{"id":"vb3","title":"Dhātuvibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"vb3","title":"Dhātuvibhaṅga","units":[{"id":"vb3:0","sourceIds":["vb3:0.1","vb3:0.2"],"kind":"text","text":{"pi":"Vibhaṅga\nDhātuvibhaṅga"}},{"id":"vb3:1","sourceIds":["vb3:1.0","vb3:1.1","vb3:1.2"],"kind":"text","text":{"pi":"1. Suttantabhājanīya\nCha dhātuyo—\npathavīdhātu, āpodhātu, tejodhātu, vāyodhātu, ākāsadhātu, viññāṇadhātu."}},{"id":"vb3:2","sourceIds":["vb3:2.1","vb3:2.2","vb3:2.3","vb3:2.4","vb3:2.5","vb3:2.6","vb3:2.7"],"kind":"text","text":{"pi":"Tattha katamā pathavīdhātu?\nPathavīdhātudvayaṁ—\natthi ajjhattikā, atthi bāhirā.\nTattha katamā ajjhattikā pathavīdhātu?\nYaṁ ajjhattaṁ paccattaṁ kakkhaḷaṁ kharigataṁ kakkhaḷattaṁ kakkhaḷabhāvo ajjhattaṁ upādinnaṁ, seyyathidaṁ—\nkesā lomā nakhā dantā taco maṁsaṁ nhāru aṭṭhi aṭṭhimiñjaṁ vakkaṁ hadayaṁ yakanaṁ kilomakaṁ pihakaṁ papphāsaṁ antaṁ antaguṇaṁ udariyaṁ karīsaṁ, yaṁ vā panaññampi atthi ajjhattaṁ paccattaṁ kakkhaḷaṁ kharigataṁ kakkhaḷattaṁ kakkhaḷabhāvo ajjhattaṁ upādinnaṁ—\nayaṁ vuccati “ajjhattikā pathavīdhātu”."}},{"id":"vb3:3","sourceIds":["vb3:3.1","vb3:3.2","vb3:3.3","vb3:3.4","vb3:3.5","vb3:3.6"],"kind":"text","text":{"pi":"Tattha katamā bāhirā pathavīdhātu?\nYaṁ bāhiraṁ kakkhaḷaṁ kharigataṁ kakkhaḷattaṁ kakkhaḷabhāvo bahiddhā anupādinnaṁ, seyyathidaṁ—\nayo lohaṁ tipu sīsaṁ sajjhaṁ muttā maṇi veḷuriyo saṅkho silā pavāḷaṁ rajataṁ jātarūpaṁ lohitaṅko masāragallaṁ tiṇaṁ kaṭṭhaṁ sakkharā kaṭhalaṁ bhūmi pāsāṇo pabbato, yaṁ vā panaññampi atthi bāhiraṁ kakkhaḷaṁ kharigataṁ kakkhaḷattaṁ kakkhaḷabhāvo bahiddhā anupādinnaṁ—\nayaṁ vuccati “bāhirā pathavīdhātu”.\nYā ca ajjhattikā pathavīdhātu yā ca bāhirā pathavīdhātu, tadekajjhaṁ abhisaññūhitvā abhisaṅkhipitvā—\nayaṁ vuccati “pathavīdhātu”."}},{"id":"vb3:4","sourceIds":["vb3:4.1","vb3:4.2","vb3:4.3","vb3:4.4","vb3:4.5","vb3:4.6","vb3:4.7"],"kind":"text","text":{"pi":"Tattha katamā āpodhātu?\nĀpodhātudvayaṁ—\natthi ajjhattikā, atthi bāhirā.\nTattha katamā ajjhattikā āpodhātu?\nYaṁ ajjhattaṁ paccattaṁ āpo āpogataṁ sineho sinehagataṁ bandhanattaṁ rūpassa ajjhattaṁ upādinnaṁ, seyyathidaṁ—\npittaṁ semhaṁ pubbo lohitaṁ sedo medo assu vasā kheḷo siṅghāṇikā lasikā muttaṁ, yaṁ vā panaññampi atthi ajjhattaṁ paccattaṁ āpo āpogataṁ sineho sinehagataṁ bandhanattaṁ rūpassa ajjhattaṁ upādinnaṁ—\nayaṁ vuccati “ajjhattikā āpodhātu”."}},{"id":"vb3:5","sourceIds":["vb3:5.1","vb3:5.2","vb3:5.3","vb3:5.4","vb3:5.5","vb3:5.6"],"kind":"text","text":{"pi":"Tattha katamā bāhirā āpodhātu?\nYaṁ bāhiraṁ āpo āpogataṁ sineho sinehagataṁ bandhanattaṁ rūpassa bahiddhā anupādinnaṁ, seyyathidaṁ—\nmūlaraso khandharaso tacaraso pattaraso puppharaso phalaraso khīraṁ dadhi sappi navanītaṁ telaṁ madhu phāṇitaṁ bhummāni vā udakāni antalikkhāni vā, yaṁ vā panaññampi atthi bāhiraṁ āpo āpogataṁ sineho sinehagataṁ bandhanattaṁ rūpassa bahiddhā anupādinnaṁ—\nayaṁ vuccati “bāhirā āpodhātu”.\nYā ca ajjhattikā āpodhātu yā ca bāhirā āpodhātu, tadekajjhaṁ abhisaññūhitvā abhisaṅkhipitvā—\nayaṁ vuccati “āpodhātu”."}},{"id":"vb3:6","sourceIds":["vb3:6.1","vb3:6.2","vb3:6.3","vb3:6.4","vb3:6.5","vb3:6.6","vb3:6.7"],"kind":"text","text":{"pi":"Tattha katamā tejodhātu?\nTejodhātudvayaṁ—\natthi ajjhattikā, atthi bāhirā.\nTattha katamā ajjhattikā tejodhātu?\nYaṁ ajjhattaṁ paccattaṁ tejo tejogataṁ usmā usmāgataṁ usumaṁ usumagataṁ ajjhattaṁ upādinnaṁ, seyyathidaṁ—\nyena ca santappati yena ca jīrīyati yena ca pariḍayhati yena ca asitapītakhāyitasāyitaṁ sammā pariṇāmaṁ gacchati, yaṁ vā panaññampi atthi ajjhattaṁ paccattaṁ tejo tejogataṁ usmā usmāgataṁ usumaṁ usumagataṁ ajjhattaṁ upādinnaṁ—\nayaṁ vuccati “ajjhattikā tejodhātu”."}},{"id":"vb3:7","sourceIds":["vb3:7.1","vb3:7.2","vb3:7.3","vb3:7.4","vb3:7.5","vb3:7.6"],"kind":"text","text":{"pi":"Tattha katamā bāhirā tejodhātu?\nYaṁ bāhiraṁ tejo tejogataṁ usmā usmāgataṁ usumaṁ usumagataṁ bahiddhā anupādinnaṁ, seyyathidaṁ—\nkaṭṭhaggi palālaggi tiṇaggi gomayaggi thusaggi saṅkāraggi indaggi aggisantāpo sūriyasantāpo kaṭṭhasannicayasantāpo tiṇasannicayasantāpo dhaññasannicayasantāpo bhaṇḍasannicayasantāpo, yaṁ vā panaññampi atthi bāhiraṁ tejo tejogataṁ usmā usmāgataṁ usumaṁ usumagataṁ bahiddhā anupādinnaṁ—\nayaṁ vuccati “bāhirā tejodhātu”.\nYā ca ajjhattikā tejodhātu yā ca bāhirā tejodhātu, tadekajjhaṁ abhisaññūhitvā abhisaṅkhipitvā—\nayaṁ vuccati “tejodhātu”."}},{"id":"vb3:8","sourceIds":["vb3:8.1","vb3:8.2","vb3:8.3","vb3:8.4","vb3:8.5","vb3:8.6","vb3:8.7"],"kind":"text","text":{"pi":"Tattha katamā vāyodhātu?\nVāyodhātudvayaṁ—\natthi ajjhattikā, atthi bāhirā.\nTattha katamā ajjhattikā vāyodhātu?\nYaṁ ajjhattaṁ paccattaṁ vāyo vāyogataṁ thambhitattaṁ rūpassa ajjhattaṁ upādinnaṁ, seyyathidaṁ—\nuddhaṅgamā vātā adhogamā vātā kucchisayā vātā koṭṭhāsayā vātā aṅgamaṅgānusārino vātā satthakavātā khurakavātā uppalakavātā assāso passāso iti vā, yaṁ vā panaññampi atthi ajjhattaṁ paccattaṁ vāyo vāyogataṁ thambhitattaṁ rūpassa ajjhattaṁ upādinnaṁ—\nayaṁ vuccati “ajjhattikā vāyodhātu”."}},{"id":"vb3:9","sourceIds":["vb3:9.1","vb3:9.2","vb3:9.3","vb3:9.4","vb3:9.5","vb3:9.6"],"kind":"text","text":{"pi":"Tattha katamā bāhirā vāyodhātu?\nYaṁ bāhiraṁ vāyo vāyogataṁ thambhitattaṁ rūpassa bahiddhā anupādinnaṁ, seyyathidaṁ—\npuratthimā vātā pacchimā vātā uttarā vātā dakkhiṇā vātā sarajā vātā arajā vātā sītā vātā uṇhā vātā parittā vātā adhimattā vātā kāḷavātā verambhavātā pakkhavātā supaṇṇavātā tālavaṇṭavātā vidhūpanavātā, yaṁ vā panaññampi atthi bāhiraṁ vāyo vāyogataṁ thambhitattaṁ rūpassa bahiddhā anupādinnaṁ—\nayaṁ vuccati “bāhirā vāyodhātu”.\nYā ca ajjhattikā vāyodhātu yā ca bāhirā vāyodhātu, tadekajjhaṁ abhisaññūhitvā abhisaṅkhipitvā—\nayaṁ vuccati “vāyodhātu”."}},{"id":"vb3:10","sourceIds":["vb3:10.1","vb3:10.2","vb3:10.3","vb3:10.4","vb3:10.5","vb3:10.6","vb3:10.7"],"kind":"text","text":{"pi":"Tattha katamā ākāsadhātu?\nĀkāsadhātudvayaṁ—\natthi ajjhattikā, atthi bāhirā.\nTattha katamā ajjhattikā ākāsadhātu?\nYaṁ ajjhattaṁ paccattaṁ ākāso ākāsagataṁ aghaṁ aghagataṁ vivaro vivaragataṁ asamphuṭṭhaṁ maṁsalohitehi ajjhattaṁ upādinnaṁ, seyyathidaṁ—\nkaṇṇacchiddaṁ nāsacchiddaṁ mukhadvāraṁ, yena ca asitapītakhāyitasāyitaṁ ajjhoharati, yattha ca asitapītakhāyitasāyitaṁ santiṭṭhati, yena ca asitapītakhāyitasāyitaṁ adhobhāgaṁ nikkhamati, yaṁ vā panaññampi atthi ajjhattaṁ paccattaṁ ākāso ākāsagataṁ aghaṁ aghagataṁ vivaro vivaragataṁ asamphuṭṭhaṁ maṁsalohitehi ajjhattaṁ upādinnaṁ—\nayaṁ vuccati “ajjhattikā ākāsadhātu”."}},{"id":"vb3:11","sourceIds":["vb3:11.1","vb3:11.2","vb3:11.3","vb3:11.4","vb3:11.5"],"kind":"text","text":{"pi":"Tattha katamā bāhirā ākāsadhātu?\nYaṁ bāhiraṁ ākāso ākāsagataṁ aghaṁ aghagataṁ vivaro vivaragataṁ asamphuṭṭhaṁ catūhi mahābhūtehi bahiddhā anupādinnaṁ—\nayaṁ vuccati “bāhirā ākāsadhātu”.\nYā ca ajjhattikā ākāsadhātu yā ca bāhirā ākāsadhātu, tadekajjhaṁ abhisaññūhitvā abhisaṅkhipitvā—\nayaṁ vuccati “ākāsadhātu”."}},{"id":"vb3:12","sourceIds":["vb3:12.1","vb3:12.2","vb3:12.3"],"kind":"text","text":{"pi":"Tattha katamā viññāṇadhātu?\nCakkhuviññāṇadhātu, sotaviññāṇadhātu, ghānaviññāṇadhātu, jivhāviññāṇadhātu, kāyaviññāṇadhātu, manoviññāṇadhātu—\nayaṁ vuccati “viññāṇadhātu”."}},{"id":"vb3:13","sourceIds":["vb3:13.1"],"kind":"text","text":{"pi":"Imā cha dhātuyo."}},{"id":"vb3:14","sourceIds":["vb3:14.1","vb3:14.2"],"kind":"text","text":{"pi":"Aparāpi cha dhātuyo—\nsukhadhātu, dukkhadhātu, somanassadhātu, domanassadhātu, upekkhādhātu, avijjādhātu."}},{"id":"vb3:15","sourceIds":["vb3:15.1","vb3:15.2","vb3:15.3"],"kind":"text","text":{"pi":"Tattha katamā sukhadhātu?\nYaṁ kāyikaṁ sātaṁ kāyikaṁ sukhaṁ kāyasamphassajaṁ sātaṁ sukhaṁ vedayitaṁ kāyasamphassajā sātā sukhā vedanā—\nayaṁ vuccati “sukhadhātu”."}},{"id":"vb3:16","sourceIds":["vb3:16.1","vb3:16.2","vb3:16.3"],"kind":"text","text":{"pi":"Tattha katamā dukkhadhātu?\nYaṁ kāyikaṁ asātaṁ kāyikaṁ dukkhaṁ kāyasamphassajaṁ asātaṁ dukkhaṁ vedayitaṁ kāyasamphassajā asātā dukkhā vedanā—\nayaṁ vuccati “dukkhadhātu”."}},{"id":"vb3:17","sourceIds":["vb3:17.1","vb3:17.2","vb3:17.3"],"kind":"text","text":{"pi":"Tattha katamā somanassadhātu?\nYaṁ cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—\nayaṁ vuccati “somanassadhātu”."}},{"id":"vb3:18","sourceIds":["vb3:18.1","vb3:18.2","vb3:18.3"],"kind":"text","text":{"pi":"Tattha katamā domanassadhātu?\nYaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—\nayaṁ vuccati “domanassadhātu”."}},{"id":"vb3:19","sourceIds":["vb3:19.1","vb3:19.2","vb3:19.3"],"kind":"text","text":{"pi":"Tattha katamā upekkhādhātu?\nYaṁ cetasikaṁ neva sātaṁ nāsātaṁ cetosamphassajaṁ adukkhamasukhaṁ vedayitaṁ cetosamphassajā adukkhamasukhā vedanā—\nayaṁ vuccati “upekkhādhātu”."}},{"id":"vb3:20","sourceIds":["vb3:20.1","vb3:20.2","vb3:20.3"],"kind":"text","text":{"pi":"Tattha katamā avijjādhātu?\nYaṁ aññāṇaṁ adassanaṁ anabhisamayo ananubodho asambodho appaṭivedho asaṅgāhaṇā apariyogāhaṇā asamapekkhanā apaccavekkhaṇā apaccakkhakammaṁ dummejjhaṁ bālyaṁ asampajaññaṁ moho pamoho sammoho avijjā avijjogho avijjāyogo avijjānusayo avijjāpariyuṭṭhānaṁ avijjālaṅgī moho akusalamūlaṁ—\nayaṁ vuccati “avijjādhātu”."}},{"id":"vb3:21","sourceIds":["vb3:21.1"],"kind":"text","text":{"pi":"Imā cha dhātuyo."}},{"id":"vb3:22","sourceIds":["vb3:22.1","vb3:22.2"],"kind":"text","text":{"pi":"Aparāpi cha dhātuyo—\nkāmadhātu, byāpādadhātu, vihiṁsādhātu, nekkhammadhātu, abyāpādadhātu, avihiṁsādhātu."}},{"id":"vb3:23","sourceIds":["vb3:23.1","vb3:23.2","vb3:23.3","vb3:23.4","vb3:23.5"],"kind":"text","text":{"pi":"Tattha katamā kāmadhātu?\nKāmapaṭisaṁyutto takko vitakko saṅkappo appanā byappanā cetaso abhiniropanā micchāsaṅkappo—\nayaṁ vuccati kāmadhātu.\nHeṭṭhato avīcinirayaṁ pariyantaṁ karitvā uparito paranimmitavasavattī deve anto karitvā yaṁ etasmiṁ antare etthāvacarā ettha pariyāpannā khandhadhātuāyatanā rūpā vedanā saññā saṅkhārā viññāṇaṁ—\nayaṁ vuccati “kāmadhātu”."}},{"id":"vb3:24","sourceIds":["vb3:24.1","vb3:24.2","vb3:24.3","vb3:24.4","vb3:24.5"],"kind":"text","text":{"pi":"Tattha katamā byāpādadhātu?\nByāpādapaṭisaṁyutto takko vitakko …pe… micchāsaṅkappo—\nayaṁ vuccati “byāpādadhātu”.\nDasasu vā āghātavatthūsu cittassa āghāto paṭighāto paṭighaṁ paṭivirodho kopo pakopo sampakopo doso padoso sampadoso cittassa byāpatti manopadoso kodho kujjhanā kujjhitattaṁ doso dussanā dussitattaṁ byāpatti byāpajjanā virodho paṭivirodho caṇḍikkaṁ asuropo anattamanatā cittassa—\nayaṁ vuccati “byāpādadhātu”."}},{"id":"vb3:25","sourceIds":["vb3:25.1","vb3:25.2","vb3:25.3","vb3:25.4","vb3:25.5"],"kind":"text","text":{"pi":"Tattha katamā vihiṁsādhātu?\nVihiṁsāpaṭisaṁyutto takko vitakko …pe… micchāsaṅkappo—\nayaṁ vuccati “vihiṁsādhātu”.\nIdhekacco pāṇinā vā leḍḍunā vā daṇḍena vā satthena vā rajjuyā vā aññataraññatarena satte viheṭheti, yā evarūpā heṭhanā viheṭhanā hiṁsanā vihiṁsanā rosanā virosanā parūpaghāto—\nayaṁ vuccati “vihiṁsādhātu”."}},{"id":"vb3:26","sourceIds":["vb3:26.1","vb3:26.2","vb3:26.3","vb3:26.4"],"kind":"text","text":{"pi":"Tattha katamā nekkhammadhātu?\nNekkhammapaṭisaṁyutto takko vitakko …pe… sammāsaṅkappo—\nayaṁ vuccati “nekkhammadhātu”.\nSabbepi kusalā dhammā “nekkhammadhātu”."}},{"id":"vb3:27","sourceIds":["vb3:27.1","vb3:27.2","vb3:27.3","vb3:27.4","vb3:27.5"],"kind":"text","text":{"pi":"Tattha katamā abyāpādadhātu?\nAbyāpādapaṭisaṁyutto takko vitakko …pe… sammāsaṅkappo—\nayaṁ vuccati “abyāpādadhātu”.\nYā sattesu metti mettāyanā mettāyitattaṁ mettācetovimutti—\nayaṁ vuccati “abyāpādadhātu”."}},{"id":"vb3:28","sourceIds":["vb3:28.1","vb3:28.2","vb3:28.3","vb3:28.4","vb3:28.5"],"kind":"text","text":{"pi":"Tattha katamā avihiṁsādhātu?\nAvihiṁsāpaṭisaṁyutto takko vitakko saṅkappo appanā byappanā cetaso abhiniropanā sammāsaṅkappo—\nayaṁ vuccati “avihiṁsādhātu”.\nYā sattesu karuṇā karuṇāyanā karuṇāyitattaṁ karuṇācetovimutti—\nayaṁ vuccati “avihiṁsādhātu”."}},{"id":"vb3:29","sourceIds":["vb3:29.1"],"kind":"text","text":{"pi":"Imā cha dhātuyo."}},{"id":"vb3:30","sourceIds":["vb3:30.1"],"kind":"text","text":{"pi":"Iti imāni tīṇi chakkāni tadekajjhaṁ abhisaññūhitvā abhisaṅkhipitvā aṭṭhārasa dhātuyo honti."}},{"id":"vb3:31","sourceIds":["vb3:31.1"],"kind":"text","text":{"pi":"Suttantabhājanīyaṁ."}},{"id":"vb3:32","sourceIds":["vb3:32.0","vb3:32.1","vb3:32.2"],"kind":"text","text":{"pi":"2. Abhidhammabhājanīya\nAṭṭhārasa dhātuyo—\ncakkhudhātu, rūpadhātu, cakkhuviññāṇadhātu, sotadhātu, saddadhātu, sotaviññāṇadhātu, ghānadhātu, gandhadhātu, ghānaviññāṇadhātu, jivhādhātu, rasadhātu, jivhāviññāṇadhātu, kāyadhātu, phoṭṭhabbadhātu, kāyaviññāṇadhātu, manodhātu, dhammadhātu, manoviññāṇadhātu."}},{"id":"vb3:33","sourceIds":["vb3:33.1","vb3:33.2","vb3:33.3"],"kind":"text","text":{"pi":"Tattha katamā cakkhudhātu?\nYaṁ cakkhu catunnaṁ mahābhūtānaṁ upādāya pasādo …pe… suñño gāmopeso—\nayaṁ vuccati “cakkhudhātu”."}},{"id":"vb3:34","sourceIds":["vb3:34.1","vb3:34.2","vb3:34.3"],"kind":"text","text":{"pi":"Tattha katamā rūpadhātu?\nYaṁ rūpaṁ catunnaṁ mahābhūtānaṁ upādāya vaṇṇanibhā …pe… rūpadhātupesā—\nayaṁ vuccati “rūpadhātu”."}},{"id":"vb3:35","sourceIds":["vb3:35.1","vb3:35.2","vb3:35.3"],"kind":"text","text":{"pi":"Tattha katamā cakkhuviññāṇadhātu?\nCakkhuñca paṭicca rūpe ca uppajjati cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjācakkhuviññāṇadhātu—\nayaṁ vuccati “cakkhuviññāṇadhātu”."}},{"id":"vb3:36","sourceIds":["vb3:36.1","vb3:36.2","vb3:36.3"],"kind":"text","text":{"pi":"Tattha katamā sotadhātu?\nYaṁ sotaṁ catunnaṁ mahābhūtānaṁ upādāya pasādo …pe… suñño gāmopeso—\nayaṁ vuccati “sotadhātu”."}},{"id":"vb3:37","sourceIds":["vb3:37.1","vb3:37.2","vb3:37.3"],"kind":"text","text":{"pi":"Tattha katamā saddadhātu?\nYo saddo catunnaṁ mahābhūtānaṁ upādāya anidassano sappaṭigho …pe… saddadhātupesā—\nayaṁ vuccati “saddadhātu”."}},{"id":"vb3:38","sourceIds":["vb3:38.1","vb3:38.2","vb3:38.3"],"kind":"text","text":{"pi":"Tattha katamā sotaviññāṇadhātu?\nSotañca paṭicca sadde ca uppajjati cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāsotaviññāṇadhātu—\nayaṁ vuccati “sotaviññāṇadhātu”."}},{"id":"vb3:39","sourceIds":["vb3:39.1","vb3:39.2","vb3:39.3"],"kind":"text","text":{"pi":"Tattha katamā ghānadhātu?\nYaṁ ghānaṁ catunnaṁ mahābhūtānaṁ upādāya pasādo …pe… suñño gāmopeso—\nayaṁ vuccati “ghānadhātu”."}},{"id":"vb3:40","sourceIds":["vb3:40.1","vb3:40.2","vb3:40.3"],"kind":"text","text":{"pi":"Tattha katamā gandhadhātu?\nYo gandho catunnaṁ mahābhūtānaṁ upādāya anidassano sappaṭigho …pe… gandhadhātupesā—\nayaṁ vuccati “gandhadhātu”."}},{"id":"vb3:41","sourceIds":["vb3:41.1","vb3:41.2","vb3:41.3"],"kind":"text","text":{"pi":"Tattha katamā ghānaviññāṇadhātu?\nGhānañca paṭicca gandhe ca uppajjati cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāghānaviññāṇadhātu—\nayaṁ vuccati “ghānaviññāṇadhātu”."}},{"id":"vb3:42","sourceIds":["vb3:42.1","vb3:42.2","vb3:42.3"],"kind":"text","text":{"pi":"Tattha katamā jivhādhātu?\nYā jivhā catunnaṁ mahābhūtānaṁ upādāya pasādo …pe… suñño gāmopeso—\nayaṁ vuccati “jivhādhātu”."}},{"id":"vb3:43","sourceIds":["vb3:43.1","vb3:43.2","vb3:43.3"],"kind":"text","text":{"pi":"Tattha katamā rasadhātu?\nYo raso catunnaṁ mahābhūtānaṁ upādāya anidassano sappaṭigho …pe… rasadhātupesā—\nayaṁ vuccati “rasadhātu”."}},{"id":"vb3:44","sourceIds":["vb3:44.1","vb3:44.2","vb3:44.3"],"kind":"text","text":{"pi":"Tattha katamā jivhāviññāṇadhātu?\nJivhañca paṭicca rase ca uppajjati cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjājivhāviññāṇadhātu—\nayaṁ vuccati “jivhāviññāṇadhātu”."}},{"id":"vb3:45","sourceIds":["vb3:45.1","vb3:45.2","vb3:45.3"],"kind":"text","text":{"pi":"Tattha katamā kāyadhātu?\nYo kāyo catunnaṁ mahābhūtānaṁ upādāya pasādo …pe… suñño gāmopeso—\nayaṁ vuccati “kāyadhātu”."}},{"id":"vb3:46","sourceIds":["vb3:46.1","vb3:46.2","vb3:46.3"],"kind":"text","text":{"pi":"Tattha katamā phoṭṭhabbadhātu?\nPathavīdhātu …pe… phoṭṭhabbadhātupesā—\nayaṁ vuccati “phoṭṭhabbadhātu”."}},{"id":"vb3:47","sourceIds":["vb3:47.1","vb3:47.2","vb3:47.3"],"kind":"text","text":{"pi":"Tattha katamā kāyaviññāṇadhātu?\nKāyañca paṭicca phoṭṭhabbe ca uppajjati cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjākāyaviññāṇadhātu—\nayaṁ vuccati “kāyaviññāṇadhātu”."}},{"id":"vb3:48","sourceIds":["vb3:48.1","vb3:48.2","vb3:48.3","vb3:48.4","vb3:48.5","vb3:48.6","vb3:48.7"],"kind":"text","text":{"pi":"Tattha katamā manodhātu?\nCakkhuviññāṇadhātuyā uppajjitvā niruddhasamanantarā uppajjati cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanodhātu;\nsotaviññāṇadhātuyā …pe…\nghānaviññāṇadhātuyā …pe…\njivhāviññāṇadhātuyā …pe…\nkāyaviññāṇadhātuyā uppajjitvā niruddhasamanantarā uppajjati cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanodhātu sabbadhammesu vā pana paṭhamasamannāhāro uppajjati cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanodhātu—\nayaṁ vuccati “manodhātu”."}},{"id":"vb3:49","sourceIds":["vb3:49.1","vb3:49.2"],"kind":"text","text":{"pi":"Tattha katamā dhammadhātu?\nVedanākkhandho, saññākkhandho, saṅkhārakkhandho, yañca rūpaṁ anidassanaappaṭighaṁ dhammāyatanapariyāpannaṁ, asaṅkhatā ca dhātu."}},{"id":"vb3:50","sourceIds":["vb3:50.1","vb3:50.2","vb3:50.3","vb3:50.4","vb3:50.5","vb3:50.6","vb3:50.7","vb3:50.8","vb3:50.9","vb3:50.10"],"kind":"text","text":{"pi":"Tattha katamo vedanākkhandho?\nEkavidhena vedanākkhandho—\nphassasampayutto.\nDuvidhena vedanākkhandho—\natthi sahetuko, atthi ahetuko.\nTividhena vedanākkhandho—\natthi kusalo, atthi akusalo, atthi abyākato …pe…\nevaṁ dasavidhena vedanākkhandho …pe…\nevaṁ bahuvidhena vedanākkhandho.\nAyaṁ vuccati “vedanākkhandho”."}},{"id":"vb3:51","sourceIds":["vb3:51.1","vb3:51.2","vb3:51.3","vb3:51.4","vb3:51.5","vb3:51.6","vb3:51.7","vb3:51.8","vb3:51.9","vb3:51.10"],"kind":"text","text":{"pi":"Tattha katamo saññākkhandho?\nEkavidhena saññākkhandho—\nphassasampayutto.\nDuvidhena saññākkhandho—\natthi sahetuko, atthi ahetuko.\nTividhena saññākkhandho—\natthi kusalo, atthi akusalo, atthi abyākato …pe…\nevaṁ dasavidhena saññākkhandho …pe…\nevaṁ bahuvidhena saññākkhandho.\nAyaṁ vuccati “saññākkhandho”."}},{"id":"vb3:52","sourceIds":["vb3:52.1","vb3:52.2","vb3:52.3","vb3:52.4","vb3:52.5","vb3:52.6","vb3:52.7","vb3:52.8","vb3:52.9","vb3:52.10"],"kind":"text","text":{"pi":"Tattha katamo saṅkhārakkhandho?\nEkavidhena saṅkhārakkhandho—\ncittasampayutto.\nDuvidhena saṅkhārakkhandho—\natthi hetu, atthi ahetu.\nTividhena saṅkhārakkhandho—\natthi kusalo, atthi akusalo, atthi abyākato …pe…\nevaṁ dasavidhena saṅkhārakkhandho …pe…\nevaṁ bahuvidhena saṅkhārakkhandho—\nayaṁ vuccati “saṅkhārakkhandho”."}},{"id":"vb3:53","sourceIds":["vb3:53.1","vb3:53.2","vb3:53.3"],"kind":"text","text":{"pi":"Tattha katamaṁ rūpaṁ anidassanaappaṭighaṁ dhammāyatanapariyāpannaṁ?\nItthindriyaṁ …pe… kabaḷīkāro āhāro—\nidaṁ vuccati rūpaṁ “anidassanaappaṭighaṁ dhammāyatanapariyāpannaṁ”."}},{"id":"vb3:54","sourceIds":["vb3:54.1","vb3:54.2","vb3:54.3","vb3:54.4"],"kind":"text","text":{"pi":"Tattha katamā asaṅkhatā dhātu?\nRāgakkhayo, dosakkhayo, mohakkhayo—\nayaṁ vuccati “asaṅkhatā dhātu”.\nAyaṁ vuccati “dhammadhātu”. –17"}},{"id":"vb3:55","sourceIds":["vb3:55.1","vb3:55.2","vb3:55.3","vb3:55.4","vb3:55.5","vb3:55.6","vb3:55.7"],"kind":"text","text":{"pi":"Tattha katamā manoviññāṇadhātu?\nCakkhuviññāṇadhātuyā uppajjitvā niruddhasamanantarā uppajjati manodhātu, manodhātuyā uppajjitvā niruddhasamanantarā uppajjati cittaṁ mano mānasaṁ …pe… tajjāmanoviññāṇadhātu;\nsotaviññāṇadhātuyā …pe…\nghānaviññāṇadhātuyā …pe…\njivhāviññāṇadhātuyā …pe…\nkāyaviññāṇadhātuyā uppajjitvā niruddhasamanantarā uppajjati manodhātu, manodhātuyāpi uppajjitvā niruddhasamanantarā uppajjati cittaṁ mano mānasaṁ …pe… tajjāmanoviññāṇadhātu manañca paṭicca dhamme ca uppajjati cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—\nayaṁ vuccati “manoviññāṇadhātu”."}},{"id":"vb3:56","sourceIds":["vb3:56.1"],"kind":"text","text":{"pi":"Abhidhammabhājanīyaṁ."}},{"id":"vb3:57","sourceIds":["vb3:57.0","vb3:57.1","vb3:57.2"],"kind":"text","text":{"pi":"3. Pañhāpucchaka\nAṭṭhārasa dhātuyo—\ncakkhudhātu, rūpadhātu, cakkhuviññāṇadhātu, sotadhātu, saddadhātu, sotaviññāṇadhātu, ghānadhātu, gandhadhātu, ghānaviññāṇadhātu, jivhādhātu, rasadhātu, jivhāviññāṇadhātu, kāyadhātu, phoṭṭhabbadhātu, kāyaviññāṇadhātu, manodhātu, dhammadhātu, manoviññāṇadhātu."}},{"id":"vb3:58","sourceIds":["vb3:58.1"],"kind":"text","text":{"pi":"Aṭṭhārasannaṁ dhātūnaṁ kati kusalā, kati akusalā, kati abyākatā …pe… kati saraṇā, kati araṇā?"}},{"id":"vb3:59","sourceIds":["vb3:59.0","vb3:59.1","vb3:59.2"],"kind":"text","text":{"pi":"3.1. Tika\nSoḷasa dhātuyo abyākatā.\nDve dhātuyo siyā kusalā, siyā akusalā, siyā abyākatā."}},{"id":"vb3:60","sourceIds":["vb3:60.1","vb3:60.2","vb3:60.3","vb3:60.4","vb3:60.5","vb3:60.6"],"kind":"text","text":{"pi":"Dasa dhātuyo na vattabbā—\n“sukhāya vedanāya sampayuttā”tipi, “dukkhāya vedanāya sampayuttā”tipi, “adukkhamasukhāya vedanāya sampayuttā”tipi.\nPañca dhātuyo adukkhamasukhāya vedanāya sampayuttā.\nKāyaviññāṇadhātu siyā sukhāya vedanāya sampayuttā, siyā dukkhāya vedanāya sampayuttā.\nManoviññāṇadhātu siyā sukhāya vedanāya sampayuttā, siyā dukkhāya vedanāya sampayuttā, siyā adukkhamasukhāya vedanāya sampayuttā.\nDhammadhātu siyā sukhāya vedanāya sampayuttā, siyā dukkhāya vedanāya sampayuttā, siyā adukkhamasukhāya vedanāya sampayuttā, siyā na vattabbā—“sukhāya vedanāya sampayuttā”tipi, “dukkhāya vedanāya sampayuttā”tipi, “adukkhamasukhāya vedanāya sampayuttā”tipi."}},{"id":"vb3:61","sourceIds":["vb3:61.1","vb3:61.2","vb3:61.3","vb3:61.4"],"kind":"text","text":{"pi":"Dasa dhātuyo nevavipākanavipākadhammadhammā.\nPañca dhātuyo vipākā.\nManodhātu siyā vipākā, siyā nevavipākanavipākadhammadhammā.\nDve dhātuyo siyā vipākā, siyā vipākadhammadhammā, siyā nevavipākanavipākadhammadhammā."}},{"id":"vb3:62","sourceIds":["vb3:62.1","vb3:62.2","vb3:62.3","vb3:62.4"],"kind":"text","text":{"pi":"Dasa dhātuyo upādinnupādāniyā.\nSaddadhātu anupādinnupādāniyā.\nPañca dhātuyo siyā upādinnupādāniyā, siyā anupādinnupādāniyā.\nDve dhātuyo siyā upādinnupādāniyā, siyā anupādinnupādāniyā, siyā anupādinnaanupādāniyā."}},{"id":"vb3:63","sourceIds":["vb3:63.1","vb3:63.2"],"kind":"text","text":{"pi":"Soḷasa dhātuyo asaṅkiliṭṭhasaṅkilesikā.\nDve dhātuyo siyā saṅkiliṭṭhasaṅkilesikā, siyā asaṅkiliṭṭhasaṅkilesikā, siyā asaṅkiliṭṭhaasaṅkilesikā."}},{"id":"vb3:64","sourceIds":["vb3:64.1","vb3:64.2","vb3:64.3","vb3:64.4"],"kind":"text","text":{"pi":"Pannarasa dhātuyo avitakkaavicārā.\nManodhātu savitakkasavicārā.\nManoviññāṇadhātu siyā savitakkasavicārā, siyā avitakkavicāramattā, siyā avitakkaavicārā.\nDhammadhātu siyā savitakkasavicārā, siyā avitakkavicāramattā, siyā avitakkaavicārā, siyā na vattabbā—“savitakkasavicārā”tipi, “avitakkavicāramattā”tipi, “avitakkaavicārā”tipi."}},{"id":"vb3:65","sourceIds":["vb3:65.1","vb3:65.2","vb3:65.3","vb3:65.4","vb3:65.5"],"kind":"text","text":{"pi":"Dasa dhātuyo na vattabbā—\n“pītisahagatā”tipi, “sukhasahagatā”tipi, “upekkhāsahagatā”tipi.\nPañca dhātuyo upekkhāsahagatā.\nKāyaviññāṇadhātu na pītisahagatā, siyā sukhasahagatā, na upekkhāsahagatā, siyā na vattabbā—“sukhasahagatā”ti.\nDve dhātuyo siyā pītisahagatā, siyā sukhasahagatā, siyā upekkhāsahagatā, siyā na vattabbā—“pītisahagatā”tipi, “sukhasahagatā”tipi, “upekkhāsahagatā”tipi."}},{"id":"vb3:66","sourceIds":["vb3:66.1","vb3:66.2"],"kind":"text","text":{"pi":"Soḷasa dhātuyo neva dassanena na bhāvanāya pahātabbā.\nDve dhātuyo siyā dassanena pahātabbā, siyā bhāvanāya pahātabbā, siyā neva dassanena na bhāvanāya pahātabbā."}},{"id":"vb3:67","sourceIds":["vb3:67.1","vb3:67.2"],"kind":"text","text":{"pi":"Soḷasa dhātuyo neva dassanena na bhāvanāya pahātabbahetukā.\nDve dhātuyo siyā dassanena pahātabbahetukā, siyā bhāvanāya pahātabbahetukā, siyā neva dassanena na bhāvanāya pahātabbahetukā."}},{"id":"vb3:68","sourceIds":["vb3:68.1","vb3:68.2"],"kind":"text","text":{"pi":"Soḷasa dhātuyo nevācayagāmināpacayagāmino.\nDve dhātuyo siyā ācayagāmino, siyā apacayagāmino, siyā nevācayagāmināpacayagāmino."}},{"id":"vb3:69","sourceIds":["vb3:69.1","vb3:69.2"],"kind":"text","text":{"pi":"Soḷasa dhātuyo nevasekkhanāsekkhā.\nDve dhātuyo siyā sekkhā, siyā asekkhā, siyā nevasekkhanāsekkhā."}},{"id":"vb3:70","sourceIds":["vb3:70.1","vb3:70.2"],"kind":"text","text":{"pi":"Soḷasa dhātuyo parittā.\nDve dhātuyo siyā parittā, siyā mahaggatā, siyā appamāṇā."}},{"id":"vb3:71","sourceIds":["vb3:71.1","vb3:71.2","vb3:71.3"],"kind":"text","text":{"pi":"Dasa dhātuyo anārammaṇā.\nCha dhātuyo parittārammaṇā.\nDve dhātuyo siyā parittārammaṇā, siyā mahaggatārammaṇā, siyā appamāṇārammaṇā, siyā na vattabbā—“parittārammaṇā”tipi, “mahaggatārammaṇā”tipi, “appamāṇārammaṇā”tipi."}},{"id":"vb3:72","sourceIds":["vb3:72.1","vb3:72.2"],"kind":"text","text":{"pi":"Soḷasa dhātuyo majjhimā.\nDve dhātuyo siyā hīnā, siyā majjhimā, siyā paṇītā."}},{"id":"vb3:73","sourceIds":["vb3:73.1","vb3:73.2"],"kind":"text","text":{"pi":"Soḷasa dhātuyo aniyatā.\nDve dhātuyo siyā micchattaniyatā, siyā sammattaniyatā, siyā aniyatā."}},{"id":"vb3:74","sourceIds":["vb3:74.1","vb3:74.2","vb3:74.3","vb3:74.4"],"kind":"text","text":{"pi":"Dasa dhātuyo anārammaṇā.\nCha dhātuyo na vattabbā—\n“maggārammaṇā”tipi, “maggahetukā”tipi, “maggādhipatino”tipi.\nDve dhātuyo siyā maggārammaṇā, siyā maggahetukā, siyā maggādhipatino, siyā na vattabbā—“maggārammaṇā”tipi, “maggahetukā”tipi, “maggādhipatino”tipi."}},{"id":"vb3:75","sourceIds":["vb3:75.1","vb3:75.2","vb3:75.3","vb3:75.4"],"kind":"text","text":{"pi":"Dasa dhātuyo siyā uppannā, siyā uppādino, siyā na vattabbā—“anuppannā”ti.\nSaddadhātu siyā uppannā, siyā anuppannā, siyā na vattabbā—“uppādinī”ti.\nCha dhātuyo siyā uppannā, siyā anuppannā, siyā uppādino.\nDhammadhātu siyā uppannā, siyā anuppannā, siyā uppādinī, siyā na vattabbā—“uppannā”tipi, “anuppannā”tipi, “uppādinī”tipi."}},{"id":"vb3:76","sourceIds":["vb3:76.1","vb3:76.2"],"kind":"text","text":{"pi":"Sattarasa dhātuyo siyā atītā, siyā anāgatā, siyā paccuppannā.\nDhammadhātu siyā atītā, siyā anāgatā, siyā paccuppannā, siyā na vattabbā—“atītā”tipi, “anāgatā”tipi, “paccuppannā”tipi."}},{"id":"vb3:77","sourceIds":["vb3:77.1","vb3:77.2","vb3:77.3"],"kind":"text","text":{"pi":"Dasa dhātuyo anārammaṇā.\nCha dhātuyo paccuppannārammaṇā.\nDve dhātuyo siyā atītārammaṇā, siyā anāgatārammaṇā, siyā paccuppannārammaṇā, siyā na vattabbā—“atītārammaṇā”tipi, “anāgatārammaṇā”tipi, “paccuppannārammaṇā”tipi."}},{"id":"vb3:78","sourceIds":["vb3:78.1"],"kind":"text","text":{"pi":"Siyā ajjhattā, siyā bahiddhā, siyā ajjhattabahiddhā."}},{"id":"vb3:79","sourceIds":["vb3:79.1","vb3:79.2","vb3:79.3"],"kind":"text","text":{"pi":"Dasa dhātuyo anārammaṇā.\nCha dhātuyo siyā ajjhattārammaṇā, siyā bahiddhārammaṇā, siyā ajjhattabahiddhārammaṇā.\nDve dhātuyo siyā ajjhattārammaṇā, siyā bahiddhārammaṇā, siyā ajjhattabahiddhārammaṇā, siyā na vattabbā—“ajjhattārammaṇā”tipi, “bahiddhārammaṇā”tipi, “ajjhattabahiddhārammaṇā”tipi."}},{"id":"vb3:80","sourceIds":["vb3:80.1","vb3:80.2","vb3:80.3"],"kind":"text","text":{"pi":"Rūpadhātu sanidassanasappaṭighā.\nNava dhātuyo anidassanaappaṭighā.\nAṭṭha dhātuyo anidassanaappaṭighā."}},{"id":"vb3:81.0","sourceIds":["vb3:81.0.1","vb3:81.0.2"],"kind":"text","text":{"pi":"3.2. 3.2 Duka\n3.2.1. Hetugocchaka"}},{"id":"vb3:81","sourceIds":["vb3:81.1","vb3:81.2","vb3:81.3","vb3:81.4","vb3:81.5","vb3:81.6","vb3:81.7","vb3:81.8","vb3:81.9","vb3:81.10","vb3:81.11","vb3:81.12","vb3:81.13","vb3:81.14","vb3:81.15","vb3:81.16","vb3:81.17","vb3:81.18","vb3:81.19"],"kind":"text","text":{"pi":"Sattarasa dhātuyo na hetū.\nDhammadhātu siyā hetu, siyā na hetu.\nSoḷasa dhātuyo ahetukā.\nDve dhātuyo siyā sahetukā, siyā ahetukā.\nSoḷasa dhātuyo hetuvippayuttā.\nDve dhātuyo siyā hetusampayuttā, siyā hetuvippayuttā.\nSoḷasa dhātuyo na vattabbā—\n“hetu ceva sahetukā cā”tipi, “sahetukā ceva na ca hetū”tipi.\nManoviññāṇadhātu na vattabbā—\n“hetu ceva sahetukā cā”ti, siyā sahetukā ceva na ca hetu, siyā na vattabbā—“sahetukā ceva na ca hetū”ti.\nDhammadhātu siyā hetu ceva sahetukā ca, siyā sahetukā ceva na ca hetu, siyā na vattabbā—“hetu ceva sahetukā cā”tipi, “sahetukā ceva na ca hetū”tipi.\nSoḷasa dhātuyo na vattabbā—\n“hetū ceva hetusampayuttā cā”tipi, “hetusampayuttā ceva na ca hetū”tipi.\nManoviññāṇadhātu na vattabbā—\n“hetu ceva hetusampayuttā cā”ti, siyā hetusampayuttā ceva na ca hetu, siyā na vattabbā—“hetusampayuttā ceva na ca hetū”ti.\nDhammadhātu siyā hetu ceva hetusampayuttā ca, siyā hetusampayuttā ceva na ca hetu, siyā na vattabbā—“hetu ceva hetusampayuttā cā”tipi, “hetusampayuttā ceva na ca hetū”tipi.\nSoḷasa dhātuyo na hetuahetukā.\nManoviññāṇadhātu siyā na hetusahetukā, siyā na hetuahetukā.\nDhammadhātu siyā na hetusahetukā, siyā na hetuahetukā, siyā na vattabbā—“na hetusahetukā”tipi, “na hetuahetukā”tipi."}},{"id":"vb3:82","sourceIds":["vb3:82.0","vb3:82.1","vb3:82.2","vb3:82.3","vb3:82.4","vb3:82.5","vb3:82.6","vb3:82.7","vb3:82.8","vb3:82.9","vb3:82.10","vb3:82.11","vb3:82.12","vb3:82.13","vb3:82.14"],"kind":"text","text":{"pi":"3.2.2. Cūḷantaraduka\nSattarasa dhātuyo sappaccayā.\nDhammadhātu siyā sappaccayā, siyā appaccayā.\nSattarasa dhātuyo saṅkhatā.\nDhammadhātu siyā saṅkhatā, siyā asaṅkhatā.\nRūpadhātu sanidassanā.\nSattarasa dhātuyo anidassanā.\nDasa dhātuyo sappaṭighā.\nAṭṭha dhātuyo appaṭighā.\nDasa dhātuyo rūpā.\nSatta dhātuyo arūpā.\nDhammadhātu siyā rūpā, siyā arūpā.\nSoḷasa dhātuyo lokiyā.\nDve dhātuyo siyā lokiyā, siyā lokuttarā;\nkenaci viññeyyā, kenaci na viññeyyā."}},{"id":"vb3:83","sourceIds":["vb3:83.0","vb3:83.1","vb3:83.2","vb3:83.3","vb3:83.4","vb3:83.5","vb3:83.6","vb3:83.7","vb3:83.8","vb3:83.9","vb3:83.10","vb3:83.11"],"kind":"text","text":{"pi":"3.2.3. Āsavagocchaka\nSattarasa dhātuyo no āsavā.\nDhammadhātu siyā āsavā, siyā no āsavā.\nSoḷasa dhātuyo sāsavā.\nDve dhātuyo siyā sāsavā, siyā anāsavā.\nSoḷasa dhātuyo āsavavippayuttā.\nDve dhātuyo siyā āsavasampayuttā, siyā āsavavippayuttā.\nSoḷasa dhātuyo na vattabbā—\n“āsavā ceva sāsavā cā”ti, sāsavā ceva no ca āsavā.\nManoviññāṇadhātu na vattabbā—\n“āsavo ceva sāsavā cā”ti, siyā sāsavā ceva no ca āsavo, siyā na vattabbā—“sāsavā ceva no ca āsavo”ti.\nDhammadhātu siyā āsavo ceva sāsavā ca, siyā sāsavā ceva no ca āsavo, siyā na vattabbā—“āsavo ceva sāsavā cā”tipi, “sāsavā ceva no ca āsavo”tipi."}},{"id":"vb3:84","sourceIds":["vb3:84.1","vb3:84.2","vb3:84.3","vb3:84.4","vb3:84.5","vb3:84.6","vb3:84.7"],"kind":"text","text":{"pi":"Soḷasa dhātuyo na vattabbā—\n“āsavā ceva āsavasampayuttā cā”tipi, “āsavasampayuttā ceva no ca āsavā”tipi.\nManoviññāṇadhātu na vattabbā—\n“āsavo ceva āsavasampayuttā cā”ti, siyā āsavasampayuttā ceva no ca āsavo, siyā na vattabbā—“āsavasampayuttā ceva no ca āsavo”ti.\nDhammadhātu siyā āsavo ceva āsavasampayuttā ca, siyā āsavasampayuttā ceva no ca āsavo, siyā na vattabbā—“āsavo ceva āsavasampayuttā cā”tipi, “āsavasampayuttā ceva no ca āsavo”tipi.\nSoḷasa dhātuyo āsavavippayuttasāsavā.\nDve dhātuyo siyā āsavavippayuttasāsavā, siyā āsavavippayuttaanāsavā, siyā na vattabbā—“āsavavippayuttasāsavā”tipi, “āsavavippayuttaanāsavā”tipi."}},{"id":"vb3:85","sourceIds":["vb3:85.0","vb3:85.1","vb3:85.2","vb3:85.3","vb3:85.4","vb3:85.5","vb3:85.6","vb3:85.7","vb3:85.8","vb3:85.9","vb3:85.10","vb3:85.11","vb3:85.12","vb3:85.13","vb3:85.14","vb3:85.15","vb3:85.16","vb3:85.17","vb3:85.18"],"kind":"text","text":{"pi":"3.2.4. Saṁyojanagocchaka\nSattarasa dhātuyo no saṁyojanā.\nDhammadhātu siyā saṁyojanaṁ, siyā no saṁyojanaṁ.\nSoḷasa dhātuyo saṁyojaniyā.\nDve dhātuyo siyā saṁyojaniyā, siyā asaṁyojaniyā.\nSoḷasa dhātuyo saṁyojanavippayuttā.\nDve dhātuyo siyā saṁyojanasampayuttā, siyā saṁyojanavippayuttā.\nSoḷasa dhātuyo na vattabbā—\n“saṁyojanā ceva saṁyojaniyā cā”ti, saṁyojaniyā ceva no ca saṁyojanā.\nManoviññāṇadhātu na vattabbā—\n“saṁyojanañceva saṁyojaniyā cā”ti, siyā saṁyojaniyā ceva no ca saṁyojanaṁ, siyā na vattabbā—“saṁyojaniyā ceva no ca saṁyojanan”ti.\nDhammadhātu siyā saṁyojanañceva saṁyojaniyā ca, siyā saṁyojaniyā ceva no ca saṁyojanaṁ, siyā na vattabbā—“saṁyojanañceva saṁyojaniyā cā”tipi, “saṁyojaniyā ceva no ca saṁyojanan”tipi.\nSoḷasa dhātuyo na vattabbā—\n“saṁyojanā ceva saṁyojanasampayuttā cā”tipi, “saṁyojanasampayuttā ceva no ca saṁyojanā”tipi.\nManoviññāṇadhātu na vattabbā—\n“saṁyojanañceva saṁyojanasampayuttā cā”ti, siyā saṁyojanasampayuttā ceva no ca saṁyojanaṁ, siyā na vattabbā—“saṁyojanasampayuttā ceva no ca saṁyojanan”ti.\nDhammadhātu siyā saṁyojanañceva saṁyojanasampayuttā ca, siyā saṁyojanasampayuttā ceva no ca saṁyojanaṁ, siyā na vattabbā—“saṁyojanañceva saṁyojanasampayuttā cā”tipi, “saṁyojanasampayuttā ceva no ca saṁyojanan”tipi.\nSoḷasa dhātuyo saṁyojanavippayuttasaṁyojaniyā.\nDve dhātuyo siyā saṁyojanavippayuttasaṁyojaniyā, siyā saṁyojanavippayuttaasaṁyojaniyā, siyā na vattabbā—“saṁyojanavippayuttasaṁyojaniyā”tipi, “saṁyojanavippayuttaasaṁyojaniyā”tipi."}},{"id":"vb3:86","sourceIds":["vb3:86.0","vb3:86.1","vb3:86.2","vb3:86.3","vb3:86.4","vb3:86.5","vb3:86.6","vb3:86.7","vb3:86.8","vb3:86.9","vb3:86.10","vb3:86.11","vb3:86.12","vb3:86.13","vb3:86.14","vb3:86.15","vb3:86.16","vb3:86.17","vb3:86.18"],"kind":"text","text":{"pi":"3.2.5. Ganthagocchaka\nSattarasa dhātuyo no ganthā.\nDhammadhātu siyā gantho, siyā no gantho.\nSoḷasa dhātuyo ganthaniyā.\nDve dhātuyo siyā ganthaniyā, siyā aganthaniyā.\nSoḷasa dhātuyo ganthavippayuttā.\nDve dhātuyo siyā ganthasampayuttā, siyā ganthavippayuttā.\nSoḷasa dhātuyo na vattabbā—\n“ganthā ceva ganthaniyā cā”ti, ganthaniyā ceva no ca ganthā.\nManoviññāṇadhātu na vattabbā—\n“gantho ceva ganthaniyā cā”ti, siyā ganthaniyā ceva no ca gantho, siyā na vattabbā—“ganthaniyā ceva no ca gantho”ti.\nDhammadhātu siyā gantho ceva ganthaniyā ca, siyā ganthaniyā ceva no ca gantho, siyā na vattabbā—“gantho ceva ganthaniyā cā”tipi, “ganthaniyā ceva no ca gantho”tipi.\nSoḷasa dhātuyo na vattabbā—\n“ganthā ceva ganthasampayuttā cā”tipi, “ganthasampayuttā ceva no ca ganthā”tipi.\nManoviññāṇadhātu na vattabbā—\n“gantho ceva ganthasampayuttā cā”ti, siyā ganthasampayuttā ceva no ca gantho, siyā na vattabbā—“ganthasampayuttā ceva no ca gantho”ti.\nDhammadhātu siyā gantho ceva ganthasampayuttā ca, siyā ganthasampayuttā ceva no ca gantho, siyā na vattabbā—“gantho ceva ganthasampayuttā cā”tipi, “ganthasampayuttā ceva no ca gantho”tipi.\nSoḷasa dhātuyo ganthavippayuttaganthaniyā.\nDve dhātuyo siyā ganthavippayuttaganthaniyā, siyā ganthavippayuttaaganthaniyā, siyā na vattabbā—“ganthavippayuttaganthaniyā”tipi, “ganthavippayuttaaganthaniyā”tipi."}},{"id":"vb3:87","sourceIds":["vb3:87.0","vb3:87.1","vb3:87.2","vb3:87.3","vb3:87.4","vb3:87.5","vb3:87.6","vb3:87.7","vb3:87.8","vb3:87.9","vb3:87.10","vb3:87.11","vb3:87.12","vb3:87.13","vb3:87.14","vb3:87.15","vb3:87.16","vb3:87.17","vb3:87.18","vb3:87.19","vb3:87.20"],"kind":"text","text":{"pi":"3.3.2.6. Oghayoganīvaraṇagocchaka\nSattarasa dhātuyo no oghā …pe…\nno yogā …pe…\nno nīvaraṇā.\nDhammadhātu siyā nīvaraṇaṁ, siyā no nīvaraṇaṁ.\nSoḷasa dhātuyo nīvaraṇiyā.\nDve dhātuyo siyā nīvaraṇiyā, siyā anīvaraṇiyā.\nSoḷasa dhātuyo nīvaraṇavippayuttā.\nDve dhātuyo siyā nīvaraṇasampayuttā, siyā nīvaraṇavippayuttā.\nSoḷasa dhātuyo na vattabbā—\n“nīvaraṇā ceva nīvaraṇiyā cā”ti, nīvaraṇiyā ceva no ca nīvaraṇā.\nManoviññāṇadhātu na vattabbā—\n“nīvaraṇañceva nīvaraṇiyā cā”ti, siyā nīvaraṇiyā ceva no ca nīvaraṇaṁ, siyā na vattabbā—“nīvaraṇiyā ceva no ca nīvaraṇan”ti.\nDhammadhātu siyā nīvaraṇañceva nīvaraṇiyā ca, siyā nīvaraṇiyā ceva no ca nīvaraṇaṁ, siyā na vattabbā—“nīvaraṇañceva nīvaraṇiyā cā”tipi, “nīvaraṇiyā ceva no ca nīvaraṇan”tipi.\nSoḷasa dhātuyo na vattabbā—\n“nīvaraṇā ceva nīvaraṇasampayuttā cā”tipi, “nīvaraṇasampayuttā ceva no ca nīvaraṇā”tipi.\nManoviññāṇadhātu na vattabbā—\n“nīvaraṇañceva nīvaraṇasampayuttā cā”ti, siyā nīvaraṇasampayuttā ceva no ca nīvaraṇaṁ, siyā na vattabbā—“nīvaraṇasampayuttā ceva no ca nīvaraṇan”ti.\nDhammadhātu siyā nīvaraṇañceva nīvaraṇasampayuttā ca, siyā nīvaraṇasampayuttā ceva no ca nīvaraṇaṁ, siyā na vattabbā—“nīvaraṇañceva nīvaraṇasampayuttā cā”tipi, “nīvaraṇasampayuttā ceva no ca nīvaraṇan”tipi.\nSoḷasa dhātuyo nīvaraṇavippayuttanīvaraṇiyā.\nDve dhātuyo siyā nīvaraṇavippayuttanīvaraṇiyā, siyā nīvaraṇavippayuttaanīvaraṇiyā, siyā na vattabbā—“nīvaraṇavippayuttanīvaraṇiyā”tipi, “nīvaraṇavippayuttaanīvaraṇiyā”tipi."}},{"id":"vb3:88","sourceIds":["vb3:88.0","vb3:88.1","vb3:88.2","vb3:88.3","vb3:88.4","vb3:88.5","vb3:88.6","vb3:88.7","vb3:88.8","vb3:88.9","vb3:88.10","vb3:88.11","vb3:88.12","vb3:88.13","vb3:88.14"],"kind":"text","text":{"pi":"3.2.9. Parāmāsagocchaka\nSattarasa dhātuyo no parāmāsā.\nDhammadhātu siyā parāmāso, siyā no parāmāso.\nSoḷasa dhātuyo parāmaṭṭhā.\nDve dhātuyo siyā parāmaṭṭhā, siyā aparāmaṭṭhā.\nSoḷasa dhātuyo parāmāsavippayuttā.\nManoviññāṇadhātu siyā parāmāsasampayuttā, siyā parāmāsavippayuttā.\nDhammadhātu siyā parāmāsasampayuttā, siyā parāmāsavippayuttā, siyā na vattabbā—“parāmāsasampayuttā”tipi, “parāmāsavippayuttā”tipi.\nSoḷasa dhātuyo na vattabbā—\n“parāmāsā ceva parāmaṭṭhā cā”ti parāmaṭṭhā ceva no ca parāmāsā.\nManoviññāṇadhātu na vattabbā—\n“parāmāso ceva parāmaṭṭhā cā”ti, siyā parāmaṭṭhā ceva no ca parāmāso, siyā na vattabbā—“parāmaṭṭhā ceva no ca parāmāso”ti.\nDhammadhātu siyā parāmāso ceva parāmaṭṭhā ca, siyā parāmaṭṭhā ceva no ca parāmāso, siyā na vattabbā—“parāmāso ceva parāmaṭṭhā cā”tipi, “parāmaṭṭhā ceva no ca parāmāso”tipi.\nSoḷasa dhātuyo parāmāsavippayuttaparāmaṭṭhā.\nDve dhātuyo siyā parāmāsavippayuttaparāmaṭṭhā, siyā parāmāsavippayuttaaparāmaṭṭhā, siyā na vattabbā—“parāmāsavippayuttaparāmaṭṭhā”tipi, “parāmāsavippayuttaaparāmaṭṭhā”tipi."}},{"id":"vb3:89","sourceIds":["vb3:89.0","vb3:89.1","vb3:89.2","vb3:89.3","vb3:89.4","vb3:89.5","vb3:89.6","vb3:89.7","vb3:89.8","vb3:89.9","vb3:89.10","vb3:89.11","vb3:89.12","vb3:89.13","vb3:89.14","vb3:89.15"],"kind":"text","text":{"pi":"3.2.10. Mahantaraduka\nDasa dhātuyo anārammaṇā.\nSatta dhātuyo sārammaṇā.\nDhammadhātu siyā sārammaṇā, siyā anārammaṇā.\nSatta dhātuyo cittā.\nEkādasa dhātuyo no cittā.\nSattarasa dhātuyo acetasikā.\nDhammadhātu siyā cetasikā, siyā acetasikā.\nDasa dhātuyo cittavippayuttā.\nDhammadhātu siyā cittasampayuttā, siyā cittavippayuttā.\nSatta dhātuyo na vattabbā—\n“cittena sampayuttā”tipi, “cittena vippayuttā”tipi.\nDasa dhātuyo cittavisaṁsaṭṭhā.\nDhammadhātu siyā cittasaṁsaṭṭhā, siyā cittavisaṁsaṭṭhā.\nSatta dhātuyo na vattabbā—\n“cittena saṁsaṭṭhā”tipi, “cittena visaṁsaṭṭhā”tipi."}},{"id":"vb3:90","sourceIds":["vb3:90.1","vb3:90.2","vb3:90.3","vb3:90.4","vb3:90.5","vb3:90.6","vb3:90.7","vb3:90.8","vb3:90.9","vb3:90.10","vb3:90.11","vb3:90.12"],"kind":"text","text":{"pi":"Dvādasa dhātuyo no cittasamuṭṭhānā.\nCha dhātuyo siyā cittasamuṭṭhānā, siyā no cittasamuṭṭhānā.\nSattarasa dhātuyo no cittasahabhuno.\nDhammadhātu siyā cittasahabhū, siyā no cittasahabhū.\nSattarasa dhātuyo no cittānuparivattino.\nDhammadhātu siyā cittānuparivattī, siyā no cittānuparivattī.\nSattarasa dhātuyo no cittasaṁsaṭṭhasamuṭṭhānā.\nDhammadhātu siyā cittasaṁsaṭṭhasamuṭṭhānā, siyā no cittasaṁsaṭṭhasamuṭṭhānā.\nSattarasa dhātuyo no cittasaṁsaṭṭhasamuṭṭhānasahabhuno.\nDhammadhātu siyā cittasaṁsaṭṭhasamuṭṭhānasahabhū, siyā no cittasaṁsaṭṭhasamuṭṭhānasahabhū.\nSattarasa dhātuyo no cittasaṁsaṭṭhasamuṭṭhānānuparivattino.\nDhammadhātu siyā cittasaṁsaṭṭhasamuṭṭhānānuparivattī, siyā no cittasaṁsaṭṭhasamuṭṭhānānuparivattī."}},{"id":"vb3:91","sourceIds":["vb3:91.1","vb3:91.2"],"kind":"text","text":{"pi":"Dvādasa dhātuyo ajjhattikā.\nCha dhātuyo bāhirā."}},{"id":"vb3:92","sourceIds":["vb3:92.1","vb3:92.2","vb3:92.3","vb3:92.4","vb3:92.5","vb3:92.6"],"kind":"text","text":{"pi":"Nava dhātuyo upādā.\nAṭṭha dhātuyo no upādā.\nDhammadhātu siyā upādā, siyā no upādā.\nDasa dhātuyo upādinnā.\nSaddadhātu anupādinnā.\nSattadhātuyo siyā upādinnā, siyā anupādinnā."}},{"id":"vb3:93","sourceIds":["vb3:93.0","vb3:93.1","vb3:93.2","vb3:93.3","vb3:93.4","vb3:93.5","vb3:93.6","vb3:93.7","vb3:93.8","vb3:93.9","vb3:93.10","vb3:93.11"],"kind":"text","text":{"pi":"3.2.11. Upādānagocchaka\nSattarasa dhātuyo no upādānā.\nDhammadhātu siyā upādānaṁ, siyā no upādānaṁ.\nSoḷasa dhātuyo upādāniyā.\nDve dhātuyo siyā upādāniyā, siyā anupādāniyā.\nSoḷasa dhātuyo upādānavippayuttā.\nDve dhātuyo siyā upādānasampayuttā, siyā upādānavippayuttā.\nSoḷasa dhātuyo na vattabbā—\n“upādānā ceva upādāniyā cā”ti, upādāniyā ceva no ca upādānā.\nManoviññāṇadhātu na vattabbā—\n“upādānañceva upādāniyā cā”ti, siyā upādāniyā ceva no ca upādānaṁ, siyā na vattabbā—“upādāniyā ceva no ca upādānan”ti.\nDhammadhātu siyā upādānañceva upādāniyā ca, siyā upādāniyā ceva no ca upādānaṁ, siyā na vattabbā—“upādānañceva upādāniyā cā”tipi, “upādāniyā ceva no ca upādānan”tipi."}},{"id":"vb3:94","sourceIds":["vb3:94.1","vb3:94.2","vb3:94.3","vb3:94.4","vb3:94.5","vb3:94.6","vb3:94.7"],"kind":"text","text":{"pi":"Soḷasa dhātuyo na vattabbā—\n“upādānā ceva upādānasampayuttā cā”tipi, “upādānasampayuttā ceva no ca upādānā”tipi.\nManoviññāṇadhātu na vattabbā—\n“upādānañceva upādānasampayuttā cā”ti, siyā upādānasampayuttā ceva no ca upādānaṁ, siyā na vattabbā—“upādānasampayuttā ceva no ca upādānan”ti.\nDhammadhātu siyā upādānañceva upādānasampayuttā ca, siyā upādānasampayuttā ceva no ca upādānaṁ, siyā na vattabbā—“upādānañceva upādānasampayuttā cā”tipi, “upādānasampayuttā ceva no ca upādānan”tipi.\nSoḷasa dhātuyo upādānavippayuttaupādāniyā.\nDve dhātuyo siyā upādānavippayuttaupādāniyā, siyā upādānavippayuttaanupādāniyā, siyā na vattabbā—“upādānavippayuttaupādāniyā”tipi, “upādānavippayuttaanupādāniyā”tipi."}},{"id":"vb3:95","sourceIds":["vb3:95.0","vb3:95.1","vb3:95.2","vb3:95.3","vb3:95.4","vb3:95.5","vb3:95.6","vb3:95.7","vb3:95.8","vb3:95.9","vb3:95.10","vb3:95.11","vb3:95.12","vb3:95.13"],"kind":"text","text":{"pi":"3.2.12. Kilesagocchaka\nSattarasa dhātuyo no kilesā.\nDhammadhātu siyā kilesā, siyā no kilesā.\nSoḷasa dhātuyo saṅkilesikā.\nDve dhātuyo siyā saṅkilesikā, siyā asaṅkilesikā.\nSoḷasa dhātuyo asaṅkiliṭṭhā.\nDve dhātuyo siyā saṅkiliṭṭhā, siyā asaṅkiliṭṭhā.\nSoḷasa dhātuyo kilesavippayuttā.\nDve dhātuyo siyā kilesasampayuttā, siyā kilesavippayuttā.\nSoḷasa dhātuyo na vattabbā—\n“kilesā ceva saṅkilesikā cā”ti, saṅkilesikā ceva no ca kilesā.\nManoviññāṇadhātu na vattabbā—\n“kileso ceva saṅkilesikā cā”ti, siyā saṅkilesikā ceva no ca kileso, siyā na vattabbā—“saṅkilesikā ceva no ca kileso”ti.\nDhammadhātu siyā kileso ceva saṅkilesikā ca, siyā saṅkilesikā ceva no ca kileso, siyā na vattabbā—“kileso ceva saṅkilesikā cā”tipi, “saṅkilesikā ceva no ca kileso”tipi."}},{"id":"vb3:96","sourceIds":["vb3:96.1","vb3:96.2","vb3:96.3","vb3:96.4","vb3:96.5","vb3:96.6","vb3:96.7","vb3:96.8","vb3:96.9","vb3:96.10","vb3:96.11","vb3:96.12"],"kind":"text","text":{"pi":"Soḷasa dhātuyo na vattabbā—\n“kilesā ceva saṅkiliṭṭhā cā”tipi, “saṅkiliṭṭhā ceva no ca kilesā”tipi.\nManoviññāṇadhātu na vattabbā—\n“kileso ceva saṅkiliṭṭhā cā”ti, siyā saṅkiliṭṭhā ceva no ca kileso, siyā na vattabbā—“saṅkiliṭṭhā ceva no ca kileso”ti.\nDhammadhātu siyā kileso ceva saṅkiliṭṭhā ca, siyā saṅkiliṭṭhā ceva no ca kileso, siyā na vattabbā—“kileso ceva saṅkiliṭṭhā cā”tipi, “saṅkiliṭṭhā ceva no ca kileso”tipi.\nSoḷasa dhātuyo na vattabbā—\n“kilesā ceva kilesasampayuttā cā”tipi, “kilesasampayuttā ceva no ca kilesā”tipi.\nManoviññāṇadhātu na vattabbā—\n“kileso ceva kilesasampayuttā cā”ti, siyā kilesasampayuttā ceva no ca kileso, siyā na vattabbā—“kilesasampayuttā ceva no ca kileso”ti.\nDhammadhātu siyā kileso ceva kilesasampayuttā ca, siyā kilesasampayuttā ceva no ca kileso, siyā na vattabbā—“kileso ceva kilesasampayuttā cā”tipi, “kilesasampayuttā ceva no ca kileso”tipi.\nSoḷasa dhātuyo kilesavippayuttasaṅkilesikā.\nDve dhātuyo siyā kilesavippayuttasaṅkilesikā, siyā kilesavippayuttaasaṅkilesikā, siyā na vattabbā—“kilesavippayuttasaṅkilesikā”tipi, “kilesavippayuttaasaṅkilesikā”tipi."}},{"id":"vb3:97","sourceIds":["vb3:97.0","vb3:97.1","vb3:97.2","vb3:97.3","vb3:97.4","vb3:97.5","vb3:97.6","vb3:97.7","vb3:97.8"],"kind":"text","text":{"pi":"3.2.13. Piṭṭhiduka\nSoḷasa dhātuyo na dassanena pahātabbā.\nDve dhātuyo siyā dassanena pahātabbā, siyā na dassanena pahātabbā.\nSoḷasa dhātuyo na bhāvanāya pahātabbā.\nDve dhātuyo siyā bhāvanāya pahātabbā, siyā na bhāvanāya pahātabbā.\nSoḷasa dhātuyo na dassanena pahātabbahetukā.\nDve dhātuyo siyā dassanena pahātabbahetukā, siyā na dassanena pahātabbahetukā.\nSoḷasa dhātuyo na bhāvanāya pahātabbahetukā.\nDve dhātuyo siyā bhāvanāya pahātabbahetukā, siyā na bhāvanāya pahātabbahetukā."}},{"id":"vb3:98","sourceIds":["vb3:98.1","vb3:98.2","vb3:98.3","vb3:98.4","vb3:98.5","vb3:98.6","vb3:98.7","vb3:98.8","vb3:98.9","vb3:98.10","vb3:98.11","vb3:98.12","vb3:98.13","vb3:98.14","vb3:98.15"],"kind":"text","text":{"pi":"Pannarasa dhātuyo avitakkā.\nManodhātu savitakkā.\nDve dhātuyo siyā savitakkā, siyā avitakkā.\nPannarasa dhātuyo avicārā.\nManodhātu savicārā.\nDve dhātuyo siyā savicārā, siyā avicārā.\nSoḷasa dhātuyo appītikā.\nDve dhātuyo siyā sappītikā, siyā appītikā.\nSoḷasa dhātuyo na pītisahagatā.\nDve dhātuyo siyā pītisahagatā, siyā na pītisahagatā.\nPannarasa dhātuyo na sukhasahagatā.\nTisso dhātuyo siyā sukhasahagatā, siyā na sukhasahagatā.\nEkādasa dhātuyo na upekkhāsahagatā.\nPañca dhātuyo upekkhāsahagatā.\nDve dhātuyo siyā upekkhāsahagatā, siyā na upekkhāsahagatā."}},{"id":"vb3:99","sourceIds":["vb3:99.1","vb3:99.2","vb3:99.3","vb3:99.4","vb3:99.5","vb3:99.6","vb3:99.7","vb3:99.8","vb3:99.9","vb3:99.10","vb3:99.11","vb3:99.12","vb3:99.13","vb3:99.14","vb3:99.15","vb3:99.16"],"kind":"text","text":{"pi":"Soḷasa dhātuyo kāmāvacarā.\nDve dhātuyo siyā kāmāvacarā, siyā na kāmāvacarā.\nSoḷasa dhātuyo na rūpāvacarā.\nDve dhātuyo siyā rūpāvacarā, siyā na rūpāvacarā.\nSoḷasa dhātuyo na arūpāvacarā.\nDve dhātuyo siyā arūpāvacarā, siyā na arūpāvacarā.\nSoḷasa dhātuyo pariyāpannā.\nDve dhātuyo siyā pariyāpannā, siyā apariyāpannā.\nSoḷasa dhātuyo aniyyānikā.\nDve dhātuyo siyā niyyānikā, siyā aniyyānikā.\nSoḷasa dhātuyo aniyatā.\nDve dhātuyo siyā niyatā, siyā aniyatā.\nSoḷasa dhātuyo sauttarā.\nDve dhātuyo siyā sauttarā, siyā anuttarā.\nSoḷasa dhātuyo araṇā.\nDve dhātuyo siyā saraṇā, siyā araṇāti."}},{"id":"vb3:100","sourceIds":["vb3:100.1"],"kind":"text","text":{"pi":"Pañhāpucchakaṁ."}},{"id":"vb3:101","sourceIds":["vb3:101.1"],"kind":"text","text":{"pi":"Dhātuvibhaṅgo niṭṭhito."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/vb3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}