.5","pp2.5:29.6","pp2.5:29.7"],"kind":"text","text":{"pi":"Tassa evaṁ jānato evaṁ passato kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccati.\nVimuttasmiṁ vimuttamiti ñāṇaṁ hoti.\n“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti pajānāti.\nIdamassa saṅgāmavijayasmiṁ.\nSeyyathāpi so yodhājīvo sahati rajaggaṁ sahati dhajaggaṁ sahati ussāraṇaṁ sahati sampahāraṁ, so taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati, tathūpamo ayaṁ puggalo.\nEvarūpopi idhekacco puggalo hoti.\nAyaṁ pañcamo yodhājīvūpamo puggalo santo saṁvijjamāno bhikkhūsu."}},{"id":"pp2.5:30","sourceIds":["pp2.5:30.1"],"kind":"text","text":{"pi":"Ime pañca yodhājīvūpamā puggalā santo saṁvijjamānā bhikkhūsu."}},{"id":"pp2.5:31","sourceIds":["pp2.5:31.1","pp2.5:31.2","pp2.5:31.3"],"kind":"text","text":{"pi":"Tattha katame pañca piṇḍapātikā?\nMandattā momūhattā piṇḍapātiko hoti, pāpiccho icchāpakato piṇḍapātiko hoti, ummādā cittavikkhepā piṇḍapātiko hoti, “vaṇṇitaṁ buddhehi buddhasāvakehī”ti piṇḍapātiko hoti, api ca appicchataṁyeva nissāya santuṭṭhiṁyeva nissāya sallekhaṁyeva nissāya idamatthitaṁyeva nissāya piṇḍapātiko hoti.\nTatra yvāyaṁ piṇḍapātiko appicchataṁyeva nissāya santuṭṭhiṁyeva nissāya sallekhaṁyeva nissāya idamatthitaṁyeva nissāya piṇḍapātiko, ayaṁ imesaṁ pañcannaṁ piṇḍapātikānaṁ aggo ca seṭṭho ca pāmokkho ca uttamo ca pavaro ca."}},{"id":"pp2.5:32","sourceIds":["pp2.5:32.1","pp2.5:32.2","pp2.5:32.3"],"kind":"text","text":{"pi":"Seyyathāpi nāma gavā khīraṁ, khīramhā dadhi, dadhimhā navanītaṁ, navanītamhā sappi, sappimhā sappimaṇḍo, sappimaṇḍaṁ tattha aggamakkhāyati;\nevamevaṁ yvāyaṁ piṇḍapātiko appicchataṁyeva nissāya santuṭṭhiṁyeva nissāya sallekhaṁyeva nissāya idamatthitaṁyeva nissāya piṇḍapātiko hoti, ayaṁ imesaṁ pañcannaṁ piṇḍapātikānaṁ aggo ca seṭṭho ca pāmokkho ca uttamo ca pavaro ca.\nIme pañca piṇḍapātikā."}},{"id":"pp2.5:33","sourceIds":["pp2.5:33.1","pp2.5:33.2","pp2.5:33.3","pp2.5:33.4","pp2.5:33.5","pp2.5:33.6","pp2.5:33.7","pp2.5:33.8","pp2.5:33.9"],"kind":"text","text":{"pi":"Tattha katame pañca khalupacchābhattikā …pe…\npañca ekāsanikā …pe…\npañca paṁsukūlikā …pe…\npañca tecīvarikā …pe…\npañca āraññikā …pe…\npañca rukkhamūlikā …pe…\npañca abbhokāsikā …pe…\npañca nesajjikā …pe…\npañca yathāsanthatikā …pe…."}},{"id":"pp2.5:34","sourceIds":["pp2.5:34.1","pp2.5:34.2","pp2.5:34.3"],"kind":"text","text":{"pi":"Tattha katame pañca sosānikā?\nMandattā momūhattā sosāniko hoti, pāpiccho icchāpakato sosāniko hoti, ummādā cittavikkhepā sosāniko hoti, “vaṇṇitaṁ buddhehi buddhasāvakehī”ti sosāniko hoti, api ca appicchataṁyeva nissāya santuṭṭhiṁyeva nissāya sallekhaṁyeva nissāya idamatthitaṁyeva nissāya sosāniko hoti.\nTatra yvāyaṁ sosāniko appicchataṁyeva nissāya santuṭṭhiṁyeva nissāya sallekhaṁyeva nissāya idamatthitaṁyeva nissāya sosāniko, ayaṁ imesaṁ pañcannaṁ sosānikānaṁ aggo ca seṭṭho ca pāmokkho ca uttamo ca pavaro ca."}},{"id":"pp2.5:35","sourceIds":["pp2.5:35.1","pp2.5:35.2","pp2.5:35.3"],"kind":"text","text":{"pi":"Seyyathāpi nāma gavā khīraṁ, khīramhā dadhi, dadhimhā navanītaṁ, navanītamhā sappi, sappimhā sappimaṇḍo, sappimaṇḍaṁ tattha aggamakkhāyati;\nevamevaṁ yvāyaṁ sosāniko appicchataṁyeva nissāya santuṭṭhiṁyeva nissāya sallekhaṁyeva nissāya idamatthitaṁyeva nissāya sosāniko hoti, ayaṁ imesaṁ pañcannaṁ sosānikānaṁ aggo ca seṭṭho ca pāmokkho ca uttamo ca pavaro ca.\nIme pañca sosānikā."}},{"id":"pp2.5:36","sourceIds":["pp2.5:36.1"],"kind":"text","text":{"pi":"Pañcakaniddeso."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/pp2.5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}