{"id":"ps3.5","title":"3.5. Cariyākathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps3.5","title":"3.5. Cariyākathā","units":[{"id":"ps3.5:0","sourceIds":["ps3.5:0.1","ps3.5:0.2","ps3.5:0.3"],"kind":"text","text":{"pi":"Paṭisambhidāmagga\n3 Paññāvagga\n3.5. Cariyākathā"}},{"id":"ps3.5:1","sourceIds":["ps3.5:1.1","ps3.5:1.2"],"kind":"text","text":{"pi":"Cariyāti, aṭṭha cariyāyo—\niriyāpathacariyā, āyatanacariyā, saticariyā, samādhicariyā, ñāṇacariyā, maggacariyā, patticariyā, lokatthacariyāti."}},{"id":"ps3.5:2","sourceIds":["ps3.5:2.1","ps3.5:2.2","ps3.5:2.3","ps3.5:2.4","ps3.5:2.5","ps3.5:2.6","ps3.5:2.7","ps3.5:2.8"],"kind":"text","text":{"pi":"Iriyāpathacariyāti catūsu iriyāpathesu.\nĀyatanacariyāti chasu ajjhattikabāhiresu āyatanesu.\nSaticariyāti catūsu satipaṭṭhānesu.\nSamādhicariyāti catūsu jhānesu.\nÑāṇacariyāti catūsu ariyasaccesu.\nMaggacariyāti catūsu ariyamaggesu.\nPatticariyāti catūsu sāmaññaphalesu.\nLokatthacariyāti tathāgatesu arahantesu sammāsambuddhesu padese paccekabuddhesu padese sāvakesu."}},{"id":"ps3.5:3","sourceIds":["ps3.5:3.1","ps3.5:3.2","ps3.5:3.3","ps3.5:3.4","ps3.5:3.5","ps3.5:3.6","ps3.5:3.7","ps3.5:3.8","ps3.5:3.9"],"kind":"text","text":{"pi":"Iriyāpathacariyā ca paṇidhisampannānaṁ.\nĀyatanacariyā ca indriyesu guttadvārānaṁ.\nSaticariyā ca appamādavihārīnaṁ.\nSamādhicariyā ca adhicittamanuyuttānaṁ.\nÑāṇacariyā ca buddhisampannānaṁ.\nMaggacariyā ca sammāpaṭipannānaṁ.\nPatticariyā ca adhigataphalānaṁ.\nLokatthacariyā ca tathāgatānaṁ arahantānaṁ sammāsambuddhānaṁ padese paccekabuddhānaṁ padese sāvakānaṁ.\nImā aṭṭha cariyāyo."}},{"id":"ps3.5:4","sourceIds":["ps3.5:4.1","ps3.5:4.2","ps3.5:4.3"],"kind":"text","text":{"pi":"Aparāpi aṭṭha cariyāyo.\nAdhimuccanto saddhāya carati, paggaṇhanto vīriyena carati, upaṭṭhāpento satiyā carati, avikkhepaṁ karonto samādhinā carati, pajānanto paññāya carati, vijānanto viññāṇacariyāya carati, evaṁ paṭipannassa kusalā dhammā āyāpentīti āyatanacariyāya carati, evaṁ paṭipanno visesamadhigacchatīti visesacariyāya carati.\nImā aṭṭha cariyāyo."}},{"id":"ps3.5:5","sourceIds":["ps3.5:5.1","ps3.5:5.2","ps3.5:5.3","ps3.5:5.4"],"kind":"text","text":{"pi":"Aparāpi aṭṭha cariyāyo.\nDassanacariyā ca sammādiṭṭhiyā, abhiniropanacariyā ca sammāsaṅkappassa, pariggahacariyā ca sammāvācāya, samuṭṭhānacariyā ca sammākammantassa, vodānacariyā ca sammāājīvassa, paggahacariyā ca sammāvāyāmassa, upaṭṭhānacariyā ca sammāsatiyā, avikkhepacariyā ca sammāsamādhissa.\nImā aṭṭha cariyāyoti.\nCariyākathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps3.5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}