{"id":"sn3.12","title":"Five Kings","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn3.12","title":"Five Kings","units":[{"id":"sn3.12:0","sourceIds":["sn3.12:0.1","sn3.12:0.2","sn3.12:0.3"],"kind":"text","text":{"pi":"Saṁyutta Nikāya 3.12\n2. Dutiyavagga\nPañcarājasutta","en":"Linked Discourses 3.12\n2. Childless\nFive Kings"}},{"id":"sn3.12:1","sourceIds":["sn3.12:1.1","sn3.12:1.2","sn3.12:1.3","sn3.12:1.4","sn3.12:1.5","sn3.12:1.6","sn3.12:1.7","sn3.12:1.8","sn3.12:1.9","sn3.12:1.10","sn3.12:1.11","sn3.12:1.12","sn3.12:1.13","sn3.12:1.14"],"kind":"text","text":{"pi":"Sāvatthinidānaṁ.\nTena kho pana samayena pañcannaṁ rājūnaṁ pasenadipamukhānaṁ pañcahi kāmaguṇehi samappitānaṁ samaṅgībhūtānaṁ paricārayamānānaṁ ayamantarākathā udapādi:\n“kiṁ nu kho kāmānaṁ aggan”ti?\nTatrekacce evamāhaṁsu:\n“rūpā kāmānaṁ aggan”ti.\nEkacce evamāhaṁsu:\n“saddā kāmānaṁ aggan”ti.\nEkacce evamāhaṁsu:\n“gandhā kāmānaṁ aggan”ti.\nEkacce evamāhaṁsu:\n“rasā kāmānaṁ aggan”ti.\nEkacce evamāhaṁsu:\n“phoṭṭhabbā kāmānaṁ aggan”ti.\nYato kho te rājāno nāsakkhiṁsu aññamaññaṁ saññāpetuṁ.","en":"At Sāvatthī.\nNow at that time five kings headed by Pasenadi were amusing themselves, supplied and provided with the five kinds of sensual stimulation, and this discussion came up among them:\n“What’s the best of sensual pleasures?”\nSome of them said,\n“Sights are the best of sensual pleasures!”\nOthers said,\n“Sounds are best!”\nOthers said,\n“Smells are best!”\nOthers said,\n“Tastes are best!”\nOthers said,\n“Touches are best!”\nSince those kings were unable to persuade each other,"}},{"id":"sn3.12:2","sourceIds":["sn3.12:2.1","sn3.12:2.2","sn3.12:2.3","sn3.12:2.4"],"kind":"text","text":{"pi":"Atha kho rājā pasenadi kosalo te rājāno etadavoca:\n“āyāma, mārisā, yena bhagavā tenupasaṅkamissāma; upasaṅkamitvā bhagavantaṁ etamatthaṁ paṭipucchissāma.\nYathā no bhagavā byākarissati tathā naṁ dhāressāmā”ti.\n“Evaṁ, mārisā”ti kho te rājāno rañño pasenadissa kosalassa paccassosuṁ.","en":"King Pasenadi said to them,\n“Come, good fellows, let’s go to the Buddha and ask him about this.\nAs he answers, so we’ll remember it.”\n“Yes, good fellows,” replied those kings."}},{"id":"sn3.12:3","sourceIds":["sn3.12:3.1","sn3.12:3.2","sn3.12:3.3","sn3.12:3.4","sn3.12:3.5","sn3.12:3.6","sn3.12:3.7","sn3.12:3.8","sn3.12:3.9","sn3.12:3.10","sn3.12:3.11","sn3.12:3.12","sn3.12:3.13","sn3.12:3.14"],"kind":"text","text":{"pi":"Atha kho te pañca rājāno pasenadipamukhā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinno kho rājā pasenadi kosalo bhagavantaṁ etadavoca:\n“idha, bhante, amhākaṁ pañcannaṁ rājūnaṁ pañcahi kāmaguṇehi samappitānaṁ samaṅgībhūtānaṁ paricārayamānānaṁ ayamantarākathā udapādi:\n‘kiṁ nu kho kāmānaṁ aggan’ti?\nEkacce evamāhaṁsu:\n‘rūpā kāmānaṁ aggan’ti.\nEkacce evamāhaṁsu:\n‘saddā kāmānaṁ aggan’ti.\nEkacce evamāhaṁsu:\n‘gandhā kāmānaṁ aggan’ti.\nEkacce evamāhaṁsu:\n‘rasā kāmānaṁ aggan’ti.\nEkacce evamāhaṁsu:\n‘phoṭṭhabbā kāmānaṁ aggan’ti.\nKiṁ nu kho, bhante, kāmānaṁ aggan”ti?","en":"Then those five kings headed by Pasenadi went to the Buddha, bowed, and sat down to one side. King Pasenadi reported their conversation to the Buddha, and said,\n“Sir, what’s the best of sensual pleasures?”"}},{"id":"sn3.12:4","sourceIds":["sn3.12:4.1","sn3.12:4.2","sn3.12:4.3","sn3.12:4.4","sn3.12:4.5"],"kind":"text","text":{"pi":"“Manāpapariyantaṁ khvāhaṁ, mahārāja, pañcasu kāmaguṇesu agganti vadāmi.\nTeva, mahārāja, rūpā ekaccassa manāpā honti, teva rūpā ekaccassa amanāpā honti.\nYehi ca yo rūpehi attamano hoti paripuṇṇasaṅkappo, so tehi rūpehi aññaṁ rūpaṁ uttaritaraṁ vā paṇītataraṁ vā na pattheti.\nTe tassa rūpā paramā honti.\nTe tassa rūpā anuttarā honti.","en":"“Great king, which kind of sensual stimulation is best is defined by which is most agreeable, I say.\nThe very same sights that are agreeable to some are disagreeable to others.\nWhen you’re happy with certain sights, as you’ve got all you wished for, you don’t want any other sight that’s better or finer.\nFor you, those sights are perfect\nand supreme."}},{"id":"sn3.12:5","sourceIds":["sn3.12:5.1","sn3.12:5.2","sn3.12:5.3","sn3.12:5.4"],"kind":"text","text":{"pi":"Teva, mahārāja, saddā ekaccassa manāpā honti, teva saddā ekaccassa amanāpā honti.\nYehi ca yo saddehi attamano hoti paripuṇṇasaṅkappo, so tehi saddehi aññaṁ saddaṁ uttaritaraṁ vā paṇītataraṁ vā na pattheti.\nTe tassa saddā paramā honti.\nTe tassa saddā anuttarā honti.","en":"The very same sounds …"}},{"id":"sn3.12:6","sourceIds":["sn3.12:6.1","sn3.12:6.2","sn3.12:6.3","sn3.12:6.4"],"kind":"text","text":{"pi":"Teva, mahārāja, gandhā ekaccassa manāpā honti, teva gandhā ekaccassa amanāpā honti.\nYehi ca yo gandhehi attamano hoti paripuṇṇasaṅkappo, so tehi gandhehi aññaṁ gandhaṁ uttaritaraṁ vā paṇītataraṁ vā na pattheti.\nTe tassa gandhā paramā honti.\nTe tassa gandhā anuttarā honti.","en":"smells …"}},{"id":"sn3.12:7","sourceIds":["sn3.12:7.1","sn3.12:7.2","sn3.12:7.3","sn3.12:7.4"],"kind":"text","text":{"pi":"Teva, mahārāja, rasā ekaccassa manāpā honti, teva rasā ekaccassa amanāpā honti.\nYehi ca yo rasehi attamano hoti paripuṇṇasaṅkappo, so tehi rasehi aññaṁ rasaṁ uttaritaraṁ vā paṇītataraṁ vā na pattheti.\nTe tassa rasā paramā honti.\nTe tassa rasā anuttarā honti.","en":"tastes …"}},{"id":"sn3.12:8","sourceIds":["sn3.12:8.1","sn3.12:8.2","sn3.12:8.3","sn3.12:8.4"],"kind":"text","text":{"pi":"Teva, mahārāja, phoṭṭhabbā ekaccassa manāpā honti, teva phoṭṭhabbā ekaccassa amanāpā honti.\nYehi ca yo phoṭṭhabbehi attamano hoti paripuṇṇasaṅkappo, so tehi phoṭṭhabbehi aññaṁ phoṭṭhabbaṁ uttaritaraṁ vā paṇītataraṁ vā na pattheti.\nTe tassa phoṭṭhabbā paramā honti.\nTe tassa phoṭṭhabbā anuttarā hontī”ti.","en":"touches that are agreeable to some are disagreeable to others.\nWhen you’re happy with certain touches, as you’ve got all you wished for, you don’t want any other touch that’s better or finer.\nFor you, those touches are perfect\nand supreme.”"}},{"id":"sn3.12:9","sourceIds":["sn3.12:9.1","sn3.12:9.2","sn3.12:9.3","sn3.12:9.4"],"kind":"text","text":{"pi":"Tena kho pana samayena candanaṅgaliko upāsako tassaṁ parisāyaṁ nisinno hoti.\nAtha kho candanaṅgaliko upāsako uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca:\n“paṭibhāti maṁ, bhagavā, paṭibhāti maṁ, sugatā”ti.\n“Paṭibhātu taṁ, candanaṅgalikā”ti bhagavā avoca.","en":"Now at that time the lay follower Candanaṅgalika was sitting in that assembly.\nThen he rose from his seat, arranged his robe over one shoulder, raised his cupped palms toward the Buddha, and said,\n“I feel inspired to speak, Blessed One! I feel inspired to speak, Holy One!”\n“Then speak as you feel inspired,” said the Buddha."}},{"id":"sn3.12:10","sourceIds":["sn3.12:10.1"],"kind":"text","text":{"pi":"Atha kho candanaṅgaliko upāsako bhagavato sammukhā tadanurūpāya gāthāya abhitthavi:","en":"Then the lay follower Candanaṅgalika extolled the Buddha in his presence with an appropriate verse:"}},{"id":"sn3.12:11","sourceIds":["sn3.12:11.1","sn3.12:11.2","sn3.12:11.3","sn3.12:11.4"],"kind":"text","text":{"pi":"“Padumaṁ yathā kokanadaṁ sugandhaṁ,\nPāto siyā phullamavītagandhaṁ;\nAṅgīrasaṁ passa virocamānaṁ,\nTapantamādiccamivantalikkhe”ti.","en":"“Like a fragrant pink lotus\nthat blooms at daybreak, its fragrance unfaded—\nsee Aṅgīrasa dazzle,\nbright as the sun in the sky!”"}},{"id":"sn3.12:12","sourceIds":["sn3.12:12.1","sn3.12:12.2"],"kind":"text","text":{"pi":"Atha kho te pañca rājāno candanaṅgalikaṁ upāsakaṁ pañcahi uttarāsaṅgehi acchādesuṁ.\nAtha kho candanaṅgaliko upāsako tehi pañcahi uttarāsaṅgehi bhagavantaṁ acchādesīti.","en":"Then those five kings clothed Candanaṅgalika with five upper robes.\nAnd Candanaṅgalika in turn endowed the Buddha with those robes."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn3.12/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}