{"id":"vb5","title":"Indriyavibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"vb5","title":"Indriyavibhaṅga","units":[{"id":"vb5:0","sourceIds":["vb5:0.1","vb5:0.2"],"kind":"text","text":{"pi":"Vibhaṅga\nIndriyavibhaṅga"}},{"id":"vb5:1","sourceIds":["vb5:1.0","vb5:1.1","vb5:1.2"],"kind":"text","text":{"pi":"1. Abhidhammabhājanīya\nBāvīsatindriyāni—\ncakkhundriyaṁ, sotindriyaṁ, ghānindriyaṁ, jivhindriyaṁ, kāyindriyaṁ, manindriyaṁ, itthindriyaṁ, purisindriyaṁ, jīvitindriyaṁ, sukhindriyaṁ, dukkhindriyaṁ, somanassindriyaṁ, domanassindriyaṁ, upekkhindriyaṁ, saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ, anaññātaññassāmītindriyaṁ, aññindriyaṁ, aññātāvindriyaṁ."}},{"id":"vb5:2","sourceIds":["vb5:2.1","vb5:2.2","vb5:2.3"],"kind":"text","text":{"pi":"Tattha katamaṁ cakkhundriyaṁ?\nYaṁ cakkhu catunnaṁ mahābhūtānaṁ upādāya pasādo …pe… suñño gāmopeso—\nidaṁ vuccati “cakkhundriyaṁ”."}},{"id":"vb5:3","sourceIds":["vb5:3.1","vb5:3.2","vb5:3.3","vb5:3.4","vb5:3.5","vb5:3.6"],"kind":"text","text":{"pi":"Tattha katamaṁ sotindriyaṁ …pe…\nghānindriyaṁ …pe…\njivhindriyaṁ …pe…\nkāyindriyaṁ?\nYo kāyo catunnaṁ mahābhūtānaṁ upādāya pasādo …pe… suñño gāmopeso—\nidaṁ vuccati “kāyindriyaṁ”."}},{"id":"vb5:4","sourceIds":["vb5:4.1","vb5:4.2","vb5:4.3","vb5:4.4","vb5:4.5","vb5:4.6","vb5:4.7","vb5:4.8","vb5:4.9","vb5:4.10","vb5:4.11","vb5:4.12","vb5:4.13","vb5:4.14"],"kind":"text","text":{"pi":"Tattha katamaṁ manindriyaṁ?\nEkavidhena manindriyaṁ—\nphassasampayuttaṁ.\nDuvidhena manindriyaṁ—\natthi sahetukaṁ, atthi ahetukaṁ.\nTividhena manindriyaṁ—\natthi kusalaṁ, atthi akusalaṁ, atthi abyākataṁ.\nCatubbidhena manindriyaṁ—\natthi kāmāvacaraṁ, atthi rūpāvacaraṁ, atthi arūpāvacaraṁ, atthi apariyāpannaṁ.\nPañcavidhena manindriyaṁ—\natthi sukhindriyasampayuttaṁ, atthi dukkhindriyasampayuttaṁ, atthi somanassindriyasampayuttaṁ, atthi domanassindriyasampayuttaṁ, atthi upekkhindriyasampayuttaṁ.\nChabbidhena manindriyaṁ—\ncakkhuviññāṇaṁ …pe… manoviññāṇaṁ.\nEvaṁ chabbidhena manindriyaṁ."}},{"id":"vb5:5","sourceIds":["vb5:5.1","vb5:5.2","vb5:5.3"],"kind":"text","text":{"pi":"Sattavidhena manindriyaṁ—\ncakkhuviññāṇaṁ …pe… kāyaviññāṇaṁ, manodhātu, manoviññāṇadhātu.\nEvaṁ sattavidhena manindriyaṁ."}},{"id":"vb5:6","sourceIds":["vb5:6.1","vb5:6.2","vb5:6.3"],"kind":"text","text":{"pi":"Aṭṭhavidhena manindriyaṁ—\ncakkhuviññāṇaṁ …pe… kāyaviññāṇaṁ atthi sukhasahagataṁ, atthi dukkhasahagataṁ, manodhātu, manoviññāṇadhātu.\nEvaṁ aṭṭhavidhena manindriyaṁ."}},{"id":"vb5:7","sourceIds":["vb5:7.1","vb5:7.2","vb5:7.3"],"kind":"text","text":{"pi":"Navavidhena manindriyaṁ—\ncakkhuviññāṇaṁ …pe… kāyaviññāṇaṁ, manodhātu, manoviññāṇadhātu atthi kusalā, atthi akusalā, atthi abyākatā.\nEvaṁ navavidhena manindriyaṁ."}},{"id":"vb5:8","sourceIds":["vb5:8.1","vb5:8.2","vb5:8.3","vb5:8.4","vb5:8.5"],"kind":"text","text":{"pi":"Dasavidhena manindriyaṁ—\ncakkhuviññāṇaṁ …pe… kāyaviññāṇaṁ atthi sukhasahagataṁ, atthi dukkhasahagataṁ, manodhātu, manoviññāṇadhātu atthi kusalā, atthi akusalā, atthi abyākatā.\nEvaṁ dasavidhena manindriyaṁ …pe…\nevaṁ bahuvidhena manindriyaṁ.\nIdaṁ vuccati “manindriyaṁ”."}},{"id":"vb5:9","sourceIds":["vb5:9.1","vb5:9.2","vb5:9.3"],"kind":"text","text":{"pi":"Tattha katamaṁ itthindriyaṁ?\nYaṁ itthiyā itthiliṅgaṁ itthinimittaṁ itthikuttaṁ itthākappo itthattaṁ itthibhāvo—\nidaṁ vuccati “itthindriyaṁ”."}},{"id":"vb5:10","sourceIds":["vb5:10.1","vb5:10.2","vb5:10.3"],"kind":"text","text":{"pi":"Tattha katamaṁ purisindriyaṁ?\nYaṁ purisassa purisaliṅgaṁ purisanimittaṁ purisakuttaṁ purisākappo purisattaṁ purisabhāvo—\nidaṁ vuccati “purisindriyaṁ”."}},{"id":"vb5:11","sourceIds":["vb5:11.1","vb5:11.2","vb5:11.3"],"kind":"text","text":{"pi":"Tattha katamaṁ jīvitindriyaṁ?\nJīvitindriyaṁ duvidhena—\natthi rūpajīvitindriyaṁ, atthi arūpajīvitindriyaṁ."}},{"id":"vb5:12","sourceIds":["vb5:12.1","vb5:12.2","vb5:12.3"],"kind":"text","text":{"pi":"Tattha katamaṁ rūpajīvitindriyaṁ?\nYo tesaṁ rūpīnaṁ dhammānaṁ āyu ṭhiti yapanā yāpanā iriyanā vattanā pālanā jīvitaṁ jīvitindriyaṁ—\nidaṁ vuccati “rūpajīvitindriyaṁ”."}},{"id":"vb5:13","sourceIds":["vb5:13.1","vb5:13.2","vb5:13.3","vb5:13.4"],"kind":"text","text":{"pi":"Tattha katamaṁ arūpajīvitindriyaṁ?\nYo tesaṁ arūpīnaṁ dhammānaṁ āyu ṭhiti yapanā yāpanā iriyanā vattanā pālanā jīvitaṁ jīvitindriyaṁ—\nidaṁ vuccati “arūpajīvitindriyaṁ”.\nIdaṁ vuccati “jīvitindriyaṁ”."}},{"id":"vb5:14","sourceIds":["vb5:14.1","vb5:14.2","vb5:14.3"],"kind":"text","text":{"pi":"Tattha katamaṁ sukhindriyaṁ?\nYaṁ kāyikaṁ sātaṁ kāyikaṁ sukhaṁ kāyasamphassajaṁ sātaṁ sukhaṁ vedayitaṁ kāyasamphassajā sātā sukhā vedanā—\nidaṁ vuccati “sukhindriyaṁ”."}},{"id":"vb5:15","sourceIds":["vb5:15.1","vb5:15.2","vb5:15.3"],"kind":"text","text":{"pi":"Tattha katamaṁ dukkhindriyaṁ?\nYaṁ kāyikaṁ asātaṁ kāyikaṁ dukkhaṁ kāyasamphassajaṁ asātaṁ dukkhaṁ vedayitaṁ kāyasamphassajā asātā dukkhā vedanā—\nidaṁ vuccati “dukkhindriyaṁ”."}},{"id":"vb5:16","sourceIds":["vb5:16.1","vb5:16.2","vb5:16.3"],"kind":"text","text":{"pi":"Tattha katamaṁ somanassindriyaṁ?\nYaṁ cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—\nidaṁ vuccati “somanassindriyaṁ”."}},{"id":"vb5:17","sourceIds":["vb5:17.1","vb5:17.2","vb5:17.3"],"kind":"text","text":{"pi":"Tattha katamaṁ domanassindriyaṁ?\nYaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—\nidaṁ vuccati “domanassindriyaṁ”."}},{"id":"vb5:18","sourceIds":["vb5:18.1","vb5:18.2","vb5:18.3"],"kind":"text","text":{"pi":"Tattha katamaṁ upekkhindriyaṁ?\nYaṁ cetasikaṁ neva sātaṁ nāsātaṁ cetosamphassajaṁ adukkhamasukhaṁ vedayitaṁ cetosamphassajā adukkhamasukhā vedanā—\nidaṁ vuccati “upekkhindriyaṁ”."}},{"id":"vb5:19","sourceIds":["vb5:19.1","vb5:19.2","vb5:19.3"],"kind":"text","text":{"pi":"Tattha katamaṁ saddhindriyaṁ?\nYā saddhā saddahanā okappanā abhippasādo saddhā saddhindriyaṁ saddhābalaṁ—\nidaṁ vuccati “saddhindriyaṁ”."}},{"id":"vb5:20","sourceIds":["vb5:20.1","vb5:20.2","vb5:20.3"],"kind":"text","text":{"pi":"Tattha katamaṁ vīriyindriyaṁ?\nYo cetasiko vīriyārambho nikkamo parakkamo uyyāmo vāyāmo ussāho ussoḷhī thāmo ṭhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ—\nidaṁ vuccati “vīriyindriyaṁ”."}},{"id":"vb5:21","sourceIds":["vb5:21.1","vb5:21.2","vb5:21.3"],"kind":"text","text":{"pi":"Tattha katamaṁ satindriyaṁ?\nYā sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati—\nidaṁ vuccati “satindriyaṁ”."}},{"id":"vb5:22","sourceIds":["vb5:22.1","vb5:22.2","vb5:22.3"],"kind":"text","text":{"pi":"Tattha katamaṁ samādhindriyaṁ?\nYā cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi—\nidaṁ vuccati “samādhindriyaṁ”."}},{"id":"vb5:23","sourceIds":["vb5:23.1","vb5:23.2","vb5:23.3"],"kind":"text","text":{"pi":"Tattha katamaṁ paññindriyaṁ?\nYā paññā pajānanā …pe… amoho dhammavicayo sammādiṭṭhi—\nidaṁ vuccati “paññindriyaṁ”."}},{"id":"vb5:24","sourceIds":["vb5:24.1","vb5:24.2","vb5:24.3"],"kind":"text","text":{"pi":"Tattha katamaṁ anaññātaññassāmītindriyaṁ?\nYā tesaṁ dhammānaṁ anaññātānaṁ adiṭṭhānaṁ appattānaṁ aviditānaṁ asacchikatānaṁ sacchikiriyāya paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nidaṁ vuccati “anaññātaññassāmītindriyaṁ”."}},{"id":"vb5:25","sourceIds":["vb5:25.1","vb5:25.2","vb5:25.3"],"kind":"text","text":{"pi":"Tattha katamaṁ aññindriyaṁ?\nYā tesaṁ dhammānaṁ ñātānaṁ diṭṭhānaṁ pattānaṁ viditānaṁ sacchikatānaṁ sacchikiriyāya paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nidaṁ vuccati “aññindriyaṁ”."}},{"id":"vb5:26","sourceIds":["vb5:26.1","vb5:26.2","vb5:26.3"],"kind":"text","text":{"pi":"Tattha katamaṁ aññātāvindriyaṁ?\nYā tesaṁ dhammānaṁ aññātāvīnaṁ diṭṭhānaṁ pattānaṁ viditānaṁ sacchikatānaṁ sacchikiriyāya paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nidaṁ vuccati “aññātāvindriyaṁ”."}},{"id":"vb5:27","sourceIds":["vb5:27.1"],"kind":"text","text":{"pi":"Abhidhammabhājanīyaṁ."}},{"id":"vb5:28","sourceIds":["vb5:28.0","vb5:28.1","vb5:28.2"],"kind":"text","text":{"pi":"2. Pañhāpucchaka\nBāvīsatindriyāni—\ncakkhundriyaṁ, sotindriyaṁ, ghānindriyaṁ, jivhindriyaṁ, kāyindriyaṁ, manindriyaṁ, itthindriyaṁ, purisindriyaṁ, jīvitindriyaṁ, sukhindriyaṁ, dukkhindriyaṁ, somanassindriyaṁ, domanassindriyaṁ, upekkhindriyaṁ, saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ, anaññātaññassāmītindriyaṁ, aññindriyaṁ, aññātāvindriyaṁ."}},{"id":"vb5:29","sourceIds":["vb5:29.1"],"kind":"text","text":{"pi":"Bāvīsatīnaṁ indriyānaṁ kati kusalā, kati akusalā, kati abyākatā …pe… kati saraṇā, kati araṇā?"}},{"id":"vb5:30","sourceIds":["vb5:30.0","vb5:30.1","vb5:30.2","vb5:30.3","vb5:30.4","vb5:30.5"],"kind":"text","text":{"pi":"2.1. Tika\nDasindriyā abyākatā.\nDomanassindriyaṁ akusalaṁ.\nAnaññātaññassāmītindriyaṁ kusalaṁ.\nCattārindriyā siyā kusalā, siyā abyākatā.\nCha indriyā siyā kusalā, siyā akusalā, siyā abyākatā."}},{"id":"vb5:31","sourceIds":["vb5:31.1","vb5:31.2","vb5:31.3","vb5:31.4"],"kind":"text","text":{"pi":"Dvādasindriyā na vattabbā—“sukhāya vedanāya sampayuttā”tipi, “dukkhāya vedanāya sampayuttā”tipi, “adukkhamasukhāya vedanāya sampayuttā”tipi.\nCha indriyā siyā sukhāya vedanāya sampayuttā, siyā adukkhamasukhāya vedanāya sampayuttā.\nTīṇindriyā siyā sukhāya vedanāya sampayuttā, siyā dukkhāya vedanāya sampayuttā, siyā adukkhamasukhāya vedanāya sampayuttā.\nJīvitindriyaṁ siyā sukhāya vedanāya sampayuttaṁ, siyā dukkhāya vedanāya sampayuttaṁ, siyā adukkhamasukhāya vedanāya sampayuttaṁ, siyā na vattabbaṁ—“sukhāya vedanāya sampayuttan”tipi, “dukkhāya vedanāya sampayuttan”tipi, “adukkhamasukhāya vedanāya sampayuttan”tipi."}},{"id":"vb5:32","sourceIds":["vb5:32.1","vb5:32.2","vb5:32.3","vb5:32.4","vb5:32.5"],"kind":"text","text":{"pi":"Sattindriyā nevavipākanavipākadhammadhammā.\nTīṇindriyā vipākā.\nDvindriyā vipākadhammadhammā.\nAññindriyaṁ siyā vipākaṁ, siyā vipākadhammadhammaṁ.\nNavindriyā siyā vipākā, siyā vipākadhammadhammā, siyā nevavipākanavipākadhammadhammā."}},{"id":"vb5:33","sourceIds":["vb5:33.1","vb5:33.2","vb5:33.3","vb5:33.4"],"kind":"text","text":{"pi":"Navindriyā upādinnupādāniyā.\nDomanassindriyaṁ anupādinnupādāniyaṁ.\nTīṇindriyā anupādinnaanupādāniyā.\nNavindriyā siyā upādinnupādāniyā, siyā anupādinnupādāniyā, siyā anupādinnaanupādāniyā."}},{"id":"vb5:34","sourceIds":["vb5:34.1","vb5:34.2","vb5:34.3","vb5:34.4","vb5:34.5"],"kind":"text","text":{"pi":"Navindriyā asaṅkiliṭṭhasaṅkilesikā.\nDomanassindriyaṁ saṅkiliṭṭhasaṅkilesikaṁ.\nTīṇindriyā asaṅkiliṭṭhaasaṅkilesikā.\nTīṇindriyā siyā asaṅkiliṭṭhasaṅkilesikā, siyā asaṅkiliṭṭhaasaṅkilesikā.\nCha indriyā siyā saṅkiliṭṭhasaṅkilesikā, siyā asaṅkiliṭṭhasaṅkilesikā, siyā asaṅkiliṭṭhaasaṅkilesikā."}},{"id":"vb5:35","sourceIds":["vb5:35.1","vb5:35.2","vb5:35.3","vb5:35.4"],"kind":"text","text":{"pi":"Navindriyā avitakkaavicārā.\nDomanassindriyaṁ savitakkasavicāraṁ.\nUpekkhindriyaṁ siyā savitakkasavicāraṁ, siyā avitakkaavicāraṁ.\nEkādasindriyā siyā savitakkasavicārā, siyā avitakkavicāramattā, siyā avitakkaavicārā."}},{"id":"vb5:36","sourceIds":["vb5:36.1","vb5:36.2","vb5:36.3","vb5:36.4"],"kind":"text","text":{"pi":"Ekādasindriyā na vattabbā—“pītisahagatā”tipi, “sukhasahagatā”tipi, “upekkhāsahagatā”tipi.\nSomanassindriyaṁ siyā pītisahagataṁ na sukhasahagataṁ na upekkhāsahagataṁ, siyā na vattabbaṁ—“pītisahagatan”ti.\nCha indriyā siyā pītisahagatā, siyā sukhasahagatā, siyā upekkhāsahagatā.\nCattārindriyā siyā pītisahagatā, siyā sukhasahagatā, siyā upekkhāsahagatā, siyā na vattabbā—“pītisahagatā”tipi, “sukhasahagatā”tipi, “upekkhāsahagatā”tipi."}},{"id":"vb5:37","sourceIds":["vb5:37.1","vb5:37.2","vb5:37.3"],"kind":"text","text":{"pi":"Pannarasindriyā neva dassanena na bhāvanāya pahātabbā.\nDomanassindriyaṁ siyā dassanena pahātabbaṁ, siyā bhāvanāya pahātabbaṁ.\nCha indriyā siyā dassanena pahātabbā, siyā bhāvanāya pahātabbā, siyā neva dassanena na bhāvanāya pahātabbā."}},{"id":"vb5:38","sourceIds":["vb5:38.1","vb5:38.2","vb5:38.3"],"kind":"text","text":{"pi":"Pannarasindriyā neva dassanena na bhāvanāya pahātabbahetukā.\nDomanassindriyaṁ siyā dassanena pahātabbahetukaṁ, siyā bhāvanāya pahātabbahetukaṁ.\nCha indriyā siyā dassanena pahātabbahetukā, siyā bhāvanāya pahātabbahetukā, siyā neva dassanena na bhāvanāya pahātabbahetukā."}},{"id":"vb5:39","sourceIds":["vb5:39.1","vb5:39.2","vb5:39.3","vb5:39.4","vb5:39.5"],"kind":"text","text":{"pi":"Dasindriyā nevācayagāmināpacayagāmino.\nDomanassindriyaṁ ācayagāmi.\nAnaññātaññassāmītindriyaṁ apacayagāmi.\nAññindriyaṁ siyā apacayagāmi, siyā nevācayagāmināpacayagāmi.\nNavindriyā siyā ācayagāmino, siyā apacayagāmino, siyā nevācayagāmināpacayagāmino."}},{"id":"vb5:40","sourceIds":["vb5:40.1","vb5:40.2","vb5:40.3","vb5:40.4"],"kind":"text","text":{"pi":"Dasindriyā nevasekkhanāsekkhā.\nDvindriyā sekkhā.\nAññātāvindriyaṁ asekkhaṁ.\nNavindriyā siyā sekkhā, siyā asekkhā, siyā nevasekkhanāsekkhā."}},{"id":"vb5:41","sourceIds":["vb5:41.1","vb5:41.2","vb5:41.3"],"kind":"text","text":{"pi":"Dasindriyā parittā.\nTīṇindriyā appamāṇā.\nNavindriyā siyā parittā, siyā mahaggatā, siyā appamāṇā."}},{"id":"vb5:42","sourceIds":["vb5:42.1","vb5:42.2","vb5:42.3","vb5:42.4","vb5:42.5"],"kind":"text","text":{"pi":"Sattindriyā anārammaṇā.\nDvindriyā parittārammaṇā.\nTīṇindriyā appamāṇārammaṇā.\nDomanassindriyaṁ siyā parittārammaṇaṁ siyā mahaggatārammaṇaṁ, na appamāṇārammaṇaṁ, siyā na vattabbaṁ—“parittārammaṇan”tipi, “mahaggatārammaṇan”tipi.\nNavindriyā siyā parittārammaṇā, siyā mahaggatārammaṇā, siyā appamāṇārammaṇā, siyā na vattabbā—“parittārammaṇā”tipi, “mahaggatārammaṇā”tipi, “appamāṇārammaṇā”tipi."}},{"id":"vb5:43","sourceIds":["vb5:43.1","vb5:43.2","vb5:43.3","vb5:43.4","vb5:43.5"],"kind":"text","text":{"pi":"Navindriyā majjhimā.\nDomanassindriyaṁ hīnaṁ.\nTīṇindriyā paṇītā.\nTīṇindriyā siyā majjhimā, siyā paṇītā.\nCha indriyā siyā hīnā, siyā majjhimā, siyā paṇītā."}},{"id":"vb5:44","sourceIds":["vb5:44.1","vb5:44.2","vb5:44.3","vb5:44.4","vb5:44.5"],"kind":"text","text":{"pi":"Dasindriyā aniyatā.\nAnaññātaññassāmītindriyaṁ sammattaniyataṁ.\nCattārindriyā siyā sammattaniyatā, siyā aniyatā.\nDomanassindriyaṁ siyā micchattaniyataṁ, siyā aniyataṁ.\nCha indriyā siyā micchattaniyatā, siyā sammattaniyatā, siyā aniyatā."}},{"id":"vb5:45","sourceIds":["vb5:45.1","vb5:45.2","vb5:45.3","vb5:45.4","vb5:45.5"],"kind":"text","text":{"pi":"Sattindriyā anārammaṇā.\nCattārindriyā na vattabbā—“maggārammaṇā”tipi, “maggahetukā”tipi, “maggādhipatino”tipi.\nAnaññātaññassāmītindriyaṁ na maggārammaṇaṁ, siyā maggahetukaṁ, siyā maggādhipati, siyā na vattabbaṁ—“maggahetukan”tipi, “maggādhipatī”tipi.\nAññindriyaṁ na maggārammaṇaṁ, siyā maggahetukaṁ, siyā maggādhipati, siyā na vattabbaṁ—“maggahetukan”tipi, “maggādhipatī”tipi.\nNavindriyā siyā maggārammaṇā, siyā maggahetukā, siyā maggādhipatino, siyā na vattabbā—“maggārammaṇā”tipi, “maggahetukā”tipi, “maggādhipatino”tipi."}},{"id":"vb5:46","sourceIds":["vb5:46.1","vb5:46.2","vb5:46.3"],"kind":"text","text":{"pi":"Dasindriyā siyā uppannā, siyā uppādino, na vattabbā—“anuppannā”ti.\nDvindriyā siyā uppannā, siyā anuppannā, na vattabbā—“uppādino”ti.\nDasindriyā siyā uppannā, siyā anuppannā, siyā uppādino."}},{"id":"vb5:47","sourceIds":["vb5:47.1"],"kind":"text","text":{"pi":"Siyā atītā, siyā anāgatā, siyā paccuppannā."}},{"id":"vb5:48","sourceIds":["vb5:48.1","vb5:48.2","vb5:48.3","vb5:48.4"],"kind":"text","text":{"pi":"Sattindriyā anārammaṇā.\nDvindriyā paccuppannārammaṇā.\nTīṇindriyā na vattabbā—“atītārammaṇā”tipi, “anāgatārammaṇā”tipi, “paccuppannārammaṇā”tipi.\nDasindriyā siyā atītārammaṇā, siyā anāgatārammaṇā, siyā paccuppannārammaṇā, siyā na vattabbā—“atītārammaṇā”tipi, “anāgatārammaṇā”tipi, “paccuppannārammaṇā”tipi."}},{"id":"vb5:49","sourceIds":["vb5:49.1"],"kind":"text","text":{"pi":"Siyā ajjhattā, siyā bahiddhā, siyā ajjhattabahiddhā."}},{"id":"vb5:50","sourceIds":["vb5:50.1","vb5:50.2","vb5:50.3"],"kind":"text","text":{"pi":"Sattindriyā anārammaṇā.\nTīṇindriyā bahiddhārammaṇā.\nCattārindriyā siyā ajjhattārammaṇā, siyā bahiddhārammaṇā, siyā ajjhattabahiddhārammaṇā, aṭṭhindriyā siyā ajjhattārammaṇā, siyā bahiddhārammaṇā, siyā ajjhattabahiddhārammaṇā, siyā na vattabbā—“ajjhattārammaṇā”tipi, “bahiddhārammaṇā”tipi, “ajjhattabahiddhārammaṇā”tipi."}},{"id":"vb5:51","sourceIds":["vb5:51.1","vb5:51.2"],"kind":"text","text":{"pi":"Pañcindriyā anidassanasappaṭighā.\nSattarasindriyā anidassanaappaṭighā."}},{"id":"vb5:52.0","sourceIds":["vb5:52.0.1","vb5:52.0.2"],"kind":"text","text":{"pi":"2.2. 2.2 Duka\n2.2.1. Hetugocchaka"}},{"id":"vb5:52","sourceIds":["vb5:52.1","vb5:52.2","vb5:52.3","vb5:52.4","vb5:52.5","vb5:52.6","vb5:52.7","vb5:52.8","vb5:52.9","vb5:52.10","vb5:52.11","vb5:52.12","vb5:52.13"],"kind":"text","text":{"pi":"Cattārindriyā hetū.\nAṭṭhārasindriyā na hetū.\nSattindriyā sahetukā.\nNavindriyā ahetukā.\nCha indriyā siyā sahetukā, siyā ahetukā.\nSattindriyā hetusampayuttā.\nNavindriyā hetuvippayuttā.\nCha indriyā siyā hetusampayuttā, siyā hetuvippayuttā.\nCattārindriyā hetū ceva sahetukā ca.\nNavindriyā na vattabbā—“hetū ceva sahetukā cā”tipi, “sahetukā ceva na ca hetū”tipi.\nTīṇindriyā na vattabbā—“hetū ceva sahetukā cā”ti.\nSahetukā ceva na ca hetū.\nCha indriyā na vattabbā—“hetū ceva sahetukā cā”ti, siyā sahetukā ceva na ca hetū, siyā na vattabbā—“sahetukā ceva na ca hetū”ti."}},{"id":"vb5:53","sourceIds":["vb5:53.1","vb5:53.2","vb5:53.3","vb5:53.4"],"kind":"text","text":{"pi":"Cattārindriyā hetū ceva hetusampayuttā ca.\nNavindriyā na vattabbā—“hetū ceva hetusampayuttā cā”tipi, “hetusampayuttā ceva na ca hetū”tipi.\nTīṇindriyā na vattabbā—“hetū ceva hetusampayuttā cā”ti, hetusampayuttā ceva na ca hetū.\nCha indriyā na vattabbā—“hetū ceva hetusampayuttā cā”ti, siyā hetusampayuttā ceva na ca hetū, siyā na vattabbā—“hetusampayuttā ceva na ca hetū”ti."}},{"id":"vb5:54","sourceIds":["vb5:54.1","vb5:54.2","vb5:54.3","vb5:54.4"],"kind":"text","text":{"pi":"Navindriyā na hetū ahetukā.\nTīṇindriyā na hetū sahetukā.\nCattārindriyā na vattabbā—“na hetū sahetukā”tipi, “na hetū ahetukā”tipi.\nCha indriyā siyā na hetū sahetukā, siyā na hetū ahetukā."}},{"id":"vb5:55","sourceIds":["vb5:55.0","vb5:55.1","vb5:55.2","vb5:55.3","vb5:55.4","vb5:55.5","vb5:55.6","vb5:55.7","vb5:55.8","vb5:55.9","vb5:55.10","vb5:55.11","vb5:55.12"],"kind":"text","text":{"pi":"2.2.2. Cūḷantaraduka\nSappaccayā.\nSaṅkhatā.\nAnidassanā.\nPañcindriyā sappaṭighā.\nSattarasindriyā appaṭighā.\nSattindriyā rūpā.\nCuddasindriyā arūpā.\nJīvitindriyaṁ siyā rūpaṁ, siyā arūpaṁ.\nDasindriyā lokiyā.\nTīṇindriyā lokuttarā.\nNavindriyā siyā lokiyā, siyā lokuttarā;\nkenaci viññeyyā, kenaci na viññeyyā."}},{"id":"vb5:56","sourceIds":["vb5:56.0","vb5:56.1","vb5:56.2","vb5:56.3","vb5:56.4","vb5:56.5","vb5:56.6","vb5:56.7","vb5:56.8","vb5:56.9","vb5:56.10"],"kind":"text","text":{"pi":"2.2.3. Āsavagocchaka\nNo āsavā.\nDasindriyā sāsavā.\nTīṇindriyā anāsavā.\nNavindriyā siyā sāsavā, siyā anāsavā.\nPannarasindriyā āsavavippayuttā.\nDomanassindriyaṁ āsavasampayuttaṁ.\nCha indriyā siyā āsavasampayuttā, siyā āsavavippayuttā.\nDasindriyā na vattabbā—“āsavā ceva sāsavā cā”ti, sāsavā ceva no ca āsavā.\nTīṇindriyā na vattabbā—“āsavā ceva sāsavā cā”tipi, “sāsavā ceva no ca āsavā”tipi.\nNavindriyā na vattabbā—“āsavā ceva sāsavā cā”ti, siyā sāsavā ceva no ca āsavā, siyā na vattabbā—“sāsavā ceva no ca āsavā”ti."}},{"id":"vb5:57","sourceIds":["vb5:57.1","vb5:57.2","vb5:57.3","vb5:57.4","vb5:57.5","vb5:57.6","vb5:57.7","vb5:57.8"],"kind":"text","text":{"pi":"Pannarasindriyā na vattabbā—“āsavā ceva āsavasampayuttā cā”tipi, “āsavasampayuttā ceva no ca āsavā”tipi.\nDomanassindriyaṁ na vattabbaṁ—“āsavo ceva āsavasampayuttañcā”ti, āsavasampayuttañceva no ca āsavo.\nCha indriyā na vattabbā—“āsavā ceva āsavasampayuttā cā”ti, siyā āsavasampayuttā ceva no ca āsavā, siyā na vattabbā—“āsavasampayuttā ceva no ca āsavā”ti.\nNavindriyā āsavavippayuttasāsavā.\nTīṇindriyā āsavavippayuttaanāsavā.\nDomanassindriyaṁ na vattabbaṁ—“āsavavippayuttasāsavan”tipi, “āsavavippayuttaanāsavan”tipi.\nTīṇindriyā siyā āsavavippayuttasāsavā, siyā āsavavippayuttaanāsavā.\nCha indriyā siyā āsavavippayuttasāsavā, siyā āsavavippayuttaanāsavā, siyā na vattabbā—“āsavavippayuttasāsavā”tipi, “āsavavippayuttaanāsavā”tipi."}},{"id":"vb5:58","sourceIds":["vb5:58.0","vb5:58.1","vb5:58.2","vb5:58.3","vb5:58.4","vb5:58.5","vb5:58.6","vb5:58.7","vb5:58.8","vb5:58.9","vb5:58.10"],"kind":"text","text":{"pi":"2.2.4. Saṁyojanagocchaka\nNo saṁyojanā.\nDasindriyā saṁyojaniyā.\nTīṇindriyā asaṁyojaniyā.\nNavindriyā siyā saṁyojaniyā, siyā asaṁyojaniyā.\nPannarasindriyā saṁyojanavippayuttā.\nDomanassindriyaṁ saṁyojanasampayuttaṁ.\nCha indriyā siyā saṁyojanasampayuttā, siyā saṁyojanavippayuttā.\nDasindriyā na vattabbā—“saṁyojanā ceva saṁyojaniyā cā”ti, saṁyojaniyā ceva no ca saṁyojanā.\nTīṇindriyā na vattabbā—“saṁyojanā ceva saṁyojaniyā cā”tipi, “saṁyojaniyā ceva no ca saṁyojanā”tipi.\nNavindriyā na vattabbā—“saṁyojanā ceva saṁyojaniyā cā”ti, siyā saṁyojaniyā ceva no ca saṁyojanā, siyā na vattabbā—“saṁyojaniyā ceva no ca saṁyojanā”ti."}},{"id":"vb5:59","sourceIds":["vb5:59.1","vb5:59.2","vb5:59.3"],"kind":"text","text":{"pi":"Pannarasindriyā na vattabbā—“saṁyojanā ceva saṁyojanasampayuttā cā”tipi, “saṁyojanasampayuttā ceva no ca saṁyojanā”tipi.\nDomanassindriyaṁ na vattabbaṁ—“saṁyojanañceva saṁyojanasampayuttañcā”ti, saṁyojanasampayuttañceva no ca saṁyojanaṁ.\nCha indriyā na vattabbā—“saṁyojanā ceva saṁyojanasampayuttā cā”ti, siyā saṁyojanasampayuttā ceva no ca saṁyojanā, siyā na vattabbā—“saṁyojanasampayuttā ceva no ca saṁyojanā”ti."}},{"id":"vb5:60","sourceIds":["vb5:60.1","vb5:60.2","vb5:60.3","vb5:60.4","vb5:60.5"],"kind":"text","text":{"pi":"Navindriyā saṁyojanavippayuttasaṁyojaniyā.\nTīṇindriyā saṁyojanavippayuttaasaṁyojaniyā.\nDomanassindriyaṁ na vattabbaṁ—“saṁyojanavippayuttasaṁyojaniyan”tipi, “saṁyojanavippayuttaasaṁyojaniyan”tipi.\nTīṇindriyā siyā saṁyojanavippayuttasaṁyojaniyā, siyā saṁyojanavippayuttaasaṁyojaniyā.\nCha indriyā siyā saṁyojanavippayuttasaṁyojaniyā, siyā saṁyojanavippayuttaasaṁyojaniyā, siyā na vattabbā—“saṁyojanavippayuttasaṁyojaniyā”tipi, “saṁyojanavippayuttaasaṁyojaniyā”tipi."}},{"id":"vb5:61","sourceIds":["vb5:61.0","vb5:61.1","vb5:61.2","vb5:61.3","vb5:61.4","vb5:61.5","vb5:61.6","vb5:61.7","vb5:61.8","vb5:61.9","vb5:61.10"],"kind":"text","text":{"pi":"2.2.5. Ganthagocchaka\nNo ganthā.\nDasindriyā ganthaniyā.\nTīṇindriyā aganthaniyā.\nNavindriyā siyā ganthaniyā, siyā aganthaniyā.\nPannarasindriyā ganthavippayuttā.\nDomanassindriyaṁ ganthasampayuttaṁ.\nCha indriyā siyā ganthasampayuttā, siyā ganthavippayuttā.\nDasindriyā na vattabbā—“ganthā ceva ganthaniyā cā”ti, ganthaniyā ceva no ca ganthā.\nTīṇindriyā na vattabbā—“ganthā ceva ganthaniyā cā”tipi, “ganthaniyā ceva no ca ganthā”tipi.\nNavindriyā na vattabbā—“ganthā ceva ganthaniyā cā”ti, siyā ganthaniyā ceva no ca ganthā, siyā na vattabbā—“ganthaniyā ceva no ca ganthā”ti."}},{"id":"vb5:62","sourceIds":["vb5:62.1","vb5:62.2","vb5:62.3"],"kind":"text","text":{"pi":"Pannarasindriyā na vattabbā—“ganthā ceva ganthasampayuttā cā”tipi, “ganthasampayuttā ceva no ca ganthā”tipi.\nDomanassindriyaṁ na vattabbaṁ—“gantho ceva ganthasampayuttañcā”ti, ganthasampayuttañceva no ca gantho.\nCha indriyā na vattabbā—“ganthā ceva ganthasampayuttā cā”ti, siyā ganthasampayuttā ceva no ca ganthā, siyā na vattabbā—“ganthasampayuttā ceva no ca ganthā”ti."}},{"id":"vb5:63","sourceIds":["vb5:63.1","vb5:63.2","vb5:63.3","vb5:63.4","vb5:63.5"],"kind":"text","text":{"pi":"Navindriyā ganthavippayuttaganthaniyā.\nTīṇindriyā ganthavippayuttaaganthaniyā.\nDomanassindriyaṁ na vattabbaṁ—“ganthavippayuttaganthaniyan”tipi, “ganthavippayuttaaganthaniyan”tipi.\nTīṇindriyā siyā ganthavippayuttaganthaniyā, siyā ganthavippayuttaaganthaniyā.\nCha indriyā siyā ganthavippayuttaganthaniyā, siyā ganthavippayuttaaganthaniyā, siyā na vattabbā—“ganthavippayuttaganthaniyā”tipi, “ganthavippayuttaaganthaniyā”tipi."}},{"id":"vb5:64","sourceIds":["vb5:64.0","vb5:64.1","vb5:64.2","vb5:64.3","vb5:64.4","vb5:64.5","vb5:64.6","vb5:64.7","vb5:64.8","vb5:64.9","vb5:64.10","vb5:64.11","vb5:64.12"],"kind":"text","text":{"pi":"5.2.2.6. Oghayoganīvaraṇagocchaka\nNo oghā …pe…\nno yogā …pe…\nno nīvaraṇā.\nDasindriyā nīvaraṇiyā.\nTīṇindriyā anīvaraṇiyā.\nNavindriyā siyā nīvaraṇiyā, siyā anīvaraṇiyā.\nPannarasindriyā nīvaraṇavippayuttā.\nDomanassindriyaṁ nīvaraṇasampayuttaṁ.\nCha indriyā siyā nīvaraṇasampayuttā, siyā nīvaraṇavippayuttā.\nDasindriyā na vattabbā—“nīvaraṇā ceva nīvaraṇiyā cā”ti, nīvaraṇiyā ceva no ca nīvaraṇā.\nTīṇindriyā na vattabbā—“nīvaraṇā ceva nīvaraṇiyā cā”tipi, “nīvaraṇiyā ceva no ca nīvaraṇā”tipi.\nNavindriyā na vattabbā—“nīvaraṇā ceva nīvaraṇiyā cā”ti, siyā nīvaraṇiyā ceva no ca nīvaraṇā, siyā na vattabbā—“nīvaraṇiyā ceva no ca nīvaraṇā”ti."}},{"id":"vb5:65","sourceIds":["vb5:65.1","vb5:65.2","vb5:65.3"],"kind":"text","text":{"pi":"Pannarasindriyā na vattabbā—“nīvaraṇā ceva nīvaraṇasampayuttā cā”tipi, “nīvaraṇasampayuttā ceva no ca nīvaraṇā”tipi.\nDomanassindriyaṁ na vattabbaṁ—“nīvaraṇañceva nīvaraṇasampayuttañcā”ti, nīvaraṇasampayuttañceva no ca nīvaraṇaṁ.\nCha indriyā na vattabbā—“nīvaraṇā ceva nīvaraṇasampayuttā cā”ti, siyā nīvaraṇasampayuttā ceva no ca nīvaraṇā, siyā na vattabbā—“nīvaraṇasampayuttā ceva no ca nīvaraṇā”ti."}},{"id":"vb5:66","sourceIds":["vb5:66.1","vb5:66.2","vb5:66.3","vb5:66.4","vb5:66.5"],"kind":"text","text":{"pi":"Navindriyā nīvaraṇavippayuttanīvaraṇiyā.\nTīṇindriyā nīvaraṇavippayuttaanīvaraṇiyā.\nDomanassindriyaṁ na vattabbaṁ—“nīvaraṇavippayuttanīvaraṇiyan”tipi, “nīvaraṇavippayuttaanīvaraṇiyan”tipi.\nTīṇindriyā siyā nīvaraṇavippayuttanīvaraṇiyā, siyā nīvaraṇavippayuttaanīvaraṇiyā.\nCha indriyā siyā nīvaraṇavippayuttanīvaraṇiyā, siyā nīvaraṇavippayuttaanīvaraṇiyā, siyā na vattabbā—“nīvaraṇavippayuttanīvaraṇiyā”tipi, “nīvaraṇavippayuttaanīvaraṇiyā”tipi."}},{"id":"vb5:67","sourceIds":["vb5:67.0","vb5:67.1","vb5:67.2","vb5:67.3","vb5:67.4","vb5:67.5","vb5:67.6","vb5:67.7","vb5:67.8","vb5:67.9","vb5:67.10","vb5:67.11","vb5:67.12","vb5:67.13"],"kind":"text","text":{"pi":"2.2.9. Parāmāsagocchaka\nNo parāmāsā.\nDasindriyā parāmaṭṭhā.\nTīṇindriyā aparāmaṭṭhā.\nNavindriyā siyā parāmaṭṭhā, siyā aparāmaṭṭhā.\nSoḷasindriyā parāmāsavippayuttā.\nCha indriyā siyā parāmāsasampayuttā, siyā parāmāsavippayuttā.\nDasindriyā na vattabbā—“parāmāsā ceva parāmaṭṭhā cā”ti, parāmaṭṭhā ceva no ca parāmāsā.\nTīṇindriyā na vattabbā—“parāmāsā ceva parāmaṭṭhā cā”tipi, “parāmaṭṭhā ceva no ca parāmāsā”tipi.\nNavindriyā na vattabbā—“parāmāsā ceva parāmaṭṭhā cā”ti, siyā parāmaṭṭhā ceva no ca parāmāsā, siyā na vattabbā—“parāmaṭṭhā ceva no ca parāmāsā”ti.\nDasindriyā parāmāsavippayuttaparāmaṭṭhā.\nTīṇindriyā parāmāsavippayuttaaparāmaṭṭhā.\nTīṇindriyā siyā parāmāsavippayuttaparāmaṭṭhā, siyā parāmāsavippayuttaaparāmaṭṭhā.\nCha indriyā siyā parāmāsavippayuttaparāmaṭṭhā, siyā parāmāsavippayuttaaparāmaṭṭhā, siyā na vattabbā—“parāmāsavippayuttaparāmaṭṭhā”tipi, “parāmāsavippayuttaaparāmaṭṭhā”tipi."}},{"id":"vb5:68","sourceIds":["vb5:68.0","vb5:68.1","vb5:68.2","vb5:68.3","vb5:68.4","vb5:68.5","vb5:68.6","vb5:68.7","vb5:68.8","vb5:68.9","vb5:68.10","vb5:68.11","vb5:68.12"],"kind":"text","text":{"pi":"2.2.10. Mahantaraduka\nSattindriyā anārammaṇā.\nCuddasindriyā sārammaṇā.\nJīvitindriyā siyā sārammaṇaṁ, siyā anārammaṇaṁ.\nEkavīsatindriyā no cittā.\nManindriyaṁ cittaṁ.\nTerasindriyā cetasikā.\nAṭṭhindriyā acetasikā.\nJīvitindriyaṁ siyā cetasikaṁ, siyā acetasikaṁ.\nTerasindriyā cittasampayuttā.\nSattindriyā cittavippayuttā.\nJīvitindriyaṁ siyā cittasampayuttaṁ, siyā cittavippayuttaṁ.\nManindriyaṁ na vattabbaṁ—“cittena sampayuttan”tipi, “cittena vippayuttan”tipi."}},{"id":"vb5:69","sourceIds":["vb5:69.1","vb5:69.2","vb5:69.3","vb5:69.4","vb5:69.5","vb5:69.6","vb5:69.7"],"kind":"text","text":{"pi":"Terasindriyā cittasaṁsaṭṭhā.\nSattindriyā cittavisaṁsaṭṭhā.\nJīvitindriyaṁ siyā cittasaṁsaṭṭhaṁ, siyā cittavisaṁsaṭṭhaṁ.\nManindriyaṁ na vattabbaṁ—“cittena saṁsaṭṭhan”tipi, “cittena visaṁsaṭṭhan”tipi.\nTerasindriyā cittasamuṭṭhānā.\nAṭṭhindriyā no cittasamuṭṭhānā.\nJīvitindriyaṁ siyā cittasamuṭṭhānaṁ, siyā no cittasamuṭṭhānaṁ."}},{"id":"vb5:70","sourceIds":["vb5:70.1","vb5:70.2","vb5:70.3","vb5:70.4","vb5:70.5","vb5:70.6"],"kind":"text","text":{"pi":"Terasindriyā cittasahabhuno.\nAṭṭhindriyā no cittasahabhuno.\nJīvitindriyaṁ siyā cittasahabhū, siyā no cittasahabhū.\nTerasindriyā cittānuparivattino.\nAṭṭhindriyā no cittānuparivattino.\nJīvitindriyaṁ siyā cittānuparivatti, siyā no cittānuparivatti."}},{"id":"vb5:71","sourceIds":["vb5:71.1","vb5:71.2","vb5:71.3","vb5:71.4","vb5:71.5","vb5:71.6","vb5:71.7","vb5:71.8","vb5:71.9"],"kind":"text","text":{"pi":"Terasindriyā cittasaṁsaṭṭhasamuṭṭhānā.\nAṭṭhindriyā no cittasaṁsaṭṭhasamuṭṭhānā.\nJīvitindriyaṁ siyā cittasaṁsaṭṭhasamuṭṭhānaṁ, siyā no cittasaṁsaṭṭhasamuṭṭhānaṁ.\nTerasindriyā cittasaṁsaṭṭhasamuṭṭhānasahabhuno.\nAṭṭhindriyā no cittasaṁsaṭṭhasamuṭṭhānasahabhuno.\nJīvitindriyaṁ siyā cittasaṁsaṭṭhasamuṭṭhānasahabhū, siyā no cittasaṁsaṭṭhasamuṭṭhānasahabhū.\nTerasindriyā cittasaṁsaṭṭhasamuṭṭhānānuparivattino.\nAṭṭhindriyā no cittasaṁsaṭṭhasamuṭṭhānānuparivattino.\nJīvitindriyaṁ siyā cittasaṁsaṭṭhasamuṭṭhānānuparivatti, siyā no cittasaṁsaṭṭhasamuṭṭhānānuparivatti."}},{"id":"vb5:72","sourceIds":["vb5:72.0","vb5:72.1","vb5:72.2","vb5:72.3","vb5:72.4","vb5:72.5","vb5:72.6","vb5:72.7","vb5:72.8"],"kind":"text","text":{"pi":"2.2.11. Upādānagocchaka\nCha indriyā ajjhattikā.\nSoḷasindriyā bāhirā.\nSattindriyā upādā.\nCuddasindriyā no upādā.\nJīvitindriyaṁ siyā upādā, siyā no upādā.\nNavindriyā upādinnā.\nCattārindriyā anupādinnā.\nNavindriyā siyā upādinnā, siyā anupādinnā."}},{"id":"vb5:73","sourceIds":["vb5:73.0","vb5:73.1","vb5:73.2","vb5:73.3","vb5:73.4","vb5:73.5","vb5:73.6","vb5:73.7","vb5:73.8","vb5:73.9","vb5:73.10"],"kind":"text","text":{"pi":"2.2.12. Kilesagocchaka\nNo upādānā.\nDasindriyā upādāniyā.\nTīṇindriyā anupādāniyā.\nNavindriyā siyā upādāniyā, siyā anupādāniyā.\nSoḷasindriyā upādānavippayuttā.\nCha indriyā siyā upādānasampayuttā, siyā upādānavippayuttā.\nDasindriyā na vattabbā—“upādānā ceva upādāniyā cā”ti, upādāniyā ceva no ca upādānā.\nTīṇindriyā na vattabbā—“upādānā ceva upādāniyā cā”tipi, “upādāniyā ceva no ca upādānā”tipi.\nNavindriyā na vattabbā—“upādānā ceva upādāniyā cā”ti, siyā upādāniyā ceva no ca upādānā.\nDasindriyā siyā upādāniyā ceva no ca upādānā, siyā na vattabbā—“upādāniyā ceva no ca upādānā”ti."}},{"id":"vb5:74","sourceIds":["vb5:74.1","vb5:74.2","vb5:74.3","vb5:74.4","vb5:74.5","vb5:74.6"],"kind":"text","text":{"pi":"Soḷasindriyā na vattabbā—“upādānā ceva upādānasampayuttā cā”tipi, “upādānasampayuttā ceva no ca upādānā”tipi.\nCha indriyā na vattabbā—“upādānā ceva upādānasampayuttā cā”ti, siyā upādānasampayuttā ceva no ca upādānā, siyā na vattabbā—“upādānasampayuttā ceva no ca upādānā”ti.\nDasindriyā upādānavippayuttaupādāniyā.\nTīṇindriyā upādānavippayuttaanupādāniyā.\nTīṇindriyā siyā upādānavippayuttaupādāniyā, siyā upādānavippayuttaanupādāniyā.\nCha indriyā siyā upādānavippayuttaupādāniyā, siyā upādānavippayuttaanupādāniyā, siyā na vattabbā—“upādānavippayuttaupādāniyā”tipi, “upādānavippayuttaanupādāniyā”tipi."}},{"id":"vb5:75","sourceIds":["vb5:75.0","vb5:75.1","vb5:75.2","vb5:75.3","vb5:75.4","vb5:75.5","vb5:75.6","vb5:75.7","vb5:75.8","vb5:75.9","vb5:75.10","vb5:75.11","vb5:75.12","vb5:75.13"],"kind":"text","text":{"pi":"2.2.13. Piṭṭhiduka\nNo kilesā.\nDasindriyā saṅkilesikā.\nTīṇindriyā asaṅkilesikā.\nNavindriyā siyā saṅkilesikā, siyā asaṅkilesikā.\nPannarasindriyā asaṅkiliṭṭhā.\nDomanassindriyaṁ saṅkiliṭṭhaṁ.\nCha indriyā siyā saṅkiliṭṭhā, siyā asaṅkiliṭṭhā.\nPannarasindriyā kilesavippayuttā.\nDomanassindriyaṁ kilesasampayuttaṁ.\nCha indriyā siyā kilesasampayuttā, siyā kilesavippayuttā.\nDasindriyā na vattabbā—“kilesā ceva saṅkilesikā cā”ti, saṅkilesikā ceva no ca kilesā.\nTīṇindriyā na vattabbā—“kilesā ceva saṅkilesikā cā”tipi, “saṅkilesikā ceva no ca kilesā”tipi.\nNavindriyā na vattabbā—“kilesā ceva saṅkilesikā cā”ti, siyā saṅkilesikā ceva no ca kilesā, siyā na vattabbā—“saṅkilesikā ceva no ca kilesā”ti."}},{"id":"vb5:76","sourceIds":["vb5:76.1","vb5:76.2","vb5:76.3"],"kind":"text","text":{"pi":"Pannarasindriyā na vattabbā—“kilesā ceva saṅkiliṭṭhā cā”tipi, “saṅkiliṭṭhā ceva no ca kilesā”tipi.\nDomanassindriyaṁ na vattabbaṁ—“kileso ceva saṅkiliṭṭhañcā”ti, saṅkiliṭṭhañceva no ca kileso.\nCha indriyā na vattabbā—“kilesā ceva saṅkiliṭṭhā cā”ti, siyā saṅkiliṭṭhā ceva no ca kilesā, siyā na vattabbā—“saṅkiliṭṭhā ceva no ca kilesā”ti."}},{"id":"vb5:77","sourceIds":["vb5:77.1","vb5:77.2","vb5:77.3","vb5:77.4","vb5:77.5","vb5:77.6","vb5:77.7","vb5:77.8"],"kind":"text","text":{"pi":"Pannarasindriyā na vattabbā—“kilesā ceva kilesasampayuttā cā”tipi, “kilesasampayuttā ceva no ca kilesā”tipi.\nDomanassindriyaṁ na vattabbaṁ—“kileso ceva kilesasampayuttañcā”ti, kilesasampayuttañceva no ca kileso.\nCha indriyā na vattabbā—“kilesā ceva kilesasampayuttā cā”ti, siyā kilesasampayuttā ceva no ca kilesā, siyā na vattabbā—“kilesasampayuttā ceva no ca kilesā”ti.\nNavindriyā kilesavippayuttasaṅkilesikā.\nTīṇindriyā kilesavippayuttaasaṅkilesikā.\nDomanassindriyaṁ na vattabbaṁ—“kilesavippayuttasaṅkilesikan”tipi, “kilesavippayuttaasaṅkilesikan”tipi.\nTīṇindriyā siyā kilesavippayuttasaṅkilesikā, siyā kilesavippayuttaasaṅkilesikā.\nCha indriyā siyā kilesavippayuttasaṅkilesikā, siyā kilesavippayuttaasaṅkilesikā, siyā na vattabbā—“kilesavippayuttasaṅkilesikā”tipi, “kilesavippayuttaasaṅkilesikā”tipi."}},{"id":"vb5:78","sourceIds":["vb5:78.1","vb5:78.2","vb5:78.3","vb5:78.4","vb5:78.5","vb5:78.6","vb5:78.7","vb5:78.8"],"kind":"text","text":{"pi":"Pannarasindriyā na dassanena pahātabbā.\nSattindriyā siyā dassanena pahātabbā, siyā na dassanena pahātabbā.\nPannarasindriyā na bhāvanāya pahātabbā.\nSattindriyā siyā bhāvanāya pahātabbā, siyā na bhāvanāya pahātabbā.\nPannarasindriyā na dassanena pahātabbahetukā.\nSattindriyā siyā dassanena pahātabbahetukā, siyā na dassanena pahātabbahetukā.\nPannarasindriyā na bhāvanāya pahātabbahetukā.\nSattindriyā siyā bhāvanāya pahātabbahetukā, siyā na bhāvanāya pahātabbahetukā."}},{"id":"vb5:79","sourceIds":["vb5:79.1","vb5:79.2","vb5:79.3","vb5:79.4","vb5:79.5","vb5:79.6","vb5:79.7","vb5:79.8","vb5:79.9","vb5:79.10","vb5:79.11","vb5:79.12","vb5:79.13","vb5:79.14"],"kind":"text","text":{"pi":"Navindriyā avitakkā.\nDomanassindriyaṁ savitakkaṁ.\nDvādasindriyā siyā savitakkā, siyā avitakkā.\nNavindriyā avicārā.\nDomanassindriyaṁ savicāraṁ.\nDvādasindriyā siyā savicārā, siyā avicārā.\nEkādasindriyā appītikā.\nEkādasindriyā siyā sappītikā, siyā appītikā.\nEkādasindriyā na pītisahagatā.\nEkādasindriyā siyā pītisahagatā, siyā na pītisahagatā.\nDvādasindriyā na sukhasahagatā.\nDasindriyā siyā sukhasahagatā, siyā na sukhasahagatā.\nDvādasindriyā na upekkhāsahagatā.\nDasindriyā siyā upekkhāsahagatā, siyā na upekkhāsahagatā."}},{"id":"vb5:80","sourceIds":["vb5:80.1","vb5:80.2","vb5:80.3","vb5:80.4","vb5:80.5","vb5:80.6","vb5:80.7","vb5:80.8","vb5:80.9","vb5:80.10","vb5:80.11","vb5:80.12","vb5:80.13","vb5:80.14","vb5:80.15","vb5:80.16","vb5:80.17","vb5:80.18","vb5:80.19","vb5:80.20","vb5:80.21","vb5:80.22"],"kind":"text","text":{"pi":"Dasindriyā kāmāvacarā.\nTīṇindriyā na kāmāvacarā.\nNavindriyā siyā kāmāvacarā, siyā na kāmāvacarā.\nTerasindriyā na rūpāvacarā.\nNavindriyā siyā rūpāvacarā, siyā na rūpāvacarā.\nCuddasindriyā na arūpāvacarā.\nAṭṭhindriyā siyā arūpāvacarā, siyā na arūpāvacarā.\nDasindriyā pariyāpannā.\nTīṇindriyā apariyāpannā.\nNavindriyā siyā pariyāpannā, siyā apariyāpannā.\nEkādasindriyā aniyyānikā.\nAnaññātaññassāmītindriyaṁ niyyānikaṁ.\nDasindriyā siyā niyyānikā, siyā aniyyānikā.\nDasindriyā aniyatā.\nAnaññātaññassāmītindriyaṁ niyataṁ.\nEkādasindriyā siyā niyatā, siyā aniyatā.\nDasindriyā sauttarā.\nTīṇindriyā anuttarā.\nNavindriyā siyā sauttarā, siyā anuttarā.\nPannarasindriyā araṇā.\nDomanassindriyaṁ saraṇaṁ.\nCha indriyā siyā saraṇā, siyā araṇāti."}},{"id":"vb5:81","sourceIds":["vb5:81.1"],"kind":"text","text":{"pi":"Pañhāpucchakaṁ."}},{"id":"vb5:82","sourceIds":["vb5:82.1"],"kind":"text","text":{"pi":"Indriyavibhaṅgo niṭṭhito."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/vb5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}