{"id":"ps3.8","title":"3.8. Satipaṭṭhānakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps3.8","title":"3.8. Satipaṭṭhānakathā","units":[{"id":"ps3.8:0","sourceIds":["ps3.8:0.1","ps3.8:0.2","ps3.8:0.3"],"kind":"text","text":{"pi":"Paṭisambhidāmagga\n3 Paññāvagga\n3.8. Satipaṭṭhānakathā"}},{"id":"ps3.8:1","sourceIds":["ps3.8:1.1","ps3.8:1.2","ps3.8:1.3","ps3.8:1.4","ps3.8:1.5","ps3.8:1.6","ps3.8:1.7","ps3.8:1.8"],"kind":"text","text":{"pi":"Sāvatthinidānaṁ.\n“Cattārome, bhikkhave, satipaṭṭhānā.\nKatame cattāro?\nIdha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ.\nVedanāsu …\ncitte …\ndhammesu dhammānupassī viharati ātāpī sampajāno satimā, vineyya loke abhijjhādomanassaṁ.\nIme kho, bhikkhave, cattāro satipaṭṭhānā”ti."}},{"id":"ps3.8:2","sourceIds":["ps3.8:2.1","ps3.8:2.2","ps3.8:2.3","ps3.8:2.4","ps3.8:2.5","ps3.8:2.6","ps3.8:2.7","ps3.8:2.8","ps3.8:2.9","ps3.8:2.10","ps3.8:2.11","ps3.8:2.12","ps3.8:2.13","ps3.8:2.14"],"kind":"text","text":{"pi":"Kathaṁ kāye kāyānupassī viharati?\nIdhekacco pathavīkāyaṁ aniccato anupassati, no niccato;\ndukkhato anupassati, no sukhato;\nanattato anupassati, no attato;\nnibbindati, no nandati;\nvirajjati, no rajjati;\nnirodheti, no samudeti, paṭinissajjati, no ādiyati.\nAniccato anupassanto niccasaññaṁ pajahati, dukkhato anupassanto sukhasaññaṁ pajahati, anattato anupassanto attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati.\nImehi sattahi ākārehi kāyaṁ anupassati.\nKāyo upaṭṭhānaṁ, no sati.\nSati upaṭṭhānañceva sati ca.\nTāya satiyā tena ñāṇena taṁ kāyaṁ anupassati.\nTena vuccati—\n“kāye kāyānupassanāsatipaṭṭhānā”."}},{"id":"ps3.8:3","sourceIds":["ps3.8:3.1","ps3.8:3.2"],"kind":"text","text":{"pi":"Bhāvanāti catasso bhāvanā—\ntattha jātānaṁ dhammānaṁ anativattanaṭṭhena bhāvanā, indriyānaṁ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā."}},{"id":"ps3.8:4","sourceIds":["ps3.8:4.1","ps3.8:4.2","ps3.8:4.3","ps3.8:4.4","ps3.8:4.5","ps3.8:4.6","ps3.8:4.7","ps3.8:4.8","ps3.8:4.9","ps3.8:4.10","ps3.8:4.11","ps3.8:4.12","ps3.8:4.13","ps3.8:4.14","ps3.8:4.15","ps3.8:4.16","ps3.8:4.17","ps3.8:4.18","ps3.8:4.19","ps3.8:4.20","ps3.8:4.21","ps3.8:4.22","ps3.8:4.23","ps3.8:4.24"],"kind":"text","text":{"pi":"Idhekacco āpokāyaṁ …pe…\ntejokāyaṁ …\nvāyokāyaṁ …\nkesakāyaṁ …\nlomakāyaṁ …\nchavikāyaṁ …\ncammakāyaṁ …\nmaṁsakāyaṁ …\nrudhirakāyaṁ …\nnhārukāyaṁ …\naṭṭhikāyaṁ …\naṭṭhimiñjakāyaṁ aniccato anupassati, no niccato;\ndukkhato anupassati, no sukhato;\nanattato anupassati, no attato;\nnibbindati, no nandati;\nvirajjati, no rajjati, nirodheti, no samudeti;\npaṭinissajjati, no ādiyati.\nAniccato anupassanto niccasaññaṁ pajahati, dukkhato anupassanto sukhasaññaṁ pajahati, anattato anupassanto attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati.\nImehi sattahi ākārehi kāyaṁ anupassati.\nKāyo upaṭṭhānaṁ, no sati.\nSati upaṭṭhānañceva sati ca.\nTāya satiyā tena ñāṇena taṁ kāyaṁ anupassati.\nTena vuccati—\n“kāye kāyānupassanāsatipaṭṭhānā”."}},{"id":"ps3.8:5","sourceIds":["ps3.8:5.1","ps3.8:5.2","ps3.8:5.3"],"kind":"text","text":{"pi":"Bhāvanāti catasso bhāvanā—\ntattha jātānaṁ dhammānaṁ anativattanaṭṭhena bhāvanā, indriyānaṁ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā.\nEvaṁ kāye kāyānupassī viharati."}},{"id":"ps3.8:6","sourceIds":["ps3.8:6.1","ps3.8:6.2","ps3.8:6.3","ps3.8:6.4","ps3.8:6.5","ps3.8:6.6","ps3.8:6.7","ps3.8:6.8","ps3.8:6.9","ps3.8:6.10","ps3.8:6.11"],"kind":"text","text":{"pi":"Kathaṁ vedanāsu vedanānupassī viharati?\nIdhekacco sukhaṁ vedanaṁ aniccato anupassati, no niccato …pe…\npaṭinissajjati, no ādiyati.\nAniccato anupassanto niccasaññaṁ pajahati …pe…\npaṭinissajjanto ādānaṁ pajahati.\nImehi sattahi ākārehi vedanaṁ anupassati.\nVedanā upaṭṭhānaṁ, no sati.\nSati upaṭṭhānañceva sati ca.\nTāya satiyā tena ñāṇena taṁ vedanaṁ anupassati.\nTena vuccati—\n“vedanāsu vedanānupassanāsatipaṭṭhānā”."}},{"id":"ps3.8:7","sourceIds":["ps3.8:7.1","ps3.8:7.2","ps3.8:7.3","ps3.8:7.4","ps3.8:7.5","ps3.8:7.6","ps3.8:7.7","ps3.8:7.8","ps3.8:7.9","ps3.8:7.10","ps3.8:7.11","ps3.8:7.12","ps3.8:7.13","ps3.8:7.14","ps3.8:7.15","ps3.8:7.16","ps3.8:7.17","ps3.8:7.18","ps3.8:7.19","ps3.8:7.20","ps3.8:7.21","ps3.8:7.22","ps3.8:7.23","ps3.8:7.24","ps3.8:7.25"],"kind":"text","text":{"pi":"Bhāvanāti catasso bhāvanā …pe…\nāsevanaṭṭhena bhāvanā …pe…\nidhekacco dukkhaṁ vedanaṁ …pe…\nadukkhamasukhaṁ vedanaṁ …\nsāmisaṁ sukhaṁ vedanaṁ …\nnirāmisaṁ sukhaṁ vedanaṁ …\nsāmisaṁ dukkhaṁ vedanaṁ …\nnirāmisaṁ dukkhaṁ vedanaṁ …\nsāmisaṁ adukkhamasukhaṁ vedanaṁ …\nnirāmisaṁ adukkhamasukhaṁ vedanaṁ …\ncakkhusamphassajaṁ vedanaṁ …\nsotasamphassajaṁ vedanaṁ …\nghānasamphassajaṁ vedanaṁ …\njivhāsamphassajaṁ vedanaṁ …\nkāyasamphassajaṁ vedanaṁ …\nmanosamphassajaṁ vedanaṁ aniccato anupassati, no niccato …pe…\npaṭinissajjati, no ādiyati.\nAniccato anupassanto niccasaññaṁ pajahati …pe…\npaṭinissajjanto ādānaṁ pajahati.\nImehi sattahi ākārehi vedanaṁ anupassati.\nVedanā upaṭṭhānaṁ, no sati.\nSati upaṭṭhānañceva sati ca.\nTāya satiyā tena ñāṇena taṁ vedanaṁ anupassati.\nTena vuccati—\n“vedanāsu vedanānupassanāsatipaṭṭhānā”."}},{"id":"ps3.8:8","sourceIds":["ps3.8:8.1","ps3.8:8.2"],"kind":"text","text":{"pi":"Bhāvanāti catasso bhāvanā …pe…\nevaṁ vedanāsu vedanānupassī viharati."}},{"id":"ps3.8:9","sourceIds":["ps3.8:9.1","ps3.8:9.2","ps3.8:9.3","ps3.8:9.4","ps3.8:9.5","ps3.8:9.6","ps3.8:9.7","ps3.8:9.8","ps3.8:9.9","ps3.8:9.10","ps3.8:9.11"],"kind":"text","text":{"pi":"Kathaṁ citte cittānupassī viharati?\nIdhekacco sarāgaṁ cittaṁ aniccato anupassati, no niccato …pe…\npaṭinissajjati, no ādiyati.\nAniccato anupassanto niccasaññaṁ pajahati …pe…\npaṭinissajjanto ādānaṁ pajahati.\nImehi sattahi ākārehi cittaṁ anupassati.\nCittaṁ upaṭṭhānaṁ, no sati.\nSati upaṭṭhānañceva sati ca.\nTāya satiyā tena ñāṇena taṁ cittaṁ anupassati.\nTena vuccati—\n“citte cittānupassanāsatipaṭṭhānā”."}},{"id":"ps3.8:10","sourceIds":["ps3.8:10.1","ps3.8:10.2"],"kind":"text","text":{"pi":"Bhāvanāti catasso bhāvanā …pe…\nāsevanaṭṭhena bhāvanā."}},{"id":"ps3.8:11","sourceIds":["ps3.8:11.1","ps3.8:11.2","ps3.8:11.3","ps3.8:11.4","ps3.8:11.5","ps3.8:11.6","ps3.8:11.7","ps3.8:11.8","ps3.8:11.9","ps3.8:11.10","ps3.8:11.11","ps3.8:11.12","ps3.8:11.13","ps3.8:11.14","ps3.8:11.15","ps3.8:11.16","ps3.8:11.17","ps3.8:11.18","ps3.8:11.19","ps3.8:11.20","ps3.8:11.21","ps3.8:11.22","ps3.8:11.23","ps3.8:11.24","ps3.8:11.25","ps3.8:11.26","ps3.8:11.27","ps3.8:11.28","ps3.8:11.29","ps3.8:11.30"],"kind":"text","text":{"pi":"Idhekacco vītarāgaṁ cittaṁ …pe…\nsadosaṁ cittaṁ …\nvītadosaṁ cittaṁ …\nsamohaṁ cittaṁ …\nvītamohaṁ cittaṁ …\nsaṅkhittaṁ cittaṁ …\nvikkhittaṁ cittaṁ …\nmahaggataṁ cittaṁ …\namahaggataṁ cittaṁ …\nsauttaraṁ cittaṁ …\nanuttaraṁ cittaṁ …\nsamāhitaṁ cittaṁ …\nasamāhitaṁ cittaṁ …\nvimuttaṁ cittaṁ …\navimuttaṁ cittaṁ …\ncakkhuviññāṇaṁ …\nsotaviññāṇaṁ …\nghānaviññāṇaṁ …\njivhāviññāṇaṁ …\nkāyaviññāṇaṁ …\nmanoviññāṇaṁ aniccato anupassati, no niccato …pe…\npaṭinissajjati, no ādiyati.\nAniccato anupassanto niccasaññaṁ pajahati …pe…\npaṭinissajjanto ādānaṁ pajahati.\nImehi sattahi ākārehi cittaṁ anupassati.\nCittaṁ upaṭṭhānaṁ, no sati.\nSati upaṭṭhānañceva sati ca.\nTāya satiyā tena ñāṇena taṁ cittaṁ anupassati.\nTena vuccati—\n“citte cittānupassanāsatipaṭṭhānā”."}},{"id":"ps3.8:12","sourceIds":["ps3.8:12.1","ps3.8:12.2","ps3.8:12.3"],"kind":"text","text":{"pi":"Bhāvanāti catasso bhāvanā …pe…\nāsevanaṭṭhena bhāvanā.\nEvaṁ citte cittānupassī viharati."}},{"id":"ps3.8:13","sourceIds":["ps3.8:13.1","ps3.8:13.2","ps3.8:13.3","ps3.8:13.4","ps3.8:13.5","ps3.8:13.6","ps3.8:13.7","ps3.8:13.8","ps3.8:13.9","ps3.8:13.10","ps3.8:13.11","ps3.8:13.12","ps3.8:13.13","ps3.8:13.14","ps3.8:13.15"],"kind":"text","text":{"pi":"Kathaṁ dhammesu dhammānupassī viharati?\nIdhekacco ṭhapetvā kāyaṁ ṭhapetvā vedanaṁ ṭhapetvā cittaṁ tadavasese dhamme aniccato anupassati, no niccato;\ndukkhato anupassati, no sukhato;\nanattato anupassati, no attato;\nnibbindati, no nandati;\nvirajjati, no rajjati;\nnirodheti, no samudeti;\npaṭinissajjati, no ādiyati.\nAniccato anupassanto niccasaññaṁ pajahati, dukkhato anupassanto sukhasaññaṁ pajahati, anattato anupassanto attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati.\nImehi sattahi ākārehi te dhamme anupassati.\nDhammā upaṭṭhānaṁ, no sati.\nSati upaṭṭhānañceva sati ca.\nTāya satiyā tena ñāṇena te dhamme anupassati.\nTena vuccati—\n“dhammesu dhammānupassanāsatipaṭṭhānā”."}},{"id":"ps3.8:14","sourceIds":["ps3.8:14.1","ps3.8:14.2","ps3.8:14.3","ps3.8:14.4"],"kind":"text","text":{"pi":"Bhāvanāti catasso bhāvanā—\ntattha jātānaṁ dhammānaṁ anativattanaṭṭhena bhāvanā, indriyānaṁ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā.\nEvaṁ dhammesu dhammānupassī viharatīti.\nSatipaṭṭhānakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps3.8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}