{"id":"vb13","title":"Appamaññāvibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"vb13","title":"Appamaññāvibhaṅga","units":[{"id":"vb13:0","sourceIds":["vb13:0.1","vb13:0.2"],"kind":"text","text":{"pi":"Vibhaṅga\nAppamaññāvibhaṅga"}},{"id":"vb13:1","sourceIds":["vb13:1.0","vb13:1.1","vb13:1.2","vb13:1.3","vb13:1.4","vb13:1.5","vb13:1.6","vb13:1.7","vb13:1.8","vb13:1.9"],"kind":"text","text":{"pi":"1. Suttantabhājanīya\nCatasso appamaññāyo—\nidha bhikkhu mettāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ.\nIti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati.\nKaruṇāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ.\nIti uddhamadho tiriyaṁ sabbadhi sabbattatāya sabbāvantaṁ lokaṁ karuṇāsahagatena cetasā vipulena mahaggatena appamāṇena averena abyāpajjena pharitvā viharati.\nMuditāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ.\nIti uddhamadho tiriyaṁ sabbadhi sabbattatāya sabbāvantaṁ lokaṁ muditāsahagatena cetasā vipulena mahaggatena appamāṇena averena abyāpajjena pharitvā viharati.\nUpekkhāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ.\nIti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati."}},{"id":"vb13:2","sourceIds":["vb13:2.0","vb13:2.1","vb13:2.2","vb13:2.3"],"kind":"text","text":{"pi":"1.1. Mettā\nKathañca bhikkhu mettāsahagatena cetasā ekaṁ disaṁ pharitvā viharati?\nSeyyathāpi nāma ekaṁ puggalaṁ piyaṁ manāpaṁ disvā mettāyeyya;\nevameva sabbe satte mettāya pharati."}},{"id":"vb13:3","sourceIds":["vb13:3.1","vb13:3.2","vb13:3.3"],"kind":"text","text":{"pi":"Tattha katamā mettā?\nYā sattesu metti mettāyanā mettāyitattaṁ mettācetovimutti—\nayaṁ vuccati “mettā”."}},{"id":"vb13:4","sourceIds":["vb13:4.1","vb13:4.2","vb13:4.3","vb13:4.4","vb13:4.5"],"kind":"text","text":{"pi":"Tattha katamaṁ cittaṁ?\nYaṁ cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—\nidaṁ vuccati “cittaṁ”.\nIdaṁ cittaṁ imāya mettāya sahagataṁ hoti sahajātaṁ saṁsaṭṭhaṁ sampayuttaṁ.\nTena vuccati “mettāsahagatena cetasā”ti."}},{"id":"vb13:5","sourceIds":["vb13:5.1"],"kind":"text","text":{"pi":"“Ekaṁ disan”ti puratthimaṁ vā disaṁ pacchimaṁ vā disaṁ uttaraṁ vā disaṁ dakkhiṇaṁ vā disaṁ uddhaṁ vā adho vā tiriyaṁ vā vidisaṁ vā."}},{"id":"vb13:6","sourceIds":["vb13:6.1"],"kind":"text","text":{"pi":"“Pharitvā”ti pharitvā adhimuccitvā."}},{"id":"vb13:7","sourceIds":["vb13:7.1","vb13:7.2"],"kind":"text","text":{"pi":"“Viharatī”ti iriyati vattati pāleti yapeti yāpeti carati viharati.\nTena vuccati “viharatī”ti."}},{"id":"vb13:8","sourceIds":["vb13:8.1"],"kind":"text","text":{"pi":"“Tathā dutiyan”ti yatheva ekaṁ disaṁ tathā dutiyaṁ disaṁ tathā tatiyaṁ disaṁ tathā catutthaṁ disaṁ tathā uddhaṁ tathā adho tathā tiriyaṁ tathā vidisaṁ."}},{"id":"vb13:9","sourceIds":["vb13:9.1","vb13:9.2","vb13:9.3"],"kind":"text","text":{"pi":"“Sabbadhi sabbattatāya sabbāvantaṁ lokan”ti sabbena sabbaṁ sabbathā sabbaṁ asesaṁ nissesaṁ.\nPariyādāyavacanametaṁ—\n“sabbadhi sabbattatāya sabbāvantaṁ lokan”ti."}},{"id":"vb13:10","sourceIds":["vb13:10.1","vb13:10.2","vb13:10.3"],"kind":"text","text":{"pi":"“Mettāsahagatena cetasā”ti tattha katamā mettā?\nYā sattesu metti mettāyanā mettāyitattaṁ mettācetovimutti—\nayaṁ vuccati “mettā”."}},{"id":"vb13:11","sourceIds":["vb13:11.1","vb13:11.2","vb13:11.3","vb13:11.4","vb13:11.5"],"kind":"text","text":{"pi":"Tattha katamaṁ cittaṁ?\nYaṁ cittaṁ mano mānasaṁ …pe… tajjāmanoviññāṇadhātu—\nidaṁ vuccati “cittaṁ”.\nIdaṁ cittaṁ imāya mettāya sahagataṁ hoti sahajātaṁ saṁsaṭṭhaṁ sampayuttaṁ.\nTena vuccati “mettāsahagatena cetasā”ti."}},{"id":"vb13:12","sourceIds":["vb13:12.1"],"kind":"text","text":{"pi":"“Vipulenā”ti yaṁ vipulaṁ taṁ mahaggataṁ, yaṁ mahaggataṁ taṁ appamāṇaṁ, yaṁ appamāṇaṁ so avero, yo avero so abyāpajjo."}},{"id":"vb13:13","sourceIds":["vb13:13.1"],"kind":"text","text":{"pi":"“Pharitvā”ti pharitvā adhimuccitvā."}},{"id":"vb13:14","sourceIds":["vb13:14.1","vb13:14.2"],"kind":"text","text":{"pi":"“Viharatī”ti …pe…\ntena vuccati “viharatī”ti."}},{"id":"vb13:15","sourceIds":["vb13:15.0","vb13:15.1","vb13:15.2","vb13:15.3"],"kind":"text","text":{"pi":"1.2. Karuṇā\nKathañca bhikkhu karuṇāsahagatena cetasā ekaṁ disaṁ pharitvā viharati?\nSeyyathāpi nāma ekaṁ puggalaṁ duggataṁ durūpetaṁ disvā karuṇāyeyya;\nevameva sabbe satte karuṇāya pharati."}},{"id":"vb13:16","sourceIds":["vb13:16.1","vb13:16.2","vb13:16.3"],"kind":"text","text":{"pi":"Tattha katamā karuṇā?\nYā sattesu karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”."}},{"id":"vb13:17","sourceIds":["vb13:17.1","vb13:17.2","vb13:17.3","vb13:17.4","vb13:17.5"],"kind":"text","text":{"pi":"Tattha katamaṁ cittaṁ?\nYaṁ cittaṁ mano mānasaṁ …pe… tajjāmanoviññāṇadhātu—\nidaṁ vuccati “cittaṁ”.\nIdaṁ cittaṁ imāya karuṇāya sahagataṁ hoti sahajātaṁ saṁsaṭṭhaṁ sampayuttaṁ.\nTena vuccati “karuṇāsahagatena cetasā”ti."}},{"id":"vb13:18","sourceIds":["vb13:18.1"],"kind":"text","text":{"pi":"“Ekaṁ disan”ti puratthimaṁ vā disaṁ pacchimaṁ vā disaṁ uttaraṁ vā disaṁ dakkhiṇaṁ vā disaṁ uddhaṁ vā adho vā tiriyaṁ vā vidisaṁ vā."}},{"id":"vb13:19","sourceIds":["vb13:19.1"],"kind":"text","text":{"pi":"“Pharitvā”ti pharitvā adhimuccitvā."}},{"id":"vb13:20","sourceIds":["vb13:20.1","vb13:20.2"],"kind":"text","text":{"pi":"“Viharatī”ti iriyati vattati pāleti yapeti yāpeti carati viharati.\nTena vuccati “viharatī”ti."}},{"id":"vb13:21","sourceIds":["vb13:21.1"],"kind":"text","text":{"pi":"“Tathā dutiyan”ti yatheva ekaṁ disaṁ tathā dutiyaṁ disaṁ tathā tatiyaṁ disaṁ tathā catutthaṁ disaṁ tathā uddhaṁ tathā adho tathā tiriyaṁ tathā vidisaṁ."}},{"id":"vb13:22","sourceIds":["vb13:22.1","vb13:22.2","vb13:22.3"],"kind":"text","text":{"pi":"“Sabbadhi sabbattatāya sabbāvantaṁ lokan”ti sabbena sabbaṁ sabbathā sabbaṁ asesaṁ nissesaṁ.\nPariyādāyavacanametaṁ—\n“sabbadhi sabbattatāya sabbāvantaṁ lokan”ti."}},{"id":"vb13:23","sourceIds":["vb13:23.1","vb13:23.2","vb13:23.3"],"kind":"text","text":{"pi":"“Karuṇāsahagatena cetasā”ti tattha katamā karuṇā?\nYā sattesu karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”."}},{"id":"vb13:24","sourceIds":["vb13:24.1","vb13:24.2","vb13:24.3","vb13:24.4","vb13:24.5"],"kind":"text","text":{"pi":"Tattha katamaṁ cittaṁ?\nYaṁ cittaṁ mano mānasaṁ …pe… tajjāmanoviññāṇadhātu—\nidaṁ vuccati “cittaṁ”.\nIdaṁ cittaṁ imāya karuṇāya sahagataṁ hoti sahajātaṁ saṁsaṭṭhaṁ sampayuttaṁ.\nTena vuccati “karuṇāsahagatena cetasā”ti."}},{"id":"vb13:25","sourceIds":["vb13:25.1"],"kind":"text","text":{"pi":"“Vipulenā”ti yaṁ vipulaṁ taṁ mahaggataṁ, yaṁ mahaggataṁ taṁ appamāṇaṁ, yaṁ appamāṇaṁ so avero, yo avero so abyāpajjo."}},{"id":"vb13:26","sourceIds":["vb13:26.1"],"kind":"text","text":{"pi":"“Pharitvā”ti pharitvā adhimuccitvā."}},{"id":"vb13:27","sourceIds":["vb13:27.1","vb13:27.2"],"kind":"text","text":{"pi":"“Viharatī”ti …pe…\ntena vuccati “viharatī”ti."}},{"id":"vb13:28","sourceIds":["vb13:28.0","vb13:28.1","vb13:28.2","vb13:28.3"],"kind":"text","text":{"pi":"1.3. Muditā\nKathañca bhikkhu muditāsahagatena cetasā ekaṁ disaṁ pharitvā viharati?\nSeyyathāpi nāma ekaṁ puggalaṁ piyaṁ manāpaṁ disvā mudito assa;\nevameva sabbe satte muditāya pharati."}},{"id":"vb13:29","sourceIds":["vb13:29.1","vb13:29.2","vb13:29.3"],"kind":"text","text":{"pi":"Tattha katamā muditā?\nYā sattesu muditā muditāyanā muditāyitattaṁ muditācetovimutti—\nayaṁ vuccati “muditā”."}},{"id":"vb13:30","sourceIds":["vb13:30.1","vb13:30.2","vb13:30.3","vb13:30.4","vb13:30.5"],"kind":"text","text":{"pi":"Tattha katamaṁ cittaṁ?\nYaṁ cittaṁ mano mānasaṁ …pe… tajjāmanoviññāṇadhātu—\nidaṁ vuccati “cittaṁ”.\nIdaṁ cittaṁ imāya muditāya sahagataṁ hoti sahajātaṁ saṁsaṭṭhaṁ sampayuttaṁ.\nTena vuccati “muditāsahagatena cetasā”ti."}},{"id":"vb13:31","sourceIds":["vb13:31.1"],"kind":"text","text":{"pi":"“Ekaṁ disan”ti puratthimaṁ vā disaṁ pacchimaṁ vā disaṁ uttaraṁ vā disaṁ dakkhiṇaṁ vā disaṁ uddhaṁ vā adho vā tiriyaṁ vā vidisaṁ vā."}},{"id":"vb13:32","sourceIds":["vb13:32.1"],"kind":"text","text":{"pi":"“Pharitvā”ti pharitvā adhimuccitvā."}},{"id":"vb13:33","sourceIds":["vb13:33.1","vb13:33.2"],"kind":"text","text":{"pi":"“Viharatī”ti …pe…\ntena vuccati “viharatī”ti."}},{"id":"vb13:34","sourceIds":["vb13:34.1"],"kind":"text","text":{"pi":"“Tathā dutiyan”ti yatheva ekaṁ disaṁ tathā dutiyaṁ disaṁ tathā tatiyaṁ disaṁ tathā catutthaṁ disaṁ tathā uddhaṁ tathā adho tathā tiriyaṁ tathā vidisaṁ."}},{"id":"vb13:35","sourceIds":["vb13:35.1","vb13:35.2","vb13:35.3"],"kind":"text","text":{"pi":"“Sabbadhi sabbattatāya sabbāvantaṁ lokan”ti sabbena sabbaṁ sabbathā sabbaṁ asesaṁ nissesaṁ.\nPariyādāyavacanametaṁ—\n“sabbadhi sabbattatāya sabbāvantaṁ lokan”ti."}},{"id":"vb13:36","sourceIds":["vb13:36.1","vb13:36.2","vb13:36.3"],"kind":"text","text":{"pi":"“Muditāsahagatena cetasā”ti tattha katamā muditā?\nYā sattesu muditā muditāyanā muditāyitattaṁ muditācetovimutti—\nayaṁ vuccati “muditā”."}},{"id":"vb13:37","sourceIds":["vb13:37.1","vb13:37.2","vb13:37.3","vb13:37.4","vb13:37.5"],"kind":"text","text":{"pi":"Tattha katamaṁ cittaṁ?\nYaṁ cittaṁ mano mānasaṁ …pe… tajjāmanoviññāṇadhātu—\nidaṁ vuccati “cittaṁ”.\nIdaṁ cittaṁ imāya muditāya sahagataṁ hoti sahajātaṁ saṁsaṭṭhaṁ sampayuttaṁ.\nTena vuccati “muditāsahagatena cetasā”ti."}},{"id":"vb13:38","sourceIds":["vb13:38.1"],"kind":"text","text":{"pi":"“Vipulenā”ti yaṁ vipulaṁ taṁ mahaggataṁ, yaṁ mahaggataṁ taṁ appamāṇaṁ, yaṁ appamāṇaṁ so avero, yo avero so abyāpajjo."}},{"id":"vb13:39","sourceIds":["vb13:39.1"],"kind":"text","text":{"pi":"“Pharitvā”ti pharitvā adhimuccitvā."}},{"id":"vb13:40","sourceIds":["vb13:40.1","vb13:40.2"],"kind":"text","text":{"pi":"“Viharatī”ti …pe…\ntena vuccati “viharatī”ti."}},{"id":"vb13:41","sourceIds":["vb13:41.0","vb13:41.1","vb13:41.2","vb13:41.3"],"kind":"text","text":{"pi":"1.4. Upekkhā\nKathañca bhikkhu upekkhāsahagatena cetasā ekaṁ disaṁ pharitvā viharati?\nSeyyathāpi nāma ekaṁ puggalaṁ neva manāpaṁ na amanāpaṁ disvā upekkhako assa;\nevameva sabbe satte upekkhāya pharati."}},{"id":"vb13:42","sourceIds":["vb13:42.1","vb13:42.2","vb13:42.3"],"kind":"text","text":{"pi":"Tattha katamā upekkhā?\nYā sattesu upekkhā upekkhāyanā upekkhāyitattaṁ upekkhācetovimutti—\nayaṁ vuccati “upekkhā”."}},{"id":"vb13:43","sourceIds":["vb13:43.1","vb13:43.2","vb13:43.3","vb13:43.4","vb13:43.5"],"kind":"text","text":{"pi":"Tattha katamaṁ cittaṁ?\nYaṁ cittaṁ mano mānasaṁ …pe… tajjāmanoviññāṇadhātu—\nidaṁ vuccati “cittaṁ”.\nIdaṁ cittaṁ imāya upekkhāya sahagataṁ hoti sahajātaṁ saṁsaṭṭhaṁ sampayuttaṁ.\nTena vuccati “upekkhāsahagatena cetasā”ti."}},{"id":"vb13:44","sourceIds":["vb13:44.1"],"kind":"text","text":{"pi":"“Ekaṁ disan”ti puratthimaṁ vā disaṁ pacchimaṁ vā disaṁ uttaraṁ vā disaṁ dakkhiṇaṁ vā disaṁ uddhaṁ vā adho vā tiriyaṁ vā vidisaṁ vā."}},{"id":"vb13:45","sourceIds":["vb13:45.1"],"kind":"text","text":{"pi":"“Pharitvā”ti pharitvā adhimuccitvā."}},{"id":"vb13:46","sourceIds":["vb13:46.1","vb13:46.2"],"kind":"text","text":{"pi":"“Viharatī”ti …pe…\ntena vuccati “viharatī”ti."}},{"id":"vb13:47","sourceIds":["vb13:47.1"],"kind":"text","text":{"pi":"“Tathā dutiyan”ti yatheva ekaṁ disaṁ tathā dutiyaṁ disaṁ tathā tatiyaṁ disaṁ tathā catutthaṁ disaṁ tathā uddhaṁ tathā adho tathā tiriyaṁ tathā vidisaṁ."}},{"id":"vb13:48","sourceIds":["vb13:48.1","vb13:48.2","vb13:48.3"],"kind":"text","text":{"pi":"“Sabbadhi sabbattatāya sabbāvantaṁ lokan”ti sabbena sabbaṁ sabbathā sabbaṁ asesaṁ nissesaṁ.\nPariyādāyavacanametaṁ—\n“sabbadhi sabbattatāya sabbāvantaṁ lokan”ti."}},{"id":"vb13:49","sourceIds":["vb13:49.1","vb13:49.2","vb13:49.3"],"kind":"text","text":{"pi":"“Upekkhāsahagatena cetasā”ti, tattha katamā upekkhā?\nYā sattesu upekkhā upekkhāyanā upekkhāyitattaṁ upekkhācetovimutti—\nayaṁ vuccati “upekkhā”."}},{"id":"vb13:50","sourceIds":["vb13:50.1","vb13:50.2","vb13:50.3","vb13:50.4","vb13:50.5"],"kind":"text","text":{"pi":"Tattha katamaṁ cittaṁ?\nYaṁ cittaṁ mano mānasaṁ …pe… tajjāmanoviññāṇadhātu—\nidaṁ vuccati “cittaṁ”.\nIdaṁ cittaṁ imāya upekkhāya sahagataṁ hoti sahajātaṁ saṁsaṭṭhaṁ sampayuttaṁ.\nTena vuccati “upekkhāsahagatena cetasā”ti."}},{"id":"vb13:51","sourceIds":["vb13:51.1"],"kind":"text","text":{"pi":"“Vipulenā”ti yaṁ vipulaṁ taṁ mahaggataṁ, yaṁ mahaggataṁ taṁ appamāṇaṁ, yaṁ appamāṇaṁ so avero, yo avero so abyāpajjo."}},{"id":"vb13:52","sourceIds":["vb13:52.1"],"kind":"text","text":{"pi":"“Pharitvā”ti pharitvā adhimuccitvā."}},{"id":"vb13:53","sourceIds":["vb13:53.1","vb13:53.2"],"kind":"text","text":{"pi":"“Viharatī”ti …pe…\ntena vuccati “viharatī”ti."}},{"id":"vb13:54","sourceIds":["vb13:54.1"],"kind":"text","text":{"pi":"Suttantabhājanīyaṁ."}},{"id":"vb13:55.0","sourceIds":["vb13:55.0.1","vb13:55.0.2"],"kind":"text","text":{"pi":"2. Abhidhammabhājanīya\n2.1. Kusala"}},{"id":"vb13:55","sourceIds":["vb13:55.1","vb13:55.2"],"kind":"text","text":{"pi":"Catasso appamaññāyo—\nmettā, karuṇā, muditā, upekkhā."}},{"id":"vb13:56","sourceIds":["vb13:56.1","vb13:56.2","vb13:56.3","vb13:56.4"],"kind":"text","text":{"pi":"Tattha katamā mettā?\nIdha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:57","sourceIds":["vb13:57.1","vb13:57.2","vb13:57.3","vb13:57.4"],"kind":"text","text":{"pi":"Tattha katamā mettā?\nIdha bhikkhu yasmiṁ samaye rūpūpapattiyā maggaṁ bhāveti vitakkavicārānaṁ vūpasamā …pe… dutiyaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:58","sourceIds":["vb13:58.1","vb13:58.2","vb13:58.3","vb13:58.4","vb13:58.5"],"kind":"text","text":{"pi":"Tattha katamā mettā?\nIdha bhikkhu yasmiṁ samaye rūpūpapattiyā maggaṁ bhāveti pītiyā ca virāgā …pe…\ntatiyaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:59","sourceIds":["vb13:59.1","vb13:59.2","vb13:59.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:60","sourceIds":["vb13:60.1","vb13:60.2","vb13:60.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti vivicceva kāmehi vivicca akusalehi dhammehi avitakkaṁ vicāramattaṁ vivekajaṁ pītisukhaṁ dutiyaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:61","sourceIds":["vb13:61.1","vb13:61.2","vb13:61.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti vitakkavicārānaṁ vūpasamā …pe… tatiyaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:62","sourceIds":["vb13:62.1","vb13:62.2","vb13:62.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti pītiyā ca virāgā …pe… catutthaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:63","sourceIds":["vb13:63.1","vb13:63.2","vb13:63.3","vb13:63.4"],"kind":"text","text":{"pi":"Tattha katamā karuṇā?\nIdha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati karuṇāsahagataṁ, yā tasmiṁ samaye karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”.\nAvasesā dhammā karuṇāya sampayuttā."}},{"id":"vb13:64","sourceIds":["vb13:64.1","vb13:64.2","vb13:64.3","vb13:64.4","vb13:64.5"],"kind":"text","text":{"pi":"Tattha katamā karuṇā?\nIdha bhikkhu yasmiṁ samaye rūpūpapattiyā maggaṁ bhāveti pītiyā ca virāgā …pe…\ndutiyaṁ jhānaṁ upasampajja viharati karuṇāsahagataṁ, yā tasmiṁ samaye karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”.\nAvasesā dhammā karuṇāya sampayuttā."}},{"id":"vb13:65","sourceIds":["vb13:65.1","vb13:65.2","vb13:65.3","vb13:65.4","vb13:65.5"],"kind":"text","text":{"pi":"Tattha katamā karuṇā?\nIdha bhikkhu yasmiṁ samaye rūpūpapattiyā maggaṁ bhāveti pītiyā ca virāgā …pe…\ntatiyaṁ jhānaṁ upasampajja viharati karuṇāsahagataṁ, yā tasmiṁ samaye karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”.\nAvasesā dhammā karuṇāya sampayuttā."}},{"id":"vb13:66","sourceIds":["vb13:66.1","vb13:66.2","vb13:66.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati karuṇāsahagataṁ, yā tasmiṁ samaye karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”.\nAvasesā dhammā karuṇāya sampayuttā."}},{"id":"vb13:67","sourceIds":["vb13:67.1","vb13:67.2","vb13:67.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti vivicceva kāmehi vivicca akusalehi dhammehi avitakkaṁ vicāramattaṁ vivekajaṁ pītisukhaṁ dutiyaṁ jhānaṁ upasampajja viharati karuṇāsahagataṁ, yā tasmiṁ samaye karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”.\nAvasesā dhammā karuṇāya sampayuttā."}},{"id":"vb13:68","sourceIds":["vb13:68.1","vb13:68.2","vb13:68.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti vitakkavicārānaṁ vūpasamā …pe… tatiyaṁ jhānaṁ upasampajja viharati karuṇāsahagataṁ, yā tasmiṁ samaye karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”.\nAvasesā dhammā karuṇāya sampayuttā."}},{"id":"vb13:69","sourceIds":["vb13:69.1","vb13:69.2","vb13:69.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti pītiyā ca virāgā …pe… catutthaṁ jhānaṁ upasampajja viharati karuṇāsahagataṁ, yā tasmiṁ samaye karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”.\nAvasesā dhammā karuṇāya sampayuttā."}},{"id":"vb13:70","sourceIds":["vb13:70.1","vb13:70.2","vb13:70.3","vb13:70.4"],"kind":"text","text":{"pi":"Tattha katamā muditā?\nIdha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati muditāsahagataṁ, yā tasmiṁ samaye muditā muditāyanā muditāyitattaṁ muditācetovimutti—\nayaṁ vuccati “muditā”.\nAvasesā dhammā muditāya sampayuttā."}},{"id":"vb13:71","sourceIds":["vb13:71.1","vb13:71.2","vb13:71.3","vb13:71.4"],"kind":"text","text":{"pi":"Tattha katamā muditā?\nIdha bhikkhu yasmiṁ samaye rūpūpapattiyā maggaṁ bhāveti vitakkavicārānaṁ vūpasamā …pe… dutiyaṁ jhānaṁ upasampajja viharati muditāsahagataṁ, yā tasmiṁ samaye muditā muditāyanā muditāyitattaṁ muditācetovimutti—\nayaṁ vuccati “muditā”.\nAvasesā dhammā muditāya sampayuttā."}},{"id":"vb13:72","sourceIds":["vb13:72.1","vb13:72.2","vb13:72.3","vb13:72.4","vb13:72.5"],"kind":"text","text":{"pi":"Tattha katamā muditā?\nIdha bhikkhu yasmiṁ samaye rūpūpapattiyā maggaṁ bhāveti pītiyā ca virāgā …pe…\ntatiyaṁ jhānaṁ upasampajja viharati muditāsahagataṁ, yā tasmiṁ samaye muditā muditāyanā muditāyitattaṁ muditācetovimutti—\nayaṁ vuccati “muditā”.\nAvasesā dhammā muditāya sampayuttā."}},{"id":"vb13:73","sourceIds":["vb13:73.1","vb13:73.2","vb13:73.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati muditāsahagataṁ, yā tasmiṁ samaye muditā muditāyanā muditāyitattaṁ muditācetovimutti—\nayaṁ vuccati “muditā”.\nAvasesā dhammā muditāya sampayuttā."}},{"id":"vb13:74","sourceIds":["vb13:74.1","vb13:74.2","vb13:74.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti vivicceva kāmehi vivicca akusalehi dhammehi avitakkaṁ vicāramattaṁ vivekajaṁ pītisukhaṁ dutiyaṁ jhānaṁ upasampajja viharati muditāsahagataṁ, yā tasmiṁ samaye muditā muditāyanā muditāyitattaṁ muditācetovimutti—\nayaṁ vuccati “muditā”.\nAvasesā dhammā muditāya sampayuttā."}},{"id":"vb13:75","sourceIds":["vb13:75.1","vb13:75.2","vb13:75.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti vitakkavicārānaṁ vūpasamā …pe… tatiyaṁ jhānaṁ upasampajja viharati muditāsahagataṁ, yā tasmiṁ samaye muditā muditāyanā muditāyitattaṁ muditācetovimutti—\nayaṁ vuccati “muditā”.\nAvasesā dhammā muditāya sampayuttā."}},{"id":"vb13:76","sourceIds":["vb13:76.1","vb13:76.2","vb13:76.3"],"kind":"text","text":{"pi":"Idha bhikkhu yasmiṁ samaye rūpūpapattiyā maggaṁ bhāveti pītiyā ca virāgā …pe… catutthaṁ jhānaṁ upasampajja viharati muditāsahagataṁ, yā tasmiṁ samaye muditā muditāyanā muditāyitattaṁ muditācetovimutti—\nayaṁ vuccati “muditā”.\nAvasesā dhammā muditāya sampayuttā."}},{"id":"vb13:77","sourceIds":["vb13:77.1","vb13:77.2","vb13:77.3","vb13:77.4"],"kind":"text","text":{"pi":"Tattha katamā upekkhā?\nIdha bhikkhu yasmiṁ samaye rūpūpapattiyā maggaṁ bhāveti sukhassa ca pahānā …pe… catutthaṁ jhānaṁ upasampajja viharati upekkhāsahagataṁ, yā tasmiṁ samaye upekkhā upekkhāyanā upekkhāyitattaṁ upekkhācetovimutti—\nayaṁ vuccati “upekkhā”.\nAvasesā dhammā upekkhāya sampayuttā."}},{"id":"vb13:78","sourceIds":["vb13:78.0","vb13:78.1","vb13:78.2"],"kind":"text","text":{"pi":"2.2. Vipāka\nCatasso appamaññāyo—\nmettā, karuṇā, muditā, upekkhā."}},{"id":"vb13:79","sourceIds":["vb13:79.1","vb13:79.2","vb13:79.3","vb13:79.4","vb13:79.5","vb13:79.6"],"kind":"text","text":{"pi":"Tattha katamā mettā?\nIdha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati mettāsahagataṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva rūpāvacarassa kusalassa kammassa katattā upacitattā vipākaṁ vivicceva kāmehi …pe… paṭhamaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:80","sourceIds":["vb13:80.1","vb13:80.2","vb13:80.3","vb13:80.4","vb13:80.5","vb13:80.6","vb13:80.7","vb13:80.8","vb13:80.9","vb13:80.10","vb13:80.11"],"kind":"text","text":{"pi":"Tattha katamā mettā?\nIdha bhikkhu yasmiṁ samaye rūpūpapattiyā maggaṁ bhāveti vitakkavicārānaṁ vūpasamā …pe… dutiyaṁ jhānaṁ upasampajja viharati mettāsahagataṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva rūpāvacarassa kusalassa kammassa katattā upacitattā vipākaṁ vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\npaṭhamaṁ jhānaṁ …pe…\ndutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:81","sourceIds":["vb13:81.1","vb13:81.2","vb13:81.3","vb13:81.4","vb13:81.5","vb13:81.6"],"kind":"text","text":{"pi":"Tattha katamā karuṇā?\nIdha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati karuṇāsahagataṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva rūpāvacarassa kusalassa kammassa katattā upacitattā vipākaṁ vivicceva kāmehi …pe… paṭhamaṁ jhānaṁ upasampajja viharati karuṇāsahagataṁ, yā tasmiṁ samaye karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”.\nAvasesā dhammā karuṇāya sampayuttā."}},{"id":"vb13:82","sourceIds":["vb13:82.1","vb13:82.2","vb13:82.3","vb13:82.4","vb13:82.5","vb13:82.6","vb13:82.7","vb13:82.8","vb13:82.9","vb13:82.10","vb13:82.11"],"kind":"text","text":{"pi":"Tattha katamā karuṇā?\nIdha bhikkhu yasmiṁ samaye rūpūpapattiyā maggaṁ bhāveti vitakkavicārānaṁ vūpasamā …pe… dutiyaṁ jhānaṁ upasampajja viharati karuṇāsahagataṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva rūpāvacarassa kusalassa kammassa katattā upacitattā vipākaṁ vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\npaṭhamaṁ jhānaṁ …pe…\ndutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ upasampajja viharati karuṇāsahagataṁ, yā tasmiṁ samaye karuṇā karuṇāyanā karuṇāyitattaṁ karuṇācetovimutti—\nayaṁ vuccati “karuṇā”.\nAvasesā dhammā karuṇāya sampayuttā."}},{"id":"vb13:83","sourceIds":["vb13:83.1","vb13:83.2","vb13:83.3","vb13:83.4","vb13:83.5","vb13:83.6"],"kind":"text","text":{"pi":"Tattha katamā muditā?\nIdha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati muditāsahagataṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva rūpāvacarassa kusalassa kammassa katattā upacitattā vipākaṁ vivicceva kāmehi …pe… paṭhamaṁ jhānaṁ upasampajja viharati muditāsahagataṁ, yā tasmiṁ samaye muditā muditāyanā muditāyitattaṁ muditācetovimutti—\nayaṁ vuccati “muditā”.\nAvasesā dhammā muditāya sampayuttā."}},{"id":"vb13:84","sourceIds":["vb13:84.1","vb13:84.2","vb13:84.3","vb13:84.4","vb13:84.5","vb13:84.6","vb13:84.7","vb13:84.8","vb13:84.9","vb13:84.10","vb13:84.11"],"kind":"text","text":{"pi":"Tattha katamā muditā?\nIdha bhikkhu yasmiṁ samaye rūpūpapattiyā maggaṁ bhāveti vitakkavicārānaṁ vūpasamā …pe… dutiyaṁ jhānaṁ upasampajja viharati muditāsahagataṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva rūpāvacarassa kusalassa kammassa katattā upacitattā vipākaṁ vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\npaṭhamaṁ jhānaṁ …pe…\ndutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ upasampajja viharati muditāsahagataṁ, yā tasmiṁ samaye muditā muditāyanā muditāyitattaṁ muditācetovimutti—\nayaṁ vuccati “muditā”.\nAvasesā dhammā muditāya sampayuttā."}},{"id":"vb13:85","sourceIds":["vb13:85.1","vb13:85.2","vb13:85.3","vb13:85.4","vb13:85.5","vb13:85.6"],"kind":"text","text":{"pi":"Tattha katamā upekkhā?\nIdha bhikkhu yasmiṁ samaye rūpūpapattiyā maggaṁ bhāveti sukhassa ca pahānā …pe… catutthaṁ jhānaṁ upasampajja viharati upekkhāsahagataṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva rūpāvacarassa kusalassa kammassa katattā upacitattā vipākaṁ sukhassa ca pahānā dukkhassa ca pahānā …pe… catutthaṁ jhānaṁ upasampajja viharati upekkhāsahagataṁ, yā tasmiṁ samaye upekkhā upekkhāyanā upekkhāyitattaṁ upekkhācetovimutti—\nayaṁ vuccati “upekkhā”.\nAvasesā dhammā upekkhāya sampayuttā."}},{"id":"vb13:86","sourceIds":["vb13:86.0","vb13:86.1","vb13:86.2"],"kind":"text","text":{"pi":"2.3. Kiriyā\nCatasso appamaññāyo—\nmettā, karuṇā, muditā, upekkhā."}},{"id":"vb13:87","sourceIds":["vb13:87.1","vb13:87.2","vb13:87.3","vb13:87.4"],"kind":"text","text":{"pi":"Tattha katamā mettā?\nIdha bhikkhu yasmiṁ samaye rūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ vivicceva kāmehi …pe… paṭhamaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:88","sourceIds":["vb13:88.1","vb13:88.2","vb13:88.3","vb13:88.4","vb13:88.5","vb13:88.6","vb13:88.7","vb13:88.8","vb13:88.9"],"kind":"text","text":{"pi":"Tattha katamā mettā?\nIdha bhikkhu yasmiṁ samaye rūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\npaṭhamaṁ jhānaṁ …pe…\ndutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti—\nayaṁ vuccati “mettā”.\nAvasesā dhammā mettāya sampayuttā."}},{"id":"vb13:89","sourceIds":["vb13:89.1","vb13:89.2","vb13:89.3","vb13:89.4","vb13:89.5","vb13:89.6"],"kind":"text","text":{"pi":"Tattha katamā karuṇā …pe…\ntattha katamā muditā …pe…\ntattha katamā upekkhā?\nIdha bhikkhu yasmiṁ samaye rūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ sukhassa ca pahānā dukkhassa ca pahānā …pe… catutthaṁ jhānaṁ upasampajja viharati upekkhāsahagataṁ, yā tasmiṁ samaye upekkhā upekkhāyanā upekkhāyitattaṁ upekkhācetovimutti—\nayaṁ vuccati “upekkhā”.\nAvasesā dhammā upekkhāya sampayuttā."}},{"id":"vb13:90","sourceIds":["vb13:90.1"],"kind":"text","text":{"pi":"Abhidhammabhājanīyaṁ."}},{"id":"vb13:91","sourceIds":["vb13:91.0","vb13:91.1"],"kind":"text","text":{"pi":"3. Pañhāpucchaka\nCatasso appamaññāyo—"}},{"id":"vb13:92","sourceIds":["vb13:92.1"],"kind":"text","text":{"pi":"Idha bhikkhu mettāsahagatena cetasā ekaṁ disaṁ pharitvā viharati tathā dutiyaṁ tathā tatiyaṁ tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati."}},{"id":"vb13:93","sourceIds":["vb13:93.1"],"kind":"text","text":{"pi":"Karuṇāsahagatena cetasā ekaṁ disaṁ pharitvā viharati tathā dutiyaṁ tathā tatiyaṁ tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ karuṇāsahagatena cetasā vipulena mahaggatena appamāṇena averena abyāpajjena pharitvā viharati."}},{"id":"vb13:94","sourceIds":["vb13:94.1"],"kind":"text","text":{"pi":"Muditāsahagatena cetasā ekaṁ disaṁ pharitvā viharati tathā dutiyaṁ tathā tatiyaṁ tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ muditāsahagatena cetasā vipulena mahaggatena appamāṇena averena abyāpajjena pharitvā viharati."}},{"id":"vb13:95","sourceIds":["vb13:95.1"],"kind":"text","text":{"pi":"Upekkhāsahagatena cetasā ekaṁ disaṁ pharitvā viharati tathā dutiyaṁ tathā tatiyaṁ tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati."}},{"id":"vb13:96","sourceIds":["vb13:96.1"],"kind":"text","text":{"pi":"Catunnaṁ appamaññānaṁ kati kusalā, kati akusalā, kati abyākatā …pe… kati saraṇā, kati araṇā?"}},{"id":"vb13:97","sourceIds":["vb13:97.0","vb13:97.1"],"kind":"text","text":{"pi":"3.1. Tika\nSiyā kusalā, siyā abyākatā."}},{"id":"vb13:98","sourceIds":["vb13:98.1"],"kind":"text","text":{"pi":"Tisso appamaññāyo sukhāya vedanāya sampayuttā, upekkhā adukkhamasukhāya vedanāya sampayuttā."}},{"id":"vb13:99","sourceIds":["vb13:99.1"],"kind":"text","text":{"pi":"Siyā vipākā, siyā vipākadhammadhammā, siyā nevavipākanavipākadhammadhammā."}},{"id":"vb13:100","sourceIds":["vb13:100.1"],"kind":"text","text":{"pi":"Siyā upādinnupādāniyā, siyā anupādinnupādāniyā."}},{"id":"vb13:101","sourceIds":["vb13:101.1"],"kind":"text","text":{"pi":"Asaṅkiliṭṭhasaṅkilesikā."}},{"id":"vb13:102","sourceIds":["vb13:102.1","vb13:102.2"],"kind":"text","text":{"pi":"Tisso appamaññāyo siyā savitakkasavicārā, siyā avitakkavicāramattā, siyā avitakkaavicārā;\nupekkhā avitakkaavicārā."}},{"id":"vb13:103","sourceIds":["vb13:103.1","vb13:103.2"],"kind":"text","text":{"pi":"Tisso appamaññāyo siyā pītisahagatā, siyā sukhasahagatā, na upekkhāsahagatā, siyā na vattabbā pītisahagatāti;\nupekkhā upekkhāsahagatā."}},{"id":"vb13:104","sourceIds":["vb13:104.1"],"kind":"text","text":{"pi":"Neva dassanena na bhāvanāya pahātabbā."}},{"id":"vb13:105","sourceIds":["vb13:105.1"],"kind":"text","text":{"pi":"Neva dassanena na bhāvanāya pahātabbahetukā."}},{"id":"vb13:106","sourceIds":["vb13:106.1"],"kind":"text","text":{"pi":"Siyā ācayagāmino, siyā nevācayagāmināpacayagāmino."}},{"id":"vb13:107","sourceIds":["vb13:107.1"],"kind":"text","text":{"pi":"Nevasekkhanāsekkhā."}},{"id":"vb13:108","sourceIds":["vb13:108.1"],"kind":"text","text":{"pi":"Mahaggatā."}},{"id":"vb13:109","sourceIds":["vb13:109.1"],"kind":"text","text":{"pi":"Na vattabbā “parittārammaṇā”tipi, “mahaggatārammaṇā”tipi, “appamāṇārammaṇā”tipi."}},{"id":"vb13:110","sourceIds":["vb13:110.1"],"kind":"text","text":{"pi":"Majjhimā."}},{"id":"vb13:111","sourceIds":["vb13:111.1"],"kind":"text","text":{"pi":"Aniyatā."}},{"id":"vb13:112","sourceIds":["vb13:112.1"],"kind":"text","text":{"pi":"Na vattabbā “maggārammaṇā”tipi, “maggahetukā”tipi, “maggādhipatino”tipi."}},{"id":"vb13:113","sourceIds":["vb13:113.1"],"kind":"text","text":{"pi":"Siyā uppannā, siyā anuppannā, siyā uppādino."}},{"id":"vb13:114","sourceIds":["vb13:114.1"],"kind":"text","text":{"pi":"Siyā atītā, siyā anāgatā, siyā paccuppannā."}},{"id":"vb13:115","sourceIds":["vb13:115.1"],"kind":"text","text":{"pi":"Na vattabbā “atītārammaṇā”tipi, “anāgatārammaṇā”tipi, “paccuppannārammaṇā”tipi."}},{"id":"vb13:116","sourceIds":["vb13:116.1"],"kind":"text","text":{"pi":"Siyā ajjhattā, siyā bahiddhā, siyā ajjhattabahiddhā."}},{"id":"vb13:117","sourceIds":["vb13:117.1"],"kind":"text","text":{"pi":"Bahiddhārammaṇā."}},{"id":"vb13:118","sourceIds":["vb13:118.1"],"kind":"text","text":{"pi":"Anidassanaappaṭighā."}},{"id":"vb13:119.0","sourceIds":["vb13:119.0.1","vb13:119.0.2"],"kind":"text","text":{"pi":"3.2. 3.2 Duka\n3.2.1. Hetugocchaka"}},{"id":"vb13:119","sourceIds":["vb13:119.1","vb13:119.2","vb13:119.3","vb13:119.4","vb13:119.5","vb13:119.6","vb13:119.7"],"kind":"text","text":{"pi":"Mettā hetu, tisso appamaññāyo na hetū, sahetukā, hetusampayuttā.\nMettā hetu ceva sahetukā ca;\ntisso appamaññāyo na vattabbā “hetū ceva sahetukā cā”ti, sahetukā ceva na ca hetū.\nMettā hetu ceva hetusampayuttā ca;\ntisso appamaññāyo na vattabbā “hetū ceva hetusampayuttā cā”ti, hetusampayuttā ceva na ca hetū.\nTisso appamaññāyo na hetū sahetukā;\nmettā na vattabbā “na hetu sahetukā”tipi, “na hetu ahetukā”tipi."}},{"id":"vb13:120","sourceIds":["vb13:120.0","vb13:120.1"],"kind":"text","text":{"pi":"3.2.2. Cūḷantaraduka\nSappaccayā, saṅkhatā, anidassanā, appaṭighā, arūpā, lokiyā, kenaci viññeyyā, kenaci na viññeyyā."}},{"id":"vb13:121","sourceIds":["vb13:121.0","vb13:121.1","vb13:121.2"],"kind":"text","text":{"pi":"3.2.3. Āsavagocchaka\nNo āsavā, sāsavā, āsavavippayuttā, na vattabbā “āsavā ceva sāsavā cā”ti, sāsavā ceva no ca āsavā, na vattabbā āsavā ceva “āsavasampayuttā cā”tipi, “āsavasampayuttā ceva no ca āsavā”tipi.\nĀsavavippayuttā sāsavā."}},{"id":"vb13:122","sourceIds":["vb13:122.0","vb13:122.1","vb13:122.2","vb13:122.3","vb13:122.4","vb13:122.5","vb13:122.6"],"kind":"text","text":{"pi":"13.3.2.4. Saṁyojanagocchakādi\nNo saṁyojanā …pe…\nno ganthā …pe…\nno oghā …pe…\nno yogā …pe…\nno nīvaraṇā …pe…\nno parāmāsā …pe…."}},{"id":"vb13:123","sourceIds":["vb13:123.0","vb13:123.1"],"kind":"text","text":{"pi":"3.2.10. Mahantaraduka\nSārammaṇā, no cittā, cetasikā, cittasampayuttā, cittasaṁsaṭṭhā, cittasamuṭṭhānā, cittasahabhuno, cittānuparivattino, cittasaṁsaṭṭhasamuṭṭhānā, cittasaṁsaṭṭhasamuṭṭhānasahabhuno, cittasaṁsaṭṭhasamuṭṭhānānuparivattino, bāhirā, no upādā, siyā upādinnā, siyā anupādinnā."}},{"id":"vb13:124","sourceIds":["vb13:124.0","vb13:124.1","vb13:124.2","vb13:124.3","vb13:124.4","vb13:124.5","vb13:124.6","vb13:124.7","vb13:124.8","vb13:124.9","vb13:124.10","vb13:124.11","vb13:124.12","vb13:124.13"],"kind":"text","text":{"pi":"13.3.2.11. Upādānagocchakādi\nNo upādānā …pe…\nno kilesā …pe…\nna dassanena pahātabbā, na bhāvanāya pahātabbā, na dassanena pahātabbahetukā, na bhāvanāya pahātabbahetukā.\nTisso appamaññāyo siyā savitakkā, siyā avitakkā;\nupekkhā avitakkā.\nTisso appamaññāyo siyā savicārā, siyā avicārā;\nupekkhā avicārā.\nTisso appamaññāyo siyā sappītikā, siyā appītikā;\nupekkhā appītikā.\nTisso appamaññāyo siyā pītisahagatā, siyā na pītisahagatā;\nupekkhā na pītisahagatā.\nTisso appamaññāyo sukhasahagatā, upekkhā na sukhasahagatā.\nUpekkhā upekkhāsahagatā, tisso appamaññāyo na upekkhāsahagatā, na kāmāvacarā, rūpāvacarā, na arūpāvacarā, pariyāpannā, aniyyānikā, aniyatā, sauttarā, araṇāti."}},{"id":"vb13:125","sourceIds":["vb13:125.1"],"kind":"text","text":{"pi":"Pañhāpucchakaṁ."}},{"id":"vb13:126","sourceIds":["vb13:126.1"],"kind":"text","text":{"pi":"Appamaññāvibhaṅgo niṭṭhito."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/vb13/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}