{"id":"ps1.6","title":"1.6. Gatikathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps1.6","title":"1.6. Gatikathā","units":[{"id":"ps1.6:0","sourceIds":["ps1.6:0.1","ps1.6:0.2","ps1.6:0.3"],"kind":"text","text":{"pi":"Paṭisambhidāmagga\n1 Mahāvagga\n1.6. Gatikathā"}},{"id":"ps1.6:1","sourceIds":["ps1.6:1.1","ps1.6:1.2","ps1.6:1.3","ps1.6:1.4"],"kind":"text","text":{"pi":"Gatisampattiyā ñāṇasampayutte katinaṁ hetūnaṁ paccayā upapatti hoti?\nKhattiyamahāsālānaṁ brāhmaṇamahāsālānaṁ gahapatimahāsālānaṁ kāmāvacarānaṁ devānaṁ ñāṇasampayutte katinaṁ hetūnaṁ paccayā upapatti hoti?\nRūpāvacarānaṁ devānaṁ katinaṁ hetūnaṁ paccayā upapatti hoti?\nArūpāvacarānaṁ devānaṁ katinaṁ hetūnaṁ paccayā upapatti hoti?"}},{"id":"ps1.6:2","sourceIds":["ps1.6:2.1","ps1.6:2.2","ps1.6:2.3","ps1.6:2.4"],"kind":"text","text":{"pi":"Gatisampattiyā ñāṇasampayutte aṭṭhannaṁ hetūnaṁ paccayā upapatti hoti.\nKhattiyamahāsālānaṁ brāhmaṇamahāsālānaṁ gahapatimahāsālānaṁ kāmāvacarānaṁ devānaṁ ñāṇasampayutte aṭṭhannaṁ hetūnaṁ paccayā upapatti hoti.\nRūpāvacarānaṁ devānaṁ aṭṭhannaṁ hetūnaṁ paccayā upapatti hoti.\nArūpāvacarānaṁ devānaṁ aṭṭhannaṁ hetūnaṁ paccayā upapatti hoti."}},{"id":"ps1.6:3","sourceIds":["ps1.6:3.1","ps1.6:3.2","ps1.6:3.3","ps1.6:3.4","ps1.6:3.5","ps1.6:3.6","ps1.6:3.7","ps1.6:3.8","ps1.6:3.9","ps1.6:3.10","ps1.6:3.11","ps1.6:3.12","ps1.6:3.13"],"kind":"text","text":{"pi":"Gatisampattiyā ñāṇasampayutte katamesaṁ aṭṭhannaṁ hetūnaṁ paccayā upapatti hoti?\nKusalakammassa javanakkhaṇe tayo hetū kusalā;\ntasmiṁ khaṇe jātacetanāya sahajātapaccayā honti.\nTena vuccati—\nkusalamūlapaccayāpi saṅkhārā.\nNikantikkhaṇe dve hetū akusalā;\ntasmiṁ khaṇe jātacetanāya sahajātapaccayā honti.\nTena vuccati—\nakusalamūlapaccayāpi saṅkhārā.\nPaṭisandhikkhaṇe tayo hetū abyākatā;\ntasmiṁ khaṇe jātacetanāya sahajātapaccayā honti.\nTena vuccati—\n“nāmarūpapaccayāpi viññāṇaṁ, viññāṇapaccayāpi nāmarūpaṁ”."}},{"id":"ps1.6:4","sourceIds":["ps1.6:4.1","ps1.6:4.2","ps1.6:4.3","ps1.6:4.4","ps1.6:4.5","ps1.6:4.6","ps1.6:4.7","ps1.6:4.8","ps1.6:4.9","ps1.6:4.10","ps1.6:4.11","ps1.6:4.12"],"kind":"text","text":{"pi":"Paṭisandhikkhaṇe pañcakkhandhā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe cattāro mahābhūtā sahajātapaccayā honti, aññamaññapaccayā honti, nissayapaccayā honti.\nPaṭisandhikkhaṇe tayo jīvitasaṅkhārā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe nāmañca rūpañca sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe cattāro khandhā arūpino sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe pañcindriyāni sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe tayo hetū sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe nāmañca viññāṇañca sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe ime aṭṭhavīsati dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nGatisampattiyā ñāṇasampayutte imesaṁ aṭṭhannaṁ hetūnaṁ paccayā upapatti hoti."}},{"id":"ps1.6:5","sourceIds":["ps1.6:5.1","ps1.6:5.2","ps1.6:5.3","ps1.6:5.4","ps1.6:5.5","ps1.6:5.6","ps1.6:5.7","ps1.6:5.8","ps1.6:5.9","ps1.6:5.10","ps1.6:5.11","ps1.6:5.12","ps1.6:5.13"],"kind":"text","text":{"pi":"Khattiyamahāsālānaṁ brāhmaṇamahāsālānaṁ gahapatimahāsālānaṁ kāmāvacarānaṁ devānaṁ ñāṇasampayutte katamesaṁ aṭṭhannaṁ hetūnaṁ paccayā upapatti hoti?\nKusalakammassa javanakkhaṇe tayo hetū kusalā;\ntasmiṁ khaṇe jātacetanāya sahajātapaccayā honti.\nTena vuccati—\n“kusalamūlapaccayāpi saṅkhārā”.\nNikantikkhaṇe dve hetū akusalā;\ntasmiṁ khaṇe jātacetanāya sahajātapaccayā honti.\nTena vuccati—\n“akusalamūlapaccayāpi saṅkhārā”.\nPaṭisandhikkhaṇe tayo hetū abyākatā;\ntasmiṁ khaṇe jātacetanāya sahajātapaccayā honti.\nTena vuccati—\n“nāmarūpapaccayāpi viññāṇaṁ, viññāṇapaccayāpi nāmarūpaṁ”."}},{"id":"ps1.6:6","sourceIds":["ps1.6:6.1","ps1.6:6.2","ps1.6:6.3","ps1.6:6.4","ps1.6:6.5","ps1.6:6.6","ps1.6:6.7","ps1.6:6.8","ps1.6:6.9","ps1.6:6.10","ps1.6:6.11","ps1.6:6.12"],"kind":"text","text":{"pi":"Paṭisandhikkhaṇe pañcakkhandhā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe cattāro mahābhūtā sahajātapaccayā honti, aññamaññapaccayā honti, nissayapaccayā honti.\nPaṭisandhikkhaṇe tayo jīvitasaṅkhārā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe nāmañca rūpañca sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe cattāro khandhā arūpino sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe pañcindriyāni sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe tayo hetū sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe nāmañca viññāṇañca sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe ime aṭṭhavīsati dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nKhattiyamahāsālānaṁ brāhmaṇamahāsālānaṁ gahapatimahāsālānaṁ kāmāvacarānaṁ devānaṁ ñāṇasampayutte imesaṁ aṭṭhannaṁ hetūnaṁ paccayā upapatti hoti."}},{"id":"ps1.6:7","sourceIds":["ps1.6:7.1","ps1.6:7.2","ps1.6:7.3"],"kind":"text","text":{"pi":"Rūpāvacarānaṁ devānaṁ katamesaṁ aṭṭhannaṁ hetūnaṁ paccayā upapatti hoti?\nKusalakammassa javanakkhaṇe tayo hetū kusalā …pe…\nrūpāvacarānaṁ devānaṁ imesaṁ aṭṭhannaṁ hetūnaṁ paccayā upapatti hoti."}},{"id":"ps1.6:8","sourceIds":["ps1.6:8.1","ps1.6:8.2","ps1.6:8.3","ps1.6:8.4","ps1.6:8.5","ps1.6:8.6","ps1.6:8.7","ps1.6:8.8","ps1.6:8.9","ps1.6:8.10","ps1.6:8.11","ps1.6:8.12","ps1.6:8.13"],"kind":"text","text":{"pi":"Arūpāvacarānaṁ devānaṁ katamesaṁ aṭṭhannaṁ hetūnaṁ paccayā upapatti hoti?\nKusalakammassa javanakkhaṇe tayo hetū kusalā;\ntasmiṁ khaṇe jātacetanāya sahajātapaccayā honti.\nTena vuccati—\n“kusalamūlapaccayāpi saṅkhārā”.\nNikantikkhaṇe dve hetū akusalā;\ntasmiṁ khaṇe jātacetanāya sahajātapaccayā honti.\nTena vuccati—\n“akusalamūlapaccayāpi saṅkhārā”.\nPaṭisandhikkhaṇe tayo hetū abyākatā;\ntasmiṁ khaṇe jātacetanāya sahajātapaccayā honti.\nTena vuccati—\n“nāmapaccayāpi viññāṇaṁ viññāṇapaccayāpi nāmaṁ”."}},{"id":"ps1.6:9","sourceIds":["ps1.6:9.1","ps1.6:9.2","ps1.6:9.3","ps1.6:9.4","ps1.6:9.5","ps1.6:9.6"],"kind":"text","text":{"pi":"Paṭisandhikkhaṇe cattāro khandhā arūpino sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe pañcindriyāni sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe tayo hetū sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe nāmañca viññāṇañca sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nArūpāvacarānaṁ devānaṁ imesaṁ aṭṭhannaṁ hetūnaṁ paccayā upapatti hoti."}},{"id":"ps1.6:10","sourceIds":["ps1.6:10.1","ps1.6:10.2"],"kind":"text","text":{"pi":"Gatisampattiyā ñāṇavippayutte katinaṁ hetūnaṁ paccayā upapatti hoti?\nKhattiyamahāsālānaṁ brāhmaṇamahāsālānaṁ gahapatimahāsālānaṁ kāmāvacarānaṁ devānaṁ ñāṇavippayutte katinaṁ hetūnaṁ paccayā upapatti hoti?"}},{"id":"ps1.6:11","sourceIds":["ps1.6:11.1","ps1.6:11.2"],"kind":"text","text":{"pi":"Gatisampattiyā ñāṇavippayutte channaṁ hetūnaṁ paccayā upapatti hoti.\nKhattiyamahāsālānaṁ brāhmaṇamahāsālānaṁ gahapatimahāsālānaṁ kāmāvacarānaṁ devānaṁ ñāṇavippayutte channaṁ hetūnaṁ paccayā upapatti hoti."}},{"id":"ps1.6:12","sourceIds":["ps1.6:12.1","ps1.6:12.2","ps1.6:12.3","ps1.6:12.4","ps1.6:12.5","ps1.6:12.6","ps1.6:12.7","ps1.6:12.8","ps1.6:12.9","ps1.6:12.10","ps1.6:12.11","ps1.6:12.12","ps1.6:12.13"],"kind":"text","text":{"pi":"Gatisampattiyā ñāṇavippayutte katamesaṁ channaṁ hetūnaṁ paccayā upapatti hoti?\nKusalakammassa javanakkhaṇe dve hetū kusalā;\ntasmiṁ khaṇe jātacetanāya sahajātapaccayā honti.\nTena vuccati—\n“kusalamūlapaccayāpi saṅkhārā”.\nNikantikkhaṇe dve hetū akusalā;\ntasmiṁ khaṇe jātacetanāya sahajātapaccayā honti.\nTena vuccati—\n“akusalamūlapaccayāpi saṅkhārā”.\nPaṭisandhikkhaṇe dve hetū abyākatā;\ntasmiṁ khaṇe jātacetanāya sahajātapaccayā honti.\nTena vuccati—\n“nāmarūpapaccayāpi viññāṇaṁ, viññāṇapaccayāpi nāmarūpaṁ”."}},{"id":"ps1.6:13","sourceIds":["ps1.6:13.1","ps1.6:13.2","ps1.6:13.3","ps1.6:13.4","ps1.6:13.5","ps1.6:13.6","ps1.6:13.7","ps1.6:13.8","ps1.6:13.9","ps1.6:13.10","ps1.6:13.11","ps1.6:13.12"],"kind":"text","text":{"pi":"Paṭisandhikkhaṇe pañcakkhandhā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe cattāro mahābhūtā sahajātapaccayā honti, aññamaññapaccayā honti, nissayapaccayā honti.\nPaṭisandhikkhaṇe tayo jīvitasaṅkhārā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe nāmañca rūpañca sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nPaṭisandhikkhaṇe cattāro khandhā arūpino sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe cattāri indriyāni sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe dve hetū sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe nāmañca viññāṇañca sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe ime dvādasa dhammā sahajātapaccayā honti, aññamaññapaccayā honti, nissayapaccayā honti, sampayuttapaccayā honti.\nPaṭisandhikkhaṇe ime chabbīsati dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti.\nGatisampattiyā ñāṇavippayutte imesaṁ channaṁ hetūnaṁ paccayā upapatti hoti."}},{"id":"ps1.6:14","sourceIds":["ps1.6:14.1","ps1.6:14.2","ps1.6:14.3","ps1.6:14.4","ps1.6:14.5","ps1.6:14.6","ps1.6:14.7"],"kind":"text","text":{"pi":"Khattiyamahāsālānaṁ brāhmaṇamahāsālānaṁ gahapatimahāsālānaṁ kāmāvacarānaṁ devānaṁ ñāṇavippayutte katamesaṁ channaṁ hetūnaṁ paccayā upapatti hoti?\nKusalakammassa javanakkhaṇe dve hetū kusalā;\ntasmiṁ khaṇe jātacetanāya sahajātapaccayā honti.\nTena vuccati—\n“kusalamūlapaccayāpi saṅkhārā …pe…\nkhattiyamahāsālānaṁ brāhmaṇamahāsālānaṁ gahapatimahāsālānaṁ kāmāvacarānaṁ devānaṁ ñāṇavippayutte imesaṁ channaṁ hetūnaṁ paccayā upapatti hotī”ti.\nGatikathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps1.6/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}