{"id":"sn46.54","title":"Full of Love","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn46.54","title":"Full of Love","units":[{"id":"sn46.54:0","sourceIds":["sn46.54:0.1","sn46.54:0.2","sn46.54:0.3"],"kind":"text","text":{"pi":"Saṁyutta Nikāya 46.54\n6. Sākacchavagga\nMettāsahagatasutta","en":"Linked Discourses 46.54\n6. Discussion\nFull of Love"}},{"id":"sn46.54:1","sourceIds":["sn46.54:1.1","sn46.54:1.2","sn46.54:1.3","sn46.54:1.4","sn46.54:1.5"],"kind":"text","text":{"pi":"Ekaṁ samayaṁ bhagavā koliyesu viharati haliddavasanaṁ nāma koliyānaṁ nigamo.\nAtha kho sambahulā bhikkhū pubbaṇhasamayaṁ nivāsetvā pattacīvaramādāya haliddavasanaṁ piṇḍāya pavisiṁsu.\nAtha kho tesaṁ bhikkhūnaṁ etadahosi:\n“atippago kho tāva haliddavasane piṇḍāya carituṁ.\nYannūna mayaṁ yena aññatitthiyānaṁ paribbājakānaṁ ārāmo tenupasaṅkameyyāmā”ti.","en":"At one time the Buddha was staying in the land of the Koliyans, where they have a town named Haliddavasana.\nThen several mendicants robed up in the morning and, taking their bowls and robes, entered Haliddavasana for alms.\nThen it occurred to them,\n“It’s too early to wander for alms in Haliddavasana.\nWhy don’t we visit the monastery for the wanderers of other religions?”"}},{"id":"sn46.54:2","sourceIds":["sn46.54:2.1","sn46.54:2.2"],"kind":"text","text":{"pi":"Atha kho te bhikkhū yena aññatitthiyānaṁ paribbājakānaṁ ārāmo tenupasaṅkamiṁsu; upasaṅkamitvā tehi aññatitthiyehi paribbājakehi saddhiṁ sammodiṁsu.\nSammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinne kho te bhikkhū aññatitthiyā paribbājakā etadavocuṁ:","en":"Then they went to the monastery for the wanderers of other religions and exchanged greetings with the wanderers there.\nWhen the greetings and polite conversation were over, they sat down to one side. The wanderers said to them:"}},{"id":"sn46.54:3","sourceIds":["sn46.54:3.1","sn46.54:3.2","sn46.54:3.3","sn46.54:3.4","sn46.54:3.5"],"kind":"text","text":{"pi":"“Samaṇo, āvuso, gotamo sāvakānaṁ evaṁ dhammaṁ deseti:\n‘etha tumhe, bhikkhave, pañca nīvaraṇe pahāya cetaso upakkilese paññāya dubbalīkaraṇe mettāsahagatena cetasā ekaṁ disaṁ pharitvā viharatha, tathā dutiyaṁ, tathā tatiyaṁ, tathā catutthaṁ; iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharatha.\nKaruṇāsahagatena cetasā ekaṁ disaṁ pharitvā viharatha, tathā dutiyaṁ, tathā tatiyaṁ, tathā catutthaṁ; iti uddhamadho tiriyaṁ sabbadhi sabbattatāya sabbāvantaṁ lokaṁ karuṇāsahagatena cetasā vipulena mahaggatena appamāṇena averena abyāpajjena pharitvā viharatha.\nMuditāsahagatena cetasā ekaṁ disaṁ pharitvā viharatha, tathā dutiyaṁ, tathā tatiyaṁ, tathā catutthaṁ; iti uddhamadho tiriyaṁ sabbadhi sabbattatāya sabbāvantaṁ lokaṁ muditāsahagatena cetasā vipulena mahaggatena appamāṇena averena abyāpajjena pharitvā viharatha.\nUpekkhāsahagatena cetasā ekaṁ disaṁ pharitvā viharatha, tathā dutiyaṁ, tathā tatiyaṁ, tathā catutthaṁ; iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharathā’ti.","en":"“Reverends, the ascetic Gotama teaches his disciples like this:\n‘Come, mendicants, give up these five hindrances, corruptions of the heart that weaken wisdom, and meditate spreading a heart full of love to one direction, and to the second, and to the third, and to the fourth. In the same way above, below, across, everywhere, all around, spread a heart full of love to the whole world—abundant, expansive, limitless, free of enmity and ill will.\nMeditate spreading a heart full of compassion to one direction, and to the second, and to the third, and to the fourth. In the same way above, below, across, everywhere, all around, spread a heart full of compassion to the whole world—abundant, expansive, limitless, free of enmity and ill will.\nMeditate spreading a heart full of rejoicing to one direction, and to the second, and to the third, and to the fourth. In the same way above, below, across, everywhere, all around, spread a heart full of rejoicing to the whole world—abundant, expansive, limitless, free of enmity and ill will.\nMeditate spreading a heart full of equanimity to one direction, and to the second, and to the third, and to the fourth. In the same way above, below, across, everywhere, all around, they spread a heart full of equanimity to the whole world—abundant, expansive, limitless, free of enmity and ill will.’"}},{"id":"sn46.54:4","sourceIds":["sn46.54:4.1","sn46.54:4.2","sn46.54:4.3","sn46.54:4.4","sn46.54:4.5","sn46.54:4.6","sn46.54:4.7"],"kind":"text","text":{"pi":"Mayampi kho, āvuso, sāvakānaṁ evaṁ dhammaṁ desema:\n‘etha tumhe, āvuso, pañca nīvaraṇe pahāya cetaso upakkilese paññāya dubbalīkaraṇe mettāsahagatena cetasā ekaṁ disaṁ pharitvā viharatha …pe…\nkaruṇāsahagatena cetasā …\nmuditāsahagatena cetasā …\nupekkhāsahagatena cetasā ekaṁ disaṁ pharitvā viharatha, tathā dutiyaṁ, tathā tatiyaṁ, tathā catutthaṁ;\niti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharathā’ti.\nIdha no, āvuso, ko viseso, ko adhippayāso, kiṁ nānākaraṇaṁ samaṇassa vā gotamassa amhākaṁ vā, yadidaṁ—dhammadesanāya vā dhammadesanaṁ, anusāsaniyā vā anusāsanin”ti?","en":"We too teach our disciples in just the same way.\nWhat, then, is the difference between the ascetic Gotama’s teaching and instruction and ours?”"}},{"id":"sn46.54:5","sourceIds":["sn46.54:5.1","sn46.54:5.2","sn46.54:5.3","sn46.54:5.4"],"kind":"text","text":{"pi":"Atha kho te bhikkhū tesaṁ aññatitthiyānaṁ paribbājakānaṁ bhāsitaṁ neva abhinandiṁsu nappaṭikkosiṁsu.\nAnabhinanditvā appaṭikkositvā uṭṭhāyāsanā pakkamiṁsu:\n“bhagavato santike etassa bhāsitassa atthaṁ ājānissāmā”ti.\nAtha kho te bhikkhū haliddavasane piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:","en":"Those mendicants neither approved nor rejected that statement of the wanderers of other religions.\nThey rose from their seats, thinking:\n“We will learn the meaning of this statement from the Buddha himself.”\nThen, after the meal, when they returned from almsround, they went up to the Buddha, bowed, sat down to one side, and told him what had happened."}},{"id":"sn46.54:6","sourceIds":["sn46.54:6.1","sn46.54:6.2","sn46.54:6.3"],"kind":"text","text":{"pi":"“Idha mayaṁ, bhante, pubbaṇhasamayaṁ nivāsetvā pattacīvaramādāya haliddavasane piṇḍāya pavisimha.\nTesaṁ no, bhante, amhākaṁ etadahosi:\n‘atippago kho tāva haliddavasane piṇḍāya carituṁ."}},{"id":"sn46.54:7","sourceIds":["sn46.54:7.1","sn46.54:7.2"],"kind":"text","text":{"pi":"Yannūna mayaṁ yena aññatitthiyānaṁ paribbājakānaṁ ārāmo tenupasaṅkameyyāmā’ti. Atha kho mayaṁ, bhante, yena aññatitthiyānaṁ paribbājakānaṁ ārāmo tenupasaṅkamimha, upasaṅkamitvā tehi aññatitthiyehi paribbājakehi saddhiṁ sammodimha.\nSammodanīyaṁ kathaṁ sāraṇīyaṁ vītisāretvā ekamantaṁ nisīdimha. Ekamantaṁ nisinne kho amhe, bhante, te aññatitthiyā paribbājakā etadavocuṁ:"}},{"id":"sn46.54:8","sourceIds":["sn46.54:8.1","sn46.54:8.2","sn46.54:8.3","sn46.54:8.4","sn46.54:8.5"],"kind":"text","text":{"pi":"‘Samaṇo, āvuso, gotamo sāvakānaṁ evaṁ dhammaṁ deseti:\n“etha tumhe, bhikkhave, pañca nīvaraṇe pahāya cetaso upakkilese paññāya dubbalīkaraṇe mettāsahagatena cetasā ekaṁ disaṁ pharitvā viharatha …pe…\nkaruṇāsahagatena cetasā …pe…\nmuditāsahagatena cetasā …pe…\nupekkhāsahagatena cetasā ekaṁ disaṁ pharitvā viharatha, tathā dutiyaṁ, tathā tatiyaṁ, tathā catutthaṁ; iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharathā’ti."}},{"id":"sn46.54:9","sourceIds":["sn46.54:9.1","sn46.54:9.2","sn46.54:9.3","sn46.54:9.4","sn46.54:9.5","sn46.54:9.6"],"kind":"text","text":{"pi":"Mayampi kho, āvuso, sāvakānaṁ evaṁ dhammaṁ desema:\n‘etha tumhe, āvuso, pañca nīvaraṇe pahāya cetaso upakkilese paññāya dubbalīkaraṇe mettāsahagatena cetasā ekaṁ disaṁ pharitvā viharatha …pe…\nkaruṇāsahagatena cetasā …pe…\nmuditāsahagatena cetasā …pe…\nupekkhāsahagatena cetasā ekaṁ disaṁ pharitvā viharatha, tathā dutiyaṁ, tathā tatiyaṁ, tathā catutthaṁ; iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharathā’ti.\nIdha no, āvuso, ko viseso, ko adhippayāso, kiṁ nānākaraṇaṁ samaṇassa vā gotamassa amhākaṁ vā, yadidaṁ, dhammadesanāya vā dhammadesanaṁ, anusāsaniyā vā anusāsaninti?"}},{"id":"sn46.54:10","sourceIds":["sn46.54:10.1","sn46.54:10.2"],"kind":"text","text":{"pi":"Atha kho mayaṁ, bhante, tesaṁ aññatitthiyānaṁ paribbājakānaṁ bhāsitaṁ neva abhinandimha nappaṭikkosimha, anabhinanditvā appaṭikkositvā uṭṭhāyāsanā pakkamimha:\n‘bhagavato santike etassa bhāsitassa atthaṁ ājānissāmā’”ti."}},{"id":"sn46.54:11","sourceIds":["sn46.54:11.1","sn46.54:11.2","sn46.54:11.3","sn46.54:11.4","sn46.54:11.5","sn46.54:11.6","sn46.54:11.7","sn46.54:11.8","sn46.54:11.9"],"kind":"text","text":{"pi":"“Evaṁvādino, bhikkhave, aññatitthiyā paribbājakā evamassu vacanīyā:\n‘kathaṁ bhāvitā panāvuso, mettācetovimutti, kiṅgatikā hoti, kiṁparamā, kiṁphalā, kiṁpariyosānā?\nKathaṁ bhāvitā panāvuso, karuṇācetovimutti, kiṅgatikā hoti, kiṁparamā, kiṁphalā, kiṁpariyosānā?\nKathaṁ bhāvitā panāvuso, muditācetovimutti, kiṅgatikā hoti, kiṁparamā, kiṁphalā, kiṁpariyosānā?\nKathaṁ bhāvitā panāvuso, upekkhācetovimutti, kiṅgatikā hoti, kiṁparamā, kiṁphalā, kiṁpariyosānā’ti?\nEvaṁ puṭṭhā, bhikkhave, aññatitthiyā paribbājakā na ceva sampāyissanti, uttariñca vighātaṁ āpajjissanti.\nTaṁ kissa hetu?\nYathā taṁ, bhikkhave, avisayasmiṁ.\nNāhaṁ taṁ, bhikkhave, passāmi sadevake loke samārake sabrahmake sassamaṇabrāhmaṇiyā pajāya sadevamanussāya, yo imesaṁ pañhānaṁ veyyākaraṇena cittaṁ ārādheyya, aññatra tathāgatena vā tathāgatasāvakena vā ito vā pana sutvā.","en":"“Mendicants, when wanderers of other religions say this, you should say to them:\n‘But reverends, how is the heart’s release by love developed? What is its destination, apex, fruit, and culmination?\nHow is the heart’s release by compassion developed? What is its destination, apex, fruit, and end?\nHow is the heart’s release by rejoicing developed? What is its destination, apex, fruit, and end?\nHow is the heart’s release by equanimity developed? What is its destination, apex, fruit, and end?’\nQuestioned like this, the wanderers of other religions would be stumped, and, in addition, would get frustrated.\nWhy is that?\nBecause they’re out of their element.\nI don’t see anyone in this world—with its gods, Māras, and divinities, this population with its ascetics and brahmins, its gods and humans—who could provide a satisfying answer to these questions except the Realized One or his disciple or someone who has heard it from them."}},{"id":"sn46.54:12","sourceIds":["sn46.54:12.1","sn46.54:12.2","sn46.54:12.3","sn46.54:12.4","sn46.54:12.5","sn46.54:12.6","sn46.54:12.7","sn46.54:12.8","sn46.54:12.9"],"kind":"text","text":{"pi":"Kathaṁ bhāvitā ca, bhikkhave, mettācetovimutti, kiṅgatikā hoti, kiṁparamā, kiṁphalā, kiṁpariyosānā?\nIdha, bhikkhave, bhikkhu mettāsahagataṁ satisambojjhaṅgaṁ bhāveti …pe…\nmettāsahagataṁ upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.\nSo sace ākaṅkhati ‘appaṭikūle paṭikūlasaññī vihareyyan’ti, paṭikūlasaññī tattha viharati.\nSace ākaṅkhati ‘paṭikūle appaṭikūlasaññī vihareyyan’ti, appaṭikūlasaññī tattha viharati.\nSace ākaṅkhati ‘appaṭikūle ca paṭikūle ca paṭikūlasaññī vihareyyan’ti, paṭikūlasaññī tattha viharati.\nSace ākaṅkhati ‘paṭikūle ca appaṭikūle ca appaṭikūlasaññī vihareyyan’ti, appaṭikūlasaññī tattha viharati.\nSace ākaṅkhati ‘appaṭikūlañca paṭikūlañca tadubhayaṁ abhinivajjetvā upekkhako vihareyyaṁ sato sampajāno’ti, upekkhako ca tattha viharati sato sampajāno, subhaṁ vā kho pana vimokkhaṁ upasampajja viharati.\nSubhaparamāhaṁ, bhikkhave, mettācetovimuttiṁ vadāmi, idhapaññassa bhikkhuno uttarivimuttiṁ appaṭivijjhato.","en":"And how is the heart’s release by love developed? What is its destination, apex, fruit, and end?\nIt’s when a mendicant develops the heart’s release by love together with the awakening factors of mindfulness, investigation of principles, energy, rapture, tranquility, immersion,\nand equanimity, which rely on seclusion, fading away, and cessation, and ripen as letting go.\nIf they wish: ‘May I meditate perceiving the repulsive in the unrepulsive,’ that’s what they do.\nIf they wish: ‘May I meditate perceiving the unrepulsive in the repulsive,’ that’s what they do.\nIf they wish: ‘May I meditate perceiving the repulsive in the unrepulsive and the repulsive,’ that’s what they do.\nIf they wish: ‘May I meditate perceiving the unrepulsive in the repulsive and the unrepulsive,’ that’s what they do.\nIf they wish: ‘May I meditate staying equanimous, mindful and aware, shunning both the repulsive and the unrepulsive,’ that’s what they do.\nThe apex of the heart’s release by love is the beautiful, I say, for a wise mendicant here who has not penetrated to a higher freedom."}},{"id":"sn46.54:13","sourceIds":["sn46.54:13.1","sn46.54:13.2","sn46.54:13.3","sn46.54:13.4","sn46.54:13.5","sn46.54:13.6","sn46.54:13.7"],"kind":"text","text":{"pi":"Kathaṁ bhāvitā ca, bhikkhave, karuṇācetovimutti, kiṅgatikā hoti, kiṁparamā, kiṁphalā, kiṁpariyosānā?\nIdha, bhikkhave, bhikkhu karuṇāsahagataṁ satisambojjhaṅgaṁ bhāveti …pe…\nkaruṇāsahagataṁ upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.\nSo sace ākaṅkhati ‘appaṭikūle paṭikūlasaññī vihareyyan’ti, paṭikūlasaññī tattha viharati …pe…\nsace ākaṅkhati ‘appaṭikūlañca paṭikūlañca tadubhayaṁ abhinivajjetvā upekkhako vihareyyaṁ sato sampajāno’ti, upekkhako tattha viharati sato sampajāno.\nSabbaso vā pana rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.\nĀkāsānañcāyatanaparamāhaṁ, bhikkhave, karuṇācetovimuttiṁ vadāmi, idhapaññassa bhikkhuno uttarivimuttiṁ appaṭivijjhato.","en":"And how is the heart’s release by compassion developed? What is its destination, apex, fruit, and end?\nIt’s when a mendicant develops the heart’s release by compassion together with the awakening factors of mindfulness, investigation of principles, energy, rapture, tranquility, immersion,\nand equanimity, which rely on seclusion, fading away, and cessation, and ripen as letting go.\nIf they wish: ‘May I meditate perceiving the repulsive in the unrepulsive,’ that’s what they do. …\nIf they wish: ‘May I meditate staying equanimous, mindful and aware, shunning both the repulsive and the unrepulsive,’ that’s what they do.\nOr else, going totally beyond perceptions of form, with the disappearance of perceptions of impingement, not focusing on perceptions of diversity, aware that ‘space is infinite’, they enter and remain in the dimension of infinite space.\nThe apex of the heart’s release by compassion is the dimension of infinite space, I say, for a wise mendicant here who has not penetrated to a higher freedom."}},{"id":"sn46.54:14","sourceIds":["sn46.54:14.1","sn46.54:14.2","sn46.54:14.3","sn46.54:14.4","sn46.54:14.5","sn46.54:14.6","sn46.54:14.7"],"kind":"text","text":{"pi":"Kathaṁ bhāvitā ca, bhikkhave, muditācetovimutti, kiṅgatikā hoti, kiṁparamā, kiṁphalā, kiṁpariyosānā?\nIdha, bhikkhave, bhikkhu muditāsahagataṁ satisambojjhaṅgaṁ bhāveti …pe…\nmuditāsahagataṁ upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.\nSo sace ākaṅkhati ‘appaṭikūle paṭikūlasaññī vihareyyan’ti, paṭikūlasaññī tattha viharati …pe…\nsace ākaṅkhati ‘appaṭikūlañca paṭikūlañca tadubhayaṁ abhinivajjetvā upekkhako vihareyyaṁ sato sampajāno’ti, upekkhako tattha viharati sato sampajāno.\nSabbaso vā pana ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.\nViññāṇañcāyatanaparamāhaṁ, bhikkhave, muditācetovimuttiṁ vadāmi, idhapaññassa bhikkhuno uttarivimuttiṁ appaṭivijjhato.","en":"And how is the heart’s release by rejoicing developed? What is its destination, apex, fruit, and end?\nIt’s when a mendicant develops the heart’s release by rejoicing together with the awakening factors of mindfulness, investigation of principles, energy, rapture, tranquility, immersion,\nand equanimity, which rely on seclusion, fading away, and cessation, and ripen as letting go.\nIf they wish: ‘May I meditate perceiving the repulsive in the unrepulsive,’ that’s what they do. …\nIf they wish: ‘May I meditate staying equanimous, mindful and aware, shunning both the repulsive and the unrepulsive,’ that’s what they do.\nOr else, going totally beyond the dimension of infinite space, aware that ‘consciousness is infinite’, they enter and remain in the dimension of infinite consciousness.\nThe apex of the heart’s release by rejoicing is the dimension of infinite consciousness, I say, for a wise mendicant here who has not penetrated to a higher freedom."}},{"id":"sn46.54:15","sourceIds":["sn46.54:15.1","sn46.54:15.2","sn46.54:15.3","sn46.54:15.4","sn46.54:15.5","sn46.54:15.6","sn46.54:15.7","sn46.54:15.8","sn46.54:15.9","sn46.54:15.10","sn46.54:15.11"],"kind":"text","text":{"pi":"Kathaṁ bhāvitā ca, bhikkhave, upekkhācetovimutti, kiṅgatikā hoti, kiṁparamā, kiṁphalā, kiṁpariyosānā?\nIdha, bhikkhave, bhikkhu upekkhāsahagataṁ satisambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ …pe…\nupekkhāsahagataṁ upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.\nSo sace ākaṅkhati ‘appaṭikūle paṭikūlasaññī vihareyyan’ti, paṭikūlasaññī tattha viharati.\nSace ākaṅkhati ‘paṭikūle appaṭikūlasaññī vihareyyan’ti, appaṭikūlasaññī tattha viharati.\nSace ākaṅkhati ‘appaṭikūle ca paṭikūle ca paṭikūlasaññī vihareyyan’ti, paṭikūlasaññī tattha viharati.\nSace ākaṅkhati ‘paṭikūle ca appaṭikūle ca appaṭikūlasaññī vihareyyan’ti, appaṭikūlasaññī tattha viharati.\nSace ākaṅkhati ‘appaṭikūlañca paṭikūlañca tadubhayaṁ abhinivajjetvā upekkhako vihareyyaṁ sato sampajāno’ti, upekkhako tattha viharati sato sampajāno.\nSabbaso vā pana viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.\nĀkiñcaññāyatanaparamāhaṁ, bhikkhave, upekkhācetovimuttiṁ vadāmi, idhapaññassa bhikkhuno uttarivimuttiṁ appaṭivijjhato”ti.\nCatutthaṁ.","en":"And how is the heart’s release by equanimity developed? What is its destination, apex, fruit, and end?\nIt’s when a mendicant develops the heart’s release by equanimity together with the awakening factors of mindfulness, investigation of principles, energy, rapture, tranquility, immersion,\nand equanimity, which rely on seclusion, fading away, and cessation, and ripen as letting go.\nIf they wish: ‘May I meditate perceiving the repulsive in the unrepulsive,’ that’s what they do.\nIf they wish: ‘May I meditate perceiving the unrepulsive in the repulsive,’ that’s what they do.\nIf they wish: ‘May I meditate perceiving the repulsive in the unrepulsive and the repulsive,’ that’s what they do.\nIf they wish: ‘May I meditate perceiving the unrepulsive in the repulsive and the unrepulsive,’ that’s what they do.\nIf they wish: ‘May I meditate staying equanimous, mindful and aware, shunning both the repulsive and the unrepulsive,’ that’s what they do.\nOr else, going totally beyond the dimension of infinite consciousness, aware that ‘there is nothing at all’, they enter and remain in the dimension of nothingness.\nThe apex of the heart’s release by equanimity is the dimension of nothingness, I say, for a wise mendicant here who has not penetrated to a higher freedom.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn46.54/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}