{"id":"ps2.2","title":"2.2. Saccakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps2.2","title":"2.2. Saccakathā","units":[{"id":"ps2.2:0","sourceIds":["ps2.2:0.1","ps2.2:0.2","ps2.2:0.3"],"kind":"text","text":{"pi":"Paṭisambhidāmagga\n2 Yuganaddhavagga\n2.2. Saccakathā"}},{"id":"ps2.2:1","sourceIds":["ps2.2:1.1","ps2.2:1.2","ps2.2:1.3","ps2.2:1.4","ps2.2:1.5","ps2.2:1.6"],"kind":"text","text":{"pi":"Purimanidānaṁ.\n“Cattārimāni, bhikkhave, tathāni avitathāni anaññathāni.\nKatamāni cattāri?\n‘Idaṁ dukkhan’ti, bhikkhave, tathametaṁ avitathametaṁ anaññathametaṁ;\n‘ayaṁ dukkhasamudayo’ti tathametaṁ avitathametaṁ anaññathametaṁ, ‘ayaṁ dukkhanirodho’ti tathametaṁ avitathametaṁ anaññathametaṁ, ‘ayaṁ dukkhanirodhagāminī paṭipadā’ti tathametaṁ avitathametaṁ anaññathametaṁ.\nImāni kho, bhikkhave, cattāri tathāni avitathāni anaññathāni”."}},{"id":"ps2.2:2","sourceIds":["ps2.2:2.0","ps2.2:2.1","ps2.2:2.2","ps2.2:2.3","ps2.2:2.4","ps2.2:2.5"],"kind":"text","text":{"pi":"2.2.1. Paṭhamasuttantaniddesa\nKathaṁ dukkhaṁ tathaṭṭhena saccaṁ?\nCattāro dukkhassa dukkhaṭṭhā tathā avitathā anaññathā.\nDukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho—\nime cattāro dukkhassa dukkhaṭṭhā tathā avitathā anaññathā.\nEvaṁ dukkhaṁ tathaṭṭhena saccaṁ."}},{"id":"ps2.2:3","sourceIds":["ps2.2:3.1","ps2.2:3.2","ps2.2:3.3","ps2.2:3.4","ps2.2:3.5"],"kind":"text","text":{"pi":"Kathaṁ samudayo tathaṭṭhena saccaṁ?\nCattāro samudayassa samudayaṭṭhā tathā avitathā anaññathā.\nSamudayassa āyūhanaṭṭho, nidānaṭṭho, saṁyogaṭṭho palibodhaṭṭho—\nime cattāro samudayassa samudayaṭṭhā tathā avitathā anaññathā.\nEvaṁ samudayo tathaṭṭhena saccaṁ."}},{"id":"ps2.2:4","sourceIds":["ps2.2:4.1","ps2.2:4.2","ps2.2:4.3","ps2.2:4.4","ps2.2:4.5"],"kind":"text","text":{"pi":"Kathaṁ nirodho tathaṭṭhena saccaṁ?\nCattāro nirodhassa nirodhaṭṭhā tathā avitathā anaññathā.\nNirodhassa nissaraṇaṭṭho, vivekaṭṭho, asaṅkhataṭṭho, amataṭṭho—\nime cattāro nirodhassa nirodhaṭṭhā tathā avitathā anaññathā.\nEvaṁ nirodho tathaṭṭhena saccaṁ."}},{"id":"ps2.2:5","sourceIds":["ps2.2:5.1","ps2.2:5.2","ps2.2:5.3","ps2.2:5.4","ps2.2:5.5"],"kind":"text","text":{"pi":"Kathaṁ maggo tathaṭṭhena saccaṁ?\nCattāro maggassa maggaṭṭhā tathā avitathā anaññathā.\nMaggassa niyyānaṭṭho, hetuṭṭho, dassanaṭṭho, ādhipateyyaṭṭho—\nime cattāro maggassa maggaṭṭhā tathā avitathā anaññathā.\nEvaṁ maggo tathaṭṭhena saccaṁ."}},{"id":"ps2.2:6","sourceIds":["ps2.2:6.1","ps2.2:6.2","ps2.2:6.3","ps2.2:6.4","ps2.2:6.5","ps2.2:6.6","ps2.2:6.7"],"kind":"text","text":{"pi":"Katihākārehi cattāri saccāni ekappaṭivedhāni?\nCatūhākārehi cattāri saccāni ekappaṭivedhāni.\nTathaṭṭhena, anattaṭṭhena, saccaṭṭhena, paṭivedhaṭṭhena—\nimehi catūhākārehi cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:7","sourceIds":["ps2.2:7.1","ps2.2:7.2","ps2.2:7.3","ps2.2:7.4","ps2.2:7.5","ps2.2:7.6","ps2.2:7.7"],"kind":"text","text":{"pi":"Kathaṁ tathaṭṭhena cattāri saccāni ekappaṭivedhāni?\nCatūhākārehi tathaṭṭhena cattāri saccāni ekappaṭivedhāni.\nDukkhassa dukkhaṭṭho tathaṭṭho, samudayassa samudayaṭṭho tathaṭṭho, nirodhassa nirodhaṭṭho tathaṭṭho, maggassa maggaṭṭho tathaṭṭho—\nimehi catūhākārehi tathaṭṭhena cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:8","sourceIds":["ps2.2:8.1","ps2.2:8.2","ps2.2:8.3","ps2.2:8.4","ps2.2:8.5","ps2.2:8.6","ps2.2:8.7"],"kind":"text","text":{"pi":"Kathaṁ anattaṭṭhena cattāri saccāni ekappaṭivedhāni?\nCatūhākārehi anattaṭṭhena cattāri saccāni ekappaṭivedhāni.\nDukkhassa dukkhaṭṭho anattaṭṭho, samudayassa samudayaṭṭho anattaṭṭho, nirodhassa nirodhaṭṭho anattaṭṭho, maggassa maggaṭṭho anattaṭṭho—\nimehi catūhākārehi anattaṭṭhena cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:9","sourceIds":["ps2.2:9.1","ps2.2:9.2","ps2.2:9.3","ps2.2:9.4","ps2.2:9.5","ps2.2:9.6","ps2.2:9.7"],"kind":"text","text":{"pi":"Kathaṁ saccaṭṭhena cattāri saccāni ekappaṭivedhāni?\nCatūhākārehi saccaṭṭhena cattāri saccāni ekappaṭivedhāni.\nDukkhassa dukkhaṭṭho saccaṭṭho, samudayassa samudayaṭṭho saccaṭṭho, nirodhassa nirodhaṭṭho saccaṭṭho, maggassa maggaṭṭho saccaṭṭho—\nimehi catūhākārehi saccaṭṭhena cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:10","sourceIds":["ps2.2:10.1","ps2.2:10.2","ps2.2:10.3","ps2.2:10.4","ps2.2:10.5","ps2.2:10.6"],"kind":"text","text":{"pi":"Kathaṁ paṭivedhaṭṭhena cattāri saccāni ekappaṭivedhāni?\nCatūhākārehi paṭivedhaṭṭhena cattāri saccāni ekappaṭivedhāni.\nDukkhassa dukkhaṭṭho paṭivedhaṭṭho, samudayassa samudayaṭṭho paṭivedhaṭṭho nirodhassa nirodhaṭṭho paṭivedhaṭṭho, maggassa maggaṭṭho paṭivedhaṭṭho—\nimehi catūhākārehi paṭivedhaṭṭhena cattāri saccāni ekasaṅgahitāni yaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:11","sourceIds":["ps2.2:11.1","ps2.2:11.2","ps2.2:11.3","ps2.2:11.4","ps2.2:11.5","ps2.2:11.6","ps2.2:11.7","ps2.2:11.8"],"kind":"text","text":{"pi":"Katihākārehi cattāri saccāni ekappaṭivedhāni?\nYaṁ aniccaṁ taṁ dukkhaṁ, yaṁ dukkhaṁ taṁ aniccaṁ, yaṁ aniccañca dukkhañca taṁ anattā.\nYaṁ aniccañca dukkhañca anattā ca taṁ tathaṁ.\nYaṁ aniccaṁ ca dukkhañca anattā ca tathañca taṁ saccaṁ.\nYaṁ aniccañca dukkhañca anattā ca tathañca saccañca taṁ ekasaṅgahitaṁ.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:12","sourceIds":["ps2.2:12.1","ps2.2:12.2","ps2.2:12.3","ps2.2:12.4","ps2.2:12.5","ps2.2:12.6","ps2.2:12.7"],"kind":"text","text":{"pi":"Katihākārehi cattāri saccāni ekappaṭivedhāni?\nNavahākārehi cattāri saccāni ekappaṭivedhāni.\nTathaṭṭhena, anattaṭṭhena, saccaṭṭhena, paṭivedhaṭṭhena, abhiññaṭṭhena, pariññaṭṭhena, pahānaṭṭhena, bhāvanaṭṭhena, sacchikiriyaṭṭhena—\nimehi navahākārehi cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:13","sourceIds":["ps2.2:13.1","ps2.2:13.2","ps2.2:13.3","ps2.2:13.4","ps2.2:13.5","ps2.2:13.6","ps2.2:13.7"],"kind":"text","text":{"pi":"Kathaṁ tathaṭṭhena cattāri saccāni ekappaṭivedhāni?\nNavahākārehi tathaṭṭhena cattāri saccāni ekappaṭivedhāni.\nDukkhassa dukkhaṭṭho tathaṭṭho, samudayassa samudayaṭṭho tathaṭṭho, nirodhassa nirodhaṭṭho tathaṭṭho, maggassa maggaṭṭho tathaṭṭho, abhiññāya abhiññaṭṭho tathaṭṭho, pariññāya pariññaṭṭho tathaṭṭho, pahānassa pahānaṭṭho tathaṭṭho, bhāvanāya bhāvanaṭṭho tathaṭṭho, sacchikiriyāya sacchikiriyaṭṭho tathaṭṭho—\nimehi navahākārehi tathaṭṭhena cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:14","sourceIds":["ps2.2:14.1","ps2.2:14.2","ps2.2:14.3","ps2.2:14.4","ps2.2:14.5","ps2.2:14.6","ps2.2:14.7","ps2.2:14.8","ps2.2:14.9"],"kind":"text","text":{"pi":"Kathaṁ anattaṭṭhena …\nsaccaṭṭhena …\npaṭivedhaṭṭhena cattāri saccāni ekappaṭivedhāni?\nNavahākārehi paṭivedhaṭṭhena cattāri saccāni ekappaṭivedhāni.\nDukkhassa dukkhaṭṭho paṭivedhaṭṭho, samudayassa samudayaṭṭho paṭivedhaṭṭho, nirodhassa nirodhaṭṭho paṭivedhaṭṭho, maggassa maggaṭṭho paṭivedhaṭṭho, abhiññāya abhiññaṭṭho paṭivedhaṭṭho, pariññāya pariññaṭṭho paṭivedhaṭṭho, pahānassa pahānaṭṭho paṭivedhaṭṭho, bhāvanāya bhāvanaṭṭho paṭivedhaṭṭho, sacchikiriyāya sacchikiriyaṭṭho paṭivedhaṭṭho—\nimehi navahākārehi paṭivedhaṭṭhena cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:15","sourceIds":["ps2.2:15.1","ps2.2:15.2","ps2.2:15.3","ps2.2:15.4","ps2.2:15.5","ps2.2:15.6","ps2.2:15.7"],"kind":"text","text":{"pi":"Katihākārehi cattāri saccāni ekappaṭivedhāni?\nDvādasahākārehi cattāri saccāni ekappaṭivedhāni.\nTathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, tathaṭṭhena, ñātaṭṭhena, sacchikiriyaṭṭhena, phassanaṭṭhena, abhisamayaṭṭhena—\nimehi dvādasahi ākārehi cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:16","sourceIds":["ps2.2:16.1","ps2.2:16.2","ps2.2:16.3","ps2.2:16.4","ps2.2:16.5","ps2.2:16.6","ps2.2:16.7","ps2.2:16.8","ps2.2:16.9","ps2.2:16.10"],"kind":"text","text":{"pi":"Kathaṁ tathaṭṭhena cattāri saccāni ekappaṭivedhāni?\nSoḷasahākārehi tathaṭṭhena cattāri saccāni ekappaṭivedhāni.\nDukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho, tathaṭṭho;\nsamudayassa āyūhanaṭṭho, nidānaṭṭho, saṁyogaṭṭho, palibodhaṭṭho tathaṭṭho;\nnirodhassa nissaraṇaṭṭho, vivekaṭṭho, asaṅkhataṭṭho, amataṭṭho tathaṭṭho;\nmaggassa niyyānaṭṭho, hetuṭṭho, dassanaṭṭho, ādhipateyyaṭṭho tathaṭṭho—\nimehi soḷasahi ākārehi tathaṭṭhena cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:17","sourceIds":["ps2.2:17.1","ps2.2:17.2","ps2.2:17.3","ps2.2:17.4","ps2.2:17.5","ps2.2:17.6","ps2.2:17.7","ps2.2:17.8","ps2.2:17.9","ps2.2:17.10","ps2.2:17.11","ps2.2:17.12","ps2.2:17.13","ps2.2:17.14","ps2.2:17.15","ps2.2:17.16","ps2.2:17.17","ps2.2:17.18","ps2.2:17.19","ps2.2:17.20"],"kind":"text","text":{"pi":"Kathaṁ anattaṭṭhena …pe…\nsaccaṭṭhena …\npaṭivedhaṭṭhena …\nabhijānanaṭṭhena …\nparijānanaṭṭhena …\ndhammaṭṭhena …\ntathaṭṭhena …\nñātaṭṭhena …\nsacchikiriyaṭṭhena …\nphassanaṭṭhena …\nabhisamayaṭṭhena cattāri saccāni ekappaṭivedhāni?\nSoḷasahi ākārehi abhisamayaṭṭhena cattāri saccāni ekappaṭivedhāni.\nDukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho, abhisamayaṭṭho;\nsamudayassa āyūhanaṭṭho, nidānaṭṭho, saṁyogaṭṭho, palibodhaṭṭho, abhisamayaṭṭho;\nnirodhassa nissaraṇaṭṭho, vivekaṭṭho, asaṅkhataṭṭho, amataṭṭho, abhisamayaṭṭho;\nmaggassa niyyānaṭṭho, hetuṭṭho, dassanaṭṭho, ādhipateyyaṭṭho, abhisamayaṭṭho—\nimehi soḷasahi ākārehi abhisamayaṭṭhena cattāri saccāni ekasaṅgahitāni.\nYaṁ ekasaṅgahitaṁ taṁ ekattaṁ.\nEkattaṁ ekena ñāṇena paṭivijjhatīti—\ncattāri saccāni ekappaṭivedhāni."}},{"id":"ps2.2:18","sourceIds":["ps2.2:18.1","ps2.2:18.2","ps2.2:18.3","ps2.2:18.4"],"kind":"text","text":{"pi":"Saccānaṁ kati lakkhaṇāni?\nSaccānaṁ dve lakkhaṇāni.\nSaṅkhatalakkhaṇañca, asaṅkhatalakkhaṇañca—\nsaccānaṁ imāni dve lakkhaṇāni."}},{"id":"ps2.2:19","sourceIds":["ps2.2:19.1","ps2.2:19.2","ps2.2:19.3","ps2.2:19.4"],"kind":"text","text":{"pi":"Saccānaṁ kati lakkhaṇāni?\nSaccānaṁ cha lakkhaṇāni.\nSaṅkhatānaṁ saccānaṁ uppādo paññāyati, vayo paññāyati, ṭhitānaṁ aññathattaṁ paññāyati asaṅkhatassa saccassa na uppādo paññāyati, na vayo paññāyati, na ṭhitassa aññathattaṁ paññāyati—\nsaccānaṁ imāni cha lakkhaṇāni."}},{"id":"ps2.2:20","sourceIds":["ps2.2:20.1","ps2.2:20.2","ps2.2:20.3","ps2.2:20.4","ps2.2:20.5","ps2.2:20.6","ps2.2:20.7"],"kind":"text","text":{"pi":"Saccānaṁ kati lakkhaṇāni?\nSaccānaṁ dvādasa lakkhaṇāni.\nDukkhasaccassa uppādo paññāyati, vayo paññāyati, ṭhitassa aññathattaṁ paññāyati;\nsamudayasaccassa uppādo paññāyati, vayo paññāyati, ṭhitassa aññathattaṁ paññāyati;\nmaggasaccassa uppādo paññāyati, vayo paññāyati, ṭhitassa aññathattaṁ paññāyati;\nnirodhasaccassa na uppādo paññāyati, na vayo paññāyati, na ṭhitassa aññathattaṁ paññāyati—\nsaccānaṁ imāni dvādasa lakkhaṇāni."}},{"id":"ps2.2:21","sourceIds":["ps2.2:21.1","ps2.2:21.2","ps2.2:21.3"],"kind":"text","text":{"pi":"Catunnaṁ saccānaṁ kati kusalā, kati akusalā, kati abyākatā?\nSamudayasaccaṁ akusalaṁ, maggasaccaṁ kusalaṁ, nirodhasaccaṁ abyākataṁ.\nDukkhasaccaṁ siyā kusalaṁ, siyā akusalaṁ, siyā abyākataṁ."}},{"id":"ps2.2:22","sourceIds":["ps2.2:22.1","ps2.2:22.2","ps2.2:22.3","ps2.2:22.4","ps2.2:22.5","ps2.2:22.6","ps2.2:22.7","ps2.2:22.8","ps2.2:22.9","ps2.2:22.10"],"kind":"text","text":{"pi":"Siyā tīṇi saccāni ekasaccena saṅgahitāni, ekasaccaṁ tīhi saccehi saṅgahitaṁ?\nVatthuvasena pariyāyena siyāti.\nKathañca siyā?\nYaṁ dukkhasaccaṁ akusalaṁ, samudayasaccaṁ akusalaṁ—\nevaṁ akusalaṭṭhena dve saccāni ekasaccena saṅgahitāni, ekasaccaṁ dvīhi saccehi saṅgahitaṁ.\nYaṁ dukkhasaccaṁ kusalaṁ, maggasaccaṁ kusalaṁ—\nevaṁ kusalaṭṭhena dve saccāni ekasaccena saṅgahitāni, ekasaccaṁ dvīhi saccehi saṅgahitaṁ.\nYaṁ dukkhasaccaṁ abyākataṁ, nirodhasaccaṁ abyākataṁ—\nevaṁ abyākataṭṭhena dve saccāni ekasaccena saṅgahitāni, ekasaccaṁ dvīhi saccehi saṅgahitaṁ.\nEvaṁ siyā tīṇi saccāni ekasaccena saṅgahitāni, ekasaccaṁ tīhi saccehi saṅgahitaṁ vatthuvasena pariyāyenāti."}},{"id":"ps2.2:23","sourceIds":["ps2.2:23.0","ps2.2:23.1","ps2.2:23.2","ps2.2:23.3","ps2.2:23.4","ps2.2:23.5","ps2.2:23.6","ps2.2:23.7","ps2.2:23.8","ps2.2:23.9","ps2.2:23.10","ps2.2:23.11","ps2.2:23.12","ps2.2:23.13","ps2.2:23.14","ps2.2:23.15","ps2.2:23.16","ps2.2:23.17","ps2.2:23.18","ps2.2:23.19","ps2.2:23.20","ps2.2:23.21","ps2.2:23.22"],"kind":"text","text":{"pi":"2.2.2. Dutiyasuttantapāḷi\n“Pubbe me, bhikkhave, sambodhā anabhisambuddhassa bodhisattasseva sato etadahosi—\n‘ko nu kho rūpassa assādo, ko ādīnavo, kiṁ nissaraṇaṁ;\nko vedanāya assādo, ko ādīnavo, kiṁ nissaraṇaṁ;\nko saññāya assādo, ko ādīnavo, kiṁ nissaraṇaṁ;\nko saṅkhārānaṁ assādo, ko ādīnavo, kiṁ nissaraṇaṁ;\nko viññāṇassa assādo, ko ādīnavo, kiṁ nissaraṇan’ti?\nTassa mayhaṁ, bhikkhave, etadahosi—\n‘yaṁ kho rūpaṁ paṭicca uppajjati sukhaṁ somanassaṁ—\nayaṁ rūpassa assādo.\nYaṁ rūpaṁ aniccaṁ, taṁ dukkhaṁ vipariṇāmadhammaṁ—\nayaṁ rūpassa ādīnavo.\nYo rūpasmiṁ chandarāgavinayo chandarāgappahānaṁ—\nidaṁ rūpassa nissaraṇaṁ.\nYaṁ vedanaṁ paṭicca …pe…\nyaṁ saññaṁ paṭicca …\nyaṁ saṅkhāre paṭicca …\nyaṁ viññāṇaṁ paṭicca uppajjati sukhaṁ somanassaṁ—\nayaṁ viññāṇassa assādo.\nYaṁ viññāṇaṁ aniccaṁ taṁ dukkhaṁ vipariṇāmadhammaṁ—\nayaṁ viññāṇassa ādīnavo.\nYo viññāṇasmiṁ chandarāgavinayo chandarāgappahānaṁ—\nidaṁ viññāṇassa nissaraṇaṁ’."}},{"id":"ps2.2:24","sourceIds":["ps2.2:24.1","ps2.2:24.2","ps2.2:24.3","ps2.2:24.4"],"kind":"text","text":{"pi":"Yāvakīvañcāhaṁ, bhikkhave, imesaṁ pañcannaṁ upādānakkhandhānaṁ evaṁ assādañca assādato ādīnavañca ādīnavato nissaraṇañca nissaraṇato yathābhūtaṁ nābbhaññāsiṁ, neva tāvāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ yato ca khvāhaṁ, bhikkhave, imesaṁ pañcannaṁ upādānakkhandhānaṁ evaṁ assādañca assādato ādīnavañca ādīnavato nissaraṇañca nissaraṇato yathābhūtaṁ abbhaññāsiṁ, athāhaṁ, bhikkhave, ‘sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṁ sammāsambodhiṁ abhisambuddho’ti paccaññāsiṁ.\nÑāṇañca pana me dassanaṁ udapādi—\n‘akuppā me vimutti.\nAyamantimā jāti, natthi dāni punabbhavo’”ti."}},{"id":"ps2.2:25","sourceIds":["ps2.2:25.0","ps2.2:25.1","ps2.2:25.2","ps2.2:25.3","ps2.2:25.4","ps2.2:25.5","ps2.2:25.6","ps2.2:25.7","ps2.2:25.8"],"kind":"text","text":{"pi":"2.2.3. Dutiyasuttantaniddesa\nYaṁ rūpaṁ paṭicca uppajjati sukhaṁ somanassaṁ, ayaṁ rūpassa assādoti—\npahānappaṭivedho samudayasaccaṁ.\nYaṁ rūpaṁ aniccaṁ taṁ dukkhaṁ vipariṇāmadhammaṁ, ayaṁ rūpassa ādīnavoti—\npariññāpaṭivedho dukkhasaccaṁ.\nYo rūpasmiṁ chandarāgavinayo chandarāgappahānaṁ, idaṁ rūpassa nissaraṇanti—\nsacchikiriyāpaṭivedho nirodhasaccaṁ.\nYā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi—\nbhāvanāpaṭivedho maggasaccaṁ."}},{"id":"ps2.2:26","sourceIds":["ps2.2:26.1","ps2.2:26.2","ps2.2:26.3","ps2.2:26.4","ps2.2:26.5","ps2.2:26.6","ps2.2:26.7","ps2.2:26.8","ps2.2:26.9","ps2.2:26.10","ps2.2:26.11"],"kind":"text","text":{"pi":"Yaṁ vedanaṁ paṭicca …pe…\nyaṁ saññaṁ paṭicca …\nyaṁ saṅkhāre paṭicca …\nyaṁ viññāṇaṁ paṭicca uppajjati sukhaṁ somanassaṁ, ayaṁ viññāṇassa assādoti—\npahānappaṭivedho samudayasaccaṁ.\nYaṁ viññāṇaṁ aniccaṁ taṁ dukkhaṁ vipariṇāmadhammaṁ, ayaṁ viññāṇassa ādīnavoti—\npariññāpaṭivedho dukkhasaccaṁ.\nYo viññāṇasmiṁ chandarāgavinayo chandarāgappahānaṁ, idaṁ viññāṇassa nissaraṇanti—\nsacchikiriyāpaṭivedho nirodhasaccaṁ.\nYā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi—\nbhāvanāpaṭivedho maggasaccaṁ."}},{"id":"ps2.2:27","sourceIds":["ps2.2:27.1","ps2.2:27.2","ps2.2:27.3","ps2.2:27.4","ps2.2:27.5","ps2.2:27.6","ps2.2:27.7","ps2.2:27.8","ps2.2:27.9"],"kind":"text","text":{"pi":"Saccanti katihākārehi saccaṁ?\nEsanaṭṭhena, pariggahaṭṭhena, paṭivedhaṭṭhena.\nKathaṁ esanaṭṭhena saccaṁ?\nJarāmaraṇaṁ kiṁnidānaṁ, kiṁsamudayaṁ, kiṁjātikaṁ, kiṁpabhavanti—\nevaṁ esanaṭṭhena saccaṁ.\nJarāmaraṇaṁ jātinidānaṁ, jātisamudayaṁ, jātijātikaṁ, jātippabhavanti—\nevaṁ pariggahaṭṭhena saccaṁ.\nJarāmaraṇañca pajānāti, jarāmaraṇasamudayañca pajānāti, jarāmaraṇanirodhañca pajānāti, jarāmaraṇanirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:28","sourceIds":["ps2.2:28.1","ps2.2:28.2","ps2.2:28.3","ps2.2:28.4","ps2.2:28.5","ps2.2:28.6"],"kind":"text","text":{"pi":"Jāti kiṁnidānā, kiṁsamudayā, kiṁjātikā, kiṁpabhavāti—\nevaṁ esanaṭṭhena saccaṁ.\nJāti bhavanidānā, bhavasamudayā, bhavajātikā, bhavappabhavāti—\nevaṁ pariggahaṭṭhena saccaṁ.\nJātiñca pajānāti, jātisamudayañca pajānāti, jātinirodhañca pajānāti, jātinirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:29","sourceIds":["ps2.2:29.1","ps2.2:29.2","ps2.2:29.3","ps2.2:29.4","ps2.2:29.5","ps2.2:29.6"],"kind":"text","text":{"pi":"Bhavo kiṁnidāno, kiṁsamudayo, kiṁjātiko, kiṁpabhavoti—\nevaṁ esanaṭṭhena saccaṁ.\nBhavo upādānanidāno, upādānasamudayo, upādānajātiko, upādānappabhavoti—\nevaṁ pariggahaṭṭhena saccaṁ.\nBhavaṁ ca pajānāti, bhavasamudayañca pajānāti, bhavanirodhañca pajānāti, bhavanirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:30","sourceIds":["ps2.2:30.1","ps2.2:30.2","ps2.2:30.3","ps2.2:30.4","ps2.2:30.5","ps2.2:30.6"],"kind":"text","text":{"pi":"Upādānaṁ kiṁnidānaṁ, kiṁsamudayaṁ, kiṁjātikaṁ, kiṁpabhavanti—\nevaṁ esanaṭṭhena saccaṁ.\nUpādānaṁ taṇhānidānaṁ, taṇhāsamudayaṁ, taṇhājātikaṁ, taṇhāpabhavanti—\nevaṁ pariggahaṭṭhena saccaṁ.\nUpādānañca pajānāti, upādānasamudayañca pajānāti, upādānanirodhañca pajānāti upādānanirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:31","sourceIds":["ps2.2:31.1","ps2.2:31.2","ps2.2:31.3","ps2.2:31.4","ps2.2:31.5","ps2.2:31.6"],"kind":"text","text":{"pi":"Taṇhā kiṁnidānā, kiṁsamudayā, kiṁjātikā, kiṁpabhavāti—\nevaṁ esanaṭṭhena saccaṁ.\nTaṇhā vedanānidānā, vedanāsamudayā, vedanājātikā, vedanāpabhavāti—\nevaṁ pariggahaṭṭhena saccaṁ.\nTaṇhañca pajānāti, taṇhāsamudayañca pajānāti, taṇhānirodhañca pajānāti, taṇhānirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:32","sourceIds":["ps2.2:32.1","ps2.2:32.2","ps2.2:32.3","ps2.2:32.4","ps2.2:32.5","ps2.2:32.6"],"kind":"text","text":{"pi":"Vedanā kiṁnidānā, kiṁsamudayā, kiṁjātikā, kiṁpabhavāti—\nevaṁ esanaṭṭhena saccaṁ.\nVedanā phassanidānā, phassasamudayā, phassajātikā, phassappabhavāti—\nevaṁ pariggahaṭṭhena saccaṁ.\nVedanañca pajānāti, vedanāsamudayañca pajānāti, vedanānirodhañca pajānāti, vedanānirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:33","sourceIds":["ps2.2:33.1","ps2.2:33.2","ps2.2:33.3","ps2.2:33.4","ps2.2:33.5","ps2.2:33.6"],"kind":"text","text":{"pi":"Phasso kiṁnidāno, kiṁsamudayo, kiṁjātiko, kiṁpabhavoti—\nevaṁ esanaṭṭhena saccaṁ.\nPhasso saḷāyatananidāno, saḷāyatanasamudayo, saḷāyatanajātiko, saḷāyatanappabhavoti—\nevaṁ pariggahaṭṭhena saccaṁ.\nPhassañca pajānāti, phassasamudayañca pajānāti, phassanirodhañca pajānāti, phassanirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:34","sourceIds":["ps2.2:34.1","ps2.2:34.2","ps2.2:34.3","ps2.2:34.4","ps2.2:34.5","ps2.2:34.6"],"kind":"text","text":{"pi":"Saḷāyatanaṁ kiṁnidānaṁ, kiṁsamudayaṁ, kiṁjātikaṁ, kiṁpabhavanti—\nevaṁ esanaṭṭhena saccaṁ.\nSaḷāyatanaṁ nāmarūpanidānaṁ, nāmarūpasamudayaṁ, nāmarūpajātikaṁ, nāmarūpappabhavanti—\nevaṁ pariggahaṭṭhena saccaṁ.\nSaḷāyatanañca pajānāti, saḷāyatanasamudayañca pajānāti, saḷāyatananirodhañca pajānāti, saḷāyatananirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:35","sourceIds":["ps2.2:35.1","ps2.2:35.2","ps2.2:35.3","ps2.2:35.4","ps2.2:35.5","ps2.2:35.6"],"kind":"text","text":{"pi":"Nāmarūpaṁ kiṁnidānaṁ, kiṁsamudayaṁ, kiṁjātikaṁ, kiṁpabhavanti—\nevaṁ esanaṭṭhena saccaṁ.\nNāmarūpaṁ viññāṇanidānaṁ, viññāṇasamudayaṁ, viññāṇajātikaṁ, viññāṇappabhavanti—\nevaṁ pariggahaṭṭhena saccaṁ.\nNāmarūpañca pajānāti, nāmarūpasamudayañca pajānāti, nāmarūpanirodhañca pajānāti, nāmarūpanirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:36","sourceIds":["ps2.2:36.1","ps2.2:36.2","ps2.2:36.3","ps2.2:36.4","ps2.2:36.5","ps2.2:36.6"],"kind":"text","text":{"pi":"Viññāṇaṁ kiṁnidānaṁ, kiṁsamudayaṁ, kiṁjātikaṁ, kiṁpabhavanti—\nevaṁ esanaṭṭhena saccaṁ.\nViññāṇaṁ saṅkhāranidānaṁ, saṅkhārasamudayaṁ, saṅkhārajātikaṁ, saṅkhārappabhavanti—\nevaṁ pariggahaṭṭhena saccaṁ.\nViññāṇañca pajānāti, viññāṇasamudayañca pajānāti, viññāṇanirodhañca pajānāti, viññāṇanirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:37","sourceIds":["ps2.2:37.1","ps2.2:37.2","ps2.2:37.3","ps2.2:37.4","ps2.2:37.5","ps2.2:37.6"],"kind":"text","text":{"pi":"Saṅkhārā kiṁnidānā, kiṁsamudayā, kiṁjātikā, kiṁpabhavāti—\nevaṁ esanaṭṭhena saccaṁ.\nSaṅkhārā avijjānidānā, avijjāsamudayā, avijjājātikā, avijjāpabhavāti—\nevaṁ pariggahaṭṭhena saccaṁ.\nSaṅkhāre ca pajānāti, saṅkhārasamudayañca pajānāti, saṅkhāranirodhañca pajānāti, saṅkhāranirodhagāminiṁ paṭipadañca pajānāti—\nevaṁ paṭivedhaṭṭhena saccaṁ."}},{"id":"ps2.2:38","sourceIds":["ps2.2:38.1","ps2.2:38.2","ps2.2:38.3","ps2.2:38.4","ps2.2:38.5","ps2.2:38.6","ps2.2:38.7","ps2.2:38.8","ps2.2:38.9","ps2.2:38.10","ps2.2:38.11"],"kind":"text","text":{"pi":"Jarāmaraṇaṁ dukkhasaccaṁ, jāti samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nJāti dukkhasaccaṁ, bhavo samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nBhavo dukkhasaccaṁ, upādānaṁ samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nUpādānaṁ dukkhasaccaṁ, taṇhā samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nTaṇhā dukkhasaccaṁ, vedanā samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nVedanā dukkhasaccaṁ, phasso samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nPhasso dukkhasaccaṁ, saḷāyatanaṁ samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nSaḷāyatanaṁ dukkhasaccaṁ, nāmarūpaṁ samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nNāmarūpaṁ dukkhasaccaṁ, viññāṇaṁ samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nViññāṇaṁ dukkhasaccaṁ, saṅkhārā samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nSaṅkhārā dukkhasaccaṁ, avijjā samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ."}},{"id":"ps2.2:39","sourceIds":["ps2.2:39.1","ps2.2:39.2","ps2.2:39.3","ps2.2:39.4","ps2.2:39.5"],"kind":"text","text":{"pi":"Jarāmaraṇaṁ siyā dukkhasaccaṁ, siyā samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccaṁ.\nJāti siyā dukkhasaccaṁ, siyā samudayasaccaṁ …pe…\nbhavo siyā dukkhasaccaṁ, siyā samudayasaccaṁ, ubhinnampi nissaraṇaṁ nirodhasaccaṁ, nirodhappajānanā maggasaccanti.\nSaccakathā niṭṭhitā.\nBhāṇavāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps2.2/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}