{"id":"ps2.5","title":"2.5. Virāgakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps2.5","title":"2.5. Virāgakathā","units":[{"id":"ps2.5:0","sourceIds":["ps2.5:0.1","ps2.5:0.2","ps2.5:0.3"],"kind":"text","text":{"pi":"Paṭisambhidāmagga\n2 Yuganaddhavagga\n2.5. Virāgakathā"}},{"id":"ps2.5:1","sourceIds":["ps2.5:1.1","ps2.5:1.2","ps2.5:1.3","ps2.5:1.4"],"kind":"text","text":{"pi":"Virāgo maggo, vimutti phalaṁ.\nKathaṁ virāgo maggo?\nSotāpattimaggakkhaṇe dassanaṭṭhena sammādiṭṭhi micchādiṭṭhiyā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati.\nVirāgo virāgārammaṇo virāgagocaro virāge samudāgato virāge ṭhito virāge patiṭṭhito."}},{"id":"ps2.5:2","sourceIds":["ps2.5:2.1","ps2.5:2.2","ps2.5:2.3","ps2.5:2.4","ps2.5:2.5","ps2.5:2.6","ps2.5:2.7"],"kind":"text","text":{"pi":"Virāgoti dve virāgā—\nnibbānañca virāgo, ye ca nibbānārammaṇatājātā dhammā sabbe virāgā hontīti—virāgā.\nSahajātāni sattaṅgāni virāgaṁ gacchantīti—virāgo maggo.\nEtena maggena buddhā ca sāvakā ca agataṁ disaṁ nibbānaṁ gacchantīti—\naṭṭhaṅgiko maggo.\nYāvatā puthusamaṇabrāhmaṇānaṁ parappavādānaṁ maggā, ayameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti—\nmaggānaṁ aṭṭhaṅgiko seṭṭho."}},{"id":"ps2.5:3","sourceIds":["ps2.5:3.1","ps2.5:3.2","ps2.5:3.3","ps2.5:3.4","ps2.5:3.5","ps2.5:3.6","ps2.5:3.7","ps2.5:3.8","ps2.5:3.9","ps2.5:3.10"],"kind":"text","text":{"pi":"Abhiniropanaṭṭhena sammāsaṅkappo micchāsaṅkappā virajjati.\nPariggahaṭṭhena sammāvācā micchāvācāya virajjati.\nSamuṭṭhānaṭṭhena sammākammanto micchākammantā virajjati.\nVodānaṭṭhena sammāājīvo micchāājīvā virajjati.\nPaggahaṭṭhena sammāvāyāmo micchāvāyāmā virajjati.\nUpaṭṭhānaṭṭhena sammāsati micchāsatiyā virajjati.\nAvikkhepaṭṭhena sammāsamādhi micchāsamādhito virajjati.\nTadanuvattakakilesehi ca khandhehi ca virajjati.\nBahiddhā ca sabbanimittehi virajjati.\nVirāgo virāgārammaṇo virāgagocaro virāge samudāgato virāge ṭhito virāge patiṭṭhito."}},{"id":"ps2.5:4","sourceIds":["ps2.5:4.1","ps2.5:4.2","ps2.5:4.3","ps2.5:4.4","ps2.5:4.5","ps2.5:4.6","ps2.5:4.7"],"kind":"text","text":{"pi":"Virāgoti dve virāgā—\nnibbānañca virāgo, ye ca nibbānārammaṇatājātā dhammā sabbe virāgā hontīti—virāgā.\nSahajātāni sattaṅgāni virāgaṁ gacchantīti—virāgo maggo.\nEtena maggena buddhā ca sāvakā ca agataṁ disaṁ nibbānaṁ gacchantīti—\naṭṭhaṅgiko maggo.\nYāvatā puthusamaṇabrāhmaṇānaṁ parappavādānaṁ maggā, ayameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti—\nmaggānaṁ aṭṭhaṅgiko seṭṭho."}},{"id":"ps2.5:5","sourceIds":["ps2.5:5.1","ps2.5:5.2","ps2.5:5.3"],"kind":"text","text":{"pi":"Sakadāgāmimaggakkhaṇe dassanaṭṭhena sammādiṭṭhi …pe…\navikkhepaṭṭhena sammāsamādhi oḷārikā kāmarāgasaññojanā paṭighasaññojanā oḷārikā kāmarāgānusayā paṭighānusayā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati.\nVirāgo virāgārammaṇo virāgagocaro virāge samudāgato virāge ṭhito virāge patiṭṭhito."}},{"id":"ps2.5:6","sourceIds":["ps2.5:6.1","ps2.5:6.2","ps2.5:6.3","ps2.5:6.4","ps2.5:6.5","ps2.5:6.6","ps2.5:6.7","ps2.5:6.8"],"kind":"text","text":{"pi":"Virāgoti dve virāgā—\nnibbānañca virāgo, ye ca nibbānārammaṇatājātā dhammā sabbe virāgā hontīti—virāgā.\nSahajātāni sattaṅgāni virāgaṁ gacchantīti—virāgo maggo.\nEtena maggena buddhā ca sāvakā ca agataṁ disaṁ nibbānaṁ gacchantīti—\naṭṭhaṅgiko maggo.\nYāvatā puthusamaṇabrāhmaṇānaṁ parappavādānaṁ maggā.\nAyameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti—\nmaggānaṁ aṭṭhaṅgiko seṭṭho."}},{"id":"ps2.5:7","sourceIds":["ps2.5:7.1","ps2.5:7.2","ps2.5:7.3","ps2.5:7.4"],"kind":"text","text":{"pi":"Anāgāmimaggakkhaṇe dassanaṭṭhena sammādiṭṭhi …pe…\navikkhepaṭṭhena sammāsamādhi anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati.\nVirāgo virāgārammaṇo …pe…\nmaggānaṁ aṭṭhaṅgiko seṭṭho."}},{"id":"ps2.5:8","sourceIds":["ps2.5:8.1","ps2.5:8.2"],"kind":"text","text":{"pi":"Arahattamaggakkhaṇe dassanaṭṭhena sammādiṭṭhi …pe…\navikkhepaṭṭhena sammāsamādhi rūparāgā arūparāgā mānā uddhaccā avijjāya mānānusayā bhavarāgānusayā avijjānusayā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati virāgo virāgārammaṇo virāgagocaro virāge samudāgato virāge ṭhito virāge patiṭṭhito."}},{"id":"ps2.5:9","sourceIds":["ps2.5:9.1","ps2.5:9.2","ps2.5:9.3","ps2.5:9.4","ps2.5:9.5","ps2.5:9.6","ps2.5:9.7","ps2.5:9.8"],"kind":"text","text":{"pi":"Virāgoti dve virāgā—\nnibbānañca virāgo, ye ca nibbānārammaṇatājātā dhammā sabbe virāgā hontīti—virāgā.\nSahajātāni sattaṅgāni virāgaṁ gacchantīti—virāgo maggo.\nEtena maggena buddhā ca sāvakā ca agataṁ disaṁ nibbānaṁ gacchantīti—\naṭṭhaṅgiko maggo.\nYāvatā puthusamaṇabrāhmaṇānaṁ parappavādānaṁ maggā.\nAyameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti—\nmaggānaṁ aṭṭhaṅgiko seṭṭho."}},{"id":"ps2.5:10","sourceIds":["ps2.5:10.1","ps2.5:10.2","ps2.5:10.3","ps2.5:10.4","ps2.5:10.5","ps2.5:10.6","ps2.5:10.7","ps2.5:10.8","ps2.5:10.9","ps2.5:10.10","ps2.5:10.11","ps2.5:10.12","ps2.5:10.13","ps2.5:10.14","ps2.5:10.15","ps2.5:10.16","ps2.5:10.17","ps2.5:10.18","ps2.5:10.19","ps2.5:10.20","ps2.5:10.21","ps2.5:10.22","ps2.5:10.23","ps2.5:10.24","ps2.5:10.25","ps2.5:10.26","ps2.5:10.27","ps2.5:10.28","ps2.5:10.29","ps2.5:10.30","ps2.5:10.31","ps2.5:10.32","ps2.5:10.33","ps2.5:10.34","ps2.5:10.35","ps2.5:10.36","ps2.5:10.37","ps2.5:10.38","ps2.5:10.39","ps2.5:10.40","ps2.5:10.41","ps2.5:10.42","ps2.5:10.43","ps2.5:10.44","ps2.5:10.45","ps2.5:10.46","ps2.5:10.47","ps2.5:10.48","ps2.5:10.49","ps2.5:10.50","ps2.5:10.51","ps2.5:10.52","ps2.5:10.53"],"kind":"text","text":{"pi":"Dassanavirāgo sammādiṭṭhi.\nAbhiniropanavirāgo sammāsaṅkappo.\nPariggahavirāgo sammāvācā.\nSamuṭṭhānavirāgo sammākammanto.\nVodānavirāgo sammāājīvo.\nPaggahavirāgo sammāvāyāmo.\nUpaṭṭhānavirāgo sammāsati.\nAvikkhepavirāgo sammāsamādhi.\nUpaṭṭhānavirāgo satisambojjhaṅgo.\nPavicayavirāgo dhammavicayasambojjhaṅgo.\nPaggahavirāgo vīriyasambojjhaṅgo.\nPharaṇavirāgo pītisambojjhaṅgo.\nUpasamavirāgo passaddhisambojjhaṅgo.\nAvikkhepavirāgo samādhisambojjhaṅgo.\nPaṭisaṅkhānavirāgo upekkhāsambojjhaṅgo.\nAssaddhiye akampiyavirāgo saddhābalaṁ.\nKosajje akampiyavirāgo vīriyabalaṁ.\nPamāde akampiyavirāgo satibalaṁ.\nUddhacce akampiyavirāgo samādhibalaṁ.\nAvijjāya akampiyavirāgo paññābalaṁ.\nAdhimokkhavirāgo saddhindriyaṁ.\nPaggahavirāgo vīriyindriyaṁ.\nUpaṭṭhānavirāgo satindriyaṁ.\nAvikkhepavirāgo samādhindriyaṁ.\nDassanavirāgo paññindriyaṁ.\nĀdhipateyyaṭṭhena indriyāni virāgo.\nAkampiyaṭṭhena balaṁ virāgo.\nNiyyānaṭṭhena bojjhaṅgā virāgo.\nHetuṭṭhena maggo virāgo.\nUpaṭṭhānaṭṭhena satipaṭṭhānā virāgo.\nPadahanaṭṭhena sammappadhānā virāgo.\nIjjhanaṭṭhena iddhipādā virāgo.\nTathaṭṭhena saccā virāgo.\nAvikkhepaṭṭhena samatho virāgo.\nAnupassanaṭṭhena vipassanā virāgo.\nEkarasaṭṭhena samathavipassanā virāgo.\nAnativattanaṭṭhena yuganaddhaṁ virāgo.\nSaṁvaraṭṭhena sīlavisuddhi virāgo.\nAvikkhepaṭṭhena cittavisuddhi virāgo.\nDassanaṭṭhena diṭṭhivisuddhi virāgo.\nVimuttaṭṭhena vimokkho virāgo.\nPaṭivedhaṭṭhena vijjā virāgo.\nPariccāgaṭṭhena vimutti virāgo.\nSamucchedaṭṭhena khaye ñāṇaṁ virāgo.\nChando mūlaṭṭhena virāgo.\nManasikāro samuṭṭhānaṭṭhena virāgo.\nPhasso samodhānaṭṭhena virāgo.\nVedanā samosaraṇaṭṭhena virāgo.\nSamādhi pamukhaṭṭhena virāgo.\nSati ādhipateyyaṭṭhena virāgo.\nPaññā taduttaraṭṭhena virāgo.\nVimutti sāraṭṭhena virāgo.\nAmatogadhaṁ nibbānaṁ pariyosānaṭṭhena maggo."}},{"id":"ps2.5:11","sourceIds":["ps2.5:11.1","ps2.5:11.2","ps2.5:11.3"],"kind":"text","text":{"pi":"Dassanamaggo sammādiṭṭhi, abhiniropanamaggo sammāsaṅkappo …pe…\namatogadhaṁ nibbānaṁ pariyosānaṭṭhena maggo.\nEvaṁ virāgo maggo."}},{"id":"ps2.5:12","sourceIds":["ps2.5:12.1","ps2.5:12.2","ps2.5:12.3","ps2.5:12.4","ps2.5:12.5"],"kind":"text","text":{"pi":"Kathaṁ vimutti phalaṁ?\nSotāpattiphalakkhaṇe dassanaṭṭhena sammādiṭṭhi micchādiṭṭhiyā vimuttā hoti, tadanuvattakakilesehi ca khandhehi ca vimuttā hoti, bahiddhā ca sabbanimittehi vimuttā hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā.\nVimuttīti dve muttiyo—\nnibbānañca vimutti, ye ca nibbānārammaṇatājātā dhammā sabbe ca vimuttā hontīti—\nvimutti phalaṁ."}},{"id":"ps2.5:13","sourceIds":["ps2.5:13.1","ps2.5:13.2","ps2.5:13.3","ps2.5:13.4"],"kind":"text","text":{"pi":"Abhiniropanaṭṭhena sammāsaṅkappo micchāsaṅkappā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā.\nVimuttīti dve vimuttiyo—\nnibbānañca vimutti, ye ca nibbānārammaṇatājātā dhammā sabbe vimuttā hontīti—\nvimutti phalaṁ."}},{"id":"ps2.5:14","sourceIds":["ps2.5:14.1","ps2.5:14.2","ps2.5:14.3","ps2.5:14.4"],"kind":"text","text":{"pi":"Pariggahaṭṭhena sammāvācā micchāvācāya vimuttā hoti, samuṭṭhānaṭṭhena sammākammanto micchākammantā vimutto hoti, vodānaṭṭhena sammāājīvo micchāājīvā vimutto hoti, paggahaṭṭhena sammāvāyāmo micchāvāyāmā vimutto hoti, upaṭṭhānaṭṭhena sammāsati micchāsatiyā vimuttā hoti, avikkhepaṭṭhena sammāsamādhi micchāsamādhito vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā.\nVimuttīti dve vimuttiyo—\nnibbānañca vimutti, ye ca nibbānārammaṇatājātā dhammā sabbe vimuttā hontīti—\nvimutti phalaṁ."}},{"id":"ps2.5:15","sourceIds":["ps2.5:15.1","ps2.5:15.2","ps2.5:15.3","ps2.5:15.4","ps2.5:15.5"],"kind":"text","text":{"pi":"Sakadāgāmiphalakkhaṇe dassanaṭṭhena sammādiṭṭhi …pe…\navikkhepaṭṭhena sammāsamādhi oḷārikā kāmarāgasaññojanā paṭighasaññojanā oḷārikā kāmarāgānusayā paṭighānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā.\nVimuttīti dve vimuttiyo—\nnibbānañca vimutti, ye ca nibbānārammaṇatājātā dhammā sabbe vimuttā hontīti—\nvimutti phalaṁ."}},{"id":"ps2.5:16","sourceIds":["ps2.5:16.1","ps2.5:16.2"],"kind":"text","text":{"pi":"Anāgāmiphalakkhaṇe dassanaṭṭhena sammādiṭṭhi …pe…\navikkhepaṭṭhena sammāsamādhi anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā …pe…."}},{"id":"ps2.5:17","sourceIds":["ps2.5:17.1","ps2.5:17.2","ps2.5:17.3","ps2.5:17.4","ps2.5:17.5"],"kind":"text","text":{"pi":"Arahattaphalakkhaṇe dassanaṭṭhena sammādiṭṭhi …pe…\navikkhepaṭṭhena sammāsamādhi rūparāgā arūparāgā mānā uddhaccā avijjāya mānānusayā bhavarāgānusayā avijjānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā.\nVimuttīti dve vimuttiyo—\nnibbānañca vimutti, ye ca nibbānārammaṇatājātā dhammā sabbe vimuttā hontīti—\nvimutti phalaṁ."}},{"id":"ps2.5:18","sourceIds":["ps2.5:18.1","ps2.5:18.2","ps2.5:18.3","ps2.5:18.4","ps2.5:18.5","ps2.5:18.6"],"kind":"text","text":{"pi":"Dassanavimutti sammādiṭṭhi …pe…\navikkhepavimutti sammāsamādhi, upaṭṭhānavimutti satisambojjhaṅgo, paṭisaṅkhānavimutti upekkhāsambojjhaṅgo.\nAssaddhiye akampiyavimutti saddhābalaṁ …pe…\navijjāya akampiyavimutti paññābalaṁ.\nAdhimokkhavimutti saddhindriyaṁ …pe…\ndassanavimutti paññindriyaṁ."}},{"id":"ps2.5:19","sourceIds":["ps2.5:19.1","ps2.5:19.2","ps2.5:19.3","ps2.5:19.4","ps2.5:19.5"],"kind":"text","text":{"pi":"Ādhipateyyaṭṭhena indriyā vimutti.\nAkampiyaṭṭhena balā vimutti, niyyānaṭṭhena bojjhaṅgā vimutti, hetuṭṭhena maggo vimutti, upaṭṭhānaṭṭhena satipaṭṭhānā vimutti, padahanaṭṭhena sammappadhānā vimutti, ijjhanaṭṭhena iddhipādā vimutti, tathaṭṭhena saccā vimutti, avikkhepaṭṭhena samatho vimutti, anupassanaṭṭhena vipassanā vimutti, ekarasaṭṭhena samathavipassanā vimutti, anativattanaṭṭhena yuganaddhaṁ vimutti, saṁvaraṭṭhena sīlavisuddhi vimutti, avikkhepaṭṭhena cittavisuddhi vimutti, dassanaṭṭhena diṭṭhivisuddhi vimutti, vimuttaṭṭhena vimokkho vimutti, paṭivedhaṭṭhena vijjā vimutti, pariccāgaṭṭhena vimutti vimutti, paṭippassaddhiyaṭṭhena anuppāde ñāṇaṁ vimutti, chando mūlaṭṭhena vimutti, manasikāro samuṭṭhānaṭṭhena vimutti, phasso samodhānaṭṭhena vimutti, vedanā samosaraṇaṭṭhena vimutti, samādhi pamukhaṭṭhena vimutti, sati ādhipateyyaṭṭhena vimutti, paññā taduttaraṭṭhena vimutti, vimutti sāraṭṭhena vimutti, amatogadhaṁ nibbānaṁ pariyosānaṭṭhena vimutti.\nEvaṁ vimutti phalaṁ.\nEvaṁ virāgo maggo, vimutti phalanti.\nVirāgakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps2.5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}