{"id":"ps3.4","title":"3.4. Vivekakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps3.4","title":"3.4. Vivekakathā","units":[{"id":"ps3.4:0","sourceIds":["ps3.4:0.1","ps3.4:0.2","ps3.4:0.3"],"kind":"text","text":{"pi":"Paṭisambhidāmagga\n3 Paññāvagga\n3.4. Vivekakathā"}},{"id":"ps3.4:1","sourceIds":["ps3.4:1.1","ps3.4:1.2","ps3.4:1.3"],"kind":"text","text":{"pi":"Sāvatthinidānaṁ.\n“Seyyathāpi, bhikkhave, ye keci balakaraṇīyā kammantā karīyanti, sabbe te pathaviṁ nissāya pathaviyaṁ patiṭṭhāya evamete balakaraṇīyā kammantā karīyanti;\nevamevaṁ, bhikkhave, bhikkhu sīlaṁ nissāya sīle patiṭṭhāya ariyaṁ aṭṭhaṅgikaṁ maggaṁ bhāveti, ariyaṁ aṭṭhaṅgikaṁ maggaṁ bahulīkaroti."}},{"id":"ps3.4:2","sourceIds":["ps3.4:2.1","ps3.4:2.2","ps3.4:2.3","ps3.4:2.4","ps3.4:2.5","ps3.4:2.6","ps3.4:2.7","ps3.4:2.8","ps3.4:2.9","ps3.4:2.10"],"kind":"text","text":{"pi":"Kathañca, bhikkhave, bhikkhu sīlaṁ nissāya sīle patiṭṭhāya ariyaṁ aṭṭhaṅgikaṁ maggaṁ bhāveti, ariyaṁ aṭṭhaṅgikaṁ maggaṁ bahulīkaroti?\nIdha, bhikkhave, bhikkhu sammādiṭṭhiṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ.\nSammāsaṅkappaṁ …pe…\nsammāvācaṁ …\nsammākammantaṁ …\nsammāājīvaṁ …\nsammāvāyāmaṁ …\nsammāsatiṁ …\nsammāsamādhiṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ.\nEvaṁ kho, bhikkhave, bhikkhu sīlaṁ nissāya sīle patiṭṭhāya ariyaṁ aṭṭhaṅgikaṁ maggaṁ bhāveti, ariyaṁ aṭṭhaṅgikaṁ maggaṁ bahulīkaroti."}},{"id":"ps3.4:3","sourceIds":["ps3.4:3.1","ps3.4:3.2"],"kind":"text","text":{"pi":"Seyyathāpi, bhikkhave, ye keci bījagāmabhūtagāmā vuddhiṁ viruḷhiṁ vepullaṁ āpajjanti, sabbe te pathaviṁ nissāya pathaviyaṁ patiṭṭhāya evamete bījagāmabhūtagāmā vuddhiṁ viruḷhiṁ vepullaṁ āpajjanti;\nevamevaṁ kho, bhikkhave, bhikkhu sīlaṁ nissāya sīle patiṭṭhāya ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ bahulīkaronto vuddhiṁ viruḷhiṁ vepullaṁ pāpuṇāti dhammesu."}},{"id":"ps3.4:4","sourceIds":["ps3.4:4.1","ps3.4:4.2","ps3.4:4.3","ps3.4:4.4","ps3.4:4.5","ps3.4:4.6","ps3.4:4.7","ps3.4:4.8","ps3.4:4.9","ps3.4:4.10"],"kind":"text","text":{"pi":"Kathañca, bhikkhave, bhikkhu sīlaṁ nissāya sīle patiṭṭhāya ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ bahulīkaronto vuddhiṁ viruḷhiṁ vepullaṁ pāpuṇāti dhammesu?\nIdha, bhikkhave, bhikkhu sammādiṭṭhiṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ.\nSammāsaṅkappaṁ bhāveti …pe…\nsammāvācaṁ bhāveti …\nsammākammantaṁ bhāveti …\nsammāājīvaṁ bhāveti …\nsammāvāyāmaṁ bhāveti …\nsammāsatiṁ bhāveti …\nsammāsamādhiṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ.\nEvaṁ kho, bhikkhave, bhikkhu sīlaṁ nissāya sīle patiṭṭhāya ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ bahulīkaronto vuddhiṁ viruḷhiṁ vepullaṁ pāpuṇāti dhammesū”ti."}},{"id":"ps3.4:5","sourceIds":["ps3.4:5.0","ps3.4:5.1","ps3.4:5.2","ps3.4:5.3","ps3.4:5.4","ps3.4:5.5","ps3.4:5.6","ps3.4:5.7","ps3.4:5.8"],"kind":"text","text":{"pi":"3.4.1. Maggaṅganiddesa\nSammādiṭṭhiyā pañca vivekā, pañca virāgā, pañca nirodhā, pañca vosaggā, dvādasa nissayā.\nSammāsaṅkappassa …pe…\nsammāvācāya …\nsammākammantassa …\nsammāājīvassa …\nsammāvāyāmassa …\nsammāsatiyā …\nsammāsamādhissa pañca vivekā, pañca virāgā, pañca nirodhā, pañca vosaggā, dvādasa nissayā."}},{"id":"ps3.4:6","sourceIds":["ps3.4:6.1","ps3.4:6.2","ps3.4:6.3","ps3.4:6.4","ps3.4:6.5"],"kind":"text","text":{"pi":"Sammādiṭṭhiyā katame pañca vivekā?\nVikkhambhanaviveko, tadaṅgaviveko samucchedaviveko, paṭippassaddhiviveko, nissaraṇaviveko.\nVikkhambhanaviveko ca nīvaraṇānaṁ paṭhamajjhānaṁ bhāvayato, tadaṅgaviveko ca diṭṭhigatānaṁ nibbedhabhāgiyaṁ samādhiṁ bhāvayato, samucchedaviveko ca lokuttaraṁ khayagāmimaggaṁ bhāvayato, paṭippassaddhiviveko ca phalakkhaṇe, nissaraṇaviveko ca nirodho nibbānaṁ.\nSammādiṭṭhiyā ime pañca vivekā.\nImesu pañcasu vivekesu chandajāto hoti saddhādhimutto, cittañcassa svādhiṭṭhitaṁ."}},{"id":"ps3.4:7","sourceIds":["ps3.4:7.1","ps3.4:7.2","ps3.4:7.3","ps3.4:7.4","ps3.4:7.5"],"kind":"text","text":{"pi":"Sammādiṭṭhiyā katame pañca virāgā?\nVikkhambhanavirāgo, tadaṅgavirāgo, samucchedavirāgo, paṭippassaddhivirāgo, nissaraṇavirāgo.\nVikkhambhanavirāgo ca nīvaraṇānaṁ paṭhamajjhānaṁ bhāvayato, tadaṅgavirāgo ca diṭṭhigatānaṁ nibbedhabhāgiyaṁ samādhiṁ bhāvayato, samucchedavirāgo ca lokuttaraṁ khayagāmimaggaṁ bhāvayato, paṭippassaddhivirāgo ca phalakkhaṇe, nissaraṇavirāgo ca nirodho nibbānaṁ.\nSammādiṭṭhiyā ime pañca virāgā.\nImesu pañcasu virāgesu chandajāto hoti saddhādhimutto, cittañcassa svādhiṭṭhitaṁ."}},{"id":"ps3.4:8","sourceIds":["ps3.4:8.1","ps3.4:8.2","ps3.4:8.3","ps3.4:8.4","ps3.4:8.5"],"kind":"text","text":{"pi":"Sammādiṭṭhiyā katame pañca nirodhā?\nVikkhambhananirodho, tadaṅganirodho, samucchedanirodho, paṭippassaddhinirodho, nissaraṇanirodho.\nVikkhambhananirodho ca nīvaraṇānaṁ paṭhamajjhānaṁ bhāvayato, tadaṅganirodho ca diṭṭhigatānaṁ nibbedhabhāgiyaṁ samādhiṁ bhāvayato, samucchedanirodho ca lokuttaraṁ khayagāmimaggaṁ bhāvayato, paṭippassaddhinirodho ca phalakkhaṇe, nissaraṇanirodho ca amatā dhātu.\nSammādiṭṭhiyā ime pañca nirodhā.\nImesu pañcasu nirodhesu chandajāto hoti saddhādhimutto, cittañcassa svādhiṭṭhitaṁ."}},{"id":"ps3.4:9","sourceIds":["ps3.4:9.1","ps3.4:9.2","ps3.4:9.3","ps3.4:9.4","ps3.4:9.5","ps3.4:9.6"],"kind":"text","text":{"pi":"Sammādiṭṭhiyā katame pañca vosaggā?\nVikkhambhanavosaggo, tadaṅgavosaggo, samucchedavosaggo, paṭippassaddhivosaggo, nissaraṇavosaggo.\nVikkhambhanavosaggo ca nīvaraṇānaṁ paṭhamajjhānaṁ bhāvayato, tadaṅgavosaggo ca diṭṭhigatānaṁ nibbedhabhāgiyaṁ samādhiṁ bhāvayato, samucchedavosaggo ca lokuttaraṁ khayagāmimaggaṁ bhāvayato, paṭippassaddhivosaggo ca phalakkhaṇe, nissaraṇavosaggo ca nirodho nibbānaṁ.\nSammādiṭṭhiyā ime pañca vosaggā.\nImesu pañcasu vosaggesu chandajāto hoti saddhādhimutto, cittañcassa svādhiṭṭhitaṁ.\nSammādiṭṭhiyā ime pañca vivekā, pañca virāgā, pañca nirodhā, pañca vosaggā, dvādasa nissayā."}},{"id":"ps3.4:10","sourceIds":["ps3.4:10.1","ps3.4:10.2","ps3.4:10.3","ps3.4:10.4","ps3.4:10.5","ps3.4:10.6","ps3.4:10.7","ps3.4:10.8","ps3.4:10.9","ps3.4:10.10","ps3.4:10.11"],"kind":"text","text":{"pi":"Sammāsaṅkappassa …pe…\nsammāvācāya …\nsammākammantassa …\nsammāājīvassa …\nsammāvāyāmassa …\nsammāsatiyā …\nsammāsamādhissa katame pañca vivekā?\nVikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko.\nVikkhambhanaviveko ca nīvaraṇānaṁ paṭhamajjhānaṁ bhāvayato, tadaṅgaviveko ca diṭṭhigatānaṁ nibbedhabhāgiyaṁ samādhiṁ bhāvayato, samucchedaviveko ca lokuttaraṁ khayagāmimaggaṁ bhāvayato, paṭippassaddhiviveko ca phalakkhaṇe nissaraṇaviveko ca nirodho nibbānaṁ.\nSammāsamādhissa ime pañca vivekā.\nImesu pañcasu vivekesu chandajāto hoti saddhādhimutto, cittañcassa svādhiṭṭhitaṁ."}},{"id":"ps3.4:11","sourceIds":["ps3.4:11.1","ps3.4:11.2","ps3.4:11.3","ps3.4:11.4","ps3.4:11.5"],"kind":"text","text":{"pi":"Sammāsamādhissa katame pañca virāgā?\nVikkhambhanavirāgo, tadaṅgavirāgo, samucchedavirāgo, paṭippassaddhivirāgo, nissaraṇavirāgo.\nVikkhambhanavirāgo ca nīvaraṇānaṁ paṭhamajjhānaṁ bhāvayato, tadaṅgavirāgo ca diṭṭhigatānaṁ nibbedhabhāgiyaṁ samādhiṁ bhāvayato, samucchedavirāgo ca lokuttaraṁ khayagāmimaggaṁ bhāvayato, paṭippassaddhivirāgo ca phalakkhaṇe, nissaraṇavirāgo ca nirodho nibbānaṁ.\nSammāsamādhissa ime pañca virāgā.\nImesu pañcasu virāgesu chandajāto hoti saddhādhimutto, cittañcassa svādhiṭṭhitaṁ."}},{"id":"ps3.4:12","sourceIds":["ps3.4:12.1","ps3.4:12.2","ps3.4:12.3","ps3.4:12.4","ps3.4:12.5"],"kind":"text","text":{"pi":"Sammāsamādhissa katame pañca nirodhā?\nVikkhambhananirodho, tadaṅganirodho, samucchedanirodho, paṭippassaddhinirodho, nissaraṇanirodho.\nVikkhambhananirodho ca nīvaraṇānaṁ paṭhamajjhānaṁ bhāvayato, tadaṅganirodho ca diṭṭhigatānaṁ nibbedhabhāgiyaṁ samādhiṁ bhāvayato, samucchedanirodho ca lokuttaraṁ khayagāmimaggaṁ bhāvayato, paṭippassaddhinirodho ca phalakkhaṇe, nissaraṇanirodho ca amatā dhātu.\nSammāsamādhissa ime pañca nirodhā.\nImesu pañcasu nirodhesu chandajāto hoti saddhādhimutto, cittañcassa svādhiṭṭhitaṁ."}},{"id":"ps3.4:13","sourceIds":["ps3.4:13.1","ps3.4:13.2","ps3.4:13.3","ps3.4:13.4","ps3.4:13.5","ps3.4:13.6"],"kind":"text","text":{"pi":"Sammāsamādhissa katame pañca vosaggā?\nVikkhambhanavosaggo, tadaṅgavosaggo, samucchedavosaggo, paṭippassaddhivosaggo, nissaraṇavosaggo.\nVikkhambhanavosaggo ca nīvaraṇānaṁ paṭhamajjhānaṁ bhāvayato, tadaṅgavosaggo ca diṭṭhigatānaṁ nibbedhabhāgiyaṁ samādhiṁ bhāvayato, samucchedavosaggo ca lokuttaraṁ khayagāmimaggaṁ bhāvayato, paṭippassaddhivosaggo ca phalakkhaṇe, nissaraṇavosaggo ca nirodho nibbānaṁ.\nSammāsamādhissa ime pañca vosaggā.\nImesu pañcasu vosaggesu chandajāto hoti saddhādhimutto, cittañcassa svādhiṭṭhitaṁ.\nSammāsamādhissa ime pañca vivekā, pañca virāgā, pañca nirodhā, pañca vosaggā, dvādasa nissayā."}},{"id":"ps3.4:14","sourceIds":["ps3.4:14.1","ps3.4:14.2","ps3.4:14.3","ps3.4:14.4","ps3.4:14.5","ps3.4:14.6"],"kind":"text","text":{"pi":"“Seyyathāpi, bhikkhave, ye keci balakaraṇīyā kammantā karīyanti, sabbe te pathaviṁ nissāya pathaviyaṁ patiṭṭhāya evamete balakaraṇīyā kammantā karīyanti;\nevamevaṁ kho, bhikkhave, bhikkhu sīlaṁ nissāya sīle patiṭṭhāya satta bojjhaṅge bhāveti, satta bojjhaṅge bahulīkaroti …pe…\nsatta bojjhaṅge bhāvento satta bojjhaṅge bahulīkaronto vuddhiṁ virūḷhiṁ vepullaṁ pāpuṇāti dhammesu …pe…\npañca balāni bhāveti, pañca balāni bahulīkaroti …pe…\npañca balāni bhāvento pañca balāni bahulīkaronto vuddhiṁ virūḷhiṁ vepullaṁ pāpuṇāti dhammesu …pe…\npañcindriyāni bhāveti, pañcindriyāni bahulīkaroti …pe…."}},{"id":"ps3.4:15","sourceIds":["ps3.4:15.1","ps3.4:15.2"],"kind":"text","text":{"pi":"Seyyathāpi, bhikkhave, ye keci bījagāmabhūtagāmā vuddhiṁ virūḷhiṁ vepullaṁ āpajjanti, sabbe te pathaviṁ nissāya pathaviyaṁ patiṭṭhāya evamete bījagāmabhūtagāmā vuddhiṁ virūḷhiṁ vepullaṁ āpajjanti;\nevamevaṁ kho, bhikkhave, bhikkhu sīlaṁ nissāya sīle patiṭṭhāya pañcindriyāni bhāvento pañcindriyāni bahulīkaronto vuddhiṁ virūḷhiṁ vepullaṁ pāpuṇāti dhammesu."}},{"id":"ps3.4:16","sourceIds":["ps3.4:16.1","ps3.4:16.2","ps3.4:16.3","ps3.4:16.4","ps3.4:16.5","ps3.4:16.6","ps3.4:16.7","ps3.4:16.8"],"kind":"text","text":{"pi":"Kathañca, bhikkhave, bhikkhu sīlaṁ nissāya sīle patiṭṭhāya pañcindriyāni bhāvento pañcindriyāni bahulīkaronto vuddhiṁ virūḷhiṁ vepullaṁ pāpuṇāti dhammesu?\nIdha, bhikkhave, bhikkhu saddhindriyaṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ.\nVīriyindriyaṁ bhāveti …pe…\nsatindriyaṁ bhāveti …pe…\nsamādhindriyaṁ bhāveti …pe…\npaññindriyaṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ.\nEvaṁ kho, bhikkhave, bhikkhu sīlaṁ nissāya …pe…\npāpuṇāti dhammesū”ti."}},{"id":"ps3.4:17","sourceIds":["ps3.4:17.0","ps3.4:17.1","ps3.4:17.2","ps3.4:17.3","ps3.4:17.4","ps3.4:17.5"],"kind":"text","text":{"pi":"3.4.2. Indriyaniddesa\nSaddhindriyassa pañca vivekā, pañca virāgā, pañca nirodhā, pañca vosaggā, dvādasa nissayā.\nVīriyindriyassa …pe…\nsatindriyassa …pe…\nsamādhindriyassa …pe…\npaññindriyassa pañca vivekā, pañca virāgā, pañca nirodhā, pañca vosaggā, dvādasa nissayā."}},{"id":"ps3.4:18","sourceIds":["ps3.4:18.1","ps3.4:18.2","ps3.4:18.3","ps3.4:18.4","ps3.4:18.5","ps3.4:18.6"],"kind":"text","text":{"pi":"Saddhindriyassa katame pañca vivekā?\nVikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko.\nVikkhambhanaviveko ca nīvaraṇānaṁ paṭhamajjhānaṁ bhāvayato, tadaṅgaviveko ca diṭṭhigatānaṁ nibbedhabhāgiyaṁ samādhiṁ bhāvayato, samucchedaviveko ca lokuttaraṁ khayagāmimaggaṁ bhāvayato, paṭippassaddhiviveko ca phalakkhaṇe, nissaraṇaviveko ca nirodho nibbānaṁ.\nSaddhindriyassa ime pañca vivekā.\nImesu pañcasu vivekesu chandajāto hoti saddhādhimutto, cittañcassa svādhiṭṭhitaṁ …pe…\nsaddhindriyassa ime pañca vivekā, pañca virāgā, pañca nirodhā, pañca vosaggā, dvādasa nissayā."}},{"id":"ps3.4:19","sourceIds":["ps3.4:19.1","ps3.4:19.2","ps3.4:19.3","ps3.4:19.4","ps3.4:19.5","ps3.4:19.6","ps3.4:19.7"],"kind":"text","text":{"pi":"Vīriyindriyassa …pe…\nsatindriyassa …pe…\nsamādhindriyassa …\npaññindriyassa katame pañca vivekā?\nVikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko …pe…\npaññindriyassa ime pañca vivekā, pañca virāgā, pañca nirodhā, pañca vosaggā, dvādasa nissayāti.\nVivekakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps3.4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}