{"id":"ps2.7","title":"2.7. Dhammacakkakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps2.7","title":"2.7. Dhammacakkakathā","units":[{"id":"ps2.7:0","sourceIds":["ps2.7:0.1","ps2.7:0.2","ps2.7:0.3"],"kind":"text","text":{"pi":"Paṭisambhidāmagga\n2 Yuganaddhavagga\n2.7. Dhammacakkakathā"}},{"id":"ps2.7:1","sourceIds":["ps2.7:1.0","ps2.7:1.1","ps2.7:1.2"],"kind":"text","text":{"pi":"2.7.1. Saccavāra\nEkaṁ samayaṁ bhagavā bārāṇasiyaṁ viharati …pe…\niti hidaṁ āyasmato koṇḍaññassa “aññāsikoṇḍañño” tveva nāmaṁ ahosi."}},{"id":"ps2.7:2","sourceIds":["ps2.7:2.1"],"kind":"text","text":{"pi":"“Idaṁ dukkhaṁ ariyasaccan”ti pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi."}},{"id":"ps2.7:3","sourceIds":["ps2.7:3.1","ps2.7:3.2","ps2.7:3.3","ps2.7:3.4","ps2.7:3.5","ps2.7:3.6","ps2.7:3.7","ps2.7:3.8","ps2.7:3.9","ps2.7:3.10","ps2.7:3.11","ps2.7:3.12","ps2.7:3.13","ps2.7:3.14","ps2.7:3.15","ps2.7:3.16","ps2.7:3.17","ps2.7:3.18","ps2.7:3.19","ps2.7:3.20"],"kind":"text","text":{"pi":"Cakkhuṁ udapādīti—\nkenaṭṭhena?\nÑāṇaṁ udapādīti—\nkenaṭṭhena?\nPaññā udapādīti—\nkenaṭṭhena?\nVijjā udapādīti—\nkenaṭṭhena?\nĀloko udapādīti—\nkenaṭṭhena?\nCakkhuṁ udapādīti—\ndassanaṭṭhena.\nÑāṇaṁ udapādīti—\nñātaṭṭhena.\nPaññā udapādīti—\npajānanaṭṭhena.\nVijjā udapādīti—\npaṭivedhaṭṭhena.\nĀloko udapādīti—\nobhāsaṭṭhena."}},{"id":"ps2.7:4","sourceIds":["ps2.7:4.1","ps2.7:4.2","ps2.7:4.3","ps2.7:4.4","ps2.7:4.5","ps2.7:4.6"],"kind":"text","text":{"pi":"Cakkhuṁ dhammo, dassanaṭṭho attho.\nÑāṇaṁ dhammo, ñātaṭṭho attho.\nPaññā dhammo, pajānanaṭṭho attho.\nVijjā dhammo, paṭivedhaṭṭho attho.\nĀloko dhammo, obhāsaṭṭho attho.\nIme pañca dhammā pañca atthā dukkhavatthukā saccavatthukā saccārammaṇā saccagocarā saccasaṅgahitā saccapariyāpannā sacce samudāgatā sacce ṭhitā sacce patiṭṭhitā."}},{"id":"ps2.7:5","sourceIds":["ps2.7:5.1","ps2.7:5.2","ps2.7:5.3","ps2.7:5.4","ps2.7:5.5","ps2.7:5.6","ps2.7:5.7","ps2.7:5.8","ps2.7:5.9","ps2.7:5.10","ps2.7:5.11","ps2.7:5.12","ps2.7:5.13","ps2.7:5.14","ps2.7:5.15","ps2.7:5.16","ps2.7:5.17","ps2.7:5.18","ps2.7:5.19","ps2.7:5.20","ps2.7:5.21","ps2.7:5.22","ps2.7:5.23"],"kind":"text","text":{"pi":"Dhammacakkanti kenaṭṭhena dhammacakkaṁ?\nDhammañca pavatteti cakkañcāti—dhammacakkaṁ.\nCakkañca pavatteti dhammañcāti—dhammacakkaṁ.\nDhammena pavattetīti—dhammacakkaṁ.\nDhammacariyāya pavattetīti—dhammacakkaṁ.\nDhamme ṭhito pavattetīti—dhammacakkaṁ.\nDhamme patiṭṭhito pavattetīti—dhammacakkaṁ.\nDhamme patiṭṭhāpento pavattetīti—dhammacakkaṁ.\nDhamme vasippatto pavattetīti—dhammacakkaṁ.\nDhamme vasiṁ pāpento pavattetīti—dhammacakkaṁ.\nDhamme pāramippatto pavattetīti—dhammacakkaṁ.\nDhamme pāramiṁ pāpento pavattetīti—dhammacakkaṁ.\nDhamme vesārajjappatto pavattetīti—dhammacakkaṁ.\nDhamme vesārajjaṁ pāpento pavattetīti—dhammacakkaṁ.\nDhammaṁ sakkaronto pavattetīti—dhammacakkaṁ.\nDhammaṁ garuṁ karonto pavattetīti—dhammacakkaṁ.\nDhammaṁ mānento pavattetīti—dhammacakkaṁ.\nDhammaṁ pūjento pavattetīti—dhammacakkaṁ.\nDhammaṁ apacāyamāno pavattetīti—dhammacakkaṁ.\nDhammaddhajo pavattetīti—dhammacakkaṁ.\nDhammaketu pavattetīti—dhammacakkaṁ.\nDhammādhipateyyo pavattetīti—dhammacakkaṁ.\nTaṁ kho pana dhammacakkaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasminti—dhammacakkaṁ."}},{"id":"ps2.7:6","sourceIds":["ps2.7:6.1","ps2.7:6.2","ps2.7:6.3","ps2.7:6.4","ps2.7:6.5","ps2.7:6.6","ps2.7:6.7","ps2.7:6.8","ps2.7:6.9","ps2.7:6.10","ps2.7:6.11","ps2.7:6.12","ps2.7:6.13","ps2.7:6.14","ps2.7:6.15","ps2.7:6.16","ps2.7:6.17","ps2.7:6.18","ps2.7:6.19","ps2.7:6.20","ps2.7:6.21","ps2.7:6.22","ps2.7:6.23","ps2.7:6.24","ps2.7:6.25"],"kind":"text","text":{"pi":"Saddhindriyaṁ dhammo taṁ dhammaṁ pavattetīti—dhammacakkaṁ.\nVīriyindriyaṁ dhammo taṁ dhammaṁ pavattetīti—dhammacakkaṁ.\nSatindriyaṁ dhammo taṁ dhammaṁ pavattetīti—dhammacakkaṁ.\nSamādhindriyaṁ dhammo taṁ dhammaṁ pavattetīti—dhammacakkaṁ.\nPaññindriyaṁ dhammo taṁ dhammaṁ pavattetīti—dhammacakkaṁ.\nSaddhābalaṁ dhammo taṁ dhammaṁ pavattetīti—dhammacakkaṁ.\nVīriyabalaṁ dhammo taṁ dhammaṁ pavattetīti—dhammacakkaṁ.\nSatibalaṁ dhammo taṁ dhammaṁ pavattetīti—dhammacakkaṁ.\nSamādhibalaṁ dhammo taṁ dhammaṁ pavattetīti—dhammacakkaṁ.\nPaññābalaṁ dhammo taṁ dhammaṁ pavattetīti—dhammacakkaṁ.\nSatisambojjhaṅgo dhammo taṁ dhammaṁ pavattetīti—dhammacakkaṁ.\nDhammavicayasambojjhaṅgo dhammo taṁ dhammaṁ pavattetīti—dhammacakkaṁ.\nVīriyasambojjhaṅgo dhammo taṁ dhammaṁ pavattetīti—dhammacakkaṁ.\nPītisambojjhaṅgo dhammo taṁ dhammaṁ pavattetīti—dhammacakkaṁ.\nPassaddhisambojjhaṅgo dhammo taṁ dhammaṁ pavattetīti—dhammacakkaṁ.\nSamādhisambojjhaṅgo dhammo taṁ dhammaṁ pavattetīti—dhammacakkaṁ.\nUpekkhāsambojjhaṅgo dhammo taṁ dhammaṁ pavattetīti—dhammacakkaṁ.\nSammādiṭṭhi dhammo taṁ dhammaṁ pavattetīti—dhammacakkaṁ.\nSammāsaṅkappo dhammo taṁ dhammaṁ pavattetīti—dhammacakkaṁ.\nSammāvācā dhammo taṁ dhammaṁ pavattetīti—dhammacakkaṁ.\nSammākammanto dhammo taṁ dhammaṁ pavattetīti—dhammacakkaṁ.\nSammāājīvo dhammo taṁ dhammaṁ pavattetīti—dhammacakkaṁ.\nSammāvāyāmo dhammo taṁ dhammaṁ pavattetīti—dhammacakkaṁ.\nSammāsati dhammo taṁ dhammaṁ pavattetīti—dhammacakkaṁ.\nSammāsamādhi dhammo taṁ dhammaṁ pavattetīti—dhammacakkaṁ."}},{"id":"ps2.7:7","sourceIds":["ps2.7:7.1","ps2.7:7.2","ps2.7:7.3","ps2.7:7.4","ps2.7:7.5","ps2.7:7.6","ps2.7:7.7","ps2.7:7.8","ps2.7:7.9","ps2.7:7.10","ps2.7:7.11","ps2.7:7.12","ps2.7:7.13","ps2.7:7.14","ps2.7:7.15","ps2.7:7.16","ps2.7:7.17","ps2.7:7.18","ps2.7:7.19","ps2.7:7.20","ps2.7:7.21","ps2.7:7.22","ps2.7:7.23","ps2.7:7.24","ps2.7:7.25","ps2.7:7.26","ps2.7:7.27","ps2.7:7.28","ps2.7:7.29"],"kind":"text","text":{"pi":"Ādhipateyyaṭṭhena indriyaṁ dhammo taṁ dhammaṁ pavattetīti—dhammacakkaṁ.\nAkampiyaṭṭhena balaṁ dhammo taṁ dhammaṁ pavattetīti—dhammacakkaṁ.\nNiyyānikaṭṭhena bojjhaṅgo dhammo taṁ dhammaṁ pavattetīti—dhammacakkaṁ.\nHetuṭṭhena maggo dhammo taṁ dhammaṁ pavattetīti—dhammacakkaṁ.\nUpaṭṭhānaṭṭhena satipaṭṭhānā dhammo taṁ dhammaṁ pavattetīti—dhammacakkaṁ.\nPadahanaṭṭhena sammappadhānā dhammo taṁ dhammaṁ pavattetīti—dhammacakkaṁ.\nIjjhanaṭṭhena iddhipādā dhammo taṁ dhammaṁ pavattetīti—dhammacakkaṁ.\nTathaṭṭhena saccā dhammo taṁ dhammaṁ pavattetīti—dhammacakkaṁ.\nAvikkhepaṭṭhena samatho dhammo taṁ dhammaṁ pavattetīti—dhammacakkaṁ.\nAnupassanaṭṭhena vipassanā dhammo taṁ dhammaṁ pavattetīti—dhammacakkaṁ.\nEkarasaṭṭhena samathavipassanā dhammo taṁ dhammaṁ pavattetīti—dhammacakkaṁ.\nAnativattanaṭṭhena yuganaddhaṁ dhammo taṁ dhammaṁ pavattetīti—dhammacakkaṁ.\nSaṁvaraṭṭhena sīlavisuddhi dhammo taṁ dhammaṁ pavattetīti—dhammacakkaṁ.\nAvikkhepaṭṭhena cittavisuddhi dhammo taṁ dhammaṁ pavattetīti—dhammacakkaṁ.\nDassanaṭṭhena diṭṭhivisuddhi dhammo taṁ dhammaṁ pavattetīti—dhammacakkaṁ.\nMuttaṭṭhena vimokkho dhammo taṁ dhammaṁ pavattetīti—dhammacakkaṁ.\nPaṭivedhaṭṭhena vijjā dhammo taṁ dhammaṁ pavattetīti—dhammacakkaṁ.\nPariccāgaṭṭhena vimutti dhammo taṁ dhammaṁ pavattetīti—dhammacakkaṁ.\nSamucchedaṭṭhena khaye ñāṇaṁ dhammo taṁ dhammaṁ pavattetīti—dhammacakkaṁ.\nPaṭippassaddhaṭṭhena anuppāde ñāṇaṁ dhammo taṁ dhammaṁ pavattetīti—dhammacakkaṁ.\nChando mūlaṭṭhena dhammo taṁ dhammaṁ pavattetīti—dhammacakkaṁ.\nManasikāro samuṭṭhānaṭṭhena dhammo taṁ dhammaṁ pavattetīti—dhammacakkaṁ.\nPhasso samodhānaṭṭhena dhammo taṁ dhammaṁ pavattetīti—dhammacakkaṁ.\nVedanā samosaraṇaṭṭhena dhammo taṁ dhammaṁ pavattetīti—dhammacakkaṁ.\nSamādhi pamukhaṭṭhena dhammo taṁ dhammaṁ pavattetīti—dhammacakkaṁ.\nSati ādhipateyyaṭṭhena dhammo taṁ dhammaṁ pavattetīti—dhammacakkaṁ.\nPaññā taduttaraṭṭhena dhammo taṁ dhammaṁ pavattetīti—dhammacakkaṁ.\nVimutti sāraṭṭhena dhammo taṁ dhammaṁ pavattetīti—dhammacakkaṁ.\nAmatogadhaṁ nibbānaṁ pariyosānaṭṭhena dhammo taṁ dhammaṁ pavattetīti—dhammacakkaṁ."}},{"id":"ps2.7:8","sourceIds":["ps2.7:8.1","ps2.7:8.2","ps2.7:8.3"],"kind":"text","text":{"pi":"“Taṁ kho panidaṁ dukkhaṁ ariyasaccaṁ pariññeyyan”ti …pe…\npariññātanti pubbe ananussutesu dhammesu cakkhuṁ udapādi …pe…\nāloko udapādi."}},{"id":"ps2.7:9","sourceIds":["ps2.7:9.1","ps2.7:9.2","ps2.7:9.3","ps2.7:9.4","ps2.7:9.5","ps2.7:9.6","ps2.7:9.7","ps2.7:9.8","ps2.7:9.9","ps2.7:9.10","ps2.7:9.11"],"kind":"text","text":{"pi":"Cakkhuṁ udapādīti—\nkenaṭṭhena …pe…\nāloko udapādīti—\nkenaṭṭhena?\nCakkhuṁ udapādīti—\ndassanaṭṭhena …pe…\nāloko udapādīti—\nobhāsaṭṭhena.\nCakkhuṁ dhammo, dassanaṭṭho attho …pe…\nāloko dhammo, obhāsaṭṭho attho.\nIme pañca dhammā pañca atthā dukkhavatthukā saccavatthukā saccārammaṇā saccagocarā saccasaṅgahitā saccapariyāpannā sacce samudāgatā sacce ṭhitā sacce patiṭṭhitā."}},{"id":"ps2.7:10","sourceIds":["ps2.7:10.1","ps2.7:10.2","ps2.7:10.3","ps2.7:10.4","ps2.7:10.5","ps2.7:10.6","ps2.7:10.7","ps2.7:10.8"],"kind":"text","text":{"pi":"Dhammacakkanti kenaṭṭhena dhammacakkaṁ?\nDhammañca pavatteti cakkañcāti—dhammacakkaṁ.\nCakkañca pavatteti dhammañcāti—dhammacakkaṁ.\nDhammena pavattetīti—dhammacakkaṁ.\nDhammacariyāya pavattetīti—dhammacakkaṁ.\nDhamme ṭhito pavattetīti—dhammacakkaṁ.\nDhamme patiṭṭhito pavattetīti—dhammacakkaṁ …pe…\namatogadhaṁ nibbānaṁ pariyosānaṭṭhena dhammo taṁ dhammaṁ pavattetīti—dhammacakkaṁ."}},{"id":"ps2.7:11","sourceIds":["ps2.7:11.1","ps2.7:11.2","ps2.7:11.3","ps2.7:11.4","ps2.7:11.5"],"kind":"text","text":{"pi":"“Idaṁ dukkhasamudayaṁ ariyasaccan”ti pubbe ananussutesu dhammesu cakkhuṁ udapādi …pe…\nāloko udapādi …pe…\n“taṁ kho panidaṁ dukkhasamudayaṁ ariyasaccaṁ pahātabban”ti …pe…\n“pahīnan”ti pubbe ananussutesu dhammesu cakkhuṁ udapādi …pe…\nāloko udapādi."}},{"id":"ps2.7:12","sourceIds":["ps2.7:12.1","ps2.7:12.2","ps2.7:12.3","ps2.7:12.4","ps2.7:12.5","ps2.7:12.6","ps2.7:12.7","ps2.7:12.8"],"kind":"text","text":{"pi":"Cakkhuṁ udapādīti—\nkenaṭṭhena …pe…\nāloko udapādīti—\nkenaṭṭhena?\nCakkhuṁ udapādīti—\ndassanaṭṭhena …pe…\nāloko udapādīti—\nobhāsaṭṭhena."}},{"id":"ps2.7:13","sourceIds":["ps2.7:13.1","ps2.7:13.2","ps2.7:13.3","ps2.7:13.4","ps2.7:13.5"],"kind":"text","text":{"pi":"Cakkhuṁ dhammo, dassanaṭṭho attho …pe…\nāloko dhammo, obhāsaṭṭho attho.\nIme pañca dhammā pañca atthā samudayavatthukā saccavatthukā …pe…\nnirodhavatthukā saccavatthukā …pe…\nmaggavatthukā saccavatthukā saccārammaṇā saccagocarā saccasaṅgahitā saccapariyāpannā sacce samudāgatā sacce ṭhitā sacce patiṭṭhitā."}},{"id":"ps2.7:14","sourceIds":["ps2.7:14.1","ps2.7:14.2","ps2.7:14.3","ps2.7:14.4","ps2.7:14.5","ps2.7:14.6","ps2.7:14.7","ps2.7:14.8"],"kind":"text","text":{"pi":"Dhammacakkanti kenaṭṭhena dhammacakkaṁ?\nDhammañca pavatteti cakkañcāti—dhammacakkaṁ.\nCakkañca pavatteti dhammañcāti—dhammacakkaṁ.\nDhammena pavattetīti—dhammacakkaṁ.\nDhammacariyāya pavattetīti—dhammacakkaṁ.\nDhamme ṭhito pavattetīti—dhammacakkaṁ.\nDhamme patiṭṭhito pavattetīti—dhammacakkaṁ …pe…\namatogadhaṁ nibbānaṁ pariyosānaṭṭhena dhammo taṁ dhammaṁ pavattetīti—dhammacakkaṁ."}},{"id":"ps2.7:15","sourceIds":["ps2.7:15.0","ps2.7:15.1","ps2.7:15.2","ps2.7:15.3","ps2.7:15.4","ps2.7:15.5"],"kind":"text","text":{"pi":"2.7.2. Satipaṭṭhānavāra\n“‘Ayaṁ kāye kāyānupassanā’ti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi.\nSā kho panāyaṁ kāye kāyānupassanā bhāvetabbāti me, bhikkhave …pe…\nbhāvitāti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi."}},{"id":"ps2.7:16","sourceIds":["ps2.7:16.1","ps2.7:16.2","ps2.7:16.3","ps2.7:16.4","ps2.7:16.5","ps2.7:16.6","ps2.7:16.7"],"kind":"text","text":{"pi":"Ayaṁ vedanāsu …pe…\nayaṁ citte …\nayaṁ dhammesu dhammānupassanāti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi.\nSā kho panāyaṁ dhammesu dhammānupassanā bhāvetabbāti me, bhikkhave …pe…\nbhāvitāti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi”."}},{"id":"ps2.7:17","sourceIds":["ps2.7:17.1","ps2.7:17.2","ps2.7:17.3","ps2.7:17.4","ps2.7:17.5"],"kind":"text","text":{"pi":"“Ayaṁ kāye kāyānupassanā”ti pubbe ananussutesu dhammesu cakkhuṁ udapādi …pe…\nāloko udapādi …pe…\nsā kho panāyaṁ kāye kāyānupassanā bhāvetabbāti …pe…\nbhāvitāti pubbe ananussutesu dhammesu cakkhuṁ udapādi …pe…\nāloko udapādi."}},{"id":"ps2.7:18","sourceIds":["ps2.7:18.1","ps2.7:18.2","ps2.7:18.3","ps2.7:18.4","ps2.7:18.5","ps2.7:18.6","ps2.7:18.7","ps2.7:18.8"],"kind":"text","text":{"pi":"Cakkhuṁ udapādīti—\nkenaṭṭhena …pe…\nāloko udapādīti—\nkenaṭṭhena?\nCakkhuṁ udapādīti—\ndassanaṭṭhena …pe…\nāloko udapādīti—\nobhāsaṭṭhena."}},{"id":"ps2.7:19","sourceIds":["ps2.7:19.1","ps2.7:19.2","ps2.7:19.3","ps2.7:19.4","ps2.7:19.5","ps2.7:19.6"],"kind":"text","text":{"pi":"Cakkhuṁ dhammo, dassanaṭṭho attho …pe…\nāloko dhammo, obhāsaṭṭho attho.\nIme pañca dhammā pañca atthā kāyavatthukā satipaṭṭhānavatthukā …pe…\nvedanāvatthukā satipaṭṭhānavatthukā …\ncittavatthukā satipaṭṭhānavatthukā …\ndhammavatthukā satipaṭṭhānavatthukā satipaṭṭhānārammaṇā satipaṭṭhānagocarā satipaṭṭhānasaṅgahitā satipaṭṭhānapariyāpannā satipaṭṭhāne samudāgatā satipaṭṭhāne ṭhitā satipaṭṭhāne patiṭṭhitā."}},{"id":"ps2.7:20","sourceIds":["ps2.7:20.1","ps2.7:20.2","ps2.7:20.3","ps2.7:20.4","ps2.7:20.5","ps2.7:20.6","ps2.7:20.7","ps2.7:20.8"],"kind":"text","text":{"pi":"Dhammacakkanti kenaṭṭhena dhammacakkaṁ?\nDhammañca pavatteti cakkañcāti—dhammacakkaṁ.\nCakkañca pavatteti dhammañcāti—dhammacakkaṁ.\nDhammena pavattetīti—dhammacakkaṁ.\nDhammacariyāya pavattetīti—dhammacakkaṁ.\nDhamme ṭhito pavattetīti—dhammacakkaṁ.\nDhamme patiṭṭhito pavattetīti—dhammacakkaṁ …pe…\namatogadhaṁ nibbānaṁ pariyosānaṭṭhena dhammo taṁ dhammaṁ pavattetīti—dhammacakkaṁ."}},{"id":"ps2.7:21","sourceIds":["ps2.7:21.0","ps2.7:21.1","ps2.7:21.2","ps2.7:21.3","ps2.7:21.4","ps2.7:21.5"],"kind":"text","text":{"pi":"2.7.3. Iddhipādavāra\n“‘Ayaṁ chandasamādhipadhānasaṅkhārasamannāgato iddhipādo’ti me, bhikkhave pubbe ananussutesu dhammesu cakkhuṁ udapādi …pe…\nāloko udapādi.\n‘So kho panāyaṁ chandasamādhipadhānasaṅkhārasamannāgato iddhipādo bhāvetabbo’ti me, bhikkhave …pe…\nbhāvitoti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi."}},{"id":"ps2.7:22","sourceIds":["ps2.7:22.1","ps2.7:22.2","ps2.7:22.3","ps2.7:22.4","ps2.7:22.5","ps2.7:22.6","ps2.7:22.7"],"kind":"text","text":{"pi":"Ayaṁ vīriyasamādhi …pe…\nayaṁ cittasamādhi …pe…\nayaṁ vīmaṁsāsamādhipadhānasaṅkhārasamannāgato iddhipādoti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi.\nSo kho panāyaṁ vīmaṁsāsamādhipadhānasaṅkhārasamannāgato iddhipādo bhāvetabboti me, bhikkhave …pe…\nbhāvitoti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi”."}},{"id":"ps2.7:23","sourceIds":["ps2.7:23.1","ps2.7:23.2","ps2.7:23.3","ps2.7:23.4"],"kind":"text","text":{"pi":"“Ayaṁ chandasamādhipadhānasaṅkhārasamannāgato iddhipādo”ti pubbe ananussutesu dhammesu cakkhuṁ udapādi …pe…\nāloko udapādi …pe…\nso kho panāyaṁ chandasamādhipadhānasaṅkhārasamannāgato iddhipādo bhāvetabboti …pe…\nbhāvitoti pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi."}},{"id":"ps2.7:24","sourceIds":["ps2.7:24.1","ps2.7:24.2","ps2.7:24.3","ps2.7:24.4","ps2.7:24.5","ps2.7:24.6","ps2.7:24.7","ps2.7:24.8","ps2.7:24.9","ps2.7:24.10","ps2.7:24.11","ps2.7:24.12","ps2.7:24.13","ps2.7:24.14","ps2.7:24.15","ps2.7:24.16","ps2.7:24.17","ps2.7:24.18","ps2.7:24.19","ps2.7:24.20"],"kind":"text","text":{"pi":"Cakkhuṁ udapādīti—\nkenaṭṭhena?\nÑāṇaṁ udapādīti—\nkenaṭṭhena?\nPaññā udapādīti—\nkenaṭṭhena?\nVijjā udapādīti—\nkenaṭṭhena?\nĀloko udapādīti—\nkenaṭṭhena?\nCakkhuṁ udapādīti—\ndassanaṭṭhena.\nÑāṇaṁ udapādīti—\nñātaṭṭhena.\nPaññā udapādīti—\npajānanaṭṭhena.\nVijjā udapādīti—\npaṭivedhaṭṭhena.\nĀloko udapādīti—\nobhāsaṭṭhena."}},{"id":"ps2.7:25","sourceIds":["ps2.7:25.1","ps2.7:25.2","ps2.7:25.3","ps2.7:25.4","ps2.7:25.5","ps2.7:25.6"],"kind":"text","text":{"pi":"Cakkhuṁ dhammo, dassanaṭṭho attho.\nÑāṇaṁ dhammo, ñātaṭṭho attho.\nPaññā dhammo, pajānanaṭṭho attho.\nVijjā dhammo, paṭivedhaṭṭho attho.\nĀloko dhammo, obhāsaṭṭho attho.\nIme pañca dhammā pañca atthā chandavatthukā iddhipādavatthukā iddhipādārammaṇā iddhipādagocarā iddhipādasaṅgahitā iddhipādapariyāpannā iddhipāde samudāgatā iddhipāde ṭhitā iddhipāde patiṭṭhitā."}},{"id":"ps2.7:26","sourceIds":["ps2.7:26.1","ps2.7:26.2","ps2.7:26.3","ps2.7:26.4","ps2.7:26.5","ps2.7:26.6","ps2.7:26.7","ps2.7:26.8","ps2.7:26.9","ps2.7:26.10","ps2.7:26.11","ps2.7:26.12","ps2.7:26.13","ps2.7:26.14","ps2.7:26.15","ps2.7:26.16","ps2.7:26.17"],"kind":"text","text":{"pi":"Dhammacakkanti kenaṭṭhena dhammacakkaṁ?\nDhammañca pavatteti cakkañcāti—dhammacakkaṁ.\nCakkañca pavatteti dhammañcāti—dhammacakkaṁ.\nDhammena pavattetīti—dhammacakkaṁ.\nDhammacariyāya pavattetīti—dhammacakkaṁ.\nDhamme ṭhito pavattetīti—dhammacakkaṁ.\nDhamme patiṭṭhito pavattetīti—dhammacakkaṁ.\nDhamme patiṭṭhāpento pavattetīti—dhammacakkaṁ.\nDhamme vasippatto pavattetīti—dhammacakkaṁ.\nDhamme vasiṁ pāpento pavattetīti—dhammacakkaṁ.\nDhamme pāramippatto pavattetīti—dhammacakkaṁ.\nDhamme pāramiṁ pāpento pavattetīti—dhammacakkaṁ …pe…\ndhammaṁ apacāyamāno pavattetīti—dhammacakkaṁ.\nDhammaddhajo pavattetīti—dhammacakkaṁ.\nDhammaketu pavattetīti—dhammacakkaṁ.\nDhammādhipateyyo pavattetīti—dhammacakkaṁ.\nTaṁ kho pana dhammacakkaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasminti—dhammacakkaṁ."}},{"id":"ps2.7:27","sourceIds":["ps2.7:27.1","ps2.7:27.2","ps2.7:27.3","ps2.7:27.4"],"kind":"text","text":{"pi":"“Saddhindriyaṁ dhammo.\nTaṁ dhammaṁ pavattetī”ti—dhammacakkaṁ …pe…\namatogadhaṁ nibbānaṁ pariyosānaṭṭhena dhammo.\nTaṁ dhammaṁ pavattetīti—dhammacakkaṁ."}},{"id":"ps2.7:28","sourceIds":["ps2.7:28.1","ps2.7:28.2","ps2.7:28.3","ps2.7:28.4","ps2.7:28.5"],"kind":"text","text":{"pi":"Ayaṁ vīriyasamādhipadhānasaṅkhārasamannāgato iddhipādoti pubbe ananussutesu dhammesu cakkhuṁ udapādi …pe…\nāloko udapādi …pe…\nso kho panāyaṁ vīriyasamādhipadhānasaṅkhārasamannāgato iddhipādo bhāvetabboti …pe…\nbhāvitoti pubbe ananussutesu dhammesu cakkhuṁ udapādi …pe…\nāloko udapādi."}},{"id":"ps2.7:29","sourceIds":["ps2.7:29.1","ps2.7:29.2","ps2.7:29.3","ps2.7:29.4","ps2.7:29.5","ps2.7:29.6","ps2.7:29.7","ps2.7:29.8"],"kind":"text","text":{"pi":"Cakkhuṁ udapādīti—\nkenaṭṭhena …pe…\nāloko udapādīti—\nkenaṭṭhena?\nCakkhuṁ udapādīti—\ndassanaṭṭhena …pe…\nāloko udapādīti—\nobhāsaṭṭhena."}},{"id":"ps2.7:30","sourceIds":["ps2.7:30.1","ps2.7:30.2","ps2.7:30.3","ps2.7:30.4","ps2.7:30.5"],"kind":"text","text":{"pi":"Cakkhuṁ dhammo, dassanaṭṭho attho …pe…\nāloko dhammo, obhāsaṭṭho attho.\nIme pañca dhammā pañca atthā vīriyavatthukā iddhipādavatthukā …pe…\ncittavatthukā iddhipādavatthukā …\nvīmaṁsāvatthukā iddhipādavatthukā iddhipādārammaṇā iddhipādagocarā iddhipādasaṅgahitā iddhipādapariyāpannā iddhipāde samudāgatā iddhipāde ṭhitā iddhipāde patiṭṭhitā."}},{"id":"ps2.7:31","sourceIds":["ps2.7:31.1","ps2.7:31.2","ps2.7:31.3","ps2.7:31.4","ps2.7:31.5","ps2.7:31.6","ps2.7:31.7","ps2.7:31.8","ps2.7:31.9","ps2.7:31.10"],"kind":"text","text":{"pi":"Dhammacakkanti kenaṭṭhena dhammacakkaṁ?\nDhammañca pavatteti cakkañcāti—dhammacakkaṁ.\nCakkañca pavatteti dhammañcāti—dhammacakkaṁ.\nDhammena pavattetīti—dhammacakkaṁ.\nDhammacariyāya pavattetīti—dhammacakkaṁ.\nDhamme ṭhito pavattetīti—dhammacakkaṁ.\nDhamme patiṭṭhito pavattetīti—dhammacakkaṁ …pe…\namatogadhaṁ nibbānaṁ pariyosānaṭṭhena dhammo.\nTaṁ dhammaṁ pavattetīti—dhammacakkanti.\nDhammacakkakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps2.7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}