{"id":"sn3.5","title":"Self-Protected","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn3.5","title":"Self-Protected","units":[{"id":"sn3.5:0","sourceIds":["sn3.5:0.1","sn3.5:0.2","sn3.5:0.3"],"kind":"text","text":{"pi":"Saṁyutta Nikāya 3.5\n1. Paṭhamavagga\nAttarakkhitasutta","en":"Linked Discourses 3.5\n1. Shackles\nSelf-Protected"}},{"id":"sn3.5:1","sourceIds":["sn3.5:1.1","sn3.5:1.2","sn3.5:1.3","sn3.5:1.4","sn3.5:1.5","sn3.5:1.6","sn3.5:1.7","sn3.5:1.8","sn3.5:1.9","sn3.5:1.10","sn3.5:1.11","sn3.5:1.12","sn3.5:1.13","sn3.5:1.14","sn3.5:1.15","sn3.5:1.16","sn3.5:1.17","sn3.5:1.18","sn3.5:1.19"],"kind":"text","text":{"pi":"Sāvatthinidānaṁ.\nEkamantaṁ nisinno kho rājā pasenadi kosalo bhagavantaṁ etadavoca:\n“idha mayhaṁ, bhante, rahogatassa paṭisallīnassa evaṁ cetaso parivitakko udapādi:\n‘kesaṁ nu kho rakkhito attā, kesaṁ arakkhito attā’ti?\nTassa mayhaṁ, bhante, etadahosi:\n‘ye kho keci kāyena duccaritaṁ caranti, vācāya duccaritaṁ caranti, manasā duccaritaṁ caranti;\ntesaṁ arakkhito attā.\nKiñcāpi te hatthikāyo vā rakkheyya, assakāyo vā rakkheyya, rathakāyo vā rakkheyya, pattikāyo vā rakkheyya;\natha kho tesaṁ arakkhito attā.\nTaṁ kissa hetu?\nBāhirā hesā rakkhā, nesā rakkhā ajjhattikā;\ntasmā tesaṁ arakkhito attā.\nYe ca kho keci kāyena sucaritaṁ caranti, vācāya sucaritaṁ caranti, manasā sucaritaṁ caranti;\ntesaṁ rakkhito attā.\nKiñcāpi te neva hatthikāyo rakkheyya, na assakāyo rakkheyya, na rathakāyo rakkheyya, na pattikāyo rakkheyya;\natha kho tesaṁ rakkhito attā.\nTaṁ kissa hetu?\nAjjhattikā hesā rakkhā, nesā rakkhā bāhirā;\ntasmā tesaṁ rakkhito attā’”ti.","en":"At Sāvatthī.\nSeated to one side, King Pasenadi said to the Buddha,\n“Just now, sir, as I was in private retreat this thought came to mind.\n‘Who are those who protect themselves? And who are those who don’t protect themselves?’\nThen it occurred to me:\n‘Those who do bad things by way of body, speech, and mind\ndon’t protect themselves.\nEven if they’re protected by a company of elephants, cavalry, chariots, or infantry,\nthey still don’t protect themselves.\nWhy is that?\nBecause such protection is exterior, not interior.\nThat’s why they don’t protect themselves.\nThose who do good things by way of body, speech, and mind\ndo protect themselves.\nEven if they’re not protected by a company of elephants, cavalry, chariots, or infantry,\nthey still protect themselves.\nWhy is that?\nBecause such protection is interior, not exterior.\nThat’s why they do protect themselves.’”"}},{"id":"sn3.5:2","sourceIds":["sn3.5:2.1","sn3.5:2.2","sn3.5:2.3","sn3.5:2.4","sn3.5:2.5","sn3.5:2.6","sn3.5:2.7","sn3.5:2.8","sn3.5:2.9","sn3.5:2.10","sn3.5:2.11","sn3.5:2.12","sn3.5:2.13","sn3.5:2.14"],"kind":"text","text":{"pi":"“Evametaṁ, mahārāja, evametaṁ, mahārāja.\nYe hi keci, mahārāja, kāyena duccaritaṁ caranti …pe…\ntesaṁ arakkhito attā.\nTaṁ kissa hetu?\nBāhirā hesā, mahārāja, rakkhā, nesā rakkhā ajjhattikā;\ntasmā tesaṁ arakkhito attā.\nYe hi keci, mahārāja, kāyena sucaritaṁ caranti, vācāya sucaritaṁ caranti, manasā sucaritaṁ caranti;\ntesaṁ rakkhito attā.\nKiñcāpi te neva hatthikāyo rakkheyya, na assakāyo rakkheyya, na rathakāyo rakkheyya, na pattikāyo rakkheyya;\natha kho tesaṁ rakkhito attā.\nTaṁ kissa hetu?\nAjjhattikā hesā, mahārāja, rakkhā, nesā rakkhā bāhirā;\ntasmā tesaṁ rakkhito attā”ti.\nIdamavoca …pe…","en":"“That’s so true, Great King! That’s so true!” said the Buddha. And he repeated the king’s statement, adding:"}},{"id":"sn3.5:3","sourceIds":["sn3.5:3.1","sn3.5:3.2","sn3.5:3.3","sn3.5:3.4","sn3.5:3.5","sn3.5:3.6"],"kind":"text","text":{"pi":"“Kāyena saṁvaro sādhu,\nsādhu vācāya saṁvaro;\nManasā saṁvaro sādhu,\nsādhu sabbattha saṁvaro;\nSabbattha saṁvuto lajjī,\nrakkhitoti pavuccatī”ti.","en":"“Restraint of the body is good;\nrestraint of speech is good;\nrestraint of mind is good;\neverywhere, restraint is good.\nA sincere person, restrained everywhere,\nis said to be ‘protected’.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn3.5/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}