{"id":"sn42.12","title":"With Rāsiya","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn42.12","title":"With Rāsiya","units":[{"id":"sn42.12:0","sourceIds":["sn42.12:0.1","sn42.12:0.2","sn42.12:0.3"],"kind":"text","text":{"pi":"Saṁyutta Nikāya 42.12\n1. Gāmaṇivagga\nRāsiyasutta","en":"Linked Discourses 42.12\n1. Chiefs\nWith Rāsiya"}},{"id":"sn42.12:1","sourceIds":["sn42.12:1.1","sn42.12:1.2","sn42.12:1.3","sn42.12:1.4"],"kind":"text","text":{"pi":"Atha kho rāsiyo gāmaṇi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho rāsiyo gāmaṇi bhagavantaṁ etadavoca:\n“sutaṁ metaṁ, bhante, ‘samaṇo gotamo sabbaṁ tapaṁ garahati, sabbaṁ tapassiṁ lūkhajīviṁ ekaṁsena upavadati upakkosatī’ti.\nYe te, bhante, evamāhaṁsu: ‘samaṇo gotamo sabbaṁ tapaṁ garahati, sabbaṁ tapassiṁ lūkhajīviṁ ekaṁsena upavadati upakkosatī’ti, kacci te, bhante, bhagavato vuttavādino, na ca bhagavantaṁ abhūtena abbhācikkhanti, dhammassa cānudhammaṁ byākaronti, na ca koci sahadhammiko vādānuvādo gārayhaṁ ṭhānaṁ āgacchatī”ti?\n“Ye te, gāmaṇi, evamāhaṁsu: ‘samaṇo gotamo sabbaṁ tapaṁ garahati, sabbaṁ tapassiṁ lūkhajīviṁ ekaṁsena upavadati upakkosatī’ti, na me te vuttavādino, abbhācikkhanti ca pana maṁ te asatā tucchā abhūtena.","en":"Then Rāsiya the chief went up to the Buddha, bowed, sat down to one side, and said to him:\n“Sir, I have heard this: ‘The ascetic Gotama criticizes all forms of mortification. He categorically condemns and denounces those fervent mortifiers who live rough.’\nI trust those who say this repeat what the Buddha has said, and do not misrepresent him with an untruth? Is their explanation in line with the teaching? Are there any legitimate grounds for rebuttal and criticism?”\n“Chief, those who say this do not repeat what I have said. They misrepresent me with what is false, hollow, and untrue."}},{"id":"sn42.12:2","sourceIds":["sn42.12:2.1","sn42.12:2.2","sn42.12:2.3","sn42.12:2.4","sn42.12:2.5","sn42.12:2.6","sn42.12:2.7"],"kind":"text","text":{"pi":"Dveme, gāmaṇi, antā pabbajitena na sevitabbā—\nyo cāyaṁ kāmesu kāmasukhallikānuyogo hīno gammo pothujjaniko anariyo anatthasaṁhito, yo cāyaṁ attakilamathānuyogo dukkho anariyo anatthasaṁhito.\nEte te, gāmaṇi, ubho ante anupagamma majjhimā paṭipadā tathāgatena abhisambuddhā—cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati.\nKatamā ca sā, gāmaṇi, majjhimā paṭipadā tathāgatena abhisambuddhā—cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati?\nAyameva ariyo aṭṭhaṅgiko maggo, seyyathidaṁ—\nsammādiṭṭhi …pe… sammāsamādhi.\nAyaṁ kho sā, gāmaṇi, majjhimā paṭipadā tathāgatena abhisambuddhā—cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati.","en":"These two extremes should not be cultivated by one gone forth.\nIndulgence in sensual pleasures, which is low, crude, ordinary, ignoble, and pointless. And indulgence in self-mortification, which is painful, ignoble, and pointless.\nAvoiding these two extremes, the Realized One understood the middle way of practice, which gives vision and knowledge, and leads to peace, direct knowledge, awakening, and extinguishment.\nAnd what is that middle way of practice?\nIt is simply this noble eightfold path, that is:\nright view, right purpose, right speech, right action, right livelihood, right effort, right mindfulness, and right immersion.\nThis, chief, is the middle way of practice that was understood by the Realized One, which gives vision and knowledge, and leads to peace, direct knowledge, awakening, and extinguishment."}},{"id":"sn42.12:3","sourceIds":["sn42.12:3.1","sn42.12:3.2","sn42.12:3.3","sn42.12:3.4","sn42.12:3.5","sn42.12:3.6","sn42.12:3.7"],"kind":"text","text":{"pi":"Tayo kho me, gāmaṇi, kāmabhogino santo saṁvijjamānā lokasmiṁ.\nKatame tayo?\nIdha, gāmaṇi, ekacco kāmabhogī adhammena bhoge pariyesati, sāhasena adhammena bhoge pariyesitvā sāhasena na attānaṁ sukheti na pīṇeti na saṁvibhajati na puññāni karoti.\nIdha pana, gāmaṇi, ekacco kāmabhogī adhammena bhoge pariyesati sāhasena.\nAdhammena bhoge pariyesitvā sāhasena attānaṁ sukheti pīṇeti, na saṁvibhajati na puññāni karoti.\nIdha pana, gāmaṇi, ekacco kāmabhogī adhammena bhoge pariyesati sāhasena.\nAdhammena bhoge pariyesitvā sāhasena attānaṁ sukheti pīṇeti saṁvibhajati puññāni karoti.","en":"There are these three pleasure seekers in the world.\nWhat three?\nTake a pleasure seeker who seeks wealth using illegitimate, coercive means, and who doesn’t make themselves happy and pleased, or share it and make merit.\nNext, a pleasure seeker seeks wealth using illegitimate, coercive means.\nThey make themselves happy and pleased, but don’t share it and make merit.\nNext, a pleasure seeker seeks wealth using illegitimate, coercive means.\nThey make themselves happy and pleased, and they share it and make merit."}},{"id":"sn42.12:4","sourceIds":["sn42.12:4.1","sn42.12:4.2","sn42.12:4.3","sn42.12:4.4","sn42.12:4.5","sn42.12:4.6"],"kind":"text","text":{"pi":"Idha pana, gāmaṇi, ekacco kāmabhogī dhammādhammena bhoge pariyesati sāhasenapi asāhasenapi.\nDhammādhammena bhoge pariyesitvā sāhasenapi asāhasenapi na attānaṁ sukheti, na pīṇeti, na saṁvibhajati, na puññāni karoti.\nIdha pana, gāmaṇi, ekacco kāmabhogī dhammādhammena bhoge pariyesati sāhasenapi asāhasenapi.\nDhammādhammena bhoge pariyesitvā sāhasenapi asāhasenapi attānaṁ sukheti pīṇeti, na saṁvibhajati, na puññāni karoti.\nIdha pana, gāmaṇi, ekacco kāmabhogī dhammādhammena bhoge pariyesati, sāhasenapi asāhasenapi.\nDhammādhammena bhoge pariyesitvā sāhasenapi asāhasenapi attānaṁ sukheti pīṇeti saṁvibhajati puññāni karoti.","en":"Next, a pleasure seeker seeks wealth using means both legitimate and illegitimate, and coercive and non-coercive.\nThey don’t make themselves happy and pleased, or share it and make merit.\nNext, a pleasure seeker seeks wealth using means both legitimate and illegitimate, and coercive and non-coercive.\nThey don’t make themselves happy and pleased, or share it and make merit.\nNext, a pleasure seeker seeks wealth using means both legitimate and illegitimate, and coercive and non-coercive.\nThey make themselves happy and pleased, and they share it and make merit."}},{"id":"sn42.12:5","sourceIds":["sn42.12:5.1","sn42.12:5.2","sn42.12:5.3","sn42.12:5.4","sn42.12:5.5","sn42.12:5.6","sn42.12:5.7","sn42.12:5.8","sn42.12:5.9","sn42.12:5.10"],"kind":"text","text":{"pi":"Idha pana, gāmaṇi, ekacco kāmabhogī dhammena bhoge pariyesati asāhasena.\nDhammena bhoge pariyesitvā asāhasena na attānaṁ sukheti, na pīṇeti, na saṁvibhajati, na puññāni karoti.\nIdha pana, gāmaṇi, ekacco kāmabhogī dhammena bhoge pariyesati asāhasena.\nDhammena bhoge pariyesitvā asāhasena attānaṁ sukheti pīṇeti, na saṁvibhajati, na puññāni karoti.\nIdha pana, gāmaṇi, ekacco kāmabhogī dhammena bhoge pariyesati asāhasena.\nDhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti.\nTe ca bhoge gadhito mucchito ajjhopanno anādīnavadassāvī anissaraṇapañño paribhuñjati.\nIdha pana, gāmaṇi, ekacco kāmabhogī dhammena bhoge pariyesati asāhasena.\nDhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti.\nTe ca bhoge agadhito amucchito anajjhopanno ādīnavadassāvī nissaraṇapañño paribhuñjati.","en":"Next, a pleasure seeker seeks wealth using legitimate, non-coercive means.\nThey don’t make themselves happy and pleased, or share it and make merit.\nNext, a pleasure seeker seeks wealth using legitimate, non-coercive means.\nThey make themselves happy and pleased, but don’t share it and make merit.\nNext, a pleasure seeker seeks wealth using legitimate, non-coercive means.\nThey make themselves happy and pleased, and they share it and make merit.\nThey enjoy that wealth tied, infatuated, attached, blind to the drawbacks, and not understanding the escape.\nNext, a pleasure seeker seeks wealth using legitimate, non-coercive means.\nThey make themselves happy and pleased, and they share it and make merit.\nAnd they enjoy that wealth untied, uninfatuated, unattached, seeing the drawbacks, and understanding the escape."}},{"id":"sn42.12:6","sourceIds":["sn42.12:6.1","sn42.12:6.2","sn42.12:6.3","sn42.12:6.4","sn42.12:6.5","sn42.12:6.6","sn42.12:6.7"],"kind":"text","text":{"pi":"Tatra, gāmaṇi, yvāyaṁ kāmabhogī adhammena bhoge pariyesati sāhasena, adhammena bhoge pariyesitvā sāhasena na attānaṁ sukheti, na pīṇeti, na saṁvibhajati, na puññāni karoti.\nAyaṁ, gāmaṇi, kāmabhogī tīhi ṭhānehi gārayho.\nKatamehi tīhi ṭhānehi gārayho?\nAdhammena bhoge pariyesati sāhasenāti, iminā paṭhamena ṭhānena gārayho.\nNa attānaṁ sukheti na pīṇetīti, iminā dutiyena ṭhānena gārayho.\nNa saṁvibhajati, na puññāni karotīti, iminā tatiyena ṭhānena gārayho.\nAyaṁ, gāmaṇi, kāmabhogī imehi tīhi ṭhānehi gārayho.","en":"Now, consider the pleasure seeker who seeks wealth using illegitimate, coercive means, and who doesn’t make themselves happy and pleased, or share it and make merit.\nThey may be criticized on three grounds.\nWhat three?\nThey seek wealth using illegitimate, coercive means. This is the first ground for criticism.\nThey don’t make themselves happy and pleased. This is the second ground for criticism.\nThey don’t share it and make merit. This is the third ground for criticism.\nThis pleasure seeker may be criticized on these three grounds."}},{"id":"sn42.12:7","sourceIds":["sn42.12:7.1","sn42.12:7.2","sn42.12:7.3","sn42.12:7.4","sn42.12:7.5","sn42.12:7.6","sn42.12:7.7","sn42.12:7.8"],"kind":"text","text":{"pi":"Tatra, gāmaṇi, yvāyaṁ kāmabhogī adhammena bhoge pariyesati sāhasena, adhammena bhoge pariyesitvā sāhasena attānaṁ sukheti pīṇeti, na saṁvibhajati, na puññāni karoti.\nAyaṁ, gāmaṇi, kāmabhogī dvīhi ṭhānehi gārayho, ekena ṭhānena pāsaṁso.\nKatamehi dvīhi ṭhānehi gārayho?\nAdhammena bhoge pariyesati sāhasenāti, iminā paṭhamena ṭhānena gārayho.\nNa saṁvibhajati, na puññāni karotīti, iminā dutiyena ṭhānena gārayho.\nKatamena ekena ṭhānena pāsaṁso?\nAttānaṁ sukheti pīṇetīti, iminā ekena ṭhānena pāsaṁso.\nAyaṁ, gāmaṇi, kāmabhogī imehi dvīhi ṭhānehi gārayho, iminā ekena ṭhānena pāsaṁso.","en":"Now, consider the pleasure seeker who seeks wealth using illegitimate, coercive means, and who makes themselves happy and pleased, but doesn’t share it and make merit.\nThis pleasure seeker may be criticized on two grounds, and praised on one.\nWhat are the two grounds for criticism?\nThey seek wealth using illegitimate, coercive means. This is the first ground for criticism.\nThey don’t share it and make merit. This is the second ground for criticism.\nWhat is the one ground for praise?\nThey make themselves happy and pleased. This is the one ground for praise.\nThis pleasure seeker may be criticized on these two grounds, and praised on this one."}},{"id":"sn42.12:8","sourceIds":["sn42.12:8.1","sn42.12:8.2","sn42.12:8.3","sn42.12:8.4","sn42.12:8.5","sn42.12:8.6","sn42.12:8.7","sn42.12:8.8"],"kind":"text","text":{"pi":"Tatra, gāmaṇi, yvāyaṁ kāmabhogī adhammena bhoge pariyesati sāhasena, adhammena bhoge pariyesitvā sāhasena attānaṁ sukheti pīṇeti saṁvibhajati puññāni karoti.\nAyaṁ, gāmaṇi, kāmabhogī ekena ṭhānena gārayho, dvīhi ṭhānehi pāsaṁso.\nKatamena ekena ṭhānena gārayho?\nAdhammena bhoge pariyesati sāhasenāti, iminā ekena ṭhānena gārayho.\nKatamehi dvīhi ṭhānehi pāsaṁso?\nAttānaṁ sukheti pīṇetīti, iminā paṭhamena ṭhānena pāsaṁso.\nSaṁvibhajati puññāni karotīti, iminā dutiyena ṭhānena pāsaṁso.\nAyaṁ, gāmaṇi, kāmabhogī, iminā ekena ṭhānena gārayho, imehi dvīhi ṭhānehi pāsaṁso.","en":"Now, consider the pleasure seeker who seeks wealth using illegitimate, coercive means, and who makes themselves happy and pleased, and shares it and makes merit.\nThis pleasure seeker may be criticized on one ground, and praised on two.\nWhat is the one ground for criticism?\nThey seek wealth using illegitimate, coercive means. This is the one ground for criticism.\nWhat are the two grounds for praise?\nThey make themselves happy and pleased. This is the first ground for praise.\nThey share it and make merit. This is the second ground for praise.\nThis pleasure seeker may be criticized on this one ground, and praised on these two."}},{"id":"sn42.12:9","sourceIds":["sn42.12:9.1","sn42.12:9.2","sn42.12:9.3","sn42.12:9.4","sn42.12:9.5","sn42.12:9.6","sn42.12:9.7","sn42.12:9.8","sn42.12:9.9"],"kind":"text","text":{"pi":"Tatra, gāmaṇi, yvāyaṁ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi na attānaṁ sukheti, na pīṇeti, na saṁvibhajati, na puññāni karoti.\nAyaṁ, gāmaṇi, kāmabhogī ekena ṭhānena pāsaṁso, tīhi ṭhānehi gārayho.\nKatamena ekena ṭhānena pāsaṁso?\nDhammena bhoge pariyesati asāhasenāti, iminā ekena ṭhānena pāsaṁso.\nKatamehi tīhi ṭhānehi gārayho?\nAdhammena bhoge pariyesati sāhasenāti, iminā paṭhamena ṭhānena gārayho.\nNa attānaṁ sukheti, na pīṇetīti, iminā dutiyena ṭhānena gārayho.\nNa saṁvibhajati, na puññāni karotīti, iminā tatiyena ṭhānena gārayho.\nAyaṁ, gāmaṇi, kāmabhogī iminā ekena ṭhānena pāsaṁso, imehi tīhi ṭhānehi gārayho.","en":"Now, consider the pleasure seeker who seeks wealth using means both legitimate and illegitimate, and coercive and non-coercive, and who doesn’t make themselves happy and pleased, or share it and make merit.\nThey may be praised on one ground, and criticized on three.\nWhat is the one ground for praise?\nThey seek wealth using legitimate, non-coercive means. This is the one ground for praise.\nWhat are the three grounds for criticism?\nThey seek wealth using illegitimate, coercive means. This is the first ground for criticism.\nThey don’t make themselves happy and pleased. This is the second ground for criticism.\nThey don’t share it and make merit. This is the third ground for criticism.\nThis pleasure seeker may be praised on this one ground, and criticized on these three."}},{"id":"sn42.12:10","sourceIds":["sn42.12:10.1","sn42.12:10.2","sn42.12:10.3","sn42.12:10.4","sn42.12:10.5","sn42.12:10.6","sn42.12:10.7","sn42.12:10.8","sn42.12:10.9"],"kind":"text","text":{"pi":"Tatra, gāmaṇi, yvāyaṁ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṁ sukheti pīṇeti, na saṁvibhajati, na puññāni karoti.\nAyaṁ, gāmaṇi, kāmabhogī dvīhi ṭhānehi pāsaṁso, dvīhi ṭhānehi gārayho.\nKatamehi dvīhi ṭhānehi pāsaṁso?\nDhammena bhoge pariyesati asāhasenāti, iminā paṭhamena ṭhānena pāsaṁso.\nAttānaṁ sukheti pīṇetīti, iminā dutiyena ṭhānena pāsaṁso.\nKatamehi dvīhi ṭhānehi gārayho?\nAdhammena bhoge pariyesati sāhasenāti, iminā paṭhamena ṭhānena gārayho.\nNa saṁvibhajati, na puññāni karotīti, iminā dutiyena ṭhānena gārayho.\nAyaṁ, gāmaṇi, kāmabhogī imehi dvīhi ṭhānehi pāsaṁso, imehi dvīhi ṭhānehi gārayho.","en":"Now, consider the pleasure seeker who seeks wealth using means both legitimate and illegitimate, and coercive and non-coercive, and makes themselves happy and pleased, but doesn’t share it and make merit.\nThey may be praised on two grounds, and criticized on two.\nWhat are the two grounds for praise?\nThey seek wealth using legitimate, non-coercive means. This is the first ground for praise.\nThey make themselves happy and pleased. This is the second ground for praise.\nWhat are the two grounds for criticism?\nThey seek wealth using illegitimate, coercive means. This is the first ground for criticism.\nThey don’t share it and make merit. This is the second ground for criticism.\nThis pleasure seeker may be praised on these two grounds, and criticized on these two."}},{"id":"sn42.12:11","sourceIds":["sn42.12:11.1","sn42.12:11.2","sn42.12:11.3","sn42.12:11.4","sn42.12:11.5","sn42.12:11.6","sn42.12:11.7","sn42.12:11.8","sn42.12:11.9"],"kind":"text","text":{"pi":"Tatra, gāmaṇi, yvāyaṁ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṁ sukheti pīṇeti saṁvibhajati puññāni karoti.\nAyaṁ, gāmaṇi, kāmabhogī tīhi ṭhānehi pāsaṁso, ekena ṭhānena gārayho.\nKatamehi tīhi ṭhānehi pāsaṁso?\nDhammena bhoge pariyesati asāhasenāti, iminā paṭhamena ṭhānena pāsaṁso.\nAttānaṁ sukheti pīṇetīti, iminā dutiyena ṭhānena pāsaṁso.\nSaṁvibhajati puññāni karotīti, iminā tatiyena ṭhānena pāsaṁso.\nKatamena ekena ṭhānena gārayho?\nAdhammena bhoge pariyesati sāhasenāti, iminā ekena ṭhānena gārayho.\nAyaṁ, gāmaṇi, kāmabhogī imehi tīhi ṭhānehi pāsaṁso, iminā ekena ṭhānena gārayho.","en":"Now, consider the pleasure seeker who seeks wealth using means both legitimate and illegitimate, and coercive and non-coercive, and who makes themselves happy and pleased, and shares it and makes merit.\nThey may be praised on three grounds, and criticized on one.\nWhat are the three grounds for praise?\nThey seek wealth using legitimate, non-coercive means. This is the first ground for praise.\nThey make themselves happy and pleased. This is the second ground for praise.\nThey share it and make merit. This is the third ground for praise.\nWhat is the one ground for criticism?\nThey seek wealth using illegitimate, coercive means. This is the one ground for criticism.\nThis pleasure seeker may be praised on these three grounds, and criticized on this one."}},{"id":"sn42.12:12","sourceIds":["sn42.12:12.1","sn42.12:12.2","sn42.12:12.3","sn42.12:12.4","sn42.12:12.5","sn42.12:12.6","sn42.12:12.7","sn42.12:12.8"],"kind":"text","text":{"pi":"Tatra, gāmaṇi, yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena, na attānaṁ sukheti, na pīṇeti, na saṁvibhajati, na puññāni karoti.\nAyaṁ, gāmaṇi, kāmabhogī ekena ṭhānena pāsaṁso, dvīhi ṭhānehi gārayho.\nKatamena ekena ṭhānena pāsaṁso?\nDhammena bhoge pariyesati asāhasenāti, iminā ekena ṭhānena pāsaṁso.\nKatamehi dvīhi ṭhānehi gārayho?\nNa attānaṁ sukheti, na pīṇetīti, iminā paṭhamena ṭhānena gārayho.\nNa saṁvibhajati, na puññāni karotīti, iminā dutiyena ṭhānena gārayho.\nAyaṁ, gāmaṇi, kāmabhogī iminā ekena ṭhānena pāsaṁso, imehi dvīhi ṭhānehi gārayho.","en":"Now, consider the pleasure seeker who seeks wealth using legitimate, non-coercive means, but who doesn’t make themselves happy and pleased, or share it and make merit.\nThey may be praised on one ground, and criticized on two.\nWhat is the one ground for praise?\nThey seek wealth using legitimate, non-coercive means. This is the one ground for praise.\nWhat are the two grounds for criticism?\nThey don’t make themselves happy and pleased. This is the first ground for criticism.\nThey don’t share it and make merit. This is the second ground for criticism.\nThis pleasure seeker may be praised on this one ground, and criticized on these two."}},{"id":"sn42.12:13","sourceIds":["sn42.12:13.1","sn42.12:13.2","sn42.12:13.3","sn42.12:13.4","sn42.12:13.5","sn42.12:13.6","sn42.12:13.7","sn42.12:13.8"],"kind":"text","text":{"pi":"Tatra, gāmaṇi, yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṁ sukheti pīṇeti, na saṁvibhajati, na puññāni karoti.\nAyaṁ, gāmaṇi, kāmabhogī dvīhi ṭhānehi pāsaṁso, ekena ṭhānena gārayho.\nKatamehi dvīhi ṭhānehi pāsaṁso?\nDhammena bhoge pariyesati asāhasenāti, iminā paṭhamena ṭhānena pāsaṁso.\nAttānaṁ sukheti pīṇetīti, iminā dutiyena ṭhānena pāsaṁso.\nKatamena ekena ṭhānena gārayho?\nNa saṁvibhajati, na puññāni karotīti, iminā ekena ṭhānena gārayho.\nAyaṁ, gāmaṇi, kāmabhogī imehi dvīhi ṭhānehi pāsaṁso, iminā ekena ṭhānena gārayho.","en":"Now, consider the pleasure seeker who seeks wealth using legitimate, non-coercive means, and who makes themselves happy and pleased, but doesn’t share it and make merit.\nThis pleasure seeker may be praised on two grounds, and criticized on one.\nWhat are the two grounds for praise?\nThey seek wealth using legitimate, non-coercive means. This is the first ground for praise.\nThey make themselves happy and pleased. This is the second ground for praise.\nWhat is the one ground for criticism?\nThey don’t share it and make merit. This is the one ground for criticism.\nThis pleasure seeker may be praised on these two grounds, and criticized on this one."}},{"id":"sn42.12:14","sourceIds":["sn42.12:14.1","sn42.12:14.2","sn42.12:14.3","sn42.12:14.4","sn42.12:14.5","sn42.12:14.6","sn42.12:14.7","sn42.12:14.8","sn42.12:14.9"],"kind":"text","text":{"pi":"Tatra, gāmaṇi, yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti, te ca bhoge gadhito mucchito ajjhopanno anādīnavadassāvī anissaraṇapañño paribhuñjati.\nAyaṁ, gāmaṇi, kāmabhogī tīhi ṭhānehi pāsaṁso, ekena ṭhānena gārayho.\nKatamehi tīhi ṭhānehi pāsaṁso?\nDhammena bhoge pariyesati asāhasenāti, iminā paṭhamena ṭhānena pāsaṁso.\nAttānaṁ sukheti pīṇetīti, iminā dutiyena ṭhānena pāsaṁso.\nSaṁvibhajati puññāni karotīti, iminā tatiyena ṭhānena pāsaṁso.\nKatamena ekena ṭhānena gārayho?\nTe ca bhoge gadhito mucchito ajjhopanno anādīnavadassāvī anissaraṇapañño paribhuñjatīti, iminā ekena ṭhānena gārayho.\nAyaṁ, gāmaṇi, kāmabhogī imehi tīhi ṭhānehi pāsaṁso, iminā ekena ṭhānena gārayho.","en":"Now, consider the pleasure seeker who seeks wealth using legitimate, non-coercive means, and who makes themselves happy and pleased, and shares it and makes merit. But they enjoy that wealth tied, infatuated, attached, blind to the drawbacks, and not understanding the escape.\nThey may be praised on three grounds and criticized on one.\nWhat are the three grounds for praise?\nThey seek wealth using legitimate, non-coercive means. This is the first ground for praise.\nThey make themselves happy and pleased. This is the second ground for praise.\nThey share it and make merit. This is the third ground for praise.\nWhat is the one ground for criticism?\nThey enjoy that wealth tied, infatuated, attached, blind to the drawbacks, and not understanding the escape. This is the one ground for criticism.\nThis pleasure seeker may be praised on these three grounds, and criticized on this one."}},{"id":"sn42.12:15","sourceIds":["sn42.12:15.1","sn42.12:15.2","sn42.12:15.3","sn42.12:15.4","sn42.12:15.5","sn42.12:15.6","sn42.12:15.7","sn42.12:15.8","sn42.12:15.9"],"kind":"text","text":{"pi":"Tatra, gāmaṇi, yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti.\nTe ca bhoge agadhito amucchito anajjhopanno ādīnavadassāvī nissaraṇapañño paribhuñjati.\nAyaṁ, gāmaṇi, kāmabhogī catūhi ṭhānehi pāsaṁso.\nKatamehi catūhi ṭhānehi pāsaṁso?\nDhammena bhoge pariyesati asāhasenāti, iminā paṭhamena ṭhānena pāsaṁso.\nAttānaṁ sukheti pīṇetīti, iminā dutiyena ṭhānena pāsaṁso.\nSaṁvibhajati puññāni karotīti, iminā tatiyena ṭhānena pāsaṁso.\nTe ca bhoge agadhito amucchito anajjhopanno ādīnavadassāvī nissaraṇapañño paribhuñjatīti, iminā catutthena ṭhānena pāsaṁso.\nAyaṁ, gāmaṇi, kāmabhogī imehi catūhi ṭhānehi pāsaṁso.","en":"Now, consider the pleasure seeker who seeks wealth using legitimate, non-coercive means, and who makes themselves happy and pleased, and shares it and makes merit.\nAnd they enjoy that wealth untied, uninfatuated, unattached, seeing the drawbacks, and understanding the escape.\nThis pleasure seeker may be praised on four grounds.\nWhat are the four grounds for praise?\nThey seek wealth using legitimate, non-coercive means. This is the first ground for praise.\nThey make themselves happy and pleased. This is the second ground for praise.\nThey share it and make merit. This is the third ground for praise.\nThey enjoy that wealth untied, uninfatuated, unattached, seeing the drawbacks, and understanding the escape. This is the fourth ground for praise.\nThis pleasure seeker may be praised on these four grounds."}},{"id":"sn42.12:16","sourceIds":["sn42.12:16.1","sn42.12:16.2","sn42.12:16.3","sn42.12:16.4","sn42.12:16.5"],"kind":"text","text":{"pi":"Tayome, gāmaṇi, tapassino lūkhajīvino santo saṁvijjamānā lokasmiṁ.\nKatame tayo?\nIdha, gāmaṇi, ekacco tapassī lūkhajīvī saddhā agārasmā anagāriyaṁ pabbajito hoti:\n‘appeva nāma kusalaṁ dhammaṁ adhigaccheyyaṁ, appeva nāma uttari manussadhammā alamariyañāṇadassanavisesaṁ sacchikareyyan’ti.\nSo attānaṁ ātāpeti paritāpeti, kusalañca dhammaṁ nādhigacchati, uttari ca manussadhammā alamariyañāṇadassanavisesaṁ na sacchikaroti.","en":"These three fervent mortifiers who live rough are found in the world.\nWhat three?\nTake a fervent mortifier who has gone forth out of faith from the lay life to homelessness, thinking:\n‘Hopefully I will achieve a skillful quality! Hopefully I will realize a superhuman distinction in knowledge and vision worthy of the noble ones!’\nThey mortify and torment themselves. But they don’t achieve any skillful quality, or realize any superhuman distinction in knowledge and vision worthy of the noble ones."}},{"id":"sn42.12:17","sourceIds":["sn42.12:17.1","sn42.12:17.2","sn42.12:17.3"],"kind":"text","text":{"pi":"Idha pana, gāmaṇi, ekacco tapassī lūkhajīvī saddhā agārasmā anagāriyaṁ pabbajito hoti:\n‘appeva nāma kusalaṁ dhammaṁ adhigaccheyyaṁ, appeva nāma uttari manussadhammā alamariyañāṇadassanavisesaṁ sacchikareyyan’ti.\nSo attānaṁ ātāpeti paritāpeti, kusalañhi kho dhammaṁ adhigacchati, uttari manussadhammā alamariyañāṇadassanavisesaṁ na sacchikaroti.","en":"Take another fervent mortifier who has gone forth out of faith from the lay life to homelessness, thinking:\n‘Hopefully I will achieve a skillful quality! Hopefully I will realize a superhuman distinction in knowledge and vision worthy of the noble ones!’\nThey mortify and torment themselves. And they achieve a skillful quality, but don’t realize any superhuman distinction in knowledge and vision worthy of the noble ones."}},{"id":"sn42.12:18","sourceIds":["sn42.12:18.1","sn42.12:18.2","sn42.12:18.3"],"kind":"text","text":{"pi":"Idha pana, gāmaṇi, ekacco tapassī lūkhajīvī saddhā agārasmā anagāriyaṁ pabbajito hoti:\n‘appeva nāma kusalaṁ dhammaṁ adhigaccheyyaṁ, appeva nāma uttari manussadhammā alamariyañāṇadassanavisesaṁ sacchikareyyan’ti.\nSo attānaṁ ātāpeti paritāpeti, kusalañca dhammaṁ adhigacchati, uttari ca manussadhammā alamariyañāṇadassanavisesaṁ sacchikaroti.","en":"Take another fervent mortifier who has gone forth out of faith from the lay life to homelessness, thinking:\n‘Hopefully I will achieve a skillful quality! Hopefully I will realize a superhuman distinction in knowledge and vision worthy of the noble ones!’\nThey mortify and torment themselves. And they achieve a skillful quality, and they realize a superhuman distinction in knowledge and vision worthy of the noble ones."}},{"id":"sn42.12:19","sourceIds":["sn42.12:19.1","sn42.12:19.2","sn42.12:19.3","sn42.12:19.4","sn42.12:19.5","sn42.12:19.6"],"kind":"text","text":{"pi":"Tatra, gāmaṇi, yvāyaṁ tapassī lūkhajīvī attānaṁ ātāpeti paritāpeti, kusalañca dhammaṁ nādhigacchati, uttari ca manussadhammā alamariyañāṇadassanavisesaṁ na sacchikaroti. Ayaṁ, gāmaṇi, tapassī lūkhajīvī tīhi ṭhānehi gārayho.\nKatamehi tīhi ṭhānehi gārayho?\nAttānaṁ ātāpeti paritāpetīti, iminā paṭhamena ṭhānena gārayho.\nKusalañca dhammaṁ nādhigacchatīti, iminā dutiyena ṭhānena gārayho.\nUttari ca manussadhammā alamariyañāṇadassanavisesaṁ na sacchikarotīti, iminā tatiyena ṭhānena gārayho.\nAyaṁ, gāmaṇi, tapassī lūkhajīvī, imehi tīhi ṭhānehi gārayho.","en":"In this case, the first fervent mortifier may be criticized on three grounds.\nWhat three?\nThey mortify and torment themselves. This is the first ground for criticism.\nThey don’t achieve a skillful quality. This is the second ground for criticism.\nThey don’t realize a superhuman distinction in knowledge and vision worthy of the noble ones. This is the third ground for criticism.\nThis fervent mortifier may be criticized on these three grounds."}},{"id":"sn42.12:20","sourceIds":["sn42.12:20.1","sn42.12:20.2","sn42.12:20.3","sn42.12:20.4","sn42.12:20.5","sn42.12:20.6","sn42.12:20.7","sn42.12:20.8"],"kind":"text","text":{"pi":"Tatra, gāmaṇi, yvāyaṁ tapassī lūkhajīvī attānaṁ ātāpeti paritāpeti, kusalañhi kho dhammaṁ adhigacchati, uttari ca manussadhammā alamariyañāṇadassanavisesaṁ na sacchikaroti.\nAyaṁ, gāmaṇi, tapassī lūkhajīvī dvīhi ṭhānehi gārayho, ekena ṭhānena pāsaṁso.\nKatamehi dvīhi ṭhānehi gārayho?\nAttānaṁ ātāpeti paritāpetīti, iminā paṭhamena ṭhānena gārayho.\nUttari ca manussadhammā alamariyañāṇadassanavisesaṁ na sacchikarotīti, iminā dutiyena ṭhānena gārayho.\nKatamena ekena ṭhānena pāsaṁso?\nKusalañhi kho dhammaṁ adhigacchatīti, iminā ekena ṭhānena pāsaṁso.\nAyaṁ, gāmaṇi, tapassī lūkhajīvī imehi dvīhi ṭhānehi gārayho, iminā ekena ṭhānena pāsaṁso.","en":"In this case, the second fervent mortifier\nmay be criticized on two grounds, and praised on one.\nWhat are the two grounds for criticism?\nThey mortify and torment themselves. This is the first ground for criticism.\nThey don’t realize a superhuman distinction in knowledge and vision worthy of the noble ones. This is the second ground for criticism.\nWhat is the one ground for praise?\nThey achieve a skillful quality. This is the one ground for praise.\nThis fervent mortifier may be criticized on these two grounds, and praised on one."}},{"id":"sn42.12:21","sourceIds":["sn42.12:21.1","sn42.12:21.2","sn42.12:21.3","sn42.12:21.4","sn42.12:21.5","sn42.12:21.6","sn42.12:21.7"],"kind":"text","text":{"pi":"Tatra, gāmaṇi, yvāyaṁ tapassī lūkhajīvī attānaṁ ātāpeti paritāpeti, kusalañca dhammaṁ adhigacchati, uttari ca manussadhammā alamariyañāṇadassanavisesaṁ sacchikaroti. Ayaṁ, gāmaṇi, tapassī lūkhajīvī ekena ṭhānena gārayho, dvīhi ṭhānehi pāsaṁso.\nKatamena ekena ṭhānena gārayho?\nAttānaṁ ātāpeti paritāpetīti, iminā ekena ṭhānena gārayho.\nKatamehi dvīhi ṭhānehi pāsaṁso?\nKusalañca dhammaṁ adhigacchatīti, iminā paṭhamena ṭhānena pāsaṁso.\nUttari ca manussadhammā alamariyañāṇadassanavisesaṁ sacchikarotīti, iminā dutiyena ṭhānena pāsaṁso.\nAyaṁ, gāmaṇi, tapassī lūkhajīvī iminā ekena ṭhānena gārayho, imehi dvīhi ṭhānehi pāsaṁso.","en":"In this case, the third fervent mortifier may be criticized on one ground, and praised on two.\nWhat is the one ground for criticism?\nThey mortify and torment themselves. This is the one ground for criticism.\nWhat are the two grounds for praise?\nThey achieve a skillful quality. This is the first ground for praise.\nThey realize a superhuman distinction in knowledge and vision worthy of the noble ones. This is the second ground for praise.\nThis fervent mortifier may be criticized on this one ground, and praised on two."}},{"id":"sn42.12:22","sourceIds":["sn42.12:22.1","sn42.12:22.2","sn42.12:22.3","sn42.12:22.4","sn42.12:22.5","sn42.12:22.6","sn42.12:22.7","sn42.12:22.8","sn42.12:22.9","sn42.12:22.10","sn42.12:22.11","sn42.12:22.12"],"kind":"text","text":{"pi":"Tisso imā, gāmaṇi, sandiṭṭhikā nijjarā akālikā ehipassikā opaneyyikā paccattaṁ veditabbā viññūhi.\nKatamā tisso?\nYaṁ ratto rāgādhikaraṇaṁ attabyābādhāyapi ceteti, parabyābādhāyapi ceteti, ubhayabyābādhāyapi ceteti.\nRāge pahīne nevattabyābādhāya ceteti, na parabyābādhāya ceteti, na ubhayabyābādhāya ceteti.\nSandiṭṭhikā nijjarā akālikā ehipassikā opaneyyikā paccattaṁ veditabbā viññūhi.\nYaṁ duṭṭho dosādhikaraṇaṁ attabyābādhāyapi ceteti, parabyābādhāyapi ceteti, ubhayabyābādhāyapi ceteti.\nDose pahīne nevattabyābādhāya ceteti, na parabyābādhāya ceteti, na ubhayabyābādhāya ceteti.\nSandiṭṭhikā nijjarā akālikā ehipassikā opaneyyikā paccattaṁ veditabbā viññūhi.\nYaṁ mūḷho mohādhikaraṇaṁ attabyābādhāyapi ceteti, parabyābādhāyapi ceteti, ubhayabyābādhāyapi ceteti.\nMohe pahīne nevattabyābādhāya ceteti, na parabyābādhāya ceteti, na ubhayabyābādhāya ceteti.\nSandiṭṭhikā nijjarā akālikā ehipassikā opaneyyikā paccattaṁ veditabbā viññūhi.\nImā kho, gāmaṇi, tisso sandiṭṭhikā nijjarā akālikā ehipassikā opaneyyikā paccattaṁ veditabbā viññūhī”ti.","en":"There are these three kinds of wearing away that are apparent in the present life, immediately effective, inviting inspection, relevant, so that sensible people can know them for themselves.\nWhat three?\nA greedy person, because of greed, intends to hurt themselves, hurt others, and hurt both.\nWhen they’ve given up greed they don’t have such intentions.\nThis wearing away is apparent in the present life, immediately effective, inviting inspection, relevant, so that sensible people can know it for themselves.\nA hateful person, because of hate, intends to hurt themselves, hurt others, and hurt both.\nWhen they’ve given up hate they don’t have such intentions.\nThis wearing away is apparent in the present life, immediately effective, inviting inspection, relevant, so that sensible people can know it for themselves.\nA deluded person, because of delusion, intends to hurt themselves, hurt others, and hurt both.\nWhen they’ve given up delusion they don’t have such intentions.\nThis wearing away is apparent in the present life, immediately effective, inviting inspection, relevant, so that sensible people can know it for themselves.\nThese are the three kinds of wearing away that are apparent in the present life, immediately effective, inviting inspection, relevant, so that sensible people can know them for themselves.”"}},{"id":"sn42.12:23","sourceIds":["sn42.12:23.1","sn42.12:23.2","sn42.12:23.3","sn42.12:23.4"],"kind":"text","text":{"pi":"Evaṁ vutte, rāsiyo gāmaṇi bhagavantaṁ etadavoca:\n“abhikkantaṁ, bhante …pe…\nupāsakaṁ maṁ bhagavā dhāretu ajjatagge pāṇupetaṁ saraṇaṁ gatan”ti.\nDvādasamaṁ.","en":"When he said this, Rāsiya the chief said to the Buddha,\n“Excellent, sir! Excellent! …\nFrom this day forth, may the Buddha remember me as a lay follower who has gone for refuge for life.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn42.12/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}