{"id":"ps3.6","title":"3.6. Pāṭihāriyakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps3.6","title":"3.6. Pāṭihāriyakathā","units":[{"id":"ps3.6:0","sourceIds":["ps3.6:0.1","ps3.6:0.2","ps3.6:0.3"],"kind":"text","text":{"pi":"Paṭisambhidāmagga\n3 Paññāvagga\n3.6. Pāṭihāriyakathā"}},{"id":"ps3.6:1","sourceIds":["ps3.6:1.1","ps3.6:1.2","ps3.6:1.3"],"kind":"text","text":{"pi":"“Tīṇimāni, bhikkhave, pāṭihāriyāni.\nKatamāni tīṇi?\nIddhipāṭihāriyaṁ, ādesanāpāṭihāriyaṁ, anusāsanīpāṭihāriyaṁ."}},{"id":"ps3.6:2","sourceIds":["ps3.6:2.1","ps3.6:2.2","ps3.6:2.3","ps3.6:2.4","ps3.6:2.5","ps3.6:2.6"],"kind":"text","text":{"pi":"Katamañca, bhikkhave, iddhipāṭihāriyaṁ?\nIdha, bhikkhave, ekacco anekavihitaṁ iddhividhaṁ paccanubhoti—\nekopi hutvā bahudhā hoti, bahudhāpi hutvā eko hoti;\nāvibhāvaṁ tirobhāvaṁ …pe…\nyāva brahmalokāpi kāyena vasaṁ vatteti.\nIdaṁ vuccati, bhikkhave, iddhipāṭihāriyaṁ."}},{"id":"ps3.6:3","sourceIds":["ps3.6:3.1","ps3.6:3.2","ps3.6:3.3","ps3.6:3.4","ps3.6:3.5","ps3.6:3.6","ps3.6:3.7","ps3.6:3.8","ps3.6:3.9","ps3.6:3.10","ps3.6:3.11","ps3.6:3.12","ps3.6:3.13","ps3.6:3.14"],"kind":"text","text":{"pi":"Katamañca, bhikkhave, ādesanāpāṭihāriyaṁ?\nIdha, bhikkhave, ekacco nimittena ādisati—\n‘evampi te mano, itthampi te mano, itipi te cittan’ti.\nSo bahuñcepi ādisati, tatheva taṁ hoti, no aññathā.\nIdha pana, bhikkhave, ekacco na heva kho nimittena ādisati, api ca kho manussānaṁ vā amanussānaṁ vā devatānaṁ vā saddaṁ sutvā ādisati—\n‘evampi te mano, itthampi te mano, itipi te cittan’ti.\nSo bahuñcepi ādisati, tatheva taṁ hoti, no aññathā.\nIdha pana, bhikkhave, ekacco na heva kho nimittena ādisati, napi manussānaṁ vā amanussānaṁ vā devatānaṁ vā saddaṁ sutvā ādisati, api ca kho vitakkayato vicārayato vitakkavipphārasaddaṁ sutvā ādisati—\n‘evampi te mano, itthampi te mano, itipi te cittan’ti.\nSo bahuñcepi ādisati, tatheva taṁ hoti, no aññathā.\nIdha pana, bhikkhave, ekacco na heva kho nimittena ādisati, napi manussānaṁ vā amanussānaṁ vā devatānaṁ vā saddaṁ sutvā ādisati, napi vitakkayato vicārayato vitakkavipphārasaddaṁ sutvā ādisati, api ca kho avitakkaṁ avicāraṁ samādhiṁ samāpannassa cetasā ceto paricca pajānāti—\n‘yathā imassa bhoto manosaṅkhārā paṇihitā imassa cittassa anantarā amukaṁ nāma vitakkaṁ vitakkayissatī’ti.\nSo bahuñcepi ādisati, tatheva taṁ hoti, no aññathā.\nIdaṁ vuccati, bhikkhave, ādesanāpāṭihāriyaṁ."}},{"id":"ps3.6:4","sourceIds":["ps3.6:4.1","ps3.6:4.2","ps3.6:4.3","ps3.6:4.4","ps3.6:4.5","ps3.6:4.6","ps3.6:4.7"],"kind":"text","text":{"pi":"Katamañca, bhikkhave, anusāsanīpāṭihāriyaṁ?\nIdha, bhikkhave, ekacco evamanusāsati—\n‘evaṁ vitakketha, mā evaṁ vitakkayittha.\nEvaṁ manasi karotha, mā evaṁ manasākattha.\nIdaṁ pajahatha, idaṁ upasampajja viharathā’ti.\nIdaṁ vuccati, bhikkhave, anusāsanīpāṭihāriyaṁ.\nImāni kho, bhikkhave, tīṇi pāṭihāriyāni”."}},{"id":"ps3.6:5","sourceIds":["ps3.6:5.1","ps3.6:5.2","ps3.6:5.3","ps3.6:5.4","ps3.6:5.5","ps3.6:5.6"],"kind":"text","text":{"pi":"Nekkhammaṁ ijjhatīti—iddhi.\nKāmacchandaṁ paṭiharatīti—pāṭihāriyaṁ.\nYe tena nekkhammena samannāgatā, sabbe te visuddhacittā anāvilasaṅkappāti—\nādesanāpāṭihāriyaṁ.\n“Taṁ kho pana nekkhammaṁ evaṁ āsevitabbaṁ, evaṁ bhāvetabbaṁ, evaṁ bahulīkātabbaṁ, evaṁ tadanudhammatā sati upaṭṭhāpetabbā”ti—\nanusāsanīpāṭihāriyaṁ."}},{"id":"ps3.6:6","sourceIds":["ps3.6:6.1","ps3.6:6.2","ps3.6:6.3","ps3.6:6.4","ps3.6:6.5","ps3.6:6.6"],"kind":"text","text":{"pi":"Abyāpādo ijjhatīti—iddhi.\nByāpādaṁ paṭiharatīti—pāṭihāriyaṁ.\nYe tena abyāpādena samannāgatā, sabbe te visuddhacittā anāvilasaṅkappāti—\nādesanāpāṭihāriyaṁ.\n“So kho pana abyāpādo evaṁ āsevitabbo, evaṁ bhāvetabbo, evaṁ bahulīkātabbo, evaṁ tadanudhammatā sati upaṭṭhāpetabbā”ti—\nanusāsanīpāṭihāriyaṁ."}},{"id":"ps3.6:7","sourceIds":["ps3.6:7.1","ps3.6:7.2","ps3.6:7.3","ps3.6:7.4","ps3.6:7.5","ps3.6:7.6"],"kind":"text","text":{"pi":"Ālokasaññā ijjhatīti—iddhi.\nThinamiddhaṁ paṭiharatīti—pāṭihāriyaṁ.\nYe tāya ālokasaññāya samannāgatā, sabbe te visuddhacittā anāvilasaṅkappāti—\nādesanāpāṭihāriyaṁ.\n“Sā kho pana ālokasaññā evaṁ āsevitabbā, evaṁ bhāvetabbā, evaṁ bahulīkātabbā, evaṁ tadanudhammatā sati upaṭṭhāpetabbā”ti—\nanusāsanīpāṭihāriyaṁ."}},{"id":"ps3.6:8","sourceIds":["ps3.6:8.1","ps3.6:8.2","ps3.6:8.3","ps3.6:8.4","ps3.6:8.5","ps3.6:8.6"],"kind":"text","text":{"pi":"Avikkhepo ijjhatīti—iddhi.\nUddhaccaṁ paṭiharatīti—pāṭihāriyaṁ.\nYe tena avikkhepena samannāgatā, sabbe te visuddhacittā anāvilasaṅkappāti—\nādesanāpāṭihāriyaṁ.\n“So kho pana avikkhepo evaṁ āsevitabbo, evaṁ bhāvetabbo, evaṁ bahulīkātabbo, evaṁ tadanudhammatā sati upaṭṭhāpetabbā”ti—\nanusāsanīpāṭihāriyaṁ."}},{"id":"ps3.6:9","sourceIds":["ps3.6:9.1","ps3.6:9.2","ps3.6:9.3","ps3.6:9.4","ps3.6:9.5","ps3.6:9.6"],"kind":"text","text":{"pi":"Dhammavavatthānaṁ ijjhatīti—iddhi.\nVicikicchaṁ paṭiharatīti—pāṭihāriyaṁ.\nYe tena dhammavavatthānena samannāgatā, sabbe te visuddhacittā anāvilasaṅkappāti—\nādesanāpāṭihāriyaṁ.\n“Taṁ kho pana dhammavavatthānaṁ evaṁ āsevitabbaṁ, evaṁ bhāvetabbaṁ, evaṁ bahulīkātabbaṁ, evaṁ tadanudhammatā, sati upaṭṭhāpetabbā”ti—\nanusāsanīpāṭihāriyaṁ."}},{"id":"ps3.6:10","sourceIds":["ps3.6:10.1","ps3.6:10.2","ps3.6:10.3","ps3.6:10.4","ps3.6:10.5","ps3.6:10.6"],"kind":"text","text":{"pi":"Ñāṇaṁ ijjhatīti—iddhi.\nAvijjaṁ paṭiharatīti—pāṭihāriyaṁ.\nYe tena ñāṇena samannāgatā, sabbe te visuddhacittā anāvilasaṅkappāti—\nādesanāpāṭihāriyaṁ.\n“Taṁ kho pana ñāṇaṁ evaṁ āsevitabbaṁ, evaṁ bhāvetabbaṁ, evaṁ bahulīkātabbaṁ, evaṁ tadanudhammatā sati upaṭṭhāpetabbā”ti—\nanusāsanīpāṭihāriyaṁ."}},{"id":"ps3.6:11","sourceIds":["ps3.6:11.1","ps3.6:11.2","ps3.6:11.3","ps3.6:11.4","ps3.6:11.5","ps3.6:11.6"],"kind":"text","text":{"pi":"Pāmojjaṁ ijjhatīti—iddhi.\nAratiṁ paṭiharatīti—pāṭihāriyaṁ.\nYe tena pāmojjena samannāgatā, sabbe te visuddhacittā anāvilasaṅkappāti—\nādesanāpāṭihāriyaṁ.\n“Taṁ kho pana pāmojjaṁ evaṁ āsevitabbaṁ, evaṁ bhāvetabbaṁ, evaṁ bahulīkātabbaṁ, evaṁ tadanudhammatā sati upaṭṭhāpetabbā”ti—\nanusāsanīpāṭihāriyaṁ …pe…."}},{"id":"ps3.6:12","sourceIds":["ps3.6:12.1","ps3.6:12.2","ps3.6:12.3","ps3.6:12.4","ps3.6:12.5","ps3.6:12.6"],"kind":"text","text":{"pi":"Paṭhamaṁ jhānaṁ ijjhatīti—iddhi.\nNīvaraṇe paṭiharatīti—pāṭihāriyaṁ.\nYe tena paṭhamena jhānena samannāgatā, sabbe te visuddhacittā anāvilasaṅkappāti—\nādesanāpāṭihāriyaṁ.\n“Taṁ kho pana paṭhamaṁ jhānaṁ evaṁ āsevitabbaṁ, evaṁ bhāvetabbaṁ, evaṁ bahulīkātabbaṁ, evaṁ tadanudhammatā sati upaṭṭhāpetabbā”ti—\nanusāsanīpāṭihāriyaṁ …pe…."}},{"id":"ps3.6:13","sourceIds":["ps3.6:13.1","ps3.6:13.2","ps3.6:13.3","ps3.6:13.4","ps3.6:13.5","ps3.6:13.6"],"kind":"text","text":{"pi":"Arahattamaggo ijjhatīti—iddhi.\nSabbakilese paṭiharatīti—pāṭihāriyaṁ.\nYe tena arahattamaggena samannāgatā, sabbe te visuddhacittā anāvilasaṅkappāti—\nādesanāpāṭihāriyaṁ.\n“So kho pana arahattamaggo evaṁ āsevitabbo, evaṁ bhāvetabbo, evaṁ bahulīkātabbo, evaṁ tadanudhammatā sati upaṭṭhāpetabbā”ti—\nanusāsanīpāṭihāriyaṁ."}},{"id":"ps3.6:14","sourceIds":["ps3.6:14.1","ps3.6:14.2","ps3.6:14.3","ps3.6:14.4","ps3.6:14.5","ps3.6:14.6","ps3.6:14.7","ps3.6:14.8","ps3.6:14.9","ps3.6:14.10","ps3.6:14.11","ps3.6:14.12"],"kind":"text","text":{"pi":"Nekkhammaṁ ijjhatīti—iddhi.\nKāmacchandaṁ paṭiharatīti—pāṭihāriyaṁ.\nYā ca iddhi yañca pāṭihāriyaṁ, idaṁ vuccati iddhipāṭihāriyaṁ.\nAbyāpādo ijjhatīti—iddhi.\nByāpādaṁ paṭiharatīti—pāṭihāriyaṁ.\nYā ca iddhi yañca pāṭihāriyaṁ, idaṁ vuccati iddhipāṭihāriyaṁ.\nĀlokasaññā ijjhatīti—iddhi.\nThinamiddhaṁ paṭiharatīti—pāṭihāriyaṁ …pe…\narahattamaggo ijjhatīti—iddhi.\nSabbakilese paṭiharatīti—pāṭihāriyaṁ.\nYā ca iddhi yañca pāṭihāriyaṁ, idaṁ vuccati iddhipāṭihāriyanti.\nPāṭihāriyakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps3.6/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}