{"id":"ps3.1","title":"3.1. Mahāpaññākathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps3.1","title":"3.1. Mahāpaññākathā","units":[{"id":"ps3.1:0","sourceIds":["ps3.1:0.1","ps3.1:0.2","ps3.1:0.3"],"kind":"text","text":{"pi":"Paṭisambhidāmagga\n3 Paññāvagga\n3.1. Mahāpaññākathā"}},{"id":"ps3.1:1","sourceIds":["ps3.1:1.1","ps3.1:1.2","ps3.1:1.3","ps3.1:1.4"],"kind":"text","text":{"pi":"Aniccānupassanā bhāvitā bahulīkatā katamaṁ paññaṁ paripūreti?\nDukkhānupassanā bhāvitā bahulīkatā katamaṁ paññaṁ paripūreti?\nAnattānupassanā bhāvitā bahulīkatā katamaṁ paññaṁ paripūreti …pe…\npaṭinissaggānupassanā bhāvitā bahulīkatā katamaṁ paññaṁ paripūreti?"}},{"id":"ps3.1:2","sourceIds":["ps3.1:2.1","ps3.1:2.2","ps3.1:2.3","ps3.1:2.4","ps3.1:2.5","ps3.1:2.6","ps3.1:2.7","ps3.1:2.8","ps3.1:2.9","ps3.1:2.10"],"kind":"text","text":{"pi":"Aniccānupassanā bhāvitā bahulīkatā javanapaññaṁ paripūreti.\nDukkhānupassanā bhāvitā bahulīkatā nibbedhikapaññaṁ paripūreti.\nAnattānupassanā bhāvitā bahulīkatā mahāpaññaṁ paripūreti.\nNibbidānupassanā bhāvitā bahulīkatā tikkhapaññaṁ paripūreti.\nVirāgānupassanā bhāvitā bahulīkatā vipulapaññaṁ paripūreti.\nNirodhānupassanā bhāvitā bahulīkatā gambhīrapaññaṁ paripūreti.\nPaṭinissaggānupassanā bhāvitā bahulīkatā asāmantapaññaṁ paripūreti.\nImā satta paññā bhāvitā bahulīkatā paṇḍiccaṁ paripūrenti.\nImā aṭṭha paññā bhāvitā bahulīkatā puthupaññaṁ paripūrenti.\nImā nava paññā bhāvitā bahulīkatā hāsapaññaṁ paripūrenti."}},{"id":"ps3.1:3","sourceIds":["ps3.1:3.1","ps3.1:3.2","ps3.1:3.3","ps3.1:3.4","ps3.1:3.5","ps3.1:3.6"],"kind":"text","text":{"pi":"Hāsapaññā paṭibhānapaṭisambhidā.\nTassā atthavavatthānato atthapaṭisambhidā adhigatā hoti sacchikatā phassitā paññāya.\nDhammavavatthānato dhammapaṭisambhidā adhigatā hoti sacchikatā phassitā paññāya.\nNiruttivavatthānato niruttipaṭisambhidā adhigatā hoti sacchikatā phassitā paññāya.\nPaṭibhānavavatthānato paṭibhānapaṭisambhidā adhigatā hoti sacchikatā phassitā paññāya.\nTassimā catasso paṭisambhidāyo adhigatā honti sacchikatā phassitā paññāya."}},{"id":"ps3.1:4","sourceIds":["ps3.1:4.1","ps3.1:4.2","ps3.1:4.3","ps3.1:4.4","ps3.1:4.5","ps3.1:4.6","ps3.1:4.7"],"kind":"text","text":{"pi":"Rūpe aniccānupassanā bhāvitā bahulīkatā katamaṁ paññaṁ paripūreti …pe…\nrūpe paṭinissaggānupassanā bhāvitā bahulīkatā katamaṁ paññaṁ paripūreti?\nRūpe aniccānupassanā bhāvitā bahulīkatā javanapaññaṁ paripūreti …pe…\nrūpe paṭinissaggānupassanā bhāvitā bahulīkatā asāmantapaññaṁ paripūreti.\nImā satta paññā bhāvitā bahulīkatā paṇḍiccaṁ paripūrenti.\nImā aṭṭha paññā bhāvitā bahulīkatā puthupaññaṁ paripūrenti.\nImā nava paññā bhāvitā bahulīkatā hāsapaññaṁ paripūrenti."}},{"id":"ps3.1:5","sourceIds":["ps3.1:5.1","ps3.1:5.2","ps3.1:5.3","ps3.1:5.4","ps3.1:5.5","ps3.1:5.6"],"kind":"text","text":{"pi":"Hāsapaññā paṭibhānapaṭisambhidā.\nTassā atthavavatthānato atthapaṭisambhidā adhigatā hoti sacchikatā phassitā paññāya.\nDhammavavatthānato dhammapaṭisambhidā adhigatā hoti sacchikatā phassitā paññāya.\nNiruttivavatthānato niruttipaṭisambhidā adhigatā hoti sacchikatā phassitā paññāya.\nPaṭibhānavavatthānato paṭibhānapaṭisambhidā adhigatā hoti, sacchikatā phassitā paññāya.\nTassimā catasso paṭisambhidāyo adhigatā honti sacchikatā phassitā paññāya."}},{"id":"ps3.1:6","sourceIds":["ps3.1:6.1","ps3.1:6.2","ps3.1:6.3","ps3.1:6.4","ps3.1:6.5","ps3.1:6.6","ps3.1:6.7","ps3.1:6.8","ps3.1:6.9","ps3.1:6.10","ps3.1:6.11","ps3.1:6.12"],"kind":"text","text":{"pi":"Vedanāya …pe…\nsaññāya …\nsaṅkhāresu …\nviññāṇe …\ncakkhusmiṁ …pe…\njarāmaraṇe aniccānupassanā bhāvitā bahulīkatā katamaṁ paññaṁ paripūreti …pe…\njarāmaraṇe paṭinissaggānupassanā bhāvitā bahulīkatā katamaṁ paññaṁ paripūreti?\nJarāmaraṇe aniccānupassanā bhāvitā bahulīkatā javanapaññaṁ paripūreti …pe…\njarāmaraṇe paṭinissaggānupassanā bhāvitā bahulīkatā asāmantapaññaṁ paripūreti.\nImā satta paññā bhāvitā bahulīkatā paṇḍiccaṁ paripūrenti.\nImā aṭṭha paññā bhāvitā bahulīkatā puthupaññaṁ paripūrenti.\nImā nava paññā bhāvitā bahulīkatā hāsapaññaṁ paripūrenti."}},{"id":"ps3.1:7","sourceIds":["ps3.1:7.1","ps3.1:7.2","ps3.1:7.3","ps3.1:7.4","ps3.1:7.5","ps3.1:7.6"],"kind":"text","text":{"pi":"Hāsapaññā paṭibhānapaṭisambhidā.\nTassā atthavavatthānato atthapaṭisambhidā adhigatā hoti sacchikatā phassitā paññāya.\nDhammavavatthānato dhammapaṭisambhidā adhigatā hoti sacchikatā phassitā paññāya.\nNiruttivavatthānato niruttipaṭisambhidā adhigatā hoti sacchikatā phassitā paññāya.\nPaṭibhānavavatthānato paṭibhānapaṭisambhidā adhigatā hoti sacchikatā phassitā paññāya.\nTassimā catasso paṭisambhidāyo adhigatā honti sacchikatā phassitā paññāya."}},{"id":"ps3.1:8","sourceIds":["ps3.1:8.1","ps3.1:8.2","ps3.1:8.3","ps3.1:8.4","ps3.1:8.5","ps3.1:8.6","ps3.1:8.7","ps3.1:8.8","ps3.1:8.9","ps3.1:8.10","ps3.1:8.11","ps3.1:8.12","ps3.1:8.13","ps3.1:8.14"],"kind":"text","text":{"pi":"Rūpe aniccānupassanā bhāvitā bahulīkatā katamaṁ paññaṁ paripūreti?\nAtītānāgatapaccuppanne rūpe aniccānupassanā bhāvitā bahulīkatā katamaṁ paññaṁ paripūreti?\nRūpe dukkhānupassanā bhāvitā bahulīkatā katamaṁ paññaṁ paripūreti?\nAtītānāgatapaccuppanne rūpe dukkhānupassanā bhāvitā bahulīkatā katamaṁ paññaṁ paripūreti?\nRūpe anattānupassanā bhāvitā bahulīkatā katamaṁ paññaṁ paripūreti?\nAtītānāgatapaccuppanne rūpe anattānupassanā bhāvitā bahulīkatā katamaṁ paññaṁ paripūreti?\nRūpe nibbidānupassanā bhāvitā bahulīkatā katamaṁ paññaṁ paripūreti?\nAtītānāgatapaccuppanne rūpe nibbidānupassanā bhāvitā bahulīkatā katamaṁ paññaṁ paripūreti?\nRūpe virāgānupassanā bhāvitā bahulīkatā katamaṁ paññaṁ paripūreti?\nAtītānāgatapaccuppanne rūpe virāgānupassanā bhāvitā bahulīkatā katamaṁ paññaṁ paripūreti?\nRūpe nirodhānupassanā bhāvitā bahulīkatā katamaṁ paññaṁ paripūreti?\nAtītānāgatapaccuppanne rūpe nirodhānupassanā bhāvitā bahulīkatā katamaṁ paññaṁ paripūreti?\nRūpe paṭinissaggānupassanā bhāvitā bahulīkatā katamaṁ paññaṁ paripūreti?\nAtītānāgatapaccuppanne rūpe paṭinissaggānupassanā bhāvitā bahulīkatā katamaṁ paññaṁ paripūreti?"}},{"id":"ps3.1:9","sourceIds":["ps3.1:9.1","ps3.1:9.2","ps3.1:9.3","ps3.1:9.4","ps3.1:9.5","ps3.1:9.6","ps3.1:9.7","ps3.1:9.8","ps3.1:9.9","ps3.1:9.10","ps3.1:9.11","ps3.1:9.12","ps3.1:9.13","ps3.1:9.14","ps3.1:9.15","ps3.1:9.16","ps3.1:9.17"],"kind":"text","text":{"pi":"Rūpe aniccānupassanā bhāvitā bahulīkatā javanapaññaṁ paripūreti.\nAtītānāgatapaccuppanne rūpe aniccānupassanā bhāvitā bahulīkatā javanapaññaṁ paripūreti.\nRūpe dukkhānupassanā bhāvitā bahulīkatā nibbedhikapaññaṁ paripūreti.\nAtītānāgatapaccuppanne rūpe dukkhānupassanā bhāvitā bahulīkatā javanapaññaṁ paripūreti.\nRūpe anattānupassanā bhāvitā bahulīkatā mahāpaññaṁ paripūreti.\nAtītānāgatapaccuppanne rūpe anattānupassanā bhāvitā bahulīkatā javanapaññaṁ paripūreti.\nRūpe nibbidānupassanā bhāvitā bahulīkatā tikkhapaññaṁ paripūreti.\nAtītānāgatapaccuppanne rūpe nibbidānupassanā bhāvitā bahulīkatā javanapaññaṁ paripūreti.\nRūpe virāgānupassanā bhāvitā bahulīkatā vipulapaññaṁ paripūreti.\nAtītānāgatapaccuppanne rūpe virāgānupassanā bhāvitā bahulīkatā javanapaññaṁ paripūreti.\nRūpe nirodhānupassanā bhāvitā bahulīkatā gambhīrapaññaṁ paripūreti.\nAtītānāgatapaccuppanne rūpe nirodhānupassanā bhāvitā bahulīkatā javanapaññaṁ paripūreti.\nRūpe paṭinissaggānupassanā bhāvitā bahulīkatā asāmantapaññaṁ paripūreti.\nAtītānāgatapaccuppanne rūpe paṭinissaggānupassanā bhāvitā bahulīkatā javanapaññaṁ paripūreti.\nImā satta paññā bhāvitā bahulīkatā paṇḍiccaṁ paripūrenti.\nImā aṭṭha paññā bhāvitā bahulīkatā puthupaññaṁ paripūrenti.\nImā nava paññā bhāvitā bahulīkatā hāsapaññaṁ paripūrenti."}},{"id":"ps3.1:10","sourceIds":["ps3.1:10.1","ps3.1:10.2","ps3.1:10.3","ps3.1:10.4","ps3.1:10.5","ps3.1:10.6"],"kind":"text","text":{"pi":"Hāsapaññā paṭibhānapaṭisambhidā.\nTassā atthavavatthānato atthapaṭisambhidā adhigatā hoti sacchikatā phassitā paññāya.\nDhammavavatthānato dhammapaṭisambhidā adhigatā hoti sacchikatā phassitā paññāya.\nNiruttivavatthānato niruttipaṭisambhidā adhigatā hoti sacchikatā phassitā paññāya.\nPaṭibhānavavatthānato paṭibhānapaṭisambhidā adhigatā hoti sacchikatā phassitā paññāya.\nTassimā catasso paṭisambhidāyo adhigatā honti sacchikatā phassitā paññāya."}},{"id":"ps3.1:11","sourceIds":["ps3.1:11.1","ps3.1:11.2","ps3.1:11.3","ps3.1:11.4","ps3.1:11.5","ps3.1:11.6","ps3.1:11.7","ps3.1:11.8","ps3.1:11.9","ps3.1:11.10","ps3.1:11.11","ps3.1:11.12"],"kind":"text","text":{"pi":"Vedanāya …pe…\nsaññāya …\nsaṅkhāresu …\nviññāṇe …\ncakkhusmiṁ …pe…\njarāmaraṇe aniccānupassanā bhāvitā bahulīkatā katamaṁ paññaṁ paripūreti?\nAtītānāgatapaccuppanne jarāmaraṇe aniccānupassanā bhāvitā bahulīkatā katamaṁ paññaṁ paripūreti …pe…\njarāmaraṇe paṭinissaggānupassanā bhāvitā bahulīkatā katamaṁ paññaṁ paripūreti?\nAtītānāgatapaccuppanne jarāmaraṇe paṭinissaggānupassanā bhāvitā bahulīkatā katamaṁ paññaṁ paripūreti?\nJarāmaraṇe aniccānupassanā bhāvitā bahulīkatā javanapaññaṁ paripūreti.\nAtītānāgatapaccuppanne jarāmaraṇe aniccānupassanā bhāvitā bahulīkatā javanapaññaṁ paripūreti …pe…\ntassimā catasso paṭisambhidāyo adhigatā honti sacchikatā phassitā paññāya."}},{"id":"ps3.1:12","sourceIds":["ps3.1:12.1","ps3.1:12.2","ps3.1:12.3","ps3.1:12.4"],"kind":"text","text":{"pi":"“Cattārome, bhikkhave, dhammā bhāvitā bahulīkatā sotāpattiphalasacchikiriyāya saṁvattanti.\nKatame cattāro?\nSappurisasaṁsevo, saddhammassavanaṁ, yonisomanasikāro, dhammānudhammapaṭipatti—\nime kho, bhikkhave, cattāro dhammā bhāvitā bahulīkatā sotāpattiphalasacchikiriyāya saṁvattanti."}},{"id":"ps3.1:13","sourceIds":["ps3.1:13.1","ps3.1:13.2","ps3.1:13.3","ps3.1:13.4","ps3.1:13.5","ps3.1:13.6"],"kind":"text","text":{"pi":"Cattārome, bhikkhave, dhammā bhāvitā bahulīkatā sakadāgāmiphalasacchikiriyāya saṁvattanti …pe…\nanāgāmiphalasacchikiriyāya saṁvattanti …pe…\narahattaphalasacchikiriyāya saṁvattanti.\nKatame cattāro?\nSappurisasaṁsevo, saddhammassavanaṁ, yonisomanasikāro, dhammānudhammapaṭipatti—\nime kho, bhikkhave, cattāro dhammā bhāvitā bahulīkatā arahattamaggaphalasacchikiriyāya saṁvattanti."}},{"id":"ps3.1:14","sourceIds":["ps3.1:14.1","ps3.1:14.2","ps3.1:14.3","ps3.1:14.4","ps3.1:14.5","ps3.1:14.6"],"kind":"text","text":{"pi":"Cattārome, bhikkhave, dhammā bhāvitā bahulīkatā paññāpaṭilābhāya saṁvattanti …pe…\npaññābuddhiyā saṁvattanti, paññāvepullāya saṁvattanti, mahāpaññatāya saṁvattanti, puthupaññatāya saṁvattanti, vipulapaññatāya saṁvattanti, gambhīrapaññatāya saṁvattanti, asāmantapaññatāya saṁvattanti, bhūripaññatāya saṁvattanti, paññābāhullāya saṁvattanti, sīghapaññatāya saṁvattanti, lahupaññatāya saṁvattanti, hāsapaññatāya saṁvattanti, javanapaññatāya saṁvattanti, tikkhapaññatāya saṁvattanti, nibbedhikapaññatāya saṁvattanti.\nKatame cattāro?\nSappurisasaṁsevo, saddhammassavanaṁ, yonisomanasikāro, dhammānudhammapaṭipatti—\nime kho, bhikkhave, cattāro dhammā bhāvitā bahulīkatā paññāpaṭilābhāya saṁvattanti, paññābuddhiyā saṁvattanti …pe…\nnibbedhikapaññatāya saṁvattanti”."}},{"id":"ps3.1:15","sourceIds":["ps3.1:15.0","ps3.1:15.1","ps3.1:15.2","ps3.1:15.3","ps3.1:15.4"],"kind":"text","text":{"pi":"3.1.1. Soḷasapaññāniddesa\nPaññāpaṭilābhāya saṁvattantīti katamo paññāpaṭilābho?\nCatunnaṁ maggañāṇānaṁ, catunnaṁ phalañāṇānaṁ, catunnaṁ paṭisambhidāñāṇānaṁ, channaṁ abhiññāñāṇānaṁ, tesattatīnaṁ ñāṇānaṁ, sattasattatīnaṁ ñāṇānaṁ lābho paṭilābho patti sampatti phassanā sacchikiriyā upasampadā.\nPaññāpaṭilābhāya saṁvattantīti—\nayaṁ paññā paṭilābho."}},{"id":"ps3.1:16","sourceIds":["ps3.1:16.1","ps3.1:16.2","ps3.1:16.3","ps3.1:16.4"],"kind":"text","text":{"pi":"Paññābuddhiyā saṁvattantīti katamā paññābuddhi?\nSattannañca sekkhānaṁ puthujjanakalyāṇakassa ca paññā vaḍḍhati, arahato paññā vaḍḍhati.\nVaḍḍhitavaḍḍhanā paññābuddhiyā saṁvattantīti—\nayaṁ paññābuddhi."}},{"id":"ps3.1:17","sourceIds":["ps3.1:17.1","ps3.1:17.2","ps3.1:17.3","ps3.1:17.4"],"kind":"text","text":{"pi":"Paññāvepullāya saṁvattantīti katamaṁ paññāvepullaṁ?\nSattannaṁ sekkhānaṁ puthujjanakalyāṇakassa ca paññāvepullaṁ gacchati.\nArahato paññā vepullagatā paññāvepullāya saṁvattantīti—\nidaṁ paññāvepullaṁ."}},{"id":"ps3.1:18","sourceIds":["ps3.1:18.1","ps3.1:18.2","ps3.1:18.3","ps3.1:18.4","ps3.1:18.5","ps3.1:18.6","ps3.1:18.7","ps3.1:18.8","ps3.1:18.9","ps3.1:18.10","ps3.1:18.11","ps3.1:18.12","ps3.1:18.13","ps3.1:18.14","ps3.1:18.15","ps3.1:18.16","ps3.1:18.17","ps3.1:18.18","ps3.1:18.19","ps3.1:18.20","ps3.1:18.21","ps3.1:18.22","ps3.1:18.23","ps3.1:18.24","ps3.1:18.25"],"kind":"text","text":{"pi":"Mahāpaññatāya saṁvattantīti katamā mahāpaññā?\nMahante atthe pariggaṇhātīti—mahāpaññā.\nMahante dhamme pariggaṇhātīti—mahāpaññā.\nMahantā niruttiyo pariggaṇhātīti—mahāpaññā.\nMahantāni paṭibhānāni pariggaṇhātīti—mahāpaññā.\nMahante sīlakkhandhe pariggaṇhātīti—mahāpaññā.\nMahante samādhikkhandhe pariggaṇhātīti—mahāpaññā.\nMahante paññākkhandhe pariggaṇhātīti—mahāpaññā.\nMahante vimuttikkhandhe pariggaṇhātīti—mahāpaññā.\nMahante vimuttiñāṇadassanakkhandhe pariggaṇhātīti—mahāpaññā.\nMahantāni ṭhānāṭṭhānāni pariggaṇhātīti—mahāpaññā.\nMahantā vihārasamāpattiyo pariggaṇhātīti—mahāpaññā.\nMahantāni ariyasaccāni pariggaṇhātīti—mahāpaññā.\nMahante satipaṭṭhāne pariggaṇhātīti—mahāpaññā.\nMahante sammappadhāne pariggaṇhātīti—mahāpaññā.\nMahante iddhipāde pariggaṇhātīti—mahāpaññā.\nMahantāni indriyāni pariggaṇhātīti—mahāpaññā.\nMahantāni balāni pariggaṇhātīti—mahāpaññā.\nMahante bojjhaṅge pariggaṇhātīti—mahāpaññā.\nMahantaṁ ariyamaggaṁ pariggaṇhātīti—mahāpaññā.\nMahantāni sāmaññaphalāni pariggaṇhātīti—mahāpaññā.\nMahantā abhiññāyo pariggaṇhātīti—mahāpaññā.\nMahantaṁ paramatthaṁ nibbānaṁ pariggaṇhātīti—mahāpaññā.\nMahāpaññatāya saṁvattantīti—\nayaṁ mahāpaññā."}},{"id":"ps3.1:19","sourceIds":["ps3.1:19.1","ps3.1:19.2","ps3.1:19.3","ps3.1:19.4","ps3.1:19.5","ps3.1:19.6","ps3.1:19.7","ps3.1:19.8","ps3.1:19.9","ps3.1:19.10","ps3.1:19.11","ps3.1:19.12","ps3.1:19.13","ps3.1:19.14","ps3.1:19.15","ps3.1:19.16","ps3.1:19.17","ps3.1:19.18","ps3.1:19.19","ps3.1:19.20","ps3.1:19.21","ps3.1:19.22","ps3.1:19.23","ps3.1:19.24","ps3.1:19.25","ps3.1:19.26","ps3.1:19.27","ps3.1:19.28","ps3.1:19.29","ps3.1:19.30"],"kind":"text","text":{"pi":"Puthupaññatāya saṁvattantīti katamā puthupaññā?\nPuthunānākhandhesu ñāṇaṁ pavattatīti—puthupaññā.\nPuthunānādhātūsu ñāṇaṁ pavattatīti—puthupaññā.\nPuthunānāāyatanesu ñāṇaṁ pavattatīti—puthupaññā.\nPuthunānāpaṭiccasamuppādesu ñāṇaṁ pavattatīti—puthupaññā.\nPuthunānāsuññatamanupalabbhesu ñāṇaṁ pavattatīti—puthupaññā.\nPuthunānāatthesu ñāṇaṁ pavattatīti—puthupaññā.\nPuthunānādhammesu ñāṇaṁ pavattatīti—puthupaññā.\nPuthunānāniruttīsu ñāṇaṁ pavattatīti—puthupaññā.\nPuthunānāpaṭibhānesu ñāṇaṁ pavattatīti—puthupaññā.\nPuthunānāsīlakkhandhesu ñāṇaṁ pavattatīti—puthupaññā.\nPuthunānāsamādhikkhandhesu ñāṇaṁ pavattatīti—puthupaññā.\nPuthunānāpaññākkhandhesu ñāṇaṁ pavattatīti—puthupaññā.\nPuthunānāvimuttikkhandhesu ñāṇaṁ pavattatīti—puthupaññā.\nPuthunānāvimuttiñāṇadassanakkhandhesu ñāṇaṁ pavattatīti—puthupaññā.\nPuthunānāṭhānāṭṭhānesu ñāṇaṁ pavattatīti—puthupaññā.\nPuthunānāvihārasamāpattīsu ñāṇaṁ pavattatīti—puthupaññā.\nPuthunānāariyasaccesu ñāṇaṁ pavattatīti—puthupaññā.\nPuthunānāsatipaṭṭhānesu ñāṇaṁ pavattatīti—puthupaññā.\nPuthunānāsammappadhānesu ñāṇaṁ pavattatīti—puthupaññā.\nPuthunānāiddhipādesu ñāṇaṁ pavattatīti—puthupaññā.\nPuthunānāindriyesu ñāṇaṁ pavattatīti—puthupaññā.\nPuthunānābalesu ñāṇaṁ pavattatīti—puthupaññā.\nPuthunānābojjhaṅgesu ñāṇaṁ pavattatīti—puthupaññā.\nPuthunānāariyamagge ñāṇaṁ pavattatīti—puthupaññā.\nPuthunānāsāmaññaphalesu ñāṇaṁ pavattatīti—puthupaññā.\nPuthunānāabhiññāsu ñāṇaṁ pavattatīti—puthupaññā.\nPuthujjanasādhāraṇe dhamme atikkamma paramatthe nibbāne ñāṇaṁ pavattatīti—puthupaññā.\nPuthupaññatāya saṁvattantīti—\nayaṁ puthupaññā."}},{"id":"ps3.1:20","sourceIds":["ps3.1:20.1","ps3.1:20.2","ps3.1:20.3","ps3.1:20.4","ps3.1:20.5","ps3.1:20.6","ps3.1:20.7","ps3.1:20.8","ps3.1:20.9","ps3.1:20.10","ps3.1:20.11","ps3.1:20.12","ps3.1:20.13","ps3.1:20.14","ps3.1:20.15","ps3.1:20.16","ps3.1:20.17","ps3.1:20.18","ps3.1:20.19","ps3.1:20.20","ps3.1:20.21","ps3.1:20.22","ps3.1:20.23","ps3.1:20.24","ps3.1:20.25"],"kind":"text","text":{"pi":"Vipulapaññatāya saṁvattantīti katamā vipulapaññā?\nVipule atthe pariggaṇhātīti—vipulapaññā.\nVipule dhamme pariggaṇhātīti—vipulapaññā.\nVipulā niruttiyo pariggaṇhātīti—vipulapaññā.\nVipulāni paṭibhānāni pariggaṇhātīti—vipulapaññā.\nVipule sīlakkhandhe pariggaṇhātīti—vipulapaññā.\nVipule samādhikkhandhe pariggaṇhātīti—vipulapaññā.\nVipule paññākkhandhe pariggaṇhātīti—vipulapaññā.\nVipule vimuttikkhandhe pariggaṇhātīti—vipulapaññā.\nVipule vimuttiñāṇadassanakkhandhe pariggaṇhātīti—vipulapaññā.\nVipulāni ṭhānāṭṭhānāni pariggaṇhātīti—vipulapaññā.\nVipulā vihārasamāpattiyo pariggaṇhātīti—vipulapaññā.\nVipulāni ariyasaccāni pariggaṇhātīti—vipulapaññā.\nVipule satipaṭṭhāne pariggaṇhātīti—vipulapaññā.\nVipule sammappadhāne pariggaṇhātīti—vipulapaññā.\nVipule iddhipāde pariggaṇhātīti—vipulapaññā.\nVipulāni indriyāni pariggaṇhātīti—vipulapaññā.\nVipulāni balāni pariggaṇhātīti—vipulapaññā.\nVipule bojjhaṅge pariggaṇhātīti—vipulapaññā.\nVipulaṁ ariyamaggaṁ pariggaṇhātīti—vipulapaññā.\nVipulāni sāmaññaphalāni pariggaṇhātīti—vipulapaññā.\nVipulā abhiññāyo pariggaṇhātīti—vipulapaññā.\nVipulaṁ paramatthaṁ nibbānaṁ pariggaṇhātīti—vipulapaññā.\nVipulapaññatāya saṁvattantīti—\nayaṁ vipulapaññā."}},{"id":"ps3.1:21","sourceIds":["ps3.1:21.1","ps3.1:21.2","ps3.1:21.3","ps3.1:21.4","ps3.1:21.5","ps3.1:21.6","ps3.1:21.7","ps3.1:21.8","ps3.1:21.9","ps3.1:21.10","ps3.1:21.11","ps3.1:21.12","ps3.1:21.13","ps3.1:21.14","ps3.1:21.15","ps3.1:21.16","ps3.1:21.17","ps3.1:21.18","ps3.1:21.19","ps3.1:21.20","ps3.1:21.21","ps3.1:21.22","ps3.1:21.23","ps3.1:21.24","ps3.1:21.25","ps3.1:21.26","ps3.1:21.27","ps3.1:21.28","ps3.1:21.29","ps3.1:21.30"],"kind":"text","text":{"pi":"Gambhīrapaññatāya saṁvattantīti katamā gambhīrapaññā?\nGambhīresu khandhesu ñāṇaṁ pavattatīti—gambhīrapaññā.\nGambhīrāsu dhātūsu ñāṇaṁ pavattatīti—gambhīrapaññā.\nGambhīresu āyatanesu ñāṇaṁ pavattatīti—gambhīrapaññā.\nGambhīresu paṭiccasamuppādesu ñāṇaṁ pavattatīti—gambhīrapaññā.\nGambhīresu suññatamanupalabbhesu ñāṇaṁ pavattatīti—gambhīrapaññā.\nGambhīresu atthesu ñāṇaṁ pavattatīti—gambhīrapaññā.\nGambhīresu dhammesu ñāṇaṁ pavattatīti—gambhīrapaññā.\nGambhīrāsu niruttīsu ñāṇaṁ pavattatīti—gambhīrapaññā.\nGambhīresu paṭibhānesu ñāṇaṁ pavattatīti—gambhīrapaññā.\nGambhīresu sīlakkhandhesu ñāṇaṁ pavattatīti—gambhīrapaññā.\nGambhīresu samādhikkhandhesu ñāṇaṁ pavattatīti—gambhīrapaññā.\nGambhīresu paññākkhandhesu ñāṇaṁ pavattatīti—gambhīrapaññā.\nGambhīresu vimuttikkhandhesu ñāṇaṁ pavattatīti—gambhīrapaññā.\nGambhīresu vimuttiñāṇadassanakkhandhesu ñāṇaṁ pavattatīti—gambhīrapaññā.\nGambhīresu ṭhānāṭṭhānesu ñāṇaṁ pavattatīti—gambhīrapaññā.\nGambhīrāsu vihārasamāpattīsu ñāṇaṁ pavattatīti—gambhīrapaññā.\nGambhīresu ariyasaccesu ñāṇaṁ pavattatīti—gambhīrapaññā.\nGambhīresu satipaṭṭhānesu ñāṇaṁ pavattatīti—gambhīrapaññā.\nGambhīresu sammappadhānesu ñāṇaṁ pavattatīti—gambhīrapaññā.\nGambhīresu iddhipādesu ñāṇaṁ pavattatīti—gambhīrapaññā.\nGambhīresu indriyesu ñāṇaṁ pavattatīti—gambhīrapaññā.\nGambhīresu balesu ñāṇaṁ pavattatīti—gambhīrapaññā.\nGambhīresu bojjhaṅgesu ñāṇaṁ pavattatīti—gambhīrapaññā.\nGambhīre ariyamagge ñāṇaṁ pavattatīti—gambhīrapaññā.\nGambhīresu sāmaññaphalesu ñāṇaṁ pavattatīti—gambhīrapaññā.\nGambhīrāsu abhiññāsu ñāṇaṁ pavattatīti—gambhīrapaññā.\nGambhīre paramatthe nibbāne ñāṇaṁ pavattatīti—gambhīrapaññā.\nGambhīrapaññatāya saṁvattantīti—\nayaṁ gambhīrapaññā."}},{"id":"ps3.1:22","sourceIds":["ps3.1:22.1","ps3.1:22.2","ps3.1:22.3","ps3.1:22.4"],"kind":"text","text":{"pi":"Asāmantapaññatāya saṁvattantīti katamā asāmantapaññā?\nYassa puggalassa atthavavatthānato atthapaṭisambhidā adhigatā hoti sacchikatā phassitā paññāya, dhammavavatthānato dhammapaṭisambhidā adhigatā hoti sacchikatā phassitā paññāya, niruttivavatthānato niruttipaṭisambhidā adhigatā hoti sacchikatā phassitā paññāya, paṭibhānavavatthānato paṭibhānapaṭisambhidā adhigatā hoti sacchikatā phassitā paññāya, tassa atthe ca dhamme ca niruttiyā ca paṭibhāne ca na añño koci sakkoti abhisambhavituṁ.\nAnabhisambhavanīyo ca so aññehīti—\nasāmantapañño."}},{"id":"ps3.1:23","sourceIds":["ps3.1:23.1","ps3.1:23.2","ps3.1:23.3","ps3.1:23.4","ps3.1:23.5","ps3.1:23.6","ps3.1:23.7","ps3.1:23.8","ps3.1:23.9","ps3.1:23.10","ps3.1:23.11","ps3.1:23.12","ps3.1:23.13"],"kind":"text","text":{"pi":"Puthujjanakalyāṇakassa paññā aṭṭhamakassa paññāya dūre vidūre suvidūre na santike na sāmantā.\nPuthujjanakalyāṇakaṁ upādāya aṭṭhamako asāmantapañño.\nAṭṭhamakassa paññā sotāpannassa paññāya dūre vidūre suvidūre na santike na sāmantā.\nAṭṭhamakaṁ upādāya sotāpanno asāmantapañño.\nSotāpannassa paññā sakadāgāmissa paññāya dūre vidūre suvidūre na santike na sāmantā.\nSotāpannaṁ upādāya sakadāgāmī asāmantapañño.\nSakadāgāmissa paññā anāgāmissa paññāya dūre vidūre suvidūre na santike na sāmantā.\nSakadāgāmiṁ upādāya anāgāmī asāmantapañño.\nAnāgāmissa paññā arahato paññāya dūre vidūre suvidūre na santike na sāmantā.\nAnāgāmiṁ upādāya arahā asāmantapañño.\nArahato paññā paccekasambuddhassa paññāya dūre vidūre suvidūre na santike na sāmantā.\nArahantaṁ upādāya paccekabuddho asāmantapañño.\nPaccekabuddhañca sadevakañca lokaṁ upādāya tathāgato arahaṁ sammāsambuddho aggo asāmantapañño."}},{"id":"ps3.1:24","sourceIds":["ps3.1:24.1","ps3.1:24.2"],"kind":"text","text":{"pi":"Paññāpabhedakusalo pabhinnañāṇo adhigatappaṭisambhido catuvesārajjappatto dasabaladhārī purisāsabho purisasīho purisanāgo purisājañño purisadhorayho anantañāṇo anantatejo anantayaso aḍḍho mahaddhano dhanavā netā vinetā anunetā paññāpetā nijjhāpetā pekkhetā pasādetā.\n“So hi bhagavā anuppannassa maggassa uppādetā, asañjātassa maggassa sañjanetā, anakkhātassa maggassa akkhātā, maggaññū maggavidū maggakovido maggānugāmī ca panassa etarahi sāvakā viharanti pacchā samannāgatā”."}},{"id":"ps3.1:25","sourceIds":["ps3.1:25.1","ps3.1:25.2","ps3.1:25.3","ps3.1:25.4","ps3.1:25.5"],"kind":"text","text":{"pi":"“So hi bhagavā jānaṁ jānāti, passaṁ passati, cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato.\nNatthi tassa bhagavato aññātaṁ adiṭṭhaṁ aviditaṁ asacchikataṁ aphassitaṁ paññāya.\nAtītaṁ anāgataṁ paccuppannaṁ upādāya sabbe dhammā sabbākārena buddhassa bhagavato ñāṇamukhe āpāthaṁ āgacchanti.\nYaṁ kiñci neyyaṁ nāma atthi taṁ sabbaṁ jānitabbaṁ.\nAttattho vā parattho vā ubhayattho vā diṭṭhadhammiko vā attho samparāyiko vā attho uttāno vā attho gambhīro vā attho gūḷho vā attho paṭicchanno vā attho neyyo vā attho nīto vā attho anavajjo vā attho nikkileso vā attho vodāno vā attho paramattho vā attho, sabbaṁ taṁ antobuddhañāṇe parivattati."}},{"id":"ps3.1:26","sourceIds":["ps3.1:26.1","ps3.1:26.2","ps3.1:26.3","ps3.1:26.4","ps3.1:26.5","ps3.1:26.6","ps3.1:26.7","ps3.1:26.8","ps3.1:26.9","ps3.1:26.10","ps3.1:26.11","ps3.1:26.12","ps3.1:26.13","ps3.1:26.14","ps3.1:26.15","ps3.1:26.16","ps3.1:26.17","ps3.1:26.18","ps3.1:26.19"],"kind":"text","text":{"pi":"Sabbaṁ kāyakammaṁ buddhassa bhagavato ñāṇānuparivatti.\nSabbaṁ vacīkammaṁ buddhassa bhagavato ñāṇānuparivatti.\nSabbaṁ manokammaṁ buddhassa bhagavato ñāṇānuparivatti.\nAtīte buddhassa bhagavato appaṭihataṁ ñāṇaṁ.\nAnāgate buddhassa bhagavato appaṭihataṁ ñāṇaṁ.\nPaccuppanne buddhassa bhagavato appaṭihataṁ ñāṇaṁ.\nYāvatakaṁ neyyaṁ tāvatakaṁ ñāṇaṁ, yāvatakaṁ ñāṇaṁ tāvatakaṁ neyyaṁ.\nNeyyapariyantikaṁ ñāṇaṁ, ñāṇapariyantikaṁ neyyaṁ.\nNeyyaṁ atikkamitvā ñāṇaṁ nappavattati.\nÑāṇaṁ atikkamitvā neyyapatho natthi.\nAññamaññapariyantaṭṭhāyino te dhammā.\nYathā dvinnaṁ samuggapaṭalānaṁ sammā phusitānaṁ heṭṭhimaṁ samuggapaṭalaṁ uparimaṁ nātivattati, uparimaṁ samuggapaṭalaṁ heṭṭhimaṁ nātivattati, aññamaññapariyantaṭṭhāyino;\nevameva buddhassa bhagavato neyyañca ñāṇañca aññamaññapariyantaṭṭhāyino.\nYāvatakaṁ neyyaṁ tāvatakaṁ ñāṇaṁ, yāvatakaṁ ñāṇaṁ tāvatakaṁ neyyaṁ.\nNeyyapariyantikaṁ ñāṇaṁ, ñāṇapariyantikaṁ neyyaṁ.\nNeyyaṁ atikkamitvā ñāṇaṁ nappavattati.\nÑāṇaṁ atikkamitvā neyyapatho natthi.\nAññamaññapariyantaṭṭhāyino te dhammā.\nSabbadhammesu buddhassa bhagavato ñāṇaṁ pavattati."}},{"id":"ps3.1:27","sourceIds":["ps3.1:27.1","ps3.1:27.2","ps3.1:27.3","ps3.1:27.4","ps3.1:27.5"],"kind":"text","text":{"pi":"Sabbe dhammā buddhassa bhagavato āvajjanappaṭibaddhā ākaṅkhappaṭibaddhā manasikārappaṭibaddhā cittuppādappaṭibaddhā.\nSabbasattesu buddhassa bhagavato ñāṇaṁ pavattati.\nSabbesaṁ sattānaṁ buddho āsayaṁ jānāti, anusayaṁ jānāti, caritaṁ jānāti, adhimuttiṁ jānāti.\nApparajakkhe mahārajakkhe tikkhindriye mudindriye svākāre dvākāre suviññāpaye duviññāpaye bhabbābhabbe satte pajānāti.\nSadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati."}},{"id":"ps3.1:28","sourceIds":["ps3.1:28.1","ps3.1:28.2","ps3.1:28.3","ps3.1:28.4"],"kind":"text","text":{"pi":"Yathā ye keci macchakacchapā, antamaso timitimiṅgalaṁ upādāya, antomahāsamudde parivattanti, evamevaṁ sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati.\nYathā ye keci pakkhino, antamaso garuḷaṁ venateyyaṁ upādāya, ākāsassa padese parivattanti;\nevameva yepi te sāriputtasamā paññāya tepi buddhañāṇassa padese parivattanti.\nBuddhañāṇaṁ devamanussānaṁ paññaṁ pharitvā atighaṁsitvā tiṭṭhati."}},{"id":"ps3.1:29","sourceIds":["ps3.1:29.1","ps3.1:29.2","ps3.1:29.3","ps3.1:29.4","ps3.1:29.5","ps3.1:29.6"],"kind":"text","text":{"pi":"Yepi te khattiyapaṇḍitā brāhmaṇapaṇḍitā gahapatipaṇḍitā samaṇapaṇḍitā nipuṇā kataparappavādā vālavedhirūpā vobhindantā maññe caranti paññāgatena diṭṭhigatāni, te pañhaṁ abhisaṅkharitvā abhisaṅkharitvā tathāgataṁ upasaṅkamitvā pucchanti gūḷhāni ca paṭicchannāni ca.\nKathitā visajjitā ca te pañhā bhagavatā honti niddiṭṭhakāraṇā.\nUpakkhittakā ca te bhagavato sampajjanti.\nAtha kho bhagavā tattha atirocati yadidaṁ paññāyā”ti.\nAggo asāmantapañño, asāmantapaññatāya saṁvattantīti—\nayaṁ asāmantapaññā."}},{"id":"ps3.1:30","sourceIds":["ps3.1:30.1","ps3.1:30.2","ps3.1:30.3","ps3.1:30.4","ps3.1:30.5","ps3.1:30.6","ps3.1:30.7","ps3.1:30.8","ps3.1:30.9","ps3.1:30.10","ps3.1:30.11","ps3.1:30.12","ps3.1:30.13","ps3.1:30.14","ps3.1:30.15","ps3.1:30.16","ps3.1:30.17","ps3.1:30.18","ps3.1:30.19","ps3.1:30.20","ps3.1:30.21","ps3.1:30.22","ps3.1:30.23","ps3.1:30.24","ps3.1:30.25","ps3.1:30.26","ps3.1:30.27","ps3.1:30.28","ps3.1:30.29","ps3.1:30.30","ps3.1:30.31","ps3.1:30.32","ps3.1:30.33","ps3.1:30.34","ps3.1:30.35","ps3.1:30.36","ps3.1:30.37","ps3.1:30.38","ps3.1:30.39","ps3.1:30.40","ps3.1:30.41","ps3.1:30.42","ps3.1:30.43","ps3.1:30.44","ps3.1:30.45","ps3.1:30.46","ps3.1:30.47","ps3.1:30.48","ps3.1:30.49","ps3.1:30.50","ps3.1:30.51","ps3.1:30.52","ps3.1:30.53"],"kind":"text","text":{"pi":"Bhūripaññatāya saṁvattantīti katamā bhūripaññā?\nRāgaṁ abhibhuyyatīti—bhūripaññā.\nAbhibhavitāti—bhūripaññā.\nDosaṁ abhibhuyyatīti—bhūripaññā.\nAbhibhavitāti—bhūripaññā.\nMohaṁ abhibhuyyatīti—bhūripaññā.\nAbhibhavitāti—bhūripaññā.\nKodhaṁ …pe…\nupanāhaṁ …\nmakkhaṁ …\npaḷāsaṁ …\nissaṁ …\nmacchariyaṁ …\nmāyaṁ …\nsāṭheyyaṁ …\nthambhaṁ …\nsārambhaṁ …\nmānaṁ …\natimānaṁ …\nmadaṁ …\npamādaṁ …\nsabbe kilese …\nsabbe duccarite …\nsabbe abhisaṅkhāre …pe…\nsabbe bhavagāmikamme abhibhuyyatīti—bhūripaññā.\nAbhibhavitāti—bhūripaññā.\nRāgo ari taṁ ariṁ maddanipaññāti—bhūripaññā.\nDoso ari taṁ ariṁ maddanipaññāti—bhūripaññā.\nMoho ari taṁ ariṁ maddanipaññāti—bhūripaññā.\nKodho …pe…\nupanāho …\nmakkho …\npaḷāso …\nissā …\nmacchariyaṁ …\nmāyā …\nsāṭheyyaṁ …\nthambho …\nsārambho …\nmāno …\natimāno …\nmado …\npamādo …\nsabbe kilesā …\nsabbe duccaritā …\nsabbe abhisaṅkhārā …pe…\nsabbe bhavagāmikammā ari taṁ ariṁ maddanipaññāti—bhūripaññā.\nBhūri vuccati pathavī.\nTāya pathavisamāya vitthatāya vipulāya paññāya samannāgatoti—bhūripaññā.\nApi ca paññāya metaṁ adhivacanaṁ.\nBhūri medhā pariṇāyikāti—bhūripaññā.\nBhūripaññatāya saṁvattantīti—\nayaṁ bhūripaññā."}},{"id":"ps3.1:31","sourceIds":["ps3.1:31.1","ps3.1:31.2","ps3.1:31.3","ps3.1:31.4","ps3.1:31.5","ps3.1:31.6"],"kind":"text","text":{"pi":"Paññābāhullāya saṁvattantīti katamaṁ paññābāhullaṁ?\nIdhekacco paññāgaruko hoti paññācarito paññāsayo paññādhimutto paññādhajo paññāketu paññādhipateyyo vicayabahulo pavicayabahulo okkhāyanabahulo samokkhāyanabahulo sampekkhāyanadhammo vibhūtavihārī taccarito taggaruko tabbahulo tanninno tappoṇo tappabbhāro tadadhimutto tadadhipateyyo.\nYathā gaṇagaruko vuccati “gaṇabāhuliko”ti, cīvaragaruko vuccati “cīvarabāhuliko”ti, pattagaruko vuccati “pattabāhuliko”ti, senāsanagaruko vuccati “senāsanabāhuliko”ti;\nevamevaṁ idhekacco paññāgaruko hoti paññācarito paññāsayo paññādhimutto paññādhajo paññāketu paññādhipateyyo vicayabahulo pavicayabahulo okkhāyanabahulo samokkhāyanabahulo sampekkhāyanadhammo vibhūtavihārī taccarito taggaruko tabbahulo tanninno tappoṇo tappabbhāro tadadhimutto tadadhipateyyo.\nPaññābāhullāya saṁvattantīti—\nidaṁ paññābāhullaṁ."}},{"id":"ps3.1:32","sourceIds":["ps3.1:32.1","ps3.1:32.2","ps3.1:32.3","ps3.1:32.4","ps3.1:32.5","ps3.1:32.6","ps3.1:32.7","ps3.1:32.8","ps3.1:32.9","ps3.1:32.10","ps3.1:32.11","ps3.1:32.12","ps3.1:32.13","ps3.1:32.14","ps3.1:32.15","ps3.1:32.16","ps3.1:32.17","ps3.1:32.18","ps3.1:32.19","ps3.1:32.20","ps3.1:32.21","ps3.1:32.22","ps3.1:32.23","ps3.1:32.24","ps3.1:32.25"],"kind":"text","text":{"pi":"Sīghapaññatāya saṁvattantīti katamā sīghapaññā?\nSīghaṁ sīghaṁ sīlāni paripūretīti—sīghapaññā.\nSīghaṁ sīghaṁ indriyasaṁvaraṁ paripūretīti—sīghapaññā.\nSīghaṁ sīghaṁ bhojane mattaññutaṁ paripūretīti—sīghapaññā.\nSīghaṁ sīghaṁ jāgariyānuyogaṁ paripūretīti—sīghapaññā.\nSīghaṁ sīghaṁ sīlakkhandhaṁ paripūretīti—sīghapaññā.\nSīghaṁ sīghaṁ samādhikkhandhaṁ paripūretīti—sīghapaññā.\nSīghaṁ sīghaṁ paññākkhandhaṁ paripūretīti—sīghapaññā.\nSīghaṁ sīghaṁ vimuttikkhandhaṁ paripūretīti—sīghapaññā.\nSīghaṁ sīghaṁ vimuttiñāṇadassanakkhandhaṁ paripūretīti—sīghapaññā.\nSīghaṁ sīghaṁ ṭhānāṭṭhānāni paṭivijjhatīti—sīghapaññā.\nSīghaṁ sīghaṁ vihārasamāpattiyo paripūretīti—sīghapaññā.\nSīghaṁ sīghaṁ ariyasaccāni paṭivijjhatīti—sīghapaññā.\nSīghaṁ sīghaṁ satipaṭṭhāne bhāvetīti—sīghapaññā.\nSīghaṁ sīghaṁ sammappadhāne bhāvetīti—sīghapaññā.\nSīghaṁ sīghaṁ iddhipāde bhāvetīti—sīghapaññā.\nSīghaṁ sīghaṁ indriyāni bhāvetīti—sīghapaññā.\nSīghaṁ sīghaṁ balāni bhāvetīti—sīghapaññā.\nSīghaṁ sīghaṁ bojjhaṅge bhāvetīti—sīghapaññā.\nSīghaṁ sīghaṁ ariyamaggaṁ bhāvetīti—sīghapaññā.\nSīghaṁ sīghaṁ sāmaññaphalāni sacchikarotīti—sīghapaññā.\nSīghaṁ sīghaṁ abhiññāyo paṭivijjhatīti—sīghapaññā.\nSīghaṁ sīghaṁ paramatthaṁ nibbānaṁ sacchikarotīti—sīghapaññā.\nSīghapaññatāya saṁvattantīti—\nayaṁ sīghapaññā."}},{"id":"ps3.1:33","sourceIds":["ps3.1:33.1","ps3.1:33.2","ps3.1:33.3","ps3.1:33.4","ps3.1:33.5","ps3.1:33.6","ps3.1:33.7","ps3.1:33.8","ps3.1:33.9","ps3.1:33.10","ps3.1:33.11","ps3.1:33.12","ps3.1:33.13","ps3.1:33.14","ps3.1:33.15","ps3.1:33.16","ps3.1:33.17","ps3.1:33.18","ps3.1:33.19","ps3.1:33.20","ps3.1:33.21","ps3.1:33.22","ps3.1:33.23","ps3.1:33.24","ps3.1:33.25"],"kind":"text","text":{"pi":"Lahupaññatāya saṁvattantīti katamā lahupaññā?\nLahuṁ lahuṁ sīlāni paripūretīti—lahupaññā.\nLahuṁ lahuṁ indriyasaṁvaraṁ paripūretīti—lahupaññā.\nLahuṁ lahuṁ bhojane mattaññutaṁ paripūretīti—lahupaññā.\nLahuṁ lahuṁ jāgariyānuyogaṁ paripūretīti—lahupaññā.\nLahuṁ lahuṁ sīlakkhandhaṁ …pe…\nsamādhikkhandhaṁ …\npaññākkhandhaṁ …\nvimuttikkhandhaṁ …\nvimuttiñāṇadassanakkhandhaṁ paripūretīti—lahupaññā.\nLahuṁ lahuṁ ṭhānāṭṭhānāni paṭivijjhatīti—lahupaññā.\nLahuṁ lahuṁ vihārasamāpattiyo paripūretīti—lahupaññā.\nLahuṁ lahuṁ ariyasaccāni paṭivijjhatīti—lahupaññā.\nLahuṁ lahuṁ satipaṭṭhāne bhāvetīti—lahupaññā.\nLahuṁ lahuṁ sammappadhāne bhāvetīti—lahupaññā.\nLahuṁ lahuṁ iddhipāde bhāvetīti—lahupaññā.\nLahuṁ lahuṁ indriyāni bhāvetīti—lahupaññā.\nLahuṁ lahuṁ balāni bhāvetīti—lahupaññā.\nLahuṁ lahuṁ bojjhaṅge bhāvetīti—lahupaññā.\nLahuṁ lahuṁ ariyamaggaṁ bhāvetīti—lahupaññā.\nLahuṁ lahuṁ sāmaññaphalāni sacchikarotīti—lahupaññā.\nLahuṁ lahuṁ abhiññāyo paṭivijjhatīti—lahupaññā.\nLahuṁ lahuṁ paramatthaṁ nibbānaṁ sacchikarotīti—lahupaññā.\nLahupaññatāya saṁvattantīti—\nayaṁ lahupaññā."}},{"id":"ps3.1:34","sourceIds":["ps3.1:34.1","ps3.1:34.2","ps3.1:34.3","ps3.1:34.4","ps3.1:34.5","ps3.1:34.6","ps3.1:34.7","ps3.1:34.8","ps3.1:34.9","ps3.1:34.10","ps3.1:34.11","ps3.1:34.12","ps3.1:34.13","ps3.1:34.14","ps3.1:34.15","ps3.1:34.16","ps3.1:34.17","ps3.1:34.18","ps3.1:34.19","ps3.1:34.20","ps3.1:34.21","ps3.1:34.22","ps3.1:34.23","ps3.1:34.24","ps3.1:34.25"],"kind":"text","text":{"pi":"Hāsapaññatāya saṁvattantīti katamā hāsapaññā?\nIdhekacco hāsabahulo vedabahulo tuṭṭhibahulo pāmojjabahulo sīlāni paripūretīti—hāsapaññā.\nHāsabahulo vedabahulo tuṭṭhibahulo pāmojjabahulo indriyasaṁvaraṁ paripūretīti—hāsapaññā.\nHāsabahulo vedabahulo tuṭṭhibahulo pāmojjabahulo bhojane mattaññutaṁ paripūretīti—hāsapaññā.\nHāsabahulo vedabahulo tuṭṭhibahulo pāmojjabahulo jāgariyānuyogaṁ paripūretīti—hāsapaññā.\nHāsabahulo vedabahulo tuṭṭhibahulo pāmojjabahulo sīlakkhandhaṁ …pe…\nsamādhikkhandhaṁ …\npaññākkhandhaṁ …\nvimuttikkhandhaṁ …\nvimuttiñāṇadassanakkhandhaṁ paripūretīti …pe…\nṭhānāṭṭhānāni paṭivijjhatīti …\nvihārasamāpattiyo paripūretīti …\nariyasaccāni paṭivijjhatīti …\nsatipaṭṭhāne bhāvetīti …\nsammappadhāne bhāvetīti …\niddhipāde bhāvetīti …\nindriyāni bhāvetīti …\nbalāni bhāvetīti …\nbojjhaṅge bhāvetīti …\nariyamaggaṁ bhāvetīti …pe…\nsāmaññaphalāni sacchikarotīti—hāsapaññā.\nHāsabahulo vedabahulo tuṭṭhibahulo pāmojjabahulo abhiññāyo paṭivijjhatīti—hāsapaññā.\nHāsabahulo vedabahulo tuṭṭhibahulo pāmojjabahulo paramatthaṁ nibbānaṁ sacchikarotīti—hāsapaññā.\nHāsapaññatāya saṁvattantīti—\nayaṁ hāsapaññā."}},{"id":"ps3.1:35","sourceIds":["ps3.1:35.1","ps3.1:35.2","ps3.1:35.3","ps3.1:35.4","ps3.1:35.5","ps3.1:35.6","ps3.1:35.7","ps3.1:35.8","ps3.1:35.9","ps3.1:35.10","ps3.1:35.11","ps3.1:35.12","ps3.1:35.13","ps3.1:35.14"],"kind":"text","text":{"pi":"Javanapaññatāya saṁvattantīti katamā javanapaññā?\nYaṁ kiñci rūpaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā, sabbaṁ rūpaṁ aniccato khippaṁ javatīti—javanapaññā.\nDukkhato khippaṁ javatīti—javanapaññā.\nAnattato khippaṁ javatīti—javanapaññā.\nYā kāci vedanā …pe…\nyā kāci saññā …\nye keci saṅkhārā …\nyaṁ kiñci viññāṇaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā, sabbaṁ viññāṇaṁ aniccato khippaṁ javatīti—javanapaññā.\nDukkhato khippaṁ javatīti—javanapaññā.\nAnattato khippaṁ javatīti—javanapaññā.\nCakkhu …pe…\njarāmaraṇaṁ atītānāgatapaccuppannaṁ aniccato khippaṁ javatīti—javanapaññā.\nDukkhato khippaṁ javatīti—javanapaññā.\nAnattato khippaṁ javatīti—javanapaññā."}},{"id":"ps3.1:36","sourceIds":["ps3.1:36.1","ps3.1:36.2","ps3.1:36.3","ps3.1:36.4","ps3.1:36.5","ps3.1:36.6","ps3.1:36.7"],"kind":"text","text":{"pi":"Rūpaṁ atītānāgatapaccuppannaṁ aniccaṁ khayaṭṭhena dukkhaṁ bhayaṭṭhena anattā asārakaṭṭhenāti tulayitvā tīrayitvā vibhāvayitvā vibhūtaṁ katvā rūpanirodhe nibbāne khippaṁ javatīti—javanapaññā.\nVedanā …pe…\nsaññā …\nsaṅkhārā …\nviññāṇaṁ …\ncakkhu …pe…\njarāmaraṇaṁ atītānāgatapaccuppannaṁ aniccaṁ khayaṭṭhena dukkhaṁ bhayaṭṭhena anattā asārakaṭṭhenāti tulayitvā tīrayitvā vibhāvayitvā vibhūtaṁ katvā jarāmaraṇanirodhe nibbāne khippaṁ javatīti—javanapaññā."}},{"id":"ps3.1:37","sourceIds":["ps3.1:37.1","ps3.1:37.2","ps3.1:37.3","ps3.1:37.4","ps3.1:37.5","ps3.1:37.6","ps3.1:37.7","ps3.1:37.8","ps3.1:37.9"],"kind":"text","text":{"pi":"Rūpaṁ atītānāgatapaccuppannaṁ aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ nirodhadhammanti tulayitvā tīrayitvā vibhāvayitvā vibhūtaṁ katvā rūpanirodhe nibbāne khippaṁ javatīti—javanapaññā.\nVedanā …pe…\nsaññā …\nsaṅkhārā …\nviññāṇaṁ …\ncakkhu …pe…\njarāmaraṇaṁ atītānāgatapaccuppannaṁ aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ nirodhadhammanti tulayitvā tīrayitvā vibhāvayitvā vibhūtaṁ katvā jarāmaraṇanirodhe nibbāne khippaṁ javatīti—javanapaññā.\nJavanapaññatāya saṁvattantīti—\nayaṁ javanapaññā."}},{"id":"ps3.1:38","sourceIds":["ps3.1:38.1","ps3.1:38.2","ps3.1:38.3","ps3.1:38.4","ps3.1:38.5","ps3.1:38.6","ps3.1:38.7","ps3.1:38.8","ps3.1:38.9","ps3.1:38.10","ps3.1:38.11","ps3.1:38.12","ps3.1:38.13","ps3.1:38.14","ps3.1:38.15","ps3.1:38.16","ps3.1:38.17","ps3.1:38.18","ps3.1:38.19","ps3.1:38.20","ps3.1:38.21","ps3.1:38.22","ps3.1:38.23","ps3.1:38.24","ps3.1:38.25","ps3.1:38.26","ps3.1:38.27","ps3.1:38.28","ps3.1:38.29","ps3.1:38.30"],"kind":"text","text":{"pi":"Tikkhapaññatāya saṁvattantīti katamā tikkhapaññā?\nKhippaṁ kilese chindatīti—tikkhapaññā.\nUppannaṁ kāmavitakkaṁ nādhivāseti pajahati vinodeti byantīkaroti anabhāvaṁ gametīti—tikkhapaññā.\nUppannaṁ byāpādavitakkaṁ nādhivāseti pajahati vinodeti byantīkaroti anabhāvaṁ gametīti—tikkhapaññā.\nUppannaṁ vihiṁsāvitakkaṁ nādhivāseti …pe…\nuppannuppanne pāpake akusale dhamme nādhivāseti pajahati vinodeti byantīkaroti anabhāvaṁ gametīti—tikkhapaññā.\nUppannaṁ rāgaṁ nādhivāseti pajahati vinodeti byantīkaroti anabhāvaṁ gametīti—tikkhapaññā.\nUppannaṁ dosaṁ …pe…\nuppannaṁ mohaṁ …\nuppannaṁ kodhaṁ …\nuppannaṁ upanāhaṁ …\nmakkhaṁ …\npaḷāsaṁ …\nissaṁ …\nmacchariyaṁ …\nmāyaṁ …\nsāṭheyyaṁ …\nthambhaṁ …\nsārambhaṁ …\nmānaṁ …\natimānaṁ …\nmadaṁ …\npamādaṁ …\nsabbe kilese …\nsabbe duccarite …\nsabbe abhisaṅkhāre …pe…\nsabbe bhavagāmikamme nādhivāseti pajahati vinodeti byantīkaroti anabhāvaṁ gametīti—tikkhapaññā.\nEkasmiṁ āsane cattāro ca ariyamaggā cattāri ca sāmaññaphalāni catasso paṭisambhidāyo cha abhiññāyo adhigatā honti sacchikatā phassitā paññāyāti—tikkhapaññā.\nTikkhapaññatāya saṁvattantīti—\nayaṁ tikkhapaññā."}},{"id":"ps3.1:39","sourceIds":["ps3.1:39.1","ps3.1:39.2","ps3.1:39.3","ps3.1:39.4","ps3.1:39.5","ps3.1:39.6","ps3.1:39.7","ps3.1:39.8","ps3.1:39.9","ps3.1:39.10","ps3.1:39.11","ps3.1:39.12","ps3.1:39.13","ps3.1:39.14","ps3.1:39.15","ps3.1:39.16","ps3.1:39.17","ps3.1:39.18","ps3.1:39.19","ps3.1:39.20","ps3.1:39.21","ps3.1:39.22","ps3.1:39.23","ps3.1:39.24","ps3.1:39.25","ps3.1:39.26"],"kind":"text","text":{"pi":"Nibbedhikapaññatāya saṁvattantīti katamā nibbedhikapaññā?\nIdhekacco sabbasaṅkhāresu ubbegabahulo hoti uttāsabahulo ukkaṇṭhanabahulo aratibahulo anabhiratibahulo.\nBahimukho na ramati sabbasaṅkhāresu.\nAnibbiddhapubbaṁ appadālitapubbaṁ lobhakkhandhaṁ nibbijjhati padāletīti—nibbedhikapaññā.\nAnibbiddhapubbaṁ appadālitapubbaṁ dosakkhandhaṁ nibbijjhati padāletīti—nibbedhikapaññā.\nAnibbiddhapubbaṁ appadālitapubbaṁ mohakkhandhaṁ nibbijjhati padāletīti—nibbedhikapaññā.\nAnibbiddhapubbaṁ appadālitapubbaṁ kodhaṁ …pe…\nupanāhaṁ …\nmakkhaṁ …\npaḷāsaṁ …\nissaṁ …\nmacchariyaṁ …\nmāyaṁ …\nsāṭheyyaṁ …\nthambhaṁ …\nsārambhaṁ …\nmānaṁ …\natimānaṁ …\nmadaṁ …\npamādaṁ …\nsabbe kilese …\nsabbe duccarite …\nsabbe abhisaṅkhāre …pe…\nsabbe bhavagāmikamme nibbijjhati padāletīti—nibbedhikapaññā.\nNibbedhikapaññatāya saṁvattantīti—\nayaṁ nibbedhikapaññā."}},{"id":"ps3.1:40","sourceIds":["ps3.1:40.1","ps3.1:40.2"],"kind":"text","text":{"pi":"Imā soḷasa paññāyo.\nImāhi soḷasahi paññāhi samannāgato puggalo paṭisambhidappatto."}},{"id":"ps3.1:41","sourceIds":["ps3.1:41.0","ps3.1:41.1","ps3.1:41.2","ps3.1:41.3","ps3.1:41.4"],"kind":"text","text":{"pi":"3.1.2. Puggalavisesaniddesa\nDve puggalā paṭisambhidappattā—\neko pubbayogasampanno, eko na pubbayogasampanno.\nYo pubbayogasampanno so tena atireko hoti, adhiko hoti, viseso hoti.\nTassa ñāṇaṁ pabhijjati."}},{"id":"ps3.1:42","sourceIds":["ps3.1:42.1","ps3.1:42.2","ps3.1:42.3","ps3.1:42.4"],"kind":"text","text":{"pi":"Dve puggalā paṭisambhidappattā, dvepi pubbayogasampannā—\neko bahussuto, eko na bahussuto.\nYo bahussuto, so tena atireko hoti, adhiko hoti, viseso hoti.\nTassa ñāṇaṁ pabhijjati."}},{"id":"ps3.1:43","sourceIds":["ps3.1:43.1","ps3.1:43.2","ps3.1:43.3","ps3.1:43.4"],"kind":"text","text":{"pi":"Dve puggalā paṭisambhidappattā, dvepi pubbayogasampannā, dvepi bahussutā—\neko desanābahulo, eko na desanābahulo.\nYo desanābahulo, so tena atireko hoti, adhiko hoti, viseso hoti.\nTassa ñāṇaṁ pabhijjati."}},{"id":"ps3.1:44","sourceIds":["ps3.1:44.1","ps3.1:44.2","ps3.1:44.3","ps3.1:44.4"],"kind":"text","text":{"pi":"Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā—\neko garūpanissito, eko na garūpanissito.\nYo garūpanissito, so tena atireko hoti, adhiko hoti, viseso hoti.\nTassa ñāṇaṁ pabhijjati."}},{"id":"ps3.1:45","sourceIds":["ps3.1:45.1","ps3.1:45.2","ps3.1:45.3","ps3.1:45.4"],"kind":"text","text":{"pi":"Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā—\neko vihārabahulo, eko na vihārabahulo.\nYo vihārabahulo, so tena atireko hoti, adhiko hoti, viseso hoti.\nTassa ñāṇaṁ pabhijjati."}},{"id":"ps3.1:46","sourceIds":["ps3.1:46.1","ps3.1:46.2","ps3.1:46.3","ps3.1:46.4"],"kind":"text","text":{"pi":"Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā, dvepi vihārabahulā—\neko paccavekkhaṇābahulo, eko na paccavekkhaṇābahulo.\nYo paccavekkhaṇābahulo, so tena atireko hoti, adhiko hoti, viseso hoti.\nTassa ñāṇaṁ pabhijjati."}},{"id":"ps3.1:47","sourceIds":["ps3.1:47.1","ps3.1:47.2","ps3.1:47.3","ps3.1:47.4"],"kind":"text","text":{"pi":"Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā, dvepi vihārabahulā, dvepi paccavekkhaṇābahulā—\neko sekhapaṭisambhidappatto, eko asekhapaṭisambhidappatto.\nYo asekhapaṭisambhidappatto, so tena atireko hoti, adhiko hoti, viseso hoti.\nTassa ñāṇaṁ pabhijjati."}},{"id":"ps3.1:48","sourceIds":["ps3.1:48.1","ps3.1:48.2","ps3.1:48.3","ps3.1:48.4"],"kind":"text","text":{"pi":"Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā, dvepi vihārabahulā, dvepi paccavekkhaṇābahulā, dvepi asekhapaṭisambhidappattā—\neko sāvakapāramippatto, eko na sāvakapāramippatto.\nYo sāvakapāramippatto, so tena atireko hoti, adhiko hoti, viseso hoti.\nTassa ñāṇaṁ pabhijjati."}},{"id":"ps3.1:49","sourceIds":["ps3.1:49.1","ps3.1:49.2","ps3.1:49.3","ps3.1:49.4"],"kind":"text","text":{"pi":"Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā, dvepi vihārabahulā, dvepi paccavekkhaṇābahulā, dvepi asekhapaṭisambhidappattā—\neko sāvakapāramippatto, eko paccekasambuddho.\nYo paccekasambuddho, so tena atireko hoti, adhiko hoti, viseso hoti.\nTassa ñāṇaṁ pabhijjati."}},{"id":"ps3.1:50","sourceIds":["ps3.1:50.1","ps3.1:50.2","ps3.1:50.3","ps3.1:50.4","ps3.1:50.5"],"kind":"text","text":{"pi":"Paccekabuddhañca sadevakañca lokaṁ upādāya tathāgato arahaṁ sammāsambuddho aggo paṭisambhidappatto paññāpabhedakusalo pabhinnañāṇo adhigatapaṭisambhido catuvesārajjappatto dasabaladhārī purisāsabho purisasīho …pe…\nyepi te khattiyapaṇḍitā brāhmaṇapaṇḍitā gahapatipaṇḍitā samaṇapaṇḍitā nipuṇā kataparappavādā vālavedhirūpā vobhindantā maññe caranti paññāgatena diṭṭhigatāni, te pañhaṁ abhisaṅkharitvā abhisaṅkharitvā tathāgataṁ upasaṅkamitvā pucchanti gūḷhāni ca paṭicchannāni ca.\nKathitā visajjitā ca te pañhā bhagavatā honti niddiṭṭhakāraṇā, upakkhittakā ca te bhagavato sampajjanti.\nAtha kho bhagavā tattha atirocati, yadidaṁ paññāyāti aggo paṭisambhidappattoti.\nMahāpaññākathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps3.1/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}