{"id":"sn12.64","title":"If There is Desire","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn12.64","title":"If There is Desire","units":[{"id":"sn12.64:0","sourceIds":["sn12.64:0.1","sn12.64:0.2","sn12.64:0.3"],"kind":"text","text":{"pi":"Saṁyutta Nikāya 12.64\n7. Mahāvagga\nAtthirāgasutta","en":"Linked Discourses 12.64\n7. The Great Chapter\nIf There is Desire"}},{"id":"sn12.64:1","sourceIds":["sn12.64:1.1","sn12.64:1.2","sn12.64:1.3","sn12.64:1.4","sn12.64:1.5"],"kind":"text","text":{"pi":"Sāvatthiyaṁ viharati.\n“Cattārome, bhikkhave, āhārā bhūtānaṁ vā sattānaṁ ṭhitiyā sambhavesīnaṁ vā anuggahāya.\nKatame cattāro?\nKabaḷīkāro āhāro oḷāriko vā sukhumo vā, phasso dutiyo, manosañcetanā tatiyā, viññāṇaṁ catutthaṁ.\nIme kho, bhikkhave, cattāro āhārā bhūtānaṁ vā sattānaṁ ṭhitiyā sambhavesīnaṁ vā anuggahāya.","en":"At Sāvatthī.\n“Mendicants, these four fuels maintain sentient beings that have been born and help those about to be born.\nWhat four?\nEdible food, whether solid or subtle; contact is the second, mental intention the third, and consciousness the fourth.\nThese are the four fuels that maintain sentient beings that have been born and help those about to be born."}},{"id":"sn12.64:2","sourceIds":["sn12.64:2.1","sn12.64:2.2","sn12.64:2.3","sn12.64:2.4","sn12.64:2.5","sn12.64:2.6"],"kind":"text","text":{"pi":"Kabaḷīkāre ce, bhikkhave, āhāre atthi rāgo atthi nandī atthi taṇhā, patiṭṭhitaṁ tattha viññāṇaṁ virūḷhaṁ.\nYattha patiṭṭhitaṁ viññāṇaṁ virūḷhaṁ, atthi tattha nāmarūpassa avakkanti.\nYattha atthi nāmarūpassa avakkanti, atthi tattha saṅkhārānaṁ vuddhi.\nYattha atthi saṅkhārānaṁ vuddhi, atthi tattha āyatiṁ punabbhavābhinibbatti.\nYattha atthi āyatiṁ punabbhavābhinibbatti, atthi tattha āyatiṁ jātijarāmaraṇaṁ.\nYattha atthi āyatiṁ jātijarāmaraṇaṁ, sasokaṁ taṁ, bhikkhave, sadaraṁ saupāyāsanti vadāmi.","en":"If there is desire, relishing, and craving for edible food, consciousness becomes established there and grows.\nWhere consciousness is established and grows, name and form are conceived.\nWhere name and form are conceived, there is the growth of choices.\nWhere choices grow, there is regeneration into a new state of existence in the future.\nWhere there is regeneration into a new state of existence in the future, there is rebirth, old age, and death in the future.\nWhere there is rebirth, old age, and death in the future, I say this is full of sorrow, anguish, and distress."}},{"id":"sn12.64:3","sourceIds":["sn12.64:3.1","sn12.64:3.2","sn12.64:3.3","sn12.64:3.4","sn12.64:3.5","sn12.64:3.6","sn12.64:3.7","sn12.64:3.8"],"kind":"text","text":{"pi":"Phasse ce, bhikkhave, āhāre …pe…\nmanosañcetanāya ce, bhikkhave, āhāre …\nviññāṇe ce, bhikkhave, āhāre atthi rāgo atthi nandī atthi taṇhā, patiṭṭhitaṁ tattha viññāṇaṁ virūḷhaṁ.\nYattha patiṭṭhitaṁ viññāṇaṁ virūḷhaṁ, atthi tattha nāmarūpassa avakkanti.\nYattha atthi nāmarūpassa avakkanti, atthi tattha saṅkhārānaṁ vuddhi.\nYattha atthi saṅkhārānaṁ vuddhi, atthi tattha āyatiṁ punabbhavābhinibbatti.\nYattha atthi āyatiṁ punabbhavābhinibbatti, atthi tattha āyatiṁ jātijarāmaraṇaṁ.\nYattha atthi āyatiṁ jātijarāmaraṇaṁ, sasokaṁ taṁ, bhikkhave, sadaraṁ saupāyāsanti vadāmi.","en":"If there is desire, relishing, and craving for contact as fuel …\nIf there is desire, relishing, and craving for mental intention as fuel …\nIf there is desire, relishing, and craving for consciousness as fuel, consciousness becomes established there and grows.\nWhere consciousness is established and grows, name and form are conceived.\nWhere name and form are conceived, there is the growth of choices.\nWhere choices grow, there is regeneration into a new state of existence in the future.\nWhere there is regeneration into a new state of existence in the future, there is rebirth, old age, and death in the future.\nWhere there is rebirth, old age, and death in the future, I say this is full of sorrow, anguish, and distress."}},{"id":"sn12.64:4","sourceIds":["sn12.64:4.1","sn12.64:4.2","sn12.64:4.3","sn12.64:4.4","sn12.64:4.5","sn12.64:4.6","sn12.64:4.7"],"kind":"text","text":{"pi":"Seyyathāpi, bhikkhave, rajako vā cittakārako vā sati rajanāya vā lākhāya vā haliddiyā vā nīliyā vā mañjiṭṭhāya vā suparimaṭṭhe vā phalake bhittiyā vā dussapaṭṭe vā itthirūpaṁ vā purisarūpaṁ vā abhinimmineyya sabbaṅgapaccaṅgaṁ;\nevameva kho, bhikkhave, kabaḷīkāre ce āhāre atthi rāgo atthi nandī atthi taṇhā, patiṭṭhitaṁ tattha viññāṇaṁ virūḷhaṁ.\nYattha patiṭṭhitaṁ viññāṇaṁ virūḷhaṁ, atthi tattha nāmarūpassa avakkanti.\nYattha atthi nāmarūpassa avakkanti, atthi tattha saṅkhārānaṁ vuddhi.\nYattha atthi saṅkhārānaṁ vuddhi, atthi tattha āyatiṁ punabbhavābhinibbatti.\nYattha atthi āyatiṁ punabbhavābhinibbatti, atthi tattha āyatiṁ jātijarāmaraṇaṁ.\nYattha atthi āyatiṁ jātijarāmaraṇaṁ, sasokaṁ taṁ, bhikkhave, sadaraṁ saupāyāsanti vadāmi.","en":"Suppose an artist or painter had some dye, red lac, turmeric, indigo, or rose madder. And on a polished plank or a wall or a canvas they’d create the form of a woman or a man, whole in its major and minor limbs.\nIn the same way, if there is desire, relishing, and craving for edible food, consciousness becomes established there and grows.\nWhere consciousness is established and grows, name and form are conceived.\nWhere name and form are conceived, there is the growth of choices.\nWhere choices grow, there is regeneration into a new state of existence in the future.\nWhere there is regeneration into a new state of existence in the future, there is rebirth, old age, and death in the future.\nWhere there is rebirth, old age, and death in the future, I say this is full of sorrow, anguish, and distress."}},{"id":"sn12.64:5","sourceIds":["sn12.64:5.1","sn12.64:5.2","sn12.64:5.3","sn12.64:5.4","sn12.64:5.5","sn12.64:5.6","sn12.64:5.7","sn12.64:5.8"],"kind":"text","text":{"pi":"Phasse ce, bhikkhave, āhāre …pe…\nmanosañcetanāya ce, bhikkhave, āhāre …\nviññāṇe ce, bhikkhave, āhāre atthi rāgo atthi nandī atthi taṇhā, patiṭṭhitaṁ tattha viññāṇaṁ virūḷhaṁ.\nYattha patiṭṭhitaṁ viññāṇaṁ virūḷhaṁ, atthi tattha nāmarūpassa avakkanti.\nYattha atthi nāmarūpassa avakkanti, atthi tattha saṅkhārānaṁ vuddhi.\nYattha atthi saṅkhārānaṁ vuddhi, atthi tattha āyatiṁ punabbhavābhinibbatti.\nYattha atthi āyatiṁ punabbhavābhinibbatti, atthi tattha āyatiṁ jātijarāmaraṇaṁ.\nYattha atthi āyatiṁ jātijarāmaraṇaṁ, sasokaṁ taṁ, bhikkhave, sadaraṁ saupāyāsanti vadāmi.","en":"If there is desire, relishing, and craving for contact as fuel …\nIf there is desire, relishing, and craving for mental intention as fuel …\nIf there is desire, relishing, and craving for consciousness as fuel, consciousness becomes established there and grows.\nWhere consciousness is established and grows, name and form are conceived.\nWhere name and form are conceived, there is the growth of choices.\nWhere choices grow, there is regeneration into a new state of existence in the future.\nWhere there is regeneration into a new state of existence in the future, there is rebirth, old age, and death in the future.\nWhere there is rebirth, old age, and death in the future, I say this is full of sorrow, anguish, and distress."}},{"id":"sn12.64:6","sourceIds":["sn12.64:6.1","sn12.64:6.2","sn12.64:6.3","sn12.64:6.4","sn12.64:6.5","sn12.64:6.6"],"kind":"text","text":{"pi":"Kabaḷīkāre ce, bhikkhave, āhāre natthi rāgo natthi nandī natthi taṇhā, appatiṭṭhitaṁ tattha viññāṇaṁ avirūḷhaṁ.\nYattha appatiṭṭhitaṁ viññāṇaṁ avirūḷhaṁ, natthi tattha nāmarūpassa avakkanti.\nYattha natthi nāmarūpassa avakkanti, natthi tattha saṅkhārānaṁ vuddhi.\nYattha natthi saṅkhārānaṁ vuddhi, natthi tattha āyatiṁ punabbhavābhinibbatti.\nYattha natthi āyatiṁ punabbhavābhinibbatti, natthi tattha āyatiṁ jātijarāmaraṇaṁ.\nYattha natthi āyatiṁ jātijarāmaraṇaṁ, asokaṁ taṁ, bhikkhave, adaraṁ anupāyāsanti vadāmi.","en":"If there is no desire, relishing, and craving for edible food, consciousness does not become established there and doesn’t grow.\nWhere consciousness is not established and doesn’t grow, name and form are not conceived.\nWhere name and form are not conceived, there is no growth of choices.\nWhere choices don’t grow, there is no regeneration into a new state of existence in the future.\nWhere there is no regeneration into a new state of existence in the future, there is no rebirth, old age, and death in the future.\nWhere there is no rebirth, old age, and death in the future, I say there’s no sorrow, anguish, and distress."}},{"id":"sn12.64:7","sourceIds":["sn12.64:7.1","sn12.64:7.2","sn12.64:7.3","sn12.64:7.4","sn12.64:7.5","sn12.64:7.6","sn12.64:7.7","sn12.64:7.8"],"kind":"text","text":{"pi":"Phasse ce, bhikkhave, āhāre …pe…\nmanosañcetanāya ce, bhikkhave, āhāre …\nviññāṇe ce, bhikkhave, āhāre natthi rāgo natthi nandī natthi taṇhā, appatiṭṭhitaṁ tattha viññāṇaṁ avirūḷhaṁ.\nYattha appatiṭṭhitaṁ viññāṇaṁ avirūḷhaṁ, natthi tattha nāmarūpassa avakkanti.\nYattha natthi nāmarūpassa avakkanti, natthi tattha saṅkhārānaṁ vuddhi.\nYattha natthi saṅkhārānaṁ vuddhi, natthi tattha āyatiṁ punabbhavābhinibbatti.\nYattha natthi āyatiṁ punabbhavābhinibbatti, natthi tattha āyatiṁ jātijarāmaraṇaṁ.\nYattha natthi āyatiṁ jātijarāmaraṇaṁ, asokaṁ taṁ, bhikkhave, adaraṁ anupāyāsanti vadāmi.","en":"If there is no desire, relishing, and craving for contact as fuel …\nIf there is no desire, relishing, and craving for mental intention as fuel …\nIf there is no desire, relishing, and craving for consciousness as fuel, consciousness doesn’t become established there and doesn’t grow.\nWhere consciousness is not established and doesn’t grow, name and form are not conceived.\nWhere name and form are not conceived, there is no growth of choices.\nWhere choices don’t grow, there is no regeneration into a new state of existence in the future.\nWhere there is no regeneration into a new state of existence in the future, there is no rebirth, old age, and death in the future.\nWhere there is no rebirth, old age, and death in the future, I say there’s no sorrow, anguish, and distress."}},{"id":"sn12.64:8","sourceIds":["sn12.64:8.1","sn12.64:8.2","sn12.64:8.3","sn12.64:8.4","sn12.64:8.5","sn12.64:8.6","sn12.64:8.7","sn12.64:8.8","sn12.64:8.9"],"kind":"text","text":{"pi":"Seyyathāpi, bhikkhave, kūṭāgāraṁ vā kūṭāgārasālaṁ vā uttarāya vā dakkhiṇāya vā pācīnāya vā vātapānā sūriye uggacchante vātapānena rasmi pavisitvā kvāssa patiṭṭhitā”ti?\n“Pacchimāyaṁ, bhante, bhittiyan”ti.\n“Pacchimā ce, bhikkhave, bhitti nāssa kvāssa patiṭṭhitā”ti?\n“Pathaviyaṁ, bhante”ti.\n“Pathavī ce, bhikkhave, nāssa kvāssa patiṭṭhitā”ti?\n“Āpasmiṁ, bhante”ti.\n“Āpo ce, bhikkhave, nāssa kvāssa patiṭṭhitā”ti?\n“Appatiṭṭhitā, bhante”ti.\n“Evameva kho, bhikkhave, kabaḷīkāre ce āhāre natthi rāgo natthi nandī natthi taṇhā …pe….","en":"Suppose there was a bungalow or a hall with a peaked roof, with windows on the northern, southern, or eastern side. When the sun rises and a ray of light enters through a window, where would it land?”\n“On the western wall, sir.”\n“If there was no western wall, where would it land?”\n“On the ground, sir.”\n“If there was no ground, where would it land?”\n“In water, sir.”\n“If there was no water, where would it land?”\n“It wouldn’t land, sir.”\n“In the same way, if there is no desire, relishing, and craving for edible food, consciousness does not become established there and doesn’t grow. …"}},{"id":"sn12.64:9","sourceIds":["sn12.64:9.1","sn12.64:9.2","sn12.64:9.3","sn12.64:9.4","sn12.64:9.5","sn12.64:9.6","sn12.64:9.7","sn12.64:9.8","sn12.64:9.9"],"kind":"text","text":{"pi":"Phasse ce, bhikkhave, āhāre …\nmanosañcetanāya ce, bhikkhave, āhāre …\nviññāṇe ce, bhikkhave, āhāre natthi rāgo natthi nandī natthi taṇhā, appatiṭṭhitaṁ tattha viññāṇaṁ avirūḷhaṁ.\nYattha appatiṭṭhitaṁ viññāṇaṁ avirūḷhaṁ, natthi tattha nāmarūpassa avakkanti.\nYattha natthi nāmarūpassa avakkanti, natthi tattha saṅkhārānaṁ vuddhi.\nYattha natthi saṅkhārānaṁ vuddhi, natthi tattha āyatiṁ punabbhavābhinibbatti.\nYattha natthi āyatiṁ punabbhavābhinibbatti, natthi tattha āyatiṁ jātijarāmaraṇaṁ.\nYattha natthi āyatiṁ jātijarāmaraṇaṁ asokaṁ taṁ, bhikkhave, adaraṁ anupāyāsanti vadāmī”ti.\nCatutthaṁ.","en":"If there is no desire, relishing, and craving for contact as fuel …\nIf there is no desire, relishing, and craving for mental intention as fuel …\nIf there is no desire, relishing, and craving for consciousness as fuel, consciousness doesn’t become established there and doesn’t grow.\nWhere consciousness is not established and doesn’t grow, name and form are not conceived.\nWhere name and form are not conceived, there is no growth of choices.\nWhere choices don’t grow, there is no regeneration into a new state of existence in the future.\nWhere there is no regeneration into a new state of existence in the future, there is no rebirth, old age, and death in the future.\nWhere there is no rebirth, old age, and death in the future, I say there’s no sorrow, anguish, and distress.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn12.64/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}