{"id":"pv23","title":"11. Suttapetavatthu","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"pv23","title":"11. Suttapetavatthu","units":[{"id":"pv23:0","sourceIds":["pv23:0.1","pv23:0.2","pv23:0.3"],"kind":"text","text":{"pi":"Petavatthu\nUbbarivagga\n11. Suttapetavatthu"}},{"id":"pv23:1","sourceIds":["pv23:1.1","pv23:1.2","pv23:1.3","pv23:1.4"],"kind":"text","text":{"pi":"“Ahaṁ pure pabbajitassa bhikkhuno,\nSuttaṁ adāsiṁ upasaṅkamma yācitā;\nTassa vipāko vipulaphalūpalabbhati,\nBahukā ca me uppajjare vatthakoṭiyo."}},{"id":"pv23:2","sourceIds":["pv23:2.1","pv23:2.2","pv23:2.3","pv23:2.4"],"kind":"text","text":{"pi":"Pupphābhikiṇṇaṁ ramitaṁ vimānaṁ,\nAnekacittaṁ naranārisevitaṁ;\nSāhaṁ bhuñjāmi ca pārupāmi ca,\nPahūtavittā na ca tāva khīyati."}},{"id":"pv23:3","sourceIds":["pv23:3.1","pv23:3.2","pv23:3.3","pv23:3.4"],"kind":"text","text":{"pi":"Tasseva kammassa vipākamanvayā,\nSukhañca sātañca idhūpalabbhati;\nSāhaṁ gantvā punadeva mānusaṁ,\nKāhāmi puññāni nayayyaputta man”ti."}},{"id":"pv23:4","sourceIds":["pv23:4.1","pv23:4.2","pv23:4.3","pv23:4.4"],"kind":"text","text":{"pi":"“Satta tuvaṁ vassasatā idhāgatā,\nJiṇṇā ca vuḍḍhā ca tahiṁ bhavissasi;\nSabbeva te kālakatā ca ñātakā,\nKiṁ tattha gantvāna ito karissasī”ti."}},{"id":"pv23:5","sourceIds":["pv23:5.1","pv23:5.2","pv23:5.3","pv23:5.4"],"kind":"text","text":{"pi":"“Satteva vassāni idhāgatāya me,\nDibbañca sukhañca samappitāya;\nSāhaṁ gantvāna punadeva mānusaṁ,\nKāhāmi puññāni nayayyaputta man”ti."}},{"id":"pv23:6","sourceIds":["pv23:6.1","pv23:6.2","pv23:6.3","pv23:6.4"],"kind":"text","text":{"pi":"So taṁ gahetvāna pasayha bāhāyaṁ,\nPaccānayitvāna theriṁ sudubbalaṁ;\n“Vajjesi aññampi janaṁ idhāgataṁ,\n‘Karotha puññāni sukhūpalabbhati’."}},{"id":"pv23:7","sourceIds":["pv23:7.1","pv23:7.2","pv23:7.3","pv23:7.4"],"kind":"text","text":{"pi":"Diṭṭhā mayā akatena sādhunā,\nPetā vihaññanti tatheva manussā;\nKammañca katvā sukhavedanīyaṁ,\nDevā manussā ca sukhe ṭhitā pajā”ti."}},{"id":"pv23:8","sourceIds":["pv23:8.1"],"kind":"text","text":{"pi":"Suttapetavatthu ekādasamaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/pv23/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}