{"id":"ps3.2","title":"3.2. Iddhikathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps3.2","title":"3.2. Iddhikathā","units":[{"id":"ps3.2:0","sourceIds":["ps3.2:0.1","ps3.2:0.2","ps3.2:0.3"],"kind":"text","text":{"pi":"Paṭisambhidāmagga\n3 Paññāvagga\n3.2. Iddhikathā"}},{"id":"ps3.2:1","sourceIds":["ps3.2:1.1","ps3.2:1.2","ps3.2:1.3","ps3.2:1.4","ps3.2:1.5","ps3.2:1.6","ps3.2:1.7","ps3.2:1.8","ps3.2:1.9"],"kind":"text","text":{"pi":"Kā iddhi?\nKati iddhiyo?\nIddhiyā kati bhūmiyo, kati pādā, kati padāni, kati mūlāni?\nKā iddhīti?\nIjjhanaṭṭhena iddhi.\nKati iddhiyoti?\nDasa iddhiyo.\nIddhiyā kati bhūmiyoti?\nIddhiyā catasso bhūmiyo, cattāro pādā, aṭṭha padāni, soḷasa mūlāni."}},{"id":"ps3.2:2","sourceIds":["ps3.2:2.1","ps3.2:2.2"],"kind":"text","text":{"pi":"Katamā dasa iddhiyo?\nAdhiṭṭhānā iddhi, vikubbanā iddhi, manomayā iddhi, ñāṇavipphārā iddhi, samādhivipphārā iddhi, ariyā iddhi, kammavipākajā iddhi, puññavato iddhi, vijjāmayā iddhi, tattha tattha sammāpayogapaccayā ijjhanaṭṭhena iddhi."}},{"id":"ps3.2:3","sourceIds":["ps3.2:3.1","ps3.2:3.2","ps3.2:3.3"],"kind":"text","text":{"pi":"Iddhiyā katamā catasso bhūmiyo?\nVivekajābhūmi paṭhamaṁ jhānaṁ, pītisukhabhūmi dutiyaṁ jhānaṁ, upekkhāsukhabhūmi tatiyaṁ jhānaṁ, adukkhamasukhābhūmi catutthaṁ jhānaṁ.\nIddhiyā imā catasso bhūmiyo iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṁvattantīti."}},{"id":"ps3.2:4","sourceIds":["ps3.2:4.1","ps3.2:4.2","ps3.2:4.3"],"kind":"text","text":{"pi":"Iddhiyā katame cattāro pādā?\nIdha bhikkhu chandasamādhipadhānasaṅkhārasamannāgataṁ iddhipādaṁ bhāveti, cittasamādhipadhānasaṅkhārasamannāgataṁ iddhipādaṁ bhāveti, vīriyasamādhipadhānasaṅkhārasamannāgataṁ iddhipādaṁ bhāveti, vīmaṁsāsamādhipadhānasaṅkhārasamannāgataṁ iddhipādaṁ bhāveti.\nIddhiyā ime cattāro pādā iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṁvattantīti."}},{"id":"ps3.2:5","sourceIds":["ps3.2:5.1","ps3.2:5.2","ps3.2:5.3","ps3.2:5.4","ps3.2:5.5","ps3.2:5.6","ps3.2:5.7","ps3.2:5.8","ps3.2:5.9","ps3.2:5.10","ps3.2:5.11","ps3.2:5.12","ps3.2:5.13","ps3.2:5.14"],"kind":"text","text":{"pi":"Iddhiyā katamāni aṭṭha padāni?\nChandañce bhikkhu nissāya labhati samādhiṁ, labhati cittassa ekaggataṁ.\nChando na samādhi, samādhi na chando.\nAñño chando, añño samādhi.\nVīriyañce bhikkhu nissāya labhati samādhiṁ, labhati cittassa ekaggataṁ.\nVīriyaṁ na samādhi, samādhi na vīriyaṁ.\nAññaṁ vīriyaṁ, añño samādhi.\nCittañce bhikkhu nissāya labhati samādhiṁ, labhati cittassa ekaggataṁ.\nCittaṁ na samādhi, samādhi na cittaṁ.\nAññaṁ cittaṁ, añño samādhi.\nVīmaṁsañce bhikkhu nissāya labhati samādhiṁ, labhati cittassa ekaggataṁ.\nVīmaṁsā na samādhi, samādhi na vīmaṁsā.\nAññā vīmaṁsā, añño samādhi.\nIddhiyā imāni aṭṭha padāni iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṁvattantīti."}},{"id":"ps3.2:6","sourceIds":["ps3.2:6.1","ps3.2:6.2","ps3.2:6.3","ps3.2:6.4","ps3.2:6.5","ps3.2:6.6","ps3.2:6.7","ps3.2:6.8","ps3.2:6.9","ps3.2:6.10","ps3.2:6.11","ps3.2:6.12","ps3.2:6.13","ps3.2:6.14","ps3.2:6.15","ps3.2:6.16","ps3.2:6.17","ps3.2:6.18"],"kind":"text","text":{"pi":"Iddhiyā katamāni soḷasa mūlāni?\nAnonataṁ cittaṁ kosajje na iñjatīti—āneñjaṁ.\nAnunnataṁ cittaṁ uddhacce na iñjatīti—āneñjaṁ.\nAnabhinataṁ cittaṁ rāge na iñjatīti—āneñjaṁ.\nAnapanataṁ cittaṁ byāpāde na iñjatīti—āneñjaṁ.\nAnissitaṁ cittaṁ diṭṭhiyā na iñjatīti—āneñjaṁ.\nAppaṭibaddhaṁ cittaṁ chandarāge na iñjatīti—āneñjaṁ.\nVippamuttaṁ cittaṁ kāmarāge na iñjatīti—āneñjaṁ.\nVisaññuttaṁ cittaṁ kilese na iñjatīti—āneñjaṁ.\nVimariyādikataṁ cittaṁ kilesamariyāde na iñjatīti—āneñjaṁ.\nEkattagataṁ cittaṁ nānattakilesehi na iñjatīti—āneñjaṁ.\nSaddhāya pariggahitaṁ cittaṁ assaddhiye na iñjatīti—āneñjaṁ.\nVīriyena pariggahitaṁ cittaṁ kosajje na iñjatīti—āneñjaṁ.\nSatiyā pariggahitaṁ cittaṁ pamāde na iñjatīti—āneñjaṁ.\nSamādhinā pariggahitaṁ cittaṁ uddhacce na iñjatīti—āneñjaṁ.\nPaññāya pariggahitaṁ cittaṁ avijjāya na iñjatīti—āneñjaṁ.\nObhāsagataṁ cittaṁ avijjandhakāre na iñjatīti—āneñjaṁ.\nIddhiyā imāni soḷasa mūlāni iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṁvattantīti."}},{"id":"ps3.2:7","sourceIds":["ps3.2:7.0","ps3.2:7.1","ps3.2:7.2","ps3.2:7.3","ps3.2:7.4","ps3.2:7.5","ps3.2:7.6","ps3.2:7.7","ps3.2:7.8","ps3.2:7.9","ps3.2:7.10"],"kind":"text","text":{"pi":"3.2.1. Dasaiddhiniddesa\nKatamā adhiṭṭhānā iddhi?\nIdha bhikkhu anekavihitaṁ iddhividhaṁ paccanubhoti—\nekopi hutvā bahudhā hoti, bahudhāpi hutvā eko hoti;\nāvibhāvaṁ tirobhāvaṁ;\ntirokuṭṭaṁ tiropākāraṁ tiropabbataṁ asajjamāno gacchati, seyyathāpi ākāse;\npathaviyāpi ummujjanimujjaṁ karoti, seyyathāpi udake;\nudakepi abhijjamāne gacchati, seyyathāpi pathaviyaṁ;\nākāsepi pallaṅkena kamati, seyyathāpi pakkhī sakuṇo;\nimepi candimasūriye evaṁmahiddhike evaṁmahānubhāve pāṇinā parāmasati parimajjati;\nyāva brahmalokāpi kāyena vasaṁ vattetīti."}},{"id":"ps3.2:8","sourceIds":["ps3.2:8.1","ps3.2:8.2","ps3.2:8.3","ps3.2:8.4","ps3.2:8.5","ps3.2:8.6","ps3.2:8.7","ps3.2:8.8","ps3.2:8.9","ps3.2:8.10","ps3.2:8.11","ps3.2:8.12","ps3.2:8.13","ps3.2:8.14","ps3.2:8.15"],"kind":"text","text":{"pi":"Idhāti imissā diṭṭhiyā imissā khantiyā imissā ruciyā imasmiṁ ādāye imasmiṁ dhamme imasmiṁ vinaye imasmiṁ dhammavinaye imasmiṁ pāvacane imasmiṁ brahmacariye imasmiṁ satthusāsane.\nTena vuccati—\n“idhā”ti.\nBhikkhūti puthujjanakalyāṇako vā hoti bhikkhu sekho vā arahā vā akuppadhammo.\nAnekavihitaṁ iddhividhaṁ paccanubhotīti nānappakāraṁ iddhividhaṁ paccanubhoti.\nEkopi hutvā bahudhā hotīti pakatiyā eko bahukaṁ āvajjati, sataṁ vā sahassaṁ vā satasahassaṁ vā āvajjati.\nĀvajjitvā ñāṇena adhiṭṭhāti—\n“bahulo homī”ti.\nBahulo hoti.\nYathāyasmā cūḷapanthako ekopi hutvā bahudhā hoti, evamevaṁ so iddhimā cetovasippatto ekopi hutvā bahudhā hoti.\nBahudhāpi hutvā eko hotīti pakatiyā bahuko ekaṁ āvajjati;\nāvajjitvā ñāṇena adhiṭṭhāti—\n“eko homī”ti.\nEko hoti.\nYathāyasmā cūḷapanthako bahudhāpi hutvā eko hoti, evamevaṁ so iddhimā cetovasippatto bahudhāpi hutvā eko hoti."}},{"id":"ps3.2:9","sourceIds":["ps3.2:9.1","ps3.2:9.2","ps3.2:9.3","ps3.2:9.4","ps3.2:9.5","ps3.2:9.6","ps3.2:9.7","ps3.2:9.8","ps3.2:9.9"],"kind":"text","text":{"pi":"Āvibhāvanti kenaci anāvaṭaṁ hoti appaṭicchannaṁ vivaṭaṁ pākaṭaṁ.\nTirobhāvanti kenaci āvaṭaṁ hoti paṭicchannaṁ pihitaṁ paṭikujjitaṁ.\nTirokuṭṭaṁ tiropākāraṁ tiropabbataṁ asajjamāno gacchati, seyyathāpi ākāseti pakatiyā ākāsakasiṇasamāpattiyā lābhī hoti.\nTirokuṭṭaṁ tiropākāraṁ tiropabbataṁ āvajjati.\nĀvajjitvā ñāṇena adhiṭṭhāti—\n“ākāso hotū”ti.\nĀkāso hoti.\nTirokuṭṭaṁ tiropākāraṁ tiropabbataṁ asajjamāno gacchati.\nYathā manussā pakatiyā aniddhimanto kenaci anāvaṭe aparikkhitte asajjamānā gacchanti, evamevaṁ so iddhimā cetovasippatto tirokuṭṭaṁ tiropākāraṁ tiropabbataṁ asajjamāno gacchati, seyyathāpi ākāse."}},{"id":"ps3.2:10","sourceIds":["ps3.2:10.1","ps3.2:10.2","ps3.2:10.3","ps3.2:10.4","ps3.2:10.5","ps3.2:10.6","ps3.2:10.7"],"kind":"text","text":{"pi":"Pathaviyāpi ummujjanimujjaṁ karoti, seyyathāpi udaketi pakatiyā āpokasiṇasamāpattiyā lābhī hoti.\nPathaviṁ āvajjati.\nĀvajjitvā ñāṇena adhiṭṭhāti—\n“udakaṁ hotū”ti.\nUdakaṁ hoti.\nSo pathaviyā ummujjanimujjaṁ karoti.\nYathā manussā pakatiyā aniddhimanto udake ummujjanimujjaṁ karonti, evamevaṁ so iddhimā cetovasippatto pathaviyā ummujjanimujjaṁ karoti, seyyathāpi udake."}},{"id":"ps3.2:11","sourceIds":["ps3.2:11.1","ps3.2:11.2","ps3.2:11.3","ps3.2:11.4","ps3.2:11.5","ps3.2:11.6","ps3.2:11.7"],"kind":"text","text":{"pi":"Udakepi abhijjamāne gacchati, seyyathāpi pathaviyanti pakatiyā pathavīkasiṇasamāpattiyā lābhī hoti.\nUdakaṁ āvajjati.\nĀvajjitvā ñāṇena adhiṭṭhāti—\n“pathavī hotū”ti.\nPathavī hoti.\nSo abhijjamāne udake gacchati.\nYathā manussā pakatiyā aniddhimanto abhijjamānāya pathaviyā gacchanti, evamevaṁ so iddhimā cetovasippatto abhijjamāne udake gacchati, seyyathāpi pathaviyaṁ."}},{"id":"ps3.2:12","sourceIds":["ps3.2:12.1","ps3.2:12.2","ps3.2:12.3","ps3.2:12.4","ps3.2:12.5","ps3.2:12.6","ps3.2:12.7"],"kind":"text","text":{"pi":"Ākāsepi pallaṅkena kamati, seyyathāpi pakkhī sakuṇoti pakatiyā pathavīkasiṇasamāpattiyā lābhī hoti.\nĀkāsaṁ āvajjati.\nĀvajjitvā ñāṇena adhiṭṭhāti—\n“pathavī hotū”ti.\nPathavī hoti.\nSo ākāse antalikkhe caṅkamatipi tiṭṭhatipi nisīdatipi seyyampi kappeti.\nYathā manussā pakatiyā aniddhimanto pathaviyā caṅkamantipi tiṭṭhantipi nisīdantipi seyyampi kappenti, evamevaṁ so iddhimā cetovasippatto ākāse antalikkhe caṅkamatipi tiṭṭhatipi nisīdatipi seyyampi kappeti, seyyathāpi pakkhī sakuṇo."}},{"id":"ps3.2:13","sourceIds":["ps3.2:13.1","ps3.2:13.2","ps3.2:13.3","ps3.2:13.4","ps3.2:13.5","ps3.2:13.6"],"kind":"text","text":{"pi":"Imepi candimasūriye evaṁmahiddhike evaṁmahānubhāve pāṇinā parāmasati parimajjatīti idha so iddhimā cetovasippatto nisinnako vā nipannako vā candimasūriye āvajjati.\nĀvajjitvā ñāṇena adhiṭṭhāti—\n“hatthapāse hotū”ti.\nHatthapāse hoti.\nSo nisinnako vā nipannako vā candimasūriye pāṇinā āmasati parāmasati parimajjati.\nYathā manussā pakatiyā aniddhimanto kiñcideva rūpagataṁ hatthapāse āmasanti parāmasanti parimajjanti, evamevaṁ so iddhimā cetovasippatto nisinnako vā nipannako vā candimasūriye pāṇinā āmasati parāmasati parimajjati."}},{"id":"ps3.2:14","sourceIds":["ps3.2:14.1","ps3.2:14.2","ps3.2:14.3","ps3.2:14.4","ps3.2:14.5","ps3.2:14.6","ps3.2:14.7","ps3.2:14.8","ps3.2:14.9","ps3.2:14.10","ps3.2:14.11","ps3.2:14.12","ps3.2:14.13","ps3.2:14.14","ps3.2:14.15","ps3.2:14.16","ps3.2:14.17","ps3.2:14.18","ps3.2:14.19","ps3.2:14.20","ps3.2:14.21","ps3.2:14.22","ps3.2:14.23","ps3.2:14.24","ps3.2:14.25","ps3.2:14.26","ps3.2:14.27","ps3.2:14.28","ps3.2:14.29","ps3.2:14.30","ps3.2:14.31","ps3.2:14.32"],"kind":"text","text":{"pi":"Yāva brahmalokāpi kāyena vasaṁ vattetīti sace so iddhimā cetovasippatto brahmalokaṁ gantukāmo hoti, dūrepi santike adhiṭṭhāti—\n“santike hotū”ti.\nSantike hoti.\nSantikepi dūre adhiṭṭhāti—\n“dūre hotū”ti.\nDūre hoti.\nBahukampi thokaṁ adhiṭṭhāti—\n“thokaṁ hotū”ti.\nThokaṁ hoti.\nThokampi bahukaṁ adhiṭṭhāti—\n“bahukaṁ hotū”ti.\nBahukaṁ hoti.\nDibbena cakkhunā tassa brahmuno rūpaṁ passati.\nDibbāya sotadhātuyā tassa brahmuno saddaṁ suṇāti.\nCetopariyañāṇena tassa brahmuno cittaṁ pajānāti.\nSace so iddhimā cetovasippatto dissamānena kāyena brahmalokaṁ gantukāmo hoti, kāyavasena cittaṁ pariṇāmeti, kāyavasena cittaṁ adhiṭṭhāti.\nKāyavasena cittaṁ pariṇāmetvā, kāyavasena cittaṁ adhiṭṭhahitvā, sukhasaññañca lahusaññañca okkamitvā dissamānena kāyena brahmalokaṁ gacchati.\nSace so iddhimā cetovasippatto adissamānena kāyena brahmalokaṁ gantukāmo hoti, cittavasena kāyaṁ pariṇāmeti, cittavasena kāyaṁ adhiṭṭhāti.\nCittavasena kāyaṁ pariṇāmetvā, cittavasena kāyaṁ adhiṭṭhahitvā sukhasaññañca lahusaññañca okkamitvā adissamānena kāyena brahmalokaṁ gacchati.\nSo tassa brahmuno purato rūpiṁ abhinimmināti manomayaṁ sabbaṅgapaccaṅgiṁ ahīnindriyaṁ.\nSace so iddhimā caṅkamati, nimmitopi tattha caṅkamati.\nSace so iddhimā tiṭṭhati, nimmitopi tattha tiṭṭhati.\nSace so iddhimā nisīdati, nimmitopi tattha nisīdati.\nSace so iddhimā seyyaṁ kappeti, nimmitopi tattha seyyaṁ kappeti.\nSace so iddhimā dhūmāyati, nimmitopi tattha dhūmāyati.\nSace so iddhimā pajjalati, nimmitopi tattha pajjalati.\nSace so iddhimā dhammaṁ bhāsati, nimmitopi tattha dhammaṁ bhāsati.\nSace so iddhimā pañhaṁ pucchati, nimmitopi tattha pañhaṁ pucchati.\nSace so iddhimā pañhaṁ puṭṭho visajjeti, nimmitopi tattha pañhaṁ puṭṭho visajjeti.\nSace so iddhimā tena brahmunā saddhiṁ santiṭṭhati sallapati sākacchaṁ samāpajjati, nimmitopi tattha tena brahmunā saddhiṁ santiṭṭhati sallapati sākacchaṁ samāpajjati.\nYaññadeva so iddhimā karoti, taṁtadeva hi so nimmito karotīti—\nayaṁ adhiṭṭhānā iddhi."}},{"id":"ps3.2:15","sourceIds":["ps3.2:15.1","ps3.2:15.2","ps3.2:15.3","ps3.2:15.4","ps3.2:15.5","ps3.2:15.6","ps3.2:15.7","ps3.2:15.8"],"kind":"text","text":{"pi":"Katamā vikubbanā iddhi?\nSikhissa bhagavato arahato sammāsambuddhassa abhibhū nāma sāvako brahmaloke ṭhito sahassilokadhātuṁ sarena viññāpesi.\nSo dissamānenapi kāyena dhammaṁ desesi;\nadissamānenapi kāyena dhammaṁ desesi;\ndissamānenapi heṭṭhimena upaḍḍhakāyena adissamānenapi uparimena upaḍḍhakāyena dhammaṁ desesi.\nDissamānenapi uparimena upaḍḍhakāyena, adissamānenapi heṭṭhimena upaḍḍhakāyena dhammaṁ desesi.\nSo pakativaṇṇaṁ vijahitvā kumārakavaṇṇaṁ vā dasseti, nāgavaṇṇaṁ vā dasseti, supaṇṇavaṇṇaṁ vā dasseti, yakkhavaṇṇaṁ vā dasseti, indavaṇṇaṁ vā dasseti, devavaṇṇaṁ vā dasseti, brahmavaṇṇaṁ vā dasseti, samuddavaṇṇaṁ vā dasseti, pabbatavaṇṇaṁ vā dasseti, vanavaṇṇaṁ vā dasseti, sīhavaṇṇaṁ vā dasseti, byagghavaṇṇaṁ vā dasseti, dīpivaṇṇaṁ vā dasseti, hatthimpi dasseti, assampi dasseti, rathampi dasseti, pattimpi dasseti, vividhampi senābyūhaṁ dassetīti—\nayaṁ vikubbanā iddhi."}},{"id":"ps3.2:16","sourceIds":["ps3.2:16.1","ps3.2:16.2","ps3.2:16.3","ps3.2:16.4","ps3.2:16.5","ps3.2:16.6","ps3.2:16.7","ps3.2:16.8","ps3.2:16.9","ps3.2:16.10","ps3.2:16.11","ps3.2:16.12","ps3.2:16.13","ps3.2:16.14","ps3.2:16.15","ps3.2:16.16","ps3.2:16.17","ps3.2:16.18","ps3.2:16.19"],"kind":"text","text":{"pi":"Katamā manomayā iddhi?\nIdha bhikkhu imamhā kāyā aññaṁ kāyaṁ abhinimmināti rūpiṁ manomayaṁ sabbaṅgapaccaṅgiṁ ahīnindriyaṁ.\nSeyyathāpi puriso muñjamhā īsikaṁ pavāheyya.\nTassa evamassa—\n“ayaṁ muñjo, ayaṁ īsikā.\nAñño muñjo, aññā īsikā.\nMuñjamhā tveva īsikā pavāḷhā”ti.\nSeyyathā vā pana puriso asiṁ kosiyā pavāheyya.\nTassa evamassa—\n“ayaṁ asi, ayaṁ kosi.\nAñño asi, aññā kosi.\nKosiyā tveva asi pavāḷho”ti.\nSeyyathā vā pana puriso ahiṁ karaṇḍā uddhareyya.\nTassa evamassa—\n“ayaṁ ahi, ayaṁ karaṇḍo.\nAñño ahi, añño karaṇḍo.\nKaraṇḍā tveva ahi ubbhato”ti.\nEvamevaṁ bhikkhu imamhā kāyā aññaṁ kāyaṁ abhinimmināti rūpiṁ manomayaṁ sabbaṅgapaccaṅgiṁ ahīnindriyaṁ.\nAyaṁ manomayā iddhi."}},{"id":"ps3.2:17","sourceIds":["ps3.2:17.1","ps3.2:17.2","ps3.2:17.3","ps3.2:17.4","ps3.2:17.5","ps3.2:17.6","ps3.2:17.7","ps3.2:17.8","ps3.2:17.9","ps3.2:17.10","ps3.2:17.11","ps3.2:17.12"],"kind":"text","text":{"pi":"Katamā ñāṇavipphārā iddhi?\nAniccānupassanāya niccasaññāya pahānaṭṭho ijjhatīti—\nñāṇavipphārā iddhi.\nDukkhānupassanāya sukhasaññāya …\nanattānupassanāya attasaññāya …\nnibbidānupassanāya nandiyā …\nvirāgānupassanāya rāgassa …\nnirodhānupassanāya samudayassa …\npaṭinissaggānupassanāya ādānassa pahānaṭṭho ijjhatīti—\nñāṇavipphārā iddhi.\nĀyasmato bākulassa ñāṇavipphārā iddhi, āyasmato saṅkiccassa ñāṇavipphārā iddhi, āyasmato bhūtapālassa ñāṇavipphārā iddhi.\nAyaṁ ñāṇavipphārā iddhi."}},{"id":"ps3.2:18","sourceIds":["ps3.2:18.1","ps3.2:18.2","ps3.2:18.3","ps3.2:18.4","ps3.2:18.5","ps3.2:18.6","ps3.2:18.7","ps3.2:18.8","ps3.2:18.9","ps3.2:18.10","ps3.2:18.11","ps3.2:18.12","ps3.2:18.13","ps3.2:18.14"],"kind":"text","text":{"pi":"Katamā samādhivipphārā iddhi?\nPaṭhamena jhānena nīvaraṇānaṁ pahānaṭṭho ijjhatīti—\nsamādhivipphārā iddhi.\nDutiyena jhānena vitakkavicārānaṁ pahānaṭṭho ijjhatīti—\nsamādhivipphārā iddhi.\nTatiyena jhānena pītiyā pahānaṭṭho ijjhatīti …pe…\ncatutthena jhānena sukhadukkhānaṁ pahānaṭṭho ijjhatīti …pe…\nākāsānañcāyatanasamāpattiyā rūpasaññāya paṭighasaññāya nānattasaññāya pahānaṭṭho ijjhatīti …pe…\nviññāṇañcāyatanasamāpattiyā ākāsānañcāyatanasaññāya pahānaṭṭho ijjhatīti …pe…\nākiñcaññāyatanasamāpattiyā viññāṇañcāyatanasaññāya pahānaṭṭho ijjhatīti …pe…\nnevasaññānāsaññāyatanasamāpattiyā ākiñcaññāyatanasaññāya pahānaṭṭho ijjhatīti—\nsamādhivipphārā iddhi.\nĀyasmato sāriputtassa samādhivipphārā iddhi, āyasmato sañjīvassa samādhivipphārā iddhi, āyasmato khāṇukoṇḍaññassa samādhivipphārā iddhi, uttarāya upāsikāya samādhivipphārā iddhi, sāmāvatiyā upāsikāya samādhivipphārā iddhi.\nAyaṁ samādhivipphārā iddhi."}},{"id":"ps3.2:19","sourceIds":["ps3.2:19.1","ps3.2:19.2","ps3.2:19.3","ps3.2:19.4","ps3.2:19.5","ps3.2:19.6","ps3.2:19.7","ps3.2:19.8","ps3.2:19.9","ps3.2:19.10","ps3.2:19.11"],"kind":"text","text":{"pi":"Katamā ariyā iddhi?\nIdha bhikkhu sace ākaṅkhati—\n“paṭikūle appaṭikūlasaññī vihareyyan”ti, appaṭikūlasaññī tattha viharati.\nSace ākaṅkhati—\n“appaṭikūle paṭikūlasaññī vihareyyan”ti, paṭikūlasaññī tattha viharati.\nSace ākaṅkhati—\n“paṭikūle ca appaṭikūle ca appaṭikūlasaññī vihareyyan”ti, appaṭikūlasaññī tattha viharati.\nSace ākaṅkhati—\n“appaṭikūle ca paṭikūle ca paṭikūlasaññī vihareyyan”ti, paṭikūlasaññī tattha viharati.\nSace ākaṅkhati—\n“paṭikūle ca appaṭikūle ca tadubhayaṁ abhinivajjetvā upekkhako vihareyyaṁ sato sampajāno”ti, upekkhako tattha viharati sato sampajāno."}},{"id":"ps3.2:20","sourceIds":["ps3.2:20.1","ps3.2:20.2","ps3.2:20.3"],"kind":"text","text":{"pi":"Kathaṁ paṭikūle appaṭikūlasaññī viharati?\nAniṭṭhasmiṁ vatthusmiṁ mettāya vā pharati, dhātuto vā upasaṁharati.\nEvaṁ paṭikūle appaṭikūlasaññī viharati."}},{"id":"ps3.2:21","sourceIds":["ps3.2:21.1","ps3.2:21.2","ps3.2:21.3"],"kind":"text","text":{"pi":"Kathaṁ appaṭikūle paṭikūlasaññī viharati?\nIṭṭhasmiṁ vatthusmiṁ asubhāya vā pharati, aniccato vā upasaṁharati.\nEvaṁ appaṭikūle paṭikūlasaññī viharati."}},{"id":"ps3.2:22","sourceIds":["ps3.2:22.1","ps3.2:22.2","ps3.2:22.3"],"kind":"text","text":{"pi":"Kathaṁ paṭikūle ca appaṭikūle ca appaṭikūlasaññī viharati?\nAniṭṭhasmiñca iṭṭhasmiñca vatthusmiṁ mettāya vā pharati, dhātuto vā upasaṁharati.\nEvaṁ paṭikūle ca appaṭikūle ca appaṭikūlasaññī viharati."}},{"id":"ps3.2:23","sourceIds":["ps3.2:23.1","ps3.2:23.2","ps3.2:23.3"],"kind":"text","text":{"pi":"Kathaṁ appaṭikūle ca paṭikūle ca paṭikūlasaññī viharati?\nIṭṭhasmiñca aniṭṭhasmiñca vatthusmiṁ asubhāya vā pharati, aniccato vā upasaṁharati.\nEvaṁ appaṭikūle ca paṭikūle ca paṭikūlasaññī viharati."}},{"id":"ps3.2:24","sourceIds":["ps3.2:24.1","ps3.2:24.2","ps3.2:24.3","ps3.2:24.4","ps3.2:24.5","ps3.2:24.6","ps3.2:24.7","ps3.2:24.8","ps3.2:24.9"],"kind":"text","text":{"pi":"Kathaṁ paṭikūle ca appaṭikūle ca tadubhayaṁ abhinivajjetvā upekkhako viharati sato sampajāno?\nIdha bhikkhu cakkhunā rūpaṁ disvā neva sumano hoti na dummano, upekkhako viharati sato sampajāno.\nSotena saddaṁ sutvā …pe…\nghānena gandhaṁ ghāyitvā …\njivhāya rasaṁ sāyitvā …\nkāyena phoṭṭhabbaṁ phusitvā …\nmanasā dhammaṁ viññāya neva sumano hoti na dummano, upekkhako viharati sato sampajāno.\nEvaṁ paṭikūle ca appaṭikūle ca tadubhayaṁ abhinivajjetvā upekkhako viharati sato sampajāno.\nAyaṁ ariyā iddhi."}},{"id":"ps3.2:25","sourceIds":["ps3.2:25.1","ps3.2:25.2","ps3.2:25.3"],"kind":"text","text":{"pi":"Katamā kammavipākajā iddhi?\nSabbesaṁ pakkhīnaṁ, sabbesaṁ devānaṁ, ekaccānaṁ manussānaṁ, ekaccānaṁ vinipātikānaṁ.\nAyaṁ kammavipākajā iddhi."}},{"id":"ps3.2:26","sourceIds":["ps3.2:26.1","ps3.2:26.2","ps3.2:26.3","ps3.2:26.4"],"kind":"text","text":{"pi":"Katamā puññavato iddhi?\nRājā cakkavattī vehāsaṁ gacchati saddhiṁ caturaṅginiyā senāya, antamaso assabandhagopurise upādāya.\nJotikassa gahapatissa puññavato iddhi, jaṭilassa gahapatissa puññavato iddhi, meṇḍakassa gahapatissa puññavato iddhi, ghositassa gahapatissa puññavato iddhi, pañcannaṁ mahāpuññānaṁ puññavato iddhi.\nAyaṁ puññavato iddhi."}},{"id":"ps3.2:27","sourceIds":["ps3.2:27.1","ps3.2:27.2","ps3.2:27.3"],"kind":"text","text":{"pi":"Katamā vijjāmayā iddhi?\nVijjādharā vijjaṁ parijappetvā vehāsaṁ gacchanti, ākāse antalikkhe hatthimpi dassenti, assampi dassenti, rathampi dassenti, pattimpi dassenti, vividhampi senābyūhaṁ dassenti.\nAyaṁ vijjāmayā iddhi."}},{"id":"ps3.2:28","sourceIds":["ps3.2:28.1","ps3.2:28.2","ps3.2:28.3","ps3.2:28.4","ps3.2:28.5","ps3.2:28.6","ps3.2:28.7","ps3.2:28.8","ps3.2:28.9","ps3.2:28.10"],"kind":"text","text":{"pi":"Kathaṁ tattha tattha sammāpayogapaccayā ijjhanaṭṭhena iddhi?\nNekkhammena kāmacchandassa pahānaṭṭho ijjhatīti—\ntattha tattha sammāpayogapaccayā ijjhanaṭṭhena iddhi.\nAbyāpādena byāpādassa pahānaṭṭho ijjhatīti—\ntattha tattha sammāpayogapaccayā ijjhanaṭṭhena iddhi …pe…\narahattamaggena sabbakilesānaṁ pahānaṭṭho ijjhatīti—\ntattha tattha sammāpayogapaccayā ijjhanaṭṭhena iddhi.\nEvaṁ tattha tattha sammāpayogapaccayā ijjhanaṭṭhena iddhi.\nImā dasa iddhiyo.\nIddhikathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps3.2/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}