{"id":"sn35.133","title":"Verahaccāni","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn35.133","title":"Verahaccāni","units":[{"id":"sn35.133:0","sourceIds":["sn35.133:0.1","sn35.133:0.2","sn35.133:0.3"],"kind":"text","text":{"pi":"Saṁyutta Nikāya 35.133\n13. Gahapativagga\nVerahaccānisutta","en":"Linked Discourses 35.133\n13. Householders\nVerahaccāni"}},{"id":"sn35.133:1","sourceIds":["sn35.133:1.1","sn35.133:1.2","sn35.133:1.3","sn35.133:1.4","sn35.133:1.5","sn35.133:1.6","sn35.133:1.7"],"kind":"text","text":{"pi":"Ekaṁ samayaṁ āyasmā udāyī kāmaṇḍāyaṁ viharati todeyyassa brāhmaṇassa ambavane.\nAtha kho verahaccānigottāya brāhmaṇiyā antevāsī māṇavako yenāyasmā udāyī tenupasaṅkami; upasaṅkamitvā āyasmatā udāyinā saddhiṁ sammodi.\nSammodanīyaṁ kathaṁ sāraṇīyaṁ vītisāretvā ekamantaṁ nisīdi.\nEkamantaṁ nisinnaṁ kho taṁ māṇavakaṁ āyasmā udāyī dhammiyā kathāya sandassesi samādapesi samuttejesi sampahaṁsesi.\nAtha kho so māṇavako āyasmatā udāyinā dhammiyā kathāya sandassito samādapito samuttejito sampahaṁsito uṭṭhāyāsanā yena verahaccānigottā brāhmaṇī tenupasaṅkami; upasaṅkamitvā verahaccānigottaṁ brāhmaṇiṁ etadavoca:\n“yagghe, bhoti, jāneyyāsi.\nSamaṇo udāyī dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ, sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsetī”ti.","en":"At one time Venerable Udāyī was staying near Kāmaṇḍā in the brahmin Todeyya’s mango grove.\nThen a boy who was a pupil of the brahmin lady of the Verahaccāni clan went up to Udāyī and exchanged greetings with him.\nWhen the greetings and polite conversation were over, he sat down to one side.\nUdāyī educated, encouraged, fired up, and inspired that young student with a Dhamma talk.\nThen that young student went to the brahmin lady of the Verahaccāni clan and said to her,\n“Please, madam, you should know this.\nThe ascetic Udāyī teaches Dhamma that’s good in the beginning, good in the middle, and good in the end, meaningful and well-phrased. And he reveals a spiritual practice that’s entirely full and pure.”"}},{"id":"sn35.133:2","sourceIds":["sn35.133:2.1","sn35.133:2.2","sn35.133:2.3","sn35.133:2.4","sn35.133:2.5","sn35.133:2.6","sn35.133:2.7","sn35.133:2.8","sn35.133:2.9"],"kind":"text","text":{"pi":"“Tena hi tvaṁ, māṇavaka, mama vacanena samaṇaṁ udāyiṁ nimantehi svātanāya bhattenā”ti.\n“Evaṁ, bhotī”ti kho so māṇavako verahaccānigottāya brāhmaṇiyā paṭissutvā yenāyasmā udāyī tenupasaṅkami; upasaṅkamitvā āyasmantaṁ udāyiṁ etadavoca:\n“adhivāsetu kira, bhavaṁ udāyī amhākaṁ ācariyabhariyāya verahaccānigottāya brāhmaṇiyā svātanāya bhattan”ti.\nAdhivāsesi kho āyasmā udāyī tuṇhībhāvena.\nAtha kho āyasmā udāyī tassā rattiyā accayena pubbaṇhasamayaṁ nivāsetvā pattacīvaramādāya yena verahaccānigottāya brāhmaṇiyā nivesanaṁ tenupasaṅkami; upasaṅkamitvā paññatte āsane nisīdi.\nAtha kho verahaccānigottā brāhmaṇī āyasmantaṁ udāyiṁ paṇītena khādanīyena bhojanīyena sahatthā santappesi sampavāresi.\nAtha kho verahaccānigottā brāhmaṇī āyasmantaṁ udāyiṁ bhuttāviṁ onītapattapāṇiṁ pādukā ārohitvā ucce āsane nisīditvā sīsaṁ oguṇṭhitvā āyasmantaṁ udāyiṁ etadavoca:\n“bhaṇa, samaṇa, dhamman”ti.\n“Bhavissati, bhagini, samayo”ti vatvā uṭṭhāyāsanā pakkami.","en":"“Then, young student, invite him in my name for tomorrow’s meal.”\n“Yes, madam,” he replied. He went to Udāyī and said,\n“Would Worthy Udāyī please accept an offering of tomorrow’s meal from my tutor’s wife, the brahmin lady of the Verahaccāni clan?”\nUdāyī consented with silence.\nThen when the night had passed, Udāyī robed up in the morning and, taking his bowl and robe, went to the brahmin lady’s home, and sat down on the seat spread out.\nThen the brahmin lady served and satisfied Udāyī with her own hands with delicious fresh and cooked foods.\nWhen Udāyī had eaten and washed his hand and bowl, she put on a pair of slippers, sat on a high seat, covered her head, and said to him,\n“Ascetic, preach the Dhamma.”\n“There will be an occasion for that, sister,” he replied, then rose from his seat and left."}},{"id":"sn35.133:3","sourceIds":["sn35.133:3.1","sn35.133:3.2","sn35.133:3.3","sn35.133:3.4","sn35.133:3.5","sn35.133:3.6"],"kind":"text","text":{"pi":"Dutiyampi kho so māṇavako yenāyasmā udāyī tenupasaṅkami; upasaṅkamitvā āyasmatā udāyinā saddhiṁ sammodi.\nSammodanīyaṁ kathaṁ sāraṇīyaṁ vītisāretvā ekamantaṁ nisīdi.\nEkamantaṁ nisinnaṁ kho taṁ māṇavakaṁ āyasmā udāyī dhammiyā kathāya sandassesi samādapesi samuttejesi sampahaṁsesi.\nDutiyampi kho so māṇavako āyasmatā udāyinā dhammiyā kathāya sandassito samādapito samuttejito sampahaṁsito uṭṭhāyāsanā yena verahaccānigottā brāhmaṇī tenupasaṅkami; upasaṅkamitvā verahaccānigottaṁ brāhmaṇiṁ etadavoca:\n“yagghe, bhoti, jāneyyāsi.\nSamaṇo udāyī dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ, sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsetī”ti.","en":"For a second time that young student went to Venerable Udāyī …\nAnd for a second time that young student went to the brahmin lady of the Verahaccāni clan …"}},{"id":"sn35.133:4","sourceIds":["sn35.133:4.1","sn35.133:4.2","sn35.133:4.3","sn35.133:4.4","sn35.133:4.5","sn35.133:4.6","sn35.133:4.7","sn35.133:4.8","sn35.133:4.9"],"kind":"text","text":{"pi":"“Evamevaṁ pana tvaṁ, māṇavaka, samaṇassa udāyissa vaṇṇaṁ bhāsasi.\nSamaṇo panudāyī ‘bhaṇa, samaṇa, dhamman’ti vutto samāno ‘bhavissati, bhagini, samayo’ti vatvā uṭṭhāyāsanā pakkanto”ti.\n“Tathā hi pana tvaṁ, bhoti, pādukā ārohitvā ucce āsane nisīditvā sīsaṁ oguṇṭhitvā etadavoca:\n‘bhaṇa, samaṇa, dhamman’ti.\nDhammagaruno hi te bhavanto dhammagāravā”ti.\n“Tena hi tvaṁ, māṇavaka, mama vacanena samaṇaṁ udāyiṁ nimantehi svātanāya bhattenā”ti.\n“Evaṁ, bhotī”ti kho so māṇavako verahaccānigottāya brāhmaṇiyā paṭissutvā yenāyasmā udāyī tenupasaṅkami; upasaṅkamitvā āyasmantaṁ udāyiṁ etadavoca:\n“adhivāsetu kira bhavaṁ udāyī amhākaṁ ācariyabhariyāya verahaccānigottāya brāhmaṇiyā svātanāya bhattan”ti.\nAdhivāsesi kho āyasmā udāyī tuṇhībhāvena.","en":"She said to him, “You keep praising the ascetic Udāyī like this.\nBut when I asked him to preach the Dhamma he just said that there would be an occasion for that, and then he got up and left.”\n“Madam, that’s because you put on a pair of slippers, sat on a high seat, and covered your head before inviting him to teach.\nFor the good sirs respect the teaching.”\n“Then, young student, invite him in my name for tomorrow’s meal.”\n“Yes, madam,” he replied. …"}},{"id":"sn35.133:5","sourceIds":["sn35.133:5.1","sn35.133:5.2","sn35.133:5.3","sn35.133:5.4"],"kind":"text","text":{"pi":"Atha kho āyasmā udāyī tassā rattiyā accayena pubbaṇhasamayaṁ nivāsetvā pattacīvaramādāya yena verahaccānigottāya brāhmaṇiyā nivesanaṁ tenupasaṅkami; upasaṅkamitvā paññatte āsane nisīdi.\nAtha kho verahaccānigottā brāhmaṇī āyasmantaṁ udāyiṁ paṇītena khādanīyena bhojanīyena sahatthā santappesi sampavāresi.\nAtha kho verahaccānigottā brāhmaṇī āyasmantaṁ udāyiṁ bhuttāviṁ onītapattapāṇiṁ pādukā orohitvā nīce āsane nisīditvā sīsaṁ vivaritvā āyasmantaṁ udāyiṁ etadavoca:\n“kismiṁ nu kho, bhante, sati arahanto sukhadukkhaṁ paññapenti, kismiṁ asati arahanto sukhadukkhaṁ na paññapentī”ti?","en":"Then the brahmin lady served and satisfied Udāyī with her own hands with delicious fresh and cooked foods.\nWhen Udāyī had eaten and washed his hand and bowl, she took off her slippers, sat on a low seat, uncovered her head, and said to him,\n“Sir, when what exists do the perfected ones assert that there is pleasure and pain? When what doesn’t exist do the perfected ones not declare that there is pleasure and pain?”"}},{"id":"sn35.133:6","sourceIds":["sn35.133:6.1","sn35.133:6.2","sn35.133:6.3"],"kind":"text","text":{"pi":"“Cakkhusmiṁ kho, bhagini, sati arahanto sukhadukkhaṁ paññapenti, cakkhusmiṁ asati arahanto sukhadukkhaṁ na paññapenti …pe…\njivhāya sati arahanto sukhadukkhaṁ paññapenti, jivhāya asati arahanto sukhadukkhaṁ na paññapenti …pe….\nManasmiṁ sati arahanto sukhadukkhaṁ paññapenti, manasmiṁ asati arahanto sukhadukkhaṁ na paññapentī”ti.","en":"“Sister, when there’s an eye, the perfected ones assert that there is pleasure and pain. When there’s no eye, the perfected ones don’t declare that there is pleasure and pain.\nWhen there’s an ear … nose … tongue … body …\nmind, the perfected ones assert that there is pleasure and pain. When there’s no mind, the perfected ones don’t declare that there is pleasure and pain.”"}},{"id":"sn35.133:7","sourceIds":["sn35.133:7.1","sn35.133:7.2","sn35.133:7.3","sn35.133:7.4","sn35.133:7.5","sn35.133:7.6","sn35.133:7.7"],"kind":"text","text":{"pi":"Evaṁ vutte, verahaccānigottā brāhmaṇī āyasmantaṁ udāyiṁ etadavoca:\n“abhikkantaṁ, bhante, abhikkantaṁ, bhante.\nSeyyathāpi, bhante, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ ayyena udāyinā anekapariyāyena dhammo pakāsito.\nEsāhaṁ, ayya udāyi, taṁ bhagavantaṁ saraṇaṁ gacchāmi, dhammañca, bhikkhusaṅghañca.\nUpāsikaṁ maṁ ayyo udāyī dhāretu ajjatagge pāṇupetaṁ saraṇaṁ gatan”ti.\nDasamaṁ.\nGahapativaggo tatiyo.","en":"When he said this, the brahmin lady said to Udāyī,\n“Excellent, sir! Excellent!\nAs if he were righting the overturned, or revealing the hidden, or pointing out the path to the lost, or lighting a lamp in the dark so people with clear eyes can see what’s there, Master Udāyī has made the teaching clear in many ways.\nI go for refuge to the Buddha, to the teaching, and to the mendicant Saṅgha.\nFrom this day forth, may Master Udāyī remember me as a lay follower who has gone for refuge for life.”"}},{"id":"sn35.133:8","sourceIds":["sn35.133:8.0","sn35.133:8.1","sn35.133:8.2","sn35.133:8.3","sn35.133:8.4"],"kind":"text","text":{"pi":"Tassuddānaṁ\nVesālī vajji nāḷandā,\nBhāradvāja soṇo ca ghosito;\nHāliddiko nakulapitā,\nLohicco verahaccānīti."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn35.133/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}