{"id":"sn56.11","title":"Rolling Forth the Wheel of Dhamma","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn56.11","title":"Rolling Forth the Wheel of Dhamma","units":[{"id":"sn56.11:0","sourceIds":["sn56.11:0.1","sn56.11:0.2","sn56.11:0.3"],"kind":"text","text":{"pi":"Saṁyutta Nikāya 56.11\n2. Dhammacakkappavattanavagga\nDhammacakkappavattanasutta","en":"Linked Discourses 56.11\n2. Rolling Forth the Wheel of Dhamma\nRolling Forth the Wheel of Dhamma"}},{"id":"sn56.11:1","sourceIds":["sn56.11:1.1","sn56.11:1.2"],"kind":"text","text":{"pi":"Ekaṁ samayaṁ bhagavā bārāṇasiyaṁ viharati isipatane migadāye.\nTatra kho bhagavā pañcavaggiye bhikkhū āmantesi:","en":"At one time the Buddha was staying near Varanasi in the deer park at Isipatana.\nThere the Buddha addressed the group of five mendicants:"}},{"id":"sn56.11:2","sourceIds":["sn56.11:2.1","sn56.11:2.2","sn56.11:2.3","sn56.11:2.4"],"kind":"text","text":{"pi":"“Dveme, bhikkhave, antā pabbajitena na sevitabbā.\nKatame dve?\nYo cāyaṁ kāmesu kāmasukhallikānuyogo hīno gammo pothujjaniko anariyo anatthasaṁhito, yo cāyaṁ attakilamathānuyogo dukkho anariyo anatthasaṁhito.\nEte kho, bhikkhave, ubho ante anupagamma majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati.","en":"“Mendicants, these two extremes should not be cultivated by one gone forth.\nWhat two?\nIndulgence in sensual pleasures, which is low, crude, ordinary, ignoble, and pointless. And indulgence in self-mortification, which is painful, ignoble, and pointless.\nAvoiding these two extremes, the Realized One understood the middle way of practice, which gives vision and knowledge, and leads to peace, direct knowledge, awakening, and extinguishment."}},{"id":"sn56.11:3","sourceIds":["sn56.11:3.1","sn56.11:3.2","sn56.11:3.3","sn56.11:3.4"],"kind":"text","text":{"pi":"Katamā ca sā, bhikkhave, majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati?\nAyameva ariyo aṭṭhaṅgiko maggo, seyyathidaṁ—\nsammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi.\nAyaṁ kho sā, bhikkhave, majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati.","en":"And what is that middle way of practice?\nIt is simply this noble eightfold path, that is:\nright view, right purpose, right speech, right action, right livelihood, right effort, right mindfulness, and right immersion.\nThis is that middle way of practice, which gives vision and knowledge, and leads to peace, direct knowledge, awakening, and extinguishment."}},{"id":"sn56.11:4","sourceIds":["sn56.11:4.1","sn56.11:4.2","sn56.11:4.3","sn56.11:4.4","sn56.11:4.5","sn56.11:4.6","sn56.11:4.7","sn56.11:4.8","sn56.11:4.9","sn56.11:4.10"],"kind":"text","text":{"pi":"Idaṁ kho pana, bhikkhave, dukkhaṁ ariyasaccaṁ—\njātipi dukkhā, jarāpi dukkhā, byādhipi dukkho, maraṇampi dukkhaṁ, appiyehi sampayogo dukkho, piyehi vippayogo dukkho, yampicchaṁ na labhati tampi dukkhaṁ—saṅkhittena pañcupādānakkhandhā dukkhā.\nIdaṁ kho pana, bhikkhave, dukkhasamudayaṁ ariyasaccaṁ—\nyāyaṁ taṇhā ponobbhavikā nandirāgasahagatā tatratatrābhinandinī, seyyathidaṁ—\nkāmataṇhā, bhavataṇhā, vibhavataṇhā.\nIdaṁ kho pana, bhikkhave, dukkhanirodhaṁ ariyasaccaṁ—\nyo tassāyeva taṇhāya asesavirāganirodho cāgo paṭinissaggo mutti anālayo.\nIdaṁ kho pana, bhikkhave, dukkhanirodhagāminī paṭipadā ariyasaccaṁ—\nayameva ariyo aṭṭhaṅgiko maggo, seyyathidaṁ—\nsammādiṭṭhi …pe… sammāsamādhi.","en":"Now this is the noble truth of suffering.\nRebirth is suffering; old age is suffering; illness is suffering; death is suffering; being coupled with the disliked is suffering; separation from the liked is suffering; not getting what you wish for is suffering. In brief, the five grasping aggregates are suffering.\nNow this is the noble truth of the origin of suffering.\nIt’s the craving that leads to future lives, mixed up with relishing and greed, taking pleasure there wherever it alights. That is,\ncraving for sensual pleasures, craving for continued existence, and craving for nonexistence.\nNow this is the noble truth of the cessation of suffering.\nIt’s the fading away and cessation of that very same craving no residue left behind; giving it away, letting it go, releasing it, and not clinging to it.\nNow this is the noble truth of the practice that leads to the cessation of suffering.\nIt is simply this noble eightfold path, that is:\nright view, right purpose, right speech, right action, right livelihood, right effort, right mindfulness, and right immersion."}},{"id":"sn56.11:5","sourceIds":["sn56.11:5.1","sn56.11:5.2","sn56.11:5.3"],"kind":"text","text":{"pi":"‘Idaṁ dukkhaṁ ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.\n‘Taṁ kho panidaṁ dukkhaṁ ariyasaccaṁ pariññeyyan’ti me, bhikkhave, pubbe …pe… udapādi.\n‘Taṁ kho panidaṁ dukkhaṁ ariyasaccaṁ pariññātan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.","en":"‘This is the noble truth of suffering.’ Such was the vision, knowledge, wisdom, realization, and light that arose in me regarding teachings not learned before from another.\n‘This noble truth of suffering should be completely understood.’ Such was the vision that arose in me …\n‘This noble truth of suffering has been completely understood.’ Such was the vision that arose in me …"}},{"id":"sn56.11:6","sourceIds":["sn56.11:6.1","sn56.11:6.2","sn56.11:6.3"],"kind":"text","text":{"pi":"‘Idaṁ dukkhasamudayaṁ ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.\n‘Taṁ kho panidaṁ dukkhasamudayaṁ ariyasaccaṁ pahātabban’ti me, bhikkhave, pubbe …pe… udapādi.\n‘Taṁ kho panidaṁ dukkhasamudayaṁ ariyasaccaṁ pahīnan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.","en":"‘This is the noble truth of the origin of suffering.’ Such was the vision that arose in me …\n‘This noble truth of the origin of suffering should be given up.’ Such was the vision that arose in me …\n‘This noble truth of the origin of suffering has been given up.’ Such was the vision that arose in me …"}},{"id":"sn56.11:7","sourceIds":["sn56.11:7.1","sn56.11:7.2","sn56.11:7.3"],"kind":"text","text":{"pi":"‘Idaṁ dukkhanirodhaṁ ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.\n‘Taṁ kho panidaṁ dukkhanirodhaṁ ariyasaccaṁ sacchikātabban’ti me, bhikkhave, pubbe …pe… udapādi.\n‘Taṁ kho panidaṁ dukkhanirodhaṁ ariyasaccaṁ sacchikatan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.","en":"‘This is the noble truth of the cessation of suffering.’ Such was the vision that arose in me …\n‘This noble truth of the cessation of suffering should be realized.’ Such was the vision that arose in me …\n‘This noble truth of the cessation of suffering has been realized.’ Such was the vision that arose in me …"}},{"id":"sn56.11:8","sourceIds":["sn56.11:8.1","sn56.11:8.2","sn56.11:8.3"],"kind":"text","text":{"pi":"‘Idaṁ dukkhanirodhagāminī paṭipadā ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.\n‘Taṁ kho panidaṁ dukkhanirodhagāminī paṭipadā ariyasaccaṁ bhāvetabban’ti me, bhikkhave, pubbe …pe… udapādi.\n‘Taṁ kho panidaṁ dukkhanirodhagāminī paṭipadā ariyasaccaṁ bhāvitan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.","en":"‘This is the noble truth of the practice that leads to the cessation of suffering.’ Such was the vision that arose in me …\n‘This noble truth of the practice that leads to the cessation of suffering should be developed.’ Such was the vision that arose in me …\n‘This noble truth of the practice that leads to the cessation of suffering has been developed.’ Such was the vision, knowledge, wisdom, realization, and light that arose in me regarding teachings not learned before from another."}},{"id":"sn56.11:9","sourceIds":["sn56.11:9.1"],"kind":"text","text":{"pi":"Yāvakīvañca me, bhikkhave, imesu catūsu ariyasaccesu evaṁ tiparivaṭṭaṁ dvādasākāraṁ yathābhūtaṁ ñāṇadassanaṁ na suvisuddhaṁ ahosi, neva tāvāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.","en":"As long as my true knowledge and vision about these four noble truths was not fully purified in these three rounds and twelve aspects, I didn’t announce my supreme perfect awakening in this world with its gods, Māras, and divinities, this population with its ascetics and brahmins, its gods and humans."}},{"id":"sn56.11:10","sourceIds":["sn56.11:10.1","sn56.11:10.2","sn56.11:10.3","sn56.11:10.4","sn56.11:10.5"],"kind":"text","text":{"pi":"Yato ca kho me, bhikkhave, imesu catūsu ariyasaccesu evaṁ tiparivaṭṭaṁ dvādasākāraṁ yathābhūtaṁ ñāṇadassanaṁ suvisuddhaṁ ahosi, athāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.\nÑāṇañca pana me dassanaṁ udapādi:\n‘akuppā me vimutti, ayamantimā jāti, natthi dāni punabbhavo’”ti.\nIdamavoca bhagavā.\nAttamanā pañcavaggiyā bhikkhū bhagavato bhāsitaṁ abhinandunti.","en":"But when my true knowledge and vision about these four noble truths was fully purified in these three rounds and twelve aspects, I announced my supreme perfect awakening in this world with its gods, Māras, and divinities, this population with its ascetics and brahmins, its gods and humans.\nKnowledge and vision arose in me:\n‘My freedom is unshakable; this is my last rebirth; now there’ll be no more future lives.’”\nThat is what the Buddha said.\nSatisfied, the group of five mendicants approved what the Buddha said."}},{"id":"sn56.11:11","sourceIds":["sn56.11:11.1","sn56.11:11.2"],"kind":"text","text":{"pi":"Imasmiñca pana veyyākaraṇasmiṁ bhaññamāne āyasmato koṇḍaññassa virajaṁ vītamalaṁ dhammacakkhuṁ udapādi:\n“yaṁ kiñci samudayadhammaṁ sabbaṁ taṁ nirodhadhamman”ti.","en":"And while this discourse was being spoken, the stainless, immaculate vision of the Dhamma arose in Venerable Koṇḍañña:\n“Everything that is liable to arise is liable to cease.”"}},{"id":"sn56.11:12","sourceIds":["sn56.11:12.1","sn56.11:12.2","sn56.11:12.3","sn56.11:12.4","sn56.11:12.5","sn56.11:12.6","sn56.11:12.7","sn56.11:12.8","sn56.11:12.9","sn56.11:12.10","sn56.11:12.11"],"kind":"text","text":{"pi":"Pavattite ca pana bhagavatā dhammacakke bhummā devā saddamanussāvesuṁ:\n“etaṁ bhagavatā bārāṇasiyaṁ isipatane migadāye anuttaraṁ dhammacakkaṁ pavattitaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.\nBhummānaṁ devānaṁ saddaṁ sutvā cātumahārājikā devā saddamanussāvesuṁ:\n“etaṁ bhagavatā bārāṇasiyaṁ isipatane migadāye anuttaraṁ dhammacakkaṁ pavattitaṁ, appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.\nCātumahārājikānaṁ devānaṁ saddaṁ sutvā tāvatiṁsā devā …pe…\nyāmā devā …pe…\ntusitā devā …pe…\nnimmānaratī devā …pe…\nparanimmitavasavattī devā …pe…\nbrahmakāyikā devā saddamanussāvesuṁ:\n“etaṁ bhagavatā bārāṇasiyaṁ isipatane migadāye anuttaraṁ dhammacakkaṁ pavattitaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.","en":"And when the Buddha rolled forth the Wheel of Dhamma, the earth gods raised the cry:\n“Near Varanasi, in the deer park at Isipatana, the Buddha has rolled forth the supreme Wheel of Dhamma. And that wheel cannot be rolled back by any ascetic or brahmin or god or Māra or divinity or by anyone in the world.”\nHearing the cry of the earth gods, the gods of the four great kings …\nthe gods of the thirty-three …\nthe gods of Yama …\nthe joyful gods …\nthe gods who love to create …\nthe gods who control what is created by others …\nthe gods of the Divinity’s host raised the cry:\n“Near Varanasi, in the deer park at Isipatana, the Buddha has rolled forth the supreme Wheel of Dhamma. And that wheel cannot be rolled back by any ascetic or brahmin or god or Māra or divinity or by anyone in the world.”"}},{"id":"sn56.11:13","sourceIds":["sn56.11:13.1","sn56.11:13.2"],"kind":"text","text":{"pi":"Itiha tena khaṇena tena layena tena muhuttena yāva brahmalokā saddo abbhuggacchi.\nAyañca dasasahassilokadhātu saṅkampi sampakampi sampavedhi, appamāṇo ca uḷāro obhāso loke pāturahosi atikkamma devānaṁ devānubhāvanti.","en":"And so at that moment, that second, that hour, the cry soared up to the realm of divinity.\nAnd this ten-thousandfold galaxy shook and rocked and trembled. And an immeasurable, magnificent light appeared in the world, surpassing the glory of the gods."}},{"id":"sn56.11:14","sourceIds":["sn56.11:14.1","sn56.11:14.2","sn56.11:14.3","sn56.11:14.4"],"kind":"text","text":{"pi":"Atha kho bhagavā imaṁ udānaṁ udānesi:\n“aññāsi vata bho, koṇḍañño, aññāsi vata bho, koṇḍañño”ti.\nIti hidaṁ āyasmato koṇḍaññassa “aññāsikoṇḍañño” tveva nāmaṁ ahosīti.\nPaṭhamaṁ.","en":"Then the Buddha expressed this heartfelt sentiment:\n“Koṇḍañña has really understood! Koṇḍañña has really understood!”\nAnd that’s how Venerable Koṇḍañña came to be known as “Koṇḍañña Who Understood”."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn56.11/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}