{"id":"vb2","title":"Āyatanavibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"vb2","title":"Āyatanavibhaṅga","units":[{"id":"vb2:0","sourceIds":["vb2:0.1","vb2:0.2"],"kind":"text","text":{"pi":"Vibhaṅga\nĀyatanavibhaṅga"}},{"id":"vb2:1","sourceIds":["vb2:1.0","vb2:1.1","vb2:1.2"],"kind":"text","text":{"pi":"1. Suttantabhājanīya\nDvādasāyatanāni—\ncakkhāyatanaṁ, rūpāyatanaṁ, sotāyatanaṁ, saddāyatanaṁ, ghānāyatanaṁ, gandhāyatanaṁ, jivhāyatanaṁ, rasāyatanaṁ, kāyāyatanaṁ, phoṭṭhabbāyatanaṁ, manāyatanaṁ, dhammāyatanaṁ."}},{"id":"vb2:2","sourceIds":["vb2:2.1","vb2:2.2","vb2:2.3","vb2:2.4","vb2:2.5","vb2:2.6","vb2:2.7","vb2:2.8","vb2:2.9","vb2:2.10","vb2:2.11","vb2:2.12"],"kind":"text","text":{"pi":"Cakkhuṁ aniccaṁ dukkhaṁ anattā vipariṇāmadhammaṁ.\nRūpā aniccā dukkhā anattā vipariṇāmadhammā.\nSotaṁ aniccaṁ dukkhaṁ anattā vipariṇāmadhammaṁ.\nSaddā aniccā dukkhā anattā vipariṇāmadhammā.\nGhānaṁ aniccaṁ dukkhaṁ anattā vipariṇāmadhammaṁ.\nGandhā aniccā dukkhā anattā vipariṇāmadhammā.\nJivhā aniccā dukkhā anattā vipariṇāmadhammā.\nRasā aniccā dukkhā anattā vipariṇāmadhammā.\nKāyo anicco dukkho anattā vipariṇāmadhammo.\nPhoṭṭhabbā aniccā dukkhā anattā vipariṇāmadhammā.\nMano anicco dukkho anattā vipariṇāmadhammo.\nDhammā aniccā dukkhā anattā vipariṇāmadhammā."}},{"id":"vb2:3","sourceIds":["vb2:3.1"],"kind":"text","text":{"pi":"Suttantabhājanīyaṁ."}},{"id":"vb2:4","sourceIds":["vb2:4.0","vb2:4.1","vb2:4.2"],"kind":"text","text":{"pi":"2. Abhidhammabhājanīya\nDvādasāyatanāni—\ncakkhāyatanaṁ, sotāyatanaṁ, ghānāyatanaṁ, jivhāyatanaṁ, kāyāyatanaṁ, manāyatanaṁ, rūpāyatanaṁ, saddāyatanaṁ, gandhāyatanaṁ, rasāyatanaṁ, phoṭṭhabbāyatanaṁ, dhammāyatanaṁ."}},{"id":"vb2:5","sourceIds":["vb2:5.1","vb2:5.2","vb2:5.3"],"kind":"text","text":{"pi":"Tattha katamaṁ cakkhāyatanaṁ?\nYaṁ cakkhu catunnaṁ mahābhūtānaṁ upādāya pasādo attabhāvapariyāpanno anidassano sappaṭigho, yena cakkhunā anidassanena sappaṭighena rūpaṁ sanidassanaṁ sappaṭighaṁ passi vā passati vā passissati vā passe vā, cakkhumpetaṁ cakkhāyatanampetaṁ cakkhudhātupesā cakkhundriyampetaṁ lokopeso dvārāpesā samuddopeso paṇḍarampetaṁ khettampetaṁ vatthumpetaṁ nettampetaṁ nayanampetaṁ orimaṁ tīrampetaṁ suñño gāmopeso.\nIdaṁ vuccati “cakkhāyatanaṁ”."}},{"id":"vb2:6","sourceIds":["vb2:6.1","vb2:6.2","vb2:6.3"],"kind":"text","text":{"pi":"Tattha katamaṁ sotāyatanaṁ?\nYaṁ sotaṁ catunnaṁ mahābhūtānaṁ upādāya pasādo attabhāvapariyāpanno anidassano sappaṭigho, yena sotena anidassanena sappaṭighena saddaṁ anidassanaṁ sappaṭighaṁ suṇi vā suṇāti vā suṇissati vā suṇe vā, sotampetaṁ sotāyatanampetaṁ sotadhātupesā sotindriyampetaṁ lokopeso dvārāpesā samuddopeso paṇḍarampetaṁ khettampetaṁ vatthumpetaṁ orimaṁ tīrampetaṁ suñño gāmopeso.\nIdaṁ vuccati “sotāyatanaṁ”."}},{"id":"vb2:7","sourceIds":["vb2:7.1","vb2:7.2","vb2:7.3"],"kind":"text","text":{"pi":"Tattha katamaṁ ghānāyatanaṁ?\nYaṁ ghānaṁ catunnaṁ mahābhūtānaṁ upādāya pasādo attabhāvapariyāpanno anidassano sappaṭigho, yena ghānena anidassanena sappaṭighena gandhaṁ anidassanaṁ sappaṭighaṁ ghāyi vā ghāyati vā ghāyissati vā ghāye vā, ghānampetaṁ ghānāyatanampetaṁ ghānadhātupesā ghānindriyampetaṁ lokopeso dvārāpesā samuddopeso paṇḍarampetaṁ khettampetaṁ vatthumpetaṁ orimaṁ tīrampetaṁ suñño gāmopeso.\nIdaṁ vuccati “ghānāyatanaṁ”."}},{"id":"vb2:8","sourceIds":["vb2:8.1","vb2:8.2","vb2:8.3"],"kind":"text","text":{"pi":"Tattha katamaṁ jivhāyatanaṁ?\nYā jivhā catunnaṁ mahābhūtānaṁ upādāya pasādo attabhāvapariyāpanno anidassano sappaṭigho, yāya jivhāya anidassanāya sappaṭighāya rasaṁ anidassanaṁ sappaṭighaṁ sāyi vā sāyati vā sāyissati vā sāye vā, jivhāpesā jivhāyatanampetaṁ jivhādhātupesā jivhindriyampetaṁ lokopeso dvārāpesā samuddopeso paṇḍarampetaṁ khettampetaṁ vatthumpetaṁ orimaṁ tīrampetaṁ suñño gāmopeso.\nIdaṁ vuccati “jivhāyatanaṁ”."}},{"id":"vb2:9","sourceIds":["vb2:9.1","vb2:9.2","vb2:9.3"],"kind":"text","text":{"pi":"Tattha katamaṁ kāyāyatanaṁ?\nYo kāyo catunnaṁ mahābhūtānaṁ upādāya pasādo attabhāvapariyāpanno anidassano sappaṭigho, yena kāyena anidassanena sappaṭighena phoṭṭhabbaṁ anidassanaṁ sappaṭighaṁ phusi vā phusati vā phusissati vā phuse vā, kāyopeso kāyāyatanampetaṁ kāyadhātupesā kāyindriyampetaṁ lokopeso dvārāpesā samuddopeso paṇḍarampetaṁ khettampetaṁ vatthumpetaṁ orimaṁ tīrampetaṁ suñño gāmopeso.\nIdaṁ vuccati “kāyāyatanaṁ”."}},{"id":"vb2:10","sourceIds":["vb2:10.1","vb2:10.2","vb2:10.3"],"kind":"text","text":{"pi":"Tattha katamaṁ manāyatanaṁ?\nEkavidhena manāyatanaṁ—\nphassasampayuttaṁ."}},{"id":"vb2:11","sourceIds":["vb2:11.1","vb2:11.2"],"kind":"text","text":{"pi":"Duvidhena manāyatanaṁ—\natthi sahetukaṁ, atthi ahetukaṁ."}},{"id":"vb2:12","sourceIds":["vb2:12.1","vb2:12.2"],"kind":"text","text":{"pi":"Tividhena manāyatanaṁ—\natthi kusalaṁ, atthi akusalaṁ, atthi abyākataṁ."}},{"id":"vb2:13","sourceIds":["vb2:13.1","vb2:13.2"],"kind":"text","text":{"pi":"Catubbidhena manāyatanaṁ—\natthi kāmāvacaraṁ, atthi rūpāvacaraṁ, atthi arūpāvacaraṁ, atthi apariyāpannaṁ."}},{"id":"vb2:14","sourceIds":["vb2:14.1","vb2:14.2"],"kind":"text","text":{"pi":"Pañcavidhena manāyatanaṁ—\natthi sukhindriyasampayuttaṁ, atthi dukkhindriyasampayuttaṁ, atthi somanassindriyasampayuttaṁ, atthi domanassindriyasampayuttaṁ, atthi upekkhindriyasampayuttaṁ."}},{"id":"vb2:15","sourceIds":["vb2:15.1","vb2:15.2","vb2:15.3"],"kind":"text","text":{"pi":"Chabbidhena manāyatanaṁ—\ncakkhuviññāṇaṁ, sotaviññāṇaṁ, ghānaviññāṇaṁ, jivhāviññāṇaṁ, kāyaviññāṇaṁ, manoviññāṇaṁ.\nEvaṁ chabbidhena manāyatanaṁ."}},{"id":"vb2:16","sourceIds":["vb2:16.1","vb2:16.2","vb2:16.3"],"kind":"text","text":{"pi":"Sattavidhena manāyatanaṁ—\ncakkhuviññāṇaṁ, sotaviññāṇaṁ, ghānaviññāṇaṁ, jivhāviññāṇaṁ, kāyaviññāṇaṁ, manodhātu, manoviññāṇadhātu.\nEvaṁ sattavidhena manāyatanaṁ."}},{"id":"vb2:17","sourceIds":["vb2:17.1","vb2:17.2","vb2:17.3"],"kind":"text","text":{"pi":"Aṭṭhavidhena manāyatanaṁ—\ncakkhuviññāṇaṁ, sotaviññāṇaṁ, ghānaviññāṇaṁ, jivhāviññāṇaṁ, kāyaviññāṇaṁ atthi sukhasahagataṁ, atthi dukkhasahagataṁ, manodhātu, manoviññāṇadhātu.\nEvaṁ aṭṭhavidhena manāyatanaṁ."}},{"id":"vb2:18","sourceIds":["vb2:18.1","vb2:18.2","vb2:18.3"],"kind":"text","text":{"pi":"Navavidhena manāyatanaṁ—\ncakkhuviññāṇaṁ, sotaviññāṇaṁ, ghānaviññāṇaṁ, jivhāviññāṇaṁ, kāyaviññāṇaṁ, manodhātu, manoviññāṇadhātu atthi kusalaṁ, atthi akusalaṁ, atthi abyākataṁ.\nEvaṁ navavidhena manāyatanaṁ."}},{"id":"vb2:19","sourceIds":["vb2:19.1","vb2:19.2","vb2:19.3"],"kind":"text","text":{"pi":"Dasavidhena manāyatanaṁ—\ncakkhuviññāṇaṁ, sotaviññāṇaṁ, ghānaviññāṇaṁ, jivhāviññāṇaṁ, kāyaviññāṇaṁ atthi sukhasahagataṁ, atthi dukkhasahagataṁ, manodhātu, manoviññāṇadhātu atthi kusalaṁ, atthi akusalaṁ, atthi abyākataṁ.\nEvaṁ dasavidhena manāyatanaṁ."}},{"id":"vb2:20","sourceIds":["vb2:20.1","vb2:20.2"],"kind":"text","text":{"pi":"Ekavidhena manāyatanaṁ—\nphassasampayuttaṁ."}},{"id":"vb2:21","sourceIds":["vb2:21.1","vb2:21.2"],"kind":"text","text":{"pi":"Duvidhena manāyatanaṁ—\natthi sahetukaṁ, atthi ahetukaṁ."}},{"id":"vb2:22","sourceIds":["vb2:22.1","vb2:22.2","vb2:22.3","vb2:22.4"],"kind":"text","text":{"pi":"Tividhena manāyatanaṁ—\natthi sukhāya vedanāya sampayuttaṁ, atthi dukkhāya vedanāya sampayuttaṁ, atthi adukkhamasukhāya vedanāya sampayuttaṁ …pe….\nEvaṁ bahuvidhena manāyatanaṁ.\nIdaṁ vuccati “manāyatanaṁ”."}},{"id":"vb2:23","sourceIds":["vb2:23.1","vb2:23.2","vb2:23.3"],"kind":"text","text":{"pi":"Tattha katamaṁ rūpāyatanaṁ?\nYaṁ rūpaṁ catunnaṁ mahābhūtānaṁ upādāya vaṇṇanibhā sanidassanaṁ sappaṭighaṁ nīlaṁ pītakaṁ lohitakaṁ odātaṁ kāḷakaṁ mañjiṭṭhakaṁ hari harivaṇṇaṁ ambaṅkuravaṇṇaṁ dīghaṁ rassaṁ aṇuṁ thūlaṁ vaṭṭaṁ parimaṇḍalaṁ caturassaṁ chaḷaṁsaṁ aṭṭhaṁsaṁ soḷasaṁsaṁ ninnaṁ thalaṁ chāyā ātapo āloko andhakāro abbhā mahikā dhūmo rajo candamaṇḍalassa vaṇṇanibhā sūriyamaṇḍalassa vaṇṇanibhā tārakarūpānaṁ vaṇṇanibhā ādāsamaṇḍalassa vaṇṇanibhā maṇisaṅkhamuttaveḷuriyassa vaṇṇanibhā jātarūparajatassa vaṇṇanibhā, yaṁ vā panaññampi atthi rūpaṁ catunnaṁ mahābhūtānaṁ upādāya vaṇṇanibhā sanidassanaṁ sappaṭighaṁ, yaṁ rūpaṁ sanidassanaṁ sappaṭighaṁ cakkhunā anidassanena sappaṭighena passi vā passati vā passissati vā passe vā, rūpampetaṁ rūpāyatanampetaṁ rūpadhātupesā.\nIdaṁ vuccati “rūpāyatanaṁ”."}},{"id":"vb2:24","sourceIds":["vb2:24.1","vb2:24.2","vb2:24.3"],"kind":"text","text":{"pi":"Tattha katamaṁ saddāyatanaṁ?\nYo saddo catunnaṁ mahābhūtānaṁ upādāya anidassano sappaṭigho bherisaddo mudiṅgasaddo saṅkhasaddo paṇavasaddo gītasaddo vāditasaddo sammasaddo pāṇisaddo sattānaṁ nigghosasaddo dhātūnaṁ sannighātasaddo vātasaddo udakasaddo manussasaddo amanussasaddo, yo vā panaññopi atthi saddo catunnaṁ mahābhūtānaṁ upādāya anidassano sappaṭigho, yaṁ saddaṁ anidassanaṁ sappaṭighaṁ sotena anidassanena sappaṭighena suṇi vā suṇāti vā suṇissati vā suṇe vā, saddopeso saddāyatanampetaṁ saddadhātupesā.\nIdaṁ vuccati “saddāyatanaṁ”."}},{"id":"vb2:25","sourceIds":["vb2:25.1","vb2:25.2","vb2:25.3"],"kind":"text","text":{"pi":"Tattha katamaṁ gandhāyatanaṁ?\nYo gandho catunnaṁ mahābhūtānaṁ upādāya anidassano sappaṭigho mūlagandho sāragandho tacagandho pattagandho pupphagandho phalagandho āmagandho vissagandho sugandho duggandho, yo vā panaññopi atthi gandho catunnaṁ mahābhūtānaṁ upādāya anidassano sappaṭigho, yaṁ gandhaṁ anidassanaṁ sappaṭighaṁ ghānena anidassanena sappaṭighena ghāyi vā ghāyati vā ghāyissati vā ghāye vā, gandhopeso gandhāyatanampetaṁ gandhadhātupesā.\nIdaṁ vuccati “gandhāyatanaṁ”."}},{"id":"vb2:26","sourceIds":["vb2:26.1","vb2:26.2","vb2:26.3"],"kind":"text","text":{"pi":"Tattha katamaṁ rasāyatanaṁ?\nYo raso catunnaṁ mahābhūtānaṁ upādāya anidassano sappaṭigho mūlaraso khandharaso tacaraso pattaraso puppharaso phalaraso ambilaṁ madhuraṁ tittakaṁ kaṭukaṁ loṇikaṁ khārikaṁ lambikaṁ kasāvo sādu asādu, yo vā panaññopi atthi raso catunnaṁ mahābhūtānaṁ upādāya anidassano sappaṭigho, yaṁ rasaṁ anidassanaṁ sappaṭighaṁ jivhāya anidassanāya sappaṭighāya sāyi vā sāyati vā sāyissati vā sāye vā, rasopeso rasāyatanampetaṁ rasadhātupesā.\nIdaṁ vuccati “rasāyatanaṁ”."}},{"id":"vb2:27","sourceIds":["vb2:27.1","vb2:27.2","vb2:27.3"],"kind":"text","text":{"pi":"Tattha katamaṁ phoṭṭhabbāyatanaṁ?\nPathavīdhātu tejodhātu vāyodhātu kakkhaḷaṁ mudukaṁ saṇhaṁ pharusaṁ sukhasamphassaṁ dukkhasamphassaṁ garukaṁ lahukaṁ, yaṁ phoṭṭhabbaṁ anidassanaṁ sappaṭighaṁ kāyena anidassanena sappaṭighena phusi vā phusati vā phusissati vā phuse vā, phoṭṭhabbopeso phoṭṭhabbāyatanampetaṁ phoṭṭhabbadhātupesā.\nIdaṁ vuccati “phoṭṭhabbāyatanaṁ”."}},{"id":"vb2:28","sourceIds":["vb2:28.1","vb2:28.2"],"kind":"text","text":{"pi":"Tattha katamaṁ dhammāyatanaṁ?\nVedanākkhandho, saññākkhandho, saṅkhārakkhandho, yañca rūpaṁ anidassanaappaṭighaṁ dhammāyatanapariyāpannaṁ, asaṅkhatā ca dhātu."}},{"id":"vb2:29","sourceIds":["vb2:29.1","vb2:29.2","vb2:29.3","vb2:29.4","vb2:29.5","vb2:29.6","vb2:29.7","vb2:29.8","vb2:29.9","vb2:29.10"],"kind":"text","text":{"pi":"Tattha katamo vedanākkhandho?\nEkavidhena vedanākkhandho—\nphassasampayutto.\nDuvidhena vedanākkhandho—\natthi sahetuko, atthi ahetuko.\nTividhena vedanākkhandho—\natthi kusalo, atthi akusalo, atthi abyākato …pe…\nevaṁ dasavidhena vedanākkhandho …pe…\nevaṁ bahuvidhena vedanākkhandho.\nAyaṁ vuccati “vedanākkhandho”."}},{"id":"vb2:30","sourceIds":["vb2:30.1","vb2:30.2","vb2:30.3","vb2:30.4","vb2:30.5","vb2:30.6","vb2:30.7","vb2:30.8","vb2:30.9","vb2:30.10"],"kind":"text","text":{"pi":"Tattha katamo saññākkhandho?\nEkavidhena saññākkhandho—\nphassasampayutto.\nDuvidhena saññākkhandho—\natthi sahetuko, atthi ahetuko.\nTividhena saññākkhandho—\natthi kusalo, atthi akusalo, atthi abyākato …pe…\nevaṁ dasavidhena saññākkhandho …pe…\nevaṁ bahuvidhena saññākkhandho.\nAyaṁ vuccati “saññākkhandho”."}},{"id":"vb2:31","sourceIds":["vb2:31.1","vb2:31.2","vb2:31.3","vb2:31.4","vb2:31.5","vb2:31.6","vb2:31.7","vb2:31.8","vb2:31.9","vb2:31.10"],"kind":"text","text":{"pi":"Tattha katamo saṅkhārakkhandho?\nEkavidhena saṅkhārakkhandho—\ncittasampayutto.\nDuvidhena saṅkhārakkhandho—\natthi hetu, atthi na hetu.\nTividhena saṅkhārakkhandho—\natthi kusalo, atthi akusalo, atthi abyākato …pe…\nevaṁ dasavidhena saṅkhārakkhandho …pe…\nevaṁ bahuvidhena saṅkhārakkhandho.\nAyaṁ vuccati “saṅkhārakkhandho”."}},{"id":"vb2:32","sourceIds":["vb2:32.1","vb2:32.2","vb2:32.3"],"kind":"text","text":{"pi":"Tattha katamaṁ rūpaṁ anidassanaappaṭighaṁ dhammāyatanapariyāpannaṁ?\nItthindriyaṁ purisindriyaṁ …pe… kabaḷīkāro āhāro.\nIdaṁ vuccati rūpaṁ “anidassanaappaṭighaṁ dhammāyatanapariyāpannaṁ”."}},{"id":"vb2:33","sourceIds":["vb2:33.1","vb2:33.2","vb2:33.3"],"kind":"text","text":{"pi":"Tattha katamā asaṅkhatā dhātu?\nRāgakkhayo, dosakkhayo, mohakkhayo—\nayaṁ vuccati “asaṅkhatā dhātu”."}},{"id":"vb2:34","sourceIds":["vb2:34.1","vb2:34.2"],"kind":"text","text":{"pi":"Idaṁ vuccati dhammāyatanaṁ.\nAbhidhammabhājanīyaṁ."}},{"id":"vb2:35","sourceIds":["vb2:35.0","vb2:35.1","vb2:35.2"],"kind":"text","text":{"pi":"3. Pañhāpucchaka\nDvādasāyatanāni—\ncakkhāyatanaṁ, rūpāyatanaṁ, sotāyatanaṁ, saddāyatanaṁ, ghānāyatanaṁ, gandhāyatanaṁ, jivhāyatanaṁ, rasāyatanaṁ, kāyāyatanaṁ, phoṭṭhabbāyatanaṁ, manāyatanaṁ, dhammāyatanaṁ."}},{"id":"vb2:36","sourceIds":["vb2:36.1"],"kind":"text","text":{"pi":"Dvādasannaṁ āyatanānaṁ kati kusalā, kati akusalā, kati abyākatā …pe… kati saraṇā, kati araṇā?"}},{"id":"vb2:37","sourceIds":["vb2:37.0","vb2:37.1","vb2:37.2"],"kind":"text","text":{"pi":"3.1. Tika\nDasāyatanā abyākatā.\nDvāyatanā siyā kusalā, siyā akusalā, siyā abyākatā."}},{"id":"vb2:38","sourceIds":["vb2:38.1","vb2:38.2","vb2:38.3","vb2:38.4"],"kind":"text","text":{"pi":"Dasāyatanā na vattabbā—\n“sukhāya vedanāya sampayuttā”tipi, “dukkhāya vedanāya sampayuttā”tipi, “adukkhamasukhāya vedanāya sampayuttā”tipi.\nManāyatanaṁ siyā sukhāya vedanāya sampayuttaṁ, siyā dukkhāya vedanāya sampayuttaṁ, siyā adukkhamasukhāya vedanāya sampayuttaṁ.\nDhammāyatanaṁ siyā sukhāya vedanāya sampayuttaṁ, siyā dukkhāya vedanāya sampayuttaṁ, siyā adukkhamasukhāya vedanāya sampayuttaṁ, siyā na vattabbaṁ—“sukhāya vedanāya sampayuttan”tipi, “dukkhāya vedanāya sampayuttan”tipi, “adukkhamasukhāya vedanāya sampayuttan”tipi."}},{"id":"vb2:39","sourceIds":["vb2:39.1","vb2:39.2"],"kind":"text","text":{"pi":"Dasāyatanā nevavipākanavipākadhammadhammā.\nDvāyatanā siyā vipākā, siyā vipākadhammadhammā, siyā nevavipākanavipākadhammadhammā."}},{"id":"vb2:40","sourceIds":["vb2:40.1","vb2:40.2","vb2:40.3","vb2:40.4"],"kind":"text","text":{"pi":"Pañcāyatanā upādinnupādāniyā.\nSaddāyatanaṁ anupādinnupādāniyaṁ.\nCattāro āyatanā siyā upādinnupādāniyā, siyā anupādinnupādāniyā, siyā anupādāniyā.\nDvāyatanā siyā upādinnupādāniyā, siyā anupādinnupādāniyā, siyā anupādinnaanupādāniyā."}},{"id":"vb2:41","sourceIds":["vb2:41.1","vb2:41.2"],"kind":"text","text":{"pi":"Dasāyatanā asaṅkiliṭṭhasaṅkilesikā.\nDvāyatanā siyā saṅkiliṭṭhasaṅkilesikā, siyā asaṅkiliṭṭhasaṅkilesikā, siyā asaṅkiliṭṭhaasaṅkilesikā."}},{"id":"vb2:42","sourceIds":["vb2:42.1","vb2:42.2","vb2:42.3"],"kind":"text","text":{"pi":"Dasāyatanā avitakkaavicārā.\nManāyatanaṁ siyā savitakkasavicāraṁ, siyā avitakkavicāramattaṁ, siyā avitakkaavicāraṁ.\nDhammāyatanaṁ siyā savitakkasavicāraṁ, siyā avitakkavicāramattaṁ, siyā avitakkaavicāraṁ, siyā na vattabbaṁ—“savitakkasavicāran”tipi, “avitakkavicāramattan”tipi, “avitakkaavicāran”tipi."}},{"id":"vb2:43","sourceIds":["vb2:43.1","vb2:43.2","vb2:43.3"],"kind":"text","text":{"pi":"Dasāyatanā na vattabbā—\n“pītisahagatā”tipi, “sukhasahagatā”tipi, “upekkhāsahagatā”tipi.\nDvāyatanā siyā pītisahagatā, siyā sukhasahagatā, siyā upekkhāsahagatā, siyā na vattabbā—“pītisahagatā”tipi, “sukhasahagatā”tipi, “upekkhāsahagatā”tipi."}},{"id":"vb2:44","sourceIds":["vb2:44.1","vb2:44.2"],"kind":"text","text":{"pi":"Dasāyatanā neva dassanena na bhāvanāya pahātabbā.\nDvāyatanā siyā dassanena pahātabbā, siyā bhāvanāya pahātabbā, siyā neva dassanena na bhāvanāya pahātabbā."}},{"id":"vb2:45","sourceIds":["vb2:45.1","vb2:45.2"],"kind":"text","text":{"pi":"Dasāyatanā neva dassanena na bhāvanāya pahātabbahetukā.\nDvāyatanā siyā dassanena na pahātabbahetukā, siyā bhāvanāya pahātabbahetukā, siyā neva dassanena na bhāvanāya pahātabbahetukā."}},{"id":"vb2:46","sourceIds":["vb2:46.1","vb2:46.2"],"kind":"text","text":{"pi":"Dasāyatanā nevācayagāmināpacayagāmino.\nDvāyatanā siyā ācayagāmino, siyā apacayagāmino, siyā nevācayagāmināpacayagāmino."}},{"id":"vb2:47","sourceIds":["vb2:47.1","vb2:47.2"],"kind":"text","text":{"pi":"Dasāyatanā nevasekkhanāsekkhā.\nDvāyatanā siyā sekkhā, siyā asekkhā, siyā nevasekkhanāsekkhā."}},{"id":"vb2:48","sourceIds":["vb2:48.1","vb2:48.2"],"kind":"text","text":{"pi":"Dasāyatanā parittā.\nDvāyatanā siyā parittā, siyā mahaggatā, siyā appamāṇā."}},{"id":"vb2:49","sourceIds":["vb2:49.1","vb2:49.2"],"kind":"text","text":{"pi":"Dasāyatanā anārammaṇā.\nDvāyatanā siyā parittārammaṇā, siyā mahaggatārammaṇā, siyā appamāṇārammaṇā, siyā na vattabbā—“parittārammaṇā”tipi, “mahaggatārammaṇā”tipi, “appamāṇārammaṇā”tipi."}},{"id":"vb2:50","sourceIds":["vb2:50.1","vb2:50.2"],"kind":"text","text":{"pi":"Dasāyatanā majjhimā.\nDvāyatanā siyā hīnā, siyā majjhimā, siyā paṇītā."}},{"id":"vb2:51","sourceIds":["vb2:51.1","vb2:51.2"],"kind":"text","text":{"pi":"Dasāyatanā aniyatā.\nDvāyatanā siyā micchattaniyatā, siyā sammattaniyatā, siyā aniyatā."}},{"id":"vb2:52","sourceIds":["vb2:52.1","vb2:52.2"],"kind":"text","text":{"pi":"Dasāyatanā anārammaṇā.\nDvāyatanā siyā maggārammaṇā, siyā maggahetukā, siyā maggādhipatino, siyā na vattabbā—“maggārammaṇā”tipi, “maggahetukā”tipi, “maggādhipatino”tipi."}},{"id":"vb2:53","sourceIds":["vb2:53.1","vb2:53.2","vb2:53.3","vb2:53.4","vb2:53.5","vb2:53.6"],"kind":"text","text":{"pi":"Pañcāyatanā siyā uppannā, siyā uppādino, na vattabbā—\n“anuppannā”ti.\nSaddāyatanaṁ siyā uppannaṁ, siyā anuppannaṁ, na vattabbaṁ—\n“uppādī”ti.\nPañcāyatanā siyā uppannā, siyā anuppannā, siyā uppādino.\nDhammāyatanaṁ siyā uppannaṁ, siyā anuppannaṁ, siyā uppādī, siyā na vattabbaṁ—“uppannan”tipi, “anuppannan”tipi, “uppādī”tipi."}},{"id":"vb2:54","sourceIds":["vb2:54.1","vb2:54.2","vb2:54.3"],"kind":"text","text":{"pi":"Ekādasāyatanā siyā atītā, siyā anāgatā, siyā paccuppannā.\nDhammāyatanaṁ siyā atītaṁ, siyā anāgataṁ, siyā paccuppannaṁ, siyā na vattabbaṁ—“atītan”tipi, “anāgatan”tipi, “paccuppannan”tipi.\nDasāyatanā anārammaṇā."}},{"id":"vb2:55","sourceIds":["vb2:55.1"],"kind":"text","text":{"pi":"Dvāyatanā siyā atītārammaṇā, siyā anāgatārammaṇā, siyā paccuppannārammaṇā, siyā na vattabbā—“atītārammaṇā”tipi, “anāgatārammaṇā”tipi, “paccuppannārammaṇā”tipi."}},{"id":"vb2:56","sourceIds":["vb2:56.1"],"kind":"text","text":{"pi":"Siyā ajjhattā, siyā bahiddhā, siyā ajjhattabahiddhā."}},{"id":"vb2:57","sourceIds":["vb2:57.1","vb2:57.2"],"kind":"text","text":{"pi":"Dasāyatanā anārammaṇā.\nDvāyatanā siyā ajjhattārammaṇā, siyā bahiddhārammaṇā, siyā ajjhattabahiddhārammaṇā, siyā na vattabbā—“ajjhattārammaṇā”tipi, “bahiddhārammaṇā”tipi, “ajjhattabahiddhārammaṇā”tipi."}},{"id":"vb2:58","sourceIds":["vb2:58.1","vb2:58.2","vb2:58.3"],"kind":"text","text":{"pi":"Rūpāyatanaṁ sanidassanasappaṭighaṁ.\nNavāyatanā anidassanasappaṭighā.\nDvāyatanā anidassanaappaṭighā."}},{"id":"vb2:59.0","sourceIds":["vb2:59.0.1","vb2:59.0.2"],"kind":"text","text":{"pi":"3.2. 3.2 Duka\n3.2.1. Hetugocchaka"}},{"id":"vb2:59","sourceIds":["vb2:59.1","vb2:59.2","vb2:59.3","vb2:59.4","vb2:59.5","vb2:59.6","vb2:59.7","vb2:59.8","vb2:59.9","vb2:59.10","vb2:59.11","vb2:59.12","vb2:59.13","vb2:59.14","vb2:59.15","vb2:59.16","vb2:59.17","vb2:59.18","vb2:59.19"],"kind":"text","text":{"pi":"Ekādasāyatanā na hetū.\nDhammāyatanaṁ siyā hetu, siyā na hetu.\nDasāyatanā ahetukā.\nDvāyatanā siyā sahetukā, siyā ahetukā.\nDasāyatanā hetuvippayuttā.\nDvāyatanā siyā hetusampayuttā, siyā hetuvippayuttā.\nDasāyatanā na vattabbā—\n“hetū ceva sahetukā cā”tipi, “sahetukā ceva na ca hetū”tipi.\nManāyatanaṁ na vattabbaṁ—\n“hetu ceva sahetukañcā”ti, siyā sahetukañceva na ca hetu, siyā na vattabbaṁ—“sahetukañceva na ca hetū”ti.\nDhammāyatanaṁ siyā hetu ceva sahetukañca, siyā sahetukañceva na ca hetu, siyā na vattabbaṁ—“hetu ceva sahetukañcā”tipi, “sahetukañceva na ca hetū”tipi.\nDasāyatanā na vattabbā—\n“hetū ceva hetusampayuttā cā”tipi, “hetusampayuttā ceva na ca hetū”tipi.\nManāyatanaṁ na vattabbaṁ—\n“hetu ceva hetusampayuttañcā”ti, siyā hetusampayuttañceva na ca hetu, siyā na vattabbaṁ—“hetusampayuttañceva na ca hetū”ti.\nDhammāyatanaṁ siyā hetu ceva hetusampayuttañca, siyā hetusampayuttañceva na ca hetu, siyā na vattabbaṁ—“hetu ceva hetusampayuttañcā”tipi, “hetusampayuttañceva na ca hetū”tipi.\nDasāyatanā na hetuahetukā.\nManāyatanaṁ siyā na hetusahetukaṁ, siyā na hetuahetukaṁ.\nDhammāyatanaṁ siyā na hetusahetukaṁ, siyā na hetuahetukaṁ, siyā na vattabbaṁ—“na hetusahetukan”tipi, “na hetuahetukan”tipi."}},{"id":"vb2:60","sourceIds":["vb2:60.0","vb2:60.1","vb2:60.2","vb2:60.3","vb2:60.4","vb2:60.5","vb2:60.6","vb2:60.7","vb2:60.8","vb2:60.9","vb2:60.10","vb2:60.11","vb2:60.12","vb2:60.13","vb2:60.14"],"kind":"text","text":{"pi":"3.2.2. Cūḷantaraduka\nEkādasāyatanā sappaccayā.\nDhammāyatanaṁ siyā sappaccayaṁ, siyā appaccayaṁ.\nEkādasāyatanā saṅkhatā.\nDhammāyatanaṁ siyā saṅkhataṁ, siyā asaṅkhataṁ.\nRūpāyatanaṁ sanidassanaṁ.\nEkādasāyatanā anidassanā.\nDasāyatanā sappaṭighā.\nDvāyatanā appaṭighā.\nDasāyatanā rūpā.\nManāyatanaṁ arūpaṁ.\nDhammāyatanaṁ siyā rūpaṁ, siyā arūpaṁ.\nDasāyatanā lokiyā.\nDvāyatanā siyā lokiyā, siyā lokuttarā;\nkenaci viññeyyā, kenaci na viññeyyā."}},{"id":"vb2:61","sourceIds":["vb2:61.0","vb2:61.1","vb2:61.2","vb2:61.3","vb2:61.4","vb2:61.5","vb2:61.6","vb2:61.7","vb2:61.8","vb2:61.9","vb2:61.10","vb2:61.11","vb2:61.12","vb2:61.13","vb2:61.14","vb2:61.15","vb2:61.16","vb2:61.17","vb2:61.18"],"kind":"text","text":{"pi":"3.2.3. Āsavagocchaka\nEkādasāyatanā no āsavā.\nDhammāyatanaṁ siyā āsavo, siyā no āsavo.\nDasāyatanā sāsavā.\nDvāyatanā siyā sāsavā, siyā anāsavā.\nDasāyatanā āsavavippayuttā.\nDvāyatanā siyā āsavasampayuttā, siyā āsavavippayuttā.\nDasāyatanā na vattabbā—\n“āsavā ceva sāsavā cā”ti, sāsavā ceva no ca āsavā.\nManāyatanaṁ na vattabbaṁ—\n“āsavo ceva sāsavañcā”ti, siyā sāsavañceva no ca āsavo, siyā na vattabbaṁ—“sāsavañceva no ca āsavo”ti.\nDhammāyatanaṁ siyā āsavo ceva sāsavañca, siyā sāsavañceva no ca āsavo, siyā na vattabbaṁ—“āsavo ceva sāsavañcā”tipi, “sāsavañceva no ca āsavo”tipi.\nDasāyatanā na vattabbā—\n“āsavā ceva āsavasampayuttā cā”tipi, “āsavasampayuttā ceva no ca āsavā”tipi.\nManāyatanaṁ na vattabbaṁ—\n“āsavo ceva āsavasampayuttañcā”ti, siyā āsavasampayuttañceva no ca āsavo, siyā na vattabbaṁ—“āsavasampayuttañceva no ca āsavo”ti.\nDhammāyatanaṁ siyā āsavo ceva āsavasampayuttañca, siyā āsavasampayuttañceva no ca āsavo, siyā na vattabbaṁ—“āsavo ceva āsavasampayuttañcā”tipi, “āsavasampayuttañceva no ca āsavo”tipi.\nDasāyatanā āsavavippayuttasāsavā.\nDvāyatanā siyā āsavavippayuttasāsavā, siyā āsavavippayuttaanāsavā, siyā na vattabbā—“āsavavippayuttasāsavā”tipi, “āsavavippayuttaanāsavā”tipi."}},{"id":"vb2:62","sourceIds":["vb2:62.0","vb2:62.1","vb2:62.2","vb2:62.3","vb2:62.4","vb2:62.5","vb2:62.6","vb2:62.7","vb2:62.8","vb2:62.9","vb2:62.10","vb2:62.11","vb2:62.12","vb2:62.13","vb2:62.14","vb2:62.15","vb2:62.16","vb2:62.17","vb2:62.18"],"kind":"text","text":{"pi":"3.2.4. Saṁyojanagocchaka\nEkādasāyatanā no saṁyojanā.\nDhammāyatanaṁ siyā saṁyojanaṁ, siyā no saṁyojanaṁ.\nDasāyatanā saṁyojaniyā.\nDvāyatanā siyā saṁyojaniyā, siyā asaṁyojaniyā.\nDasāyatanā saṁyojanavippayuttā.\nDvāyatanā siyā saṁyojanasampayuttā, siyā saṁyojanavippayuttā.\nDasāyatanā na vattabbā—\n“saṁyojanā ceva saṁyojaniyā cā”ti, saṁyojaniyā ceva no ca saṁyojanā.\nManāyatanaṁ na vattabbaṁ—\n“saṁyojanañceva saṁyojaniyañcā”ti, siyā saṁyojaniyañceva no ca saṁyojanaṁ, siyā na vattabbaṁ—“saṁyojaniyañceva no ca saṁyojanan”ti.\nDhammāyatanaṁ siyā saṁyojanañceva saṁyojaniyañca, siyā saṁyojaniyañceva no ca saṁyojanaṁ, siyā na vattabbaṁ—“saṁyojanañceva saṁyojaniyan”tipi, “saṁyojaniyañceva no ca saṁyojanan”tipi.\nDasāyatanā na vattabbā—\n“saṁyojanā ceva saṁyojanasampayuttā cā”tipi, “saṁyojanasampayuttā ceva no ca saṁyojanā”tipi.\nManāyatanaṁ na vattabbaṁ—\n“saṁyojanañceva saṁyojanasampayuttañcā”ti, siyā saṁyojanasampayuttañceva no ca saṁyojanaṁ, siyā na vattabbaṁ—“saṁyojanasampayuttañceva no ca saṁyojanan”ti.\nDhammāyatanaṁ siyā saṁyojanañceva saṁyojanasampayuttañca, siyā saṁyojanasampayuttañceva no ca saṁyojanaṁ, siyā na vattabbaṁ—“saṁyojanañceva saṁyojanasampayuttañcā”tipi, “saṁyojanasampayuttañceva no ca saṁyojanan”tipi.\nDasāyatanā saṁyojanavippayuttasaṁyojaniyā.\nDvāyatanā siyā saṁyojanavippayuttasaṁyojaniyā, siyā saṁyojanavippayuttaasaṁyojaniyā, siyā na vattabbā—“saṁyojanavippayuttasaṁyojaniyā”tipi, “saṁyojanavippayuttaasaṁyojaniyā”tipi."}},{"id":"vb2:63","sourceIds":["vb2:63.0","vb2:63.1","vb2:63.2","vb2:63.3","vb2:63.4","vb2:63.5","vb2:63.6","vb2:63.7","vb2:63.8","vb2:63.9","vb2:63.10","vb2:63.11","vb2:63.12","vb2:63.13","vb2:63.14","vb2:63.15","vb2:63.16","vb2:63.17","vb2:63.18"],"kind":"text","text":{"pi":"3.2.5. Ganthagocchaka\nEkādasāyatanā no ganthā.\nDhammāyatanaṁ siyā gantho, siyā no gantho.\nDasāyatanā ganthaniyā.\nDvāyatanā siyā ganthaniyā, siyā aganthaniyā.\nDasāyatanā ganthavippayuttā.\nDvāyatanā siyā ganthasampayuttā, siyā ganthavippayuttā.\nDasāyatanā na vattabbā—\n“ganthā ceva ganthaniyā cā”ti, ganthaniyā ceva no ca ganthā.\nManāyatanaṁ na vattabbaṁ—\n“gantho ceva ganthaniyañcā”ti, siyā ganthaniyañceva no ca gantho, siyā na vattabbaṁ—“ganthaniyañceva no ca gantho”ti.\nDhammāyatanaṁ siyā gantho ceva ganthaniyañca, siyā ganthaniyañceva no ca gantho, siyā na vattabbaṁ—“gantho ceva ganthaniyañcā”tipi, “ganthaniyañceva no ca gantho”tipi.\nDasāyatanā na vattabbā—\n“ganthā ceva ganthasampayuttā cā”tipi, “ganthasampayuttā ceva no ca ganthā”tipi.\nManāyatanaṁ na vattabbaṁ—\n“gantho ceva ganthasampayuttañcā”ti, siyā ganthasampayuttañceva no ca gantho, siyā na vattabbaṁ—“ganthasampayuttañceva no ca gantho”ti.\nDhammāyatanaṁ siyā gantho ceva ganthasampayuttañca, siyā ganthasampayuttañceva no ca gantho, siyā na vattabbaṁ—“gantho ceva ganthasampayuttañcā”tipi, “ganthasampayuttañceva no ca gantho”tipi.\nDasāyatanā ganthavippayuttaganthaniyā.\nDvāyatanā siyā ganthavippayuttaganthaniyā, siyā ganthavippayuttaaganthaniyā, siyā na vattabbā—“ganthavippayuttaganthaniyā”tipi, “ganthavippayuttaaganthaniyā”tipi."}},{"id":"vb2:64","sourceIds":["vb2:64.0","vb2:64.1","vb2:64.2","vb2:64.3","vb2:64.4","vb2:64.5","vb2:64.6","vb2:64.7","vb2:64.8","vb2:64.9","vb2:64.10","vb2:64.11","vb2:64.12","vb2:64.13","vb2:64.14","vb2:64.15","vb2:64.16","vb2:64.17","vb2:64.18","vb2:64.19","vb2:64.20"],"kind":"text","text":{"pi":"2.3.2.6. Oghayoganīvaraṇagocchaka\nEkādasāyatanā no oghā …pe…\nno yogā …pe…\nno nīvaraṇā.\nDhammāyatanaṁ siyā nīvaraṇaṁ, siyā no nīvaraṇaṁ.\nDasāyatanā nīvaraṇiyā.\nDvāyatanā siyā nīvaraṇiyā, siyā anīvaraṇiyā.\nDasāyatanā nīvaraṇavippayuttā.\nDvāyatanā siyā nīvaraṇasampayuttā, siyā nīvaraṇavippayuttā.\nDasāyatanā na vattabbā—\n“nīvaraṇā ceva nīvaraṇiyā cā”ti, nīvaraṇiyā ceva no ca nīvaraṇā.\nManāyatanaṁ na vattabbaṁ—\n“nīvaraṇañceva nīvaraṇiyañcā”ti, siyā nīvaraṇiyañceva no ca nīvaraṇaṁ, siyā na vattabbaṁ—“nīvaraṇiyañceva no ca nīvaraṇan”ti.\nDhammāyatanaṁ siyā nīvaraṇañceva nīvaraṇiyañca, siyā nīvaraṇiyañceva no ca nīvaraṇaṁ, siyā na vattabbaṁ—“nīvaraṇañceva nīvaraṇiyañcā”tipi, “nīvaraṇiyañceva no ca nīvaraṇan”tipi.\nDasāyatanā na vattabbā—\n“nīvaraṇā ceva nīvaraṇasampayuttā cā”tipi, nīvaraṇasampayuttā ceva no ca nīvaraṇātipi.\nManāyatanaṁ na vattabbaṁ—\n“nīvaraṇañceva nīvaraṇasampayuttañcā”ti, siyā nīvaraṇasampayuttañceva no ca nīvaraṇaṁ, siyā na vattabbaṁ—“nīvaraṇasampayuttañceva no ca nīvaraṇan”ti.\nDhammāyatanaṁ siyā nīvaraṇañceva nīvaraṇasampayuttañca, siyā nīvaraṇasampayuttañceva no ca nīvaraṇaṁ, siyā na vattabbaṁ—“nīvaraṇañceva nīvaraṇasampayuttañcā”tipi, “nīvaraṇasampayuttañceva no ca nīvaraṇan”tipi.\nDasāyatanā nīvaraṇavippayuttanīvaraṇiyā.\nDvāyatanā siyā nīvaraṇavippayuttanīvaraṇiyā, siyā nīvaraṇavippayuttaanīvaraṇiyā, siyā na vattabbā—“nīvaraṇavippayuttanīvaraṇiyā”tipi, “nīvaraṇavippayuttaanīvaraṇiyā”tipi."}},{"id":"vb2:65","sourceIds":["vb2:65.0","vb2:65.1","vb2:65.2","vb2:65.3","vb2:65.4","vb2:65.5","vb2:65.6","vb2:65.7","vb2:65.8","vb2:65.9","vb2:65.10","vb2:65.11","vb2:65.12","vb2:65.13","vb2:65.14"],"kind":"text","text":{"pi":"3.2.9. Parāmāsagocchaka\nEkādasāyatanā no parāmāsā.\nDhammāyatanaṁ siyā parāmāso, siyā no parāmāso.\nDasāyatanā parāmaṭṭhā.\nDvāyatanā siyā parāmaṭṭhā, siyā aparāmaṭṭhā.\nDasāyatanā parāmāsavippayuttā.\nManāyatanaṁ siyā parāmāsasampayuttaṁ, siyā parāmāsavippayuttaṁ.\nDhammāyatanaṁ siyā parāmāsasampayuttaṁ, siyā parāmāsavippayuttaṁ, siyā na vattabbaṁ—“parāmāsasampayuttan”tipi, “parāmāsavippayuttan”tipi.\nDasāyatanā na vattabbā—\n“parāmāsā ceva parāmaṭṭhā cā”ti, “parāmaṭṭhā ceva no ca parāmāsā”.\nManāyatanaṁ na vattabbaṁ—\n“parāmāso ceva parāmaṭṭhañcā”ti, siyā parāmaṭṭhañceva no ca parāmāso, siyā na vattabbaṁ—“parāmaṭṭhañceva no ca parāmāso”ti.\nDhammāyatanaṁ siyā parāmāso ceva parāmaṭṭhañca, siyā parāmaṭṭhañceva no ca parāmāso, siyā na vattabbaṁ—“parāmāso ceva parāmaṭṭhañcā”tipi, “parāmaṭṭhañceva no ca parāmāso”tipi.\nDasāyatanā parāmāsavippayuttaparāmaṭṭhā.\nDvāyatanā siyā parāmāsavippayuttaparāmaṭṭhā, siyā parāmāsavippayuttaaparāmaṭṭhā, siyā na vattabbā—“parāmāsavippayuttaparāmaṭṭhā”tipi, “parāmāsavippayuttaaparāmaṭṭhā”tipi."}},{"id":"vb2:66","sourceIds":["vb2:66.0","vb2:66.1","vb2:66.2","vb2:66.3","vb2:66.4","vb2:66.5","vb2:66.6","vb2:66.7","vb2:66.8","vb2:66.9","vb2:66.10","vb2:66.11","vb2:66.12","vb2:66.13","vb2:66.14","vb2:66.15","vb2:66.16","vb2:66.17","vb2:66.18","vb2:66.19","vb2:66.20","vb2:66.21","vb2:66.22","vb2:66.23","vb2:66.24","vb2:66.25","vb2:66.26","vb2:66.27"],"kind":"text","text":{"pi":"3.2.10. Mahantaraduka\nDasāyatanā anārammaṇā.\nManāyatanaṁ sārammaṇaṁ.\nDhammāyatanaṁ siyā sārammaṇaṁ, siyā anārammaṇaṁ.\nManāyatanaṁ cittaṁ.\nEkādasāyatanā no cittā.\nEkādasāyatanā acetasikā.\nDhammāyatanaṁ siyā cetasikaṁ, siyā acetasikaṁ.\nDasāyatanā cittavippayuttā.\nDhammāyatanaṁ siyā cittasampayuttaṁ, siyā cittavippayuttaṁ.\nManāyatanaṁ na vattabbaṁ—\n“cittena sampayuttan”tipi, “cittena vippayuttan”tipi.\nDasāyatanā cittavisaṁsaṭṭhā.\nDhammāyatanaṁ siyā cittasaṁsaṭṭhaṁ, siyā cittavisaṁsaṭṭhaṁ.\nManāyatanaṁ na vattabbaṁ—\n“cittena saṁsaṭṭhan”tipi, “cittena visaṁsaṭṭhan”tipi.\nChāyatanā no cittasamuṭṭhānā.\nChāyatanā siyā cittasamuṭṭhānā, siyā no cittasamuṭṭhānā.\nEkādasāyatanā no cittasahabhuno.\nDhammāyatanaṁ siyā cittasahabhū, siyā no cittasahabhū.\nEkādasāyatanā no cittānuparivattino.\nDhammāyatanaṁ siyā cittānuparivatti, siyā no cittānuparivatti.\nEkādasāyatanā no cittasaṁsaṭṭhasamuṭṭhānā.\nDhammāyatanaṁ siyā cittasaṁsaṭṭhasamuṭṭhānaṁ, siyā no cittasaṁsaṭṭhasamuṭṭhānaṁ.\nEkādasāyatanā no cittasaṁsaṭṭhasamuṭṭhānasahabhuno.\nDhammāyatanaṁ siyā cittasaṁsaṭṭhasamuṭṭhānasahabhū, siyā no cittasaṁsaṭṭhasamuṭṭhānasahabhū.\nEkādasāyatanā no cittasaṁsaṭṭhasamuṭṭhānānuparivattino.\nDhammāyatanaṁ siyā cittasaṁsaṭṭhasamuṭṭhānānuparivatti, siyā no cittasaṁsaṭṭhasamuṭṭhānānuparivatti."}},{"id":"vb2:67","sourceIds":["vb2:67.1","vb2:67.2","vb2:67.3","vb2:67.4","vb2:67.5","vb2:67.6","vb2:67.7","vb2:67.8"],"kind":"text","text":{"pi":"Chāyatanā ajjhattikā.\nChāyatanā bāhirā.\nNavāyatanā upādā.\nDvāyatanā no upādā.\nDhammāyatanaṁ siyā upādā, siyā no upādā.\nPañcāyatanā upādinnā.\nSaddāyatanaṁ anupādinnaṁ.\nChāyatanā siyā upādinnā, siyā anupādinnā."}},{"id":"vb2:68","sourceIds":["vb2:68.0","vb2:68.1","vb2:68.2","vb2:68.3","vb2:68.4","vb2:68.5","vb2:68.6","vb2:68.7","vb2:68.8","vb2:68.9","vb2:68.10","vb2:68.11","vb2:68.12","vb2:68.13","vb2:68.14","vb2:68.15","vb2:68.16","vb2:68.17","vb2:68.18"],"kind":"text","text":{"pi":"3.2.11. Upādānagocchaka\nEkādasāyatanā no upādānā.\nDhammāyatanaṁ siyā upādānaṁ, siyā no upādānaṁ.\nDasāyatanā upādāniyā.\nDvāyatanā siyā upādāniyā, siyā anupādāniyā.\nDasāyatanā upādānavippayuttā.\nDvāyatanā siyā upādānasampayuttā, siyā upādānavippayuttā.\nDasāyatanā na vattabbā—\n“upādānā ceva upādāniyā cā”ti, upādāniyā ceva no ca upādānā.\nManāyatanaṁ na vattabbaṁ—\n“upādānañceva upādāniyañcā”ti, siyā upādāniyañceva no ca upādānaṁ, siyā na vattabbaṁ—“upādāniyañceva no ca upādānan”ti.\nDhammāyatanaṁ siyā upādānañceva upādāniyañca, siyā upādāniyañceva no ca upādānaṁ, siyā na vattabbaṁ—“upādānañceva upādāniyañcā”tipi, “upādāniyañceva no ca upādānan”tipi.\nDasāyatanā na vattabbā—\n“upādānā ceva upādānasampayuttā cā”tipi, “upādānasampayuttā ceva no ca upādānā”tipi.\nManāyatanaṁ na vattabbaṁ—\n“upādāniyañceva upādānasampayuttañcā”ti, siyā upādānasampayuttañceva no ca upādānaṁ, siyā na vattabbaṁ—“upādānasampayuttañceva no ca upādānan”ti.\nDhammāyatanaṁ siyā upādānañceva upādānasampayuttañca, siyā upādānasampayuttañceva no ca upādānaṁ, siyā na vattabbaṁ—“upādānañceva upādānasampayuttañcā”tipi, “upādānasampayuttañceva no ca upādānan”tipi.\nDasāyatanā upādānavippayuttaupādāniyā.\nDvāyatanā siyā upādānasampayuttaupādāniyā, siyā upādānavippayuttaanupādāniyā, siyā na vattabbā—“upādānavippayuttaupādāniyā”tipi, “upādānavippayuttaanupādāniyā”tipi."}},{"id":"vb2:69","sourceIds":["vb2:69.0","vb2:69.1","vb2:69.2","vb2:69.3","vb2:69.4","vb2:69.5","vb2:69.6","vb2:69.7","vb2:69.8","vb2:69.9","vb2:69.10","vb2:69.11","vb2:69.12","vb2:69.13","vb2:69.14","vb2:69.15","vb2:69.16","vb2:69.17","vb2:69.18"],"kind":"text","text":{"pi":"3.2.12. Kilesagocchaka\nEkādasāyatanā no kilesā.\nDhammāyatanaṁ siyā kileso, siyā no kileso.\nDasāyatanā saṅkilesikā.\nDvāyatanā siyā saṅkilesikā, siyā asaṅkilesikā.\nDasāyatanā asaṅkiliṭṭhā.\nDvāyatanā siyā saṅkiliṭṭhā, siyā asaṅkiliṭṭhā.\nDasāyatanā kilesavippayuttā.\nDvāyatanā siyā kilesasampayuttā, siyā kilesavippayuttā.\nDasāyatanā na vattabbā—\n“kilesā ceva saṅkilesikā cā”ti, saṅkilesikā ceva no ca kilesā.\nManāyatanaṁ na vattabbaṁ—\n“kileso ceva saṅkilesikañcā”ti, siyā saṅkilesikañceva no ca kileso, siyā na vattabbaṁ—“saṅkilesikañceva no ca kileso”ti.\nDhammāyatanaṁ siyā kileso ceva saṅkilesikañca, siyā saṅkilesikañceva no ca kileso, siyā na vattabbaṁ—“kileso ceva saṅkilesikañcā”tipi, “saṅkilesikañceva no ca kileso”tipi.\nDasāyatanā na vattabbā—\n“kilesā ceva saṅkiliṭṭhā cā”tipi, “saṅkiliṭṭhā ceva no ca kilesā”tipi.\nManāyatanaṁ na vattabbaṁ—\n“kileso ceva saṅkiliṭṭhañcā”ti, siyā saṅkiliṭṭhañceva no ca kileso, siyā na vattabbaṁ—“saṅkiliṭṭhañceva no ca kileso”ti.\nDhammāyatanaṁ siyā kileso ceva saṅkiliṭṭhañca, siyā saṅkiliṭṭhañceva no ca kileso, siyā na vattabbaṁ—“kileso ceva saṅkiliṭṭhañcā”tipi, “saṅkiliṭṭhañceva no ca kileso”tipi."}},{"id":"vb2:70","sourceIds":["vb2:70.1","vb2:70.2","vb2:70.3","vb2:70.4","vb2:70.5","vb2:70.6","vb2:70.7"],"kind":"text","text":{"pi":"Dasāyatanā na vattabbā—\n“kilesā ceva kilesasampayuttā cā”tipi, “kilesasampayuttā ceva no ca kilesā”tipi.\nManāyatanaṁ na vattabbaṁ—\n“kileso ceva kilesasampayuttañcā”ti, siyā kilesasampayuttañceva no ca kileso, siyā na vattabbaṁ—“kilesasampayuttañceva no ca kileso”ti.\nDhammāyatanaṁ siyā kileso ceva kilesasampayuttañca, siyā kilesasampayuttañceva no ca kileso, siyā na vattabbaṁ—“kileso ceva kilesasampayuttañcā”tipi, “kilesasampayuttañceva no ca kileso”tipi.\nDasāyatanā kilesavippayuttasaṅkilesikā.\nDvāyatanā siyā kilesavippayuttasaṅkilesikā, siyā kilesavippayuttaasaṅkilesikā, siyā na vattabbā—“kilesavippayuttasaṅkilesikā”tipi, “kilesavippayuttaasaṅkilesikā”tipi."}},{"id":"vb2:71","sourceIds":["vb2:71.0","vb2:71.1","vb2:71.2","vb2:71.3","vb2:71.4","vb2:71.5","vb2:71.6","vb2:71.7","vb2:71.8","vb2:71.9","vb2:71.10","vb2:71.11","vb2:71.12","vb2:71.13","vb2:71.14","vb2:71.15","vb2:71.16","vb2:71.17","vb2:71.18","vb2:71.19","vb2:71.20"],"kind":"text","text":{"pi":"3.2.13. Piṭṭhiduka\nDasāyatanā na dassanena pahātabbā.\nDvāyatanā siyā dassanena pahātabbā, siyā na dassanena pahātabbā.\nDasāyatanā na bhāvanāya pahātabbā.\nDvāyatanā siyā bhāvanāya pahātabbā, siyā na bhāvanāya pahātabbā.\nDasāyatanā na dassanena pahātabbahetukā.\nDvāyatanā siyā dassanena pahātabbahetukā, siyā na dassanena pahātabbahetukā.\nDasāyatanā na bhāvanāya pahātabbahetukā.\nDvāyatanā siyā bhāvanāya pahātabbahetukā, siyā na bhāvanāya pahātabbahetukā.\nDasāyatanā avitakkā.\nDvāyatanā siyā savitakkā, siyā avitakkā.\nDasāyatanā avicārā.\nDvāyatanā siyā savicārā, siyā avicārā.\nDasāyatanā appītikā.\nDvāyatanā siyā sappītikā, siyā appītikā.\nDasāyatanā na pītisahagatā.\nDvāyatanā siyā pītisahagatā, siyā na pītisahagatā.\nDasāyatanā na sukhasahagatā.\nDvāyatanā siyā sukhasahagatā, siyā na sukhasahagatā.\nDasāyatanā na upekkhāsahagatā.\nDvāyatanā siyā upekkhāsahagatā, siyā na upekkhāsahagatā."}},{"id":"vb2:72","sourceIds":["vb2:72.1","vb2:72.2","vb2:72.3","vb2:72.4","vb2:72.5","vb2:72.6","vb2:72.7","vb2:72.8","vb2:72.9","vb2:72.10","vb2:72.11","vb2:72.12","vb2:72.13","vb2:72.14","vb2:72.15","vb2:72.16"],"kind":"text","text":{"pi":"Dasāyatanā kāmāvacarā.\nDvāyatanā siyā kāmāvacarā, siyā na kāmāvacarā.\nDasāyatanā na rūpāvacarā.\nDvāyatanā siyā rūpāvacarā, siyā na rūpāvacarā.\nDasāyatanā na arūpāvacarā.\nDvāyatanā siyā arūpāvacarā, siyā na arūpāvacarā.\nDasāyatanā pariyāpannā.\nDvāyatanā siyā pariyāpannā, siyā apariyāpannā.\nDasāyatanā aniyyānikā.\nDvāyatanā siyā niyyānikā, siyā aniyyānikā.\nDasāyatanā aniyatā.\nDvāyatanā siyā niyatā, siyā aniyatā.\nDasāyatanā sauttarā.\nDvāyatanā siyā sauttarā, siyā anuttarā.\nDasāyatanā araṇā.\nDvāyatanā siyā saraṇā, siyā araṇāti."}},{"id":"vb2:73","sourceIds":["vb2:73.1"],"kind":"text","text":{"pi":"Pañhāpucchakaṁ."}},{"id":"vb2:74","sourceIds":["vb2:74.1"],"kind":"text","text":{"pi":"Āyatanavibhaṅgo niṭṭhito."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/vb2/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}