{"id":"ps3.9","title":"3.9. Vipassanākathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps3.9","title":"3.9. Vipassanākathā","units":[{"id":"ps3.9:0","sourceIds":["ps3.9:0.1","ps3.9:0.2","ps3.9:0.3"],"kind":"text","text":{"pi":"Paṭisambhidāmagga\nPaññāvagga\n3.9. Vipassanākathā"}},{"id":"ps3.9:1","sourceIds":["ps3.9:1.1","ps3.9:1.2","ps3.9:1.3","ps3.9:1.4","ps3.9:1.5","ps3.9:1.6"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.\nTatra kho bhagavā bhikkhū āmantesi—\n“bhikkhavo”ti.\n“Bhadante”ti te bhikkhū bhagavato paccassosuṁ.\nBhagavā etadavoca—"}},{"id":"ps3.9:2","sourceIds":["ps3.9:2.1","ps3.9:2.2","ps3.9:2.3","ps3.9:2.4","ps3.9:2.5","ps3.9:2.6"],"kind":"text","text":{"pi":"“So vata, bhikkhave, bhikkhu kañci saṅkhāraṁ niccato samanupassanto anulomikāya khantiyā samannāgato bhavissatīti—\nnetaṁ ṭhānaṁ vijjati;\nanulomikāya khantiyā asamannāgato sammattaniyāmaṁ okkamissatīti—\nnetaṁ ṭhānaṁ vijjati;\nsammattaniyāmaṁ anokkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatīti—\nnetaṁ ṭhānaṁ vijjati."}},{"id":"ps3.9:3","sourceIds":["ps3.9:3.1","ps3.9:3.2","ps3.9:3.3","ps3.9:3.4","ps3.9:3.5"],"kind":"text","text":{"pi":"So vata, bhikkhave, bhikkhu sabbasaṅkhāre aniccato samanupassanto anulomikāya khantiyā samannāgato bhavissatīti—\nṭhānametaṁ vijjati;\nanulomikāya khantiyā samannāgato sammattaniyāmaṁ okkamissatīti—\nṭhānametaṁ vijjati, sammattaniyāmaṁ okkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatīti—\nṭhānametaṁ vijjati."}},{"id":"ps3.9:4","sourceIds":["ps3.9:4.1","ps3.9:4.2","ps3.9:4.3","ps3.9:4.4","ps3.9:4.5","ps3.9:4.6"],"kind":"text","text":{"pi":"So vata, bhikkhave, bhikkhu kañci saṅkhāraṁ sukhato samanupassanto anulomikāya khantiyā samannāgato bhavissatīti—\nnetaṁ ṭhānaṁ vijjati;\nanulomikāya khantiyā asamannāgato sammattaniyāmaṁ okkamissatīti—\nnetaṁ ṭhānaṁ vijjati;\nsammattaniyāmaṁ anokkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatīti—\nnetaṁ ṭhānaṁ vijjati."}},{"id":"ps3.9:5","sourceIds":["ps3.9:5.1","ps3.9:5.2","ps3.9:5.3","ps3.9:5.4","ps3.9:5.5","ps3.9:5.6"],"kind":"text","text":{"pi":"So vata, bhikkhave, bhikkhu sabbasaṅkhāre dukkhato samanupassanto anulomikāya khantiyā samannāgato bhavissatīti—\nṭhānametaṁ vijjati;\nanulomikāya khantiyā samannāgato sammattaniyāmaṁ okkamissatīti—\nṭhānametaṁ vijjati;\nsammattaniyāmaṁ okkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatīti—\nṭhānametaṁ vijjati."}},{"id":"ps3.9:6","sourceIds":["ps3.9:6.1","ps3.9:6.2","ps3.9:6.3","ps3.9:6.4","ps3.9:6.5","ps3.9:6.6"],"kind":"text","text":{"pi":"So vata, bhikkhave, bhikkhu kañci dhammaṁ attato samanupassanto anulomikāya khantiyā samannāgato bhavissatīti—\nnetaṁ ṭhānaṁ vijjati;\nanulomikāya khantiyā asamannāgato sammattaniyāmaṁ okkamissatīti—\nnetaṁ ṭhānaṁ vijjati;\nsammattaniyāmaṁ anokkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatīti—\nnetaṁ ṭhānaṁ vijjati."}},{"id":"ps3.9:7","sourceIds":["ps3.9:7.1","ps3.9:7.2","ps3.9:7.3","ps3.9:7.4","ps3.9:7.5","ps3.9:7.6"],"kind":"text","text":{"pi":"So vata, bhikkhave, bhikkhu sabbadhamme anattato samanupassanto anulomikāya khantiyā samannāgato bhavissatīti—\nṭhānametaṁ vijjati;\nanulomikāya khantiyā samannāgato sammattaniyāmaṁ okkamissatīti—\nṭhānametaṁ vijjati;\nsammattaniyāmaṁ okkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatīti—\nṭhānametaṁ vijjati."}},{"id":"ps3.9:8","sourceIds":["ps3.9:8.1","ps3.9:8.2","ps3.9:8.3","ps3.9:8.4","ps3.9:8.5","ps3.9:8.6"],"kind":"text","text":{"pi":"So vata, bhikkhave, bhikkhu nibbānaṁ dukkhato samanupassanto anulomikāya khantiyā samannāgato bhavissatīti—\nnetaṁ ṭhānaṁ vijjati;\nanulomikāya khantiyā asamannāgato sammattaniyāmaṁ okkamissatīti—\nnetaṁ ṭhānaṁ vijjati;\nsammattaniyāmaṁ anokkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatīti—\nnetaṁ ṭhānaṁ vijjati."}},{"id":"ps3.9:9","sourceIds":["ps3.9:9.1","ps3.9:9.2","ps3.9:9.3","ps3.9:9.4","ps3.9:9.5","ps3.9:9.6"],"kind":"text","text":{"pi":"So vata, bhikkhave, bhikkhu nibbānaṁ sukhato samanupassanto anulomikāya khantiyā samannāgato bhavissatīti—\nṭhānametaṁ vijjati;\nanulomikāya khantiyā samannāgato sammattaniyāmaṁ okkamissatīti—\nṭhānametaṁ vijjati;\nsammattaniyāmaṁ okkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatīti—\nṭhānametaṁ vijjati”."}},{"id":"ps3.9:10","sourceIds":["ps3.9:10.1","ps3.9:10.2"],"kind":"text","text":{"pi":"Katihākārehi anulomikaṁ khantiṁ paṭilabhati, katihākārehi sammattaniyāmaṁ okkamati?\nCattārīsāya ākārehi anulomikaṁ khantiṁ paṭilabhati, cattārīsāya ākārehi sammattaniyāmaṁ okkamati."}},{"id":"ps3.9:11","sourceIds":["ps3.9:11.1","ps3.9:11.2"],"kind":"text","text":{"pi":"Katamehi cattārīsāya ākārehi anulomikaṁ khantiṁ paṭilabhati, katamehi cattārīsāya ākārehi sammattaniyāmaṁ okkamati?\nPañcakkhandhe aniccato dukkhato rogato gaṇḍato sallato aghato ābādhato parato palokato ītito upaddavato bhayato upasaggato calato pabhaṅguto addhuvato atāṇato aleṇato asaraṇato rittato tucchato suññato anattato ādīnavato vipariṇāmadhammato asārakato aghamūlato vadhakato vibhavato sāsavato saṅkhatato mārāmisato jātidhammato jarādhammato byādhidhammato maraṇadhammato sokadhammato paridevadhammato upāyāsadhammato saṅkilesikadhammato."}},{"id":"ps3.9:12","sourceIds":["ps3.9:12.1","ps3.9:12.2","ps3.9:12.3","ps3.9:12.4","ps3.9:12.5","ps3.9:12.6","ps3.9:12.7","ps3.9:12.8","ps3.9:12.9","ps3.9:12.10"],"kind":"text","text":{"pi":"Pañcakkhandhe aniccato passanto anulomikaṁ khantiṁ paṭilabhati.\nPañcannaṁ khandhānaṁ nirodho niccaṁ nibbānanti passanto sammattaniyāmaṁ okkamati.\nPañcakkhandhe dukkhato passanto anulomikaṁ khantiṁ paṭilabhati.\nPañcannaṁ khandhānaṁ nirodho sukhaṁ nibbānanti passanto sammattaniyāmaṁ okkamati.\nPañcakkhandhe rogato passanto anulomikaṁ khantiṁ paṭilabhati.\nPañcannaṁ khandhānaṁ nirodho ārogyaṁ nibbānanti passanto sammattaniyāmaṁ okkamati.\nPañcakkhandhe gaṇḍato passanto anulomikaṁ khantiṁ paṭilabhati.\nPañcannaṁ khandhānaṁ nirodho agaṇḍaṁ nibbānanti passanto sammattaniyāmaṁ okkamati.\nPañcakkhandhe sallato passanto anulomikaṁ khantiṁ paṭilabhati.\nPañcannaṁ khandhānaṁ nirodho visallaṁ nibbānanti passanto sammattaniyāmaṁ okkamati."}},{"id":"ps3.9:13","sourceIds":["ps3.9:13.1","ps3.9:13.2","ps3.9:13.3","ps3.9:13.4","ps3.9:13.5","ps3.9:13.6","ps3.9:13.7","ps3.9:13.8","ps3.9:13.9","ps3.9:13.10"],"kind":"text","text":{"pi":"Pañcakkhandhe aghato passanto anulomikaṁ khantiṁ paṭilabhati.\nPañcannaṁ khandhānaṁ nirodho anagho nibbānanti passanto sammattaniyāmaṁ okkamati.\nPañcakkhandhe ābādhato passanto anulomikaṁ khantiṁ paṭilabhati.\nPañcannaṁ khandhānaṁ nirodho anābādhaṁ nibbānanti passanto sammattaniyāmaṁ okkamati.\nPañcakkhandhe parato passanto anulomikaṁ khantiṁ paṭilabhati.\nPañcannaṁ khandhānaṁ nirodho aparappaccayaṁ nibbānanti passanto sammattaniyāmaṁ okkamati.\nPañcakkhandhe palokato passanto anulomikaṁ khantiṁ paṭilabhati.\nPañcannaṁ khandhānaṁ nirodho apalokadhammo nibbānanti passanto sammattaniyāmaṁ okkamati.\nPañcakkhandhe ītito passanto anulomikaṁ khantiṁ paṭilabhati.\nPañcannaṁ khandhānaṁ nirodho anītikaṁ nibbānanti passanto sammattaniyāmaṁ okkamati."}},{"id":"ps3.9:14","sourceIds":["ps3.9:14.1","ps3.9:14.2","ps3.9:14.3","ps3.9:14.4","ps3.9:14.5","ps3.9:14.6","ps3.9:14.7","ps3.9:14.8","ps3.9:14.9","ps3.9:14.10"],"kind":"text","text":{"pi":"Pañcakkhandhe upaddavato passanto anulomikaṁ khantiṁ paṭilabhati.\nPañcannaṁ khandhānaṁ nirodho anupaddavaṁ nibbānanti passanto sammattaniyāmaṁ okkamati.\nPañcakkhandhe bhayato passanto anulomikaṁ khantiṁ paṭilabhati.\nPañcannaṁ khandhānaṁ nirodho abhayaṁ nibbānanti passanto sammattaniyāmaṁ okkamati.\nPañcakkhandhe upasaggato passanto anulomikaṁ khantiṁ paṭilabhati.\nPañcannaṁ khandhānaṁ nirodho anupasaggaṁ nibbānanti passanto sammattaniyāmaṁ okkamati.\nPañcakkhandhe calato passanto anulomikaṁ khantiṁ paṭilabhati.\nPañcannaṁ khandhānaṁ nirodho acalaṁ nibbānanti passanto sammattaniyāmaṁ okkamati.\nPañcakkhandhe pabhaṅguto passanto anulomikaṁ khantiṁ paṭilabhati.\nPañcannaṁ khandhānaṁ nirodho apabhaṅgu nibbānanti passanto sammattaniyāmaṁ okkamati."}},{"id":"ps3.9:15","sourceIds":["ps3.9:15.1","ps3.9:15.2","ps3.9:15.3","ps3.9:15.4","ps3.9:15.5","ps3.9:15.6","ps3.9:15.7","ps3.9:15.8","ps3.9:15.9","ps3.9:15.10"],"kind":"text","text":{"pi":"Pañcakkhandhe addhuvato passanto anulomikaṁ khantiṁ paṭilabhati.\nPañcannaṁ khandhānaṁ nirodho dhuvaṁ nibbānanti passanto sammattaniyāmaṁ okkamati.\nPañcakkhandhe atāṇato passanto anulomikaṁ khantiṁ paṭilabhati.\nPañcannaṁ khandhānaṁ nirodho tāṇaṁ nibbānanti passanto sammattaniyāmaṁ okkamati.\nPañcakkhandhe aleṇato passanto anulomikaṁ khantiṁ paṭilabhati.\nPañcannaṁ khandhānaṁ nirodho leṇaṁ nibbānanti passanto sammattaniyāmaṁ okkamati.\nPañcakkhandhe asaraṇato passanto anulomikaṁ khantiṁ paṭilabhati.\nPañcannaṁ khandhānaṁ nirodho saraṇaṁ nibbānanti passanto sammattaniyāmaṁ okkamati.\nPañcakkhandhe rittato passanto anulomikaṁ khantiṁ paṭilabhati.\nPañcannaṁ khandhānaṁ nirodho arittaṁ nibbānanti passanto sammattaniyāmaṁ okkamati."}},{"id":"ps3.9:16","sourceIds":["ps3.9:16.1","ps3.9:16.2","ps3.9:16.3","ps3.9:16.4","ps3.9:16.5","ps3.9:16.6","ps3.9:16.7","ps3.9:16.8","ps3.9:16.9","ps3.9:16.10"],"kind":"text","text":{"pi":"Pañcakkhandhe tucchato passanto anulomikaṁ khantiṁ paṭilabhati.\nPañcannaṁ khandhānaṁ nirodho atucchaṁ nibbānanti passanto sammattaniyāmaṁ okkamati.\nPañcakkhandhe suññato passanto anulomikaṁ khantiṁ paṭilabhati.\nPañcannaṁ khandhānaṁ nirodho paramasuññaṁ nibbānanti passanto sammattaniyāmaṁ okkamati.\nPañcakkhandhe anattato passanto anulomikaṁ khantiṁ paṭilabhati.\nPañcannaṁ khandhānaṁ nirodho paramatthaṁ nibbānanti passanto sammattaniyāmaṁ okkamati.\nPañcakkhandhe ādīnavato passanto anulomikaṁ khantiṁ paṭilabhati.\nPañcannaṁ khandhānaṁ nirodho anādīnavaṁ nibbānanti passanto sammattaniyāmaṁ okkamati.\nPañcakkhandhe vipariṇāmadhammato passanto anulomikaṁ khantiṁ paṭilabhati.\nPañcannaṁ khandhānaṁ nirodho avipariṇāmadhammaṁ nibbānanti passanto sammattaniyāmaṁ okkamati."}},{"id":"ps3.9:17","sourceIds":["ps3.9:17.1","ps3.9:17.2","ps3.9:17.3","ps3.9:17.4","ps3.9:17.5","ps3.9:17.6","ps3.9:17.7","ps3.9:17.8","ps3.9:17.9","ps3.9:17.10"],"kind":"text","text":{"pi":"Pañcakkhandhe asārakato passanto anulomikaṁ khantiṁ paṭilabhati.\nPañcannaṁ khandhānaṁ nirodho sāraṁ nibbānanti passanto sammattaniyāmaṁ okkamati.\nPañcakkhandhe aghamūlato passanto anulomikaṁ khantiṁ paṭilabhati.\nPañcannaṁ khandhānaṁ nirodho anaghamūlaṁ nibbānanti passanto sammattaniyāmaṁ okkamati.\nPañcakkhandhe vadhakato passanto anulomikaṁ khantiṁ paṭilabhati.\nPañcannaṁ khandhānaṁ nirodho avadhakaṁ nibbānanti passanto sammattaniyāmaṁ okkamati.\nPañcakkhandhe vibhavato passanto anulomikaṁ khantiṁ paṭilabhati.\nPañcannaṁ khandhānaṁ nirodho avibhavaṁ nibbānanti passanto sammattaniyāmaṁ okkamati.\nPañcakkhandhe sāsavato passanto anulomikaṁ khantiṁ paṭilabhati.\nPañcannaṁ khandhānaṁ nirodho anāsavaṁ nibbānanti passanto sammattaniyāmaṁ okkamati."}},{"id":"ps3.9:18","sourceIds":["ps3.9:18.1","ps3.9:18.2","ps3.9:18.3","ps3.9:18.4","ps3.9:18.5","ps3.9:18.6","ps3.9:18.7","ps3.9:18.8","ps3.9:18.9","ps3.9:18.10"],"kind":"text","text":{"pi":"Pañcakkhandhe saṅkhatato passanto anulomikaṁ khantiṁ paṭilabhati.\nPañcannaṁ khandhānaṁ nirodho asaṅkhataṁ nibbānanti passanto sammattaniyāmaṁ okkamati.\nPañcakkhandhe mārāmisato passanto anulomikaṁ khantiṁ paṭilabhati.\nPañcannaṁ khandhānaṁ nirodho nirāmisaṁ nibbānanti passanto sammattaniyāmaṁ okkamati.\nPañcakkhandhe jātidhammato passanto anulomikaṁ khantiṁ paṭilabhati.\nPañcannaṁ khandhānaṁ nirodho ajātaṁ nibbānanti passanto sammattaniyāmaṁ okkamati.\nPañcakkhandhe jarādhammato passanto anulomikaṁ khantiṁ paṭilabhati.\nPañcannaṁ khandhānaṁ nirodho ajaraṁ nibbānanti passanto sammattaniyāmaṁ okkamati.\nPañcakkhandhe byādhidhammato passanto anulomikaṁ khantiṁ paṭilabhati.\nPañcannaṁ khandhānaṁ nirodho abyādhi nibbānanti passanto sammattaniyāmaṁ okkamati."}},{"id":"ps3.9:19","sourceIds":["ps3.9:19.1","ps3.9:19.2","ps3.9:19.3","ps3.9:19.4","ps3.9:19.5","ps3.9:19.6","ps3.9:19.7","ps3.9:19.8","ps3.9:19.9","ps3.9:19.10"],"kind":"text","text":{"pi":"Pañcakkhandhe maraṇadhammato passanto anulomikaṁ khantiṁ paṭilabhati.\nPañcannaṁ khandhānaṁ nirodho amataṁ nibbānanti passanto sammattaniyāmaṁ okkamati.\nPañcakkhandhe sokadhammato passanto anulomikaṁ khantiṁ paṭilabhati.\nPañcannaṁ khandhānaṁ nirodho asokaṁ nibbānanti passanto sammattaniyāmaṁ okkamati.\nPañcakkhandhe paridevadhammato passanto anulomikaṁ khantiṁ paṭilabhati.\nPañcannaṁ khandhānaṁ nirodho aparidevaṁ nibbānanti passanto sammattaniyāmaṁ okkamati.\nPañcakkhandhe upāyāsadhammato passanto anulomikaṁ khantiṁ paṭilabhati.\nPañcannaṁ khandhānaṁ nirodho anupāyāsaṁ nibbānanti passanto sammattaniyāmaṁ okkamati.\nPañcakkhandhe saṅkilesikadhammato passanto anulomikaṁ khantiṁ paṭilabhati.\nPañcannaṁ khandhānaṁ nirodho asaṅkiliṭṭhaṁ nibbānanti passanto sammattaniyāmaṁ okkamati."}},{"id":"ps3.9:20","sourceIds":["ps3.9:20.1","ps3.9:20.2","ps3.9:20.3","ps3.9:20.4","ps3.9:20.5","ps3.9:20.6","ps3.9:20.7","ps3.9:20.8","ps3.9:20.9","ps3.9:20.10"],"kind":"text","text":{"pi":"Aniccatoti, aniccānupassanā.\nDukkhatoti, dukkhānupassanā.\nRogatoti, dukkhānupassanā.\nGaṇḍatoti, dukkhānupassanā.\nSallatoti, dukkhānupassanā.\nAghatoti, dukkhānupassanā.\nĀbādhatoti, dukkhānupassanā.\nParatoti, anattānupassanā.\nPalokatoti, aniccānupassanā.\nĪtitoti, dukkhānupassanā. [10]"}},{"id":"ps3.9:21","sourceIds":["ps3.9:21.1","ps3.9:21.2","ps3.9:21.3","ps3.9:21.4","ps3.9:21.5","ps3.9:21.6","ps3.9:21.7","ps3.9:21.8","ps3.9:21.9","ps3.9:21.10"],"kind":"text","text":{"pi":"Upaddavatoti, dukkhānupassanā.\nBhayatoti, dukkhānupassanā.\nUpasaggatoti, dukkhānupassanā.\nCalatoti, aniccānupassanā.\nPabhaṅgutoti, aniccānupassanā.\nAddhuvatoti, aniccānupassanā.\nAtāṇatoti, dukkhānupassanā.\nAleṇatoti, dukkhānupassanā.\nAsaraṇatoti, dukkhānupassanā.\nRittatoti, anattānupassanā."}},{"id":"ps3.9:22","sourceIds":["ps3.9:22.1","ps3.9:22.2","ps3.9:22.3","ps3.9:22.4","ps3.9:22.5","ps3.9:22.6","ps3.9:22.7","ps3.9:22.8","ps3.9:22.9","ps3.9:22.10"],"kind":"text","text":{"pi":"Tucchatoti, anattānupassanā.\nSuññatoti, anattānupassanā.\nAnattatoti, anattānupassanā.\nĀdīnavatoti, dukkhānupassanā.\nVipariṇāmadhammatoti, aniccānupassanā.\nAsārakatoti, anattānupassanā.\nAghamūlatoti, dukkhānupassanā.\nVadhakatoti, dukkhānupassanā.\nVibhavatoti, aniccānupassanā.\nSāsavatoti, dukkhānupassanā."}},{"id":"ps3.9:23","sourceIds":["ps3.9:23.1","ps3.9:23.2","ps3.9:23.3","ps3.9:23.4","ps3.9:23.5","ps3.9:23.6","ps3.9:23.7","ps3.9:23.8","ps3.9:23.9","ps3.9:23.10"],"kind":"text","text":{"pi":"Saṅkhatatoti, aniccānupassanā.\nMārāmisatoti, dukkhānupassanā.\nJātidhammatoti, dukkhānupassanā.\nJarādhammatoti, dukkhānupassanā.\nByādhidhammatoti, dukkhānupassanā.\nMaraṇadhammatoti, aniccānupassanā.\nSokadhammatoti, dukkhānupassanā.\nParidevadhammatoti, dukkhānupassanā.\nUpāyāsadhammatoti, dukkhānupassanā.\nSaṅkilesikadhammatoti, dukkhānupassanā."}},{"id":"ps3.9:24","sourceIds":["ps3.9:24.1","ps3.9:24.2"],"kind":"text","text":{"pi":"Imehi cattālīsāya ākārehi anulomikaṁ khantiṁ paṭilabhati.\nImehi cattālīsāya ākārehi sammattaniyāmaṁ okkamati."}},{"id":"ps3.9:25","sourceIds":["ps3.9:25.1"],"kind":"text","text":{"pi":"Imehi cattālīsāya ākārehi anulomikaṁ khantiṁ paṭilabhantassa, imehi cattālīsāya ākārehi sammattaniyāmaṁ okkamantassa kati aniccānupassanā, kati dukkhānupassanā, kati anattānupassanā?"}},{"id":"ps3.9:26","sourceIds":["ps3.9:26.1","ps3.9:26.2","ps3.9:26.3","ps3.9:26.4","ps3.9:26.5"],"kind":"text","text":{"pi":"Pañcavīsati anattānupassanā,\nPaññāsa aniccānupassanā;\nSataṁ pañcavīsati ceva,\nYāni dukkhe pavuccareti.\nVipassanākathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps3.9/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}