{"id":"ps1.8","title":"1.8. Vipallāsakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps1.8","title":"1.8. Vipallāsakathā","units":[{"id":"ps1.8:0","sourceIds":["ps1.8:0.1","ps1.8:0.2","ps1.8:0.3"],"kind":"text","text":{"pi":"Paṭisambhidāmagga\n1 Mahāvagga\n1.8. Vipallāsakathā"}},{"id":"ps1.8:1","sourceIds":["ps1.8:1.1","ps1.8:1.2","ps1.8:1.3","ps1.8:1.4","ps1.8:1.5","ps1.8:1.6","ps1.8:1.7","ps1.8:1.8"],"kind":"text","text":{"pi":"Purimanidānaṁ.\n“Cattārome, bhikkhave, saññāvipallāsā cittavipallāsā diṭṭhivipallāsā.\nKatame cattāro?\nAnicce, bhikkhave, niccanti saññāvipallāso cittavipallāso diṭṭhivipallāso.\nDukkhe, bhikkhave, sukhanti saññāvipallāso cittavipallāso diṭṭhivipallāso.\nAnattani, bhikkhave, attāti saññāvipallāso cittavipallāso diṭṭhivipallāso.\nAsubhe, bhikkhave, subhanti saññāvipallāso cittavipallāso diṭṭhivipallāso.\nIme kho, bhikkhave, cattāro saññāvipallāsā cittavipallāsā diṭṭhivipallāsā."}},{"id":"ps1.8:2","sourceIds":["ps1.8:2.1","ps1.8:2.2","ps1.8:2.3","ps1.8:2.4","ps1.8:2.5","ps1.8:2.6","ps1.8:2.7"],"kind":"text","text":{"pi":"Cattārome, bhikkhave, nasaññāvipallāsā nacittavipallāsā nadiṭṭhivipallāsā.\nKatame cattāro?\nAnicce, bhikkhave, aniccanti nasaññāvipallāso nacittavipallāso nadiṭṭhivipallāso.\nDukkhe, bhikkhave, dukkhanti nasaññāvipallāso nacittavipallāso nadiṭṭhivipallāso.\nAnattani, bhikkhave, anattāti nasaññāvipallāso nacittavipallāso nadiṭṭhivipallāso.\nAsubhe, bhikkhave, asubhanti nasaññāvipallāso nacittavipallāso nadiṭṭhivipallāso.\nIme kho, bhikkhave, cattāro nasaññāvipallāsā nacittavipallāsā nadiṭṭhivipallāsā”ti."}},{"id":"ps1.8:3","sourceIds":["ps1.8:3.1","ps1.8:3.2","ps1.8:3.3","ps1.8:3.4","ps1.8:3.5","ps1.8:3.6"],"kind":"text","text":{"pi":"“Anicce niccasaññino,\ndukkhe ca sukhasaññino;\nAnattani ca attāti,\nasubhe subhasaññino;\nMicchādiṭṭhihatā sattā,\nkhittacittā visaññino."}},{"id":"ps1.8:4","sourceIds":["ps1.8:4.1","ps1.8:4.2","ps1.8:4.3","ps1.8:4.4"],"kind":"text","text":{"pi":"Te yogayuttā mārassa,\nayogakkhemino janā;\nSattā gacchanti saṁsāraṁ,\njātimaraṇagāmino."}},{"id":"ps1.8:5","sourceIds":["ps1.8:5.1","ps1.8:5.2","ps1.8:5.3","ps1.8:5.4"],"kind":"text","text":{"pi":"Yadā ca buddhā lokasmiṁ,\nuppajjanti pabhaṅkarā;\nTe imaṁ dhammaṁ pakāsenti,\ndukkhūpasamagāminaṁ."}},{"id":"ps1.8:6","sourceIds":["ps1.8:6.1","ps1.8:6.2","ps1.8:6.3","ps1.8:6.4"],"kind":"text","text":{"pi":"Tesaṁ sutvāna sappaññā,\nsacittaṁ paccaladdhu te;\nAniccaṁ aniccato dakkhuṁ,\ndukkhamaddakkhu dukkhato."}},{"id":"ps1.8:7","sourceIds":["ps1.8:7.1","ps1.8:7.2","ps1.8:7.3","ps1.8:7.4"],"kind":"text","text":{"pi":"Anattani anattāti,\nasubhaṁ asubhataddasuṁ;\nSammādiṭṭhisamādānā,\nsabbaṁ dukkhaṁ upaccagun”ti."}},{"id":"ps1.8:8","sourceIds":["ps1.8:8.1","ps1.8:8.2","ps1.8:8.3","ps1.8:8.4","ps1.8:8.5","ps1.8:8.6","ps1.8:8.7","ps1.8:8.8","ps1.8:8.9","ps1.8:8.10"],"kind":"text","text":{"pi":"Ime cattāro vipallāsā diṭṭhisampannassa puggalassa pahīnā, appahīnāti.\nKeci pahīnā, keci appahīnā?\nAnicce niccanti saññāvipallāso cittavipallāso diṭṭhivipallāso pahīno.\nDukkhe sukhanti saññā uppajjati, cittaṁ uppajjati, diṭṭhivipallāso pahīno.\nAnattani attāti saññāvipallāso cittavipallāso diṭṭhivipallāso pahīno.\nAsubhe subhanti saññā uppajjati, cittaṁ uppajjati, diṭṭhivipallāso pahīno.\nDvīsu vatthūsu cha vipallāsā pahīnā.\nDvīsu vatthūsu dve vipallāsā pahīnā, cattāro vipallāsā appahīnā.\nCatūsu vatthūsu aṭṭha vipallāsā pahīnā, cattāro vipallāsā appahīnāti.\nVipallāsakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps1.8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}