{"id":"sn45.8","title":"Analysis","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn45.8","title":"Analysis","units":[{"id":"sn45.8:0","sourceIds":["sn45.8:0.1","sn45.8:0.2","sn45.8:0.3"],"kind":"text","text":{"pi":"Saṁyutta Nikāya 45.8\n1. Avijjāvagga\nVibhaṅgasutta","en":"Linked Discourses 45.8\n1. Ignorance\nAnalysis"}},{"id":"sn45.8:1","sourceIds":["sn45.8:1.1","sn45.8:1.2","sn45.8:1.3","sn45.8:1.4","sn45.8:1.5"],"kind":"text","text":{"pi":"Sāvatthinidānaṁ.\n“Ariyaṁ vo, bhikkhave, aṭṭhaṅgikaṁ maggaṁ desessāmi vibhajissāmi.\nTaṁ suṇātha, sādhukaṁ manasi karotha, bhāsissāmī”ti.\n“Evaṁ, bhante”ti kho te bhikkhū bhagavato paccassosuṁ.\nBhagavā etadavoca:","en":"At Sāvatthī.\n“Mendicants, I will teach and analyze for you the noble eightfold path.\nListen and apply your mind well, I will speak.”\n“Yes, sir,” they replied.\nThe Buddha said this:"}},{"id":"sn45.8:2","sourceIds":["sn45.8:2.1","sn45.8:2.2"],"kind":"text","text":{"pi":"“Katamo ca, bhikkhave, ariyo aṭṭhaṅgiko maggo?\nSeyyathidaṁ—sammādiṭṭhi …pe… sammāsamādhi.","en":"“And what is the noble eightfold path?\nIt is right view, right purpose, right speech, right action, right livelihood, right effort, right mindfulness, and right immersion."}},{"id":"sn45.8:3","sourceIds":["sn45.8:3.1","sn45.8:3.2","sn45.8:3.3"],"kind":"text","text":{"pi":"Katamā ca, bhikkhave, sammādiṭṭhi?\nYaṁ kho, bhikkhave, dukkhe ñāṇaṁ, dukkhasamudaye ñāṇaṁ, dukkhanirodhe ñāṇaṁ, dukkhanirodhagāminiyā paṭipadāya ñāṇaṁ—\nayaṁ vuccati, bhikkhave, sammādiṭṭhi.","en":"And what is right view?\nKnowing about suffering, the origin of suffering, the cessation of suffering, and the practice that leads to the cessation of suffering.\nThis is called right view."}},{"id":"sn45.8:4","sourceIds":["sn45.8:4.1","sn45.8:4.2","sn45.8:4.3"],"kind":"text","text":{"pi":"Katamo ca, bhikkhave, sammāsaṅkappo?\nYo kho, bhikkhave, nekkhammasaṅkappo, abyāpādasaṅkappo, avihiṁsāsaṅkappo—\nayaṁ vuccati, bhikkhave, sammāsaṅkappo.","en":"And what is right purpose?\nThe purpose of renunciation, good will, and harmlessness.\nThis is called right purpose."}},{"id":"sn45.8:5","sourceIds":["sn45.8:5.1","sn45.8:5.2","sn45.8:5.3"],"kind":"text","text":{"pi":"Katamā ca, bhikkhave, sammāvācā?\nYā kho, bhikkhave, musāvādā veramaṇī, pisuṇāya vācāya veramaṇī, pharusāya vācāya veramaṇī, samphappalāpā veramaṇī—\nayaṁ vuccati, bhikkhave, sammāvācā.","en":"And what is right speech?\nRefraining from speech that’s false, backbiting, harsh, or nonsensical.\nThis is called right speech."}},{"id":"sn45.8:6","sourceIds":["sn45.8:6.1","sn45.8:6.2","sn45.8:6.3"],"kind":"text","text":{"pi":"Katamo ca, bhikkhave, sammākammanto?\nYā kho, bhikkhave, pāṇātipātā veramaṇī, adinnādānā veramaṇī, abrahmacariyā veramaṇī—\nayaṁ vuccati, bhikkhave, sammākammanto.","en":"And what is right action?\nRefraining from killing living creatures, stealing, and unchastity.\nThis is called right action."}},{"id":"sn45.8:7","sourceIds":["sn45.8:7.1","sn45.8:7.2","sn45.8:7.3"],"kind":"text","text":{"pi":"Katamo ca, bhikkhave, sammāājīvo?\nIdha, bhikkhave, ariyasāvako micchāājīvaṁ pahāya sammāājīvena jīvitaṁ kappeti—\nayaṁ vuccati, bhikkhave, sammāājīvo.","en":"And what is right livelihood?\nIt’s when a noble disciple gives up wrong livelihood and earns a living by right livelihood.\nThis is called right livelihood."}},{"id":"sn45.8:8","sourceIds":["sn45.8:8.1","sn45.8:8.2","sn45.8:8.3","sn45.8:8.4","sn45.8:8.5","sn45.8:8.6"],"kind":"text","text":{"pi":"Katamo ca, bhikkhave, sammāvāyāmo?\nIdha, bhikkhave, bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati,\nuppannānaṁ pāpakānaṁ akusalānaṁ dhammānaṁ pahānāya chandaṁ janeti …pe…\nanuppannānaṁ kusalānaṁ dhammānaṁ uppādāya chandaṁ janeti …pe…\nuppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati—\nayaṁ vuccati, bhikkhave, sammāvāyāmo.","en":"And what is right effort?\nIt’s when a mendicant generates enthusiasm, tries, makes an effort, exerts the mind, and strives so that bad, unskillful qualities don’t arise.\nThey generate enthusiasm, try, make an effort, exert the mind, and strive so that bad, unskillful qualities that have arisen are given up.\nThey generate enthusiasm, try, make an effort, exert the mind, and strive so that skillful qualities arise.\nThey generate enthusiasm, try, make an effort, exert the mind, and strive so that skillful qualities that have arisen remain, are not lost, but increase, mature, and are fully developed.\nThis is called right effort."}},{"id":"sn45.8:9","sourceIds":["sn45.8:9.1","sn45.8:9.2","sn45.8:9.3","sn45.8:9.4","sn45.8:9.5","sn45.8:9.6"],"kind":"text","text":{"pi":"Katamā ca, bhikkhave, sammāsati?\nIdha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ;\nvedanāsu vedanānupassī viharati ātāpī sampajāno satimā, vineyya loke abhijjhādomanassaṁ;\ncitte cittānupassī viharati ātāpī sampajāno satimā, vineyya loke abhijjhādomanassaṁ;\ndhammesu dhammānupassī viharati ātāpī sampajāno satimā, vineyya loke abhijjhādomanassaṁ—\nayaṁ vuccati, bhikkhave, sammāsati.","en":"And what is right mindfulness?\nIt’s when a mendicant meditates by observing an aspect of the body—keen, aware, and mindful, rid of covetousness and displeasure for the world.\nThey meditate observing an aspect of feelings—keen, aware, and mindful, rid of covetousness and displeasure for the world.\nThey meditate observing an aspect of the mind—keen, aware, and mindful, rid of covetousness and displeasure for the world.\nThey meditate observing an aspect of principles—keen, aware, and mindful, rid of covetousness and displeasure for the world.\nThis is called right mindfulness."}},{"id":"sn45.8:10","sourceIds":["sn45.8:10.1","sn45.8:10.2","sn45.8:10.3","sn45.8:10.4","sn45.8:10.5","sn45.8:10.6","sn45.8:10.7"],"kind":"text","text":{"pi":"Katamo ca, bhikkhave, sammāsamādhi?\nIdha, bhikkhave, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.\nVitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati.\nPītiyā ca virāgā upekkhako ca viharati sato ca sampajāno, sukhañca kāyena paṭisaṁvedeti, yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharati.\nSukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati—\nayaṁ vuccati, bhikkhave, sammāsamādhī”ti.\nAṭṭhamaṁ.","en":"And what is right immersion?\nIt’s when a mendicant, quite secluded from sensual pleasures, secluded from unskillful qualities, enters and remains in the first absorption, which has the rapture and bliss born of seclusion, while placing the mind and keeping it connected.\nAs the placing of the mind and keeping it connected are stilled, they enter and remain in the second absorption, which has the rapture and bliss born of immersion, with internal clarity and mind at one, without placing the mind and keeping it connected.\nAnd with the fading away of rapture, they enter and remain in the third absorption, where they meditate with equanimity, mindful and aware, experiencing for themselves the bliss of which the noble ones declare, ‘Equanimous and mindful, one meditates in bliss.’\nWith the giving up of pleasure and pain and the disappearance of former happiness and sadness, they enter and remain in the fourth absorption, without pleasure or pain, with pure equanimity and mindfulness.\nThis is called right immersion.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn45.8/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}