{"id":"ps2.10","title":"2.10. Suññakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps2.10","title":"2.10. Suññakathā","units":[{"id":"ps2.10:0","sourceIds":["ps2.10:0.1","ps2.10:0.2","ps2.10:0.3"],"kind":"text","text":{"pi":"Paṭisambhidāmagga\n2 Yuganaddhavagga\n2.10. Suññakathā"}},{"id":"ps2.10:1","sourceIds":["ps2.10:1.1","ps2.10:1.2","ps2.10:1.3","ps2.10:1.4"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.\nAtha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.\nEkamantaṁ nisinno kho āyasmā ānando bhagavantaṁ etadavoca—"}},{"id":"ps2.10:2","sourceIds":["ps2.10:2.1","ps2.10:2.2","ps2.10:2.3","ps2.10:2.4","ps2.10:2.5","ps2.10:2.6","ps2.10:2.7","ps2.10:2.8","ps2.10:2.9"],"kind":"text","text":{"pi":"“‘Suñño loko, suñño loko’ti, bhante, vuccati.\nKittāvatā nu kho, bhante, ‘suñño loko’ti vuccatī”ti?\n“Yasmā kho, ānanda, suññaṁ attena vā attaniyena vā, tasmā ‘suñño loko’ti vuccati.\nKiñcānanda, suññaṁ attena vā attaniyena vā?\nCakkhu kho, ānanda, suññaṁ attena vā attaniyena vā.\nRūpā suññā attena vā attaniyena vā.\nCakkhuviññāṇaṁ suññaṁ attena vā attaniyena vā.\nCakkhusamphasso suñño attena vā attaniyena vā.\nYampidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi suññaṁ attena vā attaniyena vā."}},{"id":"ps2.10:3","sourceIds":["ps2.10:3.1","ps2.10:3.2","ps2.10:3.3","ps2.10:3.4","ps2.10:3.5","ps2.10:3.6","ps2.10:3.7","ps2.10:3.8","ps2.10:3.9","ps2.10:3.10","ps2.10:3.11","ps2.10:3.12","ps2.10:3.13","ps2.10:3.14"],"kind":"text","text":{"pi":"Sotaṁ suññaṁ …pe…\nsaddā suññā …\nghānaṁ suññaṁ …\ngandhā suññā …\njivhā suññā …\nrasā suññā …\nkāyo suñño …\nphoṭṭhabbā suññā …\nmano suñño attena vā attaniyena vā.\nDhammā suññā attena vā attaniyena vā.\nManoviññāṇaṁ suññaṁ attena vā attaniyena vā.\nManosamphasso suñño attena vā attaniyena vā.\nYampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi suññaṁ attena vā attaniyena vā.\nYasmā kho, ānanda, suññaṁ attena vā attaniyena vā tasmā ‘suñño loko’ti vuccatī”ti."}},{"id":"ps2.10:4","sourceIds":["ps2.10:4.0","ps2.10:4.1"],"kind":"text","text":{"pi":"10.1. Mātikā\nSuññasuññaṁ, saṅkhārasuññaṁ, vipariṇāmasuññaṁ, aggasuññaṁ, lakkhaṇasuññaṁ, vikkhambhanasuññaṁ, tadaṅgasuññaṁ, samucchedasuññaṁ, paṭippassaddhisuññaṁ, nissaraṇasuññaṁ, ajjhattasuññaṁ, bahiddhāsuññaṁ, dubhatosuññaṁ, sabhāgasuññaṁ, visabhāgasuññaṁ, esanāsuññaṁ, pariggahasuññaṁ, paṭilābhasuññaṁ, paṭivedhasuññaṁ, ekattasuññaṁ, nānattasuññaṁ, khantisuññaṁ, adhiṭṭhānasuññaṁ, pariyogāhaṇasuññaṁ, sampajānassa pavattapariyādānaṁ sabbasuññatānaṁ paramatthasuññaṁ. [25]"}},{"id":"ps2.10:5","sourceIds":["ps2.10:5.0","ps2.10:5.1","ps2.10:5.2","ps2.10:5.3","ps2.10:5.4","ps2.10:5.5","ps2.10:5.6","ps2.10:5.7","ps2.10:5.8"],"kind":"text","text":{"pi":"10.2. Niddesa\nKatamaṁ suññasuññaṁ?\nCakkhu suññaṁ attena vā attaniyena vā niccena vā dhuvena vā sassatena vā avipariṇāmadhammena vā.\nSotaṁ suññaṁ …pe…\nghānaṁ suññaṁ …\njivhā suññā …\nkāyo suñño …\nmano suñño attena vā attaniyena vā niccena vā dhuvena vā sassatena vā avipariṇāmadhammena vā.\nIdaṁ suññasuññaṁ."}},{"id":"ps2.10:6","sourceIds":["ps2.10:6.1","ps2.10:6.2","ps2.10:6.3","ps2.10:6.4","ps2.10:6.5","ps2.10:6.6","ps2.10:6.7"],"kind":"text","text":{"pi":"Katamaṁ saṅkhārasuññaṁ?\nTayo saṅkhārā—\npuññābhisaṅkhāro, apuññābhisaṅkhāro, āneñjābhisaṅkhāro.\nPuññābhisaṅkhāro apuññābhisaṅkhārena ca āneñjābhisaṅkhārena ca suñño.\nApuññābhisaṅkhāro puññābhisaṅkhārena ca āneñjābhisaṅkhārena ca suñño.\nĀneñjābhisaṅkhāro puññābhisaṅkhārena ca apuññābhisaṅkhārena ca suñño.\nIme tayo saṅkhārā."}},{"id":"ps2.10:7","sourceIds":["ps2.10:7.1","ps2.10:7.2","ps2.10:7.3","ps2.10:7.4","ps2.10:7.5","ps2.10:7.6"],"kind":"text","text":{"pi":"Aparepi tayo saṅkhārā—\nkāyasaṅkhāro, vacīsaṅkhāro, cittasaṅkhāro.\nKāyasaṅkhāro vacīsaṅkhārena ca cittasaṅkhārena ca suñño.\nVacīsaṅkhāro kāyasaṅkhārena ca cittasaṅkhārena ca suñño.\nCittasaṅkhāro kāyasaṅkhārena ca vacīsaṅkhārena ca suñño.\nIme tayo saṅkhārā."}},{"id":"ps2.10:8","sourceIds":["ps2.10:8.1","ps2.10:8.2","ps2.10:8.3","ps2.10:8.4","ps2.10:8.5","ps2.10:8.6"],"kind":"text","text":{"pi":"Aparepi tayo saṅkhārā—\natītā saṅkhārā, anāgatā saṅkhārā, paccuppannā saṅkhārā.\nAtītā saṅkhārā anāgatehi ca paccuppannehi ca saṅkhārehi suññā.\nAnāgatā saṅkhārā atītehi ca paccuppannehi ca saṅkhārehi suññā paccuppannā saṅkhārā atītehi ca anāgatehi ca saṅkhārehi suññā.\nIme tayo saṅkhārā;\nidaṁ saṅkhārasuññaṁ."}},{"id":"ps2.10:9","sourceIds":["ps2.10:9.1","ps2.10:9.2","ps2.10:9.3","ps2.10:9.4","ps2.10:9.5","ps2.10:9.6","ps2.10:9.7","ps2.10:9.8","ps2.10:9.9","ps2.10:9.10","ps2.10:9.11","ps2.10:9.12"],"kind":"text","text":{"pi":"Katamaṁ vipariṇāmasuññaṁ?\nJātaṁ rūpaṁ sabhāvena suññaṁ.\nVigataṁ rūpaṁ vipariṇatañceva suññañca.\nJātā vedanā sabhāvena suññā.\nVigatā vedanā vipariṇatā ceva suññā ca …pe…\njātā saññā …\njātā saṅkhārā …\njātaṁ viññāṇaṁ …\njātaṁ cakkhu …pe…\njāto bhavo sabhāvena suñño.\nVigato bhavo vipariṇato ceva suñño ca.\nIdaṁ vipariṇāmasuññaṁ."}},{"id":"ps2.10:10","sourceIds":["ps2.10:10.1","ps2.10:10.2","ps2.10:10.3"],"kind":"text","text":{"pi":"Katamaṁ aggasuññaṁ?\nAggametaṁ padaṁ seṭṭhametaṁ padaṁ visiṭṭhametaṁ padaṁ yadidaṁ sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṁ.\nIdaṁ aggasuññaṁ."}},{"id":"ps2.10:11","sourceIds":["ps2.10:11.1","ps2.10:11.2","ps2.10:11.3","ps2.10:11.4","ps2.10:11.5","ps2.10:11.6","ps2.10:11.7","ps2.10:11.8","ps2.10:11.9"],"kind":"text","text":{"pi":"Katamaṁ lakkhaṇasuññaṁ?\nDve lakkhaṇāni—\nbālalakkhaṇañca paṇḍitalakkhaṇañca.\nBālalakkhaṇaṁ paṇḍitalakkhaṇena suññaṁ.\nPaṇḍitalakkhaṇaṁ bālalakkhaṇena suññaṁ.\nTīṇi lakkhaṇāni—\nuppādalakkhaṇaṁ, vayalakkhaṇaṁ, ṭhitaññathattalakkhaṇaṁ.\nUppādalakkhaṇaṁ vayalakkhaṇena ca ṭhitaññathattalakkhaṇena ca suññaṁ.\nVayalakkhaṇaṁ uppādalakkhaṇena ca ṭhitaññathattalakkhaṇena ca suññaṁ, ṭhitaññathattalakkhaṇaṁ uppādalakkhaṇena ca vayalakkhaṇena ca suññaṁ."}},{"id":"ps2.10:12","sourceIds":["ps2.10:12.1","ps2.10:12.2","ps2.10:12.3","ps2.10:12.4","ps2.10:12.5","ps2.10:12.6","ps2.10:12.7","ps2.10:12.8","ps2.10:12.9","ps2.10:12.10","ps2.10:12.11","ps2.10:12.12"],"kind":"text","text":{"pi":"Rūpassa uppādalakkhaṇaṁ vayalakkhaṇena ca ṭhitaññathattalakkhaṇena ca suññaṁ.\nRūpassa vayalakkhaṇaṁ uppādalakkhaṇena ca ṭhitaññathattalakkhaṇena ca suññaṁ.\nRūpassa ṭhitaññathattalakkhaṇaṁ uppādalakkhaṇena ca vayalakkhaṇena ca suññaṁ.\nVedanāya …pe…\nsaññāya …\nsaṅkhārānaṁ …\nviññāṇassa …\ncakkhussa …\njarāmaraṇassa uppādalakkhaṇaṁ vayalakkhaṇena ca ṭhitaññathattalakkhaṇena ca suññaṁ.\nJarāmaraṇassa vayalakkhaṇaṁ uppādalakkhaṇena ca ṭhitaññathattalakkhaṇena ca suññaṁ.\nJarāmaraṇassa ṭhitaññathattalakkhaṇaṁ uppādalakkhaṇena ca vayalakkhaṇena ca suññaṁ.\nIdaṁ lakkhaṇasuññaṁ."}},{"id":"ps2.10:13","sourceIds":["ps2.10:13.1","ps2.10:13.2","ps2.10:13.3","ps2.10:13.4","ps2.10:13.5","ps2.10:13.6","ps2.10:13.7","ps2.10:13.8","ps2.10:13.9","ps2.10:13.10","ps2.10:13.11"],"kind":"text","text":{"pi":"Katamaṁ vikkhambhanasuññaṁ?\nNekkhammena kāmacchando vikkhambhito ceva suñño ca.\nAbyāpādena byāpādo vikkhambhito ceva suñño ca.\nĀlokasaññāya thinamiddhaṁ vikkhambhitañceva suññañca.\nAvikkhepena uddhaccaṁ vikkhambhitañceva suññañca.\nDhammavavatthānena vicikicchā vikkhambhitā ceva suññā ca.\nÑāṇena avijjā vikkhambhitā ceva suññā ca.\nPāmojjena arati vikkhambhitā ceva suññā ca.\nPaṭhamena jhānena nīvaraṇā vikkhambhitā ceva suññā ca …pe…\narahattamaggena sabbakilesā vikkhambhitā ceva suññā ca.\nIdaṁ vikkhambhanasuññaṁ."}},{"id":"ps2.10:14","sourceIds":["ps2.10:14.1","ps2.10:14.2","ps2.10:14.3","ps2.10:14.4","ps2.10:14.5","ps2.10:14.6","ps2.10:14.7","ps2.10:14.8","ps2.10:14.9","ps2.10:14.10","ps2.10:14.11"],"kind":"text","text":{"pi":"Katamaṁ tadaṅgasuññaṁ?\nNekkhammena kāmacchando tadaṅgasuñño.\nAbyāpādena byāpādo tadaṅgasuñño.\nĀlokasaññāya thinamiddhaṁ tadaṅgasuññaṁ.\nAvikkhepena uddhaccaṁ tadaṅgasuññaṁ.\nDhammavavatthānena vicikicchā tadaṅgasuññā.\nÑāṇena avijjā tadaṅgasuññā.\nPāmojjena arati tadaṅgasuññā.\nPaṭhamena jhānena nīvaraṇā tadaṅgasuññā …pe…\nvivaṭṭanānupassanāya saññogābhiniveso tadaṅgasuñño.\nIdaṁ tadaṅgasuññaṁ."}},{"id":"ps2.10:15","sourceIds":["ps2.10:15.1","ps2.10:15.2","ps2.10:15.3","ps2.10:15.4","ps2.10:15.5","ps2.10:15.6","ps2.10:15.7","ps2.10:15.8","ps2.10:15.9","ps2.10:15.10","ps2.10:15.11"],"kind":"text","text":{"pi":"Katamaṁ samucchedasuññaṁ?\nNekkhammena kāmacchando samucchinno ceva suñño ca.\nAbyāpādena byāpādo samucchinno ceva suñño ca.\nĀlokasaññāya thinamiddhaṁ samucchinnañceva suññañca.\nAvikkhepena uddhaccaṁ samucchinnañceva suññañca.\nDhammavavatthānena vicikicchā samucchinnā ceva suññā ca.\nÑāṇena avijjā samucchinnā ceva suññā ca.\nPāmojjena arati samucchinnā ceva suññā ca.\nPaṭhamena jhānena nīvaraṇā samucchinnā ceva suññā ca …pe…\narahattamaggena sabbakilesā samucchinnā ceva suññā ca.\nIdaṁ samucchedasuññaṁ."}},{"id":"ps2.10:16","sourceIds":["ps2.10:16.1","ps2.10:16.2","ps2.10:16.3","ps2.10:16.4","ps2.10:16.5","ps2.10:16.6","ps2.10:16.7","ps2.10:16.8","ps2.10:16.9","ps2.10:16.10","ps2.10:16.11"],"kind":"text","text":{"pi":"Katamaṁ paṭippassaddhisuññaṁ?\nNekkhammena kāmacchando paṭippassaddho ceva suñño ca.\nAbyāpādena byāpādo paṭippassaddho ceva suñño ca.\nĀlokasaññāya thinamiddhaṁ paṭippassaddhañceva suññañca.\nAvikkhepena uddhaccaṁ paṭippassaddhañceva suññañca.\nDhammavavatthānena vicikicchā paṭippassaddhā ceva suññā ca.\nÑāṇena avijjā paṭippassaddhā ceva suññā ca.\nPāmojjena arati paṭippassaddhā ceva suññā ca.\nPaṭhamena jhānena nīvaraṇā paṭippassaddhā ceva suññā ca …pe…\narahattamaggena sabbakilesā paṭippassaddhā ceva suññā ca.\nIdaṁ paṭippassaddhisuññaṁ."}},{"id":"ps2.10:17","sourceIds":["ps2.10:17.1","ps2.10:17.2","ps2.10:17.3","ps2.10:17.4","ps2.10:17.5","ps2.10:17.6","ps2.10:17.7","ps2.10:17.8","ps2.10:17.9","ps2.10:17.10","ps2.10:17.11"],"kind":"text","text":{"pi":"Katamaṁ nissaraṇasuññaṁ?\nNekkhammena kāmacchando nissaṭo ceva suñño ca.\nAbyāpādena byāpādo nissaṭo ceva suñño ca.\nĀlokasaññāya thinamiddhaṁ nissaṭañceva suññañca.\nAvikkhepena uddhaccaṁ nissaṭañceva suññañca.\nDhammavavatthānena vicikicchā nissaṭā ceva suññā ca.\nÑāṇena avijjā nissaṭā ceva suññā ca.\nPāmojjena arati nissaṭā ceva suññā ca.\nPaṭhamena jhānena nīvaraṇā nissaṭā ceva suññā ca …pe…\narahattamaggena sabbakilesā nissaṭā ceva suññā ca.\nIdaṁ nissaraṇasuññaṁ."}},{"id":"ps2.10:18","sourceIds":["ps2.10:18.1","ps2.10:18.2","ps2.10:18.3","ps2.10:18.4","ps2.10:18.5","ps2.10:18.6","ps2.10:18.7","ps2.10:18.8"],"kind":"text","text":{"pi":"Katamaṁ ajjhattasuññaṁ?\nAjjhattaṁ cakkhuṁ suññaṁ attena vā attaniyena vā niccena vā dhuvena vā sassatena vā avipariṇāmadhammena vā.\nAjjhattaṁ sotaṁ suññaṁ …\najjhattaṁ ghānaṁ suññaṁ …\najjhattaṁ jivhā suññā …\najjhattaṁ kāyo suñño …\najjhattaṁ mano suñño attena vā attaniyena vā niccena vā dhuvena vā sassatena vā avipariṇāmadhammena vā.\nIdaṁ ajjhattasuññaṁ."}},{"id":"ps2.10:19","sourceIds":["ps2.10:19.1","ps2.10:19.2","ps2.10:19.3","ps2.10:19.4"],"kind":"text","text":{"pi":"Katamaṁ bahiddhāsuññaṁ?\nBahiddhā rūpā suññā …pe…\nbahiddhā dhammā suññā attena vā attaniyena vā niccena vā dhuvena vā sassatena vā avipariṇāmadhammena vā.\nIdaṁ bahiddhāsuññaṁ."}},{"id":"ps2.10:20","sourceIds":["ps2.10:20.1","ps2.10:20.2","ps2.10:20.3","ps2.10:20.4","ps2.10:20.5","ps2.10:20.6","ps2.10:20.7","ps2.10:20.8"],"kind":"text","text":{"pi":"Katamaṁ dubhatosuññaṁ?\nYañca ajjhattaṁ cakkhu ye ca bahiddhā rūpā ubhayametaṁ suññaṁ attena vā attaniyena vā niccena vā dhuvena vā sassatena vā avipariṇāmadhammena vā.\nYañca ajjhattaṁ sotaṁ ye ca bahiddhā saddā …pe…\nyañca ajjhattaṁ ghānaṁ ye ca bahiddhā gandhā …\nyā ca ajjhattaṁ jivhā ye ca bahiddhā rasā …\nyo ca ajjhattaṁ kāyo ye ca bahiddhā phoṭṭhabbā …\nyo ca ajjhattaṁ mano ye ca bahiddhā dhammā ubhayametaṁ suññaṁ attena vā attaniyena vā niccena vā dhuvena vā sassatena vā avipariṇāmadhammena vā.\nIdaṁ dubhatosuññaṁ."}},{"id":"ps2.10:21","sourceIds":["ps2.10:21.1","ps2.10:21.2","ps2.10:21.3","ps2.10:21.4","ps2.10:21.5","ps2.10:21.6","ps2.10:21.7","ps2.10:21.8","ps2.10:21.9"],"kind":"text","text":{"pi":"Katamaṁ sabhāgasuññaṁ?\nCha ajjhattikāni āyatanāni sabhāgāni ceva suññāni ca.\nCha bāhirāni āyatanāni sabhāgāni ceva suññāni ca.\nCha viññāṇakāyā sabhāgā ceva suññā ca.\nCha phassakāyā sabhāgā ceva suññā ca.\nCha vedanākāyā sabhāgā ceva suññā ca.\nCha saññākāyā sabhāgā ceva suññā ca.\nCha cetanākāyā sabhāgā ceva suññā ca.\nIdaṁ sabhāgasuññaṁ."}},{"id":"ps2.10:22","sourceIds":["ps2.10:22.1","ps2.10:22.2","ps2.10:22.3","ps2.10:22.4","ps2.10:22.5","ps2.10:22.6","ps2.10:22.7","ps2.10:22.8"],"kind":"text","text":{"pi":"Katamaṁ visabhāgasuññaṁ?\nCha ajjhattikāni āyatanāni chahi bāhirehi āyatanehi visabhāgāni ceva suññāni ca.\nCha bāhirāni āyatanāni chahi viññāṇakāyehi visabhāgāni ceva suññāni ca.\nCha viññāṇakāyā chahi phassakāyehi visabhāgā ceva suññā ca.\nCha phassakāyā chahi vedanākāyehi visabhāgā ceva suññā ca.\nCha vedanākāyā chahi saññākāyehi visabhāgā ceva suññā ca.\nCha saññākāyā chahi cetanākāyehi visabhāgā ceva suññā ca.\nIdaṁ visabhāgasuññaṁ."}},{"id":"ps2.10:23","sourceIds":["ps2.10:23.1","ps2.10:23.2","ps2.10:23.3","ps2.10:23.4","ps2.10:23.5","ps2.10:23.6","ps2.10:23.7","ps2.10:23.8","ps2.10:23.9","ps2.10:23.10","ps2.10:23.11"],"kind":"text","text":{"pi":"Katamaṁ esanāsuññaṁ?\nNekkhammesanā kāmacchandena suññā.\nAbyāpādesanā byāpādena suññā.\nĀlokasaññesanā thinamiddhena suññā.\nAvikkhepesanā uddhaccena suññā.\nDhammavavatthānesanā vicikicchāya suññā.\nÑāṇesanā avijjāya suññā.\nPāmojjesanā aratiyā suññā.\nPaṭhamajjhānesanā nīvaraṇehi suññā …pe…\narahattamaggesanā sabbakilesehi suññā.\nIdaṁ esanāsuññaṁ."}},{"id":"ps2.10:24","sourceIds":["ps2.10:24.1","ps2.10:24.2","ps2.10:24.3","ps2.10:24.4","ps2.10:24.5","ps2.10:24.6","ps2.10:24.7","ps2.10:24.8","ps2.10:24.9","ps2.10:24.10","ps2.10:24.11"],"kind":"text","text":{"pi":"Katamaṁ pariggahasuññaṁ?\nNekkhammapariggaho kāmacchandena suñño.\nAbyāpādapariggaho byāpādena suñño.\nĀlokasaññāpariggaho thinamiddhena suñño.\nAvikkhepapariggaho uddhaccena suñño.\nDhammavavatthānapariggaho vicikicchāya suñño.\nÑāṇapariggaho avijjāya suñño.\nPāmojjapariggaho aratiyā suñño.\nPaṭhamajjhānapariggaho nīvaraṇehi suñño …pe…\narahattamaggapariggaho sabbakilesehi suñño.\nIdaṁ pariggahasuññaṁ."}},{"id":"ps2.10:25","sourceIds":["ps2.10:25.1","ps2.10:25.2","ps2.10:25.3","ps2.10:25.4","ps2.10:25.5","ps2.10:25.6","ps2.10:25.7","ps2.10:25.8","ps2.10:25.9","ps2.10:25.10","ps2.10:25.11"],"kind":"text","text":{"pi":"Katamaṁ paṭilābhasuññaṁ?\nNekkhammapaṭilābho kāmacchandena suñño.\nAbyāpādapaṭilābho byāpādena suñño.\nĀlokasaññāpaṭilābho thinamiddhena suñño.\nAvikkhepapaṭilābho uddhaccena suñño.\nDhammavavatthānapaṭilābho vicikicchāya suñño.\nÑāṇapaṭilābho avijjāya suñño.\nPāmojjapaṭilābho aratiyā suñño.\nPaṭhamajjhānapaṭilābho nīvaraṇehi suñño …pe…\narahattamaggapaṭilābho sabbakilesehi suñño.\nIdaṁ paṭilābhasuññaṁ."}},{"id":"ps2.10:26","sourceIds":["ps2.10:26.1","ps2.10:26.2","ps2.10:26.3","ps2.10:26.4","ps2.10:26.5","ps2.10:26.6","ps2.10:26.7","ps2.10:26.8","ps2.10:26.9","ps2.10:26.10","ps2.10:26.11"],"kind":"text","text":{"pi":"Katamaṁ paṭivedhasuññaṁ?\nNekkhammappaṭivedho kāmacchandena suñño.\nAbyāpādappaṭivedho byāpādena suñño.\nĀlokasaññāppaṭivedho thinamiddhena suñño.\nAvikkhepappaṭivedho uddhaccena suñño.\nDhammavavatthānappaṭivedho vicikicchāya suñño.\nÑāṇappaṭivedho avijjāya suñño.\nPāmojjappaṭivedho aratiyā suñño.\nPaṭhamajjhānappaṭivedho nīvaraṇehi suñño …pe…\narahattamaggappaṭivedho sabbakilesehi suñño.\nIdaṁ paṭivedhasuññaṁ."}},{"id":"ps2.10:27","sourceIds":["ps2.10:27.1","ps2.10:27.2","ps2.10:27.3","ps2.10:27.4","ps2.10:27.5","ps2.10:27.6","ps2.10:27.7","ps2.10:27.8","ps2.10:27.9","ps2.10:27.10","ps2.10:27.11","ps2.10:27.12","ps2.10:27.13","ps2.10:27.14","ps2.10:27.15","ps2.10:27.16","ps2.10:27.17","ps2.10:27.18","ps2.10:27.19","ps2.10:27.20"],"kind":"text","text":{"pi":"Katamaṁ ekattasuññaṁ, nānattasuññaṁ?\nKāmacchando nānattaṁ, nekkhammaṁ ekattaṁ.\nNekkhammekattaṁ cetayato kāmacchandena suññaṁ.\nByāpādo nānattaṁ, abyāpādo ekattaṁ.\nAbyāpādekattaṁ cetayato byāpādena suññaṁ.\nThinamiddhaṁ nānattaṁ, ālokasaññā ekattaṁ.\nĀlokasaññekattaṁ cetayato thinamiddhena suññaṁ.\nUddhaccaṁ nānattaṁ, avikkhepo ekattaṁ.\nAvikkhepekattaṁ cetayato uddhaccena suññaṁ.\nVicikicchā nānattaṁ, dhammavavatthānaṁ ekattaṁ.\nDhammavavatthānekattaṁ cetayato vicikicchāya suññaṁ.\nAvijjā nānattaṁ, ñāṇaṁ ekattaṁ.\nÑāṇekattaṁ cetayato avijjāya suññaṁ.\nArati nānattaṁ, pāmojjaṁ ekattaṁ.\nPāmojjekattaṁ cetayato aratiyā suññaṁ.\nNīvaraṇā nānattaṁ, paṭhamajjhānaṁ ekattaṁ.\nPaṭhamajjhānekattaṁ cetayato nīvaraṇehi suññaṁ …pe…\nsabbakilesā nānattaṁ, arahattamaggo ekattaṁ.\nArahattamaggekattaṁ cetayato sabbakilesehi suññaṁ.\nIdaṁ ekattasuññaṁ nānattasuññaṁ."}},{"id":"ps2.10:28","sourceIds":["ps2.10:28.1","ps2.10:28.2","ps2.10:28.3","ps2.10:28.4","ps2.10:28.5","ps2.10:28.6","ps2.10:28.7","ps2.10:28.8","ps2.10:28.9","ps2.10:28.10","ps2.10:28.11"],"kind":"text","text":{"pi":"Katamaṁ khantisuññaṁ?\nNekkhammakhanti kāmacchandena suññā.\nAbyāpādakhanti byāpādena suññā.\nĀlokasaññākhanti thinamiddhena suññā.\nAvikkhepakhanti uddhaccena suññā.\nDhammavavatthānakhanti vicikicchāya suññā.\nÑāṇakhanti avijjāya suññā.\nPāmojjakhanti aratiyā suññā.\nPaṭhamajjhānakhanti nīvaraṇehi suññā …pe…\narahattamaggakhanti sabbakilesehi suññā.\nIdaṁ khantisuññaṁ."}},{"id":"ps2.10:29","sourceIds":["ps2.10:29.1","ps2.10:29.2","ps2.10:29.3","ps2.10:29.4","ps2.10:29.5","ps2.10:29.6","ps2.10:29.7","ps2.10:29.8","ps2.10:29.9","ps2.10:29.10","ps2.10:29.11"],"kind":"text","text":{"pi":"Katamaṁ adhiṭṭhānasuññaṁ?\nNekkhammādhiṭṭhānaṁ kāmacchandena suññaṁ.\nAbyāpādādhiṭṭhānaṁ byāpādena suññaṁ.\nĀlokasaññādhiṭṭhānaṁ thinamiddhena suññaṁ.\nAvikkhepādhiṭṭhānaṁ uddhaccena suññaṁ.\nDhammavavatthānādhiṭṭhānaṁ vicikicchāya suññaṁ.\nÑāṇādhiṭṭhānaṁ avijjāya suññaṁ.\nPāmojjādhiṭṭhānaṁ aratiyā suññaṁ.\nPaṭhamajjhānādhiṭṭhānaṁ nīvaraṇehi suññaṁ …pe…\narahattamaggādhiṭṭhānaṁ sabbakilesehi suññaṁ.\nIdaṁ adhiṭṭhānasuññaṁ."}},{"id":"ps2.10:30","sourceIds":["ps2.10:30.1","ps2.10:30.2","ps2.10:30.3","ps2.10:30.4","ps2.10:30.5","ps2.10:30.6","ps2.10:30.7","ps2.10:30.8","ps2.10:30.9","ps2.10:30.10","ps2.10:30.11"],"kind":"text","text":{"pi":"Katamaṁ pariyogāhaṇasuññaṁ?\nNekkhammapariyogāhaṇaṁ kāmacchandena suññaṁ.\nAbyāpādapariyogāhaṇaṁ byāpādena suññaṁ.\nĀlokasaññāpariyogāhaṇaṁ thinamiddhena suññaṁ.\nAvikkhepapariyogāhaṇaṁ uddhaccena suññaṁ.\nDhammavavatthānapariyogāhaṇaṁ vicikicchāya suññaṁ.\nÑāṇapariyogāhaṇaṁ avijjāya suññaṁ.\nPāmojjapariyogāhaṇaṁ aratiyā suññaṁ.\nPaṭhamajjhānapariyogāhaṇaṁ nīvaraṇehi suññaṁ …pe…\narahattamaggapariyogāhaṇaṁ sabbakilesehi suññaṁ.\nIdaṁ pariyogāhaṇasuññaṁ."}},{"id":"ps2.10:31","sourceIds":["ps2.10:31.1","ps2.10:31.2","ps2.10:31.3","ps2.10:31.4","ps2.10:31.5","ps2.10:31.6","ps2.10:31.7","ps2.10:31.8","ps2.10:31.9","ps2.10:31.10","ps2.10:31.11","ps2.10:31.12","ps2.10:31.13"],"kind":"text","text":{"pi":"Katamaṁ sampajānassa pavattapariyādānaṁ sabbasuññatānaṁ paramatthasuññaṁ?\nIdha sampajāno nekkhammena kāmacchandassa pavattaṁ pariyādiyati, abyāpādena byāpādassa pavattaṁ pariyādiyati, ālokasaññāya thinamiddhassa pavattaṁ pariyādiyati, avikkhepena uddhaccassa pavattaṁ pariyādiyati, dhammavavatthānena vicikicchāya pavattaṁ pariyādiyati, ñāṇena avijjāya pavattaṁ pariyādiyati, pāmojjena aratiyā pavattaṁ pariyādiyati, paṭhamena jhānena nīvaraṇānaṁ pavattaṁ pariyādiyati …pe…\narahattamaggena sabbakilesānaṁ pavattaṁ pariyādiyati.\nAtha vā pana sampajānassa anupādisesāya nibbānadhātuyā parinibbāyantassa idaṁ ceva cakkhupavattaṁ pariyādiyati, aññañca cakkhupavattaṁ na uppajjati.\nIdañceva sotapavattaṁ …pe…\nghānapavattaṁ …\njivhāpavattaṁ …\nkāyapavattaṁ …\nmanopavattaṁ pariyādiyati, aññañca manopavattaṁ na uppajjati.\nIdaṁ sampajānassa pavattapariyādānaṁ sabbasuññatānaṁ paramatthasuññanti.\nSuññakathā niṭṭhitā.\nYuganaddhavaggo dutiyo.\nTassuddānaṁ"}},{"id":"ps2.10:32","sourceIds":["ps2.10:32.1","ps2.10:32.2","ps2.10:32.3","ps2.10:32.4","ps2.10:32.5"],"kind":"text","text":{"pi":"Yuganaddhā saccabojjhaṅgā,\nmettā virāgapañcamā;\nPaṭisambhidā dhammacakkaṁ,\nlokuttarabalasuññāti.\nEsa nikāyadharehi ṭhapito, asamo dutiyo pavaro varavaggoti."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps2.10/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}