{"id":"ps2.1","title":"2.1. Yuganaddhakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps2.1","title":"2.1. Yuganaddhakathā","units":[{"id":"ps2.1:0","sourceIds":["ps2.1:0.1","ps2.1:0.2","ps2.1:0.3"],"kind":"text","text":{"pi":"Paṭisambhidāmagga\n2 Yuganaddhavagga\n2.1. Yuganaddhakathā"}},{"id":"ps2.1:1","sourceIds":["ps2.1:1.1","ps2.1:1.2","ps2.1:1.3","ps2.1:1.4","ps2.1:1.5","ps2.1:1.6"],"kind":"text","text":{"pi":"Evaṁ me sutaṁ—\nekaṁ samayaṁ āyasmā ānando kosambiyaṁ viharati ghositārāme.\nTatra kho āyasmā ānando bhikkhū āmantesi—\n“āvuso bhikkhavo”ti.\n“Āvuso”ti kho te bhikkhū āyasmato ānandassa paccassosuṁ.\nĀyasmā ānando etadavoca—"}},{"id":"ps2.1:2","sourceIds":["ps2.1:2.1","ps2.1:2.2"],"kind":"text","text":{"pi":"“Yo hi koci, āvuso, bhikkhu vā bhikkhunī vā mama santike arahattappattaṁ byākaroti, sabbaso catūhi maggehi etesaṁ vā aññatarena.\nKatamehi catūhi?"}},{"id":"ps2.1:3","sourceIds":["ps2.1:3.1","ps2.1:3.2","ps2.1:3.3","ps2.1:3.4"],"kind":"text","text":{"pi":"Idhāvuso, bhikkhu samathapubbaṅgamaṁ vipassanaṁ bhāveti.\nTassa samathapubbaṅgamaṁ vipassanaṁ bhāvayato maggo sañjāyati.\nSo taṁ maggaṁ āsevati bhāveti bahulīkaroti.\nTassa taṁ maggaṁ āsevato bhāvayato bahulīkaroto saññojanāni pahīyanti, anusayā byantīhonti."}},{"id":"ps2.1:4","sourceIds":["ps2.1:4.1","ps2.1:4.2","ps2.1:4.3","ps2.1:4.4"],"kind":"text","text":{"pi":"Puna caparaṁ, āvuso, bhikkhu vipassanāpubbaṅgamaṁ samathaṁ bhāveti.\nTassa vipassanāpubbaṅgamaṁ samathaṁ bhāvayato maggo sañjāyati.\nSo taṁ maggaṁ āsevati bhāveti bahulīkaroti.\nTassa taṁ maggaṁ āsevato bhāvayato bahulīkaroto saññojanāni pahīyanti, anusayā byantīhonti."}},{"id":"ps2.1:5","sourceIds":["ps2.1:5.1","ps2.1:5.2","ps2.1:5.3","ps2.1:5.4"],"kind":"text","text":{"pi":"Puna caparaṁ, āvuso, bhikkhu samathavipassanaṁ yuganaddhaṁ bhāveti.\nTassa samathavipassanaṁ yuganaddhaṁ bhāvayato maggo sañjāyati.\nSo taṁ maggaṁ āsevati bhāveti bahulīkaroti.\nTassa taṁ maggaṁ āsevato bhāvayato bahulīkaroto saññojanāni pahīyanti, anusayā byantīhonti."}},{"id":"ps2.1:6","sourceIds":["ps2.1:6.1","ps2.1:6.2","ps2.1:6.3","ps2.1:6.4","ps2.1:6.5"],"kind":"text","text":{"pi":"Puna caparaṁ, āvuso, bhikkhuno dhammuddhaccaviggahitaṁ mānasaṁ hoti;\nhoti so, āvuso, samayo yaṁ taṁ cittaṁ ajjhattameva santiṭṭhati sannisīdati ekodi hoti samādhiyati.\nTassa maggo sañjāyati.\nSo taṁ maggaṁ āsevati bhāveti bahulīkaroti.\nTassa taṁ maggaṁ āsevato bhāvayato bahulīkaroto saññojanāni pahīyanti, anusayā byantīhonti."}},{"id":"ps2.1:7","sourceIds":["ps2.1:7.1"],"kind":"text","text":{"pi":"Yo hi koci, āvuso, bhikkhu vā bhikkhunī vā mama santike arahattappattaṁ byākaroti, sabbaso imehi catūhi maggehi, etesaṁ vā aññatarenā”ti."}},{"id":"ps2.1:8","sourceIds":["ps2.1:8.0","ps2.1:8.1","ps2.1:8.2","ps2.1:8.3","ps2.1:8.4","ps2.1:8.5","ps2.1:8.6","ps2.1:8.7","ps2.1:8.8"],"kind":"text","text":{"pi":"2.1.1. Suttantaniddesa\nKathaṁ samathapubbaṅgamaṁ vipassanaṁ bhāveti?\nNekkhammavasena cittassa ekaggatā avikkhepo samādhi.\nTattha jāte dhamme aniccato anupassanaṭṭhena vipassanā, dukkhato anupassanaṭṭhena vipassanā, anattato anupassanaṭṭhena vipassanā.\nIti paṭhamaṁ samatho, pacchā vipassanā.\nTena vuccati—\n“samathapubbaṅgamaṁ vipassanaṁ bhāvetī”ti.\nBhāvetīti catasso bhāvanā—\ntattha jātānaṁ dhammānaṁ anativattanaṭṭhena bhāvanā, indriyānaṁ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā."}},{"id":"ps2.1:9","sourceIds":["ps2.1:9.1","ps2.1:9.2","ps2.1:9.3"],"kind":"text","text":{"pi":"Maggo sañjāyatīti kathaṁ maggo sañjāyati?\nDassanaṭṭhena sammādiṭṭhi maggo sañjāyati, abhiniropanaṭṭhena sammāsaṅkappo maggo sañjāyati, pariggahaṭṭhena sammāvācā maggo sañjāyati, samuṭṭhānaṭṭhena sammākammanto maggo sañjāyati, vodānaṭṭhena sammāājīvo maggo sañjāyati, paggahaṭṭhena sammāvāyāmo maggo sañjāyati, upaṭṭhānaṭṭhena sammāsati maggo sañjāyati, avikkhepaṭṭhena sammāsamādhi maggo sañjāyati—\nevaṁ maggo sañjāyati."}},{"id":"ps2.1:10","sourceIds":["ps2.1:10.1","ps2.1:10.2","ps2.1:10.3"],"kind":"text","text":{"pi":"So taṁ maggaṁ āsevati bhāveti bahulīkaroti āsevatīti kathaṁ āsevati?\nĀvajjanto āsevati, jānanto āsevati, passanto āsevati, paccavekkhanto āsevati, cittaṁ adhiṭṭhahanto āsevati, saddhāya adhimuccanto āsevati, vīriyaṁ paggaṇhanto āsevati, satiṁ upaṭṭhāpento āsevati, cittaṁ samādahanto āsevati, paññāya pajānanto āsevati, abhiññeyyaṁ abhijānanto āsevati, pariññeyyaṁ parijānanto āsevati, pahātabbaṁ pajahanto āsevati, bhāvetabbaṁ bhāvento āsevati, sacchikātabbaṁ sacchikaronto āsevati—\nevaṁ āsevati."}},{"id":"ps2.1:11","sourceIds":["ps2.1:11.1","ps2.1:11.2","ps2.1:11.3"],"kind":"text","text":{"pi":"Bhāvetīti kathaṁ bhāveti?\nĀvajjanto bhāveti, jānanto bhāveti, passanto bhāveti, paccavekkhanto bhāveti, cittaṁ adhiṭṭhahanto bhāveti, saddhāya adhimuccanto bhāveti, vīriyaṁ paggaṇhanto bhāveti, satiṁ upaṭṭhāpento bhāveti, cittaṁ samādahanto bhāveti, paññāya pajānanto bhāveti, abhiññeyyaṁ abhijānanto bhāveti, pariññeyyaṁ parijānanto bhāveti, pahātabbaṁ pajahanto bhāveti, bhāvetabbaṁ bhāvento bhāveti, sacchikātabbaṁ sacchikaronto bhāveti—\nevaṁ bhāveti."}},{"id":"ps2.1:12","sourceIds":["ps2.1:12.1","ps2.1:12.2","ps2.1:12.3"],"kind":"text","text":{"pi":"Bahulīkarotīti kathaṁ bahulīkaroti?\nĀvajjanto bahulīkaroti, jānanto bahulīkaroti, passanto bahulīkaroti, paccavekkhanto bahulīkaroti, cittaṁ adhiṭṭhahanto bahulīkaroti, saddhāya adhimuccanto bahulīkaroti, vīriyaṁ paggaṇhanto bahulīkaroti, satiṁ upaṭṭhāpento bahulīkaroti, cittaṁ samādahanto bahulīkaroti, paññāya pajānanto bahulīkaroti, abhiññeyyaṁ abhijānanto bahulīkaroti, pariññeyyaṁ parijānanto bahulīkaroti, pahātabbaṁ pajahanto bahulīkaroti, bhāvetabbaṁ bhāvento bahulīkaroti, sacchikātabbaṁ sacchikaronto bahulīkaroti—\nevaṁ bahulīkaroti."}},{"id":"ps2.1:13","sourceIds":["ps2.1:13.1","ps2.1:13.2","ps2.1:13.3","ps2.1:13.4","ps2.1:13.5","ps2.1:13.6","ps2.1:13.7","ps2.1:13.8","ps2.1:13.9","ps2.1:13.10","ps2.1:13.11","ps2.1:13.12","ps2.1:13.13","ps2.1:13.14","ps2.1:13.15","ps2.1:13.16","ps2.1:13.17","ps2.1:13.18"],"kind":"text","text":{"pi":"Tassa taṁ maggaṁ āsevato bhāvayato bahulīkaroto saññojanāni pahīyanti anusayā byantīhontīti kathaṁ saññojanāni pahīyanti, anusayā byantīhonti?\nSotāpattimaggena, sakkāyadiṭṭhi, vicikicchā, sīlabbataparāmāso—\nimāni tīṇi saññojanāni pahīyanti;\ndiṭṭhānusayo, vicikicchānusayo—\nime dve anusayā byantīhonti.\nSakadāgāmimaggena oḷārikaṁ kāmarāgasaññojanaṁ, paṭighasaññojanaṁ—\nimāni dve saññojanāni pahīyanti;\noḷāriko kāmarāgānusayo, paṭighānusayo—\nime dve anusayā byantīhonti.\nAnāgāmimaggena anusahagataṁ kāmarāgasaññojanaṁ, paṭighasaññojanaṁ—\nimāni dve saññojanāni pahīyanti;\nanusahagato kāmarāgānusayo, paṭighānusayo—\nime dve anusayā byantīhonti.\nArahattamaggena rūparāgo, arūparāgo, māno, uddhaccaṁ, avijjā—\nimāni pañca saññojanāni pahīyanti;\nmānānusayo, bhavarāgānusayo, avijjānusayo—\nime tayo anusayā byantīhonti.\nEvaṁ saññojanāni pahīyanti, anusayā byantīhonti."}},{"id":"ps2.1:14","sourceIds":["ps2.1:14.1","ps2.1:14.2","ps2.1:14.3","ps2.1:14.4","ps2.1:14.5","ps2.1:14.6","ps2.1:14.7","ps2.1:14.8","ps2.1:14.9"],"kind":"text","text":{"pi":"Abyāpādavasena cittassa ekaggatā avikkhepo samādhi …pe…\nālokasaññāvasena cittassa ekaggatā avikkhepo samādhi …pe…\npaṭinissaggānupassī assāsavasena paṭinissaggānupassī passāsavasena cittassa ekaggatā avikkhepo samādhi.\nTattha jāte dhamme aniccato anupassanaṭṭhena vipassanā, dukkhato anupassanaṭṭhena vipassanā, anattato anupassanaṭṭhena vipassanā.\nIti paṭhamaṁ samatho, pacchā vipassanā.\nTena vuccati—\n“samathapubbaṅgamaṁ vipassanaṁ bhāvetī”ti.\nBhāvetīti catasso bhāvanā—\ntattha jātānaṁ dhammānaṁ anativattanaṭṭhena bhāvanā, indriyānaṁ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā."}},{"id":"ps2.1:15","sourceIds":["ps2.1:15.1","ps2.1:15.2","ps2.1:15.3","ps2.1:15.4"],"kind":"text","text":{"pi":"Maggo sañjāyatīti kathaṁ maggo sañjāyati?\nDassanaṭṭhena sammādiṭṭhi maggo sañjāyati, abhiniropanaṭṭhena sammāsaṅkappo maggo sañjāyati …pe…\navikkhepaṭṭhena sammāsamādhi maggo sañjāyati.\nEvaṁ maggo sañjāyati."}},{"id":"ps2.1:16","sourceIds":["ps2.1:16.1","ps2.1:16.2","ps2.1:16.3","ps2.1:16.4","ps2.1:16.5","ps2.1:16.6","ps2.1:16.7","ps2.1:16.8","ps2.1:16.9"],"kind":"text","text":{"pi":"So taṁ maggaṁ āsevati bhāveti bahulīkaroti āsevatīti kathaṁ āsevati?\nĀvajjanto āsevati …pe…\nsacchikātabbaṁ sacchikaronto āsevati, evaṁ āsevati.\nBhāvetīti kathaṁ bhāveti?\nĀvajjanto bhāveti, jānanto bhāveti …pe…\nsacchikātabbaṁ sacchikaronto bhāveti, evaṁ bhāveti.\nBahulīkarotīti kathaṁ bahulīkaroti?\nĀvajjanto bahulīkaroti, jānanto bahulīkaroti …pe…\nsacchikātabbaṁ sacchikaronto bahulīkaroti, evaṁ bahulīkaroti."}},{"id":"ps2.1:17","sourceIds":["ps2.1:17.1","ps2.1:17.2","ps2.1:17.3","ps2.1:17.4","ps2.1:17.5","ps2.1:17.6","ps2.1:17.7","ps2.1:17.8","ps2.1:17.9","ps2.1:17.10","ps2.1:17.11","ps2.1:17.12","ps2.1:17.13","ps2.1:17.14","ps2.1:17.15","ps2.1:17.16","ps2.1:17.17","ps2.1:17.18","ps2.1:17.19"],"kind":"text","text":{"pi":"Tassa taṁ maggaṁ āsevato bhāvayato bahulīkaroto saññojanāni pahīyanti, anusayā byantīhontīti kathaṁ saññojanā pahīyanti, anusayā byantīhonti?\nSotāpattimaggena sakkāyadiṭṭhi vicikicchā sīlabbataparāmāso—\nimāni tīṇi saññojanāni pahīyanti;\ndiṭṭhānusayo, vicikicchānusayo—\nime dve anusayā byantīhonti.\nSakadāgāmimaggena oḷārikaṁ kāmarāgasaññojanaṁ, paṭighasaññojanaṁ—\nimāni dve saññojanāni pahīyanti;\noḷāriko kāmarāgānusayo paṭighānusayo—\nime dve anusayā byantīhonti.\nAnāgāmimaggena anusahagataṁ kāmarāgasaññojanaṁ, paṭighasaññojanaṁ—\nimāni dve saññojanāni pahīyanti;\nanusahagato kāmarāgānusayo, paṭighānusayo—\nime dve anusayā byantīhonti.\nArahattamaggena rūparāgo, arūparāgo, māno, uddhaccaṁ, avijjā—\nimāni pañca saññojanāni pahīyanti;\nmānānusayo, bhavarāgānusayo, avijjānusayo—\nime tayo anusayā byantīhonti.\nEvaṁ saññojanāni pahīyanti, anusayā byantīhonti.\nEvaṁ samathapubbaṅgamaṁ vipassanaṁ bhāveti."}},{"id":"ps2.1:18","sourceIds":["ps2.1:18.1","ps2.1:18.2","ps2.1:18.3","ps2.1:18.4","ps2.1:18.5","ps2.1:18.6","ps2.1:18.7","ps2.1:18.8","ps2.1:18.9","ps2.1:18.10","ps2.1:18.11"],"kind":"text","text":{"pi":"Kathaṁ vipassanāpubbaṅgamaṁ samathaṁ bhāveti?\nAniccato anupassanaṭṭhena vipassanā, dukkhato anupassanaṭṭhena vipassanā, anattato anupassanaṭṭhena vipassanā.\nTattha jātānaṁ dhammānañca vosaggārammaṇatā cittassa ekaggatā avikkhepo.\nSamādhi iti paṭhamaṁ vipassanā, pacchā samatho.\nTena vuccati—\n“vipassanāpubbaṅgamaṁ samathaṁ bhāvetī”ti.\nBhāvetīti catasso bhāvanā—\nāsevanaṭṭhena bhāvanā …pe…\nmaggo sañjāyatīti kathaṁ maggo sañjāyati …pe…\nevaṁ maggo sañjāyati.\nEvaṁ saññojanāni pahīyanti, anusayā byantīhonti."}},{"id":"ps2.1:19","sourceIds":["ps2.1:19.1","ps2.1:19.2","ps2.1:19.3","ps2.1:19.4","ps2.1:19.5","ps2.1:19.6","ps2.1:19.7","ps2.1:19.8","ps2.1:19.9","ps2.1:19.10"],"kind":"text","text":{"pi":"Rūpaṁ aniccato anupassanaṭṭhena vipassanā, rūpaṁ dukkhato anupassanaṭṭhena vipassanā, rūpaṁ anattato anupassanaṭṭhena vipassanā.\nTattha jātānaṁ dhammānañca vosaggārammaṇatā cittassa ekaggatā avikkhepo samādhi.\nIti paṭhamaṁ vipassanā, pacchā samatho.\nTena vuccati—\n“vipassanāpubbaṅgamaṁ samathaṁ bhāvetī”ti.\nBhāvetīti catasso bhāvanā—\nāsevanaṭṭhena bhāvanā …pe…\nmaggo sañjāyatīti kathaṁ maggo sañjāyati …pe…\nevaṁ maggo sañjāyati.\nEvaṁ saññojanāni pahīyanti, anusayā byantīhonti."}},{"id":"ps2.1:20","sourceIds":["ps2.1:20.1","ps2.1:20.2","ps2.1:20.3","ps2.1:20.4","ps2.1:20.5","ps2.1:20.6","ps2.1:20.7","ps2.1:20.8","ps2.1:20.9","ps2.1:20.10","ps2.1:20.11","ps2.1:20.12","ps2.1:20.13","ps2.1:20.14","ps2.1:20.15","ps2.1:20.16","ps2.1:20.17"],"kind":"text","text":{"pi":"Vedanaṁ …pe…\nsaññaṁ …\nsaṅkhāre …\nviññāṇaṁ …\ncakkhuṁ …pe…\njarāmaraṇaṁ aniccato anupassanaṭṭhena vipassanā, jarāmaraṇaṁ dukkhato …pe…\nanattato anupassanaṭṭhena vipassanā.\nTattha jātānaṁ dhammānañca vosaggārammaṇatā cittassa ekaggatā avikkhepo samādhi.\nIti paṭhamaṁ vipassanā, pacchā samatho.\nTena vuccati—\n“vipassanāpubbaṅgamaṁ samathaṁ bhāvetī”ti.\nBhāvetīti catasso bhāvanā—\nāsevanaṭṭhena bhāvanā …pe…\nmaggo sañjāyatīti kathaṁ maggo sañjāyati …pe…\nevaṁ maggo sañjāyati.\nEvaṁ saññojanāni pahīyanti, anusayā byantīhonti.\nEvaṁ vipassanāpubbaṅgamaṁ samathaṁ bhāveti."}},{"id":"ps2.1:21","sourceIds":["ps2.1:21.1","ps2.1:21.2","ps2.1:21.3"],"kind":"text","text":{"pi":"Kathaṁ samathavipassanaṁ yuganaddhaṁ bhāveti?\nSoḷasahi ākārehi samathavipassanaṁ yuganaddhaṁ bhāveti.\nĀrammaṇaṭṭhena gocaraṭṭhena pahānaṭṭhena pariccāgaṭṭhena vuṭṭhānaṭṭhena vivaṭṭanaṭṭhena santaṭṭhena paṇītaṭṭhena vimuttaṭṭhena anāsavaṭṭhena taraṇaṭṭhena animittaṭṭhena appaṇihitaṭṭhena suññataṭṭhena ekarasaṭṭhena anativattanaṭṭhena yuganaddhaṭṭhena."}},{"id":"ps2.1:22","sourceIds":["ps2.1:22.1","ps2.1:22.2","ps2.1:22.3","ps2.1:22.4","ps2.1:22.5","ps2.1:22.6","ps2.1:22.7","ps2.1:22.8","ps2.1:22.9","ps2.1:22.10","ps2.1:22.11"],"kind":"text","text":{"pi":"Kathaṁ ārammaṇaṭṭhena samathavipassanaṁ yuganaddhaṁ bhāveti?\nUddhaccaṁ pajahato cittassa ekaggatā avikkhepo samādhi nirodhārammaṇo, avijjaṁ pajahato anupassanaṭṭhena vipassanā nirodhārammaṇā.\nIti ārammaṇaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“ārammaṇaṭṭhena samathavipassanaṁ yuganaddhaṁ bhāvetī”ti.\nBhāvetīti catasso bhāvanā—\nāsevanaṭṭhena bhāvanā …pe…\nmaggo sañjāyatīti kathaṁ maggo sañjāyati …pe…\nevaṁ maggo sañjāyati.\nEvaṁ saññojanāni pahīyanti, anusayā byantīhonti.\nEvaṁ ārammaṇaṭṭhena samathavipassanaṁ yuganaddhaṁ bhāveti."}},{"id":"ps2.1:23","sourceIds":["ps2.1:23.1","ps2.1:23.2","ps2.1:23.3","ps2.1:23.4","ps2.1:23.5"],"kind":"text","text":{"pi":"Kathaṁ gocaraṭṭhena samathavipassanaṁ yuganaddhaṁ bhāveti?\nUddhaccaṁ pajahato cittassa ekaggatā avikkhepo samādhi nirodhagocaro, avijjaṁ pajahato anupassanaṭṭhena vipassanā nirodhagocarā.\nIti gocaraṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“gocaraṭṭhena samathavipassanaṁ yuganaddhaṁ bhāvetī”ti."}},{"id":"ps2.1:24","sourceIds":["ps2.1:24.1","ps2.1:24.2","ps2.1:24.3","ps2.1:24.4","ps2.1:24.5"],"kind":"text","text":{"pi":"Kathaṁ pahānaṭṭhena samathavipassanaṁ yuganaddhaṁ bhāveti?\nUddhaccasahagatakilese ca khandhe ca pajahato cittassa ekaggatā avikkhepo samādhi nirodhagocaro, avijjāsahagatakilese ca khandhe ca pajahato anupassanaṭṭhena vipassanā nirodhagocarā.\nIti pahānaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“pahānaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:25","sourceIds":["ps2.1:25.1","ps2.1:25.2","ps2.1:25.3","ps2.1:25.4","ps2.1:25.5"],"kind":"text","text":{"pi":"Kathaṁ pariccāgaṭṭhena samathavipassanaṁ yuganaddhaṁ bhāveti?\nUddhaccasahagatakilese ca khandhe ca pariccajato cittassa ekaggatā avikkhepo samādhi nirodhagocaro, avijjāsahagatakilese ca khandhe ca pariccajato anupassanaṭṭhena vipassanā nirodhagocarā.\nIti pariccāgaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“pariccāgaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:26","sourceIds":["ps2.1:26.1","ps2.1:26.2","ps2.1:26.3","ps2.1:26.4","ps2.1:26.5"],"kind":"text","text":{"pi":"Kathaṁ vuṭṭhānaṭṭhena samathavipassanaṁ yuganaddhaṁ bhāveti?\nUddhaccasahagatakilesehi ca khandhehi ca vuṭṭhahato cittassa ekaggatā avikkhepo samādhi nirodhagocaro, avijjāsahagatakilesehi ca khandhehi ca vuṭṭhahato anupassanaṭṭhena vipassanā nirodhagocarā.\nIti vuṭṭhānaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“vuṭṭhānaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:27","sourceIds":["ps2.1:27.1","ps2.1:27.2","ps2.1:27.3","ps2.1:27.4","ps2.1:27.5"],"kind":"text","text":{"pi":"Kathaṁ vivaṭṭanaṭṭhena samathavipassanaṁ yuganaddhaṁ bhāveti?\nUddhaccasahagatakilesehi ca khandhehi ca vivaṭṭato cittassa ekaggatā avikkhepo samādhi nirodhagocaro, avijjāsahagatakilesehi ca khandhehi ca vivaṭṭato anupassanaṭṭhena vipassanā nirodhagocarā.\nIti vivaṭṭanaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“vivaṭṭanaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:28","sourceIds":["ps2.1:28.1","ps2.1:28.2","ps2.1:28.3","ps2.1:28.4","ps2.1:28.5"],"kind":"text","text":{"pi":"Kathaṁ santaṭṭhena samathavipassanaṁ yuganaddhaṁ bhāveti?\nUddhaccaṁ pajahato cittassa ekaggatā avikkhepo samādhi santo honti nirodhagocaro, avijjaṁ pajahato anupassanaṭṭhena vipassanā santā hoti nirodhagocarā.\nIti santaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“santaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:29","sourceIds":["ps2.1:29.1","ps2.1:29.2","ps2.1:29.3","ps2.1:29.4","ps2.1:29.5"],"kind":"text","text":{"pi":"Kathaṁ paṇītaṭṭhena samathavipassanaṁ yuganaddhaṁ bhāveti?\nUddhaccaṁ pajahato cittassa ekaggatā avikkhepo samādhi paṇīto hoti nirodhagocaro, avijjaṁ pajahato anupassanaṭṭhena vipassanā paṇītā hoti nirodhagocarā.\nIti paṇītaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“paṇītaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:30","sourceIds":["ps2.1:30.1","ps2.1:30.2","ps2.1:30.3","ps2.1:30.4","ps2.1:30.5"],"kind":"text","text":{"pi":"Kathaṁ vimuttaṭṭhena samathavipassanaṁ yuganaddhaṁ bhāveti?\nUddhaccaṁ pajahato cittassa ekaggatā avikkhepo samādhi kāmāsavā vimutto hoti nirodhagocaro, avijjaṁ pajahato anupassanaṭṭhena vipassanā avijjāsavā vimuttā hoti nirodhagocarā.\nIti rāgavirāgā cetovimutti avijjāvirāgā paññāvimutti vimuttaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“vimuttaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:31","sourceIds":["ps2.1:31.1","ps2.1:31.2","ps2.1:31.3","ps2.1:31.4","ps2.1:31.5"],"kind":"text","text":{"pi":"Kathaṁ anāsavaṭṭhena samathavipassanaṁ yuganaddhaṁ bhāveti?\nUddhaccaṁ pajahato cittassa ekaggatā avikkhepo samādhi kāmāsavena anāsavo hoti nirodhagocaro, avijjaṁ pajahato anupassanaṭṭhena vipassanā avijjāsavena anāsavā hoti nirodhagocarā.\nIti anāsavaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“anāsavaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:32","sourceIds":["ps2.1:32.1","ps2.1:32.2","ps2.1:32.3","ps2.1:32.4","ps2.1:32.5"],"kind":"text","text":{"pi":"Kathaṁ taraṇaṭṭhena samathavipassanaṁ yuganaddhaṁ bhāveti?\nUddhaccasahagatakilese ca khandhe ca tarato cittassa ekaggatā avikkhepo samādhi nirodhagocaro, avijjāsahagatakilese ca khandhe ca tarato anupassanaṭṭhena vipassanā nirodhagocarā.\nIti taraṇaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“taraṇaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:33","sourceIds":["ps2.1:33.1","ps2.1:33.2","ps2.1:33.3","ps2.1:33.4","ps2.1:33.5"],"kind":"text","text":{"pi":"Kathaṁ animittaṭṭhena samathavipassanaṁ yuganaddhaṁ bhāveti?\nUddhaccaṁ pajahato cittassa ekaggatā avikkhepo samādhi sabbanimittehi animitto hoti nirodhagocaro, avijjaṁ pajahato anupassanaṭṭhena vipassanā sabbanimittehi animittā hoti nirodhagocarā.\nIti animittaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“animittaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:34","sourceIds":["ps2.1:34.1","ps2.1:34.2","ps2.1:34.3","ps2.1:34.4","ps2.1:34.5"],"kind":"text","text":{"pi":"Kathaṁ appaṇihitaṭṭhena samathavipassanaṁ yuganaddhaṁ bhāveti?\nUddhaccaṁ pajahato cittassa ekaggatā avikkhepo samādhi sabbapaṇidhīhi appaṇihito hoti nirodhagocaro, avijjaṁ pajahato anupassanaṭṭhena vipassanā sabbapaṇidhīhi appaṇihitā hoti nirodhagocarā.\nIti appaṇihitaṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“appaṇihitaṭṭhena samathavipassanaṁ yuganaddhaṁ bhāvetī”ti."}},{"id":"ps2.1:35","sourceIds":["ps2.1:35.1","ps2.1:35.2","ps2.1:35.3","ps2.1:35.4","ps2.1:35.5","ps2.1:35.6","ps2.1:35.7","ps2.1:35.8","ps2.1:35.9","ps2.1:35.10","ps2.1:35.11","ps2.1:35.12","ps2.1:35.13"],"kind":"text","text":{"pi":"Kathaṁ suññataṭṭhena samathavipassanaṁ yuganaddhaṁ bhāveti?\nUddhaccaṁ pajahato cittassa ekaggatā avikkhepo samādhi sabbābhinivesehi suñño hoti nirodhagocaro, avijjaṁ pajahato anupassanaṭṭhena vipassanā sabbābhinivesehi suññā hoti nirodhagocarā.\nIti suññataṭṭhena samathavipassanā ekarasā honti, yuganaddhā honti, aññamaññaṁ nātivattantīti.\nTena vuccati—\n“suññataṭṭhena samathavipassanaṁ yuganaddhaṁ bhāvetī”ti.\nBhāvetīti catasso bhāvanā—\nāsevanaṭṭhena bhāvanā …pe…\nmaggo sañjāyatīti kathaṁ maggo sañjāyati …pe…\nevaṁ maggo sañjāyati.\nEvaṁ saññojanāni pahīyanti, anusayā byantīhonti.\nEvaṁ suññataṭṭhena samathavipassanaṁ yuganaddhaṁ bhāveti.\nImehi soḷasahi ākārehi samathavipassanaṁ yuganaddhaṁ bhāveti, evaṁ samathavipassanaṁ yuganaddhaṁ bhāveti.\nSuttantaniddeso."}},{"id":"ps2.1:36","sourceIds":["ps2.1:36.0","ps2.1:36.1","ps2.1:36.2","ps2.1:36.3","ps2.1:36.4","ps2.1:36.5","ps2.1:36.6","ps2.1:36.7"],"kind":"text","text":{"pi":"2. Dhammuddhaccavāraniddesa\nKathaṁ dhammuddhaccaviggahitaṁ mānasaṁ hoti?\nAniccato manasikaroto obhāso uppajjati, obhāso dhammoti obhāsaṁ āvajjati, tato vikkhepo uddhaccaṁ.\nTena uddhaccena viggahitamānaso aniccato upaṭṭhānaṁ yathābhūtaṁ nappajānāti, dukkhato upaṭṭhānaṁ yathābhūtaṁ nappajānāti, anattato upaṭṭhānaṁ yathābhūtaṁ nappajānāti.\nTena vuccati—\n“dhammuddhaccaviggahitamānaso hoti so samayo, yaṁ taṁ cittaṁ ajjhattameva santiṭṭhati sannisīdati ekodi hoti samādhiyati.\nTassa maggo sañjāyatī”ti kathaṁ maggo sañjāyati …pe…\nevaṁ maggo sañjāyati, evaṁ saññojanāni pahīyanti, anusayā byantīhonti."}},{"id":"ps2.1:37","sourceIds":["ps2.1:37.1","ps2.1:37.2","ps2.1:37.3","ps2.1:37.4","ps2.1:37.5","ps2.1:37.6","ps2.1:37.7","ps2.1:37.8"],"kind":"text","text":{"pi":"Aniccato manasikaroto ñāṇaṁ uppajjati, pīti uppajjati, passaddhi uppajjati, sukhaṁ uppajjati, adhimokkho uppajjati, paggaho uppajjati, upaṭṭhānaṁ uppajjati, upekkhā uppajjati, nikanti uppajjati, “nikanti dhammo”ti nikantiṁ āvajjati.\nTato vikkhepo uddhaccaṁ.\nTena uddhaccena viggahitamānaso aniccato upaṭṭhānaṁ yathābhūtaṁ nappajānāti, dukkhato upaṭṭhānaṁ yathābhūtaṁ nappajānāti, anattato upaṭṭhānaṁ yathābhūtaṁ nappajānāti.\nTena vuccati—\n“dhammuddhaccaviggahitamānaso hoti so samayo, yaṁ taṁ cittaṁ ajjhattameva santiṭṭhati sannisīdati ekodi hoti samādhiyati.\nTassa maggo sañjāyatī”ti.\nKathaṁ maggo sañjāyati …pe…\nevaṁ maggo sañjāyati, evaṁ saññojanāni pahīyanti, anusayā byantīhonti."}},{"id":"ps2.1:38","sourceIds":["ps2.1:38.1","ps2.1:38.2","ps2.1:38.3","ps2.1:38.4","ps2.1:38.5","ps2.1:38.6","ps2.1:38.7"],"kind":"text","text":{"pi":"Dukkhato manasikaroto …pe…\nanattato manasikaroto obhāso uppajjati …pe… ñāṇaṁ uppajjati, pīti uppajjati, passaddhi uppajjati, sukhaṁ uppajjati, adhimokkho uppajjati, paggaho uppajjati, upaṭṭhānaṁ uppajjati, upekkhā uppajjati, nikanti uppajjati, “nikanti dhammo”ti nikantiṁ āvajjati.\nTato vikkhepo uddhaccaṁ.\nTena uddhaccena viggahitamānaso anattato upaṭṭhānaṁ, aniccato upaṭṭhānaṁ, dukkhato upaṭṭhānaṁ yathābhūtaṁ nappajānāti.\nTena vuccati—\n“dhammuddhaccaviggahitamānaso …pe…\nevaṁ saññojanāni pahīyanti, anusayā byantīhonti”."}},{"id":"ps2.1:39","sourceIds":["ps2.1:39.1","ps2.1:39.2","ps2.1:39.3","ps2.1:39.4","ps2.1:39.5","ps2.1:39.6","ps2.1:39.7","ps2.1:39.8","ps2.1:39.9","ps2.1:39.10","ps2.1:39.11","ps2.1:39.12","ps2.1:39.13","ps2.1:39.14","ps2.1:39.15","ps2.1:39.16","ps2.1:39.17","ps2.1:39.18","ps2.1:39.19","ps2.1:39.20","ps2.1:39.21","ps2.1:39.22"],"kind":"text","text":{"pi":"Rūpaṁ aniccato manasikaroto …pe…\nrūpaṁ dukkhato manasikaroto …\nrūpaṁ anattato manasikaroto …\nvedanaṁ …pe…\nsaññaṁ …\nsaṅkhāre …\nviññāṇaṁ …\ncakkhuṁ …pe…\njarāmaraṇaṁ aniccato manasikaroto …pe…\njarāmaraṇaṁ dukkhato manasikaroto, jarāmaraṇaṁ anattato manasikaroto obhāso uppajjati …pe… ñāṇaṁ uppajjati, pīti uppajjati, passaddhi uppajjati, sukhaṁ uppajjati, adhimokkho uppajjati, paggaho uppajjati, upaṭṭhānaṁ uppajjati, upekkhā uppajjati, nikanti uppajjati, “nikanti dhammo”ti nikantiṁ āvajjati.\nTato vikkhepo uddhaccaṁ.\nTena uddhaccena viggahitamānaso.\nJarāmaraṇaṁ anattato upaṭṭhānaṁ yathābhūtaṁ nappajānāti.\nJarāmaraṇaṁ aniccato upaṭṭhānaṁ yathābhūtaṁ nappajānāti, jarāmaraṇaṁ dukkhato upaṭṭhānaṁ yathābhūtaṁ nappajānāti.\nTena vuccati—\n“dhammuddhaccaviggahitamānaso hoti.\nSo samayo, yaṁ taṁ cittaṁ ajjhattameva santiṭṭhati sannisīdati ekodi hoti samādhiyati.\nTassa maggo sañjāyatī”ti.\nKathaṁ maggo sañjāyati …pe…\nevaṁ maggo sañjāyati.\nEvaṁ saññojanāni pahīyanti, anusayā byantīhonti.\nEvaṁ dhammuddhaccaviggahitaṁ mānasaṁ hoti."}},{"id":"ps2.1:40","sourceIds":["ps2.1:40.1","ps2.1:40.2","ps2.1:40.3","ps2.1:40.4"],"kind":"text","text":{"pi":"Obhāse ceva ñāṇe ca,\npītiyā ca vikampati;\nPassaddhiyā sukhe ceva,\nyehi cittaṁ pavedhati."}},{"id":"ps2.1:41","sourceIds":["ps2.1:41.1","ps2.1:41.2","ps2.1:41.3","ps2.1:41.4"],"kind":"text","text":{"pi":"Adhimokkhe ca paggāhe,\nupaṭṭhāne ca kampati;\nUpekkhāvajjanāya ceva,\nupekkhāya ca nikantiyā."}},{"id":"ps2.1:42","sourceIds":["ps2.1:42.1","ps2.1:42.2","ps2.1:42.3","ps2.1:42.4"],"kind":"text","text":{"pi":"Imāni dasa ṭhānāni,\npaññā yassa pariccitā;\nDhammuddhaccakusalo hoti,\nna ca sammoha gacchati."}},{"id":"ps2.1:43","sourceIds":["ps2.1:43.1","ps2.1:43.2","ps2.1:43.3","ps2.1:43.4"],"kind":"text","text":{"pi":"Vikkhipati ceva kilissati ca,\nCavati cittabhāvanā;\nVikkhipati na kilissati,\nBhāvanā parihāyati."}},{"id":"ps2.1:44","sourceIds":["ps2.1:44.1","ps2.1:44.2","ps2.1:44.3","ps2.1:44.4"],"kind":"text","text":{"pi":"Vikkhipati na kilissati,\nBhāvanā na parihāyati;\nNa ca vikkhipate cittaṁ na kilissati,\nNa cavati cittabhāvanā."}},{"id":"ps2.1:45","sourceIds":["ps2.1:45.1","ps2.1:45.2"],"kind":"text","text":{"pi":"Imehi catūhi ṭhānehi cittassa saṅkhepavikkhepaviggahitaṁ dasa ṭhāne sampajānātīti.\nYuganaddhakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps2.1/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}