{"id":"ps3.3","title":"3.3. Abhisamayakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps3.3","title":"3.3. Abhisamayakathā","units":[{"id":"ps3.3:0","sourceIds":["ps3.3:0.1","ps3.3:0.2","ps3.3:0.3"],"kind":"text","text":{"pi":"Paṭisambhidāmagga\n3 Paññāvagga\n3.3. Abhisamayakathā"}},{"id":"ps3.3:1","sourceIds":["ps3.3:1.1","ps3.3:1.2","ps3.3:1.3"],"kind":"text","text":{"pi":"Abhisamayoti.\nKena abhisameti?\nCittena abhisameti."}},{"id":"ps3.3:2","sourceIds":["ps3.3:2.1","ps3.3:2.2","ps3.3:2.3"],"kind":"text","text":{"pi":"Hañci cittena abhisameti, tena hi aññāṇī abhisameti?\nNa aññāṇī abhisameti.\nÑāṇena abhisameti."}},{"id":"ps3.3:3","sourceIds":["ps3.3:3.1","ps3.3:3.2","ps3.3:3.3"],"kind":"text","text":{"pi":"Hañci ñāṇena abhisameti, tena hi acittena ca ñāṇena ca acittako abhisameti?\nNa acittako abhisameti.\nCittena ca ñāṇena ca abhisameti."}},{"id":"ps3.3:4","sourceIds":["ps3.3:4.1","ps3.3:4.2"],"kind":"text","text":{"pi":"Hañci cittena ca ñāṇena ca abhisameti, tena hi kāmāvacaracittena ca ñāṇena ca abhisameti?\nNa kāmāvacaracittena ca ñāṇena ca abhisameti."}},{"id":"ps3.3:5","sourceIds":["ps3.3:5.1","ps3.3:5.2"],"kind":"text","text":{"pi":"Tena hi rūpāvacaracittena ca ñāṇena ca abhisameti?\nNa rūpāvacaracittena ca ñāṇena ca abhisameti."}},{"id":"ps3.3:6","sourceIds":["ps3.3:6.1","ps3.3:6.2"],"kind":"text","text":{"pi":"Tena hi arūpāvacaracittena ca ñāṇena ca abhisameti?\nNa arūpāvacaracittena ca ñāṇena ca abhisameti."}},{"id":"ps3.3:7","sourceIds":["ps3.3:7.1","ps3.3:7.2"],"kind":"text","text":{"pi":"Tena hi kammassakatacittena ca ñāṇena ca abhisameti?\nNa kammassakatacittena ca ñāṇena ca abhisameti."}},{"id":"ps3.3:8","sourceIds":["ps3.3:8.1","ps3.3:8.2"],"kind":"text","text":{"pi":"Tena hi saccānulomikacittena ca ñāṇena ca abhisameti?\nNa saccānulomikacittena ca ñāṇena ca abhisameti."}},{"id":"ps3.3:9","sourceIds":["ps3.3:9.1","ps3.3:9.2"],"kind":"text","text":{"pi":"Tena hi atītacittena ca ñāṇena ca abhisameti?\nNa atītacittena ca ñāṇena ca abhisameti."}},{"id":"ps3.3:10","sourceIds":["ps3.3:10.1","ps3.3:10.2"],"kind":"text","text":{"pi":"Tena hi anāgatacittena ca ñāṇena ca abhisameti?\nNa anāgatacittena ca ñāṇena ca abhisameti."}},{"id":"ps3.3:11","sourceIds":["ps3.3:11.1","ps3.3:11.2","ps3.3:11.3"],"kind":"text","text":{"pi":"Tena hi paccuppannalokiyacittena ca ñāṇena ca abhisameti?\nNa paccuppannalokiyacittena ca ñāṇena ca abhisameti.\nLokuttaramaggakkhaṇe paccuppannacittena ca ñāṇena ca abhisameti."}},{"id":"ps3.3:12","sourceIds":["ps3.3:12.1","ps3.3:12.2","ps3.3:12.3"],"kind":"text","text":{"pi":"Kathaṁ lokuttaramaggakkhaṇe paccuppannacittena ca ñāṇena ca abhisameti?\nLokuttaramaggakkhaṇe uppādādhipateyyaṁ cittaṁ ñāṇassa hetu paccayo ca taṁsampayuttaṁ nirodhagocaraṁ dassanādhipateyyaṁ ñāṇaṁ cittassa hetu paccayo ca taṁsampayuttaṁ ñāṇaṁ nirodhagocaraṁ.\nEvaṁ lokuttaramaggakkhaṇe paccuppannacittena ca ñāṇena ca abhisameti."}},{"id":"ps3.3:13","sourceIds":["ps3.3:13.1","ps3.3:13.2","ps3.3:13.3","ps3.3:13.4","ps3.3:13.5","ps3.3:13.6","ps3.3:13.7","ps3.3:13.8"],"kind":"text","text":{"pi":"Kiṁ nu ettakoyeva abhisamayoti?\nNa hi.\nLokuttaramaggakkhaṇe dassanābhisamayo sammādiṭṭhi, abhiniropanābhisamayo sammāsaṅkappo, pariggahābhisamayo sammāvācā, samuṭṭhānābhisamayo sammākammanto, vodānābhisamayo sammāājīvo, paggahābhisamayo sammāvāyāmo, upaṭṭhānābhisamayo sammāsati, avikkhepābhisamayo sammāsamādhi;\nupaṭṭhānābhisamayo satisambojjhaṅgo, pavicayābhisamayo dhammavicayasambojjhaṅgo, paggahābhisamayo vīriyasambojjhaṅgo, pharaṇābhisamayo pītisambojjhaṅgo, upasamābhisamayo passaddhisambojjhaṅgo, avikkhepābhisamayo samādhisambojjhaṅgo, paṭisaṅkhānābhisamayo upekkhāsambojjhaṅgo;\nassaddhiye akampiyābhisamayo saddhābalaṁ, kosajje akampiyābhisamayo vīriyabalaṁ, pamāde akampiyābhisamayo satibalaṁ, uddhacce akampiyābhisamayo samādhibalaṁ, avijjāya akampiyābhisamayo paññābalaṁ;\nadhimokkhābhisamayo saddhindriyaṁ, paggahābhisamayo vīriyindriyaṁ, upaṭṭhānābhisamayo satindriyaṁ, avikkhepābhisamayo samādhindriyaṁ, dassanābhisamayo paññindriyaṁ.\nĀdhipateyyaṭṭhena indriyābhisamayo, akampiyaṭṭhena balābhisamayo, niyyānaṭṭhena bojjhaṅgābhisamayo, hetuṭṭhena maggābhisamayo, upaṭṭhānaṭṭhena satipaṭṭhānābhisamayo, padahaṭṭhena sammappadhānābhisamayo, ijjhanaṭṭhena iddhipādābhisamayo, tathaṭṭhena saccābhisamayo, avikkhepaṭṭhena samathābhisamayo, anupassanaṭṭhena vipassanābhisamayo, ekarasaṭṭhena samathavipassanābhisamayo, anativattanaṭṭhena yuganaddhābhisamayo, saṁvaraṭṭhena sīlavisuddhiabhisamayo, avikkhepaṭṭhena visuddhiabhisamayo, dassanaṭṭhena diṭṭhivisuddhiabhisamayo, muttaṭṭhena vimokkhābhisamayo, paṭivedhaṭṭhena vijjābhisamayo, pariccāgaṭṭhena vimuttiabhisamayo, samucchedaṭṭhena khaye ñāṇaṁ abhisamayo.\nChando mūlaṭṭhena abhisamayo, manasikāro samuṭṭhānaṭṭhena abhisamayo, phasso samodhānaṭṭhena abhisamayo, vedanā samosaraṇaṭṭhena abhisamayo, samādhi pamukhaṭṭhena abhisamayo, sati ādhipateyyaṭṭhena abhisamayo, paññā taduttaraṭṭhena abhisamayo, vimutti sāraṭṭhena abhisamayo, amatogadhaṁ nibbānaṁ pariyosānaṭṭhena abhisamayo."}},{"id":"ps3.3:14","sourceIds":["ps3.3:14.1","ps3.3:14.2","ps3.3:14.3","ps3.3:14.4"],"kind":"text","text":{"pi":"Kiṁ nu ettakoyeva abhisamayoti?\nNa hi.\nSotāpattimaggakkhaṇe dassanābhisamayo sammādiṭṭhi …pe…\namatogadhaṁ nibbānaṁ pariyosānaṭṭhena abhisamayo."}},{"id":"ps3.3:15","sourceIds":["ps3.3:15.1","ps3.3:15.2","ps3.3:15.3","ps3.3:15.4","ps3.3:15.5","ps3.3:15.6"],"kind":"text","text":{"pi":"Kiṁ nu ettakoyeva abhisamayoti?\nNa hi.\nSotāpattiphalakkhaṇe dassanābhisamayo sammādiṭṭhi …pe…\npaṭippassaddhaṭṭhena anuppāde ñāṇaṁ abhisamayo.\nChando mūlaṭṭhena abhisamayo …pe…\namatogadhaṁ nibbānaṁ pariyosānaṭṭhena abhisamayo."}},{"id":"ps3.3:16","sourceIds":["ps3.3:16.1","ps3.3:16.2","ps3.3:16.3","ps3.3:16.4","ps3.3:16.5","ps3.3:16.6","ps3.3:16.7","ps3.3:16.8","ps3.3:16.9","ps3.3:16.10","ps3.3:16.11"],"kind":"text","text":{"pi":"Kiṁ nu ettakoyeva abhisamayoti?\nNa hi.\nSakadāgāmimaggakkhaṇe …pe…\nsakadāgāmiphalakkhaṇe …\nanāgāmimaggakkhaṇe …\nanāgāmiphalakkhaṇe …\narahattamaggakkhaṇe …pe…\narahattaphalakkhaṇe dassanābhisamayo sammādiṭṭhi, abhiniropanābhisamayo sammāsaṅkappo …pe…\npaṭippassaddhaṭṭhena anuppāde ñāṇaṁ abhisamayo.\nChando mūlaṭṭhena abhisamayo …pe…\namatogadhaṁ nibbānaṁ pariyosānaṭṭhena abhisamayo."}},{"id":"ps3.3:17","sourceIds":["ps3.3:17.1","ps3.3:17.2","ps3.3:17.3","ps3.3:17.4","ps3.3:17.5","ps3.3:17.6","ps3.3:17.7","ps3.3:17.8","ps3.3:17.9"],"kind":"text","text":{"pi":"Yvāyaṁ kilese pajahati, atīte kilese pajahati …pe…\nanāgate kilese pajahati, paccuppanne kilese pajahati, atīte kilese pajahatīti.\nHañci atīte kilese pajahati, tena hi khīṇaṁ khepeti, niruddhaṁ nirodheti, vigataṁ vigameti, atthaṅgataṁ atthaṅgameti, atītaṁ yaṁ na atthi taṁ pajahatīti?\nNa atīte kilese pajahatīti.\nAnāgate kilese pajahatīti.\nHañci anāgate kilese pajahati, tena hi ajātaṁ pajahati, anibbattaṁ pajahati, anuppannaṁ pajahati, apātubhūtaṁ pajahati, anāgataṁ yaṁ na atthi taṁ pajahatīti?\nNa anāgate kilese pajahatīti.\nPaccuppanne kilese pajahatīti.\nHañci paccuppanne kilese pajahati, tena hi ratto rāgaṁ pajahati, duṭṭho dosaṁ pajahati, mūḷho mohaṁ pajahati, vinibaddho mānaṁ pajahati, parāmaṭṭho diṭṭhiṁ pajahati, vikkhepagato uddhaccaṁ pajahati, aniṭṭhaṅgato vicikicchaṁ pajahati, thāmagato anusayaṁ pajahati, kaṇhasukkadhammā yuganaddhā samameva vattanti, saṅkilesikā maggabhāvanā hoti?"}},{"id":"ps3.3:18","sourceIds":["ps3.3:18.1","ps3.3:18.2","ps3.3:18.3","ps3.3:18.4","ps3.3:18.5","ps3.3:18.6","ps3.3:18.7","ps3.3:18.8","ps3.3:18.9","ps3.3:18.10","ps3.3:18.11","ps3.3:18.12","ps3.3:18.13","ps3.3:18.14","ps3.3:18.15","ps3.3:18.16","ps3.3:18.17","ps3.3:18.18","ps3.3:18.19"],"kind":"text","text":{"pi":"Na hi atīte kilese pajahati, na anāgate kilese pajahati, na paccuppanne kilese pajahatīti.\nHañci na atīte kilese pajahati, na anāgate …pe…\nna paccuppanne kilese pajahati, tena hi natthi maggabhāvanā, natthi phalasacchikiriyā, natthi kilesappahānaṁ, natthi dhammābhisamayoti?\nAtthi maggabhāvanā, atthi phalasacchikiriyā, atthi kilesappahānaṁ, atthi dhammābhisamayo.\nYathā kathaṁ viya?\nSeyyathāpi taruṇo rukkho ajātaphalo.\nTamenaṁ puriso mūlaṁ chindeyya.\nYe tassa rukkhassa ajātaphalā, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti.\nEvamevaṁ uppādo hetu, uppādo paccayo kilesānaṁ nibbattiyāti.\nUppāde ādīnavaṁ disvā anuppāde cittaṁ pakkhandati.\nAnuppāde cittassa pakkhandattā ye uppādapaccayā kilesā nibbatteyyuṁ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti.\nEvaṁ hetunirodhā dukkhanirodho.\nPavattaṁ hetu, nimittaṁ hetu, āyūhanā hetu.\nĀyūhanā paccayo kilesānaṁ nibbattiyāti.\nĀyūhane ādīnavaṁ disvā anāyūhane cittaṁ pakkhandati.\nAnāyūhane cittassa pakkhandattā, ye āyūhanapaccayā kilesā nibbatteyyuṁ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti.\nEvaṁ hetunirodhā dukkhanirodho.\nEvaṁ atthi maggabhāvanā, atthi phalasacchikiriyā, atthi kilesappahānaṁ, atthi dhammābhisamayoti.\nAbhisamayakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps3.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}