{"id":"vb7","title":"Satipaṭṭhānavibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"vb7","title":"Satipaṭṭhānavibhaṅga","units":[{"id":"vb7:0","sourceIds":["vb7:0.1","vb7:0.2"],"kind":"text","text":{"pi":"Vibhaṅga\nSatipaṭṭhānavibhaṅga"}},{"id":"vb7:1","sourceIds":["vb7:1.0","vb7:1.1","vb7:1.2"],"kind":"text","text":{"pi":"1. Suttantabhājanīya\nCattāro satipaṭṭhānā—\nidha bhikkhu ajjhattaṁ kāye kāyānupassī viharati bahiddhā kāye kāyānupassī viharati ajjhattabahiddhā kāye kāyānupassī viharati ātāpī sampajāno satimā vineyya loke abhijjhādomanassaṁ, ajjhattaṁ vedanāsu vedanānupassī viharati bahiddhā vedanāsu vedanānupassī viharati ajjhattabahiddhā vedanāsu vedanānupassī viharati ātāpī sampajāno satimā vineyya loke abhijjhādomanassaṁ, ajjhattaṁ citte cittānupassī viharati bahiddhā citte cittānupassī viharati ajjhattabahiddhā citte cittānupassī viharati ātāpī sampajāno satimā vineyya loke abhijjhādomanassaṁ, ajjhattaṁ dhammesu dhammānupassī viharati bahiddhā dhammesu dhammānupassī viharati ajjhattabahiddhā dhammesu dhammānupassī viharati ātāpī sampajāno satimā vineyya loke abhijjhādomanassaṁ."}},{"id":"vb7:2","sourceIds":["vb7:2.0","vb7:2.1","vb7:2.2","vb7:2.3","vb7:2.4","vb7:2.5"],"kind":"text","text":{"pi":"1.1. Kāyānupassanāniddesa\nKathañca bhikkhu ajjhattaṁ kāye kāyānupassī viharati?\nIdha bhikkhu ajjhattaṁ kāyaṁ uddhaṁ pādatalā adho kesamatthakā tacapariyantaṁ pūraṁ nānappakārassa asucino paccavekkhati—\n“atthi imasmiṁ kāye kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ, pittaṁ semhaṁ pubbo lohitaṁ sedo medo, assu vasā kheḷo siṅghāṇikā lasikā muttan”ti.\nSo taṁ nimittaṁ āsevati bhāveti bahulīkaroti, svāvatthitaṁ vavatthapeti.\nSo taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā bahiddhā kāye cittaṁ upasaṁharati."}},{"id":"vb7:3","sourceIds":["vb7:3.1","vb7:3.2","vb7:3.3","vb7:3.4","vb7:3.5"],"kind":"text","text":{"pi":"Kathañca bhikkhu bahiddhā kāye kāyānupassī viharati?\nIdha bhikkhu bahiddhā kāyaṁ uddhaṁ pādatalā adho kesamatthakā tacapariyantaṁ pūraṁ nānappakārassa asucino paccavekkhati—\n“atthissa kāye kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ, pittaṁ semhaṁ pubbo lohitaṁ sedo medo, assu vasā kheḷo siṅghāṇikā lasikā muttan”ti.\nSo taṁ nimittaṁ āsevati bhāveti bahulīkaroti, svāvatthitaṁ vavatthapeti.\nSo taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā ajjhattabahiddhā kāye cittaṁ upasaṁharati."}},{"id":"vb7:4","sourceIds":["vb7:4.1","vb7:4.2","vb7:4.3","vb7:4.4"],"kind":"text","text":{"pi":"Kathañca bhikkhu ajjhattabahiddhā kāye kāyānupassī viharati?\nIdha bhikkhu ajjhattabahiddhā kāyaṁ uddhaṁ pādatalā adho kesamatthakā tacapariyantaṁ pūraṁ nānappakārassa asucino paccavekkhati—\n“atthi imasmiṁ kāye kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ, pittaṁ semhaṁ pubbo lohitaṁ sedo medo, assu vasā kheḷo siṅghāṇikā lasikā muttan”ti.\nEvaṁ bhikkhu ajjhattabahiddhā kāye kāyānupassī viharati ātāpī sampajāno satimā vineyya loke abhijjhādomanassaṁ."}},{"id":"vb7:5","sourceIds":["vb7:5.1","vb7:5.2","vb7:5.3","vb7:5.4","vb7:5.5","vb7:5.6"],"kind":"text","text":{"pi":"“Anupassī”ti.\nTattha katamā anupassanā?\nYā paññā pajānanā …pe… amoho dhammavicayo sammādiṭṭhi—\nayaṁ vuccati “anupassanā”.\nImāya anupassanāya upeto hoti samupeto upāgato samupāgato upapanno sampanno samannāgato.\nTena vuccati “anupassī”ti."}},{"id":"vb7:6","sourceIds":["vb7:6.1","vb7:6.2","vb7:6.3"],"kind":"text","text":{"pi":"“Viharatī”ti.\nIriyati vattati pāleti yapeti yāpeti carati viharati.\nTena vuccati “viharatī”ti."}},{"id":"vb7:7","sourceIds":["vb7:7.1","vb7:7.2","vb7:7.3","vb7:7.4","vb7:7.5","vb7:7.6"],"kind":"text","text":{"pi":"“Ātāpī”ti.\nTattha katamo ātāpo?\nYo cetasiko vīriyārambho …pe… sammāvāyāmo—\nayaṁ vuccati “ātāpo”.\nIminā ātāpena upeto hoti samupeto upāgato samupāgato upapanno sampanno samannāgato.\nTena vuccati “ātāpī”ti."}},{"id":"vb7:8","sourceIds":["vb7:8.1","vb7:8.2","vb7:8.3","vb7:8.4","vb7:8.5","vb7:8.6"],"kind":"text","text":{"pi":"“Sampajāno”ti.\nTattha katamaṁ sampajaññaṁ?\nYā paññā pajānanā …pe… amoho dhammavicayo sammādiṭṭhi—\nidaṁ vuccati “sampajaññaṁ”.\nIminā sampajaññena upeto hoti samupeto upāgato samupāgato upapanno sampanno samannāgato.\nTena vuccati “sampajāno”ti."}},{"id":"vb7:9","sourceIds":["vb7:9.1","vb7:9.2","vb7:9.3","vb7:9.4","vb7:9.5","vb7:9.6"],"kind":"text","text":{"pi":"“Satimā”ti.\nTattha katamā sati?\nYā sati anussati …pe… sammāsati—\nayaṁ vuccati “sati”.\nImāya satiyā upeto hoti samupeto upāgato samupāgato upapanno sampanno samannāgato.\nTena vuccati “satimā”ti."}},{"id":"vb7:10","sourceIds":["vb7:10.1","vb7:10.2","vb7:10.3","vb7:10.4","vb7:10.5","vb7:10.6","vb7:10.7","vb7:10.8","vb7:10.9","vb7:10.10","vb7:10.11","vb7:10.12","vb7:10.13"],"kind":"text","text":{"pi":"“Vineyya loke abhijjhādomanassan”ti.\nTattha katamo loko?\nSveva kāyo loko.\nPañcapi upādānakkhandhā loko.\nAyaṁ vuccati “loko”.\nTattha katamā abhijjhā?\nYo rāgo sārāgo …pe… cittassa sārāgo—\nayaṁ vuccati “abhijjhā”.\nTattha katamaṁ domanassaṁ?\nYaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—\nidaṁ vuccati “domanassaṁ”.\nIti ayañca abhijjhā idañca domanassaṁ imamhi loke vinītā honti paṭivinītā santā samitā vūpasantā atthaṅgatā abbhatthaṅgatā appitā byappitā sositā visositā byantīkatā.\nTena vuccati “vineyya loke abhijjhādomanassan”ti."}},{"id":"vb7:11","sourceIds":["vb7:11.1"],"kind":"text","text":{"pi":"Kāyānupassanāniddeso."}},{"id":"vb7:12","sourceIds":["vb7:12.0","vb7:12.1","vb7:12.2","vb7:12.3","vb7:12.4"],"kind":"text","text":{"pi":"1.2. Vedanānupassanāniddesa\nKathañca bhikkhu ajjhattaṁ vedanāsu vedanānupassī viharati?\nIdha bhikkhu sukhaṁ vedanaṁ vedayamāno “sukhaṁ vedanaṁ vedayāmī”ti pajānāti, dukkhaṁ vedanaṁ vedayamāno “dukkhaṁ vedanaṁ vedayāmī”ti pajānāti, adukkhamasukhaṁ vedanaṁ vedayamāno “adukkhamasukhaṁ vedanaṁ vedayāmī”ti pajānāti, sāmisaṁ vā sukhaṁ vedanaṁ vedayamāno “sāmisaṁ sukhaṁ vedanaṁ vedayāmī”ti pajānāti, nirāmisaṁ vā sukhaṁ vedanaṁ vedayamāno “nirāmisaṁ sukhaṁ vedanaṁ vedayāmī”ti pajānāti, sāmisaṁ vā dukkhaṁ vedanaṁ vedayamāno “sāmisaṁ dukkhaṁ vedanaṁ vedayāmī”ti pajānāti, nirāmisaṁ vā dukkhaṁ vedanaṁ vedayamāno “nirāmisaṁ dukkhaṁ vedanaṁ vedayāmī”ti pajānāti, sāmisaṁ vā adukkhamasukhaṁ vedanaṁ vedayamāno “sāmisaṁ adukkhamasukhaṁ vedanaṁ vedayāmī”ti pajānāti, nirāmisaṁ vā adukkhamasukhaṁ vedanaṁ vedayamāno “nirāmisaṁ adukkhamasukhaṁ vedanaṁ vedayāmī”ti pajānāti.\nSo taṁ nimittaṁ āsevati bhāveti bahulīkaroti svāvatthitaṁ vavatthapeti.\nSo taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā bahiddhā vedanāsu cittaṁ upasaṁharati."}},{"id":"vb7:13","sourceIds":["vb7:13.1","vb7:13.2","vb7:13.3","vb7:13.4"],"kind":"text","text":{"pi":"Kathañca bhikkhu bahiddhā vedanāsu vedanānupassī viharati?\nIdha bhikkhu sukhaṁ vedanaṁ vedayamānaṁ “sukhaṁ vedanaṁ vedayatī”ti pajānāti, dukkhaṁ vedanaṁ vedayamānaṁ “dukkhaṁ vedanaṁ vedayatī”ti pajānāti, adukkhamasukhaṁ vedanaṁ vedayamānaṁ “adukkhamasukhaṁ vedanaṁ vedayatī”ti pajānāti, sāmisaṁ vā sukhaṁ vedanaṁ vedayamānaṁ “sāmisaṁ sukhaṁ vedanaṁ vedayatī”ti pajānāti, nirāmisaṁ vā sukhaṁ vedanaṁ vedayamānaṁ “nirāmisaṁ sukhaṁ vedanaṁ vedayatī”ti pajānāti, sāmisaṁ vā dukkhaṁ vedanaṁ vedayamānaṁ “sāmisaṁ dukkhaṁ vedanaṁ vedayatī”ti pajānāti, nirāmisaṁ vā dukkhaṁ vedanaṁ vedayamānaṁ “nirāmisaṁ dukkhaṁ vedanaṁ vedayatī”ti pajānāti, sāmisaṁ vā adukkhamasukhaṁ vedanaṁ vedayamānaṁ “sāmisaṁ adukkhamasukhaṁ vedanaṁ vedayatī”ti pajānāti, nirāmisaṁ vā adukkhamasukhaṁ vedanaṁ vedayamānaṁ “nirāmisaṁ adukkhamasukhaṁ vedanaṁ vedayatī”ti pajānāti.\nSo taṁ nimittaṁ āsevati bhāveti bahulīkaroti svāvatthitaṁ vavatthapeti.\nSo taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā ajjhattabahiddhā vedanāsu cittaṁ upasaṁharati."}},{"id":"vb7:14","sourceIds":["vb7:14.1","vb7:14.2","vb7:14.3"],"kind":"text","text":{"pi":"Kathañca bhikkhu ajjhattabahiddhā vedanāsu vedanānupassī viharati?\nIdha bhikkhu sukhaṁ vedanaṁ “sukhā vedanā”ti pajānāti, dukkhaṁ vedanaṁ “dukkhā vedanā”ti pajānāti, adukkhamasukhaṁ vedanaṁ “adukkhamasukhā vedanā”ti pajānāti, sāmisaṁ vā sukhaṁ vedanaṁ “sāmisā sukhā vedanā”ti pajānāti, nirāmisaṁ vā sukhaṁ vedanaṁ “nirāmisā sukhā vedanā”ti pajānāti, sāmisaṁ vā dukkhaṁ vedanaṁ “sāmisā dukkhā vedanā”ti pajānāti, nirāmisaṁ vā dukkhaṁ vedanaṁ “nirāmisā dukkhā vedanā”ti pajānāti, sāmisaṁ vā adukkhamasukhaṁ vedanaṁ “sāmisā adukkhamasukhā vedanā”ti pajānāti, nirāmisaṁ vā adukkhamasukhaṁ vedanaṁ “nirāmisā adukkhamasukhā vedanā”ti pajānāti.\nEvaṁ bhikkhu ajjhattabahiddhā vedanāsu vedanānupassī viharati ātāpī sampajāno satimā vineyya loke abhijjhādomanassaṁ."}},{"id":"vb7:15","sourceIds":["vb7:15.1","vb7:15.2","vb7:15.3","vb7:15.4","vb7:15.5","vb7:15.6","vb7:15.7","vb7:15.8","vb7:15.9","vb7:15.10","vb7:15.11","vb7:15.12","vb7:15.13","vb7:15.14","vb7:15.15","vb7:15.16","vb7:15.17","vb7:15.18"],"kind":"text","text":{"pi":"“Anupassī”ti …pe…\n“viharatī”ti …pe…\n“ātāpī”ti …pe…\n“sampajāno”ti …pe…\n“satimā”ti …pe…\n“vineyya loke abhijjhādomanassan”ti.\nTattha katamo loko?\nSāyeva vedanā loko.\nPañcapi upādānakkhandhā loko.\nAyaṁ vuccati “loko”.\nTattha katamā abhijjhā?\nYo rāgo sārāgo …pe… cittassa sārāgo—\nayaṁ vuccati “abhijjhā”.\nTattha katamaṁ domanassaṁ?\nYaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—\nidaṁ vuccati “domanassaṁ”.\nIti ayañca abhijjhā idañca domanassaṁ imamhi loke vinītā honti paṭivinītā santā samitā vūpasantā atthaṅgatā abbhatthaṅgatā appitā byappitā sositā visositā byantīkatā.\nTena vuccati “vineyya loke abhijjhādomanassan”ti."}},{"id":"vb7:16","sourceIds":["vb7:16.1"],"kind":"text","text":{"pi":"Vedanānupassanāniddeso."}},{"id":"vb7:17","sourceIds":["vb7:17.0","vb7:17.1","vb7:17.2","vb7:17.3","vb7:17.4"],"kind":"text","text":{"pi":"1.3. Cittānupassanāniddesa\nKathañca bhikkhu ajjhattaṁ citte cittānupassī viharati?\nIdha bhikkhu sarāgaṁ vā cittaṁ “sarāgaṁ me cittan”ti pajānāti, vītarāgaṁ vā cittaṁ “vītarāgaṁ me cittan”ti pajānāti, sadosaṁ vā cittaṁ “sadosaṁ me cittan”ti pajānāti, vītadosaṁ vā cittaṁ “vītadosaṁ me cittan”ti pajānāti, samohaṁ vā cittaṁ “samohaṁ me cittan”ti pajānāti, vītamohaṁ vā cittaṁ “vītamohaṁ me cittan”ti pajānāti, saṅkhittaṁ vā cittaṁ “saṅkhittaṁ me cittan”ti pajānāti, vikkhittaṁ vā cittaṁ “vikkhittaṁ me cittan”ti pajānāti, mahaggataṁ vā cittaṁ “mahaggataṁ me cittan”ti pajānāti, amahaggataṁ vā cittaṁ “amahaggataṁ me cittan”ti pajānāti, sauttaraṁ vā cittaṁ “sauttaraṁ me cittan”ti pajānāti, anuttaraṁ vā cittaṁ “anuttaraṁ me cittan”ti pajānāti, samāhitaṁ vā cittaṁ “samāhitaṁ me cittan”ti pajānāti, asamāhitaṁ vā cittaṁ “asamāhitaṁ me cittan”ti pajānāti, vimuttaṁ vā cittaṁ “vimuttaṁ me cittan”ti pajānāti, avimuttaṁ vā cittaṁ “avimuttaṁ me cittan”ti pajānāti.\nSo taṁ nimittaṁ āsevati bhāveti bahulīkaroti svāvatthitaṁ vavatthapeti.\nSo taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā bahiddhā citte cittaṁ upasaṁharati."}},{"id":"vb7:18","sourceIds":["vb7:18.1","vb7:18.2","vb7:18.3","vb7:18.4"],"kind":"text","text":{"pi":"Kathañca bhikkhu bahiddhā citte cittānupassī viharati?\nIdha bhikkhu sarāgaṁ vāssa cittaṁ “sarāgamassa cittan”ti pajānāti, vītarāgaṁ vāssa cittaṁ “vītarāgamassa cittan”ti pajānāti, sadosaṁ vāssa cittaṁ “sadosamassa cittan”ti pajānāti, vītadosaṁ vāssa cittaṁ “vītadosamassa cittan”ti pajānāti, samohaṁ vāssa cittaṁ “samohamassa cittan”ti pajānāti, vītamohaṁ vāssa cittaṁ “vītamohamassa cittan”ti pajānāti, saṅkhittaṁ vāssa cittaṁ “saṅkhittamassa cittan”ti pajānāti, vikkhittaṁ vāssa cittaṁ “vikkhittamassa cittan”ti pajānāti, mahaggataṁ vāssa cittaṁ “mahaggatamassa cittan”ti pajānāti, amahaggataṁ vāssa cittaṁ “amahaggatamassa cittan”ti pajānāti, sauttaraṁ vāssa cittaṁ “sauttaramassa cittan”ti pajānāti, anuttaraṁ vāssa cittaṁ “anuttaramassa cittan”ti pajānāti, samāhitaṁ vāssa cittaṁ “samāhitamassa cittan”ti pajānāti, asamāhitaṁ vāssa cittaṁ “asamāhitamassa cittan”ti pajānāti, vimuttaṁ vāssa cittaṁ “vimuttamassa cittan”ti pajānāti, avimuttaṁ vāssa cittaṁ “avimuttamassa cittan”ti pajānāti.\nSo taṁ nimittaṁ āsevati bhāveti bahulīkaroti svāvatthitaṁ vavatthapeti.\nSo taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā ajjhattabahiddhā citte cittaṁ upasaṁharati."}},{"id":"vb7:19","sourceIds":["vb7:19.1","vb7:19.2","vb7:19.3"],"kind":"text","text":{"pi":"Kathañca bhikkhu ajjhattabahiddhā citte cittānupassī viharati?\nIdha bhikkhu sarāgaṁ vā cittaṁ “sarāgaṁ cittan”ti pajānāti, vītarāgaṁ vā cittaṁ “vītarāgaṁ cittan”ti pajānāti, sadosaṁ vā cittaṁ “sadosaṁ cittan”ti pajānāti, vītadosaṁ vā cittaṁ “vītadosaṁ cittan”ti pajānāti, samohaṁ vā cittaṁ “samohaṁ cittan”ti pajānāti, vītamohaṁ vā cittaṁ “vītamohaṁ cittan”ti pajānāti, saṅkhittaṁ vā cittaṁ “saṅkhittaṁ cittan”ti pajānāti, vikkhittaṁ vā cittaṁ “vikkhittaṁ cittan”ti pajānāti, mahaggataṁ vā cittaṁ “mahaggataṁ cittan”ti pajānāti, amahaggataṁ vā cittaṁ “amahaggataṁ cittan”ti pajānāti, sauttaraṁ vā cittaṁ “sauttaraṁ cittan”ti pajānāti, anuttaraṁ vā cittaṁ “anuttaraṁ cittan”ti pajānāti, samāhitaṁ vā cittaṁ “samāhitaṁ cittan”ti pajānāti, asamāhitaṁ vā cittaṁ “asamāhitaṁ cittan”ti pajānāti, vimuttaṁ vā cittaṁ “vimuttaṁ cittan”ti pajānāti, avimuttaṁ vā cittaṁ “avimuttaṁ cittan”ti pajānāti.\nEvaṁ bhikkhu ajjhattabahiddhā citte cittānupassī viharati ātāpī sampajāno satimā vineyya loke abhijjhādomanassaṁ."}},{"id":"vb7:20","sourceIds":["vb7:20.1","vb7:20.2","vb7:20.3","vb7:20.4","vb7:20.5","vb7:20.6","vb7:20.7","vb7:20.8","vb7:20.9","vb7:20.10","vb7:20.11","vb7:20.12","vb7:20.13","vb7:20.14","vb7:20.15","vb7:20.16","vb7:20.17"],"kind":"text","text":{"pi":"“Anupassī”ti …pe…\n“viharatī”ti …pe…\n“ātāpī”ti …pe…\n“sampajāno”ti …pe…\n“satimā”ti …pe…\n“vineyya loke abhijjhādomanassan”ti.\nTattha katamo loko?\nTaṁyeva cittaṁ loko.\nPañcapi upādānakkhandhā loko.\nTattha katamā abhijjhā?\nYo rāgo sārāgo …pe… cittassa sārāgo—\nayaṁ vuccati “abhijjhā”.\nTattha katamaṁ domanassaṁ?\nYaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—\nidaṁ vuccati “domanassaṁ”.\nIti ayañca abhijjhā idañca domanassaṁ imamhi loke vinītā honti paṭivinītā santā samitā vūpasantā atthaṅgatā abbhatthaṅgatā appitā byappitā sositā visositā byantīkatā.\nTena vuccati “vineyya loke abhijjhādomanassan”ti."}},{"id":"vb7:21","sourceIds":["vb7:21.1"],"kind":"text","text":{"pi":"Cittānupassanāniddeso."}},{"id":"vb7:22","sourceIds":["vb7:22.0","vb7:22.1","vb7:22.2","vb7:22.3","vb7:22.4","vb7:22.5","vb7:22.6"],"kind":"text","text":{"pi":"1.4. Dhammānupassanāniddesa\nKathañca bhikkhu ajjhattaṁ dhammesu dhammānupassī viharati?\nIdha bhikkhu santaṁ vā ajjhattaṁ kāmacchandaṁ “atthi me ajjhattaṁ kāmacchando”ti pajānāti, asantaṁ vā ajjhattaṁ kāmacchandaṁ “natthi me ajjhattaṁ kāmacchando”ti pajānāti, yathā ca anuppannassa kāmacchandassa uppādo hoti tañca pajānāti, yathā ca uppannassa kāmacchandassa pahānaṁ hoti tañca pajānāti, yathā ca pahīnassa kāmacchandassa āyatiṁ anuppādo hoti tañca pajānāti.\nSantaṁ vā ajjhattaṁ byāpādaṁ …pe…\nsantaṁ vā ajjhattaṁ thinamiddhaṁ …pe…\nsantaṁ vā ajjhattaṁ uddhaccakukkuccaṁ …pe…\nsantaṁ vā ajjhattaṁ vicikicchaṁ “atthi me ajjhattaṁ vicikicchā”ti pajānāti, asantaṁ vā ajjhattaṁ vicikicchaṁ “natthi me ajjhattaṁ vicikicchā”ti pajānāti, yathā ca anuppannāya vicikicchāya uppādo hoti tañca pajānāti, yathā ca uppannāya vicikicchāya pahānaṁ hoti tañca pajānāti, yathā ca pahīnāya vicikicchāya āyatiṁ anuppādo hoti tañca pajānāti."}},{"id":"vb7:23","sourceIds":["vb7:23.1","vb7:23.2","vb7:23.3","vb7:23.4","vb7:23.5","vb7:23.6","vb7:23.7","vb7:23.8"],"kind":"text","text":{"pi":"Santaṁ vā ajjhattaṁ satisambojjhaṅgaṁ “atthi me ajjhattaṁ satisambojjhaṅgo”ti pajānāti, asantaṁ vā ajjhattaṁ satisambojjhaṅgaṁ “natthi me ajjhattaṁ satisambojjhaṅgo”ti pajānāti, yathā ca anuppannassa satisambojjhaṅgassa uppādo hoti tañca pajānāti, yathā ca uppannassa satisambojjhaṅgassa bhāvanāya pāripūrī hoti tañca pajānāti, santaṁ vā ajjhattaṁ dhammavicayasambojjhaṅgaṁ …pe…\nsantaṁ vā ajjhattaṁ vīriyasambojjhaṅgaṁ …pe…\nsantaṁ vā ajjhattaṁ pītisambojjhaṅgaṁ …pe…\nsantaṁ vā ajjhattaṁ passaddhisambojjhaṅgaṁ …pe…\nsantaṁ vā ajjhattaṁ samādhisambojjhaṅgaṁ …pe…\nsantaṁ vā ajjhattaṁ upekkhāsambojjhaṅgaṁ “atthi me ajjhattaṁ upekkhāsambojjhaṅgo”ti pajānāti, asantaṁ vā ajjhattaṁ upekkhāsambojjhaṅgaṁ “natthi me ajjhattaṁ upekkhāsambojjhaṅgo”ti pajānāti, yathā ca anuppannassa upekkhāsambojjhaṅgassa uppādo hoti tañca pajānāti, yathā ca uppannassa upekkhāsambojjhaṅgassa bhāvanāya pāripūrī hoti, tañca pajānāti.\nSo taṁ nimittaṁ āsevati bhāveti bahulīkaroti, svāvatthitaṁ vavatthapeti.\nSo taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā bahiddhā dhammesu cittaṁ upasaṁharati."}},{"id":"vb7:24","sourceIds":["vb7:24.1","vb7:24.2","vb7:24.3","vb7:24.4","vb7:24.5","vb7:24.6"],"kind":"text","text":{"pi":"Kathañca bhikkhu bahiddhā dhammesu dhammānupassī viharati?\nIdha bhikkhu santaṁ vāssa kāmacchandaṁ “atthissa kāmacchando”ti pajānāti, asantaṁ vāssa kāmacchandaṁ “natthissa kāmacchando”ti pajānāti, yathā ca anuppannassa kāmacchandassa uppādo hoti tañca pajānāti, yathā ca uppannassa kāmacchandassa pahānaṁ hoti tañca pajānāti, yathā ca pahīnassa kāmacchandassa āyatiṁ anuppādo hoti tañca pajānāti.\nSantaṁ vāssa byāpādaṁ …pe…\nsantaṁ vāssa thinamiddhaṁ …pe…\nsantaṁ vāssa uddhaccakukkuccaṁ …pe…\nsantaṁ vāssa vicikicchaṁ “atthissa vicikicchā”ti pajānāti, asantaṁ vāssa vicikicchaṁ “natthissa vicikicchā”ti pajānāti, yathā ca anuppannāya vicikicchāya uppādo hoti tañca pajānāti, yathā ca uppannāya vicikicchāya pahānaṁ hoti tañca pajānāti, yathā ca pahīnāya vicikicchāya āyatiṁ anuppādo hoti tañca pajānāti."}},{"id":"vb7:25","sourceIds":["vb7:25.1","vb7:25.2","vb7:25.3","vb7:25.4","vb7:25.5","vb7:25.6","vb7:25.7","vb7:25.8","vb7:25.9"],"kind":"text","text":{"pi":"Santaṁ vāssa satisambojjhaṅgaṁ “atthissa satisambojjhaṅgo”ti pajānāti, asantaṁ vāssa satisambojjhaṅgaṁ “natthissa satisambojjhaṅgo”ti pajānāti, yathā ca anuppannassa satisambojjhaṅgassa uppādo hoti tañca pajānāti, yathā ca uppannassa satisambojjhaṅgassa bhāvanāya pāripūrī hoti tañca pajānāti.\nSantaṁ vāssa dhammavicayasambojjhaṅgaṁ …pe…\nsantaṁ vāssa vīriyasambojjhaṅgaṁ …pe…\nsantaṁ vāssa pītisambojjhaṅgaṁ …pe…\nsantaṁ vāssa passaddhisambojjhaṅgaṁ …pe…\nsantaṁ vāssa samādhisambojjhaṅgaṁ …pe…\nsantaṁ vāssa upekkhāsambojjhaṅgaṁ “atthissa upekkhāsambojjhaṅgo”ti pajānāti, asantaṁ vāssa upekkhāsambojjhaṅgaṁ “natthissa upekkhāsambojjhaṅgo”ti pajānāti, yathā ca anuppannassa upekkhāsambojjhaṅgassa uppādo hoti tañca pajānāti, yathā ca uppannassa upekkhāsambojjhaṅgassa bhāvanāya pāripūrī hoti tañca pajānāti.\nSo taṁ nimittaṁ āsevati bhāveti bahulīkaroti, svāvatthitaṁ vavatthapeti.\nSo taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā ajjhattabahiddhā dhammesu cittaṁ upasaṁharati."}},{"id":"vb7:26","sourceIds":["vb7:26.1","vb7:26.2","vb7:26.3","vb7:26.4","vb7:26.5","vb7:26.6"],"kind":"text","text":{"pi":"Kathañca bhikkhu ajjhattabahiddhā dhammesu dhammānupassī viharati?\nIdha bhikkhu santaṁ vā kāmacchandaṁ “atthi kāmacchando”ti pajānāti, asantaṁ vā kāmacchandaṁ “natthi kāmacchando”ti pajānāti, yathā ca anuppannassa kāmacchandassa uppādo hoti tañca pajānāti, yathā ca uppannassa kāmacchandassa pahānaṁ hoti tañca pajānāti, yathā ca pahīnassa kāmacchandassa āyatiṁ anuppādo hoti tañca pajānāti.\nSantaṁ vā byāpādaṁ …pe…\nsantaṁ vā thinamiddhaṁ …pe…\nsantaṁ vā uddhaccakukkuccaṁ …pe…\nsantaṁ vā vicikicchaṁ “atthi vicikicchā”ti pajānāti, asantaṁ vā vicikicchaṁ “natthi vicikicchā”ti pajānāti, yathā ca anuppannāya vicikicchāya uppādo hoti tañca pajānāti, yathā ca uppannāya vicikicchāya pahānaṁ hoti tañca pajānāti, yathā ca pahīnāya vicikicchāya āyatiṁ anuppādo hoti tañca pajānāti."}},{"id":"vb7:27","sourceIds":["vb7:27.1","vb7:27.2","vb7:27.3","vb7:27.4","vb7:27.5","vb7:27.6","vb7:27.7","vb7:27.8"],"kind":"text","text":{"pi":"Santaṁ vā satisambojjhaṅgaṁ “atthi satisambojjhaṅgo”ti pajānāti, asantaṁ vā satisambojjhaṅgaṁ “natthi satisambojjhaṅgo”ti pajānāti, yathā ca anuppannassa satisambojjhaṅgassa uppādo hoti tañca pajānāti, yathā ca uppannassa satisambojjhaṅgassa bhāvanāya pāripūrī hoti tañca pajānāti.\nSantaṁ vā dhammavicayasambojjhaṅgaṁ …pe…\nsantaṁ vā vīriyasambojjhaṅgaṁ …pe…\nsantaṁ vā pītisambojjhaṅgaṁ …pe…\nsantaṁ vā passaddhisambojjhaṅgaṁ …pe…\nsantaṁ vā samādhisambojjhaṅgaṁ …pe…\nsantaṁ vā upekkhāsambojjhaṅgaṁ “atthi upekkhāsambojjhaṅgo”ti pajānāti, asantaṁ vā upekkhāsambojjhaṅgaṁ “natthi upekkhāsambojjhaṅgo”ti pajānāti, yathā ca anuppannassa upekkhāsambojjhaṅgassa uppādo hoti tañca pajānāti, yathā ca uppannassa upekkhāsambojjhaṅgassa bhāvanāya pāripūrī hoti tañca pajānāti.\nEvaṁ bhikkhu ajjhattabahiddhā dhammesu dhammānupassī viharati ātāpī sampajāno satimā vineyya loke abhijjhādomanassaṁ."}},{"id":"vb7:28","sourceIds":["vb7:28.1","vb7:28.2","vb7:28.3","vb7:28.4","vb7:28.5","vb7:28.6"],"kind":"text","text":{"pi":"“Anupassī”ti.\nTattha katamā anupassanā?\nYā paññā pajānanā …pe… amoho dhammavicayo sammādiṭṭhi—\nayaṁ vuccati “anupassanā”.\nImāya anupassanāya upeto hoti samupeto upāgato samupāgato upapanno sampanno samannāgato.\nTena vuccati “anupassī”ti."}},{"id":"vb7:29","sourceIds":["vb7:29.1","vb7:29.2","vb7:29.3"],"kind":"text","text":{"pi":"“Viharatī”ti.\nIriyati vattati pāleti yapeti yāpeti carati viharati.\nTena vuccati “viharatī”ti."}},{"id":"vb7:30","sourceIds":["vb7:30.1","vb7:30.2","vb7:30.3","vb7:30.4","vb7:30.5","vb7:30.6"],"kind":"text","text":{"pi":"“Ātāpī”ti.\nTattha katamo ātāpo?\nYo cetasiko vīriyārambho …pe… sammāvāyāmo—\nayaṁ vuccati “ātāpo”.\nIminā ātāpena upeto hoti …pe… samannāgato.\nTena vuccati “ātāpī”ti."}},{"id":"vb7:31","sourceIds":["vb7:31.1","vb7:31.2","vb7:31.3","vb7:31.4","vb7:31.5","vb7:31.6"],"kind":"text","text":{"pi":"“Sampajāno”ti.\nTattha katamaṁ sampajaññaṁ?\nYā paññā pajānanā …pe… amoho dhammavicayo sammādiṭṭhi—\nidaṁ vuccati “sampajaññaṁ”.\nIminā sampajaññena upeto hoti …pe… samannāgato.\nTena vuccati “sampajāno”ti."}},{"id":"vb7:32","sourceIds":["vb7:32.1","vb7:32.2","vb7:32.3","vb7:32.4","vb7:32.5","vb7:32.6"],"kind":"text","text":{"pi":"“Satimā”ti.\nTattha katamā sati?\nYā sati anussati …pe… sammāsati—\nayaṁ vuccati “sati”.\nImāya satiyā upeto hoti …pe… samannāgato.\nTena vuccati “satimā”ti."}},{"id":"vb7:33","sourceIds":["vb7:33.1","vb7:33.2","vb7:33.3","vb7:33.4","vb7:33.5","vb7:33.6","vb7:33.7","vb7:33.8","vb7:33.9","vb7:33.10","vb7:33.11","vb7:33.12","vb7:33.13"],"kind":"text","text":{"pi":"“Vineyya loke abhijjhādomanassan”ti.\nTattha katamo loko?\nTeva dhammā loko.\nPañcapi upādānakkhandhā loko.\nAyaṁ vuccati “loko”.\nTattha katamā abhijjhā?\nYo rāgo sārāgo …pe… cittassa sārāgo—\nayaṁ vuccati “abhijjhā”.\nTattha katamaṁ domanassaṁ?\nYaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—\nidaṁ vuccati “domanassaṁ”.\nIti ayañca abhijjhā idañca domanassaṁ imamhi loke vinītā honti paṭivinītā santā samitā vūpasantā atthaṅgatā abbhatthaṅgatā appitā byappitā sositā visositā byantīkatā.\nTena vuccati “vineyya loke abhijjhādomanassan”ti."}},{"id":"vb7:34","sourceIds":["vb7:34.1","vb7:34.2"],"kind":"text","text":{"pi":"Dhammānupassanāniddeso.\nSuttantabhājanīyaṁ."}},{"id":"vb7:35","sourceIds":["vb7:35.0","vb7:35.1","vb7:35.2"],"kind":"text","text":{"pi":"2. Abhidhammabhājanīya\nCattāro satipaṭṭhānā—\nidha bhikkhu kāye kāyānupassī viharati, vedanāsu vedanānupassī viharati, citte cittānupassī viharati, dhammesu dhammānupassī viharati."}},{"id":"vb7:36","sourceIds":["vb7:36.1","vb7:36.2","vb7:36.3","vb7:36.4"],"kind":"text","text":{"pi":"Kathañca bhikkhu kāye kāyānupassī viharati?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ kāye kāyānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:37","sourceIds":["vb7:37.1","vb7:37.2","vb7:37.3","vb7:37.4"],"kind":"text","text":{"pi":"Kathañca bhikkhu vedanāsu vedanānupassī viharati?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ vedanāsu vedanānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:38","sourceIds":["vb7:38.1","vb7:38.2","vb7:38.3","vb7:38.4"],"kind":"text","text":{"pi":"Kathañca bhikkhu citte cittānupassī viharati?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ citte cittānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:39","sourceIds":["vb7:39.1","vb7:39.2","vb7:39.3","vb7:39.4"],"kind":"text","text":{"pi":"Kathañca bhikkhu dhammesu dhammānupassī viharati?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ dhammesu dhammānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:40","sourceIds":["vb7:40.1","vb7:40.2","vb7:40.3","vb7:40.4"],"kind":"text","text":{"pi":"Tattha katamaṁ satipaṭṭhānaṁ?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ dhammesu dhammānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:41","sourceIds":["vb7:41.1","vb7:41.2"],"kind":"text","text":{"pi":"Cattāro satipaṭṭhānā—\nidha bhikkhu kāye kāyānupassī viharati, vedanāsu vedanānupassī viharati, citte cittānupassī viharati, dhammesu dhammānupassī viharati."}},{"id":"vb7:42","sourceIds":["vb7:42.1","vb7:42.2","vb7:42.3","vb7:42.4","vb7:42.5","vb7:42.6"],"kind":"text","text":{"pi":"Kathañca bhikkhu kāye kāyānupassī viharati?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ kāye kāyānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:43","sourceIds":["vb7:43.1","vb7:43.2","vb7:43.3","vb7:43.4","vb7:43.5","vb7:43.6"],"kind":"text","text":{"pi":"Kathañca bhikkhu vedanāsu vedanānupassī viharati?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ vedanāsu vedanānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:44","sourceIds":["vb7:44.1","vb7:44.2","vb7:44.3","vb7:44.4","vb7:44.5","vb7:44.6"],"kind":"text","text":{"pi":"Kathañca bhikkhu citte cittānupassī viharati?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ citte cittānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:45","sourceIds":["vb7:45.1","vb7:45.2","vb7:45.3","vb7:45.4","vb7:45.5","vb7:45.6"],"kind":"text","text":{"pi":"Kathañca bhikkhu dhammesu dhammānupassī viharati?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ dhammesu dhammānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:46","sourceIds":["vb7:46.1","vb7:46.2","vb7:46.3","vb7:46.4","vb7:46.5","vb7:46.6"],"kind":"text","text":{"pi":"Tattha katamaṁ satipaṭṭhānaṁ?\nIdha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.\nIme dhammā kusalā.\nTasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—\nidaṁ vuccati “satipaṭṭhānaṁ”.\nAvasesā dhammā satipaṭṭhānasampayuttā."}},{"id":"vb7:47","sourceIds":["vb7:47.1"],"kind":"text","text":{"pi":"Abhidhammabhājanīyaṁ."}},{"id":"vb7:48","sourceIds":["vb7:48.0","vb7:48.1","vb7:48.2"],"kind":"text","text":{"pi":"3. Pañhāpucchaka\nCattāro satipaṭṭhānā—\nidha bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ, vedanāsu vedanānupassī viharati ātāpī sampajāno satimā vineyya loke abhijjhādomanassaṁ, citte cittānupassī viharati ātāpī sampajāno satimā vineyya loke abhijjhādomanassaṁ, dhammesu dhammānupassī viharati ātāpī sampajāno satimā vineyya loke abhijjhādomanassaṁ."}},{"id":"vb7:49","sourceIds":["vb7:49.1"],"kind":"text","text":{"pi":"Catunnaṁ satipaṭṭhānānaṁ kati kusalā, kati akusalā, kati abyākatā …pe… kati saraṇā, kati araṇā?"}},{"id":"vb7:50","sourceIds":["vb7:50.0","vb7:50.1","vb7:50.2","vb7:50.3","vb7:50.4","vb7:50.5","vb7:50.6","vb7:50.7","vb7:50.8","vb7:50.9","vb7:50.10","vb7:50.11","vb7:50.12","vb7:50.13","vb7:50.14","vb7:50.15","vb7:50.16","vb7:50.17","vb7:50.18","vb7:50.19","vb7:50.20","vb7:50.21","vb7:50.22"],"kind":"text","text":{"pi":"3.1. Tika\nSiyā kusalā, siyā abyākatā …pe….\nSiyā sukhāya vedanāya sampayuttā, siyā adukkhamasukhāya vedanāya sampayuttā.\nSiyā vipākā siyā vipākadhammadhammā.\nAnupādinnaanupādāniyā.\nAsaṅkiliṭṭhaasaṅkilesikā.\nSiyā savitakkasavicārā, siyā avitakkavicāramattā, siyā avitakkaavicārā.\nSiyā pītisahagatā, siyā sukhasahagatā, siyā upekkhāsahagatā.\nNeva dassanena na bhāvanāya pahātabbā.\nNeva dassanena na bhāvanāya pahātabbahetukā.\nSiyā apacayagāmino, siyā nevācayagāmināpacayagāmino.\nSiyā sekkhā, siyā asekkhā.\nAppamāṇā.\nAppamāṇārammaṇā.\nPaṇītā.\nSiyā sammattaniyatā, siyā aniyatā.\nNa maggārammaṇā, siyā maggahetukā, siyā maggādhipatino, siyā na vattabbā “maggahetukā”tipi, “maggādhipatino”tipi.\nSiyā uppannā, siyā anuppannā, siyā uppādino.\nSiyā atītā, siyā anāgatā, siyā paccuppannā.\nNa vattabbā “atītārammaṇā”tipi, “anāgatārammaṇā”tipi, “paccuppannārammaṇā”tipi.\nSiyā ajjhattā, siyā bahiddhā, siyā ajjhattabahiddhā.\nBahiddhārammaṇā.\nAnidassanaappaṭighā."}},{"id":"vb7:51","sourceIds":["vb7:51.0","vb7:51.1","vb7:51.2","vb7:51.3","vb7:51.4","vb7:51.5","vb7:51.6"],"kind":"text","text":{"pi":"3.2. Duka\nNa hetū.\nSahetukā.\nHetusampayuttā.\nNa vattabbā hetū ceva sahetukā cāti, sahetukā ceva na ca hetū.\nNa vattabbā hetū ceva hetusampayuttā cāti, hetusampayuttā ceva na ca hetū.\nNa hetū sahetukā."}},{"id":"vb7:52","sourceIds":["vb7:52.1","vb7:52.2","vb7:52.3","vb7:52.4","vb7:52.5","vb7:52.6","vb7:52.7","vb7:52.8","vb7:52.9","vb7:52.10","vb7:52.11","vb7:52.12","vb7:52.13","vb7:52.14","vb7:52.15","vb7:52.16","vb7:52.17","vb7:52.18","vb7:52.19","vb7:52.20","vb7:52.21","vb7:52.22","vb7:52.23","vb7:52.24","vb7:52.25","vb7:52.26","vb7:52.27","vb7:52.28","vb7:52.29","vb7:52.30","vb7:52.31","vb7:52.32","vb7:52.33","vb7:52.34","vb7:52.35","vb7:52.36","vb7:52.37","vb7:52.38","vb7:52.39"],"kind":"text","text":{"pi":"Sappaccayā.\nSaṅkhatā.\nAnidassanā.\nAppaṭighā.\nArūpā.\nLokuttarā.\nKenaci viññeyyā, kenaci na viññeyyā.\nNo āsavā.\nAnāsavā.\nĀsavavippayuttā.\nNa vattabbā “āsavā ceva sāsavā cā”tipi, “sāsavā ceva no ca āsavā”tipi.\nNa vattabbā “āsavā ceva āsavasampayuttā cā”tipi, “āsavasampayuttā ceva no ca āsavā”tipi.\nĀsavavippayuttā.\nAnāsavā.\nNo saṁyojanā …pe…\nno ganthā …pe…\nno oghā …pe…\nno yogā …pe…\nno nīvaraṇā …pe…\nno parāmāsā …pe…\nsārammaṇā.\nNo cittā.\nCetasikā.\nCittasampayuttā.\nCittasaṁsaṭṭhā.\nCittasamuṭṭhānā.\nCittasahabhuno.\nCittānuparivattino.\nCittasaṁsaṭṭhasamuṭṭhānā.\nCittasaṁsaṭṭhasamuṭṭhānasahabhuno.\nCittasaṁsaṭṭhasamuṭṭhānānuparivattino.\nBāhirā.\nNo upādā.\nAnupādinnā.\nNo upādānā …pe…\nno kilesā …pe…\nna dassanena pahātabbā, na bhāvanāya pahātabbā.\nNa dassanena pahātabbahetukā.\nNa bhāvanāya pahātabbahetukā."}},{"id":"vb7:53","sourceIds":["vb7:53.1","vb7:53.2","vb7:53.3","vb7:53.4","vb7:53.5","vb7:53.6","vb7:53.7","vb7:53.8","vb7:53.9","vb7:53.10","vb7:53.11","vb7:53.12","vb7:53.13","vb7:53.14"],"kind":"text","text":{"pi":"Siyā savitakkā, siyā avitakkā.\nSiyā savicārā, siyā avicārā.\nSiyā sappītikā, siyā appītikā.\nSiyā pītisahagatā, siyā na pītisahagatā.\nSiyā sukhasahagatā, siyā na sukhasahagatā.\nSiyā upekkhāsahagatā, siyā na upekkhāsahagatā.\nNa kāmāvacarā.\nNa rūpāvacarā.\nNa arūpāvacarā.\nApariyāpannā.\nSiyā niyyānikā, siyā aniyyānikā.\nSiyā niyatā, siyā aniyatā.\nAnuttarā.\nAraṇāti."}},{"id":"vb7:54","sourceIds":["vb7:54.1"],"kind":"text","text":{"pi":"Pañhāpucchakaṁ."}},{"id":"vb7:55","sourceIds":["vb7:55.1"],"kind":"text","text":{"pi":"Satipaṭṭhānavibhaṅgo niṭṭhito."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/vb7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}