{"id":"ps2.3","title":"2.3. Bojjhaṅgakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps2.3","title":"2.3. Bojjhaṅgakathā","units":[{"id":"ps2.3:0","sourceIds":["ps2.3:0.1","ps2.3:0.2","ps2.3:0.3"],"kind":"text","text":{"pi":"Paṭisambhidāmagga\n2 Yuganaddhavagga\n2.3. Bojjhaṅgakathā"}},{"id":"ps2.3:1","sourceIds":["ps2.3:1.1","ps2.3:1.2","ps2.3:1.3","ps2.3:1.4","ps2.3:1.5"],"kind":"text","text":{"pi":"Sāvatthinidānaṁ.\n“Sattime, bhikkhave, bojjhaṅgā.\nKatame satta?\nSatisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo—\nime kho, bhikkhave, satta bojjhaṅgā”."}},{"id":"ps2.3:2","sourceIds":["ps2.3:2.1","ps2.3:2.2","ps2.3:2.3","ps2.3:2.4","ps2.3:2.5","ps2.3:2.6"],"kind":"text","text":{"pi":"Bojjhaṅgāti kenaṭṭhena bojjhaṅgā?\nBodhāya saṁvattantīti—bojjhaṅgā.\nBujjhantīti— bojjhaṅgā.\nAnubujjhantīti—bojjhaṅgā.\nPaṭibujjhantīti—bojjhaṅgā.\nSambujjhantīti—bojjhaṅgā."}},{"id":"ps2.3:3","sourceIds":["ps2.3:3.1"],"kind":"text","text":{"pi":"Bujjhanaṭṭhena bojjhaṅgā, anubujjhanaṭṭhena bojjhaṅgā, paṭibujjhanaṭṭhena bojjhaṅgā, sambujjhanaṭṭhena bojjhaṅgā."}},{"id":"ps2.3:4","sourceIds":["ps2.3:4.1","ps2.3:4.2","ps2.3:4.3","ps2.3:4.4"],"kind":"text","text":{"pi":"Bodhentīti—bojjhaṅgā.\nAnubodhentīti—bojjhaṅgā.\nPaṭibodhentīti—bojjhaṅgā.\nSambodhentīti—bojjhaṅgā."}},{"id":"ps2.3:5","sourceIds":["ps2.3:5.1"],"kind":"text","text":{"pi":"Bodhanaṭṭhena bojjhaṅgā, anubodhanaṭṭhena bojjhaṅgā, paṭibodhanaṭṭhena bojjhaṅgā, sambodhanaṭṭhena bojjhaṅgā."}},{"id":"ps2.3:6","sourceIds":["ps2.3:6.1","ps2.3:6.2"],"kind":"text","text":{"pi":"Bodhipakkhiyaṭṭhena bojjhaṅgā, anubodhipakkhiyaṭṭhena bojjhaṅgā, paṭibodhipakkhiyaṭṭhena bojjhaṅgā, sambodhipakkhiyaṭṭhena bojjhaṅgā.\n(Pañcamacatukkaṁ)"}},{"id":"ps2.3:7","sourceIds":["ps2.3:7.1","ps2.3:7.2"],"kind":"text","text":{"pi":"Buddhilabhanaṭṭhena bojjhaṅgā, buddhipaṭilabhanaṭṭhena bojjhaṅgā, buddhiropanaṭṭhena bojjhaṅgā, buddhiabhiropanaṭṭhena bojjhaṅgā, buddhipāpanaṭṭhena bojjhaṅgā, buddhisampāpanaṭṭhena bojjhaṅgā.\n(Chakkaṁ)"}},{"id":"ps2.3:8","sourceIds":["ps2.3:8.0","ps2.3:8.1"],"kind":"text","text":{"pi":"2.3.1. Mūlamūlakādidasaka\nMūlaṭṭhena bojjhaṅgā, mūlacariyaṭṭhena bojjhaṅgā, mūlapariggahaṭṭhena bojjhaṅgā, mūlaparivāraṭṭhena bojjhaṅgā, mūlaparipūraṇaṭṭhena bojjhaṅgā, mūlaparipākaṭṭhena bojjhaṅgā, mūlapaṭisambhidaṭṭhena bojjhaṅgā, mūlapaṭisambhidāpāpanaṭṭhena bojjhaṅgā, mūlapaṭisambhidāya vasībhāvaṭṭhena bojjhaṅgā, mūlapaṭisambhidāya vasībhāvappattānampi bojjhaṅgā."}},{"id":"ps2.3:9","sourceIds":["ps2.3:9.1"],"kind":"text","text":{"pi":"Hetuṭṭhena bojjhaṅgā, hetucariyaṭṭhena bojjhaṅgā, hetupariggahaṭṭhena bojjhaṅgā, hetuparivāraṭṭhena bojjhaṅgā, hetuparipūraṇaṭṭhena bojjhaṅgā, hetuparipākaṭṭhena bojjhaṅgā, hetupaṭisambhidaṭṭhena bojjhaṅgā, hetupaṭisambhidāpāpanaṭṭhena bojjhaṅgā, hetupaṭisambhidāya vasībhāvaṭṭhena bojjhaṅgā, hetupaṭisambhidāya vasībhāvappattānampi bojjhaṅgā."}},{"id":"ps2.3:10","sourceIds":["ps2.3:10.1"],"kind":"text","text":{"pi":"Paccayaṭṭhena bojjhaṅgā, paccayacariyaṭṭhena bojjhaṅgā, paccayapariggahaṭṭhena bojjhaṅgā, paccayaparivāraṭṭhena bojjhaṅgā, paccayaparipūraṇaṭṭhena bojjhaṅgā, paccayaparipākaṭṭhena bojjhaṅgā, paccayapaṭisambhidaṭṭhena bojjhaṅgā, paccayapaṭisambhidāpāpanaṭṭhena bojjhaṅgā, paccayapaṭisambhidāya vasībhāvaṭṭhena bojjhaṅgā, paccayapaṭisambhidāya vasībhāvappattānampi bojjhaṅgā."}},{"id":"ps2.3:11","sourceIds":["ps2.3:11.1"],"kind":"text","text":{"pi":"Visuddhaṭṭhena bojjhaṅgā, visuddhicariyaṭṭhena bojjhaṅgā, visuddhipariggahaṭṭhena bojjhaṅgā, visuddhiparivāraṭṭhena bojjhaṅgā, visuddhiparipūraṇaṭṭhena bojjhaṅgā, visuddhiparipākaṭṭhena bojjhaṅgā, visuddhipaṭisambhidaṭṭhena bojjhaṅgā, visuddhipaṭisambhidāpāpanaṭṭhena bojjhaṅgā, visuddhipaṭisambhidāya vasībhāvaṭṭhena bojjhaṅgā, visuddhipaṭisambhidāya vasībhāvappattānampi bojjhaṅgā."}},{"id":"ps2.3:12","sourceIds":["ps2.3:12.1"],"kind":"text","text":{"pi":"Anavajjaṭṭhena bojjhaṅgā, anavajjacariyaṭṭhena bojjhaṅgā, anavajjapariggahaṭṭhena bojjhaṅgā, anavajjaparivāraṭṭhena bojjhaṅgā, anavajjaparipūraṇaṭṭhena bojjhaṅgā, anavajjaparipākaṭṭhena bojjhaṅgā, anavajjapaṭisambhidaṭṭhena bojjhaṅgā, anavajjapaṭisambhidāpāpanaṭṭhena bojjhaṅgā, anavajjapaṭisambhidāya vasībhāvaṭṭhena bojjhaṅgā, anavajjapaṭisambhidāya vasībhāvappattānampi bojjhaṅgā."}},{"id":"ps2.3:13","sourceIds":["ps2.3:13.1"],"kind":"text","text":{"pi":"Nekkhammaṭṭhena bojjhaṅgā, nekkhammacariyaṭṭhena bojjhaṅgā, nekkhammapariggahaṭṭhena bojjhaṅgā, nekkhammaparivāraṭṭhena bojjhaṅgā, nekkhammaparipūraṇaṭṭhena bojjhaṅgā, nekkhammaparipākaṭṭhena bojjhaṅgā, nekkhammapaṭisambhidaṭṭhena bojjhaṅgā, nekkhammapaṭisambhidāpāpanaṭṭhena bojjhaṅgā, nekkhammapaṭisambhidāya vasībhāvaṭṭhena bojjhaṅgā, nekkhammapaṭisambhidāya vasībhāvappattānampi bojjhaṅgā."}},{"id":"ps2.3:14","sourceIds":["ps2.3:14.1"],"kind":"text","text":{"pi":"Vimuttaṭṭhena bojjhaṅgā, vimutticariyaṭṭhena bojjhaṅgā, vimuttipariggahaṭṭhena bojjhaṅgā, vimuttiparivāraṭṭhena bojjhaṅgā, vimuttiparipūraṇaṭṭhena bojjhaṅgā, vimuttiparipākaṭṭhena bojjhaṅgā, vimuttipaṭisambhidaṭṭhena bojjhaṅgā, vimuttipaṭisambhidāpāpanaṭṭhena bojjhaṅgā, vimuttipaṭisambhidāya vasībhāvaṭṭhena bojjhaṅgā, vimuttipaṭisambhidāya vasībhāvappattānampi bojjhaṅgā."}},{"id":"ps2.3:15","sourceIds":["ps2.3:15.1"],"kind":"text","text":{"pi":"Anāsavaṭṭhena bojjhaṅgā, anāsavacariyaṭṭhena bojjhaṅgā, anāsavapariggahaṭṭhena bojjhaṅgā, anāsavaparivāraṭṭhena bojjhaṅgā, anāsavaparipūraṇaṭṭhena bojjhaṅgā, anāsavaparipākaṭṭhena bojjhaṅgā, anāsavapaṭisambhidaṭṭhena bojjhaṅgā, anāsavapaṭisambhidāpāpanaṭṭhena bojjhaṅgā, anāsavapaṭisambhidāya vasībhāvaṭṭhena bojjhaṅgā, anāsavapaṭisambhidāya vasībhāvappattānampi bojjhaṅgā."}},{"id":"ps2.3:16","sourceIds":["ps2.3:16.1"],"kind":"text","text":{"pi":"Vivekaṭṭhena bojjhaṅgā, vivekacariyaṭṭhena bojjhaṅgā, vivekapariggahaṭṭhena bojjhaṅgā, vivekaparivāraṭṭhena bojjhaṅgā, vivekaparipūraṇaṭṭhena bojjhaṅgā, vivekaparipākaṭṭhena bojjhaṅgā, vivekapaṭisambhidaṭṭhena bojjhaṅgā, vivekapaṭisambhidāpāpanaṭṭhena bojjhaṅgā, vivekapaṭisambhidāya vasībhāvaṭṭhena bojjhaṅgā, vivekapaṭisambhidāya vasībhāvappattānampi bojjhaṅgā."}},{"id":"ps2.3:17","sourceIds":["ps2.3:17.1"],"kind":"text","text":{"pi":"Vosaggaṭṭhena bojjhaṅgā, vosaggacariyaṭṭhena bojjhaṅgā, vosaggapariggahaṭṭhena bojjhaṅgā, vosaggaparivāraṭṭhena bojjhaṅgā, vosaggaparipūraṇaṭṭhena bojjhaṅgā, vosaggaparipākaṭṭhena bojjhaṅgā, vosaggapaṭisambhidaṭṭhena bojjhaṅgā, vosaggapaṭisambhidāpāpanaṭṭhena bojjhaṅgā, vosaggapaṭisambhidāya vasībhāvaṭṭhena bojjhaṅgā, vosaggapaṭisambhidāya vasībhāvappattānampi bojjhaṅgā."}},{"id":"ps2.3:18","sourceIds":["ps2.3:18.1","ps2.3:18.2","ps2.3:18.3","ps2.3:18.4","ps2.3:18.5","ps2.3:18.6","ps2.3:18.7","ps2.3:18.8","ps2.3:18.9","ps2.3:18.10"],"kind":"text","text":{"pi":"Mūlaṭṭhaṁ bujjhantīti—bojjhaṅgā.\nHetuṭṭhaṁ bujjhantīti—bojjhaṅgā.\nPaccayaṭṭhaṁ bujjhantīti—bojjhaṅgā.\nVisuddhaṭṭhaṁ bujjhantīti—bojjhaṅgā.\nAnavajjaṭṭhaṁ bujjhantīti—bojjhaṅgā.\nNekkhammaṭṭhaṁ bujjhantīti—bojjhaṅgā.\nVimuttaṭṭhaṁ bujjhantīti—bojjhaṅgā.\nAnāsavaṭṭhaṁ bujjhantīti—bojjhaṅgā.\nVivekaṭṭhaṁ bujjhantīti—bojjhaṅgā.\nVosaggaṭṭhaṁ bujjhantīti—bojjhaṅgā."}},{"id":"ps2.3:19","sourceIds":["ps2.3:19.1","ps2.3:19.2","ps2.3:19.3","ps2.3:19.4","ps2.3:19.5","ps2.3:19.6","ps2.3:19.7","ps2.3:19.8","ps2.3:19.9","ps2.3:19.10"],"kind":"text","text":{"pi":"Mūlacariyaṭṭhaṁ bujjhantīti—bojjhaṅgā.\nHetucariyaṭṭhaṁ bujjhantīti—bojjhaṅgā.\nPaccayacariyaṭṭhaṁ bujjhantīti—bojjhaṅgā.\nVisuddhicariyaṭṭhaṁ bujjhantīti—bojjhaṅgā.\nAnavajjacariyaṭṭhaṁ bujjhantīti—bojjhaṅgā.\nNekkhammacariyaṭṭhaṁ bujjhantīti—bojjhaṅgā.\nVimutticariyaṭṭhaṁ bujjhantīti—bojjhaṅgā.\nAnāsavacariyaṭṭhaṁ bujjhantīti—bojjhaṅgā.\nVivekacariyaṭṭhaṁ bujjhantīti—bojjhaṅgā.\nVosaggacariyaṭṭhaṁ bujjhantīti—bojjhaṅgā."}},{"id":"ps2.3:20","sourceIds":["ps2.3:20.1","ps2.3:20.2","ps2.3:20.3","ps2.3:20.4","ps2.3:20.5","ps2.3:20.6","ps2.3:20.7","ps2.3:20.8","ps2.3:20.9","ps2.3:20.10","ps2.3:20.11","ps2.3:20.12","ps2.3:20.13","ps2.3:20.14"],"kind":"text","text":{"pi":"Mūlapariggahaṭṭhaṁ bujjhantīti—bojjhaṅgā …pe…\nvosaggapariggahaṭṭhaṁ bujjhantīti—bojjhaṅgā.\nMūlaparivāraṭṭhaṁ bujjhantīti—bojjhaṅgā …pe…\nvosaggaparivāraṭṭhaṁ bujjhantīti—bojjhaṅgā.\nMūlaparipūraṇaṭṭhaṁ bujjhantīti—bojjhaṅgā …pe…\nvosaggaparipūraṭṭhaṁ bujjhantīti—bojjhaṅgā.\nMūlaparipākaṭṭhaṁ bujjhantīti—bojjhaṅgā …pe…\nvosaggaparipākaṭṭhaṁ bujjhantīti—bojjhaṅgā.\nMūlapaṭisambhidaṭṭhaṁ bujjhantīti—bojjhaṅgā …pe…\nvosaggapaṭisambhidaṭṭhaṁ bujjhantīti—bojjhaṅgā.\nMūlapaṭisambhidāpāpanaṭṭhaṁ bujjhantīti—bojjhaṅgā …pe…\nvosaggapaṭisambhidāpāpanaṭṭhaṁ bujjhantīti—bojjhaṅgā.\nMūlapaṭisambhidāya vasībhāvaṭṭhaṁ bujjhantīti—bojjhaṅgā …pe…\nvosaggapaṭisambhidāya vasībhāvaṭṭhaṁ bujjhantīti—bojjhaṅgā …pe…."}},{"id":"ps2.3:21","sourceIds":["ps2.3:21.1","ps2.3:21.2","ps2.3:21.3","ps2.3:21.4","ps2.3:21.5","ps2.3:21.6","ps2.3:21.7","ps2.3:21.8","ps2.3:21.9","ps2.3:21.10","ps2.3:21.11","ps2.3:21.12","ps2.3:21.13","ps2.3:21.14","ps2.3:21.15","ps2.3:21.16","ps2.3:21.17","ps2.3:21.18","ps2.3:21.19","ps2.3:21.20","ps2.3:21.21","ps2.3:21.22","ps2.3:21.23","ps2.3:21.24","ps2.3:21.25","ps2.3:21.26","ps2.3:21.27","ps2.3:21.28","ps2.3:21.29","ps2.3:21.30","ps2.3:21.31"],"kind":"text","text":{"pi":"Pariggahaṭṭhaṁ bujjhantīti—bojjhaṅgā.\nParivāraṭṭhaṁ bujjhantīti—bojjhaṅgā.\nParipūraṇaṭṭhaṁ bujjhantīti—bojjhaṅgā.\nEkaggaṭṭhaṁ bujjhantīti—bojjhaṅgā.\nAvikkhepaṭṭhaṁ bujjhantīti—bojjhaṅgā.\nPaggahaṭṭhaṁ bujjhantīti—bojjhaṅgā.\nAvisāraṭṭhaṁ bujjhantīti—bojjhaṅgā.\nAnāvilaṭṭhaṁ bujjhantīti—bojjhaṅgā.\nAniñjanaṭṭhaṁ bujjhantīti—bojjhaṅgā.\nEkattupaṭṭhānavasena cittassa ṭhitaṭṭhaṁ bujjhantīti—bojjhaṅgā.\nĀrammaṇaṭṭhaṁ bujjhantīti—bojjhaṅgā.\nGocaraṭṭhaṁ bujjhantīti—bojjhaṅgā.\nPahānaṭṭhaṁ bujjhantīti—bojjhaṅgā.\nPariccāgaṭṭhaṁ bujjhantīti—bojjhaṅgā.\nVuṭṭhānaṭṭhaṁ bujjhantīti—bojjhaṅgā.\nVivaṭṭanaṭṭhaṁ bujjhantīti—bojjhaṅgā.\nSantaṭṭhaṁ bujjhantīti—bojjhaṅgā.\nPaṇītaṭṭhaṁ bujjhantīti—bojjhaṅgā.\nVimuttaṭṭhaṁ bujjhantīti—bojjhaṅgā.\nAnāsavaṭṭhaṁ bujjhantīti—bojjhaṅgā.\nTaraṇaṭṭhaṁ bujjhantīti—bojjhaṅgā.\nAnimittaṭṭhaṁ bujjhantīti—bojjhaṅgā.\nAppaṇihitaṭṭhaṁ bujjhantīti—bojjhaṅgā.\nSuññataṭṭhaṁ bujjhantīti—bojjhaṅgā.\nEkarasaṭṭhaṁ bujjhantīti—bojjhaṅgā.\nAnativattanaṭṭhaṁ bujjhantīti—bojjhaṅgā.\nYuganaddhaṭṭhaṁ bujjhantīti—bojjhaṅgā.\nNiyyānaṭṭhaṁ bujjhantīti—bojjhaṅgā.\nHetuṭṭhaṁ bujjhantīti—bojjhaṅgā.\nDassanaṭṭhaṁ bujjhantīti—bojjhaṅgā.\nĀdhipateyyaṭṭhaṁ bujjhantīti—bojjhaṅgā."}},{"id":"ps2.3:22","sourceIds":["ps2.3:22.1","ps2.3:22.2","ps2.3:22.3","ps2.3:22.4"],"kind":"text","text":{"pi":"Samathassa avikkhepaṭṭhaṁ bujjhantīti—bojjhaṅgā.\nVipassanāya anupassanaṭṭhaṁ bujjhantīti—bojjhaṅgā.\nSamathavipassanānaṁ ekarasaṭṭhaṁ bujjhantīti—bojjhaṅgā.\nYuganaddhassa anativattanaṭṭhaṁ bujjhantīti—bojjhaṅgā."}},{"id":"ps2.3:23","sourceIds":["ps2.3:23.1","ps2.3:23.2","ps2.3:23.3","ps2.3:23.4","ps2.3:23.5","ps2.3:23.6","ps2.3:23.7","ps2.3:23.8","ps2.3:23.9"],"kind":"text","text":{"pi":"Sikkhāya samādānaṭṭhaṁ bujjhantīti—bojjhaṅgā.\nĀrammaṇassa gocaraṭṭhaṁ bujjhantīti—bojjhaṅgā.\nLīnassa cittassa paggahaṭṭhaṁ bujjhantīti—bojjhaṅgā.\nUddhatassa cittassa niggahaṭṭhaṁ bujjhantīti—bojjhaṅgā.\nUbhovisuddhānaṁ ajjhupekkhanaṭṭhaṁ bujjhantīti—bojjhaṅgā.\nVisesādhigamaṭṭhaṁ bujjhantīti—bojjhaṅgā.\nUttari paṭivedhaṭṭhaṁ bujjhantīti—bojjhaṅgā.\nSaccābhisamayaṭṭhaṁ bujjhantīti—bojjhaṅgā.\nNirodhe patiṭṭhāpakaṭṭhaṁ bujjhantīti—bojjhaṅgā."}},{"id":"ps2.3:24","sourceIds":["ps2.3:24.1","ps2.3:24.2","ps2.3:24.3","ps2.3:24.4","ps2.3:24.5","ps2.3:24.6","ps2.3:24.7","ps2.3:24.8"],"kind":"text","text":{"pi":"Saddhindriyassa adhimokkhaṭṭhaṁ bujjhantīti—bojjhaṅgā …pe…\npaññindriyassa dassanaṭṭhaṁ bujjhantīti—bojjhaṅgā.\nSaddhābalassa assaddhiye akampiyaṭṭhaṁ bujjhantīti—bojjhaṅgā …pe…\npaññābalassa avijjāya akampiyaṭṭhaṁ bujjhantīti—bojjhaṅgā.\nSatisambojjhaṅgassa upaṭṭhānaṭṭhaṁ bujjhantīti—bojjhaṅgā …pe…\nupekkhāsambojjhaṅgassa paṭisaṅkhānaṭṭhaṁ bujjhantīti—bojjhaṅgā.\nSammādiṭṭhiyā dassanaṭṭhaṁ bujjhantīti—bojjhaṅgā …pe…\nsammāsamādhissa avikkhepaṭṭhaṁ bujjhantīti—bojjhaṅgā."}},{"id":"ps2.3:25","sourceIds":["ps2.3:25.1","ps2.3:25.2","ps2.3:25.3","ps2.3:25.4","ps2.3:25.5","ps2.3:25.6","ps2.3:25.7","ps2.3:25.8","ps2.3:25.9","ps2.3:25.10"],"kind":"text","text":{"pi":"Indriyānaṁ ādhipateyyaṭṭhaṁ bujjhantīti—bojjhaṅgā.\nBalānaṁ akampiyaṭṭhaṁ bujjhantīti—bojjhaṅgā.\nNiyyānaṭṭhaṁ bujjhantīti—bojjhaṅgā.\nMaggassa hetuṭṭhaṁ bujjhantīti—bojjhaṅgā.\nSatipaṭṭhānānaṁ upaṭṭhānaṭṭhaṁ bujjhantīti—bojjhaṅgā.\nSammappadhānānaṁ padahanaṭṭhaṁ bujjhantīti—bojjhaṅgā.\nIddhipādānaṁ ijjhanaṭṭhaṁ bujjhantīti—bojjhaṅgā.\nSaccānaṁ tathaṭṭhaṁ bujjhantīti—bojjhaṅgā.\nPayogānaṁ paṭippassaddhaṭṭhaṁ bujjhantīti—bojjhaṅgā.\nPhalānaṁ sacchikiriyaṭṭhaṁ bujjhantīti—bojjhaṅgā."}},{"id":"ps2.3:26","sourceIds":["ps2.3:26.1","ps2.3:26.2","ps2.3:26.3","ps2.3:26.4","ps2.3:26.5"],"kind":"text","text":{"pi":"Vitakkassa abhiniropanaṭṭhaṁ bujjhantīti—bojjhaṅgā.\nVicārassa upavicāraṭṭhaṁ bujjhantīti—bojjhaṅgā.\nPītiyā pharaṇaṭṭhaṁ bujjhantīti—bojjhaṅgā.\nSukhassa abhisandanaṭṭhaṁ bujjhantīti—bojjhaṅgā.\nCittassa ekaggaṭṭhaṁ bujjhantīti—bojjhaṅgā."}},{"id":"ps2.3:27","sourceIds":["ps2.3:27.1","ps2.3:27.2","ps2.3:27.3","ps2.3:27.4","ps2.3:27.5","ps2.3:27.6","ps2.3:27.7","ps2.3:27.8","ps2.3:27.9","ps2.3:27.10","ps2.3:27.11","ps2.3:27.12","ps2.3:27.13","ps2.3:27.14","ps2.3:27.15"],"kind":"text","text":{"pi":"Āvajjanaṭṭhaṁ bujjhantīti—bojjhaṅgā.\nVijānanaṭṭhaṁ bujjhantīti—bojjhaṅgā.\nPajānanaṭṭhaṁ bujjhantīti—bojjhaṅgā.\nSañjānanaṭṭhaṁ bujjhantīti—bojjhaṅgā.\nEkodaṭṭhaṁ bujjhantīti—bojjhaṅgā.\nAbhiññāya ñātaṭṭhaṁ bujjhantīti—bojjhaṅgā.\nPariññāya tīraṇaṭṭhaṁ bujjhantīti—bojjhaṅgā.\nPahānassa pariccāgaṭṭhaṁ bujjhantīti—bojjhaṅgā.\nBhāvanāya ekarasaṭṭhaṁ bujjhantīti—bojjhaṅgā.\nSacchikiriyāya phassanaṭṭhaṁ bujjhantīti—bojjhaṅgā.\nKhandhānaṁ khandhaṭṭhaṁ bujjhantīti—bojjhaṅgā.\nDhātūnaṁ dhātuṭṭhaṁ bujjhantīti—bojjhaṅgā.\nĀyatanānaṁ āyatanaṭṭhaṁ bujjhantīti—bojjhaṅgā.\nSaṅkhatānaṁ saṅkhataṭṭhaṁ bujjhantīti—bojjhaṅgā.\nAsaṅkhatassa asaṅkhataṭṭhaṁ bujjhantīti—bojjhaṅgā."}},{"id":"ps2.3:28","sourceIds":["ps2.3:28.1","ps2.3:28.2","ps2.3:28.3","ps2.3:28.4","ps2.3:28.5","ps2.3:28.6","ps2.3:28.7","ps2.3:28.8","ps2.3:28.9","ps2.3:28.10","ps2.3:28.11","ps2.3:28.12","ps2.3:28.13","ps2.3:28.14","ps2.3:28.15"],"kind":"text","text":{"pi":"Cittaṭṭhaṁ bujjhantīti—bojjhaṅgā.\nCittānantariyaṭṭhaṁ bujjhantīti—bojjhaṅgā.\nCittassa vuṭṭhānaṭṭhaṁ bujjhantīti—bojjhaṅgā.\nCittassa vivaṭṭanaṭṭhaṁ bujjhantīti—bojjhaṅgā.\nCittassa hetuṭṭhaṁ bujjhantīti—bojjhaṅgā.\nCittassa paccayaṭṭhaṁ bujjhantīti—bojjhaṅgā.\nCittassa vatthuṭṭhaṁ bujjhantīti—bojjhaṅgā.\nCittassa bhūmaṭṭhaṁ bujjhantīti—bojjhaṅgā.\nCittassa ārammaṇaṭṭhaṁ bujjhantīti—bojjhaṅgā.\nCittassa gocaraṭṭhaṁ bujjhantīti—bojjhaṅgā.\nCittassa cariyaṭṭhaṁ bujjhantīti—bojjhaṅgā.\nCittassa gataṭṭhaṁ bujjhantīti—bojjhaṅgā.\nCittassa abhinīhāraṭṭhaṁ bujjhantīti—bojjhaṅgā.\nCittassa niyyānaṭṭhaṁ bujjhantīti—bojjhaṅgā.\nCittassa nissaraṇaṭṭhaṁ bujjhantīti—bojjhaṅgā."}},{"id":"ps2.3:29","sourceIds":["ps2.3:29.1","ps2.3:29.2","ps2.3:29.3","ps2.3:29.4","ps2.3:29.5","ps2.3:29.6","ps2.3:29.7","ps2.3:29.8","ps2.3:29.9","ps2.3:29.10","ps2.3:29.11","ps2.3:29.12","ps2.3:29.13","ps2.3:29.14","ps2.3:29.15","ps2.3:29.16","ps2.3:29.17","ps2.3:29.18","ps2.3:29.19","ps2.3:29.20","ps2.3:29.21","ps2.3:29.22","ps2.3:29.23","ps2.3:29.24","ps2.3:29.25","ps2.3:29.26","ps2.3:29.27","ps2.3:29.28","ps2.3:29.29","ps2.3:29.30","ps2.3:29.31","ps2.3:29.32","ps2.3:29.33","ps2.3:29.34","ps2.3:29.35","ps2.3:29.36","ps2.3:29.37","ps2.3:29.38","ps2.3:29.39","ps2.3:29.40","ps2.3:29.41","ps2.3:29.42"],"kind":"text","text":{"pi":"Ekatte āvajjanaṭṭhaṁ bujjhantīti—bojjhaṅgā.\nEkatte vijānanaṭṭhaṁ bujjhantīti—bojjhaṅgā.\nEkatte pajānanaṭṭhaṁ bujjhantīti—bojjhaṅgā.\nEkatte sañjānanaṭṭhaṁ bujjhantīti—bojjhaṅgā.\nEkatte ekodaṭṭhaṁ bujjhantīti—bojjhaṅgā.\n(…) Ekatte pakkhandanaṭṭhaṁ bujjhantīti—bojjhaṅgā.\nEkatte pasīdanaṭṭhaṁ bujjhantīti—bojjhaṅgā.\nEkatte santiṭṭhanaṭṭhaṁ bujjhantīti—bojjhaṅgā.\nEkatte vimuccanaṭṭhaṁ bujjhantīti—bojjhaṅgā.\nEkatte etaṁ santanti passanaṭṭhaṁ bujjhantīti—bojjhaṅgā.\nEkatte yānīkataṭṭhaṁ bujjhantīti—bojjhaṅgā.\nEkatte vatthukataṭṭhaṁ bujjhantīti—bojjhaṅgā.\nEkatte anuṭṭhitaṭṭhaṁ bujjhantīti—bojjhaṅgā.\nEkatte paricitaṭṭhaṁ bujjhantīti—bojjhaṅgā.\nEkatte susamāraddhaṭṭhaṁ bujjhantīti—bojjhaṅgā.\nEkatte pariggahaṭṭhaṁ bujjhantīti—bojjhaṅgā.\nEkatte parivāraṭṭhaṁ bujjhantīti—bojjhaṅgā.\nEkatte paripūraṇaṭṭhaṁ bujjhantīti—bojjhaṅgā.\nEkatte samodhānaṭṭhaṁ bujjhantīti—bojjhaṅgā.\nEkatte adhiṭṭhānaṭṭhaṁ bujjhantīti—bojjhaṅgā.\nEkatte āsevanaṭṭhaṁ bujjhantīti—bojjhaṅgā.\nEkatte bhāvanaṭṭhaṁ bujjhantīti—bojjhaṅgā.\nEkatte bahulīkammaṭṭhaṁ bujjhantīti—bojjhaṅgā.\nEkatte susamuggataṭṭhaṁ bujjhantīti—bojjhaṅgā.\nEkatte suvimuttaṭṭhaṁ bujjhantīti—bojjhaṅgā.\nEkatte bujjhanaṭṭhaṁ bujjhantīti—bojjhaṅgā.\nEkatte anubujjhanaṭṭhaṁ bujjhantīti—bojjhaṅgā.\nEkatte paṭibujjhanaṭṭhaṁ bujjhantīti—bojjhaṅgā.\nEkatte sambujjhanaṭṭhaṁ bujjhantīti—bojjhaṅgā.\nEkatte bodhanaṭṭhaṁ bujjhantīti—bojjhaṅgā.\nEkatte anubodhanaṭṭhaṁ bujjhantīti—bojjhaṅgā.\nEkatte paṭibodhanaṭṭhaṁ bujjhantīti—bojjhaṅgā.\nEkatte sambujjhanaṭṭhaṁ bujjhantīti—bojjhaṅgā.\nEkatte bodhipakkhiyaṭṭhaṁ bujjhantīti—bojjhaṅgā.\nEkatte anubodhipakkhiyaṭṭhaṁ bujjhantīti—bojjhaṅgā.\nEkatte paṭibodhipakkhiyaṭṭhaṁ bujjhantīti—bojjhaṅgā.\nEkatte sambodhipakkhiyaṭṭhaṁ bujjhantīti—bojjhaṅgā.\nEkatte jotanaṭṭhaṁ bujjhantīti—bojjhaṅgā.\nEkatte ujjotanaṭṭhaṁ bujjhantīti—bojjhaṅgā.\nEkatte anujotanaṭṭhaṁ bujjhantīti—bojjhaṅgā.\nEkatte paṭijotanaṭṭhaṁ bujjhantīti—bojjhaṅgā.\nEkatte sañjotanaṭṭhaṁ bujjhantīti—bojjhaṅgā."}},{"id":"ps2.3:30","sourceIds":["ps2.3:30.1","ps2.3:30.2","ps2.3:30.3","ps2.3:30.4","ps2.3:30.5","ps2.3:30.6","ps2.3:30.7","ps2.3:30.8","ps2.3:30.9","ps2.3:30.10","ps2.3:30.11","ps2.3:30.12","ps2.3:30.13","ps2.3:30.14","ps2.3:30.15","ps2.3:30.16","ps2.3:30.17","ps2.3:30.18"],"kind":"text","text":{"pi":"Patāpanaṭṭhaṁ bujjhantīti—bojjhaṅgā.\nVirocanaṭṭhaṁ bujjhantīti—bojjhaṅgā.\nKilesānaṁ santāpanaṭṭhaṁ bujjhantīti—bojjhaṅgā.\nAmalaṭṭhaṁ bujjhantīti—bojjhaṅgā.\nVimalaṭṭhaṁ bujjhantīti—bojjhaṅgā.\nNimmalaṭṭhaṁ bujjhantīti—bojjhaṅgā.\nSamaṭṭhaṁ bujjhantīti—bojjhaṅgā.\nSamayaṭṭhaṁ bujjhantīti—bojjhaṅgā.\nVivekaṭṭhaṁ bujjhantīti—bojjhaṅgā.\nVivekacariyaṭṭhaṁ bujjhantīti—bojjhaṅgā.\nVirāgaṭṭhaṁ bujjhantīti—bojjhaṅgā.\nVirāgacariyaṭṭhaṁ bujjhantīti—bojjhaṅgā.\nNirodhaṭṭhaṁ bujjhantīti—bojjhaṅgā.\nNirodhacariyaṭṭhaṁ bujjhantīti—bojjhaṅgā.\nVosaggaṭṭhaṁ bujjhantīti—bojjhaṅgā.\nVosaggacariyaṭṭhaṁ bujjhantīti—bojjhaṅgā.\nVimuttaṭṭhaṁ bujjhantīti—bojjhaṅgā.\nVimutticariyaṭṭhaṁ bujjhantīti—bojjhaṅgā."}},{"id":"ps2.3:31","sourceIds":["ps2.3:31.1","ps2.3:31.2","ps2.3:31.3","ps2.3:31.4","ps2.3:31.5","ps2.3:31.6","ps2.3:31.7","ps2.3:31.8","ps2.3:31.9","ps2.3:31.10"],"kind":"text","text":{"pi":"Chandaṭṭhaṁ bujjhantīti—bojjhaṅgā.\nChandassa mūlaṭṭhaṁ bujjhantīti—bojjhaṅgā.\nChandassa pādaṭṭhaṁ bujjhantīti—bojjhaṅgā.\nChandassa padhānaṭṭhaṁ bujjhantīti—bojjhaṅgā.\nChandassa ijjhanaṭṭhaṁ bujjhantīti—bojjhaṅgā.\nChandassa adhimokkhaṭṭhaṁ bujjhantīti—bojjhaṅgā.\nChandassa paggahaṭṭhaṁ bujjhantīti—bojjhaṅgā.\nChandassa upaṭṭhānaṭṭhaṁ bujjhantīti—bojjhaṅgā.\nChandassa avikkhepaṭṭhaṁ bujjhantīti—bojjhaṅgā.\nChandassa dassanaṭṭhaṁ bujjhantīti—bojjhaṅgā."}},{"id":"ps2.3:32","sourceIds":["ps2.3:32.1","ps2.3:32.2","ps2.3:32.3","ps2.3:32.4","ps2.3:32.5","ps2.3:32.6","ps2.3:32.7","ps2.3:32.8","ps2.3:32.9","ps2.3:32.10","ps2.3:32.11","ps2.3:32.12"],"kind":"text","text":{"pi":"Vīriyaṭṭhaṁ bujjhantīti—bojjhaṅgā …pe…\ncittaṭṭhaṁ bujjhantīti—bojjhaṅgā …pe…\nvīmaṁsaṭṭhaṁ bujjhantīti—bojjhaṅgā.\nVīmaṁsāya mūlaṭṭhaṁ bujjhantīti—bojjhaṅgā.\nVīmaṁsāya pādaṭṭhaṁ bujjhantīti—bojjhaṅgā.\nVīmaṁsāya padhānaṭṭhaṁ bujjhantīti—bojjhaṅgā.\nVīmaṁsāya ijjhanaṭṭhaṁ bujjhantīti—bojjhaṅgā.\nVīmaṁsāya adhimokkhaṭṭhaṁ bujjhantīti—bojjhaṅgā.\nVīmaṁsāya paggahaṭṭhaṁ bujjhantīti—bojjhaṅgā.\nVīmaṁsāya upaṭṭhānaṭṭhaṁ bujjhantīti—bojjhaṅgā.\nVīmaṁsāya avikkhepaṭṭhaṁ bujjhantīti—bojjhaṅgā.\nVīmaṁsāya dassanaṭṭhaṁ bujjhantīti—bojjhaṅgā."}},{"id":"ps2.3:33","sourceIds":["ps2.3:33.1","ps2.3:33.2","ps2.3:33.3","ps2.3:33.4","ps2.3:33.5","ps2.3:33.6","ps2.3:33.7","ps2.3:33.8","ps2.3:33.9","ps2.3:33.10","ps2.3:33.11"],"kind":"text","text":{"pi":"Dukkhaṭṭhaṁ bujjhantīti—bojjhaṅgā.\nDukkhassa pīḷanaṭṭhaṁ bujjhantīti—bojjhaṅgā.\nDukkhassa saṅkhataṭṭhaṁ bujjhantīti—bojjhaṅgā.\nDukkhassa santāpaṭṭhaṁ bujjhantīti—bojjhaṅgā.\nDukkhassa vipariṇāmaṭṭhaṁ bujjhantīti—bojjhaṅgā.\nSamudayaṭṭhaṁ bujjhantīti—bojjhaṅgā.\nSamudayassa āyūhanaṭṭhaṁ … nidānaṭṭhaṁ … saññogaṭṭhaṁ … palibodhaṭṭhaṁ bujjhantīti—bojjhaṅgā.\nNirodhaṭṭhaṁ bujjhantīti—bojjhaṅgā.\nNirodhassa nissaraṇaṭṭhaṁ … vivekaṭṭhaṁ … asaṅkhataṭṭhaṁ … amataṭṭhaṁ bujjhantīti—bojjhaṅgā.\nMaggaṭṭhaṁ bujjhantīti—bojjhaṅgā.\nMaggassa niyyānaṭṭhaṁ … hetuṭṭhaṁ … dassanaṭṭhaṁ … ādhipateyyaṭṭhaṁ bujjhantīti—bojjhaṅgā."}},{"id":"ps2.3:34","sourceIds":["ps2.3:34.1","ps2.3:34.2","ps2.3:34.3","ps2.3:34.4","ps2.3:34.5","ps2.3:34.6","ps2.3:34.7","ps2.3:34.8","ps2.3:34.9","ps2.3:34.10","ps2.3:34.11","ps2.3:34.12"],"kind":"text","text":{"pi":"Tathaṭṭhaṁ bujjhantīti—bojjhaṅgā.\nAnattaṭṭhaṁ bujjhantīti—bojjhaṅgā.\nSaccaṭṭhaṁ bujjhantīti—bojjhaṅgā.\nPaṭivedhaṭṭhaṁ bujjhantīti—bojjhaṅgā.\nAbhijānanaṭṭhaṁ bujjhantīti—bojjhaṅgā.\nParijānanaṭṭhaṁ bujjhantīti—bojjhaṅgā.\nDhammaṭṭhaṁ bujjhantīti—bojjhaṅgā.\nDhātuṭṭhaṁ bujjhantīti—bojjhaṅgā.\nÑātaṭṭhaṁ bujjhantīti—bojjhaṅgā.\nSacchikiriyaṭṭhaṁ bujjhantīti—bojjhaṅgā.\nPhassanaṭṭhaṁ bujjhantīti—bojjhaṅgā.\nAbhisamayaṭṭhaṁ bujjhantīti—bojjhaṅgā."}},{"id":"ps2.3:35","sourceIds":["ps2.3:35.1","ps2.3:35.2","ps2.3:35.3","ps2.3:35.4","ps2.3:35.5","ps2.3:35.6","ps2.3:35.7","ps2.3:35.8","ps2.3:35.9","ps2.3:35.10"],"kind":"text","text":{"pi":"Nekkhammaṁ bujjhantīti—bojjhaṅgā.\nAbyāpādaṁ bujjhantīti—bojjhaṅgā.\nĀlokasaññaṁ bujjhantīti—bojjhaṅgā.\nAvikkhepaṁ bujjhantīti—bojjhaṅgā.\nDhammavavatthānaṁ bujjhantīti—bojjhaṅgā.\nÑāṇaṁ bujjhantīti—bojjhaṅgā.\nPāmojjaṁ bujjhantīti—bojjhaṅgā.\nPaṭhamaṁ jhānaṁ bujjhantīti—bojjhaṅgā …pe…\narahattamaggaṁ bujjhantīti—bojjhaṅgā.\nArahattaphalasamāpattiṁ bujjhantīti—bojjhaṅgā."}},{"id":"ps2.3:36","sourceIds":["ps2.3:36.1","ps2.3:36.2","ps2.3:36.3","ps2.3:36.4","ps2.3:36.5","ps2.3:36.6"],"kind":"text","text":{"pi":"Adhimokkhaṭṭhena saddhindriyaṁ bujjhantīti—bojjhaṅgā …pe…\ndassanaṭṭhena paññindriyaṁ bujjhantīti—bojjhaṅgā.\nAssaddhiye akampiyaṭṭhena saddhābalaṁ bujjhantīti—bojjhaṅgā …pe…\navijjāya akampiyaṭṭhena paññābalaṁ bujjhantīti—bojjhaṅgā.\nUpaṭṭhānaṭṭhena satisambojjhaṅgaṁ bujjhantīti—bojjhaṅgā …pe…\npaṭisaṅkhānaṭṭhena upekkhāsambojjhaṅgaṁ bujjhantīti—bojjhaṅgā."}},{"id":"ps2.3:37","sourceIds":["ps2.3:37.1","ps2.3:37.2","ps2.3:37.3","ps2.3:37.4","ps2.3:37.5","ps2.3:37.6","ps2.3:37.7","ps2.3:37.8","ps2.3:37.9","ps2.3:37.10","ps2.3:37.11","ps2.3:37.12","ps2.3:37.13","ps2.3:37.14","ps2.3:37.15","ps2.3:37.16","ps2.3:37.17","ps2.3:37.18","ps2.3:37.19","ps2.3:37.20","ps2.3:37.21","ps2.3:37.22"],"kind":"text","text":{"pi":"Dassanaṭṭhena sammādiṭṭhiṁ bujjhantīti—bojjhaṅgā …pe…\navikkhepaṭṭhena sammāsamādhiṁ bujjhantīti—bojjhaṅgā.\nĀdhipateyyaṭṭhena indriyaṁ bujjhantīti—bojjhaṅgā.\nAkampiyaṭṭhena balaṁ bujjhantīti—bojjhaṅgā.\nNiyyānaṭṭhaṁ bujjhantīti—bojjhaṅgā.\nHetuṭṭhena maggaṁ bujjhantīti—bojjhaṅgā.\nUpaṭṭhānaṭṭhena satipaṭṭhānaṁ bujjhantīti—bojjhaṅgā.\nPadahanaṭṭhena sammappadhānaṁ bujjhantīti—bojjhaṅgā.\nIjjhanaṭṭhena iddhipādaṁ bujjhantīti—bojjhaṅgā.\nTathaṭṭhena saccaṁ bujjhantīti—bojjhaṅgā.\nAvikkhepaṭṭhena samathaṁ bujjhantīti—bojjhaṅgā.\nAnupassanaṭṭhena vipassanaṁ …pe…\nekarasaṭṭhena samathavipassanaṁ bujjhantīti—bojjhaṅgā.\nAnativattanaṭṭhena yuganaddhaṁ bujjhantīti—bojjhaṅgā.\nSaṁvaraṭṭhena sīlavisuddhiṁ bujjhantīti—bojjhaṅgā.\nAvikkhepaṭṭhena cittavisuddhiṁ bujjhantīti—bojjhaṅgā.\nDassanaṭṭhena diṭṭhivisuddhiṁ bujjhantīti—bojjhaṅgā.\nMuttaṭṭhena vimokkhaṁ bujjhantīti—bojjhaṅgā.\nPaṭivedhaṭṭhena vijjaṁ bujjhantīti—bojjhaṅgā.\nPariccāgaṭṭhena vimuttiṁ bujjhantīti—bojjhaṅgā.\nSamucchedaṭṭhena khaye ñāṇaṁ bujjhantīti—bojjhaṅgā.\nPaṭippassaddhaṭṭhena anuppāde ñāṇaṁ bujjhantīti—bojjhaṅgā."}},{"id":"ps2.3:38","sourceIds":["ps2.3:38.1","ps2.3:38.2","ps2.3:38.3","ps2.3:38.4","ps2.3:38.5","ps2.3:38.6","ps2.3:38.7","ps2.3:38.8","ps2.3:38.9"],"kind":"text","text":{"pi":"Chandaṁ mūlaṭṭhena bujjhantīti—bojjhaṅgā.\nManasikāraṁ samuṭṭhānaṭṭhena bujjhantīti—bojjhaṅgā.\nPhassaṁ samodhānaṭṭhena bujjhantīti—bojjhaṅgā.\nVedanaṁ samosaraṇaṭṭhena bujjhantīti—bojjhaṅgā.\nSamādhiṁ pamukhaṭṭhena bujjhantīti—bojjhaṅgā.\nSatiṁ ādhipateyyaṭṭhena bujjhantīti—bojjhaṅgā.\nPaññaṁ taduttaraṭṭhena bujjhantīti—bojjhaṅgā.\nVimuttiṁ sāraṭṭhena bujjhantīti—bojjhaṅgā.\nAmatogadhaṁ nibbānaṁ pariyosānaṭṭhena bujjhantīti—bojjhaṅgā."}},{"id":"ps2.3:39","sourceIds":["ps2.3:39.1","ps2.3:39.2","ps2.3:39.3","ps2.3:39.4","ps2.3:39.5"],"kind":"text","text":{"pi":"Sāvatthinidānaṁ.\nTatra kho āyasmā sāriputto bhikkhū āmantesi—\n“āvuso bhikkhavo”ti.\n“Āvuso”ti kho te bhikkhū āyasmato sāriputtassa paccassosuṁ.\nĀyasmā sāriputto etadavoca—"}},{"id":"ps2.3:40","sourceIds":["ps2.3:40.1","ps2.3:40.2","ps2.3:40.3","ps2.3:40.4","ps2.3:40.5","ps2.3:40.6","ps2.3:40.7","ps2.3:40.8","ps2.3:40.9","ps2.3:40.10","ps2.3:40.11","ps2.3:40.12","ps2.3:40.13","ps2.3:40.14","ps2.3:40.15"],"kind":"text","text":{"pi":"“Sattime, āvuso, bojjhaṅgā.\nKatame satta?\nSatisambojjhaṅgo, dhammavicayasambojjhaṅgo …pe…\nupekkhāsambojjhaṅgo—\nime kho, āvuso, satta bojjhaṅgā.\nImesaṁ khvāhaṁ, āvuso, sattannaṁ bojjhaṅgānaṁ yena yena bojjhaṅgena ākaṅkhāmi pubbaṇhasamayaṁ viharituṁ, tena tena bojjhaṅgena pubbaṇhasamayaṁ viharāmi.\nYena yena bojjhaṅgena ākaṅkhāmi majjhanhikasamayaṁ …pe…\nsāyanhasamayaṁ viharituṁ, tena tena bojjhaṅgena sāyanhasamayaṁ viharāmi.\nSatisambojjhaṅgo iti ce me, ‘āvuso, hoti, appamāṇo’ti me hoti, ‘susamāraddho’ti me hoti.\nTiṭṭhantañca naṁ ‘tiṭṭhatī’ti pajānāmi.\nSacepi me cavati, ‘idappaccayā me cavatī’ti pajānāmi.\nDhammavicayasambojjhaṅgo …pe…\nupekkhāsambojjhaṅgo iti ce me, āvuso, hoti, ‘appamāṇo’ti me hoti, ‘susamāraddho’ti me hoti.\nTiṭṭhantañca naṁ ‘tiṭṭhatī’ti pajānāmi.\nSacepi me cavati, ‘idappaccayā me cavatī’ti pajānāmi."}},{"id":"ps2.3:41","sourceIds":["ps2.3:41.1","ps2.3:41.2","ps2.3:41.3","ps2.3:41.4","ps2.3:41.5","ps2.3:41.6","ps2.3:41.7","ps2.3:41.8","ps2.3:41.9","ps2.3:41.10","ps2.3:41.11","ps2.3:41.12","ps2.3:41.13"],"kind":"text","text":{"pi":"Seyyathāpi, āvuso, rañño vā rājamahāmattassa vā nānārattānaṁ dussānaṁ dussakaraṇḍako pūro assa.\nSo yaññadeva dussayugaṁ ākaṅkheyya pubbaṇhasamayaṁ pārupituṁ, taṁ tadeva dussayugaṁ pubbaṇhasamayaṁ pārupeyya.\nYaññadeva dussayugaṁ ākaṅkheyya majjhanhikasamayaṁ …pe…\nsāyanhasamayaṁ pārupituṁ, taṁ tadeva dussayugaṁ sāyanhasamayaṁ pārupeyya.\nEvameva khvāhaṁ, āvuso, imesaṁ sattannaṁ bojjhaṅgānaṁ yena yena bojjhaṅgena ākaṅkhāmi pubbaṇhasamayaṁ viharituṁ, tena tena bojjhaṅgena pubbaṇhasamayaṁ viharāmi.\nYena yena bojjhaṅgena ākaṅkhāmi majjhanhikasamayaṁ …pe…\nsāyanhasamayaṁ viharituṁ, tena tena bojjhaṅgena sāyanhasamayaṁ viharāmi.\nSatisambojjhaṅgo iti ce me, āvuso, hoti, ‘appamāṇo’ti me hoti, ‘susamāraddho’ti me hoti.\nTiṭṭhantañca naṁ ‘tiṭṭhatī’ti pajānāmi.\nSacepi me cavati, ‘idappaccayā me cavatī’ti pajānāmi …pe…\nupekkhāsambojjhaṅgo iti ce me, āvuso, hoti, ‘appamāṇo’ti me hoti, ‘susamāraddho’ti me hoti.\nTiṭṭhantañca naṁ ‘tiṭṭhatī’ti pajānāmi.\nSacepi me cavati, ‘idappaccayā me cavatī’ti pajānāmi”."}},{"id":"ps2.3:42","sourceIds":["ps2.3:42.0","ps2.3:42.1","ps2.3:42.2","ps2.3:42.3","ps2.3:42.4","ps2.3:42.5","ps2.3:42.6"],"kind":"text","text":{"pi":"2.3.2. Suttantaniddesa\nKathaṁ satisambojjhaṅgo iti ce me hotīti bojjhaṅgo?\nYāvatā nirodhūpaṭṭhāti tāvatā satisambojjhaṅgo.\nIti ce me hotīti bojjhaṅgo.\nSeyyathāpi telappadīpassa jhāyato yāvatā acci tāvatā vaṇṇo, yāvatā vaṇṇo tāvatā acci.\nEvameva yāvatā nirodhūpaṭṭhāti tāvatā satisambojjhaṅgo.\nIti ce me hotīti bojjhaṅgo."}},{"id":"ps2.3:43","sourceIds":["ps2.3:43.1","ps2.3:43.2","ps2.3:43.3","ps2.3:43.4"],"kind":"text","text":{"pi":"Kathaṁ appamāṇo iti ce me hotīti bojjhaṅgo?\nPamāṇabaddhā kilesā, sabbe ca pariyuṭṭhānā, ye ca saṅkhārā ponobhavikā appamāṇo nirodho acalaṭṭhena asaṅkhataṭṭhena.\nYāvatā nirodhūpaṭṭhāti tāvatā appamāṇo.\nIti ce me hotīti bojjhaṅgo."}},{"id":"ps2.3:44","sourceIds":["ps2.3:44.1","ps2.3:44.2","ps2.3:44.3"],"kind":"text","text":{"pi":"Kathaṁ susamāraddho iti ce me hotīti bojjhaṅgo?\nVisamā kilesā, sabbe ca pariyuṭṭhānā, ye ca saṅkhārā ponobhavikā, samadhammo nirodho santaṭṭhena paṇītaṭṭhena.\nYāvatā nirodhūpaṭṭhāti tāvatā susamāraddho iti ce me hotīti bojjhaṅgo."}},{"id":"ps2.3:45","sourceIds":["ps2.3:45.1","ps2.3:45.2","ps2.3:45.3","ps2.3:45.4","ps2.3:45.5"],"kind":"text","text":{"pi":"Kathaṁ “tiṭṭhantañca naṁ tiṭṭhatī”ti pajānāmi; sacepi cavati “idappaccayā cavatī”ti pajānāmi?\nKatihākārehi satisambojjhaṅgo tiṭṭhati?\nKatihākārehi satisambojjhaṅgo cavati?\nAṭṭhahākārehi satisambojjhaṅgo tiṭṭhati.\nAṭṭhahākārehi satisambojjhaṅgo cavati."}},{"id":"ps2.3:46","sourceIds":["ps2.3:46.1","ps2.3:46.2","ps2.3:46.3"],"kind":"text","text":{"pi":"Katamehi aṭṭhahākārehi satisambojjhaṅgo tiṭṭhati?\nAnuppādaṁ āvajjitattā satisambojjhaṅgo tiṭṭhati, uppādaṁ anāvajjitattā satisambojjhaṅgo tiṭṭhati, appavattaṁ āvajjitattā satisambojjhaṅgo tiṭṭhati, pavattaṁ anāvajjitattā satisambojjhaṅgo tiṭṭhati, animittaṁ āvajjitattā satisambojjhaṅgo tiṭṭhati, nimittaṁ anāvajjitattā satisambojjhaṅgo tiṭṭhati, nirodhaṁ āvajjitattā satisambojjhaṅgo tiṭṭhati, saṅkhāre anāvajjitattā satisambojjhaṅgo tiṭṭhati—\nimehi aṭṭhahākārehi satisambojjhaṅgo tiṭṭhati."}},{"id":"ps2.3:47","sourceIds":["ps2.3:47.1","ps2.3:47.2","ps2.3:47.3","ps2.3:47.4"],"kind":"text","text":{"pi":"Katamehi aṭṭhahākārehi satisambojjhaṅgo cavati?\nUppādaṁ āvajjitattā satisambojjhaṅgo cavati, anuppādaṁ anāvajjitattā satisambojjhaṅgo cavati, pavattaṁ āvajjitattā satisambojjhaṅgo cavati, appavattaṁ anāvajjitattā satisambojjhaṅgo cavati, nimittaṁ āvajjitattā satisambojjhaṅgo cavati, animittaṁ anāvajjitattā satisambojjhaṅgo cavati, saṅkhāre āvajjitattā satisambojjhaṅgo cavati, nirodhaṁ anāvajjitattā satisambojjhaṅgo cavati—\nimehi aṭṭhahākārehi satisambojjhaṅgo cavati.\nEvaṁ “tiṭṭhantañca naṁ tiṭṭhatī”ti pajānāmi; sacepi cavati, “idappaccayā me cavatī”ti pajānāmi …pe…."}},{"id":"ps2.3:48","sourceIds":["ps2.3:48.1","ps2.3:48.2","ps2.3:48.3","ps2.3:48.4"],"kind":"text","text":{"pi":"Kathaṁ upekkhāsambojjhaṅgo iti ce me hotīti bojjhaṅgo?\nYāvatā nirodhūpaṭṭhāti tāvatā upekkhāsambojjhaṅgo iti ce me hotīti bojjhaṅgo.\nSeyyathāpi telappadīpassa jhāyato yāvatā acci tāvatā vaṇṇo, yāvatā vaṇṇo tāvatā acci.\nEvameva yāvatā nirodhūpaṭṭhāti tāvatā upekkhāsambojjhaṅgo iti ce hotīti bojjhaṅgo."}},{"id":"ps2.3:49","sourceIds":["ps2.3:49.1","ps2.3:49.2","ps2.3:49.3"],"kind":"text","text":{"pi":"Kathaṁ appamāṇo iti ce hotīti bojjhaṅgo?\nPamāṇabaddhā kilesā, sabbe ca pariyuṭṭhānā, ye ca saṅkhārā ponobhavikā appamāṇo nirodho acalaṭṭhena asaṅkhataṭṭhena.\nYāvatā nirodhūpaṭṭhāti tāvatā appamāṇo iti ce hotīti bojjhaṅgo."}},{"id":"ps2.3:50","sourceIds":["ps2.3:50.1","ps2.3:50.2","ps2.3:50.3"],"kind":"text","text":{"pi":"Kathaṁ susamāraddho iti ce hotīti bojjhaṅgo?\nVisamā kilesā, sabbe ca pariyuṭṭhānā, ye ca saṅkhārā ponobhavikā samadhammo nirodho santaṭṭhena paṇītaṭṭhena.\nYāvatā nirodhūpaṭṭhāti tāvatā susamāraddho iti ce hotīti bojjhaṅgo."}},{"id":"ps2.3:51","sourceIds":["ps2.3:51.1","ps2.3:51.2","ps2.3:51.3","ps2.3:51.4","ps2.3:51.5"],"kind":"text","text":{"pi":"Kathaṁ “tiṭṭhantañca naṁ tiṭṭhatī”ti pajānāmi; sacepi cavati “idappaccayā me cavatī”ti pajānāmi?\nKatihākārehi upekkhāsambojjhaṅgo tiṭṭhati?\nKatihākārehi upekkhāsambojjhaṅgo cavati?\nAṭṭhahākārehi upekkhāsambojjhaṅgo tiṭṭhati.\nAṭṭhahākārehi upekkhāsambojjhaṅgo cavati."}},{"id":"ps2.3:52","sourceIds":["ps2.3:52.1","ps2.3:52.2","ps2.3:52.3"],"kind":"text","text":{"pi":"Katamehi aṭṭhahākārehi upekkhāsambojjhaṅgo tiṭṭhati?\nAnuppādaṁ āvajjitattā upekkhāsambojjhaṅgo tiṭṭhati, uppādaṁ anāvajjitattā upekkhāsambojjhaṅgo tiṭṭhati, appavattaṁ āvajjitattā upekkhāsambojjhaṅgo tiṭṭhati, pavattaṁ anāvajjitattā upekkhāsambojjhaṅgo tiṭṭhati, animittaṁ āvajjitattā upekkhāsambojjhaṅgo tiṭṭhati, nimittaṁ anāvajjitattā upekkhāsambojjhaṅgo tiṭṭhati, nirodhaṁ āvajjitattā upekkhāsambojjhaṅgo tiṭṭhati, saṅkhāre anāvajjitattā upekkhāsambojjhaṅgo tiṭṭhati—\nimehi aṭṭhahākārehi upekkhāsambojjhaṅgo tiṭṭhati."}},{"id":"ps2.3:53","sourceIds":["ps2.3:53.1","ps2.3:53.2","ps2.3:53.3","ps2.3:53.4","ps2.3:53.5"],"kind":"text","text":{"pi":"Katamehi aṭṭhahākārehi upekkhāsambojjhaṅgo cavati?\nUppādaṁ āvajjitattā upekkhāsambojjhaṅgo cavati, anuppādaṁ anāvajjitattā upekkhāsambojjhaṅgo cavati, pavattaṁ āvajjitattā upekkhāsambojjhaṅgo cavati, appavattaṁ anāvajjitattā upekkhāsambojjhaṅgo cavati, nimittaṁ āvajjitattā upekkhāsambojjhaṅgo cavati, animittaṁ anāvajjitattā upekkhāsambojjhaṅgo cavati, saṅkhāre āvajjitattā upekkhāsambojjhaṅgo cavati, nirodhaṁ anāvajjitattā upekkhāsambojjhaṅgo cavati—\nimehi aṭṭhahākārehi upekkhāsambojjhaṅgo cavati.\nEvaṁ “tiṭṭhantañca naṁ tiṭṭhatī”ti pajānāmi; sacepi cavati, “idappaccayā me cavatī”ti pajānāmi.\nBojjhaṅgakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps2.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}