{"id":"sn36.7","title":"The Infirmary (1st)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn36.7","title":"The Infirmary (1st)","units":[{"id":"sn36.7:0","sourceIds":["sn36.7:0.1","sn36.7:0.2","sn36.7:0.3"],"kind":"text","text":{"pi":"Saṁyutta Nikāya 36.7\n1. Sagāthāvagga\nPaṭhamagelaññasutta","en":"Linked Discourses 36.7\n1. With Verses\nThe Infirmary (1st)"}},{"id":"sn36.7:1","sourceIds":["sn36.7:1.1","sn36.7:1.2","sn36.7:1.3"],"kind":"text","text":{"pi":"Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.\nAtha kho bhagavā sāyanhasamayaṁ paṭisallānā vuṭṭhito yena gilānasālā tenupasaṅkami; upasaṅkamitvā paññatte āsane nisīdi.\nNisajja kho bhagavā bhikkhū āmantesi:","en":"At one time the Buddha was staying near Vesālī, at the Great Wood, in the hall with the peaked roof.\nThen in the late afternoon, the Buddha came out of retreat and went to the infirmary, where he sat down on the seat spread out,\nand addressed the mendicants:"}},{"id":"sn36.7:2","sourceIds":["sn36.7:2.1","sn36.7:2.2"],"kind":"text","text":{"pi":"“Sato, bhikkhave, bhikkhu sampajāno kālaṁ āgameyya.\nAyaṁ vo amhākaṁ anusāsanī.","en":"“Mendicants, a mendicant should await their time mindful and aware.\nThis is my instruction to you."}},{"id":"sn36.7:3","sourceIds":["sn36.7:3.1","sn36.7:3.2","sn36.7:3.3","sn36.7:3.4","sn36.7:3.5","sn36.7:3.6"],"kind":"text","text":{"pi":"Kathañca, bhikkhave, bhikkhu sato hoti?\nIdha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ;\nvedanāsu vedanānupassī viharati …pe…\ncitte cittānupassī viharati …pe…\ndhammesu dhammānupassī viharati ātāpī sampajāno satimā, vineyya loke abhijjhādomanassaṁ.\nEvaṁ kho, bhikkhave, bhikkhu sato hoti.","en":"And how is a mendicant mindful?\nIt’s when a mendicant meditates by observing an aspect of the body—keen, aware, and mindful, rid of covetousness and displeasure for the world.\nThey meditate observing an aspect of feelings …\nThey meditate observing an aspect of the mind …\nThey meditate observing an aspect of principles—keen, aware, and mindful, rid of covetousness and displeasure for the world.\nThat’s how a mendicant is mindful."}},{"id":"sn36.7:4","sourceIds":["sn36.7:4.1","sn36.7:4.2","sn36.7:4.3","sn36.7:4.4","sn36.7:4.5"],"kind":"text","text":{"pi":"Kathañca, bhikkhave, bhikkhu sampajāno hoti?\nIdha, bhikkhave, bhikkhu abhikkante paṭikkante sampajānakārī hoti, ālokite vilokite sampajānakārī hoti, samiñjite pasārite sampajānakārī hoti, saṅghāṭipattacīvaradhāraṇe sampajānakārī hoti, asite pīte khāyite sāyite sampajānakārī hoti, uccārapassāvakamme sampajānakārī hoti, gate ṭhite nisinne sutte jāgarite bhāsite tuṇhībhāve sampajānakārī hoti.\nEvaṁ kho, bhikkhave, bhikkhu sampajānakārī hoti.\nSato, bhikkhave, bhikkhu sampajāno kālaṁ āgameyya.\nAyaṁ vo amhākaṁ anusāsanī.","en":"And how is a mendicant aware?\nIt’s when a mendicant acts with situational awareness when going out and coming back; when looking ahead and aside; when bending and extending the limbs; when bearing the outer robe, bowl and robes; when eating, drinking, chewing, and tasting; when urinating and defecating; when walking, standing, sitting, sleeping, waking, speaking, and keeping silent.\nThat’s how a mendicant acts with situational awareness.\nA mendicant should await their time mindful and aware.\nThis is my instruction to you."}},{"id":"sn36.7:5","sourceIds":["sn36.7:5.1","sn36.7:5.2","sn36.7:5.3","sn36.7:5.4","sn36.7:5.5","sn36.7:5.6","sn36.7:5.7","sn36.7:5.8","sn36.7:5.9"],"kind":"text","text":{"pi":"Tassa ce, bhikkhave, bhikkhuno evaṁ satassa sampajānassa appamattassa ātāpino pahitattassa viharato uppajjati sukhā vedanā, so evaṁ pajānāti:\n‘uppannā kho myāyaṁ sukhā vedanā.\nSā ca kho paṭicca, no appaṭicca.\nKiṁ paṭicca?\nImameva kāyaṁ paṭicca.\nAyaṁ kho pana kāyo anicco saṅkhato paṭiccasamuppanno.\nAniccaṁ kho pana saṅkhataṁ paṭiccasamuppannaṁ kāyaṁ paṭicca uppannā sukhā vedanā kuto niccā bhavissatī’ti.\nSo kāye ca sukhāya ca vedanāya aniccānupassī viharati, vayānupassī viharati, virāgānupassī viharati, nirodhānupassī viharati, paṭinissaggānupassī viharati.\nTassa kāye ca sukhāya ca vedanāya aniccānupassino viharato, vayānupassino viharato, virāgānupassino viharato, nirodhānupassino viharato, paṭinissaggānupassino viharato, yo kāye ca sukhāya ca vedanāya rāgānusayo, so pahīyati.","en":"While a mendicant is meditating like this—mindful, aware, diligent, keen, and resolute—if pleasant feelings arise, they understand:\n‘A pleasant feeling has arisen in me.\nThat’s dependent, not independent.\nDependent on what?\nDependent on my own body.\nBut this body is impermanent, conditioned, dependently originated.\nSo how could a pleasant feeling be permanent, since it has arisen dependent on a body that is impermanent, conditioned, and dependently originated?’\nThey meditate observing impermanence, vanishing, dispassion, cessation, and letting go in the body and pleasant feeling.\nAs they do so, they give up the underlying tendency to greed for the body and pleasant feeling."}},{"id":"sn36.7:6","sourceIds":["sn36.7:6.1","sn36.7:6.2","sn36.7:6.3","sn36.7:6.4","sn36.7:6.5","sn36.7:6.6","sn36.7:6.7","sn36.7:6.8","sn36.7:6.9","sn36.7:6.10"],"kind":"text","text":{"pi":"Tassa ce, bhikkhave, bhikkhuno evaṁ satassa sampajānassa appamattassa ātāpino pahitattassa viharato uppajjati dukkhā vedanā.\nSo evaṁ pajānāti:\n‘uppannā kho myāyaṁ dukkhā vedanā.\nSā ca kho paṭicca, no appaṭicca.\nKiṁ paṭicca?\nImameva kāyaṁ paṭicca.\nAyaṁ kho pana kāyo anicco saṅkhato paṭiccasamuppanno.\nAniccaṁ kho pana saṅkhataṁ paṭiccasamuppannaṁ kāyaṁ paṭicca uppannā dukkhā vedanā kuto niccā bhavissatī’ti.\nSo kāye ca dukkhāya ca vedanāya aniccānupassī viharati, vayānupassī viharati, virāgānupassī viharati, nirodhānupassī viharati, paṭinissaggānupassī viharati.\nTassa kāye ca dukkhāya ca vedanāya aniccānupassino viharato …pe… paṭinissaggānupassino viharato, yo kāye ca dukkhāya ca vedanāya paṭighānusayo, so pahīyati.","en":"While a mendicant is meditating like this—mindful, aware, diligent, keen, and resolute—if painful feelings arise, they understand:\n‘A painful feeling has arisen in me.\nThat’s dependent, not independent.\nDependent on what?\nDependent on my own body.\nBut this body is impermanent, conditioned, dependently originated.\nSo how could a painful feeling be permanent, since it has arisen dependent on a body that is impermanent, conditioned, and dependently originated?’\nThey meditate observing impermanence, vanishing, dispassion, cessation, and letting go in the body and painful feeling.\nAs they do so, they give up the underlying tendency to aversion toward the body and painful feeling."}},{"id":"sn36.7:7","sourceIds":["sn36.7:7.1","sn36.7:7.2","sn36.7:7.3","sn36.7:7.4","sn36.7:7.5","sn36.7:7.6","sn36.7:7.7","sn36.7:7.8","sn36.7:7.9"],"kind":"text","text":{"pi":"Tassa ce, bhikkhave, bhikkhuno evaṁ satassa sampajānassa appamattassa ātāpino pahitattassa viharato uppajjati adukkhamasukhā vedanā, so evaṁ pajānāti:\n‘uppannā kho myāyaṁ adukkhamasukhā vedanā.\nSā ca kho paṭicca, no appaṭicca.\nKiṁ paṭicca?\nImameva kāyaṁ paṭicca.\nAyaṁ kho pana kāyo anicco saṅkhato paṭiccasamuppanno.\nAniccaṁ kho pana saṅkhataṁ paṭiccasamuppannaṁ kāyaṁ paṭicca uppannā adukkhamasukhā vedanā kuto niccā bhavissatī’ti.\nSo kāye ca adukkhamasukhāya ca vedanāya aniccānupassī viharati, vayānupassī viharati, virāgānupassī viharati, nirodhānupassī viharati, paṭinissaggānupassī viharati.\nTassa kāye ca adukkhamasukhāya ca vedanāya aniccānupassino viharato …pe… paṭinissaggānupassino viharato, yo kāye ca adukkhamasukhāya ca vedanāya avijjānusayo, so pahīyati.","en":"While a mendicant is meditating like this—mindful, aware, diligent, keen, and resolute—if neutral feelings arise, they understand:\n‘A neutral feeling has arisen in me.\nThat’s dependent, not independent.\nDependent on what?\nDependent on my own body.\nBut this body is impermanent, conditioned, dependently originated.\nSo how could a neutral feeling be permanent, since it has arisen dependent on a body that is impermanent, conditioned, and dependently originated?’\nThey meditate observing impermanence, vanishing, dispassion, cessation, and letting go in the body and neutral feeling.\nAs they do so, they give up the underlying tendency to ignorance toward the body and neutral feeling."}},{"id":"sn36.7:8","sourceIds":["sn36.7:8.1","sn36.7:8.2","sn36.7:8.3","sn36.7:8.4","sn36.7:8.5","sn36.7:8.6","sn36.7:8.7","sn36.7:8.8"],"kind":"text","text":{"pi":"So sukhañce vedanaṁ vedayati, sā aniccāti pajānāti, anajjhositāti pajānāti, anabhinanditāti pajānāti;\ndukkhañce vedanaṁ vedayati …pe…\nadukkhamasukhañce vedanaṁ vedayati, sā aniccāti pajānāti, anajjhositāti pajānāti, anabhinanditāti pajānāti.\nSo sukhañce vedanaṁ vedayati, visaññutto naṁ vedayati;\ndukkhañce vedanaṁ vedayati, visaññutto naṁ vedayati;\nadukkhamasukhañce vedanaṁ vedayati, visaññutto naṁ vedayati.\nSo kāyapariyantikaṁ vedanaṁ vedayamāno ‘kāyapariyantikaṁ vedanaṁ vedayāmī’ti pajānāti, jīvitapariyantikaṁ vedanaṁ vedayamāno ‘jīvitapariyantikaṁ vedanaṁ vedayāmī’ti pajānāti.\n‘Kāyassa bhedā uddhaṁ jīvitapariyādānā idheva sabbavedayitāni anabhinanditāni sītībhavissantī’ti pajānāti.","en":"If they feel a pleasant feeling, they understand that it’s impermanent, that they’re not attached to it, and that they don’t take pleasure in it.\nIf they feel a painful feeling, they understand that it’s impermanent, that they’re not attached to it, and that they don’t take pleasure in it.\nIf they feel a neutral feeling, they understand that it’s impermanent, that they’re not attached to it, and that they don’t take pleasure in it.\nIf they feel a pleasant feeling, they feel it detached.\nIf they feel a painful feeling, they feel it detached.\nIf they feel a neutral feeling, they feel it detached.\nFeeling the end of the body draw close, they understand: ‘I feel the end of the body draw close.’ Feeling the end of life draw close, they understand: ‘I feel the end of life draw close.’\nThey understand: ‘When my body breaks up and my life has come to an end, everything that’s felt, since I no longer take pleasure in it, will become cool right here.’"}},{"id":"sn36.7:9","sourceIds":["sn36.7:9.1","sn36.7:9.2","sn36.7:9.3","sn36.7:9.4","sn36.7:9.5"],"kind":"text","text":{"pi":"Seyyathāpi, bhikkhave, telañca paṭicca vaṭṭiñca paṭicca telappadīpo jhāyeyya,\ntasseva telassa ca vaṭṭiyā ca pariyādānā anāhāro nibbāyeyya;\nevameva kho, bhikkhave, bhikkhu kāyapariyantikaṁ vedanaṁ vedayamāno ‘kāyapariyantikaṁ vedanaṁ vedayāmī’ti pajānāti. Jīvitapariyantikaṁ vedanaṁ vedayamāno ‘jīvitapariyantikaṁ vedanaṁ vedayāmī’ti pajānāti.\n‘Kāyassa bhedā uddhaṁ jīvitapariyādānā idheva sabbavedayitāni anabhinanditāni sītībhavissantī’ti pajānātī”ti.\nSattamaṁ.","en":"Suppose an oil lamp depended on oil and a wick to burn.\nAs the oil and the wick are used up, it would be extinguished due to not being fed.\nIn the same way, feeling the end of the body draw close, a mendicant understands: ‘I feel the end of the body draw close.’ Feeling the end of life draw close, a mendicant understands: ‘I feel the end of life draw close.’\nThey understand: ‘When my body breaks up and my life is over, everything that’s felt, since I no longer take pleasure in it, will become cool right here.’”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn36.7/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}