{"id":"sn47.8","title":"Cooks","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn47.8","title":"Cooks","units":[{"id":"sn47.8:0","sourceIds":["sn47.8:0.1","sn47.8:0.2","sn47.8:0.3"],"kind":"text","text":{"pi":"Saṁyutta Nikāya 47.8\n1. Ambapālivagga\nSūdasutta","en":"Linked Discourses 47.8\n1. In Ambapālī’s Mango Grove\nCooks"}},{"id":"sn47.8:1","sourceIds":["sn47.8:1.1","sn47.8:1.2"],"kind":"text","text":{"pi":"“Seyyathāpi, bhikkhave, bālo abyatto akusalo sūdo rājānaṁ vā rājamahāmattaṁ vā nānaccayehi sūpehi paccupaṭṭhito assa—\nambilaggehipi, tittakaggehipi, kaṭukaggehipi, madhuraggehipi, khārikehipi, akhārikehipi, loṇikehipi, aloṇikehipi.","en":"“Mendicants, suppose a foolish, incompetent, unskillful cook was to serve a ruler or their chief minister with an excessive variety of curries:\nchiefly sour, bitter, pungent, and sweet; hot and mild, and salty and bland."}},{"id":"sn47.8:2","sourceIds":["sn47.8:2.1","sn47.8:2.2","sn47.8:2.3"],"kind":"text","text":{"pi":"Sa kho so, bhikkhave, bālo abyatto akusalo sūdo sakassa bhattu nimittaṁ na uggaṇhāti:\n‘idaṁ vā me ajja bhattu sūpeyyaṁ ruccati, imassa vā abhiharati, imassa vā bahuṁ gaṇhāti, imassa vā vaṇṇaṁ bhāsati.\nAmbilaggaṁ vā me ajja bhattu sūpeyyaṁ ruccati, ambilaggassa vā abhiharati, ambilaggassa vā bahuṁ gaṇhāti, ambilaggassa vā vaṇṇaṁ bhāsati. Tittakaggaṁ vā me ajja … kaṭukaggaṁ vā me ajja … madhuraggaṁ vā me ajja … khārikaṁ vā me ajja … akhārikaṁ vā me ajja … loṇikaṁ vā me ajja … aloṇikaṁ vā me ajja bhattu sūpeyyaṁ ruccati, aloṇikassa vā abhiharati, aloṇikassa vā bahuṁ gaṇhāti, aloṇikassa vā vaṇṇaṁ bhāsatī’ti.","en":"But that cook didn’t take their master’s hint:\n‘Today my master preferred this sauce, or he reached for it, or he took a lot of it, or he praised it.\nToday my master preferred the chiefly sour or bitter or pungent or sweet or hot or mild or salty sauce. Or he preferred the bland sauce, or he reached for the bland one, or he took a lot of it, or he praised it.’"}},{"id":"sn47.8:3","sourceIds":["sn47.8:3.1","sn47.8:3.2","sn47.8:3.3","sn47.8:3.4","sn47.8:3.5","sn47.8:3.6","sn47.8:3.7","sn47.8:3.8","sn47.8:3.9","sn47.8:3.10","sn47.8:3.11"],"kind":"text","text":{"pi":"Sa kho so, bhikkhave, bālo abyatto akusalo sūdo na ceva lābhī hoti acchādanassa, na lābhī vetanassa, na lābhī abhihārānaṁ.\nTaṁ kissa hetu?\nTathā hi so, bhikkhave, bālo abyatto akusalo sūdo sakassa bhattu nimittaṁ na uggaṇhāti.\nEvameva kho, bhikkhave, idhekacco bālo abyatto akusalo bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ.\nTassa kāye kāyānupassino viharato cittaṁ na samādhiyati, upakkilesā na pahīyanti.\nSo taṁ nimittaṁ na uggaṇhāti.\nVedanāsu vedanānupassī viharati …pe…\ncitte cittānupassī viharati …pe…\ndhammesu dhammānupassī viharati ātāpī sampajāno satimā, vineyya loke abhijjhādomanassaṁ.\nTassa dhammesu dhammānupassino viharato cittaṁ na samādhiyati, upakkilesā na pahīyanti.\nSo taṁ nimittaṁ na uggaṇhāti.","en":"That foolish, incompetent, unskillful cook doesn’t get presented with clothes, wages, or bonuses.\nWhy is that?\nBecause they don’t take their master’s hint.\nIn the same way, a foolish, incompetent, unskillful mendicant meditates by observing an aspect of the body—keen, aware, and mindful, rid of covetousness and displeasure for the world.\nAs they meditate observing an aspect of the body, their mind doesn’t enter immersion, and their corruptions aren’t given up.\nBut they don’t take the hint.\nThey meditate observing an aspect of feelings …\nmind …\nprinciples—keen, aware, and mindful, rid of covetousness and displeasure for the world.\nAs they meditate observing an aspect of principles, the mind doesn’t enter immersion, and the corruptions aren’t given up.\nBut they don’t take the hint."}},{"id":"sn47.8:4","sourceIds":["sn47.8:4.1","sn47.8:4.2","sn47.8:4.3"],"kind":"text","text":{"pi":"Sa kho so, bhikkhave, bālo abyatto akusalo bhikkhu na ceva lābhī hoti diṭṭheva dhamme sukhavihārānaṁ, na lābhī satisampajaññassa.\nTaṁ kissa hetu?\nTathā hi so, bhikkhave, bālo abyatto akusalo bhikkhu sakassa cittassa nimittaṁ na uggaṇhāti.","en":"That foolish, incompetent, unskillful mendicant doesn’t get blissful meditations in this very life, nor do they get mindfulness and situational awareness.\nWhy is that?\nBecause they don’t take their mind’s hint."}},{"id":"sn47.8:5","sourceIds":["sn47.8:5.1","sn47.8:5.2"],"kind":"text","text":{"pi":"Seyyathāpi, bhikkhave, paṇḍito byatto kusalo sūdo rājānaṁ vā rājamahāmattaṁ vā nānaccayehi sūpehi paccupaṭṭhito assa—\nambilaggehipi, tittakaggehipi, kaṭukaggehipi, madhuraggehipi, khārikehipi, akhārikehipi, loṇikehipi, aloṇikehipi.","en":"Suppose an astute, competent, skillful cook was to serve a ruler or their chief minister with an extravagant variety of curries:\nchiefly sour, bitter, pungent, and sweet; hot and mild, and salty and bland."}},{"id":"sn47.8:6","sourceIds":["sn47.8:6.1","sn47.8:6.2","sn47.8:6.3"],"kind":"text","text":{"pi":"Sa kho so, bhikkhave, paṇḍito byatto kusalo sūdo sakassa bhattu nimittaṁ uggaṇhāti:\n‘idaṁ vā me ajja bhattu sūpeyyaṁ ruccati, imassa vā abhiharati, imassa vā bahuṁ gaṇhāti, imassa vā vaṇṇaṁ bhāsati.\nAmbilaggaṁ vā me ajja bhattu sūpeyyaṁ ruccati, ambilaggassa vā abhiharati, ambilaggassa vā bahuṁ gaṇhāti, ambilaggassa vā vaṇṇaṁ bhāsati. Tittakaggaṁ vā me ajja … kaṭukaggaṁ vā me ajja … madhuraggaṁ vā me ajja … khārikaṁ vā me ajja … akhārikaṁ vā me ajja … loṇikaṁ vā me ajja … aloṇikaṁ vā me ajja bhattu sūpeyyaṁ ruccati, aloṇikassa vā abhiharati, aloṇikassa vā bahuṁ gaṇhāti, aloṇikassa vā vaṇṇaṁ bhāsatī’ti.","en":"And that cook took their master’s hint:\n‘Today my master preferred this sauce, or he reached for it, or he took a lot of it, or he praised it.\nToday my master preferred the chiefly sour or bitter or pungent or sweet or hot or mild or salty sauce. Or he preferred the bland sauce, or he reached for the bland one, or he took a lot of it, or he praised it.’"}},{"id":"sn47.8:7","sourceIds":["sn47.8:7.1","sn47.8:7.2","sn47.8:7.3","sn47.8:7.4","sn47.8:7.5","sn47.8:7.6","sn47.8:7.7","sn47.8:7.8","sn47.8:7.9","sn47.8:7.10","sn47.8:7.11"],"kind":"text","text":{"pi":"Sa kho so, bhikkhave, paṇḍito byatto kusalo sūdo lābhī ceva hoti acchādanassa, lābhī vetanassa, lābhī abhihārānaṁ.\nTaṁ kissa hetu?\nTathā hi so, bhikkhave, paṇḍito byatto kusalo sūdo sakassa bhattu nimittaṁ uggaṇhāti.\nEvameva kho, bhikkhave, idhekacco paṇḍito byatto kusalo bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ.\nTassa kāye kāyānupassino viharato cittaṁ samādhiyati, upakkilesā pahīyanti.\nSo taṁ nimittaṁ uggaṇhāti.\nVedanāsu vedanānupassī viharati …pe…\ncitte cittānupassī viharati …pe…\ndhammesu dhammānupassī viharati ātāpī sampajāno satimā, vineyya loke abhijjhādomanassaṁ.\nTassa dhammesu dhammānupassino viharato cittaṁ samādhiyati, upakkilesā pahīyanti.\nSo taṁ nimittaṁ uggaṇhāti.","en":"That astute, competent, skillful cook gets presented with clothes, wages, and bonuses.\nWhy is that?\nBecause they take their master’s hint.\nIn the same way, an astute, competent, skillful mendicant meditates by observing an aspect of the body—keen, aware, and mindful, rid of covetousness and displeasure for the world.\nAs they meditate observing an aspect of the body, their mind enters immersion, and their corruptions are given up.\nThey take the hint.\nThey meditate observing an aspect of feelings …\nmind …\nprinciples—keen, aware, and mindful, rid of covetousness and displeasure for the world.\nAs they meditate observing an aspect of principles, their mind enters immersion, and their corruptions are given up.\nThey take the hint."}},{"id":"sn47.8:8","sourceIds":["sn47.8:8.1","sn47.8:8.2","sn47.8:8.3","sn47.8:8.4"],"kind":"text","text":{"pi":"Sa kho so, bhikkhave, paṇḍito byatto kusalo bhikkhu lābhī ceva hoti diṭṭheva dhamme sukhavihārānaṁ, lābhī hoti satisampajaññassa.\nTaṁ kissa hetu?\nTathā hi so, bhikkhave, paṇḍito byatto kusalo bhikkhu sakassa cittassa nimittaṁ uggaṇhātī”ti.\nAṭṭhamaṁ.","en":"That astute, competent, skillful mendicant gets blissful meditations in this very life, and they get mindfulness and situational awareness.\nWhy is that?\nBecause they take their mind’s hint.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn47.8/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}