{"id":"ps2.4","title":"2.4. Mettākathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps2.4","title":"2.4. Mettākathā","units":[{"id":"ps2.4:0","sourceIds":["ps2.4:0.1","ps2.4:0.2","ps2.4:0.3"],"kind":"text","text":{"pi":"Paṭisambhidāmagga\n2 Yuganaddhavagga\n2.4. Mettākathā"}},{"id":"ps2.4:1","sourceIds":["ps2.4:1.1","ps2.4:1.2","ps2.4:1.3","ps2.4:1.4","ps2.4:1.5","ps2.4:1.6"],"kind":"text","text":{"pi":"Sāvatthinidānaṁ.\n“Mettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṁsā pāṭikaṅkhā.\nKatame ekādasa?\nSukhaṁ supati, sukhaṁ paṭibujjhati, na pāpakaṁ supinaṁ passati, manussānaṁ piyo hoti, amanussānaṁ piyo hoti, devatā rakkhanti, nāssa aggi vā visaṁ vā satthaṁ vā kamati, tuvaṭaṁ cittaṁ samādhiyati, mukhavaṇṇo vippasīdati, asammūḷho kālaṁ karoti, uttari appaṭivijjhanto brahmalokūpago hoti.\nMettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya—\nime ekādasānisaṁsā pāṭikaṅkhā”."}},{"id":"ps2.4:2","sourceIds":["ps2.4:2.1","ps2.4:2.2","ps2.4:2.3"],"kind":"text","text":{"pi":"Atthi anodhiso pharaṇā mettācetovimutti, atthi odhiso pharaṇā mettācetovimutti, atthi disāpharaṇā mettācetovimutti.\nKatihākārehi anodhiso pharaṇā mettācetovimutti, katihākārehi odhiso pharaṇā mettācetovimutti, katihākārehi disāpharaṇā mettācetovimutti?\nPañcahākārehi anodhiso pharaṇā mettācetovimutti, sattahākārehi odhiso pharaṇā mettācetovimutti, dasahākārehi disāpharaṇā mettācetovimutti."}},{"id":"ps2.4:3","sourceIds":["ps2.4:3.1","ps2.4:3.2","ps2.4:3.3","ps2.4:3.4","ps2.4:3.5","ps2.4:3.6","ps2.4:3.7"],"kind":"text","text":{"pi":"Katamehi pañcahākārehi anodhiso pharaṇā mettācetovimutti?\nSabbe sattā averā abyāpajjā anīghā sukhī attānaṁ pariharantu.\nSabbe pāṇā …pe…\nsabbe bhūtā …pe…\nsabbe puggalā …pe…\nsabbe attabhāvapariyāpannā averā abyāpajjā anīghā sukhī attānaṁ pariharantūti.\nImehi pañcahākārehi anodhiso pharaṇā mettācetovimutti."}},{"id":"ps2.4:4","sourceIds":["ps2.4:4.1","ps2.4:4.2","ps2.4:4.3","ps2.4:4.4","ps2.4:4.5","ps2.4:4.6","ps2.4:4.7","ps2.4:4.8","ps2.4:4.9"],"kind":"text","text":{"pi":"Katamehi sattahākārehi odhiso pharaṇā mettācetovimutti?\nSabbā itthiyo averā abyāpajjā anīghā sukhī attānaṁ pariharantu.\nSabbe purisā …pe…\nsabbe ariyā …pe…\nsabbe anariyā …pe…\nsabbe devā …pe…\nsabbe manussā …pe…\nsabbe vinipātikā averā abyāpajjā anīghā sukhī attānaṁ pariharantūti.\nImehi sattahākārehi odhiso pharaṇā mettācetovimutti."}},{"id":"ps2.4:5","sourceIds":["ps2.4:5.1","ps2.4:5.2","ps2.4:5.3","ps2.4:5.4","ps2.4:5.5","ps2.4:5.6","ps2.4:5.7","ps2.4:5.8","ps2.4:5.9","ps2.4:5.10","ps2.4:5.11","ps2.4:5.12","ps2.4:5.13","ps2.4:5.14","ps2.4:5.15","ps2.4:5.16","ps2.4:5.17","ps2.4:5.18","ps2.4:5.19","ps2.4:5.20","ps2.4:5.21","ps2.4:5.22","ps2.4:5.23","ps2.4:5.24","ps2.4:5.25","ps2.4:5.26","ps2.4:5.27","ps2.4:5.28","ps2.4:5.29","ps2.4:5.30","ps2.4:5.31","ps2.4:5.32"],"kind":"text","text":{"pi":"Katamehi dasahākārehi disāpharaṇā mettācetovimutti?\nSabbe puratthimāya disāya sattā averā abyāpajjā anīghā sukhī attānaṁ pariharantu.\nSabbe pacchimāya disāya sattā …pe…\nsabbe uttarāya disāya sattā …pe…\nsabbe dakkhiṇāya disāya sattā …pe…\nsabbe puratthimāya anudisāya sattā …pe…\nsabbe pacchimāya anudisāya sattā …pe…\nsabbe uttarāya anudisāya sattā …pe…\nsabbe dakkhiṇāya anudisāya sattā …pe…\nsabbe heṭṭhimāya disāya sattā …pe…\nsabbe uparimāya disāya sattā averā abyāpajjā anīghā sukhī attānaṁ pariharantu.\nSabbe puratthimāya disāya pāṇā …pe…\nbhūtā …\npuggalā …\nattabhāvapariyāpannā …\nsabbā itthiyo …\nsabbe purisā …\nsabbe ariyā …\nsabbe anariyā …\nsabbe devā …\nsabbe manussā …\nsabbe vinipātikā averā abyāpajjā anīghā sukhī attānaṁ pariharantu.\nSabbe pacchimāya disāya vinipātikā …pe…\nsabbe uttarāya disāya vinipātikā …\nsabbe dakkhiṇāya disāya vinipātikā …\nsabbe puratthimāya anudisāya vinipātikā …\nsabbe pacchimāya anudisāya vinipātikā …\nsabbe uttarāya anudisāya vinipātikā …\nsabbe dakkhiṇāya anudisāya vinipātikā …\nsabbe heṭṭhimāya disāya vinipātikā …\nsabbe uparimāya disāya vinipātikā averā abyāpajjā anīghā sukhī attānaṁ pariharantūti.\nImehi dasahākārehi disāpharaṇā mettācetovimutti."}},{"id":"ps2.4:6","sourceIds":["ps2.4:6.0","ps2.4:6.1","ps2.4:6.2","ps2.4:6.3","ps2.4:6.4","ps2.4:6.5"],"kind":"text","text":{"pi":"2.4.1. Indriyavāra\nSabbesaṁ sattānaṁ pīḷanaṁ vajjetvā apīḷanāya, upaghātaṁ vajjetvā anupaghātena, santāpaṁ vajjetvā asantāpena, pariyādānaṁ vajjetvā apariyādānena, vihesaṁ vajjetvā avihesāya, sabbe sattā averino hontu mā verino, sukhino hontu mā dukkhino, sukhitattā hontu mā dukkhitattāti—\nimehi aṭṭhahākārehi sabbe satte mettāyatīti—mettā.\nTaṁ dhammaṁ cetayatīti—ceto.\nSabbabyāpādapariyuṭṭhānehi vimuccatīti—vimutti.\nMettā ca ceto ca vimutti cāti—mettācetovimutti."}},{"id":"ps2.4:7","sourceIds":["ps2.4:7.1","ps2.4:7.2","ps2.4:7.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nsaddhāya adhimuccati.\nSaddhindriyaparibhāvitā hoti mettācetovimutti."}},{"id":"ps2.4:8","sourceIds":["ps2.4:8.1","ps2.4:8.2","ps2.4:8.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nvīriyaṁ paggaṇhāti.\nVīriyindriyaparibhāvitā hoti mettācetovimutti."}},{"id":"ps2.4:9","sourceIds":["ps2.4:9.1","ps2.4:9.2","ps2.4:9.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nsatiṁ upaṭṭhāpeti.\nSatindriyaparibhāvitā hoti mettācetovimutti."}},{"id":"ps2.4:10","sourceIds":["ps2.4:10.1","ps2.4:10.2","ps2.4:10.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\ncittaṁ samādahati.\nSamādhindriyaparibhāvitā hoti mettācetovimutti."}},{"id":"ps2.4:11","sourceIds":["ps2.4:11.1","ps2.4:11.2","ps2.4:11.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\npaññāya pajānāti.\nPaññindriyaparibhāvitā hoti mettācetovimutti."}},{"id":"ps2.4:12","sourceIds":["ps2.4:12.1","ps2.4:12.2","ps2.4:12.3","ps2.4:12.4","ps2.4:12.5","ps2.4:12.6","ps2.4:12.7","ps2.4:12.8","ps2.4:12.9","ps2.4:12.10"],"kind":"text","text":{"pi":"Imāni pañcindriyāni mettāya cetovimuttiyā āsevanā honti.\nImehi pañcahi indriyehi mettācetovimutti āsevīyati.\nImāni pañcindriyāni mettāya cetovimuttiyā bhāvanā honti.\nImehi pañcahi indriyehi mettācetovimutti bhāvīyati.\nImāni pañcindriyāni mettāya cetovimuttiyā bahulīkatā honti.\nImehi pañcahi indriyehi mettācetovimutti bahulīkarīyati.\nImāni pañcindriyāni mettāya cetovimuttiyā alaṅkārā honti.\nImehi pañcahi indriyehi mettācetovimutti svālaṅkatā hoti.\nImāni pañcindriyāni mettāya cetovimuttiyā parikkhārā honti.\nImehi pañcahi indriyehi mettācetovimutti suparikkhatā hoti."}},{"id":"ps2.4:13","sourceIds":["ps2.4:13.1","ps2.4:13.2","ps2.4:13.3"],"kind":"text","text":{"pi":"Imāni pañcindriyāni mettāya cetovimuttiyā parivārā honti.\nImehi pañcahi indriyehi mettācetovimutti suparivutā hoti.\nImāni pañcindriyāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṁsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, “etaṁ santan”ti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti, nibbattenti jotenti patāpenti."}},{"id":"ps2.4:14","sourceIds":["ps2.4:14.0","ps2.4:14.1","ps2.4:14.2","ps2.4:14.3"],"kind":"text","text":{"pi":"2.4.2. Balavāra\nSabbe sattā averino hontu, khemino hontu, sukhino hontūti—\nassaddhiye na kampati.\nSaddhābalaparibhāvitā hoti mettācetovimutti."}},{"id":"ps2.4:15","sourceIds":["ps2.4:15.1","ps2.4:15.2","ps2.4:15.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nkosajje na kampati.\nVīriyabalaparibhāvitā hoti mettācetovimutti."}},{"id":"ps2.4:16","sourceIds":["ps2.4:16.1","ps2.4:16.2","ps2.4:16.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\npamāde na kampati.\nSatibalaparibhāvitā hoti mettācetovimutti."}},{"id":"ps2.4:17","sourceIds":["ps2.4:17.1","ps2.4:17.2","ps2.4:17.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nuddhacce na kampati.\nSamādhibalaparibhāvitā hoti mettācetovimutti."}},{"id":"ps2.4:18","sourceIds":["ps2.4:18.1","ps2.4:18.2","ps2.4:18.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\navijjāya na kampati.\nPaññābalaparibhāvitā hoti mettācetovimutti."}},{"id":"ps2.4:19","sourceIds":["ps2.4:19.1","ps2.4:19.2","ps2.4:19.3","ps2.4:19.4","ps2.4:19.5","ps2.4:19.6","ps2.4:19.7","ps2.4:19.8","ps2.4:19.9","ps2.4:19.10","ps2.4:19.11","ps2.4:19.12","ps2.4:19.13"],"kind":"text","text":{"pi":"Imāni pañca balāni mettāya cetovimuttiyā āsevanā honti.\nImehi pañcahi balehi mettācetovimutti āsevīyati.\nImāni pañca balāni mettāya cetovimuttiyā bhāvanā honti.\nImehi pañcahi balehi mettācetovimutti bhāvīyati.\nImāni pañca balāni mettāya cetovimuttiyā bahulīkatā honti.\nImehi pañcahi balehi mettācetovimutti bahulīkarīyati.\nImāni pañca balāni mettāya cetovimuttiyā alaṅkārā honti.\nImehi pañcahi balehi mettācetovimutti svālaṅkatā hoti.\nImāni pañca balāni mettāya cetovimuttiyā parikkhārā honti.\nImehi pañcahi balehi mettācetovimutti suparikkhatā hoti.\nImāni pañca balāni mettāya cetovimuttiyā parivārā honti.\nImehi pañcahi balehi mettācetovimutti suparivutā hoti.\nImāni pañca balāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṁsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, “etaṁ santan”ti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpenti."}},{"id":"ps2.4:20","sourceIds":["ps2.4:20.0","ps2.4:20.1","ps2.4:20.2","ps2.4:20.3"],"kind":"text","text":{"pi":"2.4.3. Bojjhaṅgavāra\nSabbe sattā averino hontu, khemino hontu, sukhino hontūti—\nsatiṁ upaṭṭhāpeti.\nSatisambojjhaṅgaparibhāvitā hoti mettācetovimutti."}},{"id":"ps2.4:21","sourceIds":["ps2.4:21.1","ps2.4:21.2","ps2.4:21.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\npaññāya pavicināti.\nDhammavicayasambojjhaṅgaparibhāvitā hoti mettācetovimutti."}},{"id":"ps2.4:22","sourceIds":["ps2.4:22.1","ps2.4:22.2","ps2.4:22.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nvīriyaṁ paggaṇhāti.\nVīriyasambojjhaṅgaparibhāvitā hoti mettācetovimutti."}},{"id":"ps2.4:23","sourceIds":["ps2.4:23.1","ps2.4:23.2","ps2.4:23.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\npariḷāhaṁ paṭippassambheti.\nPītisambojjhaṅgaparibhāvitā hoti mettācetovimutti."}},{"id":"ps2.4:24","sourceIds":["ps2.4:24.1","ps2.4:24.2","ps2.4:24.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nduṭṭhullaṁ paṭippassambheti.\nPassaddhisambojjhaṅgaparibhāvitā hoti mettācetovimutti."}},{"id":"ps2.4:25","sourceIds":["ps2.4:25.1","ps2.4:25.2","ps2.4:25.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\ncittaṁ samādahati.\nSamādhisambojjhaṅgaparibhāvitā hoti mettācetovimutti."}},{"id":"ps2.4:26","sourceIds":["ps2.4:26.1","ps2.4:26.2","ps2.4:26.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nñāṇena kilese paṭisaṅkhāti.\nUpekkhāsambojjhaṅgaparibhāvitā hoti mettācetovimutti."}},{"id":"ps2.4:27","sourceIds":["ps2.4:27.1","ps2.4:27.2","ps2.4:27.3","ps2.4:27.4","ps2.4:27.5","ps2.4:27.6","ps2.4:27.7","ps2.4:27.8","ps2.4:27.9","ps2.4:27.10","ps2.4:27.11","ps2.4:27.12","ps2.4:27.13"],"kind":"text","text":{"pi":"Ime satta bojjhaṅgā mettāya cetovimuttiyā āsevanā honti.\nImehi sattahi bojjhaṅgehi mettācetovimutti āsevīyati.\nIme satta bojjhaṅgā mettāya cetovimuttiyā bhāvanā honti.\nImehi sattahi bojjhaṅgehi mettācetovimutti bhāvīyati.\nIme satta bojjhaṅgā mettāya cetovimuttiyā bahulīkatā honti.\nImehi sattahi bojjhaṅgehi mettācetovimutti bahulīkarīyati.\nIme satta bojjhaṅgā mettāya cetovimuttiyā alaṅkārā honti.\nImehi sattahi bojjhaṅgehi mettācetovimutti svālaṅkatā hoti.\nIme satta bojjhaṅgā mettāya cetovimuttiyā parikkhārā honti.\nImehi sattahi bojjhaṅgehi mettācetovimutti suparikkhatā hoti.\nIme satta bojjhaṅgā mettāya cetovimuttiyā parivārā honti.\nImehi sattahi bojjhaṅgehi mettācetovimutti suparivutā hoti.\nIme satta bojjhaṅgā mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṁsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, “etaṁ santan”ti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti, nibbattenti jotenti patāpenti."}},{"id":"ps2.4:28","sourceIds":["ps2.4:28.0","ps2.4:28.1","ps2.4:28.2","ps2.4:28.3"],"kind":"text","text":{"pi":"2.4.4. Maggaṅgavāra\nSabbe sattā averino hontu, khemino hontu, sukhino hontūti—\nsammā passati.\nSammādiṭṭhiparibhāvitā hoti mettācetovimutti."}},{"id":"ps2.4:29","sourceIds":["ps2.4:29.1","ps2.4:29.2","ps2.4:29.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nsammā abhiniropeti.\nSammāsaṅkappaparibhāvitā hoti mettācetovimutti."}},{"id":"ps2.4:30","sourceIds":["ps2.4:30.1","ps2.4:30.2","ps2.4:30.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nsammā pariggaṇhāti.\nSammāvācāparibhāvitā hoti mettācetovimutti."}},{"id":"ps2.4:31","sourceIds":["ps2.4:31.1","ps2.4:31.2","ps2.4:31.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nsammā samuṭṭhāpeti.\nSammākammantaparibhāvitā hoti mettācetovimutti."}},{"id":"ps2.4:32","sourceIds":["ps2.4:32.1","ps2.4:32.2","ps2.4:32.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nsammā vodāpeti.\nSammāājīvaparibhāvitā hoti mettācetovimutti."}},{"id":"ps2.4:33","sourceIds":["ps2.4:33.1","ps2.4:33.2","ps2.4:33.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nsammā paggaṇhāti.\nSammāvāyāmaparibhāvitā hoti mettācetovimutti."}},{"id":"ps2.4:34","sourceIds":["ps2.4:34.1","ps2.4:34.2","ps2.4:34.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nsammā upaṭṭhāpeti.\nSammāsatiparibhāvitā hoti mettācetovimutti."}},{"id":"ps2.4:35","sourceIds":["ps2.4:35.1","ps2.4:35.2","ps2.4:35.3"],"kind":"text","text":{"pi":"Sabbe sattā averino hontu, khemino hontu, sukhino hontūti—\nsammā samādahati.\nSammāsamādhiparibhāvitā hoti mettācetovimutti."}},{"id":"ps2.4:36","sourceIds":["ps2.4:36.1","ps2.4:36.2","ps2.4:36.3","ps2.4:36.4","ps2.4:36.5","ps2.4:36.6","ps2.4:36.7","ps2.4:36.8","ps2.4:36.9","ps2.4:36.10","ps2.4:36.11","ps2.4:36.12","ps2.4:36.13"],"kind":"text","text":{"pi":"Ime aṭṭha maggaṅgā mettāya cetovimuttiyā āsevanā honti.\nImehi aṭṭhahi maggaṅgehi mettācetovimutti āsevīyati.\nIme aṭṭha maggaṅgā mettāya cetovimuttiyā bhāvanā honti.\nImehi aṭṭhahi maggaṅgehi mettācetovimutti bhāvīyati.\nIme aṭṭha maggaṅgā mettāya cetovimuttiyā bahulīkatā honti.\nImehi aṭṭhahi maggaṅgehi mettācetovimutti bahulīkarīyati.\nIme aṭṭha maggaṅgā mettāya cetovimuttiyā alaṅkārā honti.\nImehi aṭṭhahi maggaṅgehi mettācetovimutti svālaṅkatā honti.\nIme aṭṭha maggaṅgā mettāya cetovimuttiyā parikkhārā honti.\nImehi aṭṭhahi maggaṅgehi mettācetovimutti suparikkhatā hoti.\nIme aṭṭha maggaṅgā mettāya cetovimuttiyā parivārā honti.\nImehi aṭṭhahi maggaṅgehi mettācetovimutti suparivutā hoti.\nIme aṭṭha maggaṅgā mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṁsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, “etaṁ santan”ti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpenti."}},{"id":"ps2.4:37","sourceIds":["ps2.4:37.1","ps2.4:37.2","ps2.4:37.3","ps2.4:37.4","ps2.4:37.5","ps2.4:37.6","ps2.4:37.7","ps2.4:37.8","ps2.4:37.9","ps2.4:37.10","ps2.4:37.11","ps2.4:37.12","ps2.4:37.13","ps2.4:37.14","ps2.4:37.15"],"kind":"text","text":{"pi":"Sabbesaṁ pāṇānaṁ …pe…\nsabbesaṁ bhūtānaṁ …\nsabbesaṁ puggalānaṁ …\nsabbesaṁ attabhāvapariyāpannānaṁ …\nsabbāsaṁ itthīnaṁ …\nsabbesaṁ purisānaṁ …\nsabbesaṁ ariyānaṁ …\nsabbesaṁ anariyānaṁ …\nsabbesaṁ devānaṁ …\nsabbesaṁ manussānaṁ …\nsabbesaṁ vinipātikānaṁ pīḷanaṁ vajjetvā apīḷanāya, upaghātaṁ vajjetvā anupaghātena, santāpaṁ vajjetvā asantāpena, pariyādānaṁ vajjetvā apariyādānena, vihesaṁ vajjetvā avihesāya, sabbe vinipātikā averino hontu mā verino, sukhino hontu mā dukkhino, sukhitattā hontu mā dukkhitattāti—\nimehi aṭṭhahākārehi sabbe vinipātike mettāyatīti—mettā.\nTaṁ dhammaṁ cetayatīti—ceto.\nSabbabyāpādapariyuṭṭhānehi vimuccatīti—vimutti.\nMettā ca ceto ca vimutti cāti—mettācetovimutti."}},{"id":"ps2.4:38","sourceIds":["ps2.4:38.1","ps2.4:38.2","ps2.4:38.3","ps2.4:38.4"],"kind":"text","text":{"pi":"Sabbe vinipātikā averino hontu, khemino hontu, sukhino hontūti—\nsaddhāya adhimuccati.\nSaddhindriyaparibhāvitā hoti mettācetovimutti …pe…\nnibbattenti jotenti patāpenti."}},{"id":"ps2.4:39","sourceIds":["ps2.4:39.1","ps2.4:39.2","ps2.4:39.3","ps2.4:39.4","ps2.4:39.5","ps2.4:39.6","ps2.4:39.7","ps2.4:39.8","ps2.4:39.9","ps2.4:39.10","ps2.4:39.11","ps2.4:39.12","ps2.4:39.13","ps2.4:39.14"],"kind":"text","text":{"pi":"Sabbesaṁ puratthimāya disāya sattānaṁ …pe…\nsabbesaṁ pacchimāya disāya sattānaṁ …\nsabbesaṁ uttarāya disāya sattānaṁ …\nsabbesaṁ dakkhiṇāya disāya sattānaṁ …\nsabbesaṁ puratthimāya anudisāya sattānaṁ …\nsabbesaṁ pacchimāya anudisāya sattānaṁ …\nsabbesaṁ uttarāya anudisāya sattānaṁ …\nsabbesaṁ dakkhiṇāya anudisāya sattānaṁ …\nsabbesaṁ heṭṭhimāya disāya sattānaṁ …\nsabbesaṁ uparimāya disāya sattānaṁ pīḷanaṁ vajjetvā apīḷanāya, upaghātaṁ vajjetvā anupaghātena, santāpaṁ vajjetvā asantāpena, pariyādānaṁ vajjetvā apariyādānena, vihesaṁ vajjetvā avihesāya, sabbe uparimāya disāya sattā averino hontu mā verino, sukhino hontu mā dukkhino, sukhitattā hontu mā dukkhitattāti—\nimehi aṭṭhahākārehi sabbe uparimāya disāya satte mettāyatīti—mettā.\nTaṁ dhammaṁ cetayatīti—ceto.\nSabbabyāpādapariyuṭṭhānehi vimuccatīti—vimutti.\nMettā ca ceto ca vimutti cāti—mettācetovimutti."}},{"id":"ps2.4:40","sourceIds":["ps2.4:40.1","ps2.4:40.2","ps2.4:40.3","ps2.4:40.4"],"kind":"text","text":{"pi":"Sabbe uparimāya disāya sattā averino hontu, khemino hontu, sukhino hontūti—\nsaddhāya adhimuccati.\nSaddhindriyaparibhāvitā hoti mettācetovimutti …pe…\nnibbattenti jotenti patāpenti."}},{"id":"ps2.4:41","sourceIds":["ps2.4:41.1","ps2.4:41.2","ps2.4:41.3","ps2.4:41.4","ps2.4:41.5","ps2.4:41.6","ps2.4:41.7","ps2.4:41.8","ps2.4:41.9","ps2.4:41.10","ps2.4:41.11","ps2.4:41.12","ps2.4:41.13","ps2.4:41.14","ps2.4:41.15","ps2.4:41.16","ps2.4:41.17","ps2.4:41.18","ps2.4:41.19","ps2.4:41.20","ps2.4:41.21","ps2.4:41.22","ps2.4:41.23","ps2.4:41.24"],"kind":"text","text":{"pi":"Sabbesaṁ puratthimāya disāya pāṇānaṁ …pe…\nbhūtānaṁ …\npuggalānaṁ …\nattabhāvapariyāpannānaṁ …\nsabbāsaṁ itthīnaṁ …\nsabbesaṁ purisānaṁ …\nsabbesaṁ ariyānaṁ …\nsabbesaṁ anariyānaṁ …\nsabbesaṁ devānaṁ …\nsabbesaṁ manussānaṁ …\nsabbesaṁ vinipātikānaṁ …\nsabbesaṁ pacchimāya disāya vinipātikānaṁ …\nsabbesaṁ uttarāya disāya vinipātikānaṁ …\nsabbesaṁ dakkhiṇāya disāya vinipātikānaṁ …\nsabbesaṁ puratthimāya anudisāya vinipātikānaṁ …\nsabbesaṁ pacchimāya anudisāya vinipātikānaṁ …\nsabbesaṁ uttarāya anudisāya vinipātikānaṁ …\nsabbesaṁ dakkhiṇāya anudisāya vinipātikānaṁ …\nsabbesaṁ heṭṭhimāya disāya vinipātikānaṁ …\nsabbesaṁ uparimāya disāya vinipātikānaṁ pīḷanaṁ vajjetvā apīḷanāya, upaghātaṁ vajjetvā anupaghātena, santāpaṁ vajjetvā asantāpena, pariyādānaṁ vajjetvā apariyādānena, vihesaṁ vajjetvā avihesāya, sabbe uparimāya disāya vinipātikā averino hontu mā verino, sukhino hontu mā dukkhino, sukhitattā hontu mā dukkhitattāti—\nimehi aṭṭhahākārehi sabbe uparimāya disāya vinipātike mettāyatīti—mettā.\nTaṁ dhammaṁ cetayatīti—ceto.\nSabbabyāpādapariyuṭṭhānehi vimuccatīti—vimutti.\nMettā ca ceto ca vimutti cāti—mettācetovimutti."}},{"id":"ps2.4:42","sourceIds":["ps2.4:42.1","ps2.4:42.2","ps2.4:42.3"],"kind":"text","text":{"pi":"Sabbe uparimāya disāya vinipātikā averino hontu, khemino hontu, sukhino hontūti—\nsaddhāya adhimuccati.\nSaddhindriyaparibhāvitā hoti mettācetovimutti."}},{"id":"ps2.4:43","sourceIds":["ps2.4:43.1","ps2.4:43.2","ps2.4:43.3"],"kind":"text","text":{"pi":"Sabbe uparimāya disāya vinipātikā averino hontu, khemino hontu, sukhino hontūti—\nvīriyaṁ paggaṇhāti.\nVīriyindriyaparibhāvitā hoti mettācetovimutti."}},{"id":"ps2.4:44","sourceIds":["ps2.4:44.1","ps2.4:44.2","ps2.4:44.3","ps2.4:44.4","ps2.4:44.5","ps2.4:44.6"],"kind":"text","text":{"pi":"Satiṁ upaṭṭhāpeti.\nSatindriyaparibhāvitā hoti mettācetovimutti.\nCittaṁ samādahati.\nSamādhindriyaparibhāvitā hoti mettācetovimutti.\nPaññāya pajānāti.\nPaññindriyaparibhāvitā hoti mettācetovimutti."}},{"id":"ps2.4:45","sourceIds":["ps2.4:45.1","ps2.4:45.2","ps2.4:45.3"],"kind":"text","text":{"pi":"Imāni pañcindriyāni mettāya cetovimuttiyā āsevanā honti.\nImehi pañcahi indriyehi mettācetovimutti āsevīyati …pe…\nnibbattenti jotenti patāpenti."}},{"id":"ps2.4:46","sourceIds":["ps2.4:46.1","ps2.4:46.2","ps2.4:46.3","ps2.4:46.4","ps2.4:46.5","ps2.4:46.6"],"kind":"text","text":{"pi":"Sabbe uparimāya disāya vinipātikā averino hontu, khemino hontu, sukhino hontūti—\nassaddhiye na kampati, saddhābalaparibhāvitā hoti mettācetovimutti.\nKosajje na kampati, vīriyabalaparibhāvitā hoti mettācetovimutti.\nPamāde na kampati, satibalaparibhāvitā hoti mettācetovimutti.\nUddhacce na kampati, samādhibalaparibhāvitā hoti mettācetovimutti.\nAvijjāya na kampati, paññābalaparibhāvitā hoti mettācetovimutti."}},{"id":"ps2.4:47","sourceIds":["ps2.4:47.1","ps2.4:47.2","ps2.4:47.3"],"kind":"text","text":{"pi":"Imāni pañca balāni mettāya cetovimuttiyā āsevanā honti.\nImehi pañcahi balehi mettācetovimutti āsevīyati …pe…\nnibbattenti jotenti patāpenti."}},{"id":"ps2.4:48","sourceIds":["ps2.4:48.1","ps2.4:48.2","ps2.4:48.3"],"kind":"text","text":{"pi":"Sabbe uparimāya disāya vinipātikā averino hontu, khemino hontu, sukhino hontūti—\nsatiṁ upaṭṭhāpeti.\nSatisambojjhaṅgaparibhāvitā hoti mettācetovimutti."}},{"id":"ps2.4:49","sourceIds":["ps2.4:49.1","ps2.4:49.2","ps2.4:49.3","ps2.4:49.4","ps2.4:49.5","ps2.4:49.6"],"kind":"text","text":{"pi":"Paññāya pavicināti, dhammavicayasambojjhaṅgaparibhāvitā hoti mettācetovimutti.\nVīriyaṁ paggaṇhāti, vīriyasambojjhaṅgaparibhāvitā hoti mettācetovimutti.\nPariḷāhaṁ paṭippassambheti, pītisambojjhaṅgaparibhāvitā hoti mettācetovimutti.\nDuṭṭhullaṁ paṭippassambheti, passaddhisambojjhaṅgaparibhāvitā hoti mettācetovimutti.\nCittaṁ samādahati, samādhisambojjhaṅgaparibhāvitā hoti mettācetovimutti.\nÑāṇena kilese paṭisaṅkhāti, upekkhāsambojjhaṅgaparibhāvitā hoti mettācetovimutti."}},{"id":"ps2.4:50","sourceIds":["ps2.4:50.1","ps2.4:50.2","ps2.4:50.3"],"kind":"text","text":{"pi":"Ime satta bojjhaṅgā mettāya cetovimuttiyā āsevanā honti.\nImehi sattahi bojjhaṅgehi mettācetovimutti āsevīyati …pe…\nnibbattenti jotenti patāpenti."}},{"id":"ps2.4:51","sourceIds":["ps2.4:51.1","ps2.4:51.2","ps2.4:51.3","ps2.4:51.4","ps2.4:51.5","ps2.4:51.6","ps2.4:51.7","ps2.4:51.8","ps2.4:51.9"],"kind":"text","text":{"pi":"Sabbe uparimāya disāya vinipātikā averino hontu, khemino hontu, sukhino hontūti—\nsammā passati, sammādiṭṭhi paribhāvitā hoti mettācetovimutti.\nSammā abhiniropeti, sammāsaṅkappaparibhāvitā hoti mettācetovimutti.\nSammā pariggaṇhāti, sammāvācāparibhāvitā hoti mettācetovimutti.\nSammā samuṭṭhāpeti, sammākammantaparibhāvitā hoti mettācetovimutti.\nSammā vodāpeti, sammāājīvaparibhāvitā hoti mettācetovimutti.\nSammā paggaṇhāti, sammāvāyāmaparibhāvitā hoti mettācetovimutti.\nSammā upaṭṭhāti, sammāsatiparibhāvitā hoti mettācetovimutti.\nSammā samādahati, sammāsamādhiparibhāvitā hoti mettācetovimutti."}},{"id":"ps2.4:52","sourceIds":["ps2.4:52.1","ps2.4:52.2","ps2.4:52.3","ps2.4:52.4","ps2.4:52.5","ps2.4:52.6"],"kind":"text","text":{"pi":"Ime aṭṭha maggaṅgā mettāya cetovimuttiyā āsevanā honti.\nImehi aṭṭhahi maggaṅgehi mettācetovimutti āsevīyati …pe…\nime aṭṭha maggaṅgā mettāya cetovimuttiyā paribhāvitā honti.\nImehi aṭṭhahi maggaṅgehi mettācetovimutti suparivutā hoti.\nIme aṭṭha maggaṅgā mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṁsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, “etaṁ santan”ti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpentīti.\nMettākathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps2.4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}