{"id":"sn42.5","title":"A Cavalryman","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn42.5","title":"A Cavalryman","units":[{"id":"sn42.5:0","sourceIds":["sn42.5:0.1","sn42.5:0.2","sn42.5:0.3"],"kind":"text","text":{"pi":"Saṁyutta Nikāya 42.5\n1. Gāmaṇivagga\nAssārohasutta","en":"Linked Discourses 42.5\n1. Chiefs\nA Cavalryman"}},{"id":"sn42.5:1","sourceIds":["sn42.5:1.1","sn42.5:1.2","sn42.5:1.3","sn42.5:1.4","sn42.5:1.5"],"kind":"text","text":{"pi":"Atha kho assāroho gāmaṇi yena bhagavā tenupasaṅkami; upasaṅkamitvā ekamantaṁ nisīdi. Ekamantaṁ nisinno kho assāroho gāmaṇi bhagavantaṁ etadavoca:\n“sutaṁ metaṁ, bhante, pubbakānaṁ ācariyapācariyānaṁ assārohānaṁ bhāsamānānaṁ:\n‘yo so assāroho saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajitānaṁ devānaṁ sahabyataṁ upapajjatī’ti.\nIdha bhagavā kimāhā”ti?\n“Alaṁ, gāmaṇi, tiṭṭhatetaṁ; mā maṁ etaṁ pucchī”ti.","en":"Then a cavalry chief went up to the Buddha …"}},{"id":"sn42.5:2","sourceIds":["sn42.5:2.1","sn42.5:2.2","sn42.5:2.3","sn42.5:2.4","sn42.5:2.5"],"kind":"text","text":{"pi":"Dutiyampi kho …pe…\ntatiyampi kho assāroho gāmaṇi bhagavantaṁ etadavoca:\n“sutaṁ metaṁ, bhante, pubbakānaṁ ācariyapācariyānaṁ assārohānaṁ bhāsamānānaṁ:\n‘yo so assāroho saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajitānaṁ devānaṁ sahabyataṁ upapajjatī’ti.\nIdha bhagavā kimāhā”ti?"}},{"id":"sn42.5:3","sourceIds":["sn42.5:3.1","sn42.5:3.2","sn42.5:3.3","sn42.5:3.4","sn42.5:3.5","sn42.5:3.6","sn42.5:3.7","sn42.5:3.8","sn42.5:3.9","sn42.5:3.10"],"kind":"text","text":{"pi":"“Addhā kho tyāhaṁ, gāmaṇi, na labhāmi:\n‘alaṁ, gāmaṇi, tiṭṭhatetaṁ; mā maṁ etaṁ pucchī’ti.\nApi ca kho tyāhaṁ byākarissāmi.\nYo so, gāmaṇi, assāroho saṅgāme ussahati vāyamati tassa taṁ cittaṁ pubbe gahitaṁ dukkaṭaṁ duppaṇihitaṁ:\n‘ime sattā haññantu vā bajjhantu vā ucchijjantu vā vinassantu vā mā ahesuṁ iti vā’ti.\nTamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajito nāma nirayo tattha upapajjati.\nSace kho panassa evaṁ diṭṭhi hoti:\n‘yo so assāroho saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajitānaṁ devānaṁ sahabyataṁ upapajjatī’ti, sāssa hoti micchādiṭṭhi.\nMicchādiṭṭhikassa kho panāhaṁ, gāmaṇi, purisapuggalassa dvinnaṁ gatīnaṁ aññataraṁ gatiṁ vadāmi—\nnirayaṁ vā tiracchānayoniṁ vā”ti."}},{"id":"sn42.5:4","sourceIds":["sn42.5:4.1","sn42.5:4.2","sn42.5:4.3","sn42.5:4.4","sn42.5:4.5","sn42.5:4.6","sn42.5:4.7","sn42.5:4.8","sn42.5:4.9"],"kind":"text","text":{"pi":"Evaṁ vutte, assāroho gāmaṇi parodi, assūni pavattesi.\n“Etaṁ kho tyāhaṁ, gāmaṇi, nālatthaṁ:\n‘alaṁ, gāmaṇi, tiṭṭhatetaṁ; mā maṁ etaṁ pucchī’”ti.\n“Nāhaṁ, bhante, etaṁ rodāmi yaṁ maṁ bhagavā evamāha.\nApi cāhaṁ, bhante, pubbakehi ācariyapācariyehi assārohehi dīgharattaṁ nikato vañcito paluddho:\n‘yo so assāroho saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajitānaṁ devānaṁ sahabyataṁ upapajjatī’”ti.\n“Abhikkantaṁ, bhante …pe…\najjatagge pāṇupetaṁ saraṇaṁ gatan”ti.\nPañcamaṁ.","en":"“From this day forth, may the Buddha remember me as a lay follower who has gone for refuge for life.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn42.5/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}