{"id":"ud8.8","title":"With Visākhā","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ud8.8","title":"With Visākhā","units":[{"id":"ud8.8:0","sourceIds":["ud8.8:0.1","ud8.8:0.2"],"kind":"text","text":{"pi":"Udāna 8.8\nVisākhāsutta","en":"Heartfelt Sayings 8.8\nWith Visākhā"}},{"id":"ud8.8:1","sourceIds":["ud8.8:1.1","ud8.8:1.2","ud8.8:1.3","ud8.8:1.4","ud8.8:1.5"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sāvatthiyaṁ viharati pubbārāme migāramātupāsāde.\nTena kho pana samayena visākhāya migāramātuyā nattā kālaṅkatā hoti piyā manāpā.\nAtha kho visākhā migāramātā allavatthā allakesā divā divassa yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.\nEkamantaṁ nisinnaṁ kho visākhaṁ migāramātaraṁ bhagavā etadavoca:","en":"So I have heard.\nAt one time the Buddha was staying near Sāvatthī in the stilt longhouse of Migāra’s mother in the Eastern Monastery.\nNow at that time the dear and beloved granddaughter of Visākhā, Migāra’s mother, had just passed away.\nThen, in the middle of the day, Visākhā with wet clothes and hair went to the Buddha, bowed, and sat down.\nThe Buddha said to her,"}},{"id":"ud8.8:2","sourceIds":["ud8.8:2.1","ud8.8:2.2","ud8.8:2.3","ud8.8:2.4","ud8.8:2.5"],"kind":"text","text":{"pi":"“Handa kuto nu tvaṁ, visākhe, āgacchasi allavatthā allakesā idhūpasaṅkantā divā divassā”ti?\n“Nattā me, bhante, piyā manāpā kālaṅkatā.\nTenāhaṁ allavatthā allakesā idhūpasaṅkantā divā divassā”ti.\n“Iccheyyāsi tvaṁ, visākhe, yāvatikā sāvatthiyā manussā tāvatike putte ca nattāro cā”ti?\n“Iccheyyāhaṁ, bhagavā, yāvatikā sāvatthiyā manussā tāvatike putte ca nattāro cā”ti.","en":"“So, Visākhā, where are you coming from in the middle of the day with wet clothes and hair?”\n“Sir, my beloved granddaughter has just passed away.\nThat’s why I came here in the middle of the day with wet clothes and hair.”\n“Visākhā, would you like as many children and grandchildren as there are people in the whole of Sāvatthī?”\n“I would, sir.”"}},{"id":"ud8.8:3","sourceIds":["ud8.8:3.1","ud8.8:3.2","ud8.8:3.3","ud8.8:3.4","ud8.8:3.5","ud8.8:3.6","ud8.8:3.7","ud8.8:3.8","ud8.8:3.9","ud8.8:3.10","ud8.8:3.11","ud8.8:3.12"],"kind":"text","text":{"pi":"“Kīvabahukā pana, visākhe, sāvatthiyā manussā devasikaṁ kālaṁ karontī”ti?\n“Dasapi, bhante, sāvatthiyā manussā devasikaṁ kālaṁ karonti;\nnavapi, bhante …\naṭṭhapi, bhante …\nsattapi, bhante …\nchapi, bhante …\npañcapi, bhante …\ncattāropi, bhante …\ntīṇipi, bhante …\ndvepi, bhante, sāvatthiyā manussā devasikaṁ kālaṁ karonti.\nEkopi, bhante, sāvatthiyā manusso devasikaṁ kālaṁ karoti.\nAvivittā, bhante, sāvatthi manussehi kālaṁ karontehī”ti.","en":"“But Visākhā, how many people pass away each day in Sāvatthī?”\n“Every day, sir, there are ten people passing away in Sāvatthī.\nOr else there are nine,\neight,\nseven,\nsix,\nfive,\nfour,\nthree,\ntwo,\nor at least one person who passes away every day in Sāvatthī.\nSāvatthī is never without someone passing away.”"}},{"id":"ud8.8:4","sourceIds":["ud8.8:4.1","ud8.8:4.2","ud8.8:4.3"],"kind":"text","text":{"pi":"“Taṁ kiṁ maññasi, visākhe, api nu tvaṁ kadāci karahaci anallavatthā vā bhaveyyāsi anallakesā vā”ti?\n“No hetaṁ, bhante.\nAlaṁ me, bhante, tāva bahukehi puttehi ca nattārehi cā”ti.","en":"“What do you think, Visākhā? Would there ever be a time when your clothes and hair were not wet?”\n“No, sir.\nEnough, sir, with so many children and grandchildren.”"}},{"id":"ud8.8:5","sourceIds":["ud8.8:5.1","ud8.8:5.2","ud8.8:5.3","ud8.8:5.4","ud8.8:5.5","ud8.8:5.6","ud8.8:5.7","ud8.8:5.8","ud8.8:5.9","ud8.8:5.10","ud8.8:5.11","ud8.8:5.12","ud8.8:5.13","ud8.8:5.14","ud8.8:5.15","ud8.8:5.16","ud8.8:5.17","ud8.8:5.18","ud8.8:5.19","ud8.8:5.20"],"kind":"text","text":{"pi":"“Yesaṁ kho, visākhe, sataṁ piyāni, sataṁ tesaṁ dukkhāni;\nyesaṁ navuti piyāni, navuti tesaṁ dukkhāni;\nyesaṁ asīti piyāni, asīti tesaṁ dukkhāni;\nyesaṁ sattati piyāni, sattati tesaṁ dukkhāni;\nyesaṁ saṭṭhi piyāni, saṭṭhi tesaṁ dukkhāni;\nyesaṁ paññāsaṁ piyāni, paññāsaṁ tesaṁ dukkhāni;\nyesaṁ cattārīsaṁ piyāni, cattārīsaṁ tesaṁ dukkhāni,\nyesaṁ tiṁsaṁ piyāni, tiṁsaṁ tesaṁ dukkhāni;\nyesaṁ vīsati piyāni, vīsati tesaṁ dukkhāni,\nyesaṁ dasa piyāni, dasa tesaṁ dukkhāni;\nyesaṁ nava piyāni, nava tesaṁ dukkhāni;\nyesaṁ aṭṭha piyāni, aṭṭha tesaṁ dukkhāni;\nyesaṁ satta piyāni, satta tesaṁ dukkhāni;\nyesaṁ cha piyāni, cha tesaṁ dukkhāni;\nyesaṁ pañca piyāni, pañca tesaṁ dukkhāni;\nyesaṁ cattāri piyāni, cattāri tesaṁ dukkhāni;\nyesaṁ tīṇi piyāni, tīṇi tesaṁ dukkhāni;\nyesaṁ dve piyāni, dve tesaṁ dukkhāni;\nyesaṁ ekaṁ piyaṁ, ekaṁ tesaṁ dukkhaṁ;\nyesaṁ natthi piyaṁ, natthi tesaṁ dukkhaṁ, asokā te virajā anupāyāsāti vadāmī”ti.","en":"“Those who have a hundred loved ones, Visākhā, have a hundred sufferings.\nThose who have ninety loved ones,\nor eighty,\nseventy,\nsixty,\nfifty,\nforty,\nthirty,\ntwenty,\nten,\nnine,\neight,\nseven,\nsix,\nfive,\nfour,\nthree,\ntwo,\nor one loved one have one suffering.\nThose who have no loved ones have no suffering. They are free of sorrow, stains, and anguish I say.”"}},{"id":"ud8.8:6","sourceIds":["ud8.8:6.1"],"kind":"text","text":{"pi":"Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:","en":"Then, understanding this matter, on that occasion the Buddha expressed this heartfelt sentiment:"}},{"id":"ud8.8:7","sourceIds":["ud8.8:7.1","ud8.8:7.2","ud8.8:7.3","ud8.8:7.4"],"kind":"text","text":{"pi":"“Ye keci sokā paridevitā vā,\nDukkhā va lokasmimanekarūpā;\nPiyaṁ paṭiccappabhavanti ete,\nPiye asante na bhavanti ete.","en":"“All the sorrows and lamentations\nand the countless forms of suffering in the world\noccur because of those that we love;\nwithout loved ones they do not occur."}},{"id":"ud8.8:8","sourceIds":["ud8.8:8.1","ud8.8:8.2","ud8.8:8.3","ud8.8:8.4","ud8.8:8.5"],"kind":"text","text":{"pi":"Tasmā hi te sukhino vītasokā,\nYesaṁ piyaṁ natthi kuhiñci loke;\nTasmā asokaṁ virajaṁ patthayāno,\nPiyaṁ na kayirātha kuhiñci loke”ti.\nAṭṭhamaṁ.","en":"That’s why those who have no loved ones at all in the world\nare happy and free of grief.\nSo aspiring to the sorrowless and stainless,\nhave no loved ones in the world at all.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ud8.8/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}