{"id":"vb11","title":"Maggaṅgavibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"vb11","title":"Maggaṅgavibhaṅga","units":[{"id":"vb11:0","sourceIds":["vb11:0.1","vb11:0.2"],"kind":"text","text":{"pi":"Vibhaṅga\nMaggaṅgavibhaṅga"}},{"id":"vb11:1","sourceIds":["vb11:1.0","vb11:1.1","vb11:1.2"],"kind":"text","text":{"pi":"1. Suttantabhājanīya\nAriyo aṭṭhaṅgiko maggo, seyyathidaṁ—\nsammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi."}},{"id":"vb11:2","sourceIds":["vb11:2.1","vb11:2.2","vb11:2.3"],"kind":"text","text":{"pi":"Tattha katamā sammādiṭṭhi?\nDukkhe ñāṇaṁ, dukkhasamudaye ñāṇaṁ, dukkhanirodhe ñāṇaṁ, dukkhanirodhagāminiyā paṭipadāya ñāṇaṁ—\nayaṁ vuccati “sammādiṭṭhi”."}},{"id":"vb11:3","sourceIds":["vb11:3.1","vb11:3.2","vb11:3.3"],"kind":"text","text":{"pi":"Tattha katamo sammāsaṅkappo?\nNekkhammasaṅkappo, abyāpādasaṅkappo, avihiṁsāsaṅkappo—\nayaṁ vuccati “sammāsaṅkappo”."}},{"id":"vb11:4","sourceIds":["vb11:4.1","vb11:4.2","vb11:4.3"],"kind":"text","text":{"pi":"Tattha katamā sammāvācā?\nMusāvādā veramaṇī, pisuṇāya vācāya veramaṇī, pharusāya vācāya veramaṇī, samphappalāpā veramaṇī—\nayaṁ vuccati “sammāvācā”."}},{"id":"vb11:5","sourceIds":["vb11:5.1","vb11:5.2","vb11:5.3"],"kind":"text","text":{"pi":"Tattha katamo sammākammanto?\nPāṇātipātā veramaṇī, adinnādānā veramaṇī, kāmesumicchācārā veramaṇī—\nayaṁ vuccati “sammākammanto”."}},{"id":"vb11:6","sourceIds":["vb11:6.1","vb11:6.2","vb11:6.3"],"kind":"text","text":{"pi":"Tattha katamo sammāājīvo?\nIdha ariyasāvako micchāājīvaṁ pahāya sammāājīvena jīvikaṁ kappeti—\nayaṁ vuccati “sammāājīvo”."}},{"id":"vb11:7","sourceIds":["vb11:7.1","vb11:7.2","vb11:7.3","vb11:7.4","vb11:7.5","vb11:7.6"],"kind":"text","text":{"pi":"Tattha katamo sammāvāyāmo?\nIdha bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati,\nuppannānaṁ pāpakānaṁ akusalānaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati,\nanuppannānaṁ kusalānaṁ dhammānaṁ uppādāya chandaṁ janeti vāyamati vīriyaṁ ārabhati cittaṁ paggaṇhāti padahati,\nuppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati—\nayaṁ vuccati “sammāvāyāmo”."}},{"id":"vb11:8","sourceIds":["vb11:8.1","vb11:8.2","vb11:8.3","vb11:8.4","vb11:8.5","vb11:8.6"],"kind":"text","text":{"pi":"Tattha katamā sammāsati?\nIdha bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ,\nvedanāsu vedanānupassī viharati ātāpī sampajāno satimā vineyya loke abhijjhādomanassaṁ,\ncitte cittānupassī viharati ātāpī sampajāno satimā vineyya loke abhijjhādomanassaṁ,\ndhammesu dhammānupassī viharati ātāpī sampajāno satimā vineyya loke abhijjhādomanassaṁ—\nayaṁ vuccati “sammāsati”."}},{"id":"vb11:9","sourceIds":["vb11:9.1","vb11:9.2","vb11:9.3","vb11:9.4","vb11:9.5","vb11:9.6"],"kind":"text","text":{"pi":"Tattha katamo sammāsamādhi?\nIdha bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati;\nvitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati;\npītiyā ca virāgā upekkhako ca viharati sato ca sampajāno sukhañca kāyena paṭisaṁvedeti, yaṁ taṁ ariyā ācikkhanti “upekkhako satimā sukhavihārī”ti tatiyaṁ jhānaṁ upasampajja viharati;\nsukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati—\nayaṁ vuccati “sammāsamādhi”."}},{"id":"vb11:10","sourceIds":["vb11:10.1","vb11:10.2"],"kind":"text","text":{"pi":"Ariyo aṭṭhaṅgiko maggo, seyyathidaṁ—\nsammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi."}},{"id":"vb11:11","sourceIds":["vb11:11.1","vb11:11.2","vb11:11.3","vb11:11.4","vb11:11.5","vb11:11.6","vb11:11.7","vb11:11.8","vb11:11.9"],"kind":"text","text":{"pi":"Tattha katamā sammādiṭṭhi?\nIdha bhikkhu sammādiṭṭhiṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ,\nsammāsaṅkappaṁ bhāveti …pe…\nsammāvācaṁ bhāveti …pe…\nsammākammantaṁ bhāveti …pe…\nsammāājīvaṁ bhāveti …pe…\nsammāvāyāmaṁ bhāveti …pe…\nsammāsatiṁ bhāveti …pe…\nsammāsamādhiṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ."}},{"id":"vb11:12","sourceIds":["vb11:12.1"],"kind":"text","text":{"pi":"Suttantabhājanīyaṁ."}},{"id":"vb11:13","sourceIds":["vb11:13.0","vb11:13.1","vb11:13.2"],"kind":"text","text":{"pi":"2. Abhidhammabhājanīya\nAṭṭhaṅgiko maggo—\nsammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi."}},{"id":"vb11:14","sourceIds":["vb11:14.1","vb11:14.2","vb11:14.3"],"kind":"text","text":{"pi":"Tattha katamo aṭṭhaṅgiko maggo?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye aṭṭhaṅgiko maggo hoti—\nsammādiṭṭhi …pe… sammāsamādhi."}},{"id":"vb11:15","sourceIds":["vb11:15.1","vb11:15.2","vb11:15.3"],"kind":"text","text":{"pi":"Tattha katamā sammādiṭṭhi?\nYā paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nayaṁ vuccati “sammādiṭṭhi”."}},{"id":"vb11:16","sourceIds":["vb11:16.1","vb11:16.2","vb11:16.3"],"kind":"text","text":{"pi":"Tattha katamo sammāsaṅkappo?\nYo takko vitakko saṅkappo appanā byappanā cetaso abhiniropanā sammāsaṅkappo maggaṅgaṁ maggapariyāpannaṁ—\nayaṁ vuccati “sammāsaṅkappo”."}},{"id":"vb11:17","sourceIds":["vb11:17.1","vb11:17.2","vb11:17.3"],"kind":"text","text":{"pi":"Tattha katamā sammāvācā?\nYā catūhi vacīduccaritehi ārati virati paṭivirati veramaṇī akiriyā akaraṇaṁ anajjhāpatti velāanatikkamo setughāto sammāvācā maggaṅgaṁ maggapariyāpannaṁ—\nayaṁ vuccati “sammāvācā”."}},{"id":"vb11:18","sourceIds":["vb11:18.1","vb11:18.2","vb11:18.3"],"kind":"text","text":{"pi":"Tattha katamo sammākammanto?\nYā tīhi kāyaduccaritehi ārati virati paṭivirati veramaṇī akiriyā akaraṇaṁ anajjhāpatti velāanatikkamo setughāto sammākammanto maggaṅgaṁ maggapariyāpannaṁ—\nayaṁ vuccati “sammākammanto”."}},{"id":"vb11:19","sourceIds":["vb11:19.1","vb11:19.2","vb11:19.3"],"kind":"text","text":{"pi":"Tattha katamo sammāājīvo?\nYā micchāājīvā ārati virati paṭivirati veramaṇī akiriyā akaraṇaṁ anajjhāpatti velāanatikkamo setughāto sammāājīvo maggaṅgaṁ maggapariyāpannaṁ—\nayaṁ vuccati “sammāājīvo”."}},{"id":"vb11:20","sourceIds":["vb11:20.1","vb11:20.2","vb11:20.3"],"kind":"text","text":{"pi":"Tattha katamo sammāvāyāmo?\nYo cetasiko vīriyārambho …pe… sammāvāyāmo vīriyasambojjhaṅgo maggaṅgaṁ maggapariyāpannaṁ—\nayaṁ vuccati “sammāvāyāmo”."}},{"id":"vb11:21","sourceIds":["vb11:21.1","vb11:21.2","vb11:21.3"],"kind":"text","text":{"pi":"Tattha katamā sammāsati?\nYā sati anussati …pe… sammāsati satisambojjhaṅgo maggaṅgaṁ maggapariyāpannaṁ—\nayaṁ vuccati “sammāsati”."}},{"id":"vb11:22","sourceIds":["vb11:22.1","vb11:22.2","vb11:22.3","vb11:22.4","vb11:22.5"],"kind":"text","text":{"pi":"Tattha katamo sammāsamādhi?\nYā cittassa ṭhiti …pe… sammāsamādhi samādhisambojjhaṅgo maggaṅgaṁ maggapariyāpannaṁ—\nayaṁ vuccati “sammāsamādhi”.\nAyaṁ vuccati “aṭṭhaṅgiko maggo”.\nAvasesā dhammā aṭṭhaṅgikena maggena sampayuttā."}},{"id":"vb11:23","sourceIds":["vb11:23.1","vb11:23.2"],"kind":"text","text":{"pi":"Pañcaṅgiko maggo—\nsammādiṭṭhi, sammāsaṅkappo, sammāvāyāmo, sammāsati, sammāsamādhi."}},{"id":"vb11:24","sourceIds":["vb11:24.1","vb11:24.2","vb11:24.3"],"kind":"text","text":{"pi":"Tattha katamo pañcaṅgiko maggo?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye pañcaṅgiko maggo hoti—\nsammādiṭṭhi, sammāsaṅkappo, sammāvāyāmo, sammāsati, sammāsamādhi."}},{"id":"vb11:25","sourceIds":["vb11:25.1","vb11:25.2","vb11:25.3"],"kind":"text","text":{"pi":"Tattha katamā sammādiṭṭhi?\nYā paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nayaṁ vuccati “sammādiṭṭhi”."}},{"id":"vb11:26","sourceIds":["vb11:26.1","vb11:26.2","vb11:26.3"],"kind":"text","text":{"pi":"Tattha katamo sammāsaṅkappo?\nYo takko vitakko …pe… sammāsaṅkappo maggaṅgaṁ maggapariyāpannaṁ—\nayaṁ vuccati “sammāsaṅkappo”."}},{"id":"vb11:27","sourceIds":["vb11:27.1","vb11:27.2","vb11:27.3"],"kind":"text","text":{"pi":"Tattha katamo sammāvāyāmo?\nYo cetasiko vīriyārambho …pe… sammāvāyāmo vīriyasambojjhaṅgo maggaṅgaṁ maggapariyāpannaṁ—\nayaṁ vuccati “sammāvāyāmo”."}},{"id":"vb11:28","sourceIds":["vb11:28.1","vb11:28.2","vb11:28.3"],"kind":"text","text":{"pi":"Tattha katamā sammāsati?\nYā sati anussati …pe… sammāsati satisambojjhaṅgo maggaṅgaṁ maggapariyāpannaṁ—\nayaṁ vuccati “sammāsati”."}},{"id":"vb11:29","sourceIds":["vb11:29.1","vb11:29.2","vb11:29.3","vb11:29.4","vb11:29.5"],"kind":"text","text":{"pi":"Tattha katamo sammāsamādhi?\nYā cittassa ṭhiti …pe… sammāsamādhi samādhisambojjhaṅgo maggaṅgaṁ maggapariyāpannaṁ—\nayaṁ vuccati “sammāsamādhi”.\nAyaṁ vuccati “pañcaṅgiko maggo”.\nAvasesā dhammā pañcaṅgikena maggena sampayuttā."}},{"id":"vb11:30","sourceIds":["vb11:30.1","vb11:30.2"],"kind":"text","text":{"pi":"Pañcaṅgiko maggo—\nsammādiṭṭhi, sammāsaṅkappo, sammāvāyāmo, sammāsati, sammāsamādhi."}},{"id":"vb11:31","sourceIds":["vb11:31.1","vb11:31.2","vb11:31.3","vb11:31.4","vb11:31.5","vb11:31.6","vb11:31.7"],"kind":"text","text":{"pi":"Tattha katamā sammādiṭṭhi?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, yā tasmiṁ samaye paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nayaṁ vuccati “sammādiṭṭhi”.\nAvasesā dhammā sammādiṭṭhiyā sampayuttā …pe…\navasesā dhammā sammāsaṅkappena sampayuttā …pe…\navasesā dhammā sammāvāyāmena sampayuttā …pe…\navasesā dhammā sammāsatiyā sampayuttā."}},{"id":"vb11:32","sourceIds":["vb11:32.1","vb11:32.2","vb11:32.3","vb11:32.4"],"kind":"text","text":{"pi":"Tattha katamo sammāsamādhi?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, yā tasmiṁ samaye cittassa ṭhiti …pe… sammāsamādhi samādhisambojjhaṅgo maggaṅgaṁ maggapariyāpannaṁ—\nayaṁ vuccati “sammāsamādhi”.\nAvasesā dhammā sammāsamādhinā sampayuttā."}},{"id":"vb11:33","sourceIds":["vb11:33.1","vb11:33.2"],"kind":"text","text":{"pi":"Aṭṭhaṅgiko maggo—\nsammādiṭṭhi …pe… sammāsamādhi."}},{"id":"vb11:34","sourceIds":["vb11:34.1","vb11:34.2","vb11:34.3","vb11:34.4","vb11:34.5","vb11:34.6","vb11:34.7"],"kind":"text","text":{"pi":"Tattha katamo aṭṭhaṅgiko maggo?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, tasmiṁ samaye aṭṭhaṅgiko maggo hoti—\nsammādiṭṭhi …pe… sammāsamādhi.\nAyaṁ vuccati “aṭṭhaṅgiko maggo”.\nAvasesā dhammā aṭṭhaṅgikena maggena sampayuttā."}},{"id":"vb11:35","sourceIds":["vb11:35.1","vb11:35.2"],"kind":"text","text":{"pi":"Pañcaṅgiko maggo—\nsammādiṭṭhi, sammāsaṅkappo, sammāvāyāmo, sammāsati, sammāsamādhi."}},{"id":"vb11:36","sourceIds":["vb11:36.1","vb11:36.2","vb11:36.3","vb11:36.4","vb11:36.5","vb11:36.6","vb11:36.7"],"kind":"text","text":{"pi":"Tattha katamo pañcaṅgiko maggo?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, tasmiṁ samaye pañcaṅgiko maggo hoti—\nsammādiṭṭhi, sammāsaṅkappo, sammāvāyāmo, sammāsati, sammāsamādhi.\nAyaṁ vuccati “pañcaṅgiko maggo”.\nAvasesā dhammā pañcaṅgikena maggena sampayuttā."}},{"id":"vb11:37","sourceIds":["vb11:37.1","vb11:37.2"],"kind":"text","text":{"pi":"Pañcaṅgiko maggo—\nsammādiṭṭhi, sammāsaṅkappo, sammāvāyāmo, sammāsati, sammāsamādhi."}},{"id":"vb11:38","sourceIds":["vb11:38.1","vb11:38.2","vb11:38.3","vb11:38.4","vb11:38.5","vb11:38.6","vb11:38.7","vb11:38.8","vb11:38.9"],"kind":"text","text":{"pi":"Tattha katamā sammādiṭṭhi?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, yā tasmiṁ samaye paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nayaṁ vuccati “sammādiṭṭhi”.\nAvasesā dhammā sammādiṭṭhiyā sampayuttā …pe…\navasesā dhammā sammāsaṅkappena sampayuttā …pe…\navasesā dhammā sammāvāyāmena sampayuttā …pe…\navasesā dhammā sammāsatiyā sampayuttā."}},{"id":"vb11:39","sourceIds":["vb11:39.1","vb11:39.2","vb11:39.3","vb11:39.4","vb11:39.5","vb11:39.6"],"kind":"text","text":{"pi":"Tattha katamo sammāsamādhi?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, yā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—\nayaṁ vuccati “sammāsamādhi”.\nAvasesā dhammā sammāsamādhinā sampayuttā."}},{"id":"vb11:40","sourceIds":["vb11:40.1"],"kind":"text","text":{"pi":"Abhidhammabhājanīyaṁ."}},{"id":"vb11:41","sourceIds":["vb11:41.0","vb11:41.1","vb11:41.2"],"kind":"text","text":{"pi":"3. Pañhāpucchaka\nAriyo aṭṭhaṅgiko maggo, seyyathidaṁ—\nsammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi."}},{"id":"vb11:42","sourceIds":["vb11:42.1"],"kind":"text","text":{"pi":"Aṭṭhannaṁ maggaṅgānaṁ kati kusalā, kati akusalā, kati abyākatā …pe… kati saraṇā, kati araṇā?"}},{"id":"vb11:43","sourceIds":["vb11:43.0","vb11:43.1"],"kind":"text","text":{"pi":"3.1. Tika\nSiyā kusalā, siyā abyākatā."}},{"id":"vb11:44","sourceIds":["vb11:44.1","vb11:44.2"],"kind":"text","text":{"pi":"Sammāsaṅkappo sukhāya vedanāya sampayutto;\nsatta maggaṅgā siyā sukhāya vedanāya sampayuttā, siyā adukkhamasukhāya vedanāya sampayuttā."}},{"id":"vb11:45","sourceIds":["vb11:45.1"],"kind":"text","text":{"pi":"Siyā vipākā, siyā vipākadhammadhammā."}},{"id":"vb11:46","sourceIds":["vb11:46.1"],"kind":"text","text":{"pi":"Anupādinnaanupādāniyā."}},{"id":"vb11:47","sourceIds":["vb11:47.1"],"kind":"text","text":{"pi":"Asaṅkiliṭṭhaasaṅkilesikā."}},{"id":"vb11:48","sourceIds":["vb11:48.1","vb11:48.2"],"kind":"text","text":{"pi":"Sammāsaṅkappo avitakkavicāramatto;\nsatta maggaṅgā siyā savitakkasavicārā, siyā avitakkavicāramattā, siyā avitakkaavicārā."}},{"id":"vb11:49","sourceIds":["vb11:49.1","vb11:49.2"],"kind":"text","text":{"pi":"Sammāsaṅkappo pītisahagato, sukhasahagato, na upekkhāsahagato;\nsatta maggaṅgā siyā pītisahagatā, siyā sukhasahagatā, siyā upekkhāsahagatā."}},{"id":"vb11:50","sourceIds":["vb11:50.1"],"kind":"text","text":{"pi":"Neva dassanena na bhāvanāya pahātabbā."}},{"id":"vb11:51","sourceIds":["vb11:51.1"],"kind":"text","text":{"pi":"Neva dassanena na bhāvanāya pahātabbahetukā."}},{"id":"vb11:52","sourceIds":["vb11:52.1"],"kind":"text","text":{"pi":"Siyā apacayagāmino, siyā nevācayagāmināpacayagāmino."}},{"id":"vb11:53","sourceIds":["vb11:53.1"],"kind":"text","text":{"pi":"Siyā sekkhā, siyā asekkhā."}},{"id":"vb11:54","sourceIds":["vb11:54.1"],"kind":"text","text":{"pi":"Appamāṇā."}},{"id":"vb11:55","sourceIds":["vb11:55.1"],"kind":"text","text":{"pi":"Appamāṇārammaṇā."}},{"id":"vb11:56","sourceIds":["vb11:56.1"],"kind":"text","text":{"pi":"Paṇītā."}},{"id":"vb11:57","sourceIds":["vb11:57.1"],"kind":"text","text":{"pi":"Siyā sammattaniyatā, siyā aniyatā."}},{"id":"vb11:58","sourceIds":["vb11:58.1","vb11:58.2"],"kind":"text","text":{"pi":"Na maggārammaṇā, siyā maggahetukā, siyā maggādhipatino;\nsiyā na vattabbā “maggahetukā”tipi, “maggādhipatino”tipi."}},{"id":"vb11:59","sourceIds":["vb11:59.1"],"kind":"text","text":{"pi":"Siyā uppannā, siyā anuppannā, siyā uppādino."}},{"id":"vb11:60","sourceIds":["vb11:60.1"],"kind":"text","text":{"pi":"Siyā atītā, siyā anāgatā, siyā paccuppannā."}},{"id":"vb11:61","sourceIds":["vb11:61.1"],"kind":"text","text":{"pi":"Na vattabbā “atītārammaṇā”tipi, “anāgatārammaṇā”tipi, “paccuppannārammaṇā”tipi."}},{"id":"vb11:62","sourceIds":["vb11:62.1"],"kind":"text","text":{"pi":"Siyā ajjhattā, siyā bahiddhā, siyā ajjhattabahiddhā."}},{"id":"vb11:63","sourceIds":["vb11:63.1"],"kind":"text","text":{"pi":"Bahiddhārammaṇā."}},{"id":"vb11:64","sourceIds":["vb11:64.1"],"kind":"text","text":{"pi":"Anidassanaappaṭighā."}},{"id":"vb11:65.0","sourceIds":["vb11:65.0.1","vb11:65.0.2"],"kind":"text","text":{"pi":"3.2. 3.2 Duka\n3.2.1. Hetugocchaka"}},{"id":"vb11:65","sourceIds":["vb11:65.1","vb11:65.2","vb11:65.3","vb11:65.4"],"kind":"text","text":{"pi":"Sammādiṭṭhi hetu, satta maggaṅgā na hetū, sahetukā, hetusampayuttā.\nSammādiṭṭhi hetu ceva sahetukā ca, satta maggaṅgā na vattabbā “hetū ceva sahetukā cā”ti, sahetukā ceva na ca hetū.\nSammādiṭṭhi hetu ceva hetusampayuttā ca, satta maggaṅgā na vattabbā “hetū ceva hetusampayuttā cā”ti, hetusampayuttā ceva na ca hetū.\nSatta maggaṅgā na hetū sahetukā, sammādiṭṭhi na vattabbā “na hetu sahetukā”tipi, “na hetu ahetukā”tipi."}},{"id":"vb11:66","sourceIds":["vb11:66.0","vb11:66.1","vb11:66.2","vb11:66.3","vb11:66.4","vb11:66.5","vb11:66.6","vb11:66.7"],"kind":"text","text":{"pi":"3.2.2. Cūḷantaraduka\nSappaccayā.\nSaṅkhatā.\nAnidassanā.\nAppaṭighā.\nArūpā.\nLokuttarā.\nKenaci viññeyyā, kenaci na viññeyyā."}},{"id":"vb11:67","sourceIds":["vb11:67.0","vb11:67.1","vb11:67.2","vb11:67.3","vb11:67.4","vb11:67.5","vb11:67.6","vb11:67.7"],"kind":"text","text":{"pi":"3.2.3. Āsavagocchaka\nNo āsavā.\nAnāsavā.\nĀsavavippayuttā.\nNa vattabbā “āsavā ceva sāsavā cā”tipi, “sāsavā ceva no ca āsavā”tipi.\nNa vattabbā “āsavā ceva āsavasampayuttā cā”tipi, “āsavasampayuttā ceva no ca āsavā”tipi.\nĀsavavippayuttā.\nAnāsavā."}},{"id":"vb11:68","sourceIds":["vb11:68.0","vb11:68.1","vb11:68.2","vb11:68.3","vb11:68.4","vb11:68.5","vb11:68.6"],"kind":"text","text":{"pi":"11.3.2.4. Saṁyojanagocchakādi\nNo saṁyojanā …pe…\nno ganthā …pe…\nno oghā …pe…\nno yogā …pe…\nno nīvaraṇā …pe…\nno parāmāsā …pe…."}},{"id":"vb11:69","sourceIds":["vb11:69.0","vb11:69.1","vb11:69.2","vb11:69.3","vb11:69.4","vb11:69.5","vb11:69.6","vb11:69.7","vb11:69.8","vb11:69.9","vb11:69.10","vb11:69.11","vb11:69.12","vb11:69.13","vb11:69.14"],"kind":"text","text":{"pi":"3.2.10. Mahantaraduka\nSārammaṇā.\nNo cittā.\nCetasikā.\nCittasampayuttā.\nCittasaṁsaṭṭhā.\nCittasamuṭṭhānā.\nCittasahabhuno.\nCittānuparivattino.\nCittasaṁsaṭṭhasamuṭṭhānā.\nCittasaṁsaṭṭhasamuṭṭhānasahabhuno.\nCittasaṁsaṭṭhasamuṭṭhānānuparivattino.\nBāhirā.\nNo upādā.\nAnupādinnā."}},{"id":"vb11:70","sourceIds":["vb11:70.0","vb11:70.1","vb11:70.2","vb11:70.3","vb11:70.4","vb11:70.5","vb11:70.6","vb11:70.7","vb11:70.8","vb11:70.9","vb11:70.10","vb11:70.11","vb11:70.12","vb11:70.13","vb11:70.14","vb11:70.15","vb11:70.16","vb11:70.17","vb11:70.18","vb11:70.19","vb11:70.20"],"kind":"text","text":{"pi":"11.3.2.11. Upādānagocchakādi\nNo upādānā …pe…\nno kilesā …pe…\nna dassanena pahātabbā.\nNa bhāvanāya pahātabbā.\nNa dassanena pahātabbahetukā.\nNa bhāvanāya pahātabbahetukā.\nSammāsaṅkappo avitakko, satta maggaṅgā siyā savitakkā, siyā avitakkā.\nSammāsaṅkappo savicāro, satta maggaṅgā siyā savicārā, siyā avicārā.\nSammāsaṅkappo sappītiko, satta maggaṅgā siyā sappītikā, siyā appītikā.\nSammāsaṅkappo pītisahagato, satta maggaṅgā siyā pītisahagatā, siyā na pītisahagatā.\nSammāsaṅkappo sukhasahagato, satta maggaṅgā siyā sukhasahagatā, siyā na sukhasahagatā.\nSammāsaṅkappo na upekkhāsahagato, satta maggaṅgā siyā upekkhāsahagatā, siyā na upekkhāsahagatā.\nNa kāmāvacarā.\nNa rūpāvacarā.\nNa arūpāvacarā.\nApariyāpannā.\nSiyā niyyānikā, siyā aniyyānikā.\nSiyā niyatā, siyā aniyatā.\nAnuttarā.\nAraṇāti."}},{"id":"vb11:71","sourceIds":["vb11:71.1"],"kind":"text","text":{"pi":"Pañhāpucchakaṁ."}},{"id":"vb11:72","sourceIds":["vb11:72.1"],"kind":"text","text":{"pi":"Maggaṅgavibhaṅgo niṭṭhito."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/vb11/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}